1. Fu san ede Yehovah no e teki wi gersi nanga trawan?

YEHOVAH no wani taki ala sani èn ala sma de a srefi. Wi sabi disi fu di a meki ala sortu bon, bromki, meti èn ala sortu sma. Tu fu a srefi sma no de. Sobun, noiti Yehovah e teki yu gersi nanga trawan. A e luku yu ati, fa yu de trutru na inisei (1 Sam. 16:7). A sabi tu san yu man du bun, san yu no man du so bun, èn a sabi fa yu kweki. A no o aksi moro fu yu leki san yu man gi. Wi musu si wisrefi soleki fa Yehovah e si wi. Te wi o du dati, dan wi o de nanga „krin frustan” èn wi no o denki tumusi furu fu wisrefi, ma wi no o denki taki wi no warti noti tu.​—Rom. 12:3.

2. Fu san ede a no bun te wi e teki wisrefi gersi nanga trawan?

² A no de fu taki dati wi kan leri fu a bun eksempre fu trawan. Kande wi sabi wan brada noso sisa di sabi du a preikiwroko bun (Hebr. 13:7). Wi kan teki na eksempre fu so wan sma fu si san wi kan du fu man preiki moro bun (Fil. 3:17). Ma te yu e teki a bun eksempre fu wan sma, dan dati a no a srefi leki te yu e teki yusrefi gersi nanga en. Te yu ben o du disi, dan yu kan dyarusu, yu kan lasi-ati, èn yu kan kisi a firi srefi taki yu no warti noti. Soleki fa wi ben leri na ini na artikel na fesi, dan wi nanga Yehovah kan pori te wi e strei nanga wi brada nanga sisa. Fu di Yehovah lobi wi, meki a e gi wi a rai disi: „Meki ibri sma ondrosuku san na den sani di ensrefi e du. Dan dati sa meki taki a e prisiri nanga san ensrefi e du èn a no musu teki ensrefi gersi nanga tra sma.”​—Gal. 6:4.

3. Sortu sani di yu du fu go na fesi e gi yu prisiri?

³ Yehovah wani taki yu prisiri nanga ala den sani di yu e du fu go na fesi na ini na anbegi. Fu eksempre, efu yu dopu, dan yu musu breiti taki yu doro a marki dati! Yu  teki a bosroiti dati fu di yusrefi ben wani. Yu du dati fu di yu lobi Gado. Prakseri ala den sani di yu du sensi a ten dati. Fu eksempre, yu kon lobi en fu leisi Bijbel èn yu e studeri moro dipi? Den begi fu yu kon moro bun èn yu e begi nanga yu heri ati? (Ps. 141:2) A kon moro makelek gi yu fu bigin wan takimakandra na ini a preikiwroko èn yu sabi gebroiki den wrokosani di wi kisi moro bun? Èn efu yu abi wan osofamiri, dan Yehovah yepi yu fu kon tron wan moro bun masra, wefi, papa noso mama? Yu kan breiti te yu luku ala den sani disi èn yu si taki yu go na fesi.

4. San wi o luku na ini na artikel disi?

⁴ Wi kan yepi trawan fu prisiri nanga sani di den e du fu go na fesi na ini na anbegi fu Yehovah. Wi kan yepi den tu fu no teki densrefi gersi nanga trawan. Na ini na artikel disi wi o si fa papa nanga mama kan yepi den pikin, fa trowpatna kan yepi makandra, èn fa owruman nanga trawan kan yepi den brada nanga sisa. Baka dati wi o luku wan tu Bijbeltekst di kan yepi wi fu poti marki di wi kan doro.

5. San papa nanga mama no musu du, soleki fa Efeisesma 6:4 e sori?

⁵ Papa nanga mama musu luku bun taki den no teki a wan pikin gersi nanga a trawan noso taki den e aksi wan pikin fu du moro leki san a man du. Te den du disi, dan den kan meki den pikin lasi-ati. (Leisi Efeisesma 6:4.) Wan sisa di nen Sachiko * e taki: „Den leriman na skoro ben wani taki mi ben musu du en moro bun leki den tra pikin na skoro. Boiti dati, mi mama ben wani taki mi ben musu du en bun na skoro so taki den leriman fu mi nanga mi papa, di no de wan Kotoigi, ben o denki bun fu Yehovah pipel. Fu taki en leti, a ben wani taki mi ben musu kisi 10 punt na eksame, ma mi no ben man du dati. Aladi mi no de na skoro moro omeni yari kaba, toku mi e kisi a firi son leisi taki Yehovah no breiti nanga mi awinsi mi e du ala san mi man.”

6. San papa nanga mama kan leri fu Psalm 131:1, 2?

⁶ Wan prenspari les gi papa nanga  mama de fu feni na ini Psalm 131:1, 2. (Leisi en.) Kownu David ben taki dati a no ben „suku fu du sani di bigi tumusi” gi en noso di a no ben o man du noiti. Fu di a ben abi sakafasi, meki a ben de tevrede nanga san a ben man du. San papa nanga mama kan leri fu den wortu fu David? Te papa nanga mama abi sakafasi, dan den no o fruwakti tumusi furu fu densrefi, ma den no o fruwakti tumusi furu fu den pikin tu. Den musu luku san a pikin man du bun èn san a no man du so bun, èn poti marki gi en di a man doro. Disi o yepi a pikin fu firi taki a warti. Wan sisa di nen Marina e taki: „Noiti mi mama teki mi gersi nanga den dri brada fu mi noso nanga tra pikin. A leri mi taki ibri sma abi sani di a man du bun èn taki Yehovah lobi ibriwan fu wi. Mi breiti taki mi mama kweki mi so, fu di mi no abi a gwenti now fu teki misrefi gersi nanga trawan.”

7-8. San wan masra kan du fu sori taki a e gi en wefi grani?

⁷ Wan Kresten masra musu gi en wefi grani (1 Petr. 3:7). Wan masra di e gi en wefi grani, e sori lespeki gi en èn a e sori taki a e warderi en. A no e aksi en moro leki san a man gi. A no de fu taki dati a no o teki en wefi gersi nanga tra umasma. Fa wan wefi ben o firi efu en masra ben o teki en gersi nanga tra umasma? Wan sisa di nen Rosa e firi leki a no warti noti èn a e tweifri srefi efu sma lobi en. A e firi so fu di en masra di no de wan Kotoigi, abi a gwenti fu teki en gersi nanga tra umasma. Den sani di a e taigi Rosa, e hati en srefisrefi. Rosa e taki: „Ibri leisi baka sma musu memre mi taki Yehovah lobi mi.” Ma wan Kresten masra e lespeki en wefi. A sabi taki te a o du dati, a o abi wan bun matifasi nanga en wefi èn wan bun matifasi nanga Yehovah. *

⁸ Wan masra di e gi en wefi grani, e taki bun fu en, a e taigi en wefi taki a lobi en, èn a e sori en taki a e warderi en (Odo 31:28). Disi na fa a masra fu Katerina, di wi ben kari na ini na artikel na fesi, ben yepi en fu no abi a firi taki a no warti noti. Di Katerina ben de wan pikin meisje, en mama ben gi en a firi taki a no bun èn a ben abi a gwenti fu teki en gersi nanga tra meisje, srefi nanga den mati fu en. A sani disi meki Katerina kisi a gwenti fu teki ensrefi gersi nanga trawan, srefi baka di a kon na ini waarheid. Ma en Kresten masra yepi en fu tapu nanga a gwenti disi èn fu kon kisi wan yoisti denki fu ensrefi. Katerina e taki: „Mi masra lobi mi, a e prèise mi gi den bun sani di mi e du, èn a e begi gi mi. A e sori mi tu tapu den moi fasi fu Yehovah èn a e yepi mi fu no teki misrefi gersi nanga trawan.”

9-10. Fa lobi-ati owruman yepi wan sisa fu no teki ensrefi gersi nanga trawan?

⁹ Fa owruman kan yepi den wan di abi a gwenti fu teki densrefi gersi nanga trawan? Luku na eksempre fu wan sisa di nen Hanuni, èn di sma no ben prèise di a ben de wan pikin. A e taki: „Mi ben e syen èn mi ben abi a firi taki den tra pikin ben bun moro mi. Dati meki sensi a ten dati mi bigin teki misrefi gersi nanga trawan.” Srefi baka di Hanuni tron wan Kotoigi, a ben e tan teki ensrefi gersi nanga  trawan. Dati meki a ben abi a firi taki san a ben e du na ini a gemeente no ben prenspari. Ma now a e dini leki wan pionier èn a de koloku. San yepi en fu kenki a fasi fa a ben e denki?

¹⁰ Hanuni taki dati tu lobi-ati owruman yepi en. Den taigi en taki a de fanowdu na ini a gemeente èn den prèise en gi a bun eksempre di a e gi. A e skrifi: „Wan tu leisi den owruman aksi mi fu go na wan tu sisa di ben abi yepi fanowdu èn fu gi den deki-ati. A sani disi ben gi mi a firi taki sma abi mi fanowdu. Mi man memre taki wan tu owruman ben taki mi tangi fu di mi ben gi wan tu yongu sisa deki-ati. Dan den leisi 1 Tesalonikasma 1:2, 3 gi mi. A sani dati naki mi ati trutru! Tangi fu den lobi-ati skapuman disi, meki mi sabi now taki mi de fanowdu na ini a gemeente.”

11. Fa wi kan yepi den wan di lasi-ati èn di brokosaka soleki fa skrifi na Psalm 34:18?

¹¹ Leisi Psalm 34:18. Yehovah e firi gi den wan di lasi-ati èn di brokosaka. Wi alamala, a no den owruman wawan, kan yepi fu gi den lobi brada nanga sisa disi deki-ati. Wan fasi fa wi kan gi den deki-ati na te wi e sori den taki wi e broko wi ede trutru nanga den. Yehovah wani taki wi yepi den fu frustan taki a lobi den (Odo 19:17). Wi kan yepi wi brada nanga sisa tu te wi abi sakafasi. Wi no o du sani fu meki sma poti prakseri na wi wawan, fu di wi sabi taki a sani disi ben kan meki trawan firi dyarusu. Na presi fu dati wi wani gebroiki a koni fu wi fu gi makandra deki-ati.​—1 Petr. 4:10, 11.

12. Fu san ede den mofinasma ben lobi fu de nanga Yesus? (Luku a fowtow na tapu a kafti.)

¹² Wi kan leri furu te wi e luku fa Yesus ben libi nanga den bakaman fu en. A ben de a moro bigi man di oiti ben libi. Toku a ben „abi safri-ati nanga sakafasi” (Mat. 11:28-30). A no ben meki bigi fu di a ben abi so furu sabi nanga koni. Te a ben gi leri, a ben du dati na so wan fasi taki ala sma ben man frustan en. A ben gebroiki agersitori di ben makelek fu frustan èn di ben naki sma ati (Luk. 10:21). Tra fasi leki den kerki fesiman di ben abi bigifasi, noiti a gi den mofinasma a firi taki Gado no e si den leki warti sma (Yoh. 6:37). Na presi fu dati, Yesus ben sori lespeki gi den.

13. Fa Yesus sori switifasi nanga lobi gi den disipel fu en?

¹³ Yesus ben sori switifasi nanga lobi gi den disipel fu en. A ben sabi taki den ben man du difrenti sani èn taki den ben de na ini difrenti situwâsi. Dati meki den alamala no ben tyari den srefi frantwortu èn den no ben man du a srefi na ini a preikiwroko. Toku a ben breiti te den ben du ala san den ben man du. Yesus ben sori fa a ben e denki di a gi na agersitori fu den talenti. Na ini na agersitori dati a masra e gi ibri srafu wroko èn a e hori na prakseri „san ibriwan fu den ben man du”. Aladi ala tu srafu ben wroko fayafaya, toku wán fu den ben meki moro leki a trawan. Ma a masra prèise den ala tu nanga den srefi wortu: „Heri bun, yu na wan bun srafu di e du en wroko bun!”​—Mat. 25:14-23.

14. Fa wi kan teki na eksempre fu Yesus?

¹⁴ Yesus e sori switifasi nanga lobi gi wi tu. A sabi san ibriwan fu wi man du èn san na a situwâsi fu wi. A breiti te wi e du ala san wi man. Wi musu teki na eksempre fu Yesus. Noiti wi musu gi wan brada noso wan sisa a firi taki a no warti noti  èn wi no musu meki a firi syen fu di a no man du so furu leki trawan. Na presi fu dati wi e suku okasi fu prèise wi brada nanga sisa fu di den e du ala san den man fu dini Yehovah.

15-16. Fa wan sisa kisi wini di a poti marki gi ensrefi di a man doro?

¹⁵ Te wi e poti marki na ini a diniwroko fu Yehovah, dan wi o de koloku. Ma wi musu hori na prakseri san wi man du èn san na a situwâsi fu wi. Wi no abi fu poti den srefi marki leki trawan. Efu wi ben o du dati, dan wi ben o man lasi-ati (Luk. 14:28). Luku na eksempre fu Midori, wan sisa di e pionier.

¹⁶ Di Midori ben pikin ete, en papa di no de wan Kotoigi, ben gwenti taigi en taki en brada nanga sisa èn den pikin fu en klas betre moro en. Midori e taki: „Mi ben firi leki mi no warti noti.” Ma di Midori kon bigi, a no ben firi so moro. A e taki: „Mi ben leisi Bijbel ibri dei fu di dati ben yepi mi fu abi freide na ini mi ati èn fu frustan taki Yehovah lobi mi.” Boiti dati, a e poti marki na ini a diniwroko di a man doro èn a e begi Yehovah fu yepi en fu doro den marki dati. Disi yepi Midori fu prisiri nanga den sani di a man du gi Yehovah.

17. San kan yepi wi fu tan du muiti fu meki a denki fu wi kon nyun èn san o de a bakapisi?

¹⁷ A kan teki langa fu kenki a fasi fa wi e denki fu wisrefi. Dati meki Yehovah e taigi wi: „Tan du muiti fu meki a denki fu unu kon nyun” (Ef. 4:23, 24). A no de fu taki dati efu wi wani du dati, dan wi musu begi, studeri Gado Wortu èn denki dipi fu en. Tan du den sani disi èn aksi  Yehovah fu gi yu krakti. A santa yeye fu en o leri yu fu no teki yusrefi gersi nanga trawan. Yehovah o yepi yu tu fu si efu yu e dyarusu noso efu yu kon kisi bigifasi èn a o yepi yu fu tyari kenki kon esi-esi te disi pasa.

18. Fa den wortu fu 2 Kroniki 6:29, 30 kan trowstu yu?

¹⁸ Leisi 2 Kroniki 6:29, 30. Yehovah sabi fa wi e firi. A e si tu fa wi e feti teige a yeye fu grontapu nanga den swakifasi fu wi. Te Yehovah e si omeni muiti wi e meki fu feti teige den sani disi, dan a o lobi wi moro.

19. Gi wan eksempre di e sori fa Yehovah e denki fu wi?

¹⁹ Fu meki wi frustan fa a e denki fu wi, Yehovah e gebroiki na eksempre fu a lobi di wan mama abi gi en beibi (Yes. 49:15). Luku na eksempre fu wan mama di nen Rachel. A e skrifi: „Stephanie, a meisje fu mi gebore tumusi fruku. Di mi si en fu a fosi leisi, a ben de so pikin èn a ben gersi leki a no ben o tan na libi. Ma na ini a fosi mun baka di a gebore den sma fu na ati-oso gi mi primisi fu hori en na ini mi anu wan pikinso ibri dei. Na den momenti dati, mi nanga mi beibi kon de krosibei fu makandra. Now Stephanie abi siksi yari èn a moro pikin leki tra pikin-nengre di abi siksi yari. Ma mi lobi en srefisrefi fu di mi si fa a feti fu tan na libi èn mi breiti taki mi abi en!” A e gi wi furu trowstu te wi sabi taki na so Yehovah lobi wi tu èn te a e si taki wi e du ala san wi man fu dini en nanga wi heri ati.

20. Fu san ede yu leki wan futuboi fu Yehovah kan prisiri?

²⁰ Fu di yu na wan futuboi fu Yehovah, meki yu de na ini a famiri fu en èn a e warderi yu srefisrefi. Tu fu yu no de. Di Yehovah hari yu kon na en, a no du dati fu di yu betre moro tra sma. Ma a luku na ini yu ati èn a si taki yu abi a sakafasi fu teki leri fu en èn fu tyari kenki kon (Ps. 25:9). Yu kan de seiker taki Yehovah breiti te yu e du ala san yu man fu dini en. Yu horidoro èn yu e dini en te now ete. Disi e sori taki yu „abi wan krin èn bun ati” (Luk. 8:15). Sobun, tan du ala san yu man gi Yehovah. Dan yu o prisiri „nanga san [yusrefi] e du”.