1. Йеговӕ нӕ иннети хӕццӕ цӕмӕннӕ фӕббаруй?

ЙЕГОВИ нӕ фӕндуй, цӕмӕй еугурӕйдӕр ӕмхузӕн уӕн. Е бӕрӕг ӕй, ци берӕ аллихузи цидӕртӕ сфӕлдиста, уомӕй. Алкедӕр ни дессаги конд ӕй, ӕма дӕу хузӕн адӕймаг зӕнхӕбӕл дуккаг нӕййес. Уомӕ гӕсгӕ нӕ Йеговӕ неке хӕццӕ баруй. Е нин нӕ зӕрдитӕ уинуй ӕма ’й зонуй, цӕхуӕн ан, уой (1 Сам. 16:7). Е ӕй зонуй, хуарз нин ци уайуй ӕма ци нӕ уайуй, удта ’й лӕдӕруй, ци уавӕрти исирӕзтан, е дӕр нӕбӕл бӕрӕг ке фӕккӕнуй. Нӕ бон ци нӕй, уой ни Йеговӕ некӕд байагордзӕй. Фал ма гъӕуама нӕхуӕдтӕ дӕр нӕхемӕ Йегови цӕстӕй кӕсун базонӕн. Ӕма нин уӕд ци ’нтӕсуй, уобӕл цийнӕ дӕр кӕндзиан, удта нӕхемӕ дӕр нӕ ниууодзиан (Ром. 12:3).

2. Нӕхе иннети хӕццӕ барун лӕгъуз цӕмӕн ӕй?

² Махӕн ес берӕ фӕлтӕрдгун хуӕртӕ ӕма ӕнсувӕртӕ, ӕма сӕ хӕццӕ лӕггадӕ кӕнгӕй нӕ бон ӕй берӕ цӕбӕлдӕрти исахур ун (Дзиуит. 13:7; Фил. 3:17). Фал си естӕбӕлти ахур кӕнун ӕма нӕхе сӕ хӕццӕ барун еу нӕй. Нӕхе сӕ хӕццӕ ку барӕн уӕд, гӕнӕн ес, ӕма нӕ нифс басӕтта кенӕ сӕмӕ соцъа кӕнун райдайӕн. Кенӕ ба, гӕнӕн ес, ӕма райдайӕн сӕ хӕццӕ ерис кӕнун, цӕмӕй ӕй бавдесӕн, уонӕй лӕгъуздӕр ке нӕ ан. Айразиккон статьяй куд базудтан, уомӕ гӕсгӕ ба нӕ е хуарзӕй нецӕмӕ ӕркӕндзӕй. Йеговӕ нин фӕлмӕнӕй зӕгъуй: «Алкедӕр бавдесӕд, ӕхуӕдӕг ци кӕнуй, уой. Ӕма уӕд цийнӕ кӕндзӕй ӕхе гъуддӕгтӕбӕл ӕма ӕхе иннети хӕццӕ нӕ бардзӕй» (Гал. 6:4).

3. Йеговӕн лӕггадӕ кӕнгӕй дин ци бантӕстӕй, уонӕй дин цийнӕ ци хӕссуй?

³ Йегови фӕндуй, цӕмӕй дин ци бантӕстӕй, уобӕл цийнӕ  кӕнай. Зӕгъӕн, кӕд донаргъуд райстай, уӕд цийнӕ кӕнӕ, еци нисан дӕ къохи ке бафтудӕй, уобӕл. Еци унаффӕ дӕхуӕдӕг рахастай, уомӕн ӕма Хуцауи бауарзтай. Удта ма расагъӕс кӕнӕ, уӕдӕй нурмӕ ци гъуддӕгти фӕххуӕздӕр дӕ, уонӕбӕл. Ка ’й зонуй дин нур Библи кӕсун ӕма ӕртасун фулдӕр цийнӕ хӕссуй, дӕ кувдтитӕ ба никки зӕрдиагдӕр иссӕнцӕ (Пс. 141:2). Кенӕ ба, ка ’й зонуй, игъосун кӕнунмӕ ӕма нӕмӕ ци косӕндзаумӕуттӕ ес, уонӕй пайда кӕнунмӕ фӕддӕснидӕр дӕ. Йегови ӕмбал ке исдӕ, уой фӕрци нур хуӕздӕр сӕрихецау дӕ, хуӕздӕр бийнойнаг, хуӕздӕр мадӕ кенӕ хуӕздӕр фидӕ. Мадта дин нурмӕти ци бантӕстӕй, уобӕл сагъӕс кӕнӕ, ӕма дин е цийнӕ хӕссӕд.

4. Аци статьяй цӕмӕ ӕркӕсдзиан?

⁴ Нӕ бон ӕй хуӕртӕ ӕма ӕнсувӕртӕн ӕнхус кӕнун, цӕмӕй син ци бантӕстӕй, уобӕл цийнӕ кӕнонцӕ, удта сӕхе иннети хӕццӕ ма баронцӕ. Аци статьяй ӕркӕсдзиан, еци гъуддаги ниййергутӕн, лӕгтӕн ӕма уоститӕн, хестӕр нӕлгоймӕгтӕн ӕма иннетӕн дӕр ци банхус кӕндзӕй, уомӕ. Уомӕй уӕлдай ма ӕркӕсдзиан Библий уагӕвӕрдтӕй цалдӕремӕ. Етӕ нин банхус кӕндзӕнцӕ, нӕ къохи ка бафтуйа, уӕхӕн нисӕнттӕ ӕвӕрунмӕ.

5. Ефесӕгтӕмӕ 6:4 куд финст ӕй, уомӕ гӕсгӕ ниййергутӕн куд архайгӕ ’й?

⁵ Ниййергутӕ, уӕ сувӕллӕнтти кӕрӕдзей хӕццӕ ма баретӕ, удта си ӕгӕр берӕ дӕр ма агоретӕ, кенӕ ба син сӕ нифс басӕтдзиайтӕ. (Бакӕсӕ Ефесӕгтӕмӕ 6:4.) Еу хуӕрӕ Сачико * радзурдта: «Мӕ ахургӕнгути уотӕ фӕндадтӕй, цӕмӕй къласи ӕгасемӕй хуӕздӕр ахур кодтайнӕ. Мӕ мадӕ дӕр мин дзурдта, дзӕбӕх, дан, ахур кӕнӕ, цӕмӕй дӕ фидӕ дӕр ӕма ахургӕнгутӕ дӕр Йегови Ӕвдесӕнти туххӕй хуарз гъуди кӕнонцӕ. Уотӕ ’й фӕндадтӕй, цӕмӕй экзаменти еунӕг рӕдуд дӕр ма искодтайнӕ. Фал уомӕн гӕнӕн н’ адтӕй! Кӕд скъола раги фӕдтӕн, уӕддӕр мӕмӕ хатгай уотӕ фӕккӕсуй, ӕма ми Йеговӕ арази нӕй, кӕд мӕ бон ци ӕй, уой кӕнун, уӕддӕр».

6. Псаломи 131:1, 2 финст дзурдтӕй цӕбӕл ахур кӕнӕн?

⁶ Ниййергутӕн хуарз гъудитӕ финст ес Псаломи 131:1, 2. (Бакӕсӕ.) Паддзах Давид загъта: «Ӕз нӕ бӕлдтӕн устур цӕмӕдӕрти». Уотӕ бонзонгӕ ке адтӕй, уой фӕрци ӕхе уӕлдай сӕринезӕй гъӕуай кодта. Давиди дзурдтӕй ниййергутӕ цӕбӕл ахур  кӕнунцӕ? Бонзонгӕ ӕма сӕрниллӕг ку уонцӕ, уӕд сӕхецӕй дӕр ӕма сӕ сувӕллӕнттӕй дӕр ӕгӕр берӕ нӕ агордзӕнцӕ. Гъӕуама ’й лӕдӕронцӕ, сӕ сувӕллонӕн ӕ бон ци ӕй ӕма ци нӕй, уой, ӕма ин ӕнхус кӕнонцӕ, ӕ къохи ка бафтуйдзӕй, уӕхӕн нисӕнттӕ ӕвӕрунмӕ. Уой фӕрци ’й сувӕллон лӕдӕрдзӕй, ке ’й уарзунцӕ, уой. Хуӕрӕ Маринӕ радзурдта: «Мӕ мадӕ мӕ некӕд неке хӕццӕ барста, нӕдӕр ме ’нсувӕрти хӕццӕ нӕдӕр иннӕ сувӕллӕнтти хӕццӕ. Алкӕмӕдӕр, дан, ни хуарзӕй цидӕр ес ӕма ни Йеговӕ алкедӕр берӕ уарзуй. Уой фӕрци мӕхе иннети хӕццӕ некӕд фӕббарун».

7, 8. Нӕлгоймаги бон куд ӕй ӕ бийнойнагӕн кадӕ кӕнун?

⁷ Киристон нӕлгоймӕгтӕ сӕ бийнойнӕгтӕн гъӕуама кадӕ кӕнонцӕ, гъома сӕ лӕдӕронцӕ ӕма син аргъ кӕнонцӕ (1 Пет. 3:7). Нӕлгоймаг гъӕуама ӕ бийнойнагӕй ӕгӕр берӕ ма агора, удта ’й иннӕ силгоймӕгти хӕццӕ дӕр ма бара. Цӕмӕннӕ? Ӕркӕсӕн еу хуӕрӕ Рози хабармӕ. Розӕн ӕ лӕг Йегови Ӕвдесӕн нӕй, ӕма ’й дзурдтӕй хъӕбӕр фефхуӕруй. Уой туххӕй Розӕ ӕхемӕ нецӕййаг кӕсун райдӕдта. Розӕ зӕгъуй: «Еске мин ӕй ку нӕ дзора, Йеговӕ мин аргъ ке кӕнуй, уӕд мӕхецӕй ба е нӕ феруагӕс кӕнуй». Киристон нӕлгоймӕгтӕ сӕ бийнойнӕгтӕн аргъ кӕнунцӕ, уомӕн ӕма ’й лӕдӕрунцӕ, уомӕй кӕнгӕ ке ӕй, сӕ бийнонти амонд дӕр, удта си Йеговӕ арази уодзӕй ӕви нӕ, е дӕр *.

⁸ Нӕлгоймаг ӕ бийнойнагӕн кадӕ ку кӕна, уӕд ин дзордзӕй, ке ’й уарзуй ӕма ин аргъ ке кӕнуй, иннети рази ба ин ӕ хуарзи кой кӕндзӕй (Ӕмб. 31:28). Айразиккон статьяй ке кой кодтан, еци Катеринӕн дӕр ӕ сӕрихецау гъе уӕхӕн ӕй. Катеринӕ ма сувӕллон ку адтӕй, уӕд ӕй ӕ мадӕ иннӕ кизгутти хӕццӕ арӕх фӕббаридӕ. Уой туххӕй ӕхуӕдӕг дӕр ӕхе иннети хӕццӕ барун райдӕдта. Ӕма Йегови Ӕвдесӕн ку иссӕй, уӕддӕр ин зин адтӕй раййевун. Фал ӕ сӕрихецауи фӕрци ӕхемӕ раст цӕстӕй кӕсун базудта. Катеринӕ зӕгъуй: «Берӕ мӕ уарзуй, арӕх мӕ фестауй, удта мӕн туххӕй ковгӕ дӕр фӕккӕнуй. Йеговӕ ци дессаги Хуцау ӕй, уой дӕр мин мӕ зӕрдӕбӕл ӕрлӕуун кӕнуй, ӕма уой фӕрци мӕхецӕй ӕгӕр берӕ нӕ фӕййагорун».

9, 10. Хестӕр нӕлгоймӕгтӕ еу хуӕрӕн куд банхус кодтонцӕ?

⁹ Хестӕр нӕлгоймӕгти бон куд ӕй иннетӕн ӕнхус кӕнун, цӕмӕй сӕхе маке хӕццӕ баронцӕ? Ӕркӕсӕн еу хуӕрӕ Хануний хабармӕ. Сувӕллон ма ку адтӕй, уӕд ӕй некӕд ӕстудтонцӕ. Хануни зӕгъуй: «Хъӕбӕр ӕфсӕрмигӕнагӕ сувӕллон адтӕн ӕма мӕхемӕ иннетӕй лӕгъуздӕр кастӕн. Мӕхе алкӕддӕр иннети хӕццӕ баринӕ». Донаргъуд ку райста ӕма пионерӕй лӕггадӕ кӕнун ку райдӕдта, уӕд дӕр си нӕма ӕруагӕс кодта, хуӕртӕ ӕма ӕнсувӕртӕ ’й ке уарзунцӕ ӕма ин аргъ ке кӕнунцӕ. Фал фӕстӕдӕр ӕхемӕ ӕндӕр цӕстӕй кӕсун райдӕдта, ӕма нур дзӕвгарӕ амондгундӕр ӕй.

¹⁰ Хануни хестӕр нӕлгоймӕгти фӕрци ӕхемӕ раст цӕстӕй кӕсун райдӕдта, уомӕн ӕма ин дзурдтонцӕ, ӕмбурди ин аргъ ке кӕнунцӕ, удта хуӕртӕ ӕма ӕнсувӕртӕн фӕнзуйнаг ке ӕй. «Цалдӕр хатти мин загътонцӕ, цӕмӕй мӕхецӕй кӕстӕр ка ӕй, уӕхӕн хуӕрти бафедар кодтайнӕ,– зӕгъуй Хануни.– Уӕхӕн гъуддӕгтӕ мин ке баихӕс кӕниуонцӕ, уой фӕрци ӕй уидтон, мӕнӕй дӕр цидӕр пайда ке ес. Нур дӕр ма ’й гъуди кӕнун, ӕнсувӕртӕ мӕ куд растудтонцӕ, уой,  удта мин бакастӕнцӕ 1 Фессалоникӕгтӕмӕ 1:2, 3 финст дзурдтӕ. Мӕ зӕрдӕ цийнӕй байдзаг ӕй. Еци ӕнсувӕрти фӕрци балӕдӕрдтӕн, ӕмбурди мин цӕхуӕн бунат ес, уой ӕма ин хъӕбӕр аргъ кӕнун».

11. Исаййи 57:15 куд финст ӕй, уомӕ гӕсгӕ нӕ бон куд ӕй нифссаст ка ӕй, уонӕн ӕнхус кӕнун?

¹¹ Бакӕсӕ Исаййи 57:15. Йеговӕ, нифссаст ка ӕй, уонӕбӕл хъӕбӕр тухсуй. Уӕхӕн хуӕртӕ ӕма ӕнсувӕртӕн ӕнхус кӕнун айдагъ хестӕр нӕлгоймӕгти ихӕс нӕй, фал не ’гасей ихӕс дӕр. Нӕ бон син ӕй ӕвдесун, ӕцӕгӕйдӕр сӕбӕл ке тухсӕн, уой. Йеговӕ ӕ уӕриккити берӕ уарзуй, ӕма ’й фӕндуй, цӕмӕй мах дӕр кӕрӕдземӕн уотӕ уӕн (Ӕмб. 19:17). Нӕ бон ма куд ӕй, ӕхемӕ иннетӕй лӕгъуздӕр ка кӕсуй, уӕхӕн хуӕртӕ ӕма ӕнсувӕртӕн ӕнхус кӕнун? Адӕймаг ӕхемӕ ӕгӕр берӕ ӕргом ку ’здаха, уӕд имӕ, гӕнӕн ес, ӕма иннетӕ хицӕ кӕнун райдайонцӕ. Мах ба фӕндуй нӕ дзурдтӕй ӕма нӕ гъуддӕгтӕй иннети федар кӕнун (1 Пет. 4:10, 11).

12. Хумӕтӕг адӕнӕн Йесой рази ӕнцон цӕмӕн фӕууидӕ? (Кӕсӕ хузӕмӕ ӕндаг цъарӕбӕл.)

¹² Йесо дӕр нин фӕнзуйнаг ӕй, ӕ фӕдбӕлдзӕугутӕн куд адтӕй, уомӕй. Кӕд уомӕй номдзуддӕр адӕймаг зӕнхӕбӕл нӕ цардӕй, уӕддӕр адтӕй сӕрниллӕг ӕма фӕлмӕн (Матф. 11:28–30). Удта Йесо хъӕбӕр зундгин адтӕй, фал ӕхемӕ иннети ӕргом не ’здахта. Адӕни ахур кӕнгӕй дӕр хумӕтӕг ӕвзагӕй дзурдта, удта пайда кодта ӕнцонлӕдӕрӕн цӕветтонтӕй (Лук. 10:21). Йесо сӕрбӕрзонд дини разамонгути хузӕн н’ адтӕй. Е алкӕддӕр ӕвдиста, Хуцауи цӕсти син устур аргъ ке ес (Иоан. 6:37). Алкедӕр нимадта – мӕгурти дӕр ӕма хъалти дӕр.

13. Йесо ӕ ахуркӕнуйнӕгти ке уарзта ӕма сӕ ке лӕдӕрдтӕй, е цӕмӕй бӕрӕг ӕй?

¹³ Киристе хӕларзӕрдӕ адтӕй ӕма ӕ ахуркӕнуйнӕгти уарзта. Сӕ уавӕртӕ син уидта ӕма ’й лӕдӕрдтӕй, сӕ бон ци ӕй ӕма ци нӕй, уой. Уомӕ гӕсгӕ си ӕмхузӕн нӕ агурдта. Йесо ӕй зудта, ӕгас зӕрдӕй ке лӕггадӕ кӕнунцӕ, уой ӕма син сӕ хъиамӕтӕн аргъ кодта. Йесо ӕ ахуркӕнуйнӕгтӕмӕ цӕхуӕн зӕрдӕ дардта, е бӕрӕг ӕй, ци фӕсномуг хабар радзурдта, уомӕй. Еци хабари хецау ӕ цагъартӕн цӕхуӕндӕр гъуддаг баихӕс кодта, «ӕ бон кӕмӕн цӕйбӕрцӕ адтӕй, уомӕ гӕсгӕ», ӕма си сӕ еу фулдӕр бакуста, иннӕ ба – минкъийдӕр. Фал хецау сӕ дууей дӕр ӕмхузӕн растудта: «Хъӕбӕр хуарз! Мӕ дзӕбӕх ӕма ӕууӕнкгун цагъар!» (Матф. 25:14–23).

14. Нӕ бон куд ӕй Киристей фӕнзун?

¹⁴ Йесо мах дӕр уарзуй ӕма нӕ лӕдӕруй. Нӕ уавӕртӕ нин уинуй ӕма, нӕ бон ци ӕй, уой ке кӕнӕн, уомӕн хъӕбӕр аргъ кӕнуй. Мах дӕр гъӕуама иннетӕмӕ уӕхӕн цӕстӕй кӕсӕн. Нӕхе уотӕ гъӕуама ма дарӕн, цӕмӕй ӕмбурди еске ӕхемӕ нецӕййаг ӕркӕса, иннети бӕрцӕ ке нӕ лӕггадӕ кӕнуй, уой туххӕй. Хуӕздӕр уодзӕй хуӕртӕ ӕма ӕнсувӕрти ӕстаун, Йеговӕн ӕгас зӕрдӕй ке лӕггадӕ кӕнунцӕ, уой туххӕй.

15, 16. Еу хуӕрӕ ӕ рази нисӕнттӕ ке ӕвардта, е ин куд банхус кодта?

¹⁵ Йегови гъуддӕгти нисӕнттӕ ку ӕвӕрӕн, уӕд нӕ цард амондгундӕр уодзӕй. Ӕрмӕст, нисӕнттӕ ӕвӕргӕй гъӕуама расагъӕс кӕнӕн нӕхе уавӕртӕбӕл, удта иннетӕмӕ ма кӕсӕн. Ӕндӕра нин ести ку нӕ уайа, уӕд нӕ нифс басӕтдзӕй ӕма нӕ къохтӕ ӕруадздзиан (Лук. 14:28). Ӕркӕсӕн еу пионер хуӕрӕ Мидорий хабармӕ.

¹⁶ Мидори ма минкъий ку адтӕй, уӕд ӕй ӕ фидӕ алкӕддӕр ӕ кӕстӕр хуӕрӕ ӕма ӕнсувӕри, удта е ’мкъласонти хӕццӕ баридӕ ӕма ин ӕфхуӕрӕн дзубандитӕ кодта.  Мидори зӕгъуй: «Мӕхемӕ зӕнхӕй исесуни аккаг дӕр нӕ кастӕн». Фал ку исустур ӕй, уӕд фӕннифсгундӕр ӕй. «Алли бон дӕр Библи фӕккӕсун. Уой фӕрци мӕ зӕрди ес фарнӕ, ӕма ’й лӕдӕрун, Йеговӕ мӕ ке уарзуй»,– зӕгъуй Мидори. Уомӕй уӕлдай ма ӕ рази цӕхуӕндӕр нисӕнттӕ исӕвӕруй ӕма Йеговӕмӕ фӕкковуй, цӕмӕй ӕ къохи бафтуйонцӕ. Уой фӕрци Мидори цийнӕ кӕнуй, ӕхецӕн ци ’нтӕсуй, уобӕл.

17. Нӕ бон куд ӕй идарддӕр дӕр нӕ зундахаст ӕййевун ӕма нин ци бантӕсдзӕй?

¹⁷ Цӕмӕй нӕхемӕ раст цӕстӕй кӕсун райдайӕн, уой туххӕй нӕ рӕстӕг багъӕудзӕй. Ӕма нин Йеговӕ дӕр зӕгъуй, цӕмӕй идарддӕр дӕр нӕ зундахаст ӕййевӕн (Еф. 4:23, 24). Уой туххӕй ба гъӕуй Йеговӕмӕ ковун, Библи кӕсун, ӕртасун ӕма ибӕл сагъӕс кӕнун. Йеговӕй сугъдӕг хъаурӕ корӕ, цӕмӕй дин е алкӕддӕр уайа, ӕма дӕхе иннети хӕццӕ мабал барай. Йеговӕ ма дин банхус кӕндзӕй, цӕмӕй афойнадӕбӕл фӕууинай, киристонбӕл ка нӕ федауй, уӕхӕн менеугути муггӕгтӕ, зӕгъӕн, сӕрбӕрзонддзийнадӕ ӕма соцъай муггӕгтӕ. Уой фӕрци еци лӕгъуз менеугутӕ дӕ зӕрди едӕгтӕ нӕ рауадздзӕнцӕ.

18. 2 Анзфинстити 6:29, 30 финст дзурдтӕ дӕ куд федар кӕнунцӕ?

¹⁸ Бакӕсӕ 2 Анзфинстити 6:29, 30. Йеговӕ нин нӕ зӕрдӕ уинуй. Е ӕй уинуй, аци дуйней зундахасти нихмӕ, удта нӕхе гъӕндзийнӕдти нихмӕ тох кӕнун дӕр нин куд зин ӕй, уой, ӕма нӕ уой туххӕй никки фулдӕр уарзуй.

19. Йеговӕ нӕ куд уарзуй, уой нин куд лӕдӕрун кӕнуй?

¹⁹ Йеговӕ нӕ куд уарзуй, уой нин лӕдӕрун кӕнуй мадӕ ӕма ӕ бӕдоли цӕветтонӕй (Ис. 49:15). Еу хуӕрӕ Рейчел радзурдта: «Мӕ кизгӕ Стефӕни ӕ афонӕй раздӕр  райгурдӕй. Ку ’й фӕууидтон, уӕд гъе уӕхӕн минкъий ӕма ӕнӕхъаурӕ адтӕй. Фиццаг мӕйӕ мин сӕйгӕдони фӕцӕй, фал мӕ дохтиртӕ алли бон дӕр бауадзиуонцӕ, цӕмӕй ӕй мӕ къохтӕмӕ райстайнӕ ӕма ’й барӕвдудтайнӕ. Нур Стефӕнибӕл ӕхсӕз анзи цӕуй ӕма е ’нгӕрттӕй се ’гасемӕй минкъийдӕр ӕй. Фал ӕй бонӕй-бонмӕ фулдӕр уарзун, уомӕн ӕма ’й уидтон, цардбӕл куд федар хуӕстӕй, уой, ӕма мин хъӕбӕр берӕ цийнӕ ӕрхаста!» Расагъӕс кӕнӕ, Йеговӕ дӕр нӕ гъе уотӕ уарзуй, уомӕн ӕма ’й уинуй мах дӕр ибӕл куд федар хуӕцӕн ӕма куд хъӕбӕр архайӕн, цӕмӕй ин еузӕрдонӕй лӕггадӕ кӕнӕн!

20. Йеговӕн лӕггадӕ кӕнгӕй дӕ бон цӕбӕл ӕй цийнӕ кӕнун?

²⁰ Йеговӕн ке лӕггадӕ кӕнис, уомӕ гӕсгӕ ду дӕр Йегови дессаги бийнонтӕй дӕ ӕма си дӕу хузӕн еунӕг дӕр нӕййес. Йеговӕ дӕ ӕхемӕ уой туххӕй не ’рбакодта, ӕма кӕмӕйдӕр хуӕздӕр адтӕ, фал ӕй фӕууидта, сӕрниллӕг адӕймаг ке дӕ ӕма дин е ци дзоруй, уомӕ байгъосунмӕ цӕттӕ ке дӕ (Пс. 25:9). Йеговӕ дин дӕ хъиамӕтӕн ке аргъ кӕнуй, уобӕл макӕд гурусхӕ кӕнӕ. Федар ӕма еузӕрдон ке дӕ, е уобӕл дзорӕг ӕй, ӕма дин «хуарз ӕма фӕлмӕн зӕрдӕ» ес (Лук. 8:15). Мадта Йеговӕн лӕггадӕ кӕнгӕй идарддӕр дӕр, дӕ бон ци ӕй, уой кӕнӕ, «ӕма уӕд цийнӕ кӕндзӕнӕ дӕхе гъуддӕгтӕбӕл».