1. Nagnino ty Jehovah ro tsy mampitaha antika amy ty hafa?

TSY natao i Jehovah mitovy iaby ze kila raha namboare’e. O hataeo naho o bibio zao misy karaza’e maro. Ndra o ndatio aza, le tsy misy tena mitovy zao. Tsy hampitaha azo amy ty hafa areke ty Jehovah ndra ombia ndra ombia. Oni’e soa tie ndaty manao akore rehe. (1 Sam. 16:7) Fohi’e ka tie ino ty raha vita’o naho ty raha tsy ho vita’o vaho ty fomba nitezagne azo. Tsy hangatake azo hanao raha tsy ho vita’o zao reke. Mila mikezake tika mba hitovy amy ty fomba fivazohoa i Jehovah antika ty fiheverantikagne ty tegnantika. ‘Hisaigne soa’ tika amy izay, le hihevetse ty vatantikagne arake ty antogno’e.​—Rom. 12:3.

2. Nagnino ro tsy soa ty mampitaha ty tegnantikagne amy ty hafa?

² Afake mandrambe soa amy ty modely soa mea ty rahalahy ndra ty rahavave raike tena mahay mitory tika. (Heb. 13:7) Hihasoa ty fahaintika mitory naho mitsikombe aze tika. (Fil. 3:17) Faie tsy mitovy tihoe mikezake mitsikombe ty modely soa mea ty hafa naho tihoe mampitaha ty tegnantika amy ty hafa. Naho itika mampitaha ty tegnantika amy ty hafa, le hanjare hialogne i ndatỳ naho ho kivy ndra hihevetse ty tegnantika ho tsy misy dika’e. Nitreantika tamy i lahatsoratse taloha itoỳ ka, fa ho simba ty fifandrambesantika amy i Jehovah naho mifaninagne amo o mpiara-manompo amantikagneo tika. Izay ty mahavy i Jehovah hagnomey torohevetse antika aman-katea hoe izao: “Sambe toko’e handineke ty raha anoe’e ty ndaty tsikiraidraike, amy izay reke hahatrea fifaleagne amy ty raha atao’e, fa tsy amy ty fampitahagne ty tegna’e amy ty hafa.”​—Gal. 6:4.

3. Ino ty fandrosoagne fa natao’o le nahafale azo?

³ Tea i Jehovah hifale amy ty fandrosoagne vitantikagne tika. Naho ohatse fa vita badisa rehe, le toko’e ho fale satria nahatratse  o tanjogne iohoe. Fanapaha-keve’o manokagne io fa tsy nisy namorese azo. Ty hatea’o an’Andrianagnahare ty nahavy azo nanao izay. Saintsaigno ty fandrosoagne fa nivita’o nanomboke tamy izay. Nitombo vao ohatse ty hatea’o mamaky Baiboly naho mianatse raike? Nanjare nivavake tamy ty fo vao rehe? (Sal. 141:2) Nanjare nahay nanombo-drehake naho nahay nampiasa soa i fitaovagne ampiasaegne amy ty fanompoagne rey vao rehe? Naho managne keleiagne rehe, tsapa’o vao tie nagnampe azo mba ho valy fanjaka ndra hahay hiteza soa ty ana’o ty Jehovah? Tena toko’e hahafale azo ty nanoa’o o fandrosoagne rehoe.

4. Ino ty hodinehentikagne ato?

⁴ Afake magnampe ty hafa mba ho fale amy ty fandrosoagne vita iareo naho tsy hampitaha ty tegna iareo amy ty hafa tika. Hodinehentika amy ty lahatsoratse toy ty raha azo o rae aman-dreneo agnampeagne ty ana iareo, ty raha azo ty lahilahy manambaly agnampeagne ty vali’e, naho ty raha azo o androanavi-pagnahio naho ty ndaty hafa agnampeagne o rahalahio naho o rahavaveo. Amy ty fara’e tika handineke toro lalagne hagnampe antika tsikiraidraike hanagne tanjogne mifagnarake amy ty fahaiantika naho ty raha iaignantika.

5. Ino ty raha toko’e hitaoa ty rae aman-drene, arake ty Efesianina 6:4?

⁵ Toko’e hitao ty rae aman-drene mba tsy hampitaha ty ana’e raike amy ty ana’e ila’e ndra hampanao aze raha tsy ho vita’e. Ho kivy ty ana iareo naho manao izay iareo. (Vakio ty Efesianina 6:4.) Hoe ty rahavave Sachiko *: “Nirisihe i ramoseko rey raho mba hahazo moieny ambone noho i mpiara-mianatse amako rey. Nitea i reneko ka zay, amy izay tsy hanagne heve-diso miomba o Vavolombelo i Jehovah-o i ramoséko rey naho i babako tsy vavolombelogney. Nitea’e aza naho maregne iaby ty raha nataoko naho fa izahay nanao fagnadignagne. Faie raha tsy hisy zay. Ndra tie fa ela aza ty nività ty fianarako, le kindraike raho mieretseretse tie va’e tsy mahafale i Jehovah ty raha ataoko ndra tie ty fara’e soa vitako aza ro meako aze.”

6. Ino ty raha azo ty rae aman-drene ianaragne amy ty Salamo 131:1, 2?

⁶ Misy lesogne sarobily hoahy ty rae aman-drene trea amy Salamo 131:1, 2 ao. (Vakio.) Rehafe i Davida Mpanjaka ao tie ‘tsy nipay raha ambone loatse’ reke ndra nanao raha tsy  ho vita’e. Noho ze fiambanea’e zay, le niafa-po sady nilamin-tsaigne reke. Ino ty azo o rae aman-dreneo ianaragne amo o reha i Davida rehoe? Naho miambane iareo, le tsy hitake raha tsy ho vita ty tegna iareo naho tsy ho vita ty ana iareo. Hahatsiaro ho misy dika’e ka ty ana iareo naho eké iareo fa misy raha hay i ana iareoy, le misy raha tsy vita’e sady ampea iareo reke hagnatratse tanjogne mifagnarake amy izay. Hoe ty rahavave Marina: “Mbe lia i reneko naho nampitaha ahy amo o niharo troke amako reo ndra tamy ty ajaja hafa. Nampianare’e ahy tie sambe managne ty raha hai’e naho sarobily amy i Jehovah iaby tika tsikiraidraike. Ty voka’e, tsy le mateteke mampitaha ty tegnako amy ty hafa raho.”

7-8. Akore ty anoroa ty lahilahy raike manambaly fa magnomey voninahitse ty vali’e reke?

⁷ Tsy maintsy magnomey voninahitse ty vali’e ty lahilahy manambaly. (1 Pet. 3:7) Tihoe magnomey voninahitse, le midika tihoe maneho fiheveragne manokagne naho magnaja ty hafa. Magnomey voninahitse ty vali’e ohatse ty lahilahy manambaly naho mihevetse aze ho sarobily sady tsy mitake raha tsy ho vita’e. Tsy hampitaha aze amy ty ampela hafa ka reke. Ino ty va’e ho tsapa ty ampela manambaly naho manao izay ty vali’e? Tsy vavolombelogne ty valy i rahavave Rosa. Mateteke ty vali’e ro mampitaha aze amy ty ampela hafa. Nanjare nihevetse ty tegna’e ho tsy misy dika’e ty Rosa noho ty rehake tsy misy fagnajagne natao i vali’e aze. Hoe ty Rosa: “Nila nitadidy avao areke raho tie sarobily.” Fa nagnino ty lahilahy Kristiana manambaly ro magnomey voninahitse ty vali’e? Satria hai’e tie misy voka’e amy ty fifandrambesa’e amy i vali’e naho amy i Jehovah ty fanoa’e izay. *

⁸ Magnomey voninahitse ty vali’e ka ty lahilahy manambaly naho mirehake raha soa miomba aze amy ty hafa, magnomey toky aze tie tea’e reke sady sarobily ama’e. (Ohab. 31:28, 29) Tena nagnampe i Katerina, i rahavave nirehafegne tamy i lahatsoratse taloha itoỳ, tsy hagnambane ty tegna’e ty fanoa i vali’e o raha rehoe. Tamy i Katerina mbe nikede, le lava nahatrea raha horehafegne miomba aze avao ty rene’e sady nampitaha aze amy ty hafa, agnisa izay ty ragne’e. Ty voka’e, nanjare nampitaha ty tegna’e amy ty hafa reke ndra tie fa nanjare Vavolombelo i Jehovah aza. Faie nampea i vali’e reke mba tsy hanao izay sasa, sady hihevetse ty tegna’e arake ty antogno’e. Hoe reke: “Tena tea ahy ty valiko. Midera ahy reke naho fa misy raha soa ataoko sady mivavake ho ahy. Tiahive’e amako ka ty toetse fanjaka anagna i Jehovah, sady ampea’e raho mba hagnitsy ty toe-tsaiko.”

9-10. Ino ty natao o androanavi-pagnahy bey hateao mba hagnampeagne ty rahavave raike tsy hampitaha ty tegna’e amy ty hafa?

⁹ Akore ty azo o androanavi-pagnahio agnampeagne ze ndaty tea mampitaha ty tegna’e amy ty hafa? Dineho ohatse ty raha niaigna i rahavave Hanuni. Tsy le nisy nidera aze reke tamy i reke mbe nikedey. Hoe reke: “Nisaro-kegnatse raho sady nieretseretse tie tsy mahay raha naho oharegne amy ty ajaja hafa. Mbe nikede areke raho, le fa nampitaha ty tegnako tamy ty hafa.” Mbe nanao izay avao aza ty Hanuni ndra tie fa nanjare Vavolombelo i Jehovah. Nieretseretse areke reke tie tsy misy dika’e ze raha natao’e tamo o fiangonagneo eo. Faie fa tsy hoe izay sasa reke amy izao. I reke aza mpisava lalagne falefale. Ino ty nagnampe aze hagnova ty toe-tsai’e?

¹⁰ Nirehake ty Hanuni fa o androanavi-pagnahio ty nagnampe aze. Nirehafe iareo tama’e fa  tena sarobily reke amo o fiangonagneo eo sady niderae iareo reke noho ty modely soa omei’e. Hoe ty Hanuni: “Tafara kede izay, le nirisihe o androanavi-pagnahio raho mba hagnampe ze rahavave nipay fagnampeagne rezay. Naho fa nampanoe iareo izay raho, le nahatsapa tie tena ilaegne amo o fiangonagneo eo. Tadidiko fa nisaotse ahy o androanavi-pagnahio noho ty nagnampeako i rahavave rey. Le nivakie iareo tamako ty 1 Tesalonianina 1:2, 3 tafara izay. Tena nahafale ahy zay. Tena isaorako o androanavi-pagnahy bey hatea reo, satria tsapako hinane zao tie tena ilaegne amo o fiangonagneo eo raho.”

11. Ino ty azontika atao mba hagnampeagne o ndaty ‘torotoro fo’ rehafegne amy Isaia 57:15 aò?

¹¹ Vakio ty Isaia 57:15. Tena mihevetse o ndaty ‘torotoro fò’ ty Jehovah. Tsy o androanavi-pagnahio avao ty afake mampahery ty rahalahy naho ty rahavave hoe izay fa itika iaby. Manao izay ohatse tika naho mampiseho amy iareo tie tea iareo. Tea i Jehovah hatorontikagne iareo fa tena sarobily ama’e iareo. Hampahery iareo ka tika naho miambane sady tsy mirohake. Tsy toko’e hataontika ze hahavy o ndatio hifantoke amantika satria tsy teantika ty hampitiry fialognagne am-po iareo ao. Ty toko’e hataontikagne aza, le ty hampahery ty hafa amy ty raha rehafentika naho ataontikagne.​—1 Pet. 4:10, 11.

12. Nagnino ro nitea o ndaty ambaneo ty niarake tamy i Jesosy? (Henteo ty sare amy ty fogno ty gazete toy.)

¹² Maro ty raha azontika ianaragne boake amy ty fomba nifandrambesa i Jesosy tamo o mpanonjohy ty lia’eo. Tsy nisy lahilahy niambake manahake aze ty tan-tane etoy amparake izay. Faie ndra tie teo zay, le ‘naleme fagnahy naho niambane’ reke. (Mat. 11:28-30) Mbe lia’e naho nampiseho tie tena mahay raha naho mahafanta-draha maro reke. Naho fa nampianatse reke, le nampiasa rehake tsotra naho fagnoharagne mora azo sady manohigne ty fo o ndaty ambaneo. (Lioka 10:21) Tsy nanahake o mpitarike fivavahagne tea nagnambone tegnao ty Jesosy. Mbe lia’e naho nanao raha hahavy o ndatio hieretseretse tie tsy misy dika’e aman’Andrianagnahare iareo. (Jaona 6:37) I reke aza nagnaja o ndaty tsy le niambake manao akoreo.

13. Akore ty ahatreavagne tie bey hatea naho soa fagnahy ty Jesosy naho fa nifandrambe tamo o mpiana’eo?

¹³ Nitrea tamy ty fomba nindesa i Jesosy o mpiana’eo fa soa fagnahy naho bey hatea reke. Nihai’e fa tsy mitovy ty fahaiagne nanagna iareo naho ty raha niaigna iareo. Tsy nitovy areke ty andraikitse natao iareo ndra ty habey ty fanompoagne nivita iareo. Faie nifale ty Jesosy satria nikezake ty tsikiraidraike amy iareo mba hagnomey ze fara’e soa vita’e. Trea amy ty fagnoharagne miomba i talentay ze raha nitsapa’e zay. Tamy i fagnoharagne ignehoe, le ‘asa mifagnarake amy ty fahaia’ i mpanompo’e rey ty nankine i tompo iareoy tamy iareo. Nazoto ty roe tamo o mpanompo rehoe. Ty tombo’e niazo ty raike amy iareo aza, le mbe nihoatse ty ahy i raike faharoe’ey. Faie sambe nidera iareo i tompo iareoy tie: “Soa zay mpanompo soa sady azo itokisagne!”​—Mat. 25:14-23.

14. Akore ty azontika anahafagne i Jesosy naho fa mifandrambe amy ty hafa?

¹⁴ Trea amy ty fomba indesa i Jesosy antika amy izao fa mbe soa fagnahy naho bey hatea reke. Hai’e tie tsy mitovy ty raha haintika naho iaignantika. Faie fale reke naho fa manao ze fara’e soa vitantikagne tika. Toko’e hanahake i Jesosy ka tika. Tsy toko’e hataontika ze hahavy ty rahalahy ndra ty rahavave raike hihevetse ty tegna’e ho tsy misy dika’e, ndra ho megnatse satria tsy mahavita bey manahake ty hafa. Toko’e hidera o rahalahy naho o rahavaventikagneo avao aza tika noho iareo manao ze fara’e soa vita iareo amy ty fanompoagne i Jehovah.

15-16. Ino ty soa niazo ty rahavave raike naho fa nanagne tanjogne azo tratraregne reke?

¹⁵ Naho itika managne tanjogne ara-pagnahy, le ho haintika ty raha toko’e hatao amy ty fiaignagne sady hisy dika’e ka ty fiaignantika. Faie soa naho tanjogne mifagnarake amy ty fahaiantika naho ty raha iaignantika ro tratrarentikagne fa tsy ty tanjo ty hafa. Naho itika manao izay, le tsy ho diso tamà sady tsy ho kivy. (Lioka 14:28) Dineho ohatse ty raha natao i rahavave Midori, mpisava lalagne raike.

¹⁶ Tamy i Midori mbe nikede, le mateteke ty baba’e ro nirehake tie tsy mahay raha reke naho oharegne amo o niharo troke tama’e naho o mpiara-mianatse ama’eo. Hoe ty Midori: “Nihevetse ty tegnako ho tsy misy dika’e raho tamy izay.” Faie nanjare natoky tegna reke naho fa nibey. Hoe reke: “Namaky Baiboly isan’andro raho, le izay ty nagnampe ahy hahatsapa tie tea ahy ty Jehovah.” Nikezake hanagne tanjogne azo tratraregne ka reke, sady nanao vavake voafaritse soa mba hagnampe aze hagnatratse i tanjo’e rey. Nagnampe i Midori hifale amy ty fandrosoagne vita’e ty fanoa’e ireo.

17. Ino ty hagnampe antika ‘hagnavao lognandro ty hery mikomandy ty saintika’, le ino ty ho voka izay?

¹⁷ Tsy vitantika agnate ty andro raike ty hagnova ty fomba fiheverantika ty vatantikagne. Izay ty nahavy i Jehovah handrisike antika tie: ‘Havaozo lognandro ty hery mikomandy ty sai’areo.’ (Efes. 4:23, 24) Faie mba hahavitantikagne izay, le mila mivavake, mianatse naho misaintsaigne ty Saontsin’Andrianagnahare tika. Anò lognandro o raha rehoe sady mangataha hery amy i Jehovah. Hagnampe azo tsy hanagne fagniriagne hampitaha ty tegna’o amy ty hafa ty fagnahy masigne. Hagnampe azo hahatsapa naho hagnombotse malaky ty fialognagne  naho ty firohafagne ama’o ao ka ty Jehovah naho manomboke managne o toetse raty rehoe rehe.

18. Nagnino ty rehake amy 2 Tantara 6:29, 30 ao ro mampahery azo?

¹⁸ Vakio ty 2 Tantara 6:29, 30. Fohy i Jehovah ze raha am-pontikagne ao. Oni’e ka tie mialy mafe tika mba tsy hisy voka’e amantika ty toe-tsay ty tontolo toy naho ty tsy fahavoririhantikagne. Mitombo ty hatea i Jehovah antika naho fa mahavazoho ze kezake mafe ataontikagne zay reke.

19. Ino ty natao i Jehovah mba hahatakarantikagne ty raha tsapa’e amantika?

¹⁹ Nampitovie i Jehovah amy ty hatea o reneo ty ana’e ty hatea’e antika. (Isaia 49:15) Mareho ohatse ty raha natao i Rachel, rahavave raike managne anake toy. Hoe reke: “Mbe tsy niampe sive volagne i trokoy, le fa niterake i anak’ampelako atao tihoe Stephanie-ỳ raho. Nikidikidy sady nalemeleme reke tamy i reke vaho naterakey. Faie nenga o dokoterao hitrotro aze raho isan’andro, tagnate ty vola’e raike nitoboha’e tan-dapotaly agney. Nagnampe anay miroanake hifandrambe marine zay. Fa enen-taogne reke tie amy izao, sady kedekede naho oharegne amy ty ajaja mitovy taogne ama’e. Faie tena teako reke, satria fa nialy aigne mafe reke mba hahavelogne aze sady fale raho managne aze.” Tena mahafale antika ka ty mahafantatse tie tena teà i Jehovah tika naho fa vazoho’e tie mikezake mafe manao ze fara’e soa vitantikagne ho aze.

20. Nagnino ty mpanompo i Jehovah ro fale?

²⁰ Agnisa ty keleia i Jehovah sarobily rehe amy ty maha mpanompo’e azo, sady tsy misy mitovy ama’o. Tsy noho i rehe mahay raha ambone ty hafa ty nahavy i Jehovah nitaogne azo. Nitaogne azo reke, satria nivazoho’e rehe tie ndaty miambane sady vognogne hianatse naho hiova. (Sal. 25:9) Matokia fa fale reke naho fa manao ze fara’e soa vita’o amy ty fanompoagne aze rehe. Ty fiareta’o naho ty tsy fivaliha’o, le porofo tie managne ‘fo soa naho mahitsy’ rehe. (Lioka 8:15) Mikezaha areke hagnomey ze fara’e soa vita’o hoahy i Jehovah lognandro. Naho ihe manao izay, le ‘hahatrea hafaleagne amy ty raha atao’o.’