1. Khu ginani Jehovha a si hi fananisigo ni vambe?

JEHOVHA kha vbweti gu khuye silo mwendro vathu va fana. Ha guti isoso kholu Jehovha vangide misimbo nyo hambanehambane, sirengo nyo hambanehambane ambari ni vathu. Mwalo a fanago ni mumbe. Khu kharato, Jehovha gima kha gu fananisi ni vambe. Uye a gu gevisisa monyo wago, edzi u gu idzo khu ndrani. (1 Sam. 16:7) Uye a ngu siti esi u si kodzago gu gira gwadi, esi u si si kodzigo gu gira gwadi ni edzi u vangidwego khidzo. Ni gu uye kha gu lombi gu gira gilo u gu mba gi kodza. Ethu hi yede gu dzi wona nya nga edzi Jehovha a hi wonago khidzo. Ha gu gira isoso, hi na si kodza gu ninganiseya, hi si dzi woni na hiri va tshukwana mwendro na hi si phasi gilo gu vbindra vambe. — Rom. 12:3.

2. Khu ginani si vivbidego gu dzi fananisa ni vambe?

² Hi nga hevbula nya singi khu giyeyedzo nya gyadi gya vambe. Khu giyeyedzo, adzina hi ngati vandriyathu va dugeleyago gwadi thumoni nyo tshumayela. (Hebh. 13:7) Hi nga hevbula gwawe edzi hi nga tshukwadzisago khidzo matshumayelelo yathu. (Filp. 3:17) Ganiolu, gomo guhambana avba nyo pimedzeye muthu ni gu dzi fananisa naye. Oyu a dzi fananisago ni vambe a ngapwa lidiwo, a vbeya tshivba a bwe a dzipwa na si phasi gilo. Kha nga hi si wonidego ga ndrima yi nga vbindra, gu palisana ni vandriyathu libandlani, si nga ghoha wupari wathu ni Jehovha. Khu lihaladzo, Jehovha a gu hi gengedza khuye: “Muthu ni muthu a na phele khu gu wona mithumo yaye. Ya gu manega yiri yadi a na ni fanelo nya gu  dzi zundze khu mithumo yaye nya yadi, aholu a nga dzi pimanisi khu mithumo ya vakwawe.”— Gal. 6:4.

3. Guvbindrugedza muni u gu giridego gasi u thumeya Jehovha gu gu ningago litsako?

³ Jehovha a gu vbweta gu khuye u tsaka khu satshavbo u si kodzago gu gira gasi u mu thumeya. Khu giyeyedzo, wa gu ba u bhabhatisidwe, kha wa gurumedzwa khu muthu, ganiolu u di kutswa khu lihaladzo lago khu Jehovha. Dundrugeya khu satshavbo u si giridego kala avba. Khu giyeyedzo, wa gu wona gu khuwe u engedzede gu gola gu leri Bhibhiliya ni gu gira gihevbulo nya muthu enga? Olu wa gu gira milombelo nyo ete ngudzu yi khugeyago monyoni? (Ndzi. 141:2) Ina u ngu dzipwa na wu tshulegide thumoni nyo tshumayele? Nigu u ngu si kodza gu thumisa dziferameta dzathu thumoni nyo tshumayele? Wa gu ba u ri ni ndraga, wa gu dundrugeya gu khuwe Jehovha a gu phaside gu khala mwama nya wadi, mwangadzi nya wadi mwendro muvelegi nya wadi? Tsaka khu satshavbo u si kodzidego gu vbindrugedza.

4. Ginani hi na gi wonago avba nya ndrima yeyi?

⁴ Ethu hi nga phasa vambe gutsaka khu kotani nya guvbindrugedza va gu giridego. Ethu gambe hi nga va phasa gu va si khaleyi gu dzi fananisa ni vambe. Avba nya ndrima yeyi hi na wona edzi vavelegi va nga phasago khidzo sanana sawe. Edzi dzipari nya wugadzi dzi nga phasanago khidzo ni edzi madhota ni vambe va nga phasago khidzo vandriyathu libandlani. Khu mahegiso, hi na wona Milowo nyo khaguri yi na phasago moyo ni moyo wathu gu dzi vegeya misuwo a na si kodzago gu yi vboheya.

5. Guya khu Vaefeso 6:4, ginani egi vavelegi va si yeligo gu gira?

⁵ Vavelegi gu vbwetega va dzi woneya gu fananisa gyanana gyawe ni simbe sanana, mwendro gu vireya gu khavo gi gira silo gi gu mba si kodza gu gira. Silo nya nga isoso si nga gorosa ngudzu gyanana. (Leri Vaefeso 6:4.) Ndriyathu moyo nya nyamayi nyo pwane khu Sachiko * wari khuye: “Vahevbudzi vangu va di gu vireya gu khavo nyi dusa dzinota nyo vbindre simbe sihevbuli. Nigu, mamayi wangu a di gu vbweta gu khuye nyi dugeleya gwadi xikwatunu, gasi nyi kodza gu ningeya wufakazi nya wadi ga muhevbudzi wangu ni papayi wangu a nga ba a si khali Fakazi ya Jehovha. Ni gu uye a di gu vbweta gu khuye avba nya dziprovha dzangu dzatshavbo nyi dusa 20 vhalori, ganiolu eni isoso nyi di si si kodzi. Ambari olu gu vbindrago myaga nya yingi na nyi hegiside gu hevbula, muhuno nyi ngu dzi wudzisa gu kheni ina nyi ngu gira satshavbo nyi si kodzago thumoni wa Jehovha?”

6. Ginani egi vavelegi va gi hevbulago omu ga Ndzimo 131:1, 2?

 ⁶ Vavelegi va nga hevbula gilo nya lisima omu ga Ndzimo 131:1, 2. (Leri.) Pfhumu Dhavhidhe ganede gu khuye: “Kha nyi gimbili nyi vbweta silo nya sikhongolo” mwendro gu gira silo si gu mwalo tshivbani gwaye. Khu kotani nya gu dzinogise ni gu dzumeya gu khuye khandri satshavbo a si kodzago gu gira, “manide gurula ni gu hefemula.” Ginani hi gi hevbulago avba nya malito ya Dhavhidhe? Abari gu vavelegi va ngu dzi nogisa kha va na nga vireya gu va gira silo va gu mba si kodza, mwendro gu vireya gu khavo sanana savo si gira silo si gu mba si kodza. Tugula esi sanana sago si si kodzago gu gira ni gu mba si kodza gu gira, u si phasa gu dzi vegeya misuvo si na yi kodzago gu yi vboheya. Wa gu gira isoso, gyanana gyago gi na dzipwa na gi ri ni lisima. Ndriyathu moyo nyo pwane khu Marina wari khuye: “Mamayi wangu gima a di si nyi fananisi ni vandriyangu nya vararu mwendro ni simbe sanana. Uye nyi hevbudzide gu khuye, moyo ni moyo a na ni makodzelo yaye ni gu hatshavbo hi na ni lisima mahoni ga Jehovha. Khu kotani nya giphaso gyaye, kha nyi dzi fananisi ni vambe.”

7-8. Mwama a nga yeyedza kharini gu khuye a ngu phara gwadi mwangadzi waye?

⁷ Mwama nya Mukristo a yede gu phara gwadi mwangadzi waye. (1 Ped. 3:7) Gu phara gwadi, so thula gu ninga githawo muthu nyo khaguri u bwe u mu engiseya gwadi. Khu giyeyedzo, mwama a nga phara gwadi mwangadzi waye khu gu mu wona nari muthu nya lisima. Uye kha mu lombi gu gira silo a si si kodzigo nigu uye kha mu fananisi ni vambe vanyamayi. Nyamayi a di hadzi gu dzipwa kharini mwama waye a gu mu fananisa ni vambe vanyamayi? Mwama wa ndriyathu Rosa a gu siri Fakazi a di gu khaleya gu mu fananisa ni vambe vanyamayi. Malito yaye nyo paye kha ma gira ndriyathu Rosa a dzipwa na si phasi gilo basi, ganiolu ma mu giride a kanakana gambe gu khuye vambe va ngu mu haladza. Uye wari khuye: “Tepo yatshavbo so vbweta gu nyi dundrugiswa khu vambe gu khavo nyi na ni lisima mahoni ga Jehovha.” Khu kharato, mwama nya Mukristo a yede gu phara gwadi mwangadzi waye. Uye a ngu dziti gu khuye isoso si na khuha wupari waye ni Jehovha ni wupari waye ni mwangadzi waye. *

⁸ Mwama a pharago gwadi mwangadzi waye, a ngu ganeya gwadi khuye vbakari nya vathu. A ngu mu embeya gu khuye a ngu mu haladza ni gu na ni lisima gwaye. (Mav. 31:28) Khiso mwama wa Katerina, hi ganedego khuye ga ndrima yi nga vbindra a giridego gasi gu phasa mwangadzi waye tepo a dzipwago na si phasi gilo. Katerina na ngari gyanana, mamayi waye a di gu khaleya gu ganeya guvivba khuye. A mu fananisa ni simbe sanana gu pata ni dzipari dzaye. Khu kharato, Katerina a di pheya gu dzi fananisa ni vambe ambari hwane nyo ba a khade Fakazi ya Jehovha. Mwama waye mu phaside gu ema u gira isoso a bwe a mu phasa gu dzi wona khu ndziya nya yadi. Uye wari khuye: “Uye a ngu nyi haladza, a ngu nyi dzundza khu silo nya sadi nyi girago nigu a ngu nyi gombeleya. Uye gambe a ngu nyi dundrugisa makhalelo nya yadi ya Jehovha a bwe a nyi phasa gu lulamisa mapimiselo yangu nya mba yadi.”

9-10. Madhota nya lihaladzo ma phaside kharini ndriyathu moyo nya nyamayi gu pala guwegeleya nya gu dzi fananise ni vambe?

⁹ Madhota ma nga phasa kharini vandriyathu va gu na ni guwegeleya nya gu dzi fananise ni vambe? Wona giyeyedzo gya ndriyathu moyo nya nyamayi nyo pwani khu Hanuni. Tepo a nga ba a ngari gyanana si di gu kala gu zundzwa. Uye wari khuye: “Eni nyi diri muthu nyo degule ngudzu nigu nyi di gu pimisa gu kheni simbe sanana si diri tshukwana gu vbindra eni. Gu khugeya avbovbo, nyi di pheya gu dzi fananisa ni vambe.” Ambari hwane nyo ba a khade Fakazi ya Jehovha Hanuni simamide a dzi fananisa ni vambe. Khu  kharato, uye a di gu pimisa gu khuye esi a nga ba a gira libandlani si diri mwalo lisima. Ganiolu, muhuno uye a gu thuma kha nga piyonero ni gu tsakide. Ginani gi mu phasidego gu vbindrugedza edzi a nga ba a dzi wona khidzo?

¹⁰ Hanuni wari khuye phasidwe khu madhota nya lihaladzo. Ayo ma mu embede gu khayo a na ni lisima ngudzu libandlani nigu ma mu zundzide khu giyeyedzo gyaye nya gyadi. Hanuni lovide khuye: “Ga dzitepo nyo khaguri, madhota ma nyi lombide gu tiyisa vandriyathu nya vanyamayi va nga ba va vbweta giphaso. Isoso si nyi giride nyi dzipwa na nyi ri ni lisima. Nyo dundruga tepo madhota ma nga nyi zundza kholu nyi phasidego vaphya nyo khaguri. Ayo ma nyi lerede 1 Vatesalonika 1:2, 3, isoso si nyi tsakiside ngudzu. Khu gu phaswa khu madhota yaya nya lihaladzo, muhuno nyi ngu dziti gu kheni nyi na ni lisima libandlani.”

11. Hi nga va phasa kharini vale va “khuvekidego ni vale va vbedego tshivba” va khumbugwago omu ga Isaya 57:15?

¹¹ Leri Isaya 57:15. Jehovha a ngu khatala ngudzu khu vale “va khuvekidego ni vale va vbedego tshivba.” Hatshavbo, nasiri madhota basi hi nga gira nya singi gasi gu tiyisa vandriyathu vava. Mweyo nya dzindziya hi nga va tiyisago khiyo, gu yeyedza gu khethu hi ngu khathala khavo. Jehovha a gu vbweta gu khuye hi va yeyedza gu khethu a ngu va haladza. (Mav. 19:17) Vbavbandze nya isoso, hi nga phasa gambe vandriyathu khu gu hi dzi nogisa hi bwe hi si dzi khusedzi khu makodzelo hi gu nawo. Kha hi vbweti gu dzi yeyedza ga vambe kholu isoso si nga va gira vapwa lidiwo. Wulangani nya isoso, hi yede gu thumisa guti hi gu nago ni makodzelo gasi gu tiyisa vandriyathu.— 1 Ped. 4:10, 11.

12. Khu ginani vathu va nga ba va gola gu khala ni Jesu? (Wona foto yi gomogo avba nya kapa.)

¹² Hi nga hevbula edzi hi nga pharago khidzo vambe ga edzi Jesu a pharidego khidzo vapizane vaye. Jesu mwama nya lisima a vbanyidego mafuni. Ambari ulolo, uye a diri “ni monyo nya gurule nuwo nya gu dzi sodzise.” (Mat. 11:28-30) Uye a diri muthu nya guti ngudzu, ganiolu uye kha dzi khusedza khu isoso. Wulangani nya isoso, tepo Jesu a nga ba a hevbudza a di gu thumisa maganelelo nyo vbevbuge ni sipimaniso si nga ba si khuha myonyo nya vathu. (Luka 10:21) Vathangeyi nya wukhongeyi va dzitepo dza Jesu va di gu dzi khusedza nigu va di gu gira vathu va pimisa gu khavo va mwalo lisima mahoni ga Nungungulu, ganiolu Jesu a di si giri isoso. (Joh. 6:37) Uye a di gu ninga githawo vathu vatshavbo.

13. Jesu yeyedzide kharini wuwadi ni lihaladzo ga vapizane vaye?

¹³ Lihaladzo ni wuwadi wa Jesu si wonegide ga edzi a nga ba a phara khidzo vapizane vaye. Uye a di gu dziti gu khuye va na ni makodzelo ni siemo nyo hambane. Khu kharato, khandri vatshavbo va nga hadzi si kodza gu khathaleya mithumo nyo fane mwendro gu dugeleya khu ndziya yayimweyo thumoni nyo tshumayele. Ambari ulolo, Jesu a di gu ninga lisima makodzelo ya moyo ni moyo wawe. Jesu muthu nya gu pwisise nigu isoso si wonegide tepo a nga ningeya gipimaniso nya dzitalenta. Avba nya gipamaniso gegi, pfhumu yi di ninga “muthu ni muthu guya khu makodzelo yaye.” Avba nya sithumi sivili, gimwegyo gi lukraride gu vbindra gimbe, ganiolu, pfhumu yi di zundza sithumi satshavbo sasivili khu malito nyo fane khiyo: “U thumide, githumi nya gyadi, nya gutumbege!” — Mat. 25:14-23.

14. Hi nga mu pimedzeya kharini Jesu khu ndziya eyi a nga ba a phara khiyo vambe?

¹⁴ Jesu tepo yatshavbo a ngu yeyedza lihaladzo ni wuwadi ga moyo ni moyo wathu. Uye a ngu dziti gu khuye hi na ni makodzelo nyo hambane ni siemo nyo hambane, ni gu a ngu tsaka tepo hi dzi garadzago. Ethu hi yede gu pimedzeya Jesu. Adzina vambe vandriyathu kha va si kodzi gu gira nya singi nga vambe. Khu kharato, kha hi yeli gu ganeya silo si na va girago vapwa dzitshoni mwendro gu dzipwa na va si phasi gilo. Wulangani nya isoso, tepo yatshavbo hi yede gu va zundza khu gudzigaradza va gu girago thumoni wa Jehovha.

15-16. Ndriyathu nya nyamayi, phasegide kharini khu gu dzi vegeya misuwo a nga hadzi si kodza gu yi vboheya?

¹⁵ Ha gu dzi vegeya misuwo nya liphuvbo, womi wathu wu na manega ni makungo. Ganiolu, hi yede gu dzi vegeya misuwo hi na yi kodzago gu yi vboheya na siri gu landra khesi vambe va girago. Ho dzi vegeya misuwo hi na gu mba si kodza gu yi vboheya, hi na khunguvanyega hi bwe hi vbeya tshivba. (Luka 14:28) Wona giyeyedzo gya ndriyathu moyo nya nyamayi a gu piyonero nyo pwane khu Midori.

¹⁶ Papayi wa Midori, a gu siri Fakazi ya Jehovha, a di gu mu phara khu ndziya nya mba yadi na ngari gyanana. Uye a di gu mu fananisa ni vandriyaye, ni sihevbuli kwanu. Midori wari khuye: “Nyi di gu dzipwa na nyi si phasi gilo.” Tepo a ngaya a dandra Midori a di pheya gu dzipwa gwadi. Uye wari khuye: “Gu leri Bhibhiliya tshigu ni tshigu, si nyi phaside gu rula monyo si bwe si nyi phasa gu dzipwa na nyi haladzwa khu Jehovha.” Gu diga isoso, Midori dzi vegede misuwo a nga hadzi si kodza gu yi vboheya nigu gombede ga Jehovha gasi a mu phasa gu yi vboheya. Isoso si phaside Midori gu tsaka khesi a nga ba a si kodza gu gireya Jehovha.

17. Hi nga gira kharini gasi hi simama gu ‘vbindrugedza mavbanyelo hi khala vathu vaphya monyoni ni mapimoni gwathu’ nigu hi na wuyedwa khu ginani?

¹⁷ Si ngu dzega tepo nyo laphe gasi gu vbindrugedza edzi u dzipwago ni gu dzi wonago khidzo. Khu kharato, Jehovha a gu hi embeya gu khuye: “Dzi garadzeni khu gu vbindrugedza mavbanyelo mu khala vathu vaphya myonyoni ni mapimoni gwanu.” (Efes. 4:23, 24) Gasi hi si kodza gu gira isoso, gu vbwetega hi gombeya, hi leri Bhibhiliya ni gu dundrugeya khesi hi lerigo. Khu kharato, simama gu gira silo sesi nigu lomba Jehovha gasi a gu ninga tshivba. Liphuvbo laye nya guage li na  gu phasa gu pala ni gwevbini guwegeleya nya gu dzi fananise ni vambe. Jehovha a na gu phasa gu tugula tepo u pheyago gu khala muthu nya dzi khusedze ni lidiwo, ni gu uye a na gu phasa gu vbindrugedza khu guvbiredza.

18. 2 Dzikoronika 6:29, 30, a nga hi thaveleya kharini?

¹⁸ Leri 2 Dzikoronika 6:29, 30. Jehovha a ngu wuti monyo wathu. Uye a ngu dziti gu khuye ha gu dwana ni mikutsedzelo nyo vivbe nya litigo leli ni gu mba vbeleya gwathu. Tepo Jehovha a wonago gudzigaradza gwathu gasi gu pala mikutsedzelo yoyo nyo vivbe, lihaladzo laye khu ethu la gu engedzeya.

19. Khu gevbini giyeyedzo egi Jehovha a gi thumisago gasi gu hi phasa gu pwisisa lihaladzo laye khethu?

¹⁹ Gasi gu yeyedza edzi a dzipwago khidzo khethu, Jehovha thumiside giyeyedzo nya lihaladzo eli mamayi a li pwago khu gyanana gyaye. (Isa. 49:15) Wona esi si dugeledego mamayi nyo khaguri nyo pwane khu Rachel. Uye lovide khuye: “Gyanana gyangu Stephanie gi velegidwe na gi nga si enedzi matshigu yagyo. Ga tepo nyo pheya nyi nga gi wona gi di gu khatshi gi dugwana ngudzu ni gu gi diri mwalo tshivba. Hwane nya ngima moyo na gi ngo romo omu nya mutshini nyo pwane incubadora, hospital yi di nyi dzumeleya gu khiyo nyi gi wugareya matshigu yatshavbo. Ndrani nya tepo yoyo eni ni bhebhe wangu hi di oloveyana ngudzu. Stephanie muhuno na ni 6 myaga nigu givilyana gyaye gi dugwana ngudzu wa gu gi fananisa ni sanana nya tanga yaye. Ambari ulolo, eni nyi ngu mu haladza ngudzu kholu uye dwanide ngudzu gasi gu vbanya ni gu uye a nyi ningide gu tsaka womini gwangu.” Si ngu tsakisa ngudzu guti gu khethu Jehovha a ngu hi haladza ngudzu tepo a hi wonago na hi dzi garadza gasi gu mu thumeya khu monyo wathu watshavbo.

20. Khu ginani sithumi sa Jehovha si gu na ni gighelo nya gu tsake?

²⁰ Khu kotani nya olu u thumeyago Jehovha uwe u na ni lisima avba nya sivbango nya ndranga ya Jehovha, ni gu mwalo a fanago nago. Jehovha kha gu rana hengeledzanoni yaye khu gu khuye uwe u tshukwana gu vbindra vambe. Uye a gu ranide kholu khedzide monyo wago a wona gu khuye u muthu nya gu dzi nogise ni gu u dzi emisede gu vbindrugedza. (Ndzi. 25:9) Tiyisega gu khuwe Jehovha a ngu ninga lisima satshavbo u si girago thumoni waye. Gu timiseya gwago ni gu tumbega sa gu yeyedza gu khiso u na ni “monyo nya wadi nya gululame.” (Luka 8:15) Khu kharato, simama gu dzi garadza thumoni wa Jehovha. Khavbovbo, u na mana gighelo nya gu tsake “khu mithumo [yago] nya yadi.”