1. Buakinyi Yehowa t’etupuandikishaa na bangi bantu?

YEHOWA t’akuminaa nka’shi bintu bioso bikale nka mumune nya. Atuakula bino muanda tukuete kumona bintu biadi mupangie; mitshi ilekene, nyema mpa na bantu. Takui muntu e biodi. Nyi buakinyi Yehowa t’akupuandikisha na bangi bantu. Atutalulaa bi muishimba diobe, biodi binyibinyi. (1 Sam. 16:7) Auku dingi bukome b’obe, kubofula k’obe na biabadi bakukushe. Na t’akutekie bua kukita kioshi mulombene kukita. Abitungu tuambule Yehowa pa kuimona nka bi’etumonaa. Paapa atuikala na “kinangu kikumbane,” t’atunangushena’shi tui bakile sunga’shi tui bashadile pe bangi.​—Lom. 12:3.

2. Buakinyi ta bi buwa kuipuandikisha na bangi?

² Eyendo’shi, tui kulongiela ku bileshesho bia bantu. Bu kileshesho, tuikuuka mukuetu mulume sunga mukashi akita mudimo wa bulungudi kalolo. (Eb. 13:7) Paapa, tui kumona mishindo i bungi yatudi balombene kulumbula mudimo wetu wa bulungudi. (Fid. 3:17) Anka, kui kuilekena pankatshi pa kuambula kileshesho ki buwa kia muntu, na kuipuandikisha naye. Su tu’epuandikisha na muntu tui balombene kupeta luabi, kubofula kuishimba, sunga kuipusha bu bashi na muulo. Nka bu biatuibimuene mu muisambo ushale, su tuepikena na bangi mu kakongye, mbilombene kuluisha kipuano kietu na Yehowa. Na kifulo kioso, Yehowa etulungula’shi: “Muntu ooso ataluule bwikashi bwaaye nabeene; paapa, su atundula mwanda wa kwitumbisha, eetumbishe mu’ye nabeene, kushii kwipwandjikisha na ungi muntu.”​—Nga. 6:4.

3. Matabula kinyi a mu kikudi odi muele akupe muloo?

 ³ Yehowa akiebe’shi wekale na muloo bua kiodi mulombene kukita mu mudimo waye. Bu kileshesho, su we mubatshishibue, abitungu wekale na muloo wi bungi muanda bokumbasha kaka kepatshila! We muate kino kitshibilo mube nabene. We muibikite muanda wa kifulo kiobe bua Yehowa. Banda kunangushena matabula odi mukite kubanga paapa. Bu kileshesho, we munyishe kutamisha kifulo kiobe bua kubadika Bible na kuilongiela pa bupenka su? Todi welaa nteko n’eshimba diobe diso su? (Mis. 141:2) We mupue kulumbula mushindo wa kubanga muisambo mu bulungudi na bia kufubisha bina mudimo bietu bia bulungudi? Na su we na kifuko, Yehowa mukukuashe bua kuikala mulume, mukashi sunga muledi e buwa su? We na muloo wi bungi bua ano matabula odi muele.

4. Nkinyi ki’atutalula mu uno muisambo?

⁴ Tui kukuasha bangi buabadia kuikala na muloo wa biabakitshi mu mudimo wa Yehowa. Tui kuibakuasha buabadi kuleka kuipuandikisha na bangi bantu. Mu uno muisambo, atumono mushindo ulombene baledi kukuasha bana b’abo, bia kuikuashena bena dibaka, na bilombene bakulu na bangi bakuetu kukuasha bangi bena Kidishitu. Na ku nfudilo, atutalula mayi a kulonda e mu Bible e kuitukuasha bua kuata bipatshila biatudia kulombasha.

5. Muyile Bena-Efeso 6:4, nkinyi akitungu’shi baledi badimukile?

⁵ Abitungu baledi badimukile kupuandikisha muana na ungi, sunga kuteka muana buadia kukita kintu kia’shi mulobene kukita. Su baledi bakita bino, be kubofusha bana b’abo. (Badika Bena-Efeso 6:4.) Mukuetu mukashi Sachiko * amba’shi: “Ku kalasa, balongieshi abadi abakumina’shi nkite bi bungi kukila bangi bena kalasa. Na dingi, mama badi akiebe’shi nkite bi bungi ku kalasa bua’shi mulongieshi ande na Papa shi Temwe, bakule bi buwa bua ba Temwe ba Yehowa. Biabia, mama badi akumina’shi mu mateta, mpete mpue 100 pa 100, nkintu kinamuene’shi ta kikukitshika. Ta kudi bipua bi bungi kasha napua kalasa, Anka, nkianeyipusha su Yehowa badi asankila sunga binadi mukite muande moso.”

6. Baledi be kulongiela kinyi mu Misambo 131:1, 2?

 ⁶ Dilongiesha dikata bua baledi, di mu Misambo 131:1, 2. (Badika.) Mfumu Davide badi muakule’shi, tabadi “akimbi bintu bikata,” sunga bintu bimutabukile. Pa muanda badi muiyishe, badi asanka na kiadia kukita na badi na butale. Baledi bekulongiela kinyi ku mayi a Davide? Abitungu baledi bekale beyishe na abauku mikalo yabo kushi penda mu biabakumina’shi abo bakite nya, kadi mpa mu bi’abakumina’shi bana b’abo bakite. Baledi mbalombene kukuasha bana b’abo pa kuibalesha’shi, be na bukome bua kukita kintu kampanda na ta be na bua kukita kintu kakengie, nsaa y’abebakuasha bua kuata bipatshila biabadia kukumbasha. Mukuetu mukashi Marina atentekiesha’shi: “Mama t’ampuandikishaa na bakuetu ba munda basatu sunga na bangi bana. Badi mundongieshe’shi, muntu oso e na yaye ngobesha na’shi muntu oso, e na muulo ku meso kua Yehowa. Natumbula mama, muanda pa muanda waye, tankamba kuipuandikisha na bangi.”

7-8. Mushindo kinyi ulombene mulume kulesha’shi ata mukashi aye na muulo?

⁷ Abitungu mulume muina Kidishitu anemekie mukashi aye. (1 Mp. 3:7) Kanemo akapushisha kupasukila na kunemeka bangi. Bu kileshesho, mulume, ata mukashi aye na muulo pa kumuneka. T’amutekie kia’shi mulombene kukita. Na t’amupuandiksha na bangi bakashi. Mukashi e kupusha naminyi su mulume amupuandikisha na bangi? Mukuetu mukashi Rosa, e na mulume shi Temwe akamba kumupuandikisha na bangi bakashi. Bishima biaye bi bukopo bibadi abitapa Rosa na bibadi abimutakula mukuiyipusha su kui muntu mumufule binyibinyi. Amba’shi: “Nadi na lukalo lua muntu a kunshinkamisha’shi ne na muulo ku meso kua Yehowa.” Anka, mulume muina Kidishitu anemekaa mukashi aye. Auku’shi, bikitshino biaye bi na bukitshi ku kipuano kiaye na mukashi aye mpa na kipuano kiaye na Yehowa. *

⁸ Mulume ata mukashi aye na muulo amutumbisha, amushinkamisha’shi mumufule, na kuakula bi buwa buaye. (Nki. 31:28) Nyi bibadi abikitshi mulume a Katerina, atuisambile mu muisambo ushale bua kumukuasha bua’shi epushe’shi tamushadile pe bangi. Katerina pabadi mukinga, nyin’aye badi amuakula mianda i bubi, na badi akamba kumupuandikisha na bangi, mpa na ba lole baye. Pa muanda wa bino, Katerina babangile kuipuandikisha na bangi, mpa na kunyima kuaye kutuela mu bia binyibinyi. Anka mulume aye muina Kidishitu badi mumukuashe bua kuleka kukita bino, na bua kuimona mu kipaso kikumbane. Amba’shi: “Mulume ande mmufule, atumbulaa bua mianda i buwa yandi mukite, na ela luteko buande. Na dingi, antentekieshaa nyikashi i buwa ya Yehowa na kukuasha bua kulumbula mueneno ande e bubi.”

9-10. Mushindo kinyi ubadi bakulu basha kalolo bakuashe ungi mukuetu mukashi buadia kuleka kuipusha bu shi na muulo?

⁹ Mushindo kinyi ulombene bakulu kukuasha bano bakuete kuipuandikisha na bangi? Tala kileshesho kia mukuetu mukashi Hanuni, abashibadi abakamba kutumbula pabadi mukinga. Amba’shi: “Nadi napusha buufu, na kuipusha’shi bangi bana mbakile. Nabangile kuipuandikisha na bangi kubanga nka panadi nki mukinga.” Mpa na kunyima kuaye kutuela mu bia binyibinyi, Hanuni badi atungunuka nka na kuipuandikisha na bangi. Nyi  buankinyi, badi epusha bu shi na muulo mu kakongye. Binobino, tadi mbala-mashinda e na muloo. Nkinyi kimukuashe bua kushintula binangu biaye?

¹⁰ Hanuni amba’shi abadi bamukuashe kui bakulu basha kalolo. Abadi bamulungule’shi e na muulo mu kakongye na abo nkumutumbula bua kileshesho kiaye kia lulamato. Bafundile’shi: “Angi mafuku, bakulu abadi bantekie bua kunyingisha bangi bakuetu bakashi abadi na lukalo lua bukuashi. Uno midimo ubadi unkuashe bua kuipusha bu e na muulo. Natentekiesha nsaa ibadi bakulu basha kifulo bantumbule bua binadi mungishe bangi ba nsonguakashi ba mu kakongye. Akupu, abo nkubadikila 1 Bena-Tesalonika 1:2, 3. Bino bibadi binkume kuishimba ngofu! Natumbula ngofu bano balami ba mikoko. Binobino, nataa na muloo mbalo yande mu ndumbuluilo a Yehowa.”

11. Muyile Yeeshaya 57:15, mbikunyi biatudia kukuasha bano be “mu malwa na bapombolekye”?

¹¹ Badika Yeeshaya 57:15. Yehowa apasukila ngofu baba boso be “mu malwa na bapombolekye.” Oso akuatudi mulombene kukwasha bua kunyigisha bano bakuetu balume na bakashi, kushi penda bakulu mu kakongye. Mushindo umune watudia kuibikita nyi kuibalesha’shi atuibapasukila. Yehowa akumina tuibaleshe’shi, muibafule. (Nki. 19:17) Tui kukuasha dingi bakuetu balume na bakashi pa kwikala na kuiyisha na kuuka mikalo yetu. Tatukumina kukaka binangu bia bangi kuatudi, kutshina’shi tala betulakila. Pamutu’a biabia, atufubisha ngobesha yetu na kiukilo kietu bua ku nyingisha bangi.​—1 Mp. 4:10, 11.

12. Buakinyi bantu beyishe abadi abakumina kuikala na Yesu? (Tala kifuatulo kia ku kipusu.)

¹² Tui kulonga bia kukitshina bangi mianda pa kutala mushindo ubadi Yesu akitshina balongi baye mianda. Badi muntu mukata sh’ekele dimo kuanka. Sunga biabia badi muntu ‘mupopeele na dingi mwiyishe kwishimba.’ (Mat. 11:28-30) Tabadi elesha’shi mukile bangi na’shi muibakile binangu. Badi afubisha ngakuilo mupelepele na kufubisha bileshesho bi buwa pabadi alongiesha bua kukuma mashimba a bantu beyishe. (Luk. 10:21) Mukuilekena na bakata ba bipuilo basha kuitatula, Yesu ta badi akitshi bia’shi bantu bepushe bu bashina muulo ku meso ku’Efile Mukulu. (Yo. 6:37) Anka, badi anemeka bantu boso.

13. Mushindo ubadi Yesu muleshe balongi baye kalolo na kifulo abitungiesha kinyi?

¹³ Kalolo na kifulo bia Yesu bibadi abimueka patoka mu mushindo ubadi akitshina balongi baye mianda. Badi auku’shi bena ngobesha na mianda ilekene. Nyi buakinyi t’abadi na bia kukita mianda i mumune sunga kulungula mukandu wi buwa mu mushindo umune. Anka, badi na muloo bua bioso bibadi abikitshi oso a kuabadi. Badi muibileshe mu kileshesho kiaye kia talenta. Mu kino kileshesho, mfumu badi mupe mufubi aye oso mudimo “muyiile bukome bwaye.” Umune a ku bafubi babidi ba sha kishima badi mupete bi bungi kukila ungi. Anka mfumu badi muibatumbule boso na mayi e mumune, amba’shi: “Bibuwa, mpika e buwa a kishima.”​—Mat. 25:14-23.

14. Tui kuambula mushindo ubadi Yesu akitshina bangi mianda naminyi?

¹⁴ Yesu kuet’alesha kalolo na kifulo mu mushindo w’etukitshina mianda. Auku’shi ngobesha na nshalelo etu mbilekene, biabia asankaa nsaa y’atuitatshisha bua kukita kioso akitungu. Abitungu tuambule Yesu. Tatukumanga kukita bia’shi muina Kidishitu netu epushe bu’shi na muulo sunga kupusha buufu muanda wa’shi ta mulombene kukita bi bungi bu bangi nya. Anka, abitungu tuikale atupete mishindo ya kutumbula bakuetu balume na  bakashi bua bioso bi’abakitshi mu mudimo wa Yehowa.

15-16. Bipeta kinyi bipete mukuetu mukashi pa kuata bipatshila biadi mulombene kulombasha?

¹⁵ Nsaa y’atuata bipatshila mu mudimo wa Yehowa, nshalelo etu ekala kalolo. Kilombene kuitukuasha, nkuata bipatshila muyile ngobesha yetu, kushi muyile ya bangi. Su tu’ata bipatshila bi’atush’atobesha, tui kubofula kuishimba. (Luk. 14:28) Tuate kileshesho kia mukuetu mukashi mbala-mashinda abetamina bu Midori.

¹⁶ Nshaye na Midori shi Temwe badi amuisha milongo pabadi ki mukinga, pa kumupuandikisha na bakuabo ba munda sunga bena kalasa naye. Midori amba’shi, “Nadi nepusha bushina muulo.” Pabadi ende na kukula, Midori babangile kuipusha kalolo. Amba’shi: “Nabadikaa Bible efuku dioso, muanda akuanshaa bua kupeta butale na kupusha’shi Yehowa mmufule.” Na dingi, badi muate bipatshila biadi mulombene kukumbasha, na atekaa Yehowa bua’shi amukuashe ebikumbashe. Bu kipeta, Midori e na muloo wa kiakia kia kuete kukita bua kufubila Yehowa.

17. Mushindo kinyi watudia ‘kutungunuka na kufuala muntu mupia . . . mu binangu [bietu]’ na tuikupeta bipeta kinyi?

¹⁷ Mbilombene kuata mafuku e bungi bua kushintula bi’atuimono. Nyi buakinyi Yehowa etulungula’shi: ‘Tungunukayi [NWT] na kufwala muntu mupya . . . mu binangu byenu.’ (Ef. 4:23, 24) Bua kuibikita, abitungu tutekie, tulongie Eyi di’Efile Mukulu na kuidinangushena. Tungunuka na kukita ino mianda, na kuteka Yehowa bukuashi. Kikudi kiaye ki selele akikukuasha bua kukambila kikudi kia kuipuandikisha na bangi. Yehowa akukuasha dingi  bua kutundula nsaa y’obanga kuikala na luabi sunga kuitatula, na nkukuasha bua’shi oshintulukie musango umune.

18. Mayi e mu 2 Myanda 6:29, 30, e nkunyingisha naminyi?

¹⁸ Badika 2 Myanda 6:29, 30. Yehowa auku bi muishimba dietu. Auku dingi ngoshi yatukuete kulua bua kukambila bukitshishi bui bubi bua mu ino nsenga na kukutua kuetu kua kupuidika. Apamono Yehowa mushindo w’atuitatshisha bua kukambila ino mianda, kifulo kiaye buetu akitama.

19. Nkileshesho kinyi kifubishe Yehowa bua kulesha bi’epushaa buetu?

¹⁹ Bua kupusha bi’epusha buetu, Yehowa mufubishe kileshesho kia kifulo ki pankatshi pa muana na nyin’aye. (Yesh. 49:15) Tala kileshesho kia nyina bana abetamina bu Rachel. Amba’shi: “Muan’ande Stephanie batandikilue kabishi. Nsaa inamumuene bua musango wa kumpala, kabadi kapela ngofu na takubadi lukulupilo. Nka doktere badi mukumine’shi ngikale na kamuata mu kiamo kiabela tuana tubishi (couveuse) efuku dioso bua kumutuala mu mueshi oso wa kumpala. Mu aa mafuku, ami na muan’ande tubadi befulene ngofu. Binobino, tadi na bipua bisamombo na mmupela pe bana ba bipua biaye. Sunga mbiabia, ne mumufule ngofu muanda mukudile pa bukopo na mumpe muloo mu muwa wande!” Tui na muloo wakuka’shi Yehowa muitufule ngofu nsaa y’amono atukitshi muetu moso bua kumufubila!

20. Bu biodi mufubi muilambule kui Yehowa, nkabingilo kinyi kodi nako ka kuikala na muloo?

²⁰ Bu biodi mufubi muilambule a Yehowa, we na muulo mu kifuko kiaye na ta kui ungi muntu e biodi. Yehowa ta mukukakie kuadi muanda wa’shi we buwa kukila bangi nya. Mmukukakie kuadi muanda mumone’shi we muiyishi na’shi okumina akulongieshe na’shi okumina kushintuluka. (Mis. 25:9) Ikala mushinkamishe’shi Yehowa e na muloo p’okitshi mobe moso bua kumufubila. We munyingile na we mushale na lulamato kuadi. Bino abilesha’shi we ‘n’eshimba di’eyendo na di buwa.’ (Luk. 8:15, Kilombeeno kipya 2014) Biabia, tungunuka na kukita mobe moso bua kufubila Yehowa. Paapa, wekala na kabingilo ke buwa ka kuikala na muloo “mube nabeene.”