1. Mukunda natshi Yehowa wanago gutufuanesa nu athu ako?

YEHOWA wana guzumba athu nu ima ya maluholo agasue handaga wafugile ima yagasue nu athu mu luholo lua gudisha. Muthu wagasue mukatshi dietu wakhala wagudisha nu athu ako. Yehowa wanago gugufuanesa nu athu ako, wana mona mutshima waye nu makalegelo ako anyi athu ako ajiyilego gumona. (1 Sam. 16:7) Udi mujiya nji ndaga wana kalagala muabonga nu ndaga wajiyilego gukalagala muabonga. Udi mujiya nji fundo wavualewe. Wanago gugutoga ha gukalagala ndaga jiabalega ngolo jiaye. Esue nji tudi naye guditadila gifua luholo Yehowa wana gututadila. Ngenyi mbatukhala guditadila ‘mu luholo luabonga.’ Mbatutangizago egi tudi nu ndando yavula gubalega nga ndo tushigo nu ndando yavula.—Lomo 12:3.

2. Mukunda natshi gudifuanesa nu athu ako gudi khadilo diabola?

² Tuajiya guzula malongo mu ifezegeselo ya aphangi ako. Ha gufezegesa, yajiya gukhala egi udi mujiya phangi wa yala mumoshi nga wa mukhetu wana kalagala muabonga mudimo wa gulongesa. (Heb. 13:7) Gifezegeselo gienji giajiya gugukuatesa ha gukudisa luholo luaye lua gulongesa. (Fili. 3:17) Uvi gulandula gifezegeselo giabonga gia muthu, gushigo luholo lumoshi nu gudifuanesa nenji. Gula tudi nu khadilo dia gudifuanesa nu athu ako, diajiya gututuma ha guavuila ginjiongo, ha guleba muila nga ha gutangiza egi tushigo nu ndando. Gifua luholo tuayimonyi mu longo diabalega, gula tudi nu khadilo dia gudifuanesa nu aphangi ako mu hungu, diajiya gubolesa ufuta wetu nu Yehowa. Hene Yehowa adi gututoga nu guzumba guagasue egi: ‘Muthu wagasue atadile ndaga jidi muene mukalagala, ngenyi mbawukhala nu gusuanguluga mukunda nu midimo yenji hakhenji, ashigo naye gufuanesa midimo yenji nu midimo ya athu ako.’—Gal. 6:4.

3. Ndaga jitshi wakalegele gale mu mudimo wa Yehowa jiana gugusuanguluisa?

 ³ Yehowa wana tshigina egi ukhale nu gusuanguluga mukunda nu ndaga wana gukalagala mu mudimo wenji. Ha gufezegesa, tangua wabatijiwe wakhalele nu gusuanguluga handaga watagenesele felela diene! Guzumba guaye mukunda nu muzumba Nzambi guene guagutumile ha guzula desizio dia gumukalegela mudimo nu ngolo jiaye jiagasue. Tangiza ndaga wakalegele gale mu mudimo wa Yehewa sendese wabatijiwe. Ha gufezegesa, wakudishile gale luholo luaye lua gutanga Biblia nu lua gulonguga ba? Isambu yaye yana katuga diago mu mutshima ba? (Ngi. 141:2) Wakudishile gale luholo luaye lua gusendesa guta maga nu athu mu mudimo wa gulongesa ba? Wana kalegela nji muabonga ikadigilo yetu ya gulongesela ba? Gula udi nu fami, Yehowa wa gukuatesele gale ha gukhala yala wabonga, mukhetu wabonga nga mvuaji wabonga ba? Wajiya gukhala nu gusuanguluga guavula mukunda nu ndaga jiagasue wakalegele gale mu monyo waye.

4. Itshi tuza muzuelela mu longo edi?

⁴ Tuajiya gukuatesa athu ako ha gusuanguluga nu ndaga ana gutshita mu mudimo wa Yehowa. Tuajiya nji guakuatesa ha gutuna khadilo dia gufuanesa nu athu ako. Mu longo edi tuza mumona luholo mvuaji jiajiya gukuatesa an’awo, luholo athu adizudile gale mu ulo ajiya gudikuatesa nu luholo akulu nu athu ako ajiya gukuatesa aphangi’awo a mala nu a akhetu. Tuza nji muzuelela malongo a Biblia ajiya gutukuatesa ha gudishila mafelela anyi tuajiya gutagenesa.

5. Gifua luholo Efeso 6:4 idi guyimonesa, khadilo ditshi mvuaji jidi naye gutuna?

⁵ Mvuaji jidi naye gumonesa gutema. Ashigo naye gukhala nu khadilo dia gufuanesa mun’awo nu mona muko nga gumutoga ha gukalagala ndaga jinyi jiabalega ngolo jienji. Gula mvuaji jidi nu khadilo dia gufuanesa mun’awo nu mona muko, ajiya gumulebesa muila. (Tanga Efeso 6:4.) Phangi wa mukhetu Sachiko * udi muzuela egi: “Alongeshi ami akhalele mutshigina egi ngukhale nu ndunge jiavula gubalega ana a mu khalasa dietu. Mama nji wakhalele mutshigina egi ngukhale nu ndunge jiavula gu khalasa hagula mulongeshi wetu nu tata ashigo Temue wa Yehowa atangize egi Matemue a Yehowa akhala athu abonga diago. Wakhalele mutshigina egi ngubinge mu ba examen agasue ngakhalele mukalagala. Uvi ndaga yene yakhalele gungukolela gami. Ivo yavula yabalega gale sendese ngamanesele khalasa. Ngana kalagala yagasue ha gusuanguluisa Yehowa, uvi matangua ako ngana gudihula gula ndaga jiene jiana gumusuanguluisa diago.”

6. Longo ditshi mvuaji jiajiya guzula mu mukanda wa Ngimbo 131:1, 2?

 ⁶ Mvuaji jiajiya guzula longo dia ndando didi mu Ngimbo 131:1, 2. (Tanga.) Fumu Davidi wazuelele egi ‘wakhalelego mukamba ima yakoma-koma’ nga gukalagala ndaga jinyi jiabalega ngolo jienji. Khadilo dienji dia gudibulumuisa dia mukuatesele ha gusuanguluga nu ima akhalele nawo nu ha ‘gukhala nu guhuima.’ Malongo atshi mvuaji jiajiya guzula mu mbimbi eji jia Davidi? Mvuaji jiajiya gumonesa egi adi nu khadilo dia gudibulumuisa gula ashigo gudishila mafelela anyi ajiyilego gutagenesa nga ndo ashigo naye gutoga an’awo ha gukalagala ndaga jinyi jiabalega ngolo. Mvuaji jiajiya gukuatesa mun’awo ha gudivua egi udi nu ndando gula adi mujiya ndaga mun’awo wajiya gukalagala nu ndaga jinyi ajiyilego gutshita. Adi naye gumukuatesa ha gudihagela mafelela anyi wajiya gutagenesa. Phangi Marina udi muzuela egi: “Mama wakhalelego gungufuanesa nu aphangi’ami thathu nga nu ana ako. Wakhalele gungulongesa egi muthu nu muthu wana khala nu ndunge jienji, mukut’etu agasue tuana khala nu ndando gu meso a Yehowa. Ngudi gumuhana mersi luholo angukuatesele. Ngana gudifuanesa diago ndo nu athu ako.”

7-8. Luholo lutshi yala wajiya guhana mukaji’enji ginemua?

⁷ Yala udi Muklisto udi naye gukalegela mukaji’enji ndaga nu ginemua. (1 Phet. 3:7) Guhana ginemua gudi mukotelesa guzula athu ako nu ndando yavula nu guanemesa. Ha gufezegesa, yala wajiya gukalegela mukaji’enji ndaga nu ginemua gula udi gumuzula nu ndando yavula. Ashigo naye gumutoga ha gukalagala ndaga jiabalega ngolo jienyi. Ajiyilego nji gumufuanesa nu akhetu ako. Luholo lutshi mukhetu wajiya gudivua gula mulumi’enji udi gumufuanesa nu akhetu ako? Matangua avula mulumi’a phangi Rosa yonu ashigo Temue wa Yehowa wana gumufuanesa nu akhetu ako. Mbimbi jiabola jiakhalele muzuela mulumi’enji jiakhalele mutuma phangi Rosa ha gutangiza egi ashigo nu ndando. Wakhalele gudihula nji gula gudi nu muthu wana gumuzumba. Udi muzuela egi: “Ngana tshigina egi athu akhale gunguwunguluisa tangua diagasue egi Yehowa wana gunguzumba.” Uvi mala adi Aklisto ana hana akaji’awo ginemua. Ana jiya egi gutshita ngenyi guana guakuatesa ha gukhala nu ufuta wabonga mu ulo wawo nu ha gukhala nji nu ufuta wabonga nu Yehowa. *

⁸ Yala wana kalegela mukaji’enji ndaga nu ginemua, wana wambela athu ako ndaga jiabonga mukaji’enji wana kalagala. Wana wambela nji mukaji’enji egi wana gumuzumba nu wana khala nu ndando yavula gu meso enji. (Ish. 31:28) Phangi Katerina tuazuelela mu longo diabalega mulumi’enji wakhalele mutshita ngenyi ha gumukuatesa gula udi gudivua egi ashigo nu ndando. Tangua phangi Katerina wakhalele mona wazonda gin’enji wakhalelego gumuzula nu ndando, wakhalele gumufuanesa nu ana ako nga nu mafut’enji. Ndaga yene yamutumine ha gusendesa gudifuanesa nu athu ako nu walanduile gumonesa khadilo diene ikhale tangua wabuile Temue wa Yehowa! Uvi mulumi’enji wamukuatesele ha gusombegesa khadilo diene nu ha guditadila mu luholo luabonga. Udi muzuela egi: “Mulumi’ami wana gunguzumba, wana gungushimana mukunda nu ndaga jiabonga ngana kalagala, wana kombelela nji mukunda nu ame. Wana gunguwunguluisa makalegelo abonga a Yehowa nu wana gungukuatesa ha gusombegesa matangi’ami abola.”

9-10. Luholo lutshi akulu akuatesele phangi mumoshi wa mukhetu ha gubemba khadilo dia gudifuanesa nu athu ako?

⁹ Luholo lutshi akulu ajiya gukuatesa aphangi adi nu khadilo dia gudifuanesa nu athu ako? Tutadilenu gifezegeselo gia phangi wa mukhetu Hanuni. Tangua wakhalele mona wazonda, akhalelego diago gumushimana. Udi muzuela egi: “Ngakhalele muvua musonyi, ngakhalele mumona egi ana ako angubalega. Hene ngasendesele gudifuanesa nu athu ako.” Ikhale tangua phangi Hanuni wajiyile giamatshidia, walanduile gudifuanesa nu athu ako. Ndaga yene yamutumile ha gutangiza egi ashigo nu  ndando yavula mu hungu. Uvi mangino udi mukalagala mudimo wa muvundji wa njila nu gusuanguluga guagasue. Itshi yamukuatesele ha gusombegesa khadilo dienji?

¹⁰ Phangi Hanuni udi muzuela egi, akulu amukuatesele nu guzumba guagasue. Amuwambelele egi wana khala nu ndando yavula mu hungu, wana hana nji gifezegeselo giabonga. Wasonegele egi: “Gungima dia masugu akulu angutogele ha guya muhana aphangi a akhetu ako gikhesa. Ngadivuile diago egi ngana khala nu ndando. Ngudi muwunguluga luko luholo akulu anguhanele mersi mukunda nu gikhesa ngayile muhana aphangi a mavuala a akhetu. Gungima angutangele mukanda wa 1 Tesalonike 1:2, 3. Verse yene yakuatele diago mutshima wami! Ngudi muhana mersi yavula gudi akulu handaga ana gutuzumba, henyaha ngajiya egi ngudi nu ndando yavula mu hungu.”

11. Ha gutadila Yeshaya 57:15, luholo lutshi tuajiya gukuatesa athu adi ‘aguleba muila nu adi nu khadilo dia gudibulumuisa’?

¹¹ Tanga Yeshaya 57:15. Yehowa wana gudisagesa muavula mukunda nu athu agasue adi ‘aguleba muila nu adi nu khadilo dia gudibulumuisa.’ Ishigo phamba akulu adi naye gukuatesa aphangi awa, uvi mukut’etu agasue tudi nu ginemo gia guakuatesa. Tuajiya guahana gikhesa gula tudi guamonesa haphelo egi tuana gudisagesa mukunda nu ene. Yehowa wana tshigina egi tumonese imeme yenji egi wana guyizumba muavula nu wana guyizula nu ndando. (Ish. 19:17) Tuajiya nji gukuatesa aphangi’etu a mala nu a akhetu, gula tudi nu khadilo dia gudibulumuisa nu tushigo gudihala mukunda nu ndaga tuana kalagala. Tushigo naye gutshita ndaga jiajiya gutuma aphangi ako ha gutangiza egi tudi nu ndando yavula gubalega, handaga yajiya guatuma ha gutuvuila ginjiongo. Uvi tudi naye gukalegela ndunge nu ujiyi wetu ha gukolesa aphangi a mala nu a akhetu.—1 Phet. 4:10, 11.

12. Mukunda natshi athu a gudibulumuisa akhalele muya gudi Yesu? (Tala gifuanesa holu dia gizula.)

¹² Tuajiya guzula malongo avula mu luholo Yesu wakhalele mukalegela alandudi enji ndaga. Ajiya nji gutukuatesa ha gujiya luholo tuajiya gukalegela athu ako ndaga. Yesu wakhalele wagubalega athu agasue ha mavu, uvi wakhalele muthu ‘watuluga nu wa mutshima wa gudibulumuisa.’ (Mat. 11:28-30) Akhalelego gudihala mukunda nu ndunge jienji nga ndaga jiavula akhalele mujiya. Tangua wakhalele mulongesa, wakhalele mukalegela mbimbi jialeba nu ifezegeselo yinyi athu ajiya gukotelesa. (Luka 10:21) Yesu wakhalelego gifua mafumu a ikombelelo ya enya Yuda, uvi wakhalele mumonesa athu egi adi nu ndando yavula gu meso a Nzambi. (Yone 6:37) Wakhalele guakalegela ndaga nu ginemua giagasue.

13. Luholo lutshi Yesu wamonesele gisemo nu guzumba gudi alandudi enji?

¹³ Yesu wamonesele alandudi enji gisemo nu guzumba mu luholo wakhalele guakalegela ndaga. Wakhalele mujiya egi mukut’awo agasue ana khala ndo nu ndunge jia luholo lumoshi nu ana tagana ndo nu ndaga jia luholo lumoshi. Ajiyilego gutagenesa inemo ya luholo lumoshi nu ajiyilego gukalagala mudimo wa gulongesa luholo lumoshi. Uvi wakhalele nu gusuanguluga luholo alandudi enji akhalele mukalagala mudimo nu ngolo jiawo jiagasue. Wamonesele ndaga yene mu gifezegeselo giahanele muene gia talanta. Mu gifezegeselo giene fumu wahanele muthu wagasue mudimo ‘gifua muakhalele ndunge jienji.’ Mukatshi dia ahiga ahetele talanta jiko holu, mumoshi wahetele jiavula gubalega muko. Uvi fumi’awo waashimanele muyadi awo agasue. Wazuelele egi: ‘Kiawaha, udi muenya mudimo wabonga nu wa gujinginyina!’—Mat. 25:14-23.

14. Luholo lutshi tuajiya gulandula gifezegeselo gia Yesu Klisto?

¹⁴ Tangua diagasue Yesu wana gutukalegela ndaga nu gisemo nu guzumba guagasue. Udi mujiya egi mukut’etu agasue tushigo nu ndunge jia luholo lumoshi nu tuana tagana ndo nu ndaga jia luholo lumoshi. Wana suanguluga tangua tuana kalagala mudimo nu ngolo jietu jiagasue. Hene, esue nji tudi naye gulandula gifezegeselo gia Yesu Klisto tangua tudi mukalegela athu ako ndaga. Tuajiyilego gumonesa egi, phangi mumoshi ashigo nu ndando nga gumuhana musonyi handaga ashigo mujiya gukalagala ndaga imoshi gifua luholo aphangi ako ana  guyikalagala. Uvi tudi naye gushimana aphangi’etu a mala nu a akhetu mu luholo ana kalagala ngolo ha gukombelela Yehowa.

15-16. Gubonga gutshi phangi wa mukhetu mumoshi wahetele tangua adihagele mafelela anyi ajiya gutagenesa?

¹⁵ Gula tudi gudihagela mafelela a mu nyuma, mbatujinga muabonga, mbatukhala nu gusuanguluga mu monyo wetu. Uvi tudi naye gudihagela mafelela anyi tuajiya gutagenesa. Tushigo naye gudihagela mafelela handaga athu ako adihagela mafelela ene. Gutshita ngenyi guashiya gututuma ha guvua gikenene nga ha guleba muila. (Luka 14:28) Tutadilenu gifezegeselo gia phangi wa mukhetu Midori udi muvundji wa njila.

¹⁶ Tangua phangi Midori wakhalele mona wazonda sh’enji munu ashigo Temue wa Yehowa wakhalele gumufuanesa nu ana ako, wakhalele gumufuanesa nji nu ana khalasa diawo. Phangi Midori udi muzuela egi: “Ngakhalele gudimona egi ngushigo nu ndando.” Uvi tangua akudile wasendesele gudimona egi udi nu ndando. Udi muzuela egi: “Ngakhalele mutanga Biblia lusugu nu lusugu, yakhalele gungukuatesa ha gukhala nu guhuima nu ha gudivua egi Yehowa wana gunguzumba.” Phangi Midori wadihagele mafelela anyi ajiya gutagenesa, wakhalele mutoga ukuateshi gudi Yehowa tangua diagasue mu gisambu ha gutagenesa mafelela ene. Gutshita ngenyi guamukuatesele ha gukhala nu gusuanguluga mukunda nu ndaga ana kalagala mu mudimo wa Yehowa.

17. Itshi yajiya gutukuatesa ha gusombegesa matangi’etu? Gubonga gutshi mbatuheta?

¹⁷ Yana guzula tangua ha gusombegesa luholo tuana guditadila. Uvi Yehowa udi gutuwambela egi: ‘Landulenu gubua athu ahe-ahe mu ngolo jidi mutuameza matangi’enu.’ (Ef. 4:23, 24) Hene, tudi naye gutshita gisambu, gutanga mbimbi ya Nzambi nu guyitangiza. Landula gukalagala ndaga eji nu toga Yehowa ha guguhana ngolo. Nyuma ya  Nzambi mbayigukuatesa ha gubinga khadilo dia gudifuanesa nu athu ako. Yehowa mbawugukuatesa ha gujiya gula udi nu khadilo dia lulendo nu dia ginjiongo. Mbawugukuatesa nji ha gusombegesa muphushi.

18. Luholo lutshi mbimbi jidi mu 2 Gudilanduluila 6:29, 30, jiajiya guguhana ngolo?

¹⁸ Tanga 2 Gudilanduluila 6:29, 30. Yehowa wana tala mitshima yetu. Wana jiya egi tuana tshita ngolo ha gubemba matangi abola a ha mavu awa nu ha gusombegesa makalagelo etu abola. Yehowa wana gutuzumba muavula diago tangua wana mona egi tuana kalagala ngolo ha gusombegesa.

19. Hana gifezegeselo gidi mumonesa luholo Yehowa wana gudisagesa mukunda nu esue?

¹⁹ Yehowa udi mukalegela gifezegeselo gidi mumonesa guzumba guakhala mukatshi dia mama nu mun’enji, ha gutumonesa luholo ana gudisagesa mukunda nu esue. (Yesh. 49:15) Tutadilenu gifezegeselo gia mukhetu mumoshi mu jina dia Rachel. Wasonegele egi: “Mun’ami wa mukhetu Stephanie wavualewe gabisu. Tangua ngamumonele hugo dia thomo wakhalele wazonda nu ula lege-lege. Uvi munganga wanguhanele njila ya gumubata lusugu luagasue tangua tuakhalele gu hôpital. Tuakalegele nenji mbeji imoshi guene. Ame nu mun’ami tuabuile diago mafuta akola mu masugu azonda tuabalegesela hamoshi. Henyaha udi nu ivo 6, wana khala diago wazonda gubalega ana agasue a gindongo gienji. Uvi ngana gumuzumba muavula diago handaga wana kalagala ngolo ha gujinga, wana gungusuanguluisa diago muavula!” Tuana khala nu gusuanguluga guavula ha gujiya egi Yehowa wana gutuzumba muavula handaga tuana kalagala ngolo ha gumukombelela nu monyo wetu wagasue!

20. Mukunda natshi akombeledi a Yehowa adi naye gukhala nu gusuanguluga?

²⁰ Luholo udi mukombeledi wa Yehowa, udi nu ndando yavula mu ulondegi wenji. Gushigo nga muthu mumoshi udi gifua aye mu ulondegi wa Yehowa. Yehowa wagunanelego gudi muene handaga wakhalele ya gubalega athu ako. Uvi wagunanele handaga wamonele egi udi nu khadilo dia gudibulumuisa, udi hehi ha gulonguga ndaga jiavula jiamutadila nu ha gusombegesa. (Ngi. 25:9) Khala nu gutshigina egi, Yehowa wana khala nu gusuanguluga tangua wana tshita ngolo ha gumukombelela. Khadilo diaye dia gukolesele nu dia gusala ya gujinginyina gudi muene didi mumonesa egi udi nu ‘mutshima wabonga diago.’ (Luka 8:15) Hene, landula gukalegela Yehowa mudimo nu ngolo jiaye jiagasue. Mbawukhala nu gusuanguluga ‘mukunda nu midimo [yaye hakhaye].’