1. Kungani Jehova angasicatsanisi nalabanye?

JEHOVA uyajabula nakabona tintfo letehlukahlukene nebantfu labangafani. Loku siyakubona endalweni yakhe lemangalisako, lefaka ekhatsi bantfu. Sibantfu asifani. Ngako Jehova akakucatsanisi nalabanye. Uhlola inhlitiyo, abone loko longiko ngekhatsi. (1 Sam. 16:7) Uyakwati loko longakhona kukwenta kahle, longeke ukhone kukwenta kahle, nendlela lowakhuliswa ngayo. Akakuceli kutsi wente loko longeke ukhone kukwenta. Kufanele silingise Jehova, sitibone ngendlela lasibona ngayo. Nasenta njalo, ‘sitawuticabanga ngendlela lefanele,’ singatikhandzi sincono nobe sitibukele phansi.—Rom. 12:3.

2. Kubi ngani kuticatsanisa nalabanye?

² Singafundza etibonelweni letinhle talabanye. Sibonelo saloko kutsi, kungenteka kunadzadze nobe umzalwane lomatiko lophumelelako emsebentini wekushumayela. (Heb. 13:7) Singafundza kuye, sibuke indlela lesingawutfutfukisa ngayo umsebenti wetfu wekushumayela. (Fil. 3:17) Kodvwa kunemehluko emkhatsini wekulingisa sibonelo lesihle salotsite nekuticatsanisa naye. Nangabe siticatsanisa nalabanye, singaba nemona, sidvumateke nobe sitive singasilutfo. Njengobe sifundzile esihlokweni lesendlulile, kuticatsanisa nalabanye ebandleni kungabulimata buhlobo betfu naJehova. Ngelutsandvo, Jehova uyasikhutsata utsi: “Nguloyo naloyo akahlole tento takhe, nakenta njalo utawujabula ngalakwentile, hhayi ngekutsi aticatsanise nalomunye umuntfu.”—Gal. 6:4.

3. Nguyiphi intfutfuko lekujabulisako lesewuyentile ekukhonteni Jehova?

 ³ Jehova ufuna ujabule ngekutsi uyatfutfuka ekumkhonteni. Nangabe ubhajatisiwe, kufanele ujabule ngekutsi uwufinyelele lomgomo! Utentele wena lesincumo. Wasenta ngobe umtsandza Nkulunkulu. Cabanga ngako konkhe lokwentile kusukela wabhajatiswa. Nasi sibonelo, sewukutsandza kakhulu yini kutidadishela liBhayibheli nekulifundza? Sewuthantaza ngalokusuka enhlitiyweni yini? (Hla. 141:2) Sewutfutfukile yini ekucaliseni tincociswano nebantfu nawushumayela futsi sewutfutfukile yini ekusebentiseni emathulusi ekufundzisa? Nangabe unemndeni, Jehova ukusitile yini kutsi ube yindvodza lekahle, umfati lokahle nobe umtali lokahle? Kungakujabulisa kakhulu kubona intfutfuko lesewuyentile.

4. Sitawucoca ngani kulesihloko?

⁴ Singabasita labanye kutsi bajabule ngentfutfuko lesebayentile ekukhonteni Jehova. Singaphindze sibasite kutsi bangaticatsanisi nalabanye. Kulesihloko, sitawufundza ngekutsi batali bangabasita njani bantfwana babo, loshadile angamsita njani lashade naye, nekutsi labadzala belibandla kanye nalabanye bangabasita njani bazalwane babo nabodzadze. Ekugcineni, sitawubese sicoca ngaletinye timiso teliBhayibheli letingasisita kutsi sitibekele imigomo lesingakhona kuyifinyelela.

5. Ngekusho kwaKubase-Efesu 6:4, yini batali lokufanele bangayenti?

⁵ Batali kufanele bacaphele bangamcatsanisi umntfwana nalomunye nobe balindzele kutsi ente lokungetulu kwalangakhona kukwenta. Nangabe batali bakwenta loku, bangabadvumata bantfwana babo. (Fundza Kubase-Efesu 6:4.) Lomunye dzadze lokutsiwa nguSachiko * utsi: “Bothishela bami bebalindzele kutsi ngibehlule bonkhe bantfwana lebengifundza nabo eklasini. Ngetulu kwaloko, make bekafuna kutsi ngiphase kahle esikolweni kuze thishela wami nababe wami, longasuye Fakazi, batobahlonipha boFakazi. Ecinisweni, bekafuna ngitfole konkhe nangibhala luhlolo, lokuyintfo lebengingeke ngikhone kuyenta. Nanobe ngasicedza kadzeni sikolwa, ngihle ngiva shengatsi Jehova akajabuli ngami ngisho ngenta konkhe lokusemandleni ami.”

6. Yini batali labangayifundza kuTihlabelelo 131:1, 2?

 ⁶ Batali bangatfola sifundvo lesihle kuTihlabelelo 131:1, 2. (Fundza.) INkhosi Davide yatsi ‘beyingafisi kwenta tintfo letinkhulu kakhulu’ nobe kwenta tintfo lebeyingeke ikhone kutenta. Ngenca yekutsi beyitfobekile, yaba “nekuthula.” Yini batali labangayifundza kuloko lokwashiwo nguDavide? Kuze batali batfobeke, kufanele bangalindzeli lokungetulu kwaloko labangakhona kukwenta futsi bangalindzeli nekutsi bantfwana babo bente lokungetulu kwaloko labangakhona kukwenta. Batali bangamsita umntfwana wabo kutsi ative abalulekile ngekutsi bamente abone tintfo langakhona kutenta kahle nalangeke akhone kutenta kahle, bese bayamsita kutsi atibekele imigomo langakhona kuyifinyelela. Lomunye dzadze lokutsiwa nguMarina utsi: “Make bekangangicatsanisi nebantfwabakitsi labatsatfu nobe nalabanye bantfwana. Wangifundzisa kutsi sonkhe sinemakhono lehlukahlukene futsi ngamunye wetfu uligugu kuJehova. Ngiyambonga ngaloko, ngobe angikavami kuticatsanisa nalabanye.”

7-8. Indvodza ingakhombisa njani kutsi iyamhlonipha umfati wayo?

⁷ Indvodza lengumKhristu kufanele imhloniphe umfati wayo. (1 Phet. 3:7) Kuhlonipha kusho kubanaka ngalokukhetsekile labanye nekubaphatsa kahle. Nasi sibonelo, indvodza ihlonipha umkayo ngekutsi imphatse ngendlela lekhombisa kutsi ubalulekile. Ayilindzeli kutsi ente lokungetulu kwalangakhona kukwenta. Ngetulu kwaloko, ayimcatsanisi nalabanye bafati. Umfati bekangativa njani nangabe indvodza yakhe imcatsanisa nalabanye? Indvodza yaRosa, lengasiye Fakazi, ihlala imcatsanisa nalabanye bafati. Emavi ayo lalimatako ente Rosa wativa angasilutfo futsi wangabata kutsi ukhona umuntfu lomtsandza mbamba. Rosa utsi: “Ngihlale ngidzinga kucinisekiswa kutsi ngibalulekile kuJehova.” Ngalokwehlukile, indvodza lengumKhristu iyamhlonipha umfati wayo. Iyati kutsi loko kutabutsintsa buhlobo bayo naye kanye nebuhlobo bayo naJehova. *

⁸ Indvodza lemhloniphako umkayo iyamdvumisa, imcinisekise kutsi iyamtsandza futsi imncome. (Taga 31:28) Nguloko indvodza yaKaterina lokukhulunywe ngaye esihlokweni lesengcile lekwentile kuze imsite ancobe kutiva angasilutfo. Ngesikhatsi Katerina asemncane, make wakhe bekamenta ative angasilutfo, bekamcatsanisa nalamanye emantfombatane, lokufaka ekhatsi bangani bakhe. Ngenca yaloko, Katerina wacala kuticatsanisa nalabanye futsi wachubeka akwenta loko ngisho sekanguFakazi waJehova! Nanobe kunjalo, indvodza yakhe lengumKhristu imsitile kutsi alwisane nalomkhuba futsi angatibukeli phansi. Utsi: “Indvodza yami iyangitsandza, iyangincoma ngetintfo letinhle lengitentako futsi ingithantazele. Ingikhumbuta nangebuntfu lobuhle baJehova futsi ingisite ngilungise indlela lengicabanga ngayo.”

9-10. Labadzala belibandla labanemusa bamsita njani lomunye dzadze kutsi ancobe kuticatsanisa nalabanye?

⁹ Labadzala belibandla bangabasita njani labo labavame kuticatsanisa nalabanye? Cabanga ngalokwenteka kulomunye dzadze lokutsiwa nguHanuni, lobekangakavami kunconywa nakasemncane. Utsi: “Benginemahloni, futsi bengicabanga kutsi labanye bantfwana bancono kunami. Ngacala kuticatsanisa  nalabanye kusukela ngisesemncane.” Ngisho nobe sekanguFakazi, Hanuni bekachubeka aticatsanisa nalabanye. Ngenca yaloko, bekativa angakabaluleki ebandleni. Kodvwa nyalo ulihlahlandlela lelijabulile. Yini leyamsita washintja indlela lebekacabanga ngayo?

¹⁰ Hanuni utsi wasitwa ngulabadzala belibandla labanemusa. Bamtjela kutsi ubalulekile ebandleni futsi bamncoma ngesibonelo sakhe lesihle. Wabhala watsi: “Labadzala belibandla bebahle bangicela kutsi ngikhutsate labanye bodzadze lebebadzinga lusito. Loko kwangenta ngativa ngibalulekile. Ngikhumbula ngesikhatsi labadzala belibandla labanelutsandvo bangibonga ngekukhutsata labanye bodzadze labasebasha. Ngemuva kwaloko bangifundzela 1 KubaseThesalonika 1:2, 3. Loko kwangijabulisa kakhulu! Ngenca yalabelusi labanelutsandvo, nyalo sengiyati kutsi ngilusito ebandleni.”

11. Njengobe kuchazwe ku-Isaya 57:15, singabasita njani labo “labephukile nalabanemoya lophansi”?

¹¹ Fundza Isaya 57:15. Jehova unendzaba mbamba nalabo “labephukile nalabanemoya lophansi.” Akusibo nje labadzala belibandla kuphela labangakhutsata bazalwane nabodzadze, kodvwa sonkhe singabakhutsata. Lenye indlela lesingabakhutsata ngayo kutsi sibakhombise kutsi siyabakhatsalela. Jehova ufuna sibakhombise kutsi ubatsandza kakhulu. (Taga 19:17) Singaphindze sibasite bazalwane nabodzadzewetfu ngekutsi sitfobeke. Asifuni kwenta kutsi labanye banake tsine ngobe loko kungenta kutsi labanye basidlele umona. Kunaloko, sifuna kusebentisa emakhono etfu kanye nelwati lwetfu kuze sikhutsate labanye.—1 Phet. 4:10, 11.

12. Kungani bantfu labaphansi bebatsandza kuba naJesu? (Buka sitfombe lesisekhasini lekucala.)

¹² Singafundza lokunyenti mayelana nekuphatsa labanye nasicabanga ngendlela Jesu laphatsa ngayo balandzeli bakhe. Bekangumuntfu lobaluleke kakhulu lowake waphila. Kodvwa ‘bekanemoya lophansi futsi atfobekile.’ (Mat. 11:28-30) Akazange atigabatise ngekuhlakanipha kwakhe nangelwati lolunyenti lebekanalo. Ngesikhatsi afundzisa bantfu, bekasebentisa emagama lamelula nemifanekiso lokumelula kuyicondza futsi watsintsa tinhlitiyo tebantfu labaphansi. (Luk. 10:21) Jesu bekangafani nebaholi benkholo lebebatigcabha, bekahlala enta labanye bative baligugu kuNkulunkulu. (Joh. 6:37) Bekabaphatsa ngenhlonipho bantfu labavamile.

13. Jesu wabakhombisa njani umusa kanye nelutsandvo bafundzi bakhe?

¹³ Umusa waJesu nelutsandvo lebekanalo kwabonakala ngendlela laphatsa ngayo bafundzi bakhe. Bekati kutsi banemakhono langafani nekutsi timo tabo atifani. Ngako bebangeke bonkhe bente umsebenti lofanako nobe lolinganako nabashumayela. Kodvwa wajabula ngekutsi nguloyo naloyo bekenta langakukhona. Kucabangela kwaJesu kwabonakala kulomfanekiso wemathalenta. Kulomfanekiso, inkhosi yaniketa sisebenti ngasinye ‘lokulingene emandla aso.’ Sinye kuletisebenti letimbili letikhutsele satfola lokunyenti kunalelesinye. Kodvwa lenkhosi yancoma letisebenti ngemavi lafanako, yatsi: “Wente kahle sisebenti lesihle nalesetsembekile!”—Mat. 25:14-23.

14. Singayilingisa njani indlela Jesu laphatsa ngayo labanye?

¹⁴ Jesu uhlale asiphatsa ngemusa nangelutsandvo. Uyati kutsi sinemakhono lehlukene netimo tetfu atifani, futsi uyajabula nasenta lokuncono lesingakhona kukwenta. Kufanele silingise Jesu. Akukafaneli sente umzalwane nobe dzadze ative angasilutfo nobe ative  anemahloni ngekutsi akakhoni kwenta lokunyenti njengalabanye. Kunaloko, asifuneni ematfuba ekubancoma ngenca yekwenta konkhe labangakwenta kuze bakhonte Jehova.

15-16. Lomunye dzadze wazuza njani ngekutibekela imigomo langakhona kuyifinyelela?

¹⁵ Nangabe sitibekela imigomo ekukhonteni Jehova, kuphila kwetfu kuba nenjongo. Kufanele sitibekele imigomo lesingakhona kuyifinyelela hhayi imigomo lefana neyalabanye bantfu. Asifuni kudvumateka futsi siphelelwe ngemandla. (Luk. 14:28) Cabanga ngesibonelo salomunye dzadze lolihlahlandlela lokutsiwa nguMidori.

¹⁶ Ngesikhatsi Midori asesemncane, babe wakhe longasiye Fakazi bekavame kumtjela kutsi bantfwabakubo kanye nalafundza nabo bebancono kunaye. Midori utsi: “Bengitiva ngingasilutfo.” Kodvwa njengobe akhula, wabese ucala kutetsemba. Utsi: “Ngifundza liBhayibheli onkhe malanga kuze ngitive ngincono futsi ngibone kutsi Jehova uyangitsandza.” Ngetulu kwaloko, watibekela imigomo langakhona kuyifinyelela futsi wabese uyathantaza wacela lusito kuze akhone kuyifinyelela. Loko kwenta Midori wajabula ngetintfo lakhona kutentela Jehova.

17. Singachubeka njani ‘siyenta ibe yinsha indlela lesicabanga ngayo,’ futsi utawuba yini umphumela?

¹⁷ Kungatsatsa sikhatsi lesidze kushintja indlela lotiva ngayo. Ngako Jehova uyasikhutsata utsi: “Kufanele nichubeke niyenta ibe yinsha indlela lenicabanga ngayo.” (Ef. 4:23, 24) Kuze sente njalo, kufanele sithantaze, sidadishe liVi laNkulunkulu futsi sizindle ngalo. Chubeka ukwenta loko futsi ucele Jehova  akuphe emandla. Umoya wakhe longcwele utakusita kutsi uyekele kuticatsanisa nalabanye. Jehova utawuphindze akusite ubone nangabe sewunemona nobe sewutigcabha, futsi utakusita wente lushintjo ngekushesha.

18. Angakudvudvuta njani emavi laku-2 Tikhronike 6:29, 30?

¹⁸ Fundza 2 Tikhronike 6:29, 30. Jehova uyayati indlela lesitiva ngayo. Uyati kutsi silwisana nemoya walelive kanye nemaphutsa lesiwentako. Nakasibona silwisana kamatima naletintfo, usitsandza kakhulu.

19. Jehova uyifananisa nani indlela lativa ngayo ngatsi?

¹⁹ Kuze Jehova avete indlela lasitsandza ngayo, usebentisa sibonelo selutsandvo lolusemkhatsini wamake nemntfwanakhe. (Isa. 49:15) Cabanga ngesibonelo salomunye make lokutsiwa nguRachel. Utsi: “Indvodzakati yami Stephanie yatalwa sisengakefiki sikhatsi sekutsi ibelekwe. Nangicala kuyibona, beyiyincane kakhulu. Kodvwa dokotela wangivumela kutsi ngiyiphatse onkhe malanga kulenyanga lesayicitsa sisesibhedlela. Ngaleso sikhatsi, mine nemntfwanami sasondzelana kakhulu. Nyalo uneminyaka lesitfupha futsi ubonakala amncane kunalabanye bantfwana labangangaye. Nobe kunjalo, ngimtsandza kakhulu ngobe wakhona kuphila ngaleso sikhatsi, futsi ungente ngajabula kakhulu ekuphileni!” Kusijabulisa kakhulu kwati kutsi Jehova usitsandza kakhulu nakasibona senta konkhe lesingakwenta kuze simentele lokuncono!

20. Yini leyenta tikhonti taJehova tijabule?

²⁰ Njengobe usikhonti saJehova, ulilunga leliligugu lemndeni wakhe futsi kute lofana nawe. Jehova akazange akudvonsele kuye ngobe uncono kunalabanye bantfu. Wakudvonsa ngobe wabuka inhlitiyo yakho, wabona kutsi utfobekile, uyafuna kufundza kuye futsi ushintje. (Hla. 25:9) Ungaciniseka kutsi uyajabula nawenta konkhe longakhona kukwenta kuze umkhonte. Kucinisela kwakho nekwetsembeka kwakho kubufakazi bekutsi ‘unenhlitiyo lenhle.’ (Luk. 8:15) Ngako chubeka unika Jehova lokuncono kakhulu. Nawenta njalo, utawuba nesizatfu lesihle sekujabula ‘ngalokwentile.’