1. Faandi mbei Jehovah an ta tei u maaka ku wotowan?

JEHOVAH an kë taa hii soni musu dë di wan, söseei an kë taa hii sëmbë musu dë di wan. U sa taki sö te u luku dee tookatooka soni di Gadu mbei, te kisi di tookatooka fasi fa libisëmbë mbei. Hiniwan fuu dë apaiti. Fëën mbei Jehovah an ta tei i maaka ku wotowan. A ta si unfa i dë tuutuu (1 Sam. 16:7). Jehovah sabi andi i sa du bunu, andi ja sa du sö bunu, söseei a sabi di fasi fa de kiija i. An ta hakisi i fii du soni di ja sa du. U musu mbei möiti fuu si useei kumafa Jehovah ta si u. Di soni dë o mbei u ’wegi useei ku bumbuu pakisei’. Wa o si useei hei möön fa u dë, ma a di seei ten wa o si kuma wa dë wan hojo soni tu.​—Lom. 12:3.

2. Faandi mbei an bunu te u ta tei useei maaka ku wotowan?

² An dë u taki taa u sa lei soni u woto sëmbë. U sa lei soni a wan baaa nasö wan sisa di ta du di peleikiwooko a wan bunu fasi (Heb. 13:7). U sa lei a de unfa u sa ta du di peleikiwooko a wan möön bunu fasi (Fil. 3:17). Ma te u ta djeesi wotowan a di bunu fasi fa de ta du soni ku te u ta tei useei maaka ku wotowan, na di wan seei soni. Di tei di i ta tei iseei maaka ku wotowan sa mbei i ko ta haun ku de, a sa mbei i lasi hati, nasö a sa mbei i fii kuma ja dë wan hojo soni. A di woto di pasa u bi lei taa te u ta fia ku dee baaa ku dee sisa fuu, nöö a sa mbei u ku Jehovah an dë gaan mati möön. Fëën mbei Jehovah ta piki u taa: „Hiniwan sëmbë musu wegi di soni di a ta du luku. Nöö di soni dë o mbei taa a o piizii ku di soni di a sa du, nöö an musu tei ënseei maaka ku woto sëmbë.”​—Gal. 6:4.

3. Andi ku andi i ko ta du möön bunu di ta mbei i ta wai?

 ³ Jehovah kë fii wai ku di möiti di i mbei u go a fesi a di biibi. Ee i dopu, nöö a musu u dë wan piizii soni da i taa i bi dou di maaka dë! Iseei bi buta taa joo dopu. I bi du ën u di i lobi Gadu. Nöö pakisei dee woto soni dee i bi du u lei taa i go a fesi a di biibi. I ko lobi di lesi i ta lesi di Bëibel möön gaanfa u, söseei i ko lobi di lei di i ta lei soni fëën möön gaanfa u? I ko ta begi ku hii i hati ö? (Ps. 141:2) I ko sa’ u fan ku wan sëmbë a wan möön bunu fasi te i ta du di peleikiwooko u, söseei i ko sa’ u wooko a wan möön bunu fasi ku dee buku ku woto soni dee u ta tei u peleiki ku de u? Ee i abi wan wosudendu, i si unfa Jehovah heepi i fii ko toon wan möön bunu womi, wan möön bunu mujëë, nasö wan möön bunu mama nasö tata u? Ee sö, nöö i sa wai seei taa i ko ta du soni a wan möön bunu fasi.

4. Fuun soni woo taki a di woto aki?

⁴ U sa heepi wotowan u de wai ku dee soni di de ta du u de sa dini Jehovah a wan möön bunu fasi. U sa heepi de tu u de an tei deseei maaka ku wotowan. A di woto aki woo si unfa mama ku tata sa heepi dee mii u de, unfa womi ku mujëë di tööu sa ta heepi deseei, söseei unfa gaanwomi u kemeente ku woto sëmbë jeti, sa heepi dee baaa ku dee sisa. Bakaten woo luku unfa so tëkisi u Bëibel sa heepi hiniwan fuu u buta maaka da useei di u sa ta dou.

5. Ku un soni mama ku tata musu ta köni te u luku Efeise 6:4?

⁵ Mama ku tata musu köni u de an tei wan u dee mii u de maaka ku wan wotowan, söseei de an musu ta suku u wan mii u de du soni di an o sa du. Ee mama ku tata ta du dee soni aki, a sa mbei di mii lasi hati. (Lesi Efeise 6:4.) Wan sisa de kai Sachiko * bi taki taa: „Dee sëmbë dee bi ta lei mi soni a siköö bi ta kë u mi wooko möön bunu möön dee woto mii dee mi ku de bi dë a di wan kalasi. Boiti di dë, mi mama bi kë u mi wooko bunu a siköö, sö taa di sëmbë di bi ta lei mi soni a siköö ku mi tata di an bi dë wan Jehovah Kotoigi, bi sa pakisei bunu u dee sëmbë u Jehovah. An bi kë u mi mbei na wan föutu seei te mi bi ta mbei exame. Ma ma bi o sa du di soni dë. Sömëni jaa pasa kaa di mi kaba siköö, ma tökuseei so juu mi ta fii kuma Jehovah an ta wai ku mi, hii fa mi ta du hii soni di mi sa du dëën.”

6. Andi mama ku tata sa lei u Psalöm 131:1, 2?

 ⁶ Mama ku tata sa lei wan fanöudu soni a di soni di sikifi a Psalöm 131:1, 2. (Lesi ën.) Könu Dafiti bi taki taa „an bi ta suku u du soni di bi bigi dëën tumisi faa du”, nasö an bi ta suku u du soni di an bi o sa du. U di a bi abi sakafasi mbei a bi sa dë tifeedi. Andi mama ku tata sa lei a di soni aki? Wë ee de kë lei taa de abi sakafasi, nöö de an musu duwengi deseei nasö dee mii u de u du soni di de an sa du. Mama ku tata musu luku andi dee mii u de sa’ u du bunu ku andi de an sa’ u du sö bunu, nöö de musu buta maaka da dee mii di de sa dou. Wan sisa de kai Marina ta mëni unfa soni bi dë dëën. A bi taki taa: „Na wan daka seei mi mama tei mi maaka ku dee baaa u mi, nasö ku woto mii. A bi lei mi taa hii sëmbë abi wan soni di a sa’ u du bunu, söseei taa Jehovah ta kai hiniwan fuu gaan soni. U di mi mama bi lei mi di soni aki, mbei ma ta tei miseei maaka ku wotowan.”

7-8. Unfa wan womi di tööu sa lei taa a ta kai hën mujëë gaan soni?

⁷ Wan womi di tööu, söseei di dë wan Keesitu sëmbë musu lei taa a ta kai hën mujëë gaan soni (1 Pet. 3:7). Te wan sëmbë ta kai wan wotowan gaan soni, nöö a ta buta pakisei nëën, söseei a ta lesipeki ën. Wan womi ta lei taa a ta kai hën mujëë gaan soni te a ta lesipeki ën. An ta hakisi di mujëë fëën faa du soni di an sa du. Nöö an ta tei hën mujëë maaka ku woto mujëë. Unfa wan mujëë o ta fii ee hën manu ta tei ën maaka ku woto mujëë? Di manu u wan sisa de kai Rosa, di an dë Kotoigi, ta tei di mujëë fëën maaka ku woto mujëë. Dee soni di Rosa manu ta piki ën ta mbei an ta si hënseei u soni, söseei a ta mbei a fii kuma sëmbë an lobi ën. Di sisa aki ta taki taa: „Hii juu mi bi ta kë jei taa Jehovah ta kai mi gaan soni.” Wan womi di tööu, söseei di dë Keesitu sëmbë musu ta lei hën mujëë taa a ta kai ën gaan soni. A sabi taa te a ta du sö, nöö hën ku ën mujëë o ta libi bunu ku deseei, söseei hën ku Jehovah o dë mati tu. *

⁸ Wan womi di tööu di ta kai hën mujëë gaan soni ta gafëën mujëë, söseei a ta lei ën taa a lobi ën (Nöng. 31:28). Di soni aki di manu u Sisa Katerina, di u bi taki soni fëën a di woto di pasa, bi du. A bi heepi di mujëë fëën fu an fii kuma an dë wan hojo soni. Di di sisa aki bi dë wan piki mii, nöö hën mama bi ta taki soni di bi ta mbei a fii kuma an bunu tjika. Hën mama bi ta tei ën maaka ku woto mujëë mii, te kisi dee mati fëën seei. Di soni aki bi mbei taa Katerina bi bigi ta maaka hënseei ku wotowan. A bi ta du di soni aki go dou hii fa a bi dë a di tuutuu lei! Ma hën manu bi heepi ën fu an du di soni aki möön, söseei faa ko ta si hënseei a di soifi fasi. Katerina bi taki taa: „Mi manu lobi mi, a ta gafa mi da dee bunu soni dee mi ta du, söseei a ta begi da mi. A ta mbei mi buta pakisei a dee bunu fasi dee Jehovah abi, nöö a ta heepi mi u mi tooka so fasi fa mi ta pakisei di an bunu.”

9-10. Unfa wantu gaanwomi bi heepi wan sisa fu an tei hënseei maaka ku wotowan?

⁹ Unfa dee gaanwomi sa heepi dee sëmbë dee ta tei deseei maaka ku wotowan? Luku di woto u wan sisa de kai Hanuni. Di di sisa aki bi dë miii, nöö sëmbë an bi ta gafëën wan apaiti. Hanuni bi taki taa: „Mi bi ta fii sen, nöö mi bi ta si kuma woto mii bi bunu möön mi. Sensi di wojo u mi limbo mi ta tei miseei maaka ku wotowan.” Hii fa Hanuni bi ko a di tuutuu lei, tökuseei a bi ta tei hënseei maaka  ku wotowan. Te u kaba fëën, a bi ko ta fii kuma an bi abi na wan du a di kemeente. Ma nöunöu a ta du di pioniliwooko, nöö a ta dë waiwai. Andi bi heepi di sisa aki faa tooka di fasi fa a bi ta pakisei?

¹⁰ Hanuni bi taki taa wantu gaanwomi bi heepi ën. De bi piki ën taa a ta du sömëni bunu soni a di kemeente, söseei de bi gafëën u di a dë wan sëmbë di wotowan sa ta djeesi. Di sisa aki bi taki tu taa: „Wantu pasi dee gaanwomi hakisi mi u mi da wantu sisa taanga, u di dee sisa aki bi abi heepi fanöudu. Di soni aki bi mbei mi fii taa sëmbë abi mi fanöudu. Mi ta mëni jeti di wantu gaanwomi bi da mi tangi u di mi bi da wantu njönku sisa taanga. Hën de lesi 1 Tesalonika 1:2, 3 da mi. Mi bi fii bunu seei! Mi ta da dee sikapuma aki tangi, u di de heepi mi u mi si taa de abi mi fanöudu a di kemeente.”

11. Unfa u sa heepi dee sëmbë „dee wotowan ta peeta, söseei dee abi sakafasi” kumafa Jesaaja 57:15 ta taki?

¹¹ Lesi Jesaaja 57:15. Jehovah ta booko hën hedi tuutuu ku dee sëmbë „dee wotowan ta peeta, söseei dee abi sakafasi”. Na dee gaanwomi wanwan musu da dee lö baaa ku sisa aki taanga. Ma hii u tuu sa ta du di soni aki. Wan fasi fa u sa da de taanga da te u ta lei taa u ta booko u hedi ku de tuutuu. Jehovah kë taa u musu mbei dee baaa ku dee sisa aki ko si fa a lobi de tjika (Nöng. 19:17). U sa heepi de tu te u ta lei taa u abi sakafasi. Wa kë taa sëmbë musu buta pakisei a u, u di di soni dë sa mbei wotowan ko ta haun ku u. Ma u kë taa dee soni dee u ta taki, ku dee soni dee u ta du musu da dee baaa ku dee sisa fuu taanga.​—1 Pet. 4:10, 11.

12. Faandi mbei sakafasi sëmbë bi lo’ u dë ku Jesosi? (Luku di peentje u di kafiti.)

¹² U sa lei unfa u sa libi ku wotowan te u luku di fasi fa Jesosi bi libi ku dee bakama fëën. Jesosi bi dë di möön nëbai sëmbë di bi libi a goonliba aki. Hii fa a bi dë sö, tökuseei Jesosi bi abi tjalihati, söseei a bi abi sakafasi (Mat. 11:28-30). Na wan daka seei a njan buka taki unfa a köni tjika, nasö unfa a sabi soni tjika. Te Jesosi bi ta lei sëmbë soni, nöö an bi ta kai wöutu di sëmbë an bi ta fusutan, söseei a bi ta konda woto di an bi taanga u fusutan (Luk. 10:21). Jesosi an bi dë kuma dee hedima u keiki dee bi abi gaanfasi. An bi ta mbei wotowan fii kuma de an dë wan hojo soni a Gadu wojo (Joh. 6:37). Ma a bi ta lesipeki de.

13. Unfa Jesosi bi lei taa a lobi dee bakama fëën, söseei taa a bi ta libi bunu ku de?

¹³ Di fasi fa Jesosi bi ta libi ku dee bakama fëën bi ta lei taa a bi lobi de, söseei taa a bi ta libi bunu ku sëmbë. A bi sabi taa soni an bi dë di wan seei fasi da hii de tuu. Fëën mbei de tuu an bi o sa tja hiniwan faantiwöutu, söseei na hii de tuu bi o sa du hia a di peleikiwooko. Ma tökuseei a bi ta wai, u di hii sëmbë bi ta du andi a bi sa du. Jesosi bi lei taa a ta fusutan unfa soni dë da hiniwan sëmbë te u luku di woto di a bi da u dee talënti. A di woto dë, di masa bi da hiniwan saafu wooko „leti kumafa a sabi taa de abi köni tjika fu de sa wooko”. Hii fa dee tu saafu tuu bi wooko taanga, tökuseei wan u dee saafu aki bi wooko möön möni möön di wotowan fëën. Ma di masa bi gafa dee tu saafu tuu a di wan seei fasi. A bi taki taa: „Aai, womi, i dë wan sëmbë u futoou e. I dë wan bumbuu futuboi u mi seei”.​—Mat. 25:14-23.

14. Unfa u sa djeesi Jesosi a di fasi fa a bi ta libi ku wotowan?

¹⁴ Hii juu Jesosi ta lei taa a lobi u, söseei taa a ta libi bunu ku u. A sabi taa na hii u tuu sa’ u du soni di wan fasi. A ta wai te u ta du hii soni di u sa du. U musu mbei möiti fuu djeesi Jesosi. Nöiti u musu mbei wan baaa nasö wan  sisa fii kuma an dë wan hojo soni. Söseei nöiti u musu mbei a fii sen u di an sa du soni kuma wotowan. Ma u musu suku u gafa dee baaa ku dee sisa fuu, u di de ta du hii soni di de sa u dini Jehovah.

15-16. Unfa di buta di wan sisa bi buta maaka da hënseei, bi tja wini ko dëën?

¹⁵ Te u ta buta maaka a di dini di u ta dini Jehovah, nöö u ta dë ku piizii. Ma u musu buta maaka di u sa dou. Wa musu suku nömönömö u dou dee maaka di wotowan ta buta, u di di soni aki sa mbei u fii bookosaka (Luk. 14:28). Boo luku di woto u wan sisa de kai Midori, di ta du di pioniliwooko.

¹⁶ Di Midori bi dë piki mii, nöö hën tata di an dë wan Kotoigi, bi ta piki ën taa hën baaa ku hën sisa ku dee mii dee hën ku de dë a di wan kalasi, bunu möön hën. Midori bi taki taa: „Mi bi ta fii kuma ma dë wan hojo soni.” Ma di a bi ko gaan sëmbë, hën an bi ta fii sö möön. A bi taki taa: „Mi bi ta lesi di Bëibel hiniwan daka, u di a bi ta heepi mi u mi fii taa Jehovah lobi mi.” Boiti di dë, a bi ta buta maaka da hënseei di a sa dou, nöö a bi ta begi Jehovah faa heepi ën faa sa dou dee maaka dë. Dee soni aki bi heepi Midori faa wai ku dee soni dee a sa du da Jehovah.

17. Andi sa heepi u fuu tooka di fasi fa u ta pakisei, nöö un wini di soni aki sa tja ko?

¹⁷ A ta tei ten u tooka di fasi fa u ta si useei. Fëën mbei Jehovah ta piki u taa: ’Di pakisei fuunu musu ta tooka nöömö u te un ko wan hii njunjun sëmbë’ (Ef. 4:23, 24). Ee u kë du di soni aki, nöö u musu ta begi, söseei u musu ta lesi di Bëibel ta pakisei fundu fëën. Mbei möiti fii ta du dee soni aki nöömö, söseei hakisi Jehovah kaakiti fii sa du de. Di santa jeje fëën  o heepi i fu ja tei iseei maaka ku wotowan. Jehovah o heepi i fii sabi ee i ko abi fasi kuma gaanfasi ku haun, nöö a o heepi i fii tooka soni wantewante.

18. Unfa dee soni dee sikifi a 2 Kloniki 6:29, 30, sa da i kötöhati?

¹⁸ Lesi 2 Kloniki 6:29, 30. Jehovah sabi unfa u ta fii. A sabi tu unfa u ta feti ku di jeje u di goonliba aki, söseei ku dee suwakifasi fuu. Te Jehovah ta si unfa u ta feti ku dee soni aki tjika, nöö a ta lobi u möön gaanfa.

19. Konda wan woto di ta lei unfa Jehovah ta fii da u tjika?

¹⁹ Jehovah bi tei di fasi fa wan mama ta dë ku di beibi fëën maaka ku di fasi fa a ta fii da u (Jes. 49:15). Luku di woto u wan mama de kai Rachel. A bi taki taa: „Mi bi pai di mujëë mii u mi de kai Stephanie, ufö di juu fëën dou. Di fosu pasi di mi si ën a bi piki seei. Di fosu liba baka di mi pai ën di a bi dë a hatiwosu, di data bi ta da mi pasi u mi tjëën a maun hiniwan daka. A di pisiten dë, mi bi ko lobi di beibi u mi möön gaanfa. Nöunöu a abi sikisi jaa, ma an bigi kuma dee pei fëën. Mi lobi ën gaanfa seei, u di soni miti ën seei, ma töku a dë a libi, söseei a mbei mi ko ta dë waiwai!” U ta wai seei, u di u sabi taa a di lö fasi aki Jehovah ta lobi u tu te a si di taanga möiti di u ta mbei u dini ën ku hii u hati!

20. Faandi mbei dee dinima u Jehovah sa ta dë waiwai?

²⁰ U di i da wan dinima u Jehovah, mbei u sa taki taa i da wan sëmbë u di wosudendu fëën di a ta kai gaan soni. Na wan woto sëmbë dë kuma i. Jehovah an hai i ko nëën u di i bunu möön wotowan. Ma a du ën, u di a sabi fa hati fii dë. A si taa i abi sakafasi, taa i dë kabakaba u lei soni fëën, söseei a si taa i dë kabakaba u tooka soni a di libi fii (Ps. 25:9). I sa dë seiki taa Jehovah ta wai te i ta du hii soni di i sa du u dini ën. Di fasi fa i ta hoi dou, ku di fasi fa i ta hoi iseei nëën, ta lei taa i abi wan bunu hati (Luk. 8:15). Mbei möiti go dou u du hii soni di i sa du u dini Jehovah. Di soni dë o mbei i „piizii ku di soni di [i] sa du”.