1. Соске о Јехова на спорединела амен е јаверенцар?

О ЈЕХОВА мангела о буќа те овен различна. Акава џанаја соске ов створинѓа различна растенија, животне чак амен створинѓа амен различна. Адалеске со секова јекх амендар тано посебно, о Јехова никогаш на спорединела амен е јаверенцар. Ов дикхела адава со иси тут андре ко вило (1. Сам. 16:7). Ов исто аѓаар џанела тле јака хем тле слаба стране хем сар бариљан. На родела тутар повише таро адава со шај те де. Амен ваљани те дикха ки аменде исто сар о Јехова. Тегани ка ова разумна хем нане те мислина кај сием пошукар е јаверендар или палем кај на врединаја (Рим. 12:3).

2. Соске нане шукар те споредина амен е јаверенцар?

² Џанѓола пе, шај те овел аменге корисно ако џаја пало шукар пример несаве пхралескоро или пхењакоро кова сој шукар ки служба (Евр. 13:7). Тегани, шај те сикљова лестар или латар сар те ова пошукар ки амари служба (Фил. 3:17). Сепак, иси разлика машкар адава те џа пало некаскоро шукар пример хем те користине адава пример те шај те споредине тут леа. Ако спорединаја амен е јаверенцар шај те почмина те завидина, те ова обесхрабриме хем шај чак те мислина кај на врединаја. Сар со дикхлем ки статија англедер, ако натпреваринаја амен амаре пхраленцар адава ка руминел амаро амалипе е Јеховаја. Адалеске о Јехова љубезно поттикнинела амен: „Секова мануш ваљани те испитинел пле постапке, хем тегани ка овел ле причина те овел  бахтало башо буќа со керела лен ов, а на адалеске со спорединела пе е јаверенцар“ (Гал. 6:4).

3. Кова духовно напредок со керѓан ле керела тут бахтало?

³ О Јехова мангела те ове бахтало башо тло духовно напредок. На пример, ако крстинѓан тут ваљани те ове бут бахтало со исполнинѓан адаја цел. Тло мангипе спрема о Девел поттикнинѓа тут те ане адаја одлука. Размислин кобор напредујнѓан оттегани. На пример, дали акана повише уживинеа ко читибе хем проучибе и Библија? Дали тле молитве уле посмисловна хем похор? (Пс. 141:2). Дали уљан повешто ки служба хем дали акана пошукар користинеа амаре главна публикацие службаке? А ако иси тут фамилија, дали о Јехова поможинѓа туке те ове пошукар ром, ромни или родители? Ту шај те ове бут бахтало башо тло напредок со керѓан ле.

4. Со ка дикха ки акаја статија?

⁴ Амен шај те поможина е јаверенге те овен бахтале башо пумаро духовно напредок. Шај исто аѓаар те поможина ленге те чхинавен те спорединен пе е јаверенцар. Ки акаја статија ка дикха сар о родителија шај те поможинен пумаре чхавенге, сар о брачна партнерија шај те поможинен јекх јекхеске хем сар о старешине хем о јавера шај те поможинен е пхраленге хем е пхењенге. Ко крајо, ка дикха несаве библиска начелија со шај те поможинен аменге те чхива аменге целија со шај те исполнина лен.

5. Спрема Ефешаните 6:4, со на ваљани о родителија те керен?

⁵ О родителија ваљани те пазинен ма те спорединен јекхе чхаве е јавереа, хем те на роден лендар повише таро адава со шај те керен. Ако о родителија керена адава ола шај те обесхрабринен пумаре чхавен. (Читин Ефешаните 6:4.) Јекх пхен со викинела пе Сачико, * вакерела: „Мле учителија очекујнена сине те овав пошукар таро мле соученикија ки школа. Исто аѓаар ми дај да керела манге сине о исто притисок те шај те дав шукар сведоштво мле учителенге, хем ме дадеске кова со нане е Јеховаскоро сведоко. Ој мангела сине те накхав о испитија бизи ни јекх грешка, ама адава нашти сине те керав. Накхле бут берша откеда завршинѓум е школаја, ама ме понадари да  некогаш пучава ман, иако дава мандар са дали адава тано доволно е Јеховаске“.

6. Со шај о родителија те сикљовен таро Псалм 131:1, 2?

⁶ О родителија шај те сикљовен јекх важно лекција која со аракхљола ко Псалм 131:1, 2. (Читин.) О цари о Давид вакерѓа кај на родела буќа кола сој леске „бут баре“, или буќа кола со нашти те керел лен. Адалеске со сине понизно хем скромно, ов сине задоволно хем сине ле андруно мир. Со шај о родителија те сикљовен таро е Давидескере лафија? О родителија шај те овен понизна хем скромна аѓаар со нане те очекујнен превише пестар, а ни таро пумаре чхаве. Ола шај те поможинен пумаре чхавенге те овел лен доверба ки песте аѓаар со ка поможинен ленге те чхивен песке разумна целија спрема пле околностија хем способностија. Јекх пхен, со викинела пе Марина, вакерела: „Ми дај никогаш на спорединѓа ман мле трине пхраленцар или јавере чхавенцар. Ој сикавѓа ман кај секоле јекхе амендар иси ле различна способностија хем кај секова јекх амендар тано скапоцено е Јеховаске. Адалеске со воспитинѓа амен аѓаар, ме ретко спорединава ман е јаверенцар“.

7-8. Сар шај јекх ром те поштујнел пле ромња?

⁷ О христијанска рома мора те поштујнен пумаре ромњен (1. Пет. 3:7). Адава значинела те сикавел пе ленге посебно внимание хем ценење. На пример, јекх ром поштујнела пле ромња аѓаар со сикавела кај тани леске важно. На родела латар повише таро адава со шај те дел хем исто аѓаар, на спорединела ла јавере џувленцар. Сар ка осетинел пе и ромни ако о ром спорединела ла е јаверенцар? Е Розакоро ром, кова со нане е Јеховаскоро сведоко, често спорединела ла е јавере џувленцар. Лескере груба лафија керѓе на само те осетинел пе кај на врединела него исто аѓаар те сумнинел пе дали о Јехова чаче мангела ла. Ој вакерела: „Ваљани стално те уверинав ман кај о Јехова ценинела ман“. Ама, јекх ром сој Сведоко сикавела кај поштујнела пле ромња. Ов тано свесно кај ако керела аѓаар адава ка влијајнел шукар упро лескоро однос е ромњаја хем упро лескоро амалипе е Јеховаја. *

⁸ Јекх ром со поштујнела пле ромња, фалинела ла хем вакерела лаке кај мангела ла (Изр. 31:28). Аѓаар постапинѓа о ром е Катеринакоро, кола со спомнинѓем ла ки англуни статија, ов поможинѓа лаке те цидел пестар о негативна чувствија. Кеда сине тикни, лакири дај критикујнела ла сине хем бут пути спорединела ла сине јавере чхаенцар. Адалеске, и Катерина почминѓа те спорединел пе јаверенцар хем продолжинѓа те керел адава чак откеда ули е Јеховаскоро сведоко. Ама, лакоро ром поможинѓа лаке те чхинавел те керел адава хем те почминел те дикхел шукар ки песте. Ој вакерела: „Ов мангела ман, фалинела ман башо шукар буќа со керава хем молинела пе манге. Исто аѓаар, поможинела манге те на бистрав е Јеховаскере шуже особине хем те чхинавав те размислинав негативно“.

9-10. Сар о љубезна старешине поможинѓе јекхе пхењаке те на спорединел пе е јаверенцар?

⁹ Сар шај о старешине те поможинен околенге со спорединена пе е јаверенцар? Размислин башо искуство е пхењакоро Хануни, која со сар тикни ретко добинела сине пофалба. Ој вакерела: „Сиум сине лаџутни хем мислинава сине кај о јавера чхаве тане пошукар мандар. Панда таро тикнипе  почминѓум те спорединав ман е јаверенцар“. Чак откеда ули е Јеховаскоро сведоко, и Хануни понадари да керела сине адава. Адалеске ој мислинела сине кај адава со керела сине ко собрание нане важно. Ама акана ој тани бахтали пионерка. Со поможинѓа лаке те менинел пло стави?

¹⁰ И Хануни вакерела кај о љубезна старешине поможинѓе лаке. Ола уверинѓе ла кај тани скапоцено ко собрание хем пофалинѓе ла баши лакири вера хем пример. Ој вакерела: „Некобор пути о старешине замолинѓе ман те охрабринав несаве пхењен каске со ваљанѓа помош. Акаја задача керѓа те осетинав ман корисно. Сетинава ман сар о старешине благодаринѓе манге адалеске со охрабринѓум несаве потерне пхењен. Пало адава читинѓе манге 1. Солуњаните 1:2, 3. Адава керѓа те осетинав ман бут шукар. Акала шукар пастирија поможинѓе манге те ценинав мло тхан ко собрание“.

11. Спрема Исаија 57:15, сар шај те поможина околенге со „осетинена пе пхаге“?

¹¹ Читин Исаија 57:15. О Јехова бут грижинела пе околенге со „осетинена пе пхаге“. Сарине амен, на само о старешине, шај те охрабрина амаре мангле пхрален хем пхењен. Јекх начин сар шај те кера адава тано, ако искрено интересинаја амен ленге. О Јехова преку аменде мангела те сикавел пло мангипе пле скапоцена бакхренге (Изр. 19:17). Исто аѓаар, шај те поможина амаре пхраленге хем пхењенге аѓаар со ка ова понизна хем скромна. На мангаја те истакнина амен англо јавера хем аѓаар те кера љубоморна амаре пхрален. Наместо адава, мангаја те користина амаре способностија те шај те охрабрина амен јекх јекхеа (1. Пет. 4:10, 11).

12. Соске о понизна мануша мангена сине те овен узо Исус? (Дикх и слика ки насловно страна.)

¹² Шај бут те сикљова башо адава сар те понашина амен е јаверенцар, ако дикхаја сар о Исус понашинѓа пе пле следбениконцар. Ов сине о најбаро мануш кова со некогаш живинѓа ки Пхув. Сепак сине „кротко хем понизно ко вило“ (Мат. 11:28-30). Иако сине бут интелегентно хем џанела сине бут буќа, ама ов никогаш на фалинѓа пе адалеа. О Исус користинела сине едноставна лафија хем споредбе кола со шај сине локхе те хаљовен пе хем те ресен џи ко вило околенгоро сој понизна (Лука 10:21). О Исус на сине сар о горда религиозна водачија. Ов никогаш на керѓа о јавера те мислинен кај о Девел на ценинела лен (Јован 6:37). Наместо адава, ов сикавела сине поштовање е обично манушенге.

13. Сар о Исус сикавѓа љубезност хем мангипе пле учениконге?

¹³ Е Исусескири љубезност хем мангипе дикхена пе таро адава сар понашинела пе сине пле учениконцар. Ов џанља кај сине лен различна способностија хем околностија. Адалеске на очекујнела сине сарине те керен о иста задаче хем те завршинен исто бути ки служба. Сепак ов ценинела сине кеда секова јекх лендар ка дел пло најшукар. Акава јасно дикхјола пе тари лескири споредба башо талантија. Ки акаја споредба о господари дела секоле робоске бути „спрема лескири способност“. Иако јекх таро дуј вредна робија заработинѓа повише, о господари пофалинѓа е солдујен е иста лафенцар: „Шукар керѓан, мло шукар хем верно слуга“ (Мат. 25:14-23).

14. Сар шај те џа пало е Исусескоро пример?

¹⁴ О Исус тано љубезно аменцар хем сикавела аменге мангипе. Ов џанела кај саринен иси амен различна способностија хем околностија. Сепак, ов ценинела кеда даја амаро најшукар. Амен да ваљани те џа пало лескоро пример. Никогаш на ваљани те  кера јекх пхрал или јекх пхен те мислинел кај на врединела, или те лаџал адалеске со нашти те керела добором кобор со јавера керена. Наместо адава, ваљани те рода прилике те пофалина амаре пхрален хем пхењен адалеске со дена пумаро најшукар те служинен е Јеховаске.

15-16. Сави корист сине јекхе пхења адалеске со чхивѓа песке разумна целија?

¹⁵ О духовна целија дена амен правцо хем смисла ко живото. Ама, мора те чхива аменге целија спрема амаре способностија хем околностија, а на спрема е јаверенгере. Соске ако кераја адава шај те разочарина амен хем те обесхрабрина амен (Лука 14:28). Размислин башо пример јекхе пионеркакоро, со викинела пе Мидори.

¹⁶ Кеда и Мидори сине тикни лакоро дад, кова со нане Сведоко, понижинела ла сине хем вакерела сине кај лакоро пхрал, и пхен хем лакере соученикија тане пошукар латар. И Мидори вакерела: „Мислинава сине кај на врединава“. Ама кеда барили почминѓа те дикхел пошукар ки песте. Ој вакерела: „Читинава сине и Библија секова диве те шај те овел ман андруно мир хем дикхљум кај о Јехова мангела ман“. Исто аѓаар, чхивѓа песке разумна целија хем молинѓа пе о Јехова те поможинел лаке те исполнинел адала целија. Адава поможинѓа лаке те овел бахтали башо пло духовно напредок.

17. Со шај те поможинел аменге те кера промене ко амаро размислибе, хем саво ка овел о резултати?

¹⁷ О негативна чувствија хем мисле нашти те менинен пе сигате. Адалеске о Јехова поттикнинела амен понадари да те менина амаро начин сар размислинаја (Еф. 4:23, 24). Те шај те кера адава ваљани те молина амен, те проучина е Девлескоро лафи хем  те размислина башо адава со читинаја. Кер акала буќа хем роде сила таро Јехова. Лескоро свети дух ка поможинел туке те сикљове те на споредине тут е јаверенцар. О Јехова исто аѓаар ка поможинел туке те дикхе дали уљан завидливо или гордо хем ка поможинел туке сигате те кере о промене.

18. Сар шај о лафија таро 2. Летописи 6:29, 30 те утешинен тут?

¹⁸ Читин 2. Летописи 6:29, 30. О Јехова џанела сар осетинаја амен. Ов џанела кај боринаја амен против о духо акале светоскоро хем амари несовршеност. Кеда о Јехова дикхела кобор трудинаја амен те борина амен против акала буќа, ов панда повише мангела амен.

19. Сар о Јехова објаснинѓа пле чувствија спрема аменде?

¹⁹ Те шај те сикавел саве чувствија иси ле спрема аменде, о Јехова користинела и врска со иси машкар и дај хем лакоро бебе (Иса. 49:15). Те дикха о пример јекхе дајакоро со викинела пе Рејчел. Ој вакерела: „Ми чхај и Стефани, бијандили порано него со ваљани сине. Кеда прво пути дикхљум ла, сине бут тикни хем слабо. Ама о докторија дозволинѓе манге те икерав ла секова диве ки ангали џикоте јекх масек сине ко инкубатор. Ко адава периоди ме хем ми чхај бут поврзинѓем амен. Акана иси ла шов берш хем тани потикни таро јавера ки лакири возраст. Сепак бут мангава ла соске боринѓа пе те ачховел ко живото, хем керѓа мло живото бут бахтало“. Кобор утешно тано адава со џанаја кај е Јехова иси ле баш асавко мангипе спрема аменде кеда дикхела кај боринаја амен са амаре силенцар те служина леске!

20. Соске е Јеховаскоро слуга тане бахтале?

²⁰ Адалеске со сиан е Јеховаскоро слуга ту сиан леске посебно хем бут сиан ценимо ки лескири фамилија. Ов на викинѓа тут ки песте адалеске со сиан пошукар таро јавера мануша, него адалеске со дикхља ко тло вило хем дикхља кај сиан понизно мануш коле со шај те обликујнел ле (Пс. 25:9). Шај те ове сигурно кај ов бут ценинела кеда деа тутар са те служине леске. Тли истрајност хем тли верност тане доказ кај иси тут „чисто хем шукар вило“ (Лука 8:15). Адалеске, понадари да де тло најшукар е Јеховаске. Тегани ка овел тут шукар причина те ове бахтало башо „буќа со кереа лен ту“.