1. Ahabw’enki Yehova atarikutugyeragyeranisa n’abandi?

YEHOVA naakunda ebintu by’emiringo etari emwe n’emwe. Eki nitukireebera gye omu byahangirwe bye byona otwariiremu n’abantu. Buri omwe n’ow’omutaano. N’ahabw’ekyo Yehova tarikutugyeragyeranisa n’abandi. Naashwijuma omutima gwawe, nari eki ori omunda. (1 Sam. 16:7) Naamanya ebi orikubaasa kukora gye, obweremwa bwawe, n’oku waakuziibwe. Tarikukushaba kumuha eki otarikubaasa. Twine kutooreza Yehova turikwegiraho emiteekateekyere mirungi nk’ei atwineho. Twakikora, titurikwija kweteekateekaho kukira oku turi nari kwegarura ahansi.​—Rom. 12:3.

2. Ahabw’enki kitari kirungi kwegyeragyeranisa n’abandi?

² Buzima, nitugasirwa twayetegyereza gye eky’okureeberaho kirungi eky’ow’eishe-emwe nari munyaanyazi-itwe orikukora gye omu buheereza. (Heb. 13:7) Reero obwo nikibaasa kutuhwera kureeba emiringo y’okwongyera kubuurira gye. (Fil. 3:17) Kwonka hariho entaaniso aha gati y’okwenda kutooreza eky’okureeberaho kirungi n’okwegyeragyeranisa n’omuntu ondiijo. Twayegyeragyeranisa n’abandi nitubaasa kutandika kwegomba eby’abandi, kutamwa, nari kwereeba nk’abataine mugasho. Nk’oku tureebire omu kicweka eky’enyima, okuhayahayana n’abandi omu kibiina n’eky’akabi omu by’omwoyo. N’ahabw’ekyo Yehova naatuhiga ati: ‘Omuntu weena ayehimbisize omu murimo gwe, kutari kwehimbisiza omu gwa mutaahi we.’​—Gal. 6:4.

³Yehova naayenda ngu oyesiimire omu kutunguuka kwawe okw’eby’omwoyo. Nk’eky’okureeberaho, ku oraabe obatiziibwe, shemererwa ahabw’okuhika aha kigyendererwa ekyo!  Okacwamu otyo ahabwa rukundo yaawe ei oyiniire Ruhanga. Teekateeka aha kutunguuka oku okozire kuruga obwo. Nk’eky’okureeberaho, oyongyeire kukunda kweyegyesa n’okweshomesa Baibuli? Otandikire kushaba omu muringo gw’amakuru, kandi kuruga aha mutima? (Zab. 141:2) Nikikworobera kutandika kugaaniira n’omuntu omu kubuurira, kandi nookoresa gye ebikoreso byaitu by’obuheereza? Waaba oine eka, Yehova akuhwereire kuba omushaija, omukazi, nari omuzaire murungi? Noobaasa kugira okushemererwa n’okumarwa ahabw’entunguuka ei obaasize kukora.

4. Nituza kushwijuma ki omu kicweka eki?

⁴ Nitubaasa kuhwera abandi kwesiimira omu kutunguuka kwabo okw’eby’omwoyo. Nitubaasa n’okubahwera kwetantara kwegyeragyeranisa n’abandi. Omu kicweka eki, nituza kureeba oku abazaire barikubaasa kuhwera abaana baabo, oku abashweraine barikubaasa kuhwerahwerana, n’oku abareeberezi n’abandi barikubaasa kuhwera ab’eishe-emwe na banyaanyazi-itwe. Aha muheru, nituza kureeba emisingye ya Baibuli erikubaasa kutuhwera kweteeraho ebigyendererwa biringaniire kurugiirira aha kubaasa kwaitu n’embeera ezi turimu.

5. Kurugiirira aha Abaefeso 6:4, abazaire baine kwetantara ki?

⁵ Abazaire baine kwegyendesereza okutagyeragyeranisa omwana n’ondiijo nari kushaba omwana kukora eki atarikubaasa. Okugyeragyeranisa abaana nari okubashaba kukora eki batarikubaasa nikibaasa kubagwisa kubi. (Shoma Abaefeso 6:4.) Munyaanyazi-itwe orikwetwa Sachiko * naagira ati: “Abashomesa bangye bakaba nibateekateeka ngu nyine kukora gye kukira abandi omu kibiina aha ishomero. Kandi, maawe akaba naayenda ngu nkore gye aha ishomero reero kibe obujurizi aha mushomesa wangye na tata otari mu mazima. Akaba naayenda ngu, nyiheyo 100 ahari igana omu bigyezo, eki naashangire kitarikubaasika. Hati mmazire emyaka mingi ndugire aha ishomero, kwonka niinyebuuza yaaba ekirungi eki ndikuha Yehova nikimara.”

6. Abazaire nibabaasa kwegyera ki aha biri omu Zaaburi 131:1, 2?

⁶ Eishomo rikuru eri abazaire baine kumanya riri omu Zaaburi 131:1, 2. (Kishome.) Omugabe Daudi akagira ngu akaba ‘atarikwetenga  eby’ahaiguru’ nari ebimurengire. Obucureezi n’okwetwara bikamuhwera kucureeza “omutima” gwe. Abazaire nibabaasa kwegyera ki aha bigambo bya Daudi? Abazaire nibabaasa kworeka ngu n’abacureezi kandi abarikwetwara batarikufayo kumanya obugarukiro bwabo bonka, beitu n’obw’abaana baabo. Abazaire nibabaasa kuhamiza omwana waabo barikumanya amaani ge n’obweremwa bwe baaba nibamuhwera kutaho ebigyendererwa ebiringaniire. Munyaanyazi-itwe orikwetwa Marina akagira ati: “Maama tihaine obu araangyeragyeraniise na beene maawe bashatu nari n’abaana abandi. Akaanyegyesa ngu buri omwe aine emitwarize y’omutaano kandi ngu twena turi ab’omuhendo ahari Yehova. Ninsiima maawe owaampweraire munonga, hati tindikukira kwegyeragyeranisa n’abandi.”

7-8. Omushaija naabaasa kworeka ata ngu naaha omukazi we ekitiinisa?

⁷ Omushaija Omukristaayo aine kuha omukazi we ekitiinisa. (1 Pet. 3:7) Okuha abandi ekitiinisa nikimanyisa okworeka ngu noobafaho munonga kandi noobatwara nk’ab’omuhendo. Nk’eky’eky’okureeberaho, omushaija naaha omukazi we ekitiinisa arikumutwara nk’ow’omuhendo. Tarikumushaba kukora eki atarikubaasa. Kandi tarikumugyeragyeranisa n’abandi bakazi. Yaakikora nihabaasa kurugamu ki? Munyaanyazi-itwe Rosa ou iba otari mu mazima naakira kumugyeragyeranisa n’abandi bakazi. Ebigambo bye ebirikucumita bireetaire Rosa okuteegiremu obwesigye. Naagira ati: “Nyine kuguma nimpamizibwa ngu Yehova naantwara nk’ow’omuhendo.” Aha rubaju orundi, omushaija Omukristaayo naaha omukazi we ekitiinisa. Naamanya ngu ekyo nikikwata aha mukago gwe n’omukazi we hamwe na Yehova. *

⁸ Omushaija orikuha omukazi we ekitiinisa naamusiima, amuhamiza ngu naakumukunda, kandi naamwebaza. (Enf. 31:28) Oku nikwo iba wa Katerina, orikugambwaho omu kicweka eky’enyima yaahwereire omukazi we kwegiraho emiteekateekyere mirungi. Ahakuba omukazi we obu yaabaire akiri muto, nyina akaba amujuma kandi amugyeragyeranisa n’abaishiki abandi banywani be. Ekyarugiremu, Katerina akaguma naayegyeragyeranisa n’abandi na bwanyima y’okwega amazima! Kwonka iba Omukristaayo, amuhweraire kurwanisa omuze ogu n’okwegiraho emiteekateekyere eringaniire. Naagira ati: “Naankunda, naansiima ahabw’ebirungi ebi ndikukora, kandi naanshabira. Kandi naanyijutsya emitwarize mirungi ya Yehova, kandi naampwera kweihamu emiteekateekyere egwire.”

9-10. Abareeberezi abarikufayo bakahwera bata munyaanyazi-itwe kusingura omuze gw’okwegyeragyeranisa n’abandi?

⁹ Abareeberezi nibabaasa kuhwera bata abarikukira kwegyeragyeranisa n’abandi? Teekateeka aha ky’okureeberaho kya munyaanyazi-itwe orikwetwa Hanuni, owaabaire atarikukira kusiimwa omu buto bwe. Naijuka ati: “Nkaba nyine enshoni kandi ndikuteekateeka ngu abaana abandi nibankira. Kuruga omu buto nkatandika kwegyeragyeranisa n’abandi.” Na bwanyima ya Hanuni kwega amazima, akaguma naayegyeragyeranisa n’abandi. N’ahabw’ekyo, akaba naayereeba nk’otari w’omuhendo omu kibiina. Kwonka hati, ni payoniya oshemereirwe. Niki ekyamuhweraire kuhindura emiteekateekyere ye?

¹⁰ Hanuni naagira ngu akahwerwa abareeberezi abarikufayo. Bakamworeka ngu n’ow’omuhendo omu kibiina kandi baamusiima ahabw’eky’okureeberaho kye eky’obwesigwa.  Naagira ati: “Emirundi emwe abareeberezi bakanshaba kugumya banyaanyazi-itwe bamwe omu kibiina abaabaire nibenda obuhwezi. Obujunaanizibwa obu bukaandeetera kumanya ngu ninyetengwa omu kibiina. Ninyijuka obu abareeberezi abarikufayo baanyebaza ahabw’okugumya banyaanyazi-itwe bamwe abato. Reero bakanshomera 1 Abatesalonika 1:2, 3. Ekyo ka kyanshemeize! Ninsiima munonga abariisa barungi abo, ahakuba hati omwanya gwangye omu kibiina kya Yehova niingutwara nk’ogw’omuhendo.”

11. Nitubaasa kuhwera tuta ow’omutima gucuramiriirwe kandi “omucureezi” kurugiirira ahari Isaaya 57:15?

¹¹ Shoma Isaaya 57:15. Yehova naafayo munonga ahari abo abaine omutima ogucuramiriirwe ‘kandi omucureezi.’ Twena, otwariiremu n’abareeberezi nitubaasa kugumya ab’eishe-emwe na banyaanyazi-itwe abakundwa. Omuringo gumwe ogu turikubaasa kubagumyamu n’okworeka ngu nitubafaho. Yehova naayenda ngu tuhwere entaama ze ez’omuhendo kumanya ngu naabakunda. (Enf. 19:17) Kandi nitubaasa kuhwera banyaanyazi-itwe turikuba abacureezi kandi abarikwetwara. Titurikwenda kweyoreka ekirikubaasa kureetera abandi kugira eihari. Kureka, nitukoresa okubaasa kwaitu n’okumanya oku twine kugumyana.​—1 Pet. 4:10, 11.

12. Ahabw’enki abantu ba butoosha baabaire nibakunda kuba na Yesu? (Reeba ekishushani ekiri aha kipampagare.)

¹² Nitubaasa kwegyera ahari Yesu bingi kurugiirira aha ku yaabaire naatwariza abakuratsi be. Akaba ari omushaija orikukirayo obwengye oraabaireho. Kwonka, akaba naatwaza gye kandi ari “omucureezi omu mutima.” (Mat. 11:28-30) Akaba atarikweyoreka ahabw’okwetegyereza kwe kw’ahaiguru n’okumanya kwe kwingi. Akaba naayegyesa arikukoresa orurimi orworobi n’eby’okureeberaho ebirikuhika aha mitima y’abantu ab’ahansi. (Luk. 10:21) Yesu okutaana n’abeebembezi b’ediini abaabaire batari bacureezi, akaba atarikureetera abandi kwehurira nk’abatari b’omugasho ahari Ruhanga. (Yoh. 6:37) Kureka akaba naaha abantu ba butoosha ekitiinisa.

13. Omuringo ogu Yesu yaatwariizemu abeegi be gukooreka guta ngu aine embabazi na rukundo?

¹³ Omuringo ogu Yesu yaabaire naatwarizamu abeegi be gukooreka embabazi ze na rukundo ye. Akaba naamanya ngu baine okubaasa kutarikushushana n’embeera z’omutaano. N’ahabw’ekyo bakaba batarikubaasa kukora ebirikwingana, nari kutunga ebirikushushana omu buheereza. Kwonka, akaba naasiima okuteeraho kwa buri omwe okurikuruga aha mutima. Enfumu ya Yesu ey’etalanta neeyoreka gye emiteekateekyere egi. Omu nfumu egyo, mukama w’abambari akaha buri omwe aharibo omurimo kurugiirira “oku yaabaire naabaasa.” Omwe aha bambari babiri abeesigwa akakora amagoba maingi g’etalanta kukira ondiijo. Kwonka mukama waabo akabasiima bombi arikukoresa ebigambo nibyo bimwe ati: “Kazaare, iwe omwambari omurungi orikwesigwa!”​—Mat. 25:14-23.

14. Nitubaasa kutooreza tuta Yesu omu kutwariza abandi?

¹⁴ Yesu aine embabazi na rukundo kurugiirira aha ku arikututwariza. Naamanya ngu okubaasa n’embeera zaitu tibirikushushana, kwonka naasiima twakora eki turikubaasa. Naitwe tushemereire kutooreza Yesu. Titurikwenda kureetera omuheereza wa Yehova mugyenzi waitu kwereeba nk’otaine mugasho, nari kuhemuka ahabw’okugira ngu tarikukora ebirikwingana n’ebyaitu. Kureka, ka tusherure oburyo bw’okusiima ab’eishe-emwe na banyaanyazi-itwe ahabw’okuteeraho kuha Yehova ekirikukirayo oburungi.

15-16. Munyaanyazi-itwe omwe akagasirwa ata ahabw’okutaho ebigyendererwa ebiringaniire?

¹⁵ Ebigyendererwa by’omwoyo nibituhwera kumanya ei turikuza n’okutunga okumarwa. Kwonka ekikuru, n’okutaho ebigyendererwa kurugiirira aha kubaasa kwaitu n’embeera zaitu tutarikwegyeragyeranisa n’abandi. Titurikwenda kwereebya reero kikaturugiramu okwehurira kubi. (Luk. 14:28) Teekateeka aha ky’okureeberaho kya munyaanyazi-itwe payoniya orikwetwa Midori.

¹⁶ Ishe Midori, otari Mujurizi wa Yehova akaba naakira kumureetera kwehurira kubi arikumugyeragyeranisa na beene nyina n’abu arikushoma nabo. “Nkehurira nk’otaine mugasho,” Midori nikwo arikugira. Kwonka Midori ku yaagumire naakura, akatandika kwegiramu obwesigye. Naagira ati: “Nkaba ninshoma Baibuli buri izooba kugira obusingye bw’omu mutima, kandi nkabaasa kureeba ngu Yehova naankunda.” Kandi, akataho ebigyendererwa biringaniire, kandi akashaba Ruhanga obuhwezi butunu kubaasa kubihikiiriza. Ekyarugiremu, Midori akeesiimira omu ntunguuka ye ey’eby’omwoyo.

17. Niki ekiraatuhwere ‘kuhindurwa basya omu mwoyo gw’obwengye’ bwaitu, kandi nihaija kurugamu birungi ki?

¹⁷ Enyehurira mbi nari ebiteekateeko bibi nibibaasa okutaturugamu omu kiro kimwe. N’ahabw’ekyo Yehova naatuhiga ati: “Muhindurwe basya omu mwoyo gw’obwengye bwanyu.” (Efe. 4:23, 24) Kwonka kubaasa kukora ekyo, nituba twine kushaba, kushoma Ekigambo kya Ruhanga, kandi tukakiteekateekaho. Yezirikye kukora ebintu ebyo, kandi oshabe Yehova kukuha amaani. Omwoyo gwe ogurikwera nigwija kukuhwera kusingura omuze gw’okwegyeragyeranisa n’abandi. Yehova naija kukuhwera kumanya emitwarize nk’eihari  n’amaryo, kandi ahonaaho oyeyihemu okwegomba nari amaryo byatandika kuza omu mutima gwawe.

18. Ebiri omu 2 Obusingye 6:29, 30 nibibaasa kukuhuumuriza bita?

¹⁸ Shoma 2 Obusingye 6:29, 30. Yehova naamanya emitima yaitu. Kandi naamanya n’orutaro oru twine orw’okurwanisa emyoyo mibi n’obutahikiirira bwaitu. Yehova ku arikureeba oku turikuteeraho kusingura ebintu ebyo, naayongyera kutukunda.

19. Yehova naayoreka ata enyehurira ezi atwiniire?

¹⁹ Yehova kutuhwera kwetegyereza oku arikwehurira, naakoresa eky’okureeberaho kya rukundo y’omukazi n’omwana we. (Isa. 49:15) Teekateeka aha ky’okureeberaho eky’omuzaire orikwetwa Rachel. Naahandiika arikugira ati: “Muhara wangye Stephanie akazaarwa atahikire. Obu naabanza kumureeba, akaba ari mukye munonga ataine maani. Kwonka ab’eirwariro bakanyikiriza kuguma niimukiikira buri izooba omu kwezi kw’okubanza obu yaabaire ari omu kyoma eki barikukurizamu abaana abarikuzaarwa batahikire. Obwire obwo bukampwera kumugirira rukundo ehami. Hati aine emyaka mukaaga beitu ni mukye aha bandi ab’emyaka ye. Kwonka, niimukunda ahakuba akarwana munonga kubaasa kuguma ahuriire, kandi buzima andeeteire okushemererwa kwingi!” Ka nikihuumuriza kumanya ngu Yehova atwiniire rukundo nk’egyo ku arikureeba nituteeraho kumuheereza twihire aha mutima!

20. Obu ori omuheereza wa Yehova oyehaireyo, niki eki oine kwesiimiramu?

²⁰ Obu ori omuheereza wa Yehova, ori ow’omutaano kandi ow’omuhendo omu ka ye mpango ey’abantu batarikushushana. Yehova tarakweyiriize haihi ahabw’okugira ngu nookira bataahi baawe. Akakweyiriza haihi ahabw’okugira ngu akareeba omu mutima gwawe yaayetegyereza ngu ori omuntu omucureezi ou arikubaasa kwegyesa kandi akabumba. (Zab. 25:9) Gira obuhame ngu nikimushemeza ku orikuteeraho kumuheereza nk’oku orikubaasa. Okugumisiriza kwawe n’obwesigwa obu oyorekire nibyoreka ngu oine ‘omutima gushemeire kandi omurungi.’ (Luk. 8:15) N’ahabw’ekyo gumizamu nooha Yehova ekirikukirayo oburungi. Reero obwo, noija kugira enshonga nungi ey’okwesiimiramu ahabwawe.