1. Why nao Jehovah no comparem iumi witim olketa narawan?

JEHOVAH no laekem evri samting for semsem. Iumi savve lo datwan bikos hem wakem staka difren kaen plant, animal, and nomata iumi olketa man iumi no semsem. No eniwan semsem olsem iumi. So hard for Jehovah comparem iumi witim olketa narawan. Hem savve gud lo wanem kaen man nao iumi. (Fas Samuel 16:7) Hem savve tu lo wanem iumi fit for duim, olketa samting wea iumi no savve duim, and wei blo famili blo iumi. Jehovah no askem iumi for duim wanem iumi no fit for duim. So iumi tu laek for followim example blo hem. Then bae iumi garem “gudfala tingting,” and no tinghae tumas lo iumiseleva or ting daonem iumiseleva.—Rome 12:3.

2. Why nao iumi shud no comparem wanem iumi duim witim olketa narawan?

² Hem gud samting for lane from example blo brata or sista wea duim gud ministry. (Heb. 13:7) Maet iumi luksavve lo samfala samting wea iumi savve kamap gud lo hem lo ministry. (Phil. 3:17) Hem gud for followim example blo narawan, bat no comparem iumiseleva witim hem and tingse iumi mas barava olsem hem bikos datwan savve mekem iumi jealous, wikdaon, or feel iusles. And olsem iumi lanem lo study bifor diswan, sapos iumi trae for winim olketa brata and sista lo kongregeson bae Jehovah no hapi lo iumi. Dastawe Jehovah talem iumi for duim diswan: “Man mas lukluk gud long wanem hemseleva duim, then bae hem hapi long wanem hem duim. Hem shud no comparem wanem hem duim witim wanem narawan duim.”—Gal. 6:4.

3. Olketa wanem spiritual goal nao iumi kasem finis wea mekem iumi hapi?

 ³ Jehovah laekem iumi for hapi bikos iumi duim best blo iumi for hem. Olsem example, sapos iumi baptaes finis iumi shud hapi bikos iumi kasem datfala goal! Iumi duim datwan bikos iumi lovem Jehovah. Bihaen iumi baptaes maet iumi kasem samfala nara goal. Olsem example, maet firstaem iumi faendem hem hard for duim Bible reading and duim study seleva, bat distaem iumi enjoyim datwan. Maet distaem iumi no hol bak for storyim feeling blo iumi taem iumi prea lo Jehovah. (Sams 141:2) Or maet distaem iumi savve story gud witim olketa haosholder, and savve hao for iusim olketa video and pablikeson for ministry. And from Jehovah helpem iumi, maet distaem iumi kamap gudfala hasband, waef, or parents. Iumi fit for hapi and satisfae from iumi kasem olketa goal hia.

4. Wanem nao bae iumi storyim lo disfala study?

⁴ Iumi savve helpem olketa narawan for hapi from olketa duim best blo olketa for Jehovah. Iumi savve helpem olketa tu for no comparem olketa seleva witim narawan. Lo disfala study, bae iumi storyim hao parents helpem pikinini, hasband and waef helpem each other, and olketa elder and narawan helpem olketa brata and sista for hapi lo wanem olketa duim and no comparem wanem olketa duim witim narawan. Bae iumi storyim tu samfala Bible principle wea savve helpem iumi for markem goal wea iumi fit for kasem.

5. Olsem Ephesus 6:4 storyim, wanem nao parents no laek for duim?

⁵ Parents no laek for comparem wanfala pikinini witim nara pikinini, or expectim pikinini for duim samting wea hem no fit for duim. Sapos parents duim datwan pikinini savve feel wikdaon. (Readim Ephesus 6:4.) Wanfala sista wea nem blo hem Sachiko * sei: “Olketa teacher expectim mi for garem olketa gud mark. Mami tu laekem mi for barava duim gud lo skul mekem teacher and dadi, wea no Witness, for tinghae lo truth. Mami sei mi mas kasem hae mark lo evri exam,  bat mi no fit for duim datwan. Mi no skul distaem, bat from mami and olketa teacher no hapi lo wanem mi duim lo datfala taem, mi tingse Jehovah tu no hapi lo mi.”

6. Wanem nao parents savve lanem from toktok lo Sams 131:1, 2?

⁶ Parents savve lanem gud samting from toktok lo Sams 131:1, 2. (Readim.) From King David hem hambol, hem luksavve hem no fit for duim samfala samting. Wanem nao parents savve lanem from toktok blo David? Sapos parents hambol olketa bae luksavve olketa no fit for duim samfala samting, and shud no expectim pikinini for duim samting wea hem no fit for duim. Parents savve helpem pikinini for no tingse hem iusles taem olketa markem goal wea hem fit for kasem. Wanfala sista wea nem blo hem Marina sei: “Mami blo mi no savve sei thrifala brata blo mi or olketa nara pikinini duim samting wea gud winim mi. Hem helpem mi for luksavve evriwan gud lo samfala samting and Jehovah lovem evriwan wea worshipim hem. Datwan barava helpem mi for no comparem wanem mi duim witim olketa narawan.”

7-8. Hao nao hasband savve showimaot hem tinghae lo waef blo hem?

⁷ Christian hasband mas tinghae lo waef blo hem. (1 Pet. 3:7) Olsem example, hasband wea tinghae lo waef bae no expectim waef for duim samting wea hem no fit for duim. And bae hem no sei olketa nara woman gud winim waef blo hem. Why nao olsem? Hasband blo Rosa wea hem no wanfala Witness savve sei olketa nara woman gud winim Rosa. Datwan mekem Rosa for feel iusles. Hem sei, “Mi evritaem needim samwan for storyim hao Jehovah tinghae lo mi.” Hasband shud no treatim waef olsem. Hasband wea tinghae lo waef blo hem bae stap gud witim waef, and Jehovah bae hapi lo hem. *

⁸ Hasband wea tinghae lo waef bae praisem and talem waef hem lovem hem. (Provebs 31:28) Hasband blo Katerina wea iumi storyim lo article bifor diswan helpem Katerina for no ting daonem hemseleva. Taem Katerina hem pikinini, mami blo hem savve sei olketa fren blo hem and olketa nara gele gud winim hem. So datwan mekem Katerina for gohed ting daonem hemseleva, nomata taem hem kamap Witness finis! Bat hasband blo hem helpem hem for no garem datkaen tingting. Katerina sei: “Hasband blo mi lovem mi, hem praisem mi for olketa gud samting wea mi duim, and hem prea for mi. Hem talem tu hao Jehovah lovem mi.”

9-10. Hao nao olketa elder helpem wanfala sista wea comparem hemseleva witim olketa narawan?

⁹ Hao nao olketa elder savve helpem olketa wea ting daonem olketa seleva? Tingim experience blo Hanuni, wanfala pioneer sista wea taem hem pikinini parents blo hem no savve praisem hem. Hem sei: “Taem mi smol mi savve shame and mi tingse olketa nara pikinini gud winim mi. Mi evritaem comparem miseleva witim olketa narawan.” Nomata bihaen Hanuni kam insaed lo truth, hem gohed for duim olsem. Datwan mekem hem feel olsem wanem hem duim lo pioneer waka hem no barava gud. Bat gogo  hem changem tingting blo hem, and distaem hem hapi lo pioneer waka blo hem. Hu nao helpem Hanuni?

¹⁰ Hem sei olketa elder barava helpem hem. Olketa talem hem olketa hapi hem stap insaed kongregeson and praisem hem for gudfala example blo hem. Hanuni sei: “Tu-thri taem olketa elder askem mi for encouragem nara sista. Diswan mekem mi for feel hapi. Mi tingim taem wea olketa elder praisem mi from mi encouragem samfala young sista. Olketa readim 1 Thessalonica 1:2, 3 and datwan barava encouragem mi! From olketa elder hia tingim mi, distaem mi enjoyim waka wea mi duim insaed organization blo Jehovah.”

11. Hao nao iumi savve helpem olketa wea feel “sore tumas” wea Sams 34:18 storyim?

¹¹ Readim Sams 34:18. Jehovah barava tingim olketa wea feel “sore tumas.” Olketa elder and iumi evriwan savve encouragem olketa brata and sista blo iumi wea feel sorre. Wanfala wei iumi savve encouragem olketa hem for showimaot iumi tingim olketa. Taem iumi duim datwan, olketa bae luksavve Jehovah tingim olketa tu. (Provebs 19:17) Sapos iumi hambol and no mekhae lo olketa gud samting iumi duim lo kongregeson datwan tu savve helpem olketa. Iumi no laekem olketa for comparem olketa seleva witim iumi. Iumi laekem evri samting iumi talem and duim for encouragem olketa brata and sista.—1 Pet. 4:10, 11.

12. Why nao pipol wea hambol no fraet lo Jesus? (Lukim piksa lo front page.)

¹² Iumi savve lane from example Jesus lo hao hem treatim olketa follower blo hem. Nomata hem garem bigfala savve “hem hambol.” (Matt. 11:28-30) Hem no mekhae lo hemseleva. Taem Jesus teachim pipol, hem iusim simpol toktok and olketa tokpiksa wea isi for minim and wea kasem heart blo pipol wea hambol. (Luke 10:21) Jesus no olsem olketa wea teachim law and olketa Pharisee wea mekem pipol feel olsem God no tinghae lo olketa. (John 6:37) Hem showimaot hem respectim evri difren kaen pipol.

13. Wanem nao Jesus duim wea showimaot hem kaen and lovem olketa follower blo hem?

¹³ Jesus kaen and showimaot love lo olketa follower blo hem bifor. From olketa follower garem difren savve and laef blo olketa no semsem, Jesus savve each wan bae gud lo olketa difren waka and samfala bae garem moa taem for duim ministry winim narawan. Nomata olsem, hem tinghae lo hao olketa duim best blo olketa. Jesus mekhae lo datwan lo tokpiksa abaotem selen wea olketa wakaman kasem. Boss givim selen lo thrifala wakaman for duim bisnis witim selen “followim wanem olketa fit for duim.” Tufala nomoa duim bisnis witim selen hia bat wanfala givim go bak lo boss big selen winim narawan. Nomata olsem, boss praisem tufala evriwan and sei: “Gud tumas! Iu barava faithful long wanem iu duim witim selen hia.”—Matt. 25:14-23.

14. Hao nao iumi savve followim example blo Jesus for kaen lo narawan?

¹⁴ Jesus kaen and showimaot love lo iumi tu. Bat nomata iumi garem difren savve and laef blo iumi no semsem, hem hapi from iumi duim best blo iumi. Iumi laek for followim example blo Jesus for kaen lo narawan, and no talem or duim samting wea mekem brata or sista ting daonem hemseleva from hem no savve duim wanem olketa narawan savve duim.  Bat iumi laek for praisem olketa from olketa duim best blo olketa for worshipim Jehovah.

15-16. Wanem gud samting nao Midori kasem from hem markem olketa goal wea hem fit for kasem?

¹⁵ Taem iumi garem olketa spiritual goal bae iumi hapi. Hem important for markem olketa goal wea iumi fit for kasem, and no tingse iumi mas garem sem goal olsem narawan. Bat sapos iumi markem goal wea iumi no fit for kasem bae datwan mekem iumi wikdaon. (Luke 14:28) Tingim example blo Midori, wanfala pioneer sista.

¹⁶ Taem Midori smol, dadi blo hem wea no Witness savve sei brata and sista blo hem and olketa skul fren gud winim hem. Midori sei: “Mi savve feel iusles.” Taem hem big, hem start for lusim datfala feeling. Wanem nao helpem hem? Midori sei: “Mi readim Bible evriday and datwan helpem mi for no ting daonem miseleva and for luksavve Jehovah lovem mi.” Midori markem olketa goal tu wea hem fit for kasem, and askem Jehovah for helpem hem for kasem olketa goal hia. Datwan mekem Midori hapi from hem duim best blo hem for Jehovah.

17. Wanem nao bae helpem iumi for ‘gohed garem niu tingting,’ and wanem nao bae kamaot from datwan?

¹⁷ Hem no isi for lusim wei for comparem wanem iumi duim witim narawan. Dastawe Jehovah encouragem iumi for ‘gohed garem niu tingting.’ (Eph. 4:23, 24) For duim datwan, iumi need for prea, studyim Bible, and ting raonem wanem iumi lanem. Gohed for duim  olketa samting hia, and depend lo Jehovah for helpem iumi. Hem bae iusim holy spirit for helpem iumi for no tingse narawan hem gud winim iumi or iumi gud winim narawan. Jehovah bae helpem iumi for luksavve sapos iumi praod or jealous, and for lusim olketa nogud wei hia.

18. Hao nao toktok lo Mektu Kronikols 6:29, 30 comfortim iumi?

¹⁸ Readim Mektu Kronikols 6:29, 30. Jehovah luksavve iumi duim best blo iumi for worshipim hem, and nomata iumi no perfect iumi waka hard for no olsem pipol lo world. Hem barava lovem iumi from iumi duim datwan.

19. Wanem example nao Jehovah iusim for showimaot hem barava lovem iumi?

¹⁹ Jehovah iusim example blo mami witim baby blo hem for showimaot hem barava lovem iumi. (Aesaea 49:15) Tingim example blo Rachel and baby blo hem. Hem sei: “Taem baby gele blo mi Stephanie hem born, hem smol tumas bikos hem born early. Nomata hem stap insaed machine wea helpem hem for brith for wanfala month, evriday olketa nurse letem mi for karem hem for lelebet taem. Taem mi duim olsem mi lovem tumas baby blo mi. Hem six years distaem bat no big olsem olketa pikinini wea sem age olsem hem. Nomata olsem, mi hapi tumas lo hem and mi barava lovem hem!” Iumi hapi for minim bigfala love wea Jehovah garem for iumi, especially taem hem lukim iumi duim best blo iumi for worshipim hem.

20. Why nao iumi garem gudfala reason for hapi lo wanem iumi duim for Jehovah?

²⁰ Jehovah ting lo each wan wea worshipim hem spesol and hem tinghae lo iumi wanwan. Jehovah leadim iumi kam lo hem no from iumi gud winim nara pipol, bat bikos iumi garem gudfala heart, iumi hambol, and iumi willing for change. (Sams 25:9) Iumi savve sure Jehovah hem hapi taem iumi duim best blo iumi for worshipim hem. From iumi faithful and no givap, datwan showimaot iumi “tinghae” lo truth. (Luke 8:15) So gohed duim best for Jehovah. Then bae iumi garem gudfala reason for “hapi long wanem [iumi] duim.”