1. Eaa ra a Iehova kare e akaaite ia tatou ki tetai ke?

E REKA ana a Iehova i te au mea tukeke. Ka kiteaia teia i roto i tana au mea i anga, kapiti mai te tangata. Kare tatou e aiteite ana e kare roa a Iehova e akaaite ia koe ki tetai ke. Te kite maira aia i toou ngakau. (1 Samu. 16:7) Kite katoa ra aia i toou maroiroi, paruparu e toou tupu anga. Kare aia e pati maata mai i taau ka rauka i te rave. Kia akara tatou ia tatou uaorai mei ta Iehova e kite ra. Me rauka “te manako meitaki,” kare tatou e manako maata me kore e manako puapinga kore ia tatou uaorai.​—Roma 12:3.

2. Eaa ra tatou kare e akaaite ia tatou uaorai ki tetai ke?

² E tika, ka puapingaia tatou me aru i te akaraanga meitaki o te au taeake e te au tuaine i roto i te angaanga tutu aere. (Ebe. 13:7) Ka rauka i reira ia tatou kia akameitaki atu i tetai au tuanga o ta tatou angaanga tutu aere. (Phili. 3:17) Inara e tuke te aru anga i te akaraanga meitaki o tetai tangata, ki te akaaite anga i toou uaorai puapinga kiaia. Ka akatupu teia manako i te tu vareae, te taitaia, e kia manako puapinga kore ia koe uaorai. Mei ta tatou i apii mei te atikara i mua ake, me tarere tatou ki tetai ke i roto i te putuputuanga, ka takinoia to tatou turanga pae vaerua. No reira, karanga a Iehova: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”​—Gala. 6:4.

3. Eaa te au taui anga pae vaerua taau i rave tei akatupu i te mataora?

³ Inangaro a Iehova kia rekareka koe i taau uaorai tavini anga. Ei akaraanga, me kua papetitoia koe, kia mataora koe e kua taeria teia akakoroanga! Naau uaorai i rave i teia ikianga. Kua rave koe i te reira no toou inangaro i te Atua. Akamanako i te au mea meitaki taau i rave mei tera taime mai. Ei akaraanga, kua maata atu ainei toou inangaro i te  apii e te tatau i te Pipiria? Kua meitaki atu ainei taau au pure ngakau tae? (Sala. 141:2) Kua nakiro ainei koe i te tutu aere e te taangaanga i ta tatou au apinga apii? E me e ngutuare tangata toou, kua tauturu ainei a Iehova ia koe kia riro mai ei tane, ei vaine me kore ei nga metua meitaki? Kia mataora e kia mareka ua rai koe i te au taui anga taau i rave.

4. Eaa ta tatou ka uriuri i roto i teia atikara?

⁴ Ka tauturu tatou i tetai ke kia rekareka i ta ratou uaorai tavini anga. Ka tauturu katoa tatou ia ratou kia kore e akaaite ia ratou ki tetai ke. I teia atikara, ka uriuri tatou akapeea te au metua me tauturu i ta ratou tamariki, akapeea te au tokorua akaipoipo me tauturu i tetai e tetai, e akapeea te aronga pakari me tauturu i te au taeake e te au tuaine. E ka uriuri katoa tatou i te au kaveinga Pipiria te ka tauturu i te akanoo i te au akakoroanga tau.

5. Ia Ephesia 6:4, eaa te au mea ta te au metua ka kopae?

⁵ Kia matakite te au metua, auraka e akaaite i ta ratou tamariki ki tetai ke e te pati maata atu i ta ratou ka rauka i te rave. Ka riro te akaaite tau kore e te marō anga i te tamariki i te akataitaia ia ratou. (E tatau ia Ephesia 6:4.) Karanga te tuaine ko Sachiko *: “Kua marō toku puapii kia meitaki atu au i toku au oa. E kua inangaro toku mami kia meitaki au i te apii e kia mareka toku tati, kare aia i te Kite. Kua inangaro aia kia pāti au i taku tarere i te apii e 100 patene, inara kua manako au e kare e rauka iaku te reira. Noatu kua roa toku akaruke anga i te apii, te manako nei rai au me kua rava taku e rave ra no Iehova.”

6. Eaa ta te au metua ka apii mei ia Salamo 131:1, 2?

⁶ Ka kitea te apiianga puapinga no te au metua i roto ia Salamo 131:1, 2. (E tatau.) Karanga te Ariki ko Davida e kare aia “i umuumu i te au mea mamaata” e te kimi i te au mea teitei roa atu. Riro tona tu akaaka e te tau i te akamarū iaia. Eaa ta te au metua ka apii mai mei ta Davida tuatua? Kia akaari te au metua i te tu akaaka e te tau kia ratou uaorai e ta ratou tamariki. Kia akamaroiroi te au  metua i ta ratou tamariki na te āriki anga i to ratou tu maroiroi e te tu paruparu me akanoo i ta ratou au akakoroanga. Karanga te tuaine ko Marina: “Kare rava toku mami e akaaite iaku ki toku au tungane e ki tetai tamariki ke. Kua apii mai aia e e tukeke te tu karape o te tangata e te akaperepere ra a Iehova ia ratou tataki tai. No reira kare au e akaaite ana iaku ki tetai ke.”

7-8. Akapeea tetai tane me akangateitei i tana vaine?

⁷ Ka anoanoia te tane Kerititiano kia akangateitei i tana vaine. (1 Pete. 3:7) Te tu ngateitei, te ō maira te tu takinga meitaki e te aroa. Ei akaraanga, ka akangateitei te tane i tana vaine na te akaperepereanga iaia. Kare aia e pati maata atu i tana ka rauka i te rave. E kare rava e akaaite iaia ki tetai vaine ke. Me pera aia, eaa ta teia akaaiteanga ka akatupu? E akaaite ana te tane a Rosa, kare i te Kite, iaia ki te au vaine ke atu. Kua akatupu tana tuatua akakino i te manako puapinga kore kia Rosa. Karanga aia, “E anoano putuputu ana au i tetai akapapuanga e te akaperepere maira a Iehova iaku.” No reira, kia akangateitei te tane Kerititiano i tana vaine. Me rave aia i te reira ka meitaki tona pirianga ki tana vaine e kia Iehova. *

⁸ Ko te tane tei akangateitei i tana vaine, ka akaari aia i tona inangaro nona, e ka akameitaki iaia. (Mase. 31:28) Kua tauturu te tane a Katerina, tei taikuia i te atikara i mua ake, iaia kia kopae i te au manako puapinga kore. I tona tamariki anga, e taakama ana tona mami iaia e ka akaaite iaia ki te au tamariki tamaine ke, e ki tona au oa. Tei tupu, kua akamata a Katerina i te akaaite iaia uaorai ki tetai ke—te rave nei rai aia i te reira i muri ake i tona āriki anga i te tuatua mou! Inara, kua tauturu tana tane iaia kia kopae i te au manako puapinga kore e kia rauka te manako tau iaia uaorai. Karanga aia: “Te inangaro ra aia iaku, ka akameitaki mai no te au mea meitaki taku i rave, e ka pure aia noku. Ka akakite ua rai aia i to Iehova au tu manea e ka tauturu i te akatano i toku aerenga manako.”

9-10. Akapeea te aronga pakari te tauturu anga i tetai tuaine kia kore e akaaite iaia uaorai ki tetai ke?

⁹ Akapeea te aronga pakari me tauturu i te aronga te akaaite ra ia ratou uaorai ki tetai ke? Akamanako i tei tupu ki te tuaine ko Hanuni. Karanga aia: “E tu akama ua toku e kua manako e e meitaki atu te au tamariki ke iaia. Kua akamata au i te akaaite iaku uaorai ki tetai ke mei toku tamariki anga mai.” Noatu tei roto aia i te tuatua mou i teianei, te akaaite nei rai a Hanuni iaia uaorai ki tetai ke. Tei tupu, kua manako aia e kare ona puapinga i roto i te putuputuanga. Inara, i teianei, te tavini ra aia ei painia mataora. Eaa tei tauturu iaia kia taui i tona aerenga manako?

¹⁰ Karanga a Hanuni e kua tauturu te aronga pakari iaia. Oronga ratou i te manako papu kiaia e kua akameitaki iaia no tona akarongo tiratiratu. Tata aia: “Kua pati putuputu te aronga pakari iaku kia akamaroiroi i te au tuaine tei anoano i te tauturu. Riro teia i te akapapu e puapinga  au i roto i te putuputuanga. Kua akameitaki mai te aronga pakari iaku no te akamaroiroi i te au tuaine mapu. E oti, tatau ratou ia 1 Tesalonia 1:2, 3. Pakia tikai toku ngakau! Ka akameitaki au i te aronga pakari, e i teianei te akaperepere nei au i taku apainga i roto i te akaaerenga a Iehova.”

11. Ia Isaia 57:15, akapeea tatou me tauturu i te aronga “tataraara, e tei akaaka te vaerua”?

¹¹ E tatau ia Isaia 57:15. Inangaro maata a Iehova i te aronga “tataraara, e tei akaaka te vaerua.” Ka rauka ia tatou pouroa i te akamaroiroi i te au taeake e te au tuaine. Tetai ravenga no te akamaroiroi ia ratou, na te akaari anga i to Iehova inangaro no tana au mamoe akaperepere. (Mase. 19:17) Ka rauka katoa ia tatou i te akaari i te tu akaaka e te tau. Kare tatou e inangaro kia akapaapaaia mai tatou no te mea ka akatupu teia i te vareae i roto i tetai ke. Mari ra, e taangaanga i to tatou kite karape no te akamaroiroi i tetai e tetai.​—1 Pete. 4:10, 11.

12. Eaa te aronga akaaka i akavaitata atu ei kia Iesu? (Akara i te tutu i te kapi mua.)

¹² E maata ta tatou ka apii mai mei te tu i akono ei a Iesu i tana au pipi. Koia te tangata maata rava atu tei ora ana. Noatu rai, e tangata ‘maru aia e te ngakau akaaka.’ (Mata. 11:28-30) Kare aia i akapaapaa iaia uaorai no tona tu kite maata e te pakari. Kua apii aia i te tangata na te au tuatua e te au akatutuanga mama ua tei itae i te ngakau o te aronga akaaka. (Luka 10:21) Ei tuke ki te au arataki akonoanga, kare roa a Iesu i maani i te tangata kia manako e puapinga kore ratou ki te Atua. (Ioa. 6:37) Mari ra, kua akangateitei aia ia ratou.

13. Akapeea to Iesu tu takinga meitaki e te aroa te kitea anga na te tu i akono ei aia i tana au pipi?

¹³ Kua kiteaia to Iesu tu takinga meitaki e te aroa na te tu i akono ei aia i tana au pipi. Kua kite aia e kare to ratou kite karape e te turanga e aiteite ana. No reira, tukeke ta ratou apainga; tuke katoa ta ratou angaanga tutu aere. Inara, kua mataora aia i ta ratou tauta anga. Kua akaariia mai to Iesu tu mārama i roto i tana akatutuanga o te tareni. I roto i teia akatutuanga, kua oronga te pu i te angaanga “tei tau katoa i aua nga tangata ra.” E maata atu ta tetai tangata tareni i rauka i ta tetai. Inara, kua aiteite te akameitakianga a te pu kia raua: “Kua tika rava, e teianei tavini meitaki e te pikikaa kore.”​—Mata. 25:14-23.

14. Akapeea tatou me akono i tetai ke mei ia Iesu rai?

¹⁴ Ka akono a Iesu ia tatou ma te tu takinga meitaki e te aroa. Kite aia e tukeke to tatou au tareni e to tatou turanga, e ka mataora aia me rave tatou i ta tatou ka rauka. E mea meitaki kia akono tatou i tetai ke mei ia Iesu rai. Kare rava tatou e inangaro kia manako puapinga kore te au taeake e te au tuaine ia ratou uaorai me kore kia taakama ia ratou. Mari ra, e kimi tatou i te au atianga no te akameitaki ia ratou no ta ratou ka rauka i te rave no Iehova.

15-16. Akapeea tetai tuaine i puapingaia ai mei te au akakoroanga meitaki tana i akanoo?

¹⁵ Ka oronga mai te au akakoroanga pae vaerua i te aratakianga meitaki kia puapinga te oraanga. Inara, mea puapinga kia akanoo i te au akakoroanga tei tau ki to tatou kite karape e te turanga. Kare tatou e inangaro kia paruparu e kia  taitaia tatou. (Luka 14:28) Akamanako i te akaraanga o te tuaine painia ko Midori.

¹⁶ Kare te tati o Midori i te Kite, e kua taakama aia ia Midori na te akaaite anga iaia ki tona au tungane e te au oa apii. Karanga a Midori, “Kua manako puapinga kore au iaku uaorai.” Inara, te maata anga mai aia, kua rauka ia Midori te manako papu. Karanga aia, “Ka tatau au i te Pipiria i te au rā ravarai kia rauka te ngakau ‘au e kia kite i to Iehova inangaro noku.” Akanoo katoa aia i te au akakoroanga meitaki e kua pure no te tauturu kia taeria te reira. Tei tupu, kua mataora a Midori i tana tavini anga.

17. Akapeea e rauka ai ia tatou te ‘akaou i to tatou vaerua ra i te ngakau,’ e eaa te ka tupu?

¹⁷ Kare te au manako puapinga kore e ngaro vave. Akamaroiroi mai a Iehova: “Kia akaouia oki kotou i to kotou vaerua ra i te ngakau.” (Ephe. 4:23, 24) Inara kia rauka te reira, ka anoanoia tatou kia pure, kia apii i te tuatua a te Atua e kia akamanako oonu i te reira. E tauta i te rave i teia au mea e e pati i ta Iehova tauturu. Ka tauturu Tona vaerua tapu ia koe kia kore e akaaite ia koe ki tetai ke. Ka tauturu katoa a Iehova ia koe kia kite e kia kiriti tumu i te tu vareae e te tu akateitei me tupu ki roto i toou ngakau.

18. Akapeea a 2 Paraleipomeno 6:29, 30 me akapumaana ia koe?

¹⁸ E tatau ia 2 Paraleipomeno 6:29, 30. Kua kite a Iehova i to tatou ngakau. Kua kite aia i to tatou tu paruparu​—te timataanga o teia ao kino e to tatou uaorai tu apa. Me kite mai a Iehova i ta tatou tauta anga i te tamaki i te au akakeuanga tarevake, ka tupu ua tona inangaro no tatou.

19. Akapeea a Iehova te akatutuanga mai i tona inangaro no tatou?

 ¹⁹ Ei akatutu i tona inangaro no tatou, kua taangaanga a Iehova i te pirianga o tetai mama ki tana pepe. (Isa. 49:15) Akamanako i te akaraanga o Rachel. Tata aia: “Kua anau mai taku pepe ko Stephanie noatu kare i tae tona tuatau no te anau. Te kite anga au iaia, e pepe varevare ua aia. Inara kua akatika te taote kia mou au iaia i te marama mua o tona anau anga. Akatupu teia i te pirianga vaitata tikai i rotopu ia maua. E ono ona mataiti i teianei e e meangiti atu aia i te au tamariki i tona uaorai mataiti. Noatu te reira, inangaro maata au iaia no te mea kua tauta aia kia ora e kua akatupu aia i te mataora kiaku!” Pumaana tikai te kite i to Iehova inangaro maata no tatou, me kite aia ia tatou e tauta ra i te tavini iaia ma te ngakau katoa!

20. Ei tavini tiratiratu no Iehova, eaa te tumu ka rekarekaʼi koe?

²⁰ Ei tavini no Iehova, te akaperepere ra aia ia koe. Kare a Iehova i akavaitata ia koe kiaia no te mea e meitaki atu koe i toou au oa. Mari ra, kua kite aia i toou ngakau e e tangata marū koe te ka rauka Iaia i te apii. (Sala. 25:9) Ka papu ia koe e te akaperepere maata ra aia i taau tauta anga i te tavini iaia. Kua akapapu mai toou tu akakoromaki e te tiratiratu e e “ngakau pikikaa kore e te tau” toou. (Luka 8:15) No reira, e tavini ua rai ia Iehova ma toou maroiroi katoa. Ei reira koe e “rekarekaʼi [ia koe] uaorai.”