1. ¿Tleka Jehová xsan kitstika tla xueli tikchiuaj tlen oksekimej ueli kichiuaj?

JEHOVÁ kuelita ika tinochimej matitlatlamantikej noso matisejsenekamej. Yejon kuajli tikitaj ipan nochi tlen okichijchiuj, hasta ipan tlaltikpakchanejkej. Se tlaltikpakchane xsan noijki tlachia noso kichiua ken okse tlaltikpakchane, ika yejon, Jehová xsan kitstika tla xueli tikchiuaj tlen oksekimej ueli kichiuaj. Yejua kita tlenon tikpiyaj ipan toyojlo niman kenon titlanemiliaj (1 Sam. 16:7). Noijki kimati tlenon ueli tikchiuaj, tlenon xueli tikchiuaj niman tlenon topan yonochiuj. Jehová xtechtlajtlanilia matikchiuakan tlen kimati ika xtiuelij. Noneki topatiojkaitaskej ijkon ken yejua techpatiojkaita. Tla ijkon tikchiuaj, tikteititiskej ika kuajli tiktekitiltiaj totlamachilis niman xtoueyimatiskej nion xtiknemiliskej ika xtlaj ika titepaleuijkej (Rom. 12:3).

2. ¿Tlenon xnoneki tikchiuaskej ijkuak tikitaskej tlen oksekimej kichiuaj?

² Yejuin xkijtosneki tla xnoneki tikitaskej kenon kuajli tenojnotsa se tokniuj (Heb. 13:7). Pampa tla tikitaj tlen kichiua, techpaleuis más kuajli matitenojnotsakan (Filip. 3:17). Kuakon, ¿tlenon xnoneki tikchiuaskej? Xnoneki san tikitstoskej tlen kichiuaj oksekimej para tikijtoskej ika tejuamej más ueli itlaj tikchiuaj noso xtlaj ueli tikchiuaj. Pampa tla ijkon titlanemiliaj uelis peuas titenexikolitaskej, toyolajmanaskej noso hasta tiknemiliskej ika xtlaj ika titepaleuijkej. Ijkon ken otikitakej ipan okse tlamachtijli, tla tejuamej totlatlanij imiuan tokniuan uelis kichiuas maka ok matouikakan iuan Jehová. Pampa Jehová  melak techtlasojtla, yejuin tlen techijlia ipan Gálatas 6:4: “Cada se sano yejua ma notlat[l]ata tla kuajli nouika. Tla kuajli nouika ipan inemilis, pakis niman xnoneki kinemilis ika yejua más ueyixtikaj xken okse tlakatl”.

3. Itech nochi tlen yotikchiuj ipan ikalpan toTajtsin, ¿tlenon más mitsyolpaktia?

³ Jehová kineki matiyolpakikan ipampa nochi tlen yotikchiujkej para tikueyichiuaskej. San matikonnemilikan yejuin, tla tejuamej kemach otoapolaktijkej, melak tiyolpakij pampa ouel ijkon otikchiujkej, yejuin itlaj tlen san toselti otiktlapejpenijkej pampa melak tiktlasojtlaj Jehová. Kanaj aman miyek tlemach yotikchiujkej, kanaj más tikuelitaj tikamapouaskej niman tomachtiskej Biblia, kanaj ijkuak tiknotsaj toTajtsin aman tikijliaj nochi tlen tikmachiliaj (Sal. 141:2). Kanaj más kuajli ititenojnotsaj niman kuajli tikintekitiltiaj toamatlajkuiloluan. Kanaj yotikitakej ika Jehová yotechpaleui kuajli matouikakan iuan toixnamik niman kuajli matikinyekanakan tokoneuan. Tiyolpakij ipampa nochi tlen youel yotikchiujkej.

4. ¿Tlenon tikitaskej ipan yejuin tlamachtijli?

⁴ Uelis tikinpaleuiskej tokniuan mayolpakikan ipampa nochi tlen ueli kichiuaj ipan ikalpan Jehová niman maka san makitstokan tlen oksekimej kichiuaj. Ipan yejuin tlamachtijli, tikitaskej kenon tajtin uelis kinpaleuiskej inkoneuan, kenon akin yononamiktijkej uelis san no yejuamej nopaleuiskej niman kenon tlayekankej niman akin nemij ipan se tlanechikojli uelis nopaleuiskej. Noijki, tikimitaskej seki textos tlen techpaleuiskej matikchiuakan hasta kampa tiuelij ipan ikalpan toTajtsin.

5. Ken kijtoua Efesios 6:4, ¿tlenon xnoneki kichiuaskej tajtin?

⁵ Tajtin xsan noneki kitstoskej tla inkoneuj ueli noso xueli kichiua itlaj ijkon ken oksekimej nion xnoneki kitlajtlaniliskej makichiua itlaj tlen yejua xueli. Pampa tla ijkon kichiuaj, san kinkualaniskej inkoneuan (xpoua Efesios 6:4). Se tokniuj siuatl, akin itoka Sachiko, * kijtoua: “Nomaestros nochipa kichiayaj manikintlani akin imiuan ninomachtiaya. Niman nonan nechijliaya ika kinekiya kuajli manikinkixti nocalificaciones pampa kinekiya ika nomaestros niman notaj, akin xnomachtia Biblia, kuajli matlajtokan itech iteixpantijkauan Jehová. Nion xkinekiya maninopopolo ipan noexámenes. ¡Melak ouijtika tlen  nechtlajtlaniliaya! Maski youejkauj ika onikis ipan escuela, kemantika niknemilia ika maski ninokojtilia niktekichiuilis Jehová, xkeman nikyolpaktis”.

6. ¿Tlenon kimititia tajtin tlen kijtoua Salmo 131:1, 2?

⁶ Tajtin uelis kinpaleuis tlen kijtoua Salmo 131:1, 2 (xpoua). Tekiuaj David okijto: “Xitlaj nikneki nikchiuas yejuan sanoyej ueyi kijtosneki, itlaj yejuan xnejua nechtocaroua nikchiuas”. Pampa David yolyemanki katka niman kimatstoya ika xnochi ueliya kichiuaya, yejua yolseujtoya niman ika iyojlo nemiya. Yejuin kimititia tajtin ika yejuamej noneki yolyemankej yeskej niman kasikamatiskej ika xnochi ueli kichiuaj, niman ika inkoneuan noijki xuelis nochi kichiuaskej. Ijkuak yejuamej kinnauatiskej inkoneuan itlaj makichiuakan noso kenon más kuajli kitekichiuiliskej toTajtsin, noneki kitaskej tlenon uelij kichiuaj niman tlenon xuelij kichiuaj. Tokniuj Marina kijtoua: “Nonan xkeman onechijli ika nonekiya nikchiuas tlen nokniuan niman oksekimej kokonej kichiuayaj. Onechititi ika tinochimej titlatlamantikej niman ika tinochimej techtlasojtla Jehová. Yejuin yonechpaleui maka san manikitsto kenon oksekimej kichiuaj tlen nejua xniueli”.

7, 8. ¿Kenon se teueuentsin uelis kiteititis ika kitlakaita isiuauj?

⁷ Nochimej tokniuan noneki kitlakaitaskej insiuauj (1 Ped. 3:7). Yejon kijtosneki ika melak noneki kititiskej ika kitlasojtlaj niman ika kitlakaitaj. ¿Kenon uelis ijkon kichiuaskej? Tla kititiaj ika kipatiojkaitaj, tla xkijliaj makichiua itlaj tlen kimatij ika xuelis niman tla xkijliaj tleka xkichiua ijkon ken oksekimej siuamej. ¿Tlenon uelis panos tla se teueuentsin xijkon kichiua? Matikitakan tlen ipan yonochiuj tokniuj Rosa. Iueuentsin, akin xnomachtia, san nochipa kijlitika tleka yejua xijkon ken oksekimej siuamej. Pampa nochipa ijkon kijlia, Rosa melak noyolkokoua niman kimachilia ika xakaj kitlasojtla. Yejua kijtoua: “Noneki nochipa manechilnamiktijtokan ika Jehová kema nechtlasojtla”. San ika, tokniuan kitlakaitaj insiuauj pampa kimatij ika tla ijkon kichiuaj kuajli nouikaskej iuan insiuauj niman iuan Jehová. *

⁸ Teueuentsitsinuan akin kitlakaitaj insiuauj kijliaj ika kitlasojtlaj, kijliaj tlen kuajli kichiua niman xkeman kitejteneuaj (Prov. 31:28). Yejon tlen okichiuj iueuentsin tokniuj Katerina, akin otikteneujkaj ipan okse tlamachtijli, iueuentsin melak okipaleui más kuajli manomachili. Ijkuak Katerina pitentsin katka, inan xkitlasojtlaya niman nochipa kijliaya tleka xkichiuaya ijkon ken oksekimej ichpokamej noso ken iamigas. Yejua ika, Katerina melak najmanaya ijkuak kitaya ika xueliya kichiuaya tlen oksekimej kema ueliyaj kichiuayaj. Maski yejua yopeujka nomachtia Biblia, ok ijkon tlanemiliaya. San ika, iueuentsin melak kipaleuiya maka ijkon matlanemili. Yejua kijtoua: “Noueuentsin nechtlasojtla, nechijlia ijkuak nikchiua itlaj tlen kuajli niman kichiua teoyotl nopampa. Noijki, nechilnamiktia kenon tlanemilia Jehová niman nechpaleuiya ijkuak xkuajli nitlanemilia”.

9, 10. ¿Kenon tlayekankej okipaleuijkej tokniuj Hanuni?

⁹ ¿Kenon tlayekankej uelis kinpaleuiskej tokniuan akin kimachiliaj ika xtlaj ika tepaleuiyaj pampa xueli kichiuaj tlen oksekimej kema ueli kichiuaj? Matikitakan tlenon ipan onochiuj se tokniuj siuatl akin itoka Hanuni. Ijkuak yejua pitentsin katka, nochipa kijliayaj ika xkeman itlaj kuajli kichiuaya. Yejua kijtoua: “Nejua san nipinauiya niman nikmachiliaya ika nochimej kokonej más tlamachilisejkej katkaj xijkon ken  nejua. Desde yeuejkaui san nikualitstiuj kenon oksekimej ueli kichiuaj tlen nejua xueli nikchiua”. Maski tokniuj Hanuni iiteixpantijkauj Jehová katka, ok ijkon kichiuaya niman kimachiliaya ika xtlaj ika tepaleuiaya ipan tlanechikojli. Aman yejua precursora niman melak yolpaki. ¿Tlenon okipaleui manopatla?

¹⁰ Hanuni kijtoua ika tokniuan tlayekankej melak okipaleuijkej. Tokniuan okititijkej ika itech tlaneltokayaj niman okijlikej ika melak tepaleuijtoya ipan tlanechikojli. Hanuni kijtoua: “Kemantika tlayekankej nechijliayaj manikinyolchikaua oksekimej tokniuan, yejon okichiuj manikmachili ika kema nitepaleui ipan tlanechikojli. Nikilnamiki ika tlayekankej melak onechtlasojkamachilijkej pampa onikinpaleui oksekimej ichpokamej, niman sakin onechpouilijkej 1 Tesalonicenses 1:2, 3. Yejon oajsik ipan noyojlo. Pampa yejuin tokniuan onechpaleuijkej, aman kuajli nikmatstika ika kema nitlapaleuiya ipan ikalpan Jehová”. 

11. ¿Kenon uelis tikinpaleuiskej akin noteneuaj ipan Isaías 57:15?

¹¹ (Xpoua Isaías 57:15). Jehová najmana ipampa “on yejuan yolyemanki niman on yejuan yonoyolpatlak”. Xsan tlayekankej uelis tepaleuiskej, noijki tejuamej uelis tikinpaleuiskej tokniuan akin melak noyolajmanaj. Noneki tikimititiskej ika melauak tiknekij tikinpaleuiskej. Jehová kineki matikimititikan ika melak kintlasojtla (Prov. 19:17). Noijki uelis tikinpaleuiskej tla tiyolyemankej niman tla tikasikamatij ika xueli nochi tikchiuaj. Xnoneki tikchiuaskej ika oksekimej matechueyikaitakan pampa yejon ueliskia kichiuas matechnexikolitakan. Tiknekij tiktekitiltiskej nochi tlen ueli tikchiuaj para tikinyolchikauaskej oksekimej (1 Ped. 4:10, 11).

12. ¿Tleka miyekej kuelitayaj nemiskej iuan Jesús? (Xkita tlaixkopinajli tlen onka ixpan yejuin revista).

¹² Tejuamej uelis tikintlasojtlaskej tokniuan tla tikitaj kenon Jesús okintlasojtlak inomachtijkauan. Maski yejua melak ueyixtoya, yolyemanki katka niman xkeman onoueyimat (Mat. 11:28-30). Yejua xkiteijlitinemiya ika melak tlamachilise katka. Yejua xouijtika ken temachtiaya, niman tlen kiteijliaya ajsiya ipan inyojlo akin kikaktoyaj (Luc. 10:21). Jesús xokichiuj ijkon ken kichiuayaj akin tlayekanayaj ipan tlaneltokiltin, yejua okiteititi ika toTajtsin kema nochimej kinpatiojkaita (Juan 6:37). Niman nochipa okintlakaitak akin xmás kintlakaitayaj.

13. ¿Tleka tikijtouaj ika Jesús okimikneli niman okintlasojtlak inomachtijkauan?

¹³ Jesús okimikneli niman okintlasojtlak inomachtijkauan. Kimatiya ika inomachtijkauan xueliskia san no yejua tekitl kichiuaskiaj, xueliskia san no yejua tekitl kinmakas niman ika xsan noijki ken tenojnotsaskiaj. San ika, Jesús melak kipatiojkaitaya nochi tlen kichiuayaj inomachtijkauan. Tikitaj kenon Jesús melak teasikamati ika tlen okiteneuj ipan Mateo 25:14-23. Ompa otlajto itech se tlakatl akin okinmakateuj tomin sekimej itlakeualuan. Melauak ika se itech yejon omemej itlakeualuan, akin kuajli okichiujkej intekiyo, más miyek okitlan. San ika, on ome tlakeualtin, inteko ijkin okimijli: “¡Sanoyej kuajli! Tejua tikuajli tekitketl, niman otikchiu ken oniknek”.

14. ¿Kenon uelis tikteititiskej ika tikimikneliaj niman tikintlasojtlaj tokniuan ijkon ken Jesús okichiuj?

¹⁴ Jesús noijki techiknelia niman techtlasojtla. Yejua kimatstika ika xuelis san no yejua tekitl tikchiuaskej. Melak yolpaki ijkuak kita ika tokojtiliaj tikchiuaskej tlen tiuelij. ¿Kenon uelis tikchiuaskej ijkon ken yejua? Xtiknekij tikchiuaskej ika se tokniuj makimachili ika xtlaj ika tepaleui noso mapinaui pampa xueli kichiua tlen tejuamej kema tiuelij. Matikimijlikan tokniuan ijkuak itlaj kuajli kichiuaj niman  pampa nokojtiliaj kichiuaskej nochi tlen uelij para kitekichiuiliskej toTajtsin.

15, 16. ¿Tlenon okipaleui tokniuj Midori makitekichiuili Jehová ika tlen yejua ueli kichiua?

¹⁵ Ijkuak tejuamej tokojtiliaj tiktekichiuiliskej Jehová, techpaleuiya matiyolpakikan. Matiknemilikan kenon más uelis tiktekichiuiliskej toTajtsin ika tlen tejuamej kema ueli tikchiuaj. Pampa tla tiknekij tikchiuaskej tlen oksekimej ueli kichiuaj, maski tikmatij ika tejuamej xtiuelij, san titlauelmikiskej niman toyolkokoskej (Luc. 14:28). Matikitakan tlen ipan onochiuj se precursora itoka Midori.

¹⁶ Ijkuak Midori pitentsin katka, itaj, akin xiteixpantijkauj Jehová, nochipa kipijpinaujtiaya niman kijliaya tleka yejua xijkon katka ken ikniuan niman ken akin imiuan nomachtiaya ipan escuela. Yejua kijtoua: “Nikmachiliaya ika xtlaj ika nitepaleuiaya”. San ika, sakin yejua onopatlak. Midori kijtoua: “Mojmostla nikpouaya noBiblia pampa yejon nechyolseuiaya niman kichiuaya manikmachili ika Jehová nechtlasojtla”. Noijki, okitlajtlanili Jehová makipaleui makitekichiuili ika tlen yejua ueliya kichiuaya. Yejon okipaleui mayolpaki ipampa tlen ueli kichiua ipan ikalpan Jehová.

17. ¿Tlenon techpaleuis matikyenkuilijtiakan totlamachilis, niman kenon techpaleuis tla ijkon tikchiuaj?

¹⁷ Ijkuak yakaj kinemilia noso kimachilia ika xtlaj ika tepaleui, melak ouijtika kita oksejpa kuajli nomachilis, ika yejon, Jehová techijlia: “Nemejuamej xkauilikan para kuajli ma kiyenkuilijtiu nemoyojlo niman nemotlamachilis” (Efes. 4:23, 24). Tla tiknekij tikyenkuilijtiaskej totlamachilis noneki tikchiuaskej teoyotl, tomachtiskej iTlajtol toTajtsin niman itech titlanemiliskej. Nochipa ijkon matikchiujtokan niman matiktlajtlanilikan Jehová matechkojtili.  Iespíritu santo techpaleuis matikpatlakan ken titlanemiliaj niman maka san matikitstokan kenon oksekimej kichiuaj tlen tejuamej xtiuelij. Jehová noijki techpaleuis matikitakan tla yopeuj toueyimatij noso titenexikolitaj niman techijlis tlenon uelis tikchiuaskej.

18. ¿Kenon mitsyolseuiya tlen kijtoua 2 Crónicas 6:29, 30?

¹⁸ (Xpoua 2 Crónicas 6:29, 30). Jehová kuajli kixmati toyojlo. Noijki, kimatstika ika tikyejyekojtokej xtikchiuaskej tlen xkuajli niman tlen kileuiya totlalnakayo. Ijkuak kita ika tokojtiliaj tikyolpaktiskej, yejua más techtlasojtlatiuj.

19. ¿Kenon techtlasojtla Jehová?

¹⁹ Jehová kijtoua ika melak techtlasojtla ijkon ken se nantli kitlasojtla ikonetsin (Is. 49:15). Tokniuj Rachel kijtoua: “Ijkuak noichpokatsin Stephanie onemiko, xikuajli chikauiya. Ijkuak onikitak, melak onikikneli pampa pitentsin katka. Ipan kachtopa metstli onen ipan se incubadora, san ika, tlapajtiketl onechkauili mojmostla maniknapalo nokonetsin. Yejon okichiuj más matotlasojtlakan. Aman ikipiya chikuasen xiuitl niman xmás onoskalti ijkon ken oksekimej kokonej, san ika, melak niktlasojtla pampa maski sajnoye otlajyoui, yejua otlaxiko. Melak nechyolpaktia”. Ijkuak Jehová kita kenon tokojtiliaj kuajli tiktekichiuiliskej, melak techtlasojtla ijkon ken se nantli kitlasojtla ikonetsin. ¿Xmelak ika yejon techyolseuiya?

20. ¿Tleka tinochimej uelis tiyolpakiskej?

²⁰ Tinochimej titlapaleuiyaj ipan ikalpan toTajtsin. Jehová xotechuajuikak ipan ikalpan san pampa tla más tiueltokej tikchiuaj itlaj xijkon ken oksekimej. Yejua okichiuj matiknisiuikan pampa okitak ika tikpiyaj kuajli toyojlo, ika tiyolyemankej niman ika tiknektokej matechmachti niman matechyekana (Sal. 25:9). Kuajli tikmatstokej ika Jehová kiyolpaktia nochi tlen tikchiuaj ipan itekiyo. Ijkuak tejuamej titlaxikouaj niman tiyolmelajkanemij, tikteititiaj ika tikpiyaj kuajli toyojlo (Luc. 8:15). Ika yejon, nochipa matokojtilikan tikchiuaskej nochi tlen tiuelij ipan ikalpan toTajtsin. Tla ijkon tikchiuaj, tiyolpakiskej ipampa tlen tejuamej kema ueli tikchiuaj.