1. Thangwi yanji Yahova nee asatilandanisa na anthu anango?

YAHOVA nee asafuna kuti pinthu pyonsene pikhale sawasawa. Ife tisadziwa pyenepi thangwi Yahova acita pinthu pya mitundu yakusiyana-siyana, ninga miti, pinyama, kuphatanizambo ife anthu. Anthu onsene ndi akusiyana. Na thangwi ineyi, Yahova cipo asakulandanisani na munthu unango. Iye asadinga ntima wanu, pontho asakudziwani mwadidi. (1 Sam. 16:7) Iye asadziwa pinthu pinakwanisa imwe kucita na pinacimwana imwe kucita, pontho iye asadziwa njira indakuzwa imwe. Iye nee asakuphembani kuti mucite pinthu pyakuti nee munakwanisa kupicita. Ife tisafunika kukhala na maonero mabodzi ene ninga ali na Yahova thangwi ya ife. Mungacita pyenepi, imwe munakwanisa kukhala “na manyerezero adidi,” mbamukhonda kunyerezera kuti ndimwe wakufunika kakamwe peno nee ndimwe wakufunika kakamwe.—Aroma 12:3.

2. Thangwi yanji nee ndi pyadidi kulandanisika na anthu anango?

² Ndimomwene kuti ife tinakwanisa kupfundza pizinji tingaona m’bale peno mulongo wakuti asakwanisa kucita pizinji m’basa yakumwaza mphangwa. (Aheb. 13:7) Panango tinakwanisa kuona njira yakuthimizira maluso athu m’basa yathu yakumwaza mphangwa. (Afil. 3:17) Mbwenye kutowezera makhaliro adidi a munthu ndi pyakusiyana na kulandanisika na munthu unoyu. Kulandanisika kweneku panango kunakucitisani kukhala na bibvu, kufewa manungo peno kunyerezera kuti ndimwe wakusowa basa. Ninga pidapfundza ife mu nsolo udamala, tingacita mapika na anango mu mpingo, tinaikha pangozwi uxamwali wathu na Yahova. Na thangwi ineyi, Yahova asaticenjeza: “M’bodzi na m’bodzi asafunika kudinga mabasace; natenepa, iye anadzakhala na thangwi toera kutsandzaya na pinthu pinacita iye, tayu kulandanisa na pinacita munthu unango.”—Agal. 6:4.

3. Ndi kuthambaruka kupi kwauzimu kudacita imwe kwakuti kusakutsandzayisani?

 ³ Yahova asafuna kuti mutsandzaye na kuthambaruka kwanu mwauzimu. Mwacitsandzo, khala mwabatizwa imwe munakwanisa kutsandzaya thangwi yakukwanirisa cifuno ceneci. Imwe mwasankhula mwekhene toera kubatizwa. Mwacita pyenepi thangwi imwe musafuna Mulungu. Nyerezerani kuthambaruka kudacita imwe kubulukira pa ndzidzi unoyu. Mwacitsandzo, kodi cifuno canu cakupfundza na kuleri Bhibhlya cathimizirika? Kodi cincino musacita maphembero akubulukira muntima? (Masal. 141:2) Kodi luso yanu yakutomesa makani na kuphatisira mabukhu athu m’basa yakumwaza mphangwa yathimizirika? Khala muli na banja, kodi Yahova akuphedzani toera mukhale mamuna wadidi, nkazi wadidi peno nyakubala wadidi? Imwe munakwanisa kutsandzaya thangwi ya macinjo onsene adacita imwe m’makhundu anewa.

4. Tinapfundzanji mu nsolo uno?

⁴ Ife tinakwanisa kuphedzambo anango toera atsandzaye na kuthambaruka kwawo mwauzimu. Tinakwanisambo kuaphedza toera akhonde kulandanisika na anthu anango. Mu nsolo uno, ife tinaona kuti anyakubala anaphedza tani anawo, anyakumanga banja anaphedzana tani unango na ndzace, pontho akulu a mpingo na anango anaphedza tani abale na alongo. Pakumalisa, ife tinaona midida ya Bhibhlya yakuti inatiphedza toera kukhazikisa pifuno pyakuti pisabverana na maluso athu na makhaliro athu.

5. Mwakubverana na Aefesi 6:4, kodi anyakubala asafunika kucaliranji?

⁵ Anyakubala asafunika kucita mphole-mphole toera akhonde kulandanisa mwana m’bodzi na unango. Pontho nee asafunika adikhire kuti mwana acite pinthu pyakuti nee anakwanisa kupicita. Anyakubala angacita pyenepi anakwanisa kutsukwalisa mwanawo. (Lerini Aefesi 6:4.) Mulongo unango anacemerwa Sachiko * alonga: “Apfundzisi anga kuxikola akhadikhira kuti ine ndikhale nyakupfundza wadidi kakamwe kupiringana andzanga. Kusiyapo pyenepi, mai wanga akhafuna kuti ine ndibuluse mavalore adidi pakucita maporova kuxikola toera kupereka umboni kuna mpfundzisi wanga na pai wanga wakuti nee ndi Mboni wa Yahova. Iye akhafuna kuti ndikhonde kudodomeka pa maprova anga kuxikola, mbwenye pyenepi nee mbapidakwanisika. Ngakhale kuti papita pyaka pizinji kubulukira mu ndzidzi udamalisa ine kupfundza xikola, midzidzi inango ndisanyerezera kuti panango Yahova nee asakomerwa na ine, maseze ndisacita pyonsene pinakwanisa ine.”

6. Kodi anyakubala anapfundzanji pa lemba ya Masalmo 131:1, 2?

 ⁶ Anyakubala anakwanisa kupfundza cinthu cakufunika kakamwe pa Masalmo 131:1, 2. (Lerini.) Mambo Dhavidhi alonga kuti iye nee ‘akhafuna pinthu pikulu kakamwe,’ peno pinthu pyakuti nee mbadapikwanisa. Kucepeseka kwace kwamphedza toera akhale ‘wakukhurudzika na wakumatama.’ Kodi anyakubala anapfundzanji na mafala adalonga Dhavidhi? Toera anyakubala akhale akucepeseka, iwo nee asafunika kufuna pinthu pizinji pyakuti pisapiringana mphambvu zawo, pontho nee asafunika kudikhira pizinji kuna anawo. Pontho anyakubala anakwanisa kuphedza mwanawo toera abvesese kuti ndi wakufunika angadzindikira pinthu pinakwanisa iye kucita mwadidi na pire pyakuti nee anakwanisa kupicita mwadidi. Buluka penepo asafunika kumphedza toera akhazikise pifuno pyakuti anakwanisa kupikwanirisa. Mulongo unango anacemerwa Marina asakumbuka: “Mai wanga cipo akhandilandanisa na abale anga atatu peno na ana anango. Iye andipfundzisa kuti m’bodzi na m’bodzi ali na maluso ace, pontho m’bodzi na m’bodzi wa ife ndi wakufunika kakamwe kuna Yahova. Thangwi ya ciphedzo cace, ine nee ndisalandanisika kazinji kene na anango.”

7-8. Kodi mamuna anapangiza tani cilemedzo kuna nkazace?

⁷ Mamuna Wacikristu asafunika kulemedza nkazace. (1 Ped. 3:7) Cilemedzo cisaphataniza kutsalakana anango na ntima onsene. Mwacitsandzo, mamuna asalemedza nkazace angantsalakana ninga munthu wakufunika. Iye nee asaphemba kuti nkazace acite pinthu pizinji pyakuti nee anakwanisa kupicita, pontho iye nee asamulandanisa na akazi anango. Kodi nkazi anapibva tani mamunace angamulandanisa na akazi anango? Mulongo unango anacemerwa Rosa, wakuti mamunace nee ndi Mboni wa Yahova, kazinji kene asamulandanisa na akazi anango, mbancitisa kunyerezera kuti nkhabe munthu ananfuna. Iye alonga: “Ndikhafunika kukumbuka kazinji kene kuti Yahova asandifuna.” Mwakusiyana na mamuna wa mulongo Rosa, mamuna Wacikristu asalemedza nkazace. Iye asadziwa kuti kucita pyenepi kunamphedza toera akhale na uxamwali wadidi na nkazace, pontho toera akhale na uxamwali wadidi na Yahova. *

⁸ Mamuna wakuti asalemedza nkazace, asamulonga mwadidi pamaso pa anango, asansimba, pontho asampanga kuti asanfuna. (Mis. 31:28) Pyenepi ndi pidacita mamunace Katerina adalongwa mu nsolo udamala, iye amphedza toera akunde manyerezero akuti nee ndi wakufunika ninga anthu anango. Pikhali iye mwana, mai wace akhampwaza, pontho kazinji kene akhamulandanisa na atsikana anango, kuphatanizambo axamwali ace. Na thangwi ineyi, Katerina atoma kulandanisika na anthu anango, pontho apitiriza kucita pyenepi pidakhala iye Mboni wa Yahova. Mbwenye mamunace wakuti ndi Nkristu, amphedza toera asiye kucita pyenepi, mbakhala na manyerezero akulinganira thangwi ya iye ene. Iye alonga: “Mamunanga asandifuna, asandisimba thangwi ya pinthu pyadidi pinacita ine, pontho asacita phembero thangwi ya ine. Iye asandikumbusambo kuti Yahova ali na makhaliro adidi, pontho asandiphedza toera kucinja manyerezero anga akuphonyeka.”

9-10. Kodi akulu a mpingo aufuni aphedza tani mulongo Hanuni toera akunde cipendamiro cace cakulandanisika na anthu anango?

⁹ Kodi akulu a mpingo anakwanisa tani kuphedza ale akuti ali na cipendamiro cakulandanisika na anthu anango? Onani pidacitika na mulongo unango anacemerwa Hanuni, wakuti nee akhasimbwa kazinji kene pikhali iye mwana. Iye alonga: “Ine ndikhali na manyadzo, pontho ndikhapibva kuti ana anango akhali adidi kakamwe kupiringana ine. Ine ndatoma kulandanisika na anango kutomera  pikhali ine mwana.” Pidakhala iye Mboni wa Yahova, Hanuni apitiriza kulandanisika na anthu anango. Na thangwi ineyi, iye akhaona kuti nee akhali wakufunika mu mpingo. Mbwenye cincino iye asatumikira ninga mpainiya mwakutsandzaya. Ninji cidamphedza toera kucinja manyerezero ace?

¹⁰ Hanuni alonga kuti iye aphedzwa na akulu a mpingo acitsalakano. Iwo ampanga kuti iye ndi wakufunika kakamwe mu mpingo, pontho ansimba thangwi yakukhulupirika kwace. Iye alemba: “Midzidzi inango akulu a mpingo andiphemba toera kuwangisa alongo anango akuti akhafuna ciphedzo. Mabasa anewa andiphedza toera kuona kuti ndine wakufunika. Ndisakumbuka ndzidzi wakuti akulu a mpingo aufuni apereka takhuta kuna ine thangwi ya ciwangiso cidapereka ine kuna alongo anango akuti ndi atsikana. Buluka penepo, iwo aleri lemba ya 1 Atesalonika 1:2, 3. Pyenepi pyakhuya kakamwe ntima wanga. Thangwi ya ciphedzo ca akulu a mpingo anewa, cincino ndisaona kuti ndine wakufunika mu mpingo.”

11. Mwakubverana na Izaiya 57:15, tinaphedza tani ale ‘anathabuka na ale a ntima wakucepeseka’?

¹¹ Lerini Izaiya 57:15. Yahova asatsalakana kakamwe ale ‘anathabuka, na ale a ntima wakucepeseka.’ Kusiyapo akulu a mpingo, ife tonsene tinakwanisa kuwangisa abale na alongo anewa akufunika. Njira ibodzi ya kuawangisa ndi kupangiza citsalakano candimomwene kuna iwo. Yahova asafuna kuti tipangize kuna mabira ace kuti iye asaafuna kakamwe. (Mis. 19:17) Tinakwanisambo kuphedza abale athu tingakhala anthu akucepeseka, mbatikhonda kudzikuza thangwi ya maluso athu. Ife nee tisafuna kucita pinthu pyakuti anango angapiona anakhala na bibvu na ife. M’mbuto mwace, ife tisaphatisira maluso athu na cidziwiso cathu toera kuwangisana unango na ndzace.—1 Ped. 4:10, 11.

12. Thangwi yanji anthu akupwazika akhakomerwa kukhala pabodzi na Yezu? (Onani foto iri patsamba yakutoma.)

¹² Ife tinakwanisa kupfundza pizinji thangwi yakutsalakana mwadidi anango tingabvesesa kuti Yezu akhatsalakana tani atowereri ace. Iye akhali munthu wakufunika kakamwe mu ndzidzi ukhali iye pa dziko yapantsi. Ngakhale tenepo, iye akhali “wakukhurudzika na wakucepeseka.” (Mat. 11:28-30) Iye cipo akhadzikuza thangwi ya maluso ace peno thangwi ya pinthu pyonsene pikhadziwa iye. Pikhapfundzisa iye anthu, iye akhaphatisira mafala akukhonda nentsa kubvesesa na misangani yakuti ikhakhuya mitima ya anthu akucepeseka. (Luka 10:21) Mwakusiyana na atsogoleri a mauphemberi akuti akhali akudzikuza, Yezu cipo acitisa anthu kunyerezera kuti nee ndi akufunika kuna Mulungu. (Juwau 6:37) M’mbuto mwace, iye akhatsalakana anthu akupwazika.

13. Kodi kukoma ntima na ufuni wa Yezu pyapangizika tani munjira ikhatsalakana iye anyakupfundzace?

¹³ Kukoma ntima na ufuni wa Yezu pikhapangizika munjira ikhatsalakana iye anyakupfundzace. Iye akhadziwa kuti maluso awo na makhaliro awo ndi akusiyana. Natenepa, iye akhadziwa kuti onsene nee mbadacita pinthu pibodzi pyene m’mabasa a anango na mu utumiki. Ngakhale tenepo, iye akhakomerwa thangwi yakuwangisira kukhacita m’bodzi na m’bodzi wa iwo. Yezu apangiza pyenepi pidalonga iye nsangani wa matalento. Mu nsangani unoyu, mbuya apasa basa anyabasace, m’bodzi na m’bodzi “mwakubverana na maluso awo.” Anyabasa awiri aphinga awina pinthu pyakusiyana. Mbwenye mbuya wawo aasimba na mafala mabodzi ene: “Wacita mwadidi, ndiwe nyabasa wadidi na wakukhulupirika!”—Mat. 25:14-23.

14. Tinatowezera tani citsalakano ca Yezu?

¹⁴ Ndzidzi onsene Yezu asatitsalakana mwakukoma ntima na mwaufuni. Iye asadziwa kuti maluso athu na makhaliro athu ndi akusiyana, pontho iye asakomerwa tingawangisira toera kucita pinakwanisa ife. Ifembo tisafunika kutowezera Yezu. Ife cipo tisafunika kucitisa m’bale peno mulongo kunyerezera kuti nee ndi wakufunika peno kupasika manyadzo thangwi nee asakwanisa kucita pizinji ninga pinacita anango. Mbwenye ndzidzi onsene tisafunika kusimba abale na  alongo athu thangwi yakuwangisira kunacita iwo toera kutumikira Yahova.

15-16. Kodi mulongo aphedzeka tani thangwi yakukhazikisa pifuno pyakuti mbadapikwanirisa?

¹⁵ Tingakhazikisa pifuno m’basa yathu yakutumikira Yahova, tisakhala akutsandzaya, pontho umaso wathu usakhala na cifuniro. Mbwenye cinthu cakufunika kakamwe ndi kukhazikisa pifuno mwakubverana na maluso athu, pontho na makhaliro athu, tayu mwakubverana na maluso a anango peno makhaliro awo. Thangwi tingacita pyenepi, ife tinafewa manungo mbatitsukwala. (Luka 14:28) Onani citsandzo ca mulongo Midori wakuti ndi mpainiya.

¹⁶ Mu ndzidzi wakuti akhali mwana, pai wace akhampanga mwakubwereza-bwereza kuti abale ace na andzace a kuxikola ndi adidi kakamwe kupiringana iye. Mondori alonga: “Ine ndikhapibva kuti ndine munthu wakusowa basa.” Mbwenye pidakula iye, atoma kupibva kuti ndi wakufunika. Iye alonga: “Ine ndikhaleri Bhibhlya ntsiku zonsene toera ndikwanise kukhala na ntendere muntima mwanga, pontho pyenepi pikhandiphedza kupibva kuti Yahova asandifuna.” Kusiyapo pyenepi, iye akhazikisa pifuno pyakuti mbadapikwanirisa, pontho akhacita phembero toera akwanirise pifuno pyace. Pyenepi pyaphedza toera atsandzaye thangwi ya pinthu pikhakwanisa iye kucita toera kutumikira Yahova.

17. ‘Tinapitiriza tani kusasanyira mphambvu inatsogolera manyerezero athu,’ pontho ndi nkhombo zipi zinafuna kukhala na ife?

¹⁷ Pisakwata ndzidzi toera kucinja manyerezero athu akuphonyeka. Na thangwi ineyi, Yahova asaticenjeza: “Pitirizani kusasanyira mphambvu inatsogolera manyerezero anu.” (Aef. 4:23, 24) Mbwenye toera kucita pyenepi, tisafunika kucita phembero, kupfundza Bhibhlya na kunyerezera mwadidi pinapfundza ife. Pitirizani kucita pinthu pyenepi, pontho phembani Yahova  toera akupaseni mphambvu. Nzimu wakucena wa Mulungu unakuphedzani toera kukunda cipendamiro cakulandanisika na anango. Pontho mungatoma kukhala na bibvu peno kudzikuza muntima mwanu, Yahova anakuphedzani toera kupidzindikira na kupimalisa mwakucimbiza.

18. Mafala anagumanika pa 2 Pya dziko ya Israele 6:29, 30, asatibalangaza tani?

¹⁸ Lerini 2 Pya dziko ya Israele 6:29, 30. Yahova asadziwa piri muntima mwathu. Iye asadziwambo kuwangisira konsene kunacita ife toera kukunda nzimu wa dziko na madodo athu. Yahova angaona kuti ife tisawangisira kakamwe toera kukunda pinthu pyenepi, ufuni wace kuna ife usathimizirika.

19. Kodi Yahova asaphatisiranji toera kupangiza kuti asatifuna?

¹⁹ Toera kutiphedza kubvesesa mabvero ali na iye thangwi ya ife, Yahova asaphatisira ufuni unapangiza mai kuna mwanace. (Iza. 49:15) Onani pidalonga mai unango anacemerwa Rachel. Iye alemba: “Mwananga Stephanie abalwa ntsiku yace mbidzati kufika. Ndzidzi wakutoma udamuona ine iye akhali wang’ono kakamwe, pontho nee akhali na mphambvu. Mbwenye pikhali iye ku xipitari pa mwezi wakutoma udabalwa iye, ntsiku zonsene dotoro akhanditawirisa toera ndim’phate. Midzidzi ineyi yandiphedza toera kufuna kakamwe mwananga. Cincino iye ali na pyaka pitanthatu pyakubalwa. Mbwenye manungo ace ndi mang’ono kakamwe mwakusiyana na ana anango a thunga yace. Ngakhale tenepo, ine ndisanfuna kakamwe, thangwi iye awangisira kakamwe toera apitirize kukhala na umaso, pontho iye asanditsandzayisa kakamwe!” Ndi pyakuntsandzayisa kakamwe kudziwa kuti Yahova asapangiza ufuni ukulu ninga unoyu kuna ife, angationa mbatiwangisira toera kuntumikira na ntima onsene!

20. Ninga ntumiki wa Yahova, ndi thangwi ipi inafuna kukucitisani kukhala wakutsandzaya?

²⁰ Nakuti ndimwe ntumiki wa Yahova, imwe ndimwe wakufunika mu mpingo wace, pontho iye nkhabe kukulandanisani na anango. Yahova nee akuphedzani toera mundziwe thangwi imwe mukhali munthu wadidi kupiringana anango. Iye akuphedzani toera mundziwe thangwi aona muntima mwanu kuti ndimwe munthu wakucepeseka, pontho mbamudatawira kupfundziswa na iye mbamucinja makhaliro anu. (Masal. 25:9) Khalani na cinyindiro cakuti iye asakomerwa na imwe mungacita pyonsene pinakwanisa imwe toera kuntumikira. Kupirira kwanu na kukhulupirika kwanu pisapangiza kuti imwe muli na “ntima wadidi kakamwe.” (Luka 8:15) Natenepa, pitirizani kucita pyonsene pinakwanisa imwe toera kutumikira Yahova. Mungacita pyenepi, imwe munadzakhala na mathangwi adidi toera kutsandzaya ‘na pinthu pinacita imwe.’