1. ¿Tleka Jehová amo mokuayejyekoua oksekimej okachi kuali itlaj kichiuaj uan tejuan amo?

JEHOVÁ tinochtin techtlasojtla. Ijkon tikmatij porque tlatlamantli tlen okichijchi, xochitl, yolkamej uan tejuan. Amikaj ijkon ken tejuan, Jehová tlatlamantli otechchijchi uan kita tlen tikpiaj itech toyolo, ye kuali techixmatij (1 Sam. 16:7). Noijki ye kimati tlen kuali tikchiuaj uan tlen amo, kimati ken otechiskaltijkej, ik non, ye techiluia tlen uelis tikchiuaskej. Ma timokuayejyekokan ken ye techita. Tla ijkon tikchiuaj, tikteititiskej kuali timokuayejyekouaj uan ijkon amo tikijtoskej tejuan okachi kuali itlaj tikchiuaj noso amo (Rom. 12:3).

2. ¿Tleka amo kuali ma timokuayejyekokan tejuan tikmatij itlaj tikchiuaj uan amo oksekimej?

² Amo tlajtlakoli tla tikitaj se tokni kimati kuali tetlapouis (Heb. 13:7). Non techpaleuis kuali ma tikmatikan ken titetlapouiskej (Filip. 3:17). Pero amo kuali tla tikijtoskej ye okachi kuali tlamachtia uan tejuan amo. Tla timokuayejyekouaj oksekimej okachi itlaj kimatij, uelis titenexikolitaskej, timoyolkokoskej noso hasta tikmachiliskej amitlaj topati. Itech okse tlamachtil otikitakej amo ma timokuayejyekokan tejuan okachi itlaj tikmatij tikchiuaskej uan amo tokniuan, tla ijkon tikchiuaj uelis kichiuas ayakmo ma timouikakan iuan Jehová. Ik non, ye techiluia: “Tla tikmachiliah kuali tiyeknemih, matipakikah iwa amo matikimitakah kox kuali noso amo kuali tlan kichiwah oksikimeh” (Gál. 6:4).

3. ¿Tlen yotikchijkej para tiktekichiuiliskej Jehová?

³ Jehová kineki ma tiyolpakikan ika nochi tlen yotikchijkej  para tikueyichiuaskej. Tla yotimoapolaktijkej, ma tiyolpakikan porque otikchijkej miak tlamantli para ijkon tikchiuaskiaj. Sejse otikpejpenkej ijkon tikchiuaskej porque tiktlasojtlaj Jehová. Ma timokuayejyekokan ken yotikpatlakej tonemilis. Axkan okachi tiyolpakij tiktlajtoltiskej Biblia. Xamo axkan okachi timotlatlaujtiaj ika nochi toyolo (Sal. 141:2). Xamo okachi amo oui ikaj tiktlapouiskej uan tikmatij tiktekitiltiaj tlen ika titlamachtiaj. Xamo Jehová yotechpaleui okachi kuali ma timouikakan iuan tosiua, tonamik uan tokoneuan. Uelis tiyolpakiskej porque axkan okachi yotikchijkej miak tlamantli.

4. ¿Tlen timomachtiskej?

⁴ Uelis tikinpaleuiskej oksekimej ma yolpakikan ika tlen kichiuaj para kitekichiuiliskej Jehová uan amo ma mokuayejyekokan oksekimej okachi kimatij kichiuaskej miak tlamantli uan yejuan amo. Itech nin tlamachtil tikitaskej ken tetajmej uelis kinpaleuiskej inkoneuan, ken uelis mopaleuiskej akinmej yomonamiktijkej uan ken tlayekankej uan oksekimej tokniuan tlen inmiuan monechikouaj uelis mopaleuiskej. Saiktlami tikitaskej seki principios bíblicos tlen techpaleuiskej ma timokuayejyekokan ken moneki maski titlatlamantin tikmatij itlaj tikchiuaskej.

5. Ijkon ken kijtoua Efesios 6:4, ¿tlen amo moneki kichiuaskej tetajmej?

⁵ Tetajmej amo ma kinmiluikan se inkone okachi kimati itlaj kichiuas. Non uelis kichiuas amo kuali ma momachili okse inkone (xiktlajtolti Efesios 6:4). Se tokni tlen itoka Sachiko * okijto: “Akinmej onechmachtiayaj okinekiayaj ma nikpia okachi kuali calificaciones, amo ken oksekimej. Noijki nonantsin okinekiaya kuali ma nimomachti porque ijkon notajtsin akin amo okatka iTlaixpantijka Jehová uan akinmej onechmachtiayaj kuali tlajtoskiaj itech ialtepe Jehová. Amo okinekiaya nion se tepitsin ma nimotlapololti itech exámenes pero amo ijkon opanok. Yiuejkika ayakmo nio escuela, nimokuayejyekoua maski nimochijchikaua niktekichiuilis Jehová ye amo kipatioita”.

6. ¿Tlen uelis momachtiskej tetajmej tlen kijtoua Salmo 131:1, 2?

 ⁶ Tetajmej uelis momachtiskej seki tlamantli ipati tlen kijtoua Salmo 131:1, 2 (xiktlajtolti). Tekiua David okijto amo omokuayejyeko itlaj miak ipati kipiaskia nion okinekiaya tlen amo keman uelis kipiaskia. Okatka yolyamanki, ik non, oyolpakiaya uan kuali omomachiliaya. Nin kinmachtia tetajmej uelis yetoskej yolyamankej, amo ma mokuayejyekokan inkoneuan kichiuaskej itlaj tlen amo ueliskej nion ma kinmiluikan tlen amo uelis kichiuaskej. Ma kimatokan tetajmej tlen uelij kichiuaj inkoneuan uan tlen amo, ijkon kuali momachiliskej ika tlen uelis kichiuaskej. Se tokni tlen itoka Marina okijto: “Nonantsin amo keman okijto ne amitlaj ueli onikchiuaya uan nokniuan kema nion okijtouaya oksekimej konemej okachi okimatiayaj uan ne amo. Onechmachti tlatlamantli uelis tikchiuaskej uan Jehová tinochtin techtlasojtla. Ye onechpaleui amo keman ma nimokuayejyeko oksekimej okachi okimatiayaj itlaj kichiuaskej uan ne amo”.

7, 8. ¿Ken uelis tokniuan kintlakaitaskej insiua?

⁷ Tokniuan moneki kitlakaitaskej insiua (1 Ped. 3:7). ¿Ken uelis kichiuaskej? Moneki kitlasojtlaskej uan amo ma kiluikan ma kichiua tlen amo uelis uan amo ma kiluikan oksekimej siuamej okachi kimatij itlaj kichiuaskej uan ye amo. ¿Tlen uelis panos tla ijkon kichiuaj? Ma tikitakan tlen okipanok se tokni tlen itoka Rosa. Inamik amo iTlaixpantijka Jehová uan nochipa kiluia oksekimej siuamej okachi kimatij itlaj kichiuaskej uan ye amo. Inamik nochipa ijkon kiluia uan ye momachilia amitlaj ipati uan mokuayejyekoua kox ikaj kitlasojtla. Ye okijto: “Moneki nochipa nechilnamiktiskej Jehová nechtlasojtla”. Pero tokniuan kema kintlasojtlaj insiua, ijkon kuali iuan mouikaj uan noijki iuan Jehová. *

⁸ Tokniuan kintlakaitaj insiua, kinmiluiaj oksekimej tlen kuali kichiua, kiluiaj kitlasojtlaj (Prov. 31:28). Ijkon okichi inamik Katerina. Itech okse tlamachtil otikijtojkej tlen okipanouaya. Ijkuak ye okatka tsikitsin, inantsin amo okitlasojtlaya uan okijtouaya oksekimej takotsitsintin uan iyolikniuan okachi okimatiayaj itlaj kichiuaskej uan ye amo. Ik non, Katerina maski yokixmatiaya Jehová opejki mokuayejyekoua oksekimej okachi okimatiayaj itlaj kichiuaskej uan ye amo. Pero inamik nochipa kipaleuia amo ijkon ma mokuayejyeko. Ye okijto: “Nonamik nechtlasojtla, nechiluia tlen kuali nikchiua uan kiluia Jehová ma nechpaleui. Noijki nechilnamiktia Jehová kipia kualtsin iyelis uan noijki nechpaleuia ayakmo ma nimokuayejyeko tlen amo moneki”.

9, 10. ¿Ken okipaleuijkej tlayekankej tokni Hanuni?

⁹ ¿Ken uelis kinpaleuiskej tlayekankej akinmej mokuayejyekouaj oksekimej okachi kimatij itlaj kichiuaskej? Ma tikitakan tlen okipanok se tokni tlen itoka Hanuni, ijkuak okatka takotsin amo keman okiluijkej itlaj kuali okichiuaya. Ye okijto: “Onipinauaya uan onimokuayejyekouaya oksekimej konemej okachi okimatiaya itlaj kichiuaskej. Ok nikilnamiki nochipa ijkon onimokuayejyekouaya”. Maski omochi iTlaixpantijka Jehová, Hanuni ok ijkon omokuayejyekouaya. Non okichiuaya ma mokuayejyeko amo otlapaleuiaya  itech tlanechikol. Pero axkan precursora uan yolpaki. ¿Tlen okipaleui ayakmo ijkon ma mokuayejyeko?

¹⁰ Hanuni okijto tlayekankej okipaleuijkej uan okitlasojtlakej. Yejuan okiluijkej kuali otlapaleuiaya itech tlanechikol uan kuali okitekichiuiliaya Jehová. Ye okijto: “Tlayekankej onechiluijkej ma nikinyolchikaua oksekimej tokniuan siuamej. Ijkon onikitak uelis nitlapaleuiskia. Nikilnamiki ijkuak tokniuan tlayekankej onechtlasojkamatilijkej porque onikinyolchika tokniuan ichpokamej uan onechtlajtoltilijkej 1 Tesalonicenses 1:2 uan 3. Non oajsik itech noyolo. Tokniuan tlayekankej onechyolchikajkej, ijkon onikajsikamatki uelis nikinpaleuiskia tokniuan tlen inmiuan nimonechikoua”.

11. ¿Ken uelis tikinpaleuiskej tokniuan tlen “yolpatlachitokej” ijkon ken ijkuilitok Isaías 57:15?

¹¹ (Xiktlajtolti Isaías 57:15). Jehová kita ken kinpaleuis akinmej “yolpatlachitokej”. Amo san tlayekankej moneki kinyolchikauaskej tokniuan akinmej ijkon momachiliaj, tinochtin uelis ijkon tikchiuaskej. Uelis tikinmititiskej tiknekij tikinpaleuiskej. Jehová kineki ma tikinmititikan ye kintlasojtla (Prov. 19:17). Noijki tikinpaleuiskej tla tiyolyamankej uan amo ma tikteititikan tejuan nochi tikmatij tikchiuaskej. Amo tiknekij oksekimej san ma techitakan tlen okachi tikmatij tikchiuaskej porque amo tiknekij ma tenexikolitakan tokniuan. Ma tikinyolchikauakan ika tlen tikmatij (1 Ped. 4:10, 11).

12. ¿Tleka miakej okinpaktiaya yetoskej iuan Jesús? (Xikita dibujo tlen kajki itech página 1).

¹² Uelis timomachtiskej miak tlamantli tla tikitaj tlen okichi Jesús iuan imachtijkauan. Amikaj okatka ken yeporque okatka ‘yolyámanki iwa oteiknomatiayah’ (Mat. 11:28-30). Maski okatka ixtlamatki amo omoueyinekiaya. Amo oui otlamachtiaya uan okijtouaya itlaj tlen oajsiaya itech inyolo akinmej yolyamankej (Luc. 10:21). Akinmej okintlapouiaya Jesús okinmachti toTajtsin Dios okintlasojtlaya pero tlayekankej judíos amo ijkon otlamachtiayaj (Juan 6:37). Nochtin nochipa okintlakaitaya Jesús.

13. ¿Ken okiteititi Jesús okintlasojtlak imachtijkauan?

¹³ Jesús okintlasojtlak imachtijkauan. Ye okimatiaya nochtin oueliayaj tlatlamantli itlaj kichiuaskej. Ik non, amo nochtin uelij okichiuayaj seki tlamantli para okachi kitekichiuiliskiaj Jehová. Pero Jesús okipatioitaya omochijchikauayaj kitekichiuiliskej Jehová ika nochi inyolo. Ijkon okiteititi ijkuak okijto se tlakatl sejse itlakeual okikajteuili seki tekitl ijkon ken yejuan ‘weletis kitekitiltiskiahʼ. Se itlakeual okachi okitlanki pero ome intlakeualuan okinmilui: “Kuali otikchi, te kuali tlakéwale iwa titetlakitak” (Mat. 25:14-23).

14. ¿Ken uelis tikchiuaskej ken Jesús?

¹⁴ Jesús noijki techtlasojtla. Kimati tlatlamantli tekitl uelis tikchiuaskej uan yolpaki ijkuak kita timochijchikauaj tikchiuaskej tlen tiuelij. ¿Ken uelis tikchiuaskej ken ye? Amo tiknekij nion se tokni ma momachili amitlaj ipati nion amo tiknekij ma pinaua porque amo ueli kichiua ken oksekimej. Nochipa ma tiktlasojkamatilikan porque mochijchikaua kitekichiuilia Jehová.

15, 16. ¿Tlen okipaleui tokni Midori para mokuayejyekos tlen uelis kichiuaskia?

¹⁵ Tla timokuayejyekouaj ken okachi uelis tiktekichiuiliskej Jehová, techpaleuia  ma tiyolpakikan. Pero ma timokuayejyekokan tlen uelis tikchiuaskej uan amo tlen oksekimej kema uelij kichiuaj, tlamo timosotlauaskej uan timoyolkokoskej (Lucas 14:28). Ma tikitakan tlen okichi se precursora tlen itoka Midori.

¹⁶ Ijkuak Midori okatka takotsin itajtsin tlen amo iTlaixpantijka Jehová okipinauiaya uan okijtouaya ikniuan uan akinmej inmiuan omomachtiaya okachi kuali itlaj okichiuayaj uan ye amo. Ye okijto: “Onikmachiliaya amitlaj nopati”. Pero ijkuak omoskalti kuali omomachili. Ye okijto: “Mojmostla oniktlajtoltiaya Biblia porque non onechpaleuiaya kuali ma nimomachili uan onikmachiliaya Jehová onechtlasojtlaya”. Noijki okijto tlen okseki uelis kichiuaskia para okachi kitekichiuiliskia Jehová uan okitlatlaujti ma kipaleui. Ijkon oyolpakik porque okitak ken okachi uelis kitekichiuiliskia.

17. ¿Ken ‘tikyankuiliskej totlalnamikilis’?

¹⁷ Amo san niman uelis timokuayejyekoskej ken moneki. Ik non, Jehová techiluia: “Moneki anmoyankuiliskej [...] ipan namotlalnamikilis” (Efes. 4:23, 24, Itlajtol totajtzin Dios [NHY]). Ik non, moneki timotlatlaujtiskej, timomachtiskej iTlajtol toTajtsin Dios uan itech timokuayejyekoskej. Nochipa ijkon ma tikchiuakan uan ma tiktlatlaujtikan Jehová ma techpaleui. Iespíritu santo techpaleuis amo ma timokuayejyekokan oksekimej okachi kimatij itlaj kichiuaskej uan tejuan amo. Noijki techpaleuis ma tikitakan tla timoueyinekij noso titenexikolitaj uan noijki techpaleuis ayakmo ijkon ma timokuayejyekokan.

18. ¿Ken mitsyolchikaua tlen kijtoua 2 Crónicas 6:29, 30?

¹⁸ (Xiktlajtolti 2 Crónicas 6:29, 30).  Jehová kixmati toyolo. Noijki kimati moneki timochijchikajtoskej para amo timokuayejyekoskej ken akinmej amo kixmatij uan noijki kimati titlajtlakolejkej. Ijkuak kita timochijchikauaj para amo timokuayejyekoskej tlen amo kuali, ye okachi techtlasojtla.

19. ¿Ken techititia Jehová sapanoua techtlasojtla?

¹⁹ Jehová techititia techtlasojtla ijkon ken se siuatl kitlasojtla ikonetsin (Is. 49:15). Se tokni tlen itoka Rachel okijto: “Notakotsin Stephanie oneski ijkuak ok opoliuiaya nesiskia. Ijkuak yikin onikitak omotaya sapanoua tsikitsin. Se metstli okatka itech se incubandora pero tepajti onechkauili mojmostla ma niknapalo notakotsin. Non onechpaleui nochipa ma nikneki niyetos iuan nokone. Maski yikipia chikuase xiuitl amo mota ueyi ken oksekimej konemej pero sapanoua niktlasojtla uan sapanoua niyolpaki yoltok”. Ijkuak Jehová kita timochijchikauaj kuali tiktekichiuiliskej, ye sapanoua techtlasojtla. ¡Non techyolchikaua!

20. ¿Tleka uelis tiyolpakiskej?

²⁰ Jehová sapanoua mitstlasojtla uan kita amo onka okse ken te itech ialtepe. Jehová otechyoltitlanki pero amo porque okitak tejuan okachi tikmatij itlaj tikchiuaskej uan amo oksekimej. Ye okitak tlen tikpiaj itech toyolo uan okitak tiyolyamankej uan otiknekej ma techmachti uan ma techpaleui ma tikpiakan tonemilis ken ye kineki (Sal. 25:9). Uelis tikneltokaskej ye yolpaki ijkuak timochijchikauaj tiktekichiuiliskej. Tla nochipa tiktlakamatij Jehová uan tikxikouaj miak tlamantli, tikteititiskej tikpiaj ‘kuali toyoloʼ (Luc. 8:15). Ik non, ma timochijchikajtokan okachi kuali ma tiktekichiuilikan Jehová. Tla ijkon tikchiuaj, tiyolpakiskej ika tlen tejuan ueli tikchiuaj.