1. Lamo Yehova ndopatɛdjɛka l’anto ankina?

YEHOVA apakɔpɛ djɛ nkete nkfumɔ edjinge anto ankfumɔ ndjala ngo wopo ɔmɔ. Kɛsɔ nyɛnamaka papoo má nkete djɛ nkamɔ djɛ ndatonge ndjila edjinge onto. Onto l’onto alekɔ ngo wopo wɔnde nyɔmɛlɛ. Djɛkondeke Yehova apatɛdjɛka kaanga ndambo daambi l’anto ankina. Nde nshishimaka oloko wɔko, ntepela ente lonto lɔko lɔ l’eteyi. (1 Sa. 16:7) Nde ndjewaka kɛnɛ koyɛ l’akoka wa nangha la kɛngopalekɔ l’akoka, edjinge nde ndjewaka yopo y’iyakowongola. Nde apakɔlɔmbɛ kɛnɛ kɛ ngopalekɔ l’akoka wa nangha. Iso ladjɛ ndjokola Yehova má ndawɛnaka isɔmɛlɛ etengo ɔtɛnande. Má nangha nghɔsɔ, tongoyala ‘l’ikanyi yɛ wɔlɔ,’ topangokanelaka amboleka efula kana daambi efula lá nkambo djɛso.—Ɔrɔ. 12:3.

2. Lamo iyopalekɔ wɔlɔ ndawɛdjɛ l’anto ankina?

² Lá nsɔsɔlɔ, tokoka mba wapɔ má nshishima ndjɔmbɔmba yɛ wɔlɔ yɛ wananyɔ l’ankaana yɛ nkɔmano yewa eposelo wɛ wɔlɔ m’olemo w’ipoposanyɛ. (Heb. 13:7) Másɔ tokokaka nyɛna topo t’okokaso ndalɔngɔsɔla l’olemo wɔso w’ipoposanyɛ. (Flp. 3:17) Koko otshikitano wolekɔ l’antenyɛ ndjokola ndjɔmbɔmba kɛ wɔlɔ k’onto ɔmɔtshi la nkamba la ndjɔmbɔmba kɛkɔ djɛ ndawɛdjɛ lande. Nangha nghɔsɔ nkoka nkotshinda djɛ wɛ ndjala l’ankombola, ndɛmba kana ndoyawɛna etengo opalekɔ la ntshina. Etengo isɛnyi lá djamba djehetisa, mpamana l’anto wel’otshumano nkoka ndjala l’eposelo wɛ nyɛtshi tá lonyuma lɔso. Djɛkondeke la ngandji k’entshumɔ Yehova ntoshimelaka ante: ‘Onto l’onto ashishime nanghedji djɛnde nyɔmɛlɛ, ko nde angoyala l’elonga kɛ nsasanga la kɛnɛ k’onanghande nyɔmɛlɛ, koko ape la ndawɛdjɛ l’onto onkina.’—Nga. 6:4.

3. L’akambo wakɔnge welá nyuma wangombofula wakɔpɛyɛ osasa?

³ Yehova nkɔpaka djɛ wɛ nsasanga l’efulelo wɛko welá nyuma. Ndjɔmbɔmba ntsha wɛ ombolongola batisimo, wɛ ladjɛ ndjala l’osasa lá wopo wɔ ngakotshɛ okoma wɔsɔ! Wɛ ɔsaka nkano djɛ  nangha nkambo djɛsɔ nghɔmɛlɛ. Wɛ ɔsaka nkano djɛsɔ má ngandji kɛko te Ndjambe. Kokanela efulelo wɛ ngombonangha m’ɔkɔngɔ wɔ lasɔ. Ndjɔmbɔmba, ngandji kɛko kɛ badji edjinge kɛ wekelo wɔ Bible w’onto nyɔmɛlɛ kembofula? Ɔmbɔwɔngɛ alɔmbɛlɔ wako edjinge wambotateyɛ ndjɛ m’anse k’oloko? (Yee. 141:2) Ɔmbɔwɔngɛ yopo yɛko yɛ ndjamba l’anto l’olemo w’ipoposanyɛ edjinge ombewa nkamba la mpeko djɛso dj’olemo wɔlɔ? Ko ntsha olekɔ la nkfumbo, Yehova ambokokotshɛ djɛ wɛ ndeka ndjala wome, wadji, kana ombotshi wɔ wɔlɔ? Wɛ nkoka ndjala l’osasa edjinge nsasanga efula l’efulelo wɛko, ndjɔmbɔmba l’akambo etengo wasɔ.

4. Kɛkɔnge k’ɛnaso lɔ lá djamba djɛnɛ?

⁴ Iso nkoka nkotshɛ anto ankina djɛ nsasanga l’efulelo wɛwɔ welá nyuma. Iso nkoka lonkina ndakotshɛ dj’iwɔ ntshika ndawɛdjɛ l’anto ankina. Lá djamba djɛnɛ tɔngɛna wopo wɔ ambotshi okokawɔ nkotshɛ wana wawɔ, wopo wɔ wadji la wome okokawɔ nkotshana l’anteyi kɛwɔ edinge wopo wɔ tokokolo l’anto ankina okokawɔ nkotshɛ wananyɔ l’ankaana yɛwɔ. L’ekomo, tɔngɛna tɔkfɔ tɔmɔtshi tɔ Bible tokoka ntokotshɛ djɛ ndawilela ekoma w’okokaso ndawila lá nkilika akoka waso edjinge akambo wapomana laso lá lowiko.

5. Lá nkilika Ɛfɛsɛ 6:4, kɛkɔnge kɛ ambotshi oyɛwɔ ladjɛ ndjewɔ?

⁵ Ambotshi ladjɛ mbadjɛka dj’ipa ndjɛdjɛ wɔna wɔnɛ la wɔna onkina kana ndɔmba wɔna djɛ nde nangha kɛnɛ kɛ ndopakoke nangha. Ntsha iwɔ nangha nghɔsɔ, wɔna nkoka ndɔlɛmba. (Wala Ɛfɛsɛ 6:4.) Nkaana kɛmɔtshi k’etawɔ Sachiko * ntepelaka ante: “Wetsha wɛmi wahonaki ngo djɛ lemi ndeka winami ankfumɔ welá nkalasa. Lonkina, mama kɛmi akombolaki ngo djɛ lemi nangha ngo akambo wa wɔlɔ lá nkalasa djɛ mpɛyɛ owakɛ le anto ankina edjinge le papa kɛmi kepalekɔ Owakɛ. Lá nsɔsɔlɔ nde akɔpaki djɛ lemi mba pursa 100 l’ɛgzamɛ, nkambo djɛ motayalaki l’akoka wa nangha. Kaanga mashiyɛ nkalasa amboheta ɛnɔnyi efula, langokindjɛke ndawopola lá winá ɛmɔtshi ntsha Yehova angoyalake l’osasa má kɛnɛ konanghami kaanga ntsha langilake welo efula.”

6. Olakanyelo wɔkɔnge ambotshi okokawɔ mba má Yeembo 131:1, 2?

⁶ Olakanyelo wɔ djonyi wokoka ambotshi mba wolekɔ lá Yeembo 131:1, 2. (Wala.) Nkfumi Davidɛ atepelaka djɛ nde apakombola ‘nkete djɛ nkekete efula’ kana nkete djɛ  ndotayalaki l’akoka wa mba. Okitshakitshɛ edjinge wopo wɔ ndewaka elelo wɛnde ‘ɔhɔdjɛka edjinge ovumbɛka.’ Olakanyelo wɔkɔnge ambotshi okakawɔ mba m’etepela wɛ Davidɛ wɛsɔ? Ambotshi nkoka ndjala l’okitshakitshɛ edjinge ndjewa elelo wɛwɔ apengo lá kɛnɛ k’onanghawɔ toko, koko edjinge lá kɛnɛ k’ohonawɔ djɛ wana wawɔ nangha. Ambotshi nkoka nkotshɛ wana wawɔ djɛ ndawoka djɛ walekɔ la ntshina má ndjewaka kɛnɛ k’okokawɔ nangha la k’iyopakoke nangha, edjinge ndaakotshɛ dj’iwɔ ndawilela ekoma wokokawɔ nkotshɛ. Nkaana kɛmɔtshi ketawɔ Marina mvungɔka ante: “Mama kɛmi atandjɛdjɛki kaanga lofu l’ankfune wami asato kana la dɛngɛ nkina. Nde andakanyɛka ante onto l’onto alekɔ l’epapɛyɛ wetshikitanyi edjinge onto onkfumɔ alekɔ la ntshina lá wiso wa Yehova. Mpeyi l’okotshɔ wɔnde, mpalekaka ndawɛdjɛ l’anto ankina.”

7-8. Wopo wɔkɔnge wome okokande mpɛyɛ wadjɛnde lomo?

⁷ Wome w’Okristo ladjɛ mpɛyɛ wadjɛnde lomo. (1 Pɛ. 3:7) Mpɛyɛ onto lomo nsakisolaka ndowila yimba edjinge ndɔlɛmɛyɛ. Ndjɔmbɔmba, wome mpɛyɛka wadjɛnde lomo má ndɔɔwɔsa l’odjito. Nde apɔlɔmbɛ kɛnɛ kɛ ndopalekɔ l’akoka wa nangha. Edjinge lá nsɔsɔlɔ nde apɔwɛdjɛka l’amato ankina. Wopo wɔkɔnge wadji okokande dawoka ntsha womɛnde ndɔwɛdjɛka l’amato ankina? Womɛ nkaana kɛso Rosa wopalekɔ Owakɛ wɔ Yehova, angɔwɛdjɛke mbala efula l’amato ankina. Etepela wɛnde wɛ nyɛtshi wembokomɛ Rosa dj’ipa nde ndawɔsa l’odjito edjinge djɛ ndjila ehamo lá ngandji k’owoka anto ankina. Nde ntepelaka ante: “Mbala la mbala langoyalake la djonyi dj’onto ntshikikɛ lemi ante Yehova ndɔsaka lemi la ntshina.” Lá lɛdji lotshikitanyi, wome w’Okristo mpɛyɛka wadjɛnde lomo. Nde ndjewaka ante nangha nkambo djɛsɔ nkoka ndjala l’eposelo ayale lá djokanelo djɛnde nya wadjɛnde kana nya Yehova. *

⁸ Wome wilaka wadjɛnde lomo, ndoolumɛka, ndɔwɛnyɛka ngandji edjinge ndoowandolaka. (Woo. 31:28) Nghɔsɔ ndeke lonanghisa womɛ Katerina, kanga isatepela lá djamba djemboheta, djɛ ndookotshɛ djɛ nde ndongela ikanyi yɛ nsamba ndawɔsa la ntshina. Winá wɔ ndayalaka ilɛngɛ, nyɔ kɛnde ɔwɔnyɔlaki edjinge ɔwɛdjɛki mbala la mbala l’eseka enkina ndjila edjinge tolongo tɔnde. Eposelo weyalisa la nkambo djɛsɔ nde, Katerina awangaka ndawɛdjɛ l’anto ankina, kaanga m’ɔkɔngɔ wɔ nde nkoma Owakɛ wɔ Yehova. Koko, womɛnde w’Okristo okotshɛka djɛ nana l’enkfumbo kɛsɔ edjinge djɛ nde ndjala l’ikanyi yɛ wɔlɔ lá nkambo djɛnde nyɔmɛlɛ. Katerina ntepelaka ante: “Nde nkɔpaka lemi, mbandolaka lemi l’akambo wa wɔlɔ w’onanghami edjinge ndɔmbaka lá nkambo djɛmi. Lonkina, nde mvungolaka lemi wekeka wa wɔlɔ wa Yehova edjinge nkotshɛka lemi djɛ nsembola ekanedji kɛmi.”

9-10. Wopo wɔkɔnge tokokolo tɔ ngandji iyakotshɛ nkaana kɛmɔtshi keyalaki l’enkfumbo kɛ nyɛtshi kɛ ndawɛdjɛ l’anto ankina?

⁹ Wopo wɔkɔnge tokokolo okokawɔ nkotshɛ wanɛ walekɔ l’enkfumbo kɛ ndawɛdjɛ l’anto ankina? Tokolenda ndjɔmbɔmba kɛ nkaana kɛso Hanuni, kanga liyawandolaka ngo taangoyi m’ɔlɛngɛ wɔnde. Nde mvungɔka ante: “Lá yalaki l’ɔnsɔnyi edjinge lafɛnyɛki ente dɛngɛ nkina ndeka lemi. Mbangaka ndawɛdjɛ l’anto ankina ngo m’ilɛngɛ.” Kaanga m’ɔkɔngɔ wɔnde ndjewa akambo wa nsɔsɔlɔ, Hanuni akindjɛka ngo ndawɛdjɛ l’anto ankina. Eposelo weyalisa la nkambo djɛsɔ nde, nde awangaka ndawoka etengo apalekɔ la ntshina l’otshumano. Koko,  win’ɔsɔ nde akambela Yehova l’osasa etengo yat’ekalo. Kɛkɔnge k’okotshisa djɛ nde ntshikitanyɛ yopo yɛnde yɛ nyɛna akambo?

¹⁰ Hanuni ntepelaka ante nde awaka okotshɔ me tokokolo tɔ ngandji. Iwɔ woshimelaki ambɔ, nde alekɔ la ntshina l’otshumano edjinge woowandolaki lá ndjɔmbɔmba kɛnde kɛ nkɔmano. Nde afunaka ante: “Lá mbamba imɔtshi, tokokolo wandɔmbaki djɛ lemi ntokotshɛ ankaana imɔtshi yeyalaki la djonyi dj’okotshɔ. Edjito wɛsɔ wenkotshɛka djɛ lemi ndawoka ente ndekɔ la ntshina. Mvungɔ winá wɔ tokokolo iyankawoyɛka lokasa winá wɔ makembɛ ankaana imɔtshi yɛ dangala. Masɔ iwɔ wambalelaka 1 Tesalɔnikɛ 1:2, 3. Ɔsɔngo nkambo djɛsɔ iyakote oloko wɔmi! Mpeyi la anami w’ɛnkɔkɔ w’eloko wɛlɔ wasɔ, win’ɔsɔ lambotateyɛ ndɔsa mpipo kelekɔ la lemi l’olonghanyelo wɔ Yehova la ntshina.”

11. Wopo wɔkɔnge w’okokaso nkotshɛ wanɛ ‘wambátshatshɛ edjinge walekɔ la yimba y’okitshakitshɛ,’ etengo Izaya 57:15?

¹¹ Wala Izaya 57:15. Yehova ndakiyanyɛka efula lá nkambo djɛ wanɛ ‘wambátshatshɛ edjinge walekɔ la yimba y’okitshakitshɛ.’ Isankfumɔ ape ngo tokokolo toko, nkoka mpɛyɛ lɔwɔ djɛ nkembɛ wananyɔ l’ankaana yɛ ngandji yɛsɔ. Yopo y’okokaso ndakembɛ nde, má ndawila yimba l’oloko ɔmɔ. Yehova nkɔpaka dj’iso nyɛnyɛ ngandji kɛnde te ɛnkɔkɔ wɛnde wɛ ntsho. (Woo. 19:17) Iso nkoka lonkina nkotshɛ wananyɔ l’ankaana yɛso má ndjala l’okitshakitshɛ edjinge ndjewa elelo wɛso. Topakɔpɛ nsepa ikanyi y’anto ankina leso isɔmɛlɛ dj’ipa ndotshinda anto ankina djɛ ndotokombola. Koko, tokambe l’akoka edjinge la balo djelekɔ laso djɛ nkotshɛ anto ankina.—1 Pɛ. 4:10, 11.

12. Lamo anto ngo anto iyasepamaka te Yeso? (Lenda ntshango djɛ loposo.)

¹² Má ndenda wopo wɔ Yeso ndananghelaka ambeki wande akambo, iso nkoka ndjeka akambo efula lá wopo wɔ nanghela anto ankina akambo. Nde ayalaki onto woleka ekekete lá deko nkfumɔ, koko nde ayalaki ‘ɔkɔkɛ edjinge l’oloko w’okitshakitshɛ.’ (Mat. 11:28-30) Nde atayafuna má balo djɛnde dj’efula edjinge dj’ekekete. Nde akambaki l’etepela wɛ wɔdju winá wɔ ndalakanyɛka edjinge la ndjɔmbɔmba yɛ wɔdju yesepaki eloko wɛ wanɛ walekɔ l’okitshakitshɛ. (Luka 10:21) Otshikitanyi l’ewandji wɛ ntolo wefudjɛki apɛka, Yeso atakomɛki anto djɛ ndawoka kaanga ndambo daambi ambɔ wapalekɔ la ntshina le Ndjambe. (Dj. 6:37) Koko, nde apɛyɛki anto ankfumɔ lomo.

13. Wopo wɔkɔnge oloko wɔlɔ edjinge ngandji kɛ Yeso iyɛnama má wopo wɔ ndananghelaka ambeki wande akambo?

¹³ Oloko wɔlɔ edjinge ngandji kɛ Yeso kɛnamaka má wopo w’indananghelaka ambeki wande akambo. Nde ewaki ante iwɔ walekɔ l’akoka edjinge l’akambo welá lowiko watshikitana. Djɛkondeke, iwɔ watakokaki mbɛmba edjito wɛkɔ ɛmɔ kana ndjala l’eposelo wɛkɔ ɛmɔ m’olemo w’ipoposanyɛ. Koko, nde akɔpaki welo wɛ l’oloko ɔmɔ wilaki onto l’onto. Looka lɔ wɔlɔ lɔ Yeso lɛnamaka má ndjɔmbɔmba kɛ ndapɛyɛ kɛ talata. Lá ndjɔmbɔmba kɛsɔ, owandji apɛyɛka os’olemo ɔmɔ ɔmɔ ‘olemo wɛdje l’akoka wande.’ As’olemo ape wayakamba olemo w’efula, koko ɔmɔtshi awaka ndeka winande. Koko owandji áwandolaka iyape kɛkɔ l’etepela wɛkɔ ɛmɔ ante: ‘Wɔlɔ efula, wɛ olekɔ os’olemo wɔ wɔlɔ edjinge wɔ nkɔmano!’—Mat. 25:14-23.

14. Wopo wɔkɔnge w’okokaso ndjokola wopo wɔ Yeso onanghelande anto ankina akambo?

¹⁴ Oloko wɔlɔ la ngandji kɛ Yeso nyɛnamaka má wopo wotonanghelande akambo. Nde ndjewaka ante akoka edjinge akambo welá lowiko lɔso ntshikitana, edjinge nde nsasangaka winá wonanghaso kɛnɛ keleka wɔlɔ. Alekɔ djonyi iso nanghelaka anto ankina akambo etengo Yeso otonanghelande. Topakoke ntshinda winaso Okristo djɛ ndawoka etengo apalekɔ la  ntshina kana ndɔpɛyɛ nsɔnyi mande apalekɔ l’akoka wa nangha akambo efula etengo anto ankina. Koko, tohonake mbamba yɛ mbandola wananyɔ l’ankaana yɛsɔ lá wopo wonanghawɔ kɛnɛ keleka wɔlɔ djɛ nkambela Yehova.

15-16. Wapɔ wɔkɔnge wowisa nkaana kɛmɔtshi má ndawilela ekoma wɛ ndakoke nkotshɛ?

¹⁵ Ndawilela ekoma welá nyuma ntokotshɛka djɛ mba ɛlɔndjɛlɔ edjinge ndjala la lowiko lɔ ntshina. Koko djɛ nkotshɛ nkambo djɛsɔ, ngo iso ndawilela ekoma wɛdje l’akoka waso edjinge l’akambo welá lowiko lɔso, koko ape lá nkilika anto ankina. Ntsha topananghisa nghɔsɔ tokoka ndotshutshɛ osasa edjinge ndɔmba. (Luka 14:28) Tokolenda ndjɔmbɔmba kɛ yat’ekalo imɔtshi yetawɔ Midori.

¹⁶ Winá wɔ Midori ndayalaka ilɛngɛ, papa kɛnde ketayalaki owakɛ ɔpɛyɛki nsɔnyi má ndɔwɛdjɛ l’ankfune wande edjinge la winande welá nkalasa. Midori ntepelaka ante: “Ndawokaki ente mpalekɔ la ntshina.” Koko winá wɔ ndofulaka, Midori atateyɛka ndoyawɔsa la ntshina. Nde ntepelaka ante: “Láwalaki Bible nfu inkfumɔ djɛ lemi mba vu dj’oloko, ko kɛsɔ kenkotshɛka djɛ ndashikikɛ ente Yehova nkɔpaka lemi.” Lonkina, nde ayawilelaka ekoma wɛ ndakoke nkotshɛ edjinge alɔmbaka efula djɛ Yehova ndokotshɛ djɛ nkotshɛ ekoma wɛkɔ. Kɛsɔ kekotshɛka Midori djɛ nsasanga l’efulelo wɛnde welá nyuma.

17. Wopo wɔkɔnge okokaso ‘nkindjɛ ndawila ntato lá wolo wɔ lɔndjɛ timba tɔso,’ edjinge eposelo wɛkɔnge wengoyala?

¹⁷ Nsaki edjinge tokanyi tɔ nyɛtshi topapikɔ mbala kɛkɔ kɛmɔ. Djɛkondeke Yehova otokembɛnde ante: ‘Nyo ladjɛ nkindjɛ ndawila ntato lá wolo wɔlɔndjɛ timba tɔnyo.’ (Ɛfɛ. 4:23, 24) Lá nsɔsɔlɔ, djɛ nangha nghɔsɔ, iso ladjɛ ndɔmbaka, ndjekaka Otepela wɔ Ndjambe edjinge  ntɔnɔlaka. Djɛkondeke, kindjɛ nkamba l’akambo wasɔ edjinge lɔmba Yehova djɛ nkokotshɛ. Nyuma kɛnde k’ekina kengokokotshɛ djɛ wɛ ndonga djɛ nyimɛ nanghedji nkfumɔ djɛ ndawɛdjɛ l’anto ankina. Yehova angokokotshɛ lonkina djɛ wɛ ndjewa edjinge nyimɛ la nkeke otako kana ankombola ntsha tokanyi tɔ nyɛtshi tɔsɔ tombokonama l’oloko wɔko.

18. Wopo wɔkɔnge w’okokɛ mba lokembo má etepela welekɔ lá 2 Ɛkɔndɔ 6:29, 30?

¹⁸ Wala 2 Ɛkɔndɔ 6:29, 30. Yehova ndjewaka eloko wɛso. Nde ndjewaka welo w’ilaso, mbandji k’onanaso l’ikanyi yel’andja wanɛ edjinge l’evunga wɛso. Winá wɔ Yehova ɛnande welo w’ilaso djɛ nana la tokanyi tɔ nyɛtshi tɔsɔ, ngandji kɛnde teso nfulaka.

19. Ndjɔmbɔmba kɛkɔnge kekamba la Yehowa djɛ ntɛyɛ wopo woyakande lá nkambo djɛso?

¹⁹ Djɛ nyɛnyɛ wopo woyawokande lá nkambo djɛso, Yehova nkambaka la djokanelo djelekɔ l’antenyɛ mama nya wɔnande wɔ ntato wɔlɔma. (Iza. 49:15) Tokolenda ndjɔmbɔmba kɛ mama kɛmɔtshi ketawɔ Rachel. Nde anfunaka ante: “Wɔnami w’omoto wetawɔ Stephanie awotshɔka lá ntondo kɛ ngɔndɔ kɛ botshi nkoka. Mbala kɛ ntondo kɛmɔwɛnyi, ndɔwɛnaka daambi edjinge yɔdju yɔdju. Koko wadɔktɛrɛ wankotshɛka djɛ ndɔwɛmbaka efula lá ngɔndɔ kɛ ntondo k’indayalaka l’ɛlɔndɔ. L’etsho wɛsɔ, ngandji kɛso kelekaka nfula. Win’ɔsɔ nde alekɔ l’ɛnɔnyi esamalo edjinge alekɔ demba daambi ndeka dɛngɛ nkina djɛ lɔsɔkɛ lɔnde. Koko, lemi ndɔkɔpaka efula mande nde ɛnaka ndjolo djɛ ntshikala la lowiko edjinge nde mpɛyɛka lemi osasa efula!” Ɔsɔngo owaso lonkembo má ndjewa ente wopo wɔ ngandji k’efula kɛ nghɔsɔ ndeke Yehova otokande winá w’ɔtɛnande tonana djɛ ndokambela l’oloko ɔmɔ!

20. Etengo oyɛ onkambi wɔ Yehova womboyalambola tende, elonga kɛkɔnge k’oyɛ ladjɛ nsasanga?

²⁰ Etengo oyɛ onkambi wɔ Yehova, olekɔ la ntshina l’anteyi kɛ nkfumbo kɛnde edjinge lako onto wolekɔ wopo wɔk’ɔmɔ lawɛ. Yehova atakosepa tende mande wɛ ndeka anto ankina. Nde akosepaka mande nde alendaka oloko wɔko ko ɛnaka ante olekɔ l’okitshakitshɛ edjinge okoka ndjeka mende ko nangha etshikitano. (Yee. 25:9) Lokoyashikikɛ ente nde nsasangaka efula winá w’onanghɛ k’enkfumɔ k’oyɛ l’akoka djɛ ndokambela. Okfulumeyelo wɔko la nkɔmano djɛko, nyɛnyɛka djɛ wɛ ‘oleko l’oloko wɔ wɔlɔ.’ (Luka 8:15) Djɛkondeke, kindjɛ mpɛyɛ Yehova kɛnɛ kelekɔ wɔlɔ lewɛ. Má nangha nghɔsɔ ongowa elonga kɛ nsasanga ‘má kɛnɛ k’onanghɛ wɛ nghɔmɛlɛ.’