1. Nkamboonzi Jehova naatatweezyanisyi aabamwi?

JEHOVA talangilili kuti toonse tukozyanie pe nkaambo wakalenga misyobo iisiyene-siyene yamisamu, banyama abantu. Mbukunga tubantu tulisiyene, Jehova tatweezyanisyi aabamwi pe. Umwizi kabotu umwi awumwi wesu. (1 Sam. 16:7) Ulizi nzitukonzya anzitutakonzyi kuchita alubo ulizi mbutwakakomezegwa. Talangilili kuti umwi awumwi wesu achite zyiingi kwiinda nzyakonzya. Tweelede kutobelezya chikozyano chaJehova kwiinda mukulibona mbuli mbatubona. Kuti twachita oobo, tunootondeezya kuti ‘tuyeeya kabotu’ alubo tatukolibona katuyandikana loko naakuti katutagwasyi.—Rom. 12:3.

2. Nkamboonzi nikutali kabotu kulyeezyanisya aabamwi?

² Tulakonzya kwiiya kuzikozyano zyabamwi zilikabotu. (Heb. 13:7) Muchikozyano, kuti kakuli umwi mukwesu naakuti muchizi uuchita kabotu mumulimu wakukambawuka, tulakonzya kwiiya kulinguwe kuti tuyungizye luzibo lwesu mumulimu wakukambawuka. (Flp. 3:17) Kutobelezya zintu zibotu zichitwa aawumwi muntu kulisiyene akulyeezyanisya anguwe. Kulyeezyanisya aamuntu kulakonzya kupa kuti tube aabbivwe, tumane manguzu akuti tulibone katutagwasyi. Alubo mbuli mbutwakabona muchiiyo chayinda, kulyeezyanisya aabamwi mumbungano kulakonzya kunyongania bweenzuma bwesu aJehova. Nkinkaako, Jehova utulayilila kuti: “Umwi aumwi alingule nzyacita lwakwe mwini, mpoonya ulajana kaambo kamupa kukondwa lwakwe mwini, ikutali akaambo kakulyeezyanya amuntu uumbi.”—Gal. 6:4.

3. Niinzi nzwaakachita mukubelekela Jehova zikonzya kupa kuti ubotelwe?

 ³ Jehova uyanda kuti ubotelwe azintu nzuchita mumulimu wakwe. Muchikozyano, kuti kuli wakabbabbatizigwa, weelede kubotelwa nkaambo wakasala kubelekela Leza akaambo kakuti ulamuyanda. Yeeya atala azintu zyoonse nzwaakachita kuzwa nwaakabbabbatizigwa. Muchikozyano, nzila njubalaayo Bbayibbele anjuchitaayo chiiyo chako awulikke yakayungizya na? Ani nkombyo zyako zyakachincha na? (Int. 141:2) Wakayungizya luzibo lwako na mumulimu wakukambawuka naakuti waabukonzya kuzibelesya kabotu zibelesyo nzitubelesya mumulimu wakukambawuka? Alubo kuti kuli aampuli, wakaba mwaalumi, mwanakazi naakuti muzyali ulikabotu na? Kuti kakuli boobo, ulakonzya kubotelwa akuchincha nkwaakachita.

4. Tulalanga-langaanzi muchiiyo eechi?

⁴ Tulakonzya kugwasya bamwi kuti babotelwe anzibalikuchita mumulimu waJehova. Alubo tulakonzya kubagwasya kuti batalyeezyanisyi aabamwi. Muchiiyo eechi, tulabona bazyali mbubakonzya kugwasya bana babo, bakwetene mbubakonzya kugwasyania, baalu andiswe toonse mbutukonzya kugwasyania mumbungano. Alubo tulabona malayilile aamuBbayibbele akonzya kutugwasya kuti tuchite zintu nzitukonzya kweendelana azyiimo azipo nzitulaazyo.

5. Kweendelana alugwalo lwa Baefeso 6:4, niinzi bazyali nzibateelede kuchita?

⁵ Bazyali tabeelede kweezyanisya bana babo naakuti kulangilila kuti bachite zyiingi kwiinda nzibakonzya. Kuti bachita oobo, bana babo balakonzya kumana manguzu. (Bala Baefeso 6:4.) Muchizi uutegwa Sachiko * wakaamba kuti: “Bayiisi bangu bakali kuyanda kuti ndiinde bamwi bana boonse mukkilasi. Alubo baama bakali kuyanda kuti ndipase kuchitila kuti maticha andeende wakatali Kamboni babone kuti Bakamboni baJehova mbantu balikabotu. Baama bakali kuyanda kuti nditakachilwi nikuba umwi biyo mubuzyo nitwakali kulemba misunko. Pesi eezi teezyakali kukonzeka pe. Nikuba kuti ndaba aaminyaka myiingi kuzwa nindakamaninsya chikolo, pesi zyakachitika kandili muniini zipa kuti ndikkale kandilibuzya kuti, Jehova ulabotelwa na atala anzindilikuchita mukumubelekela.”

6. Lugwalo lwa Intembauzyo 131:1, 2, lubayiisyaanzi bazyali?

⁶ Chimwi chiiyo chiyandikana nchibakonzya  kwiiya bazyali chijanika muli Intembauzyo 131:1, 2. (Bala.) Mwaami Davida wakati: “Kunyina nendilombozya zintu zipati kapati, noziba zintu nzyonditakonzyi kujana.” Akaambo kakuti wakali kulibombya wakakonzya ‘kuumbulizya akuwuumuzya’ moyo wakwe. Bazyali bayiyaanzi kuzwa kumajwi aaDavida? Bazyali balakonzya kutondeezya kuti balalibombya kwiinda mukuzumina kuti kuli zimwi zintu nzibatakonzyi alubo tabeelede kulangilila kuti bana babo bachite zintu nzibatakonzyi pe. Bazyali balakonzya kugwasya bana babo kuti babone kuti balayandikana kwiinda mukubagwasya kuti basale zintu zyeendelana anzibakonzya azipo nzibalaazyo. Muchizi uutegwa Marina wakaamba kuti: “Baama takwe nibakali kundeezyanisya amukulanaangu abanike bangu babili naakuti abamwi bana. Bakandiyiisya kuti umwi awumwi wesu ulaazintu nzyakonzya akuti toonse tulayandikana kuli Jehova. Ndilabalumba akaambo kakuti eezi zyakandigwasya kuti nditalyeezyanisyi aabamwi.”

7-8. Kujana mwaalumi watondeezya biyeni kuti umupa bulemu mwanakazi wakwe?

⁷ Mwaalumi weelede kumupa bulemu mwanakazi wakwe. (1 Pet. 3:7) Kupa bulemu umwi muntu chaamba kumubona kayandikana akumulemeka. Muchikozyano, mwaalumi ulakonzya kutondeezya kuti umupa bulemu mwanakazi wakwe kwiinda mukumubona kayandikana. Tayelede kulangilila kuti achite zintu nzyatakonzyi alubo tamweezyanisyi aabamwi banakazi. Niinzi zikonzya kuchitika kuti mwaalumi weezyanisya mwanakazi wakwe abamwi banakazi? Mulumi wamuchizi Rosa uutali Kamboni ukkala kamweezyanisya aabamwi banakazi. Nzyaakachita mwaalumi ooyu zyakapa kuti Rosa alibone katagwasyi alubo zyakapa kuti abonaanga takwe muntu umuyanda pe. Muchizi Rosa wakaamba kuti: “Ndiyanda kukkala kandiyeezegwa kuti Jehova ulandiyanda.” Kusiyana azichitwa aamulumi waRosa, baalumi bachiKristu babapa bulemu banakazi babo. Nkaambo balizi kuti kubapa bulemu kupa kuti babe aabweenzinyina bulikabotu aJehova abanakazi babo. *

⁸ Mwaalumi uupa bulemu mwanakazi wakwe waambuula zilikabotu atala anguwe, umubuzya kuti ulamuyanda alubo ulamulumbayizya. (Tus. 31:28) Eezi nzizyo zyakali kuchitwa aamulumi waKaterina wakaambwa muchiiyo chayinda. Chiindi Katerina naakali kulimvwa katagwasyi mulumaakwe wakali kumugwasya kuti azunde penzi eeli. Naakali muniini bayina bakali kumweezyanisya abamwi bana kuswaanizya abeenzinyina. Eezi zyakapa kuti Katerina asaangune kulyeezyanisya aabamwi. Nikuba chiindi naakaba Kamboni waJehova wakali kulyeezyanisya abamumbungano yakwe. Mulumaakwe wakamugwasya kuti aleke kulyeezyanisya aabamwi akuti alibone munzila iilikabotu. Katerina wakaamba kuti: “Mulumaangu ulandiyanda, ulandilumbayizya akaambo kazintu zibotu nzindichita alubo ulandikombela. Alubo undigwasya kuti ndiyeeyesesye atala abuntu bubotu mbwalaabo Jehova akuti ndilibone kandiyandikana.”

9-10. Baalu bakamugwasya biyeni umwi muchizi kuti aleke kulyeezyanisya aabamwi?

⁹ Kujana baalu babagwasya biyeni bantu balyeezyanisya aabamwi mumbungano? Atubone chikozyano chamuchizi uutegwa Hanuni. Kuzwa kali muniini taakali kulumbayizigwa pe akaambo kazintu nzyaakali kuchita. Muchizi ooyu wakati: “Ndakali aabweeme alubo ndakali kubonaanga bamwi bana bayandikana loko kwiinda ndime. Ndakasaanguna kulyeezyanisya aabamwi kuzwa kandili muniini.” Nikuba  chiindi naakaba Kamboni, Hanuni wakali kulyeezyanisya aabamwi. Eezi zyakapa kuti alibone katayandikani pe mumbungano. Pesi lino ubeleka kali payona. Niinzi chakapa kuti achinche maboneno aakwe?

¹⁰ Hanuni wakaamba kuti wakagwasigwa aabaalu. Bakamubuzya kuti ulayandikana mumbungano alubo bakali kumulumbayizya akaambo kakuba chikozyano chilikabotu kuli bamwi. Hanuni wakaamba kuti: “Aali zimwi ziindi, baalu bakali kundikumbila kuti ndisungwaazye bamwi bachizi bakali kuyanda kugwasigwa. Eezi zyakapa kuti ndilimvwe kandiyandikana. Ndichiyeeyede baalu nibakandilumba akaambo kakusungwaazya bamwi bachizi bachikula alubo bakandibalila lugwalo lwa 1 Batesalonika 1:2, 3. Eezi zyakapa kuti ndibotelwe. Ndilabalumba beembezi aaba balaaluyando nkaambo bakandigwasya kuti ndibone kuti ndili aamulimu uuyandikana ngundichita mumbungano.”

11. Kweendelana alugwalo lwa Isaya 57:15, kujana twabagwasya biyeni “batyompedwe alimwi bajisi muuya wakulicesya”?

¹¹ Bala Isaya 57:15. Jehova ulaandaba abantu “batyompedwe alimwi bajisi muuya wakulicesya.” Toonse mumbungano tuli aamulimu wakusungwaazya bakwesu abachizi balimvwa oobu kutali baalu luzutu. Imwi nzila mbutukonzya kuzichita nkutondeezya kuti tuli aandaba ambabo. Jehova uyanda kuti tubatondeezye kuti ulabayanda. (Tus. 19:17) Alubo tulakonzya kugwasya bakwesu abachizi kuti katutalisumpuli akaambo kazipo nzitulaazyo. Tatweelede kuchita zintu katuyanda kubonenenwa nkaambo tulakonzya kupa kuti bamwi babe abbivwe. Pesi tweelede kubelesya luzibo azipo nzitulaazyo kuti tusungwaazye bamwi.—1 Pet. 4:10, 11.

12. Nkamboonzi bantu bakali kulangilwaansi nibakali kumuyanda Jesu? (Langa chifanikisyo chili achivumbyo.)

¹² Tulakonzya kwiiya zyiingi atala ambutukonzya kujata bamwi kuti twalanga nzila Jesu njaakali kubajataayo batobeli bakwe. Nikuba kuti wakali mupati kwiinda bantu boonse pesi wakaamba kuti: “Ndili mubombe moyo, alimwi ndilalicesya.” (Mt. 11:28-30) Takwe naakali kulisumpula pe akaambo kabusongo aluzibo ndwaakalaalo. Chiindi naakali kuyiisya wakali kwaambuula munzila imvwisisika alubo wakali kubelesya zikozyano zyuuba, zyakali kubasika aamoyo bantu bakali kulangilwaansi. (Lk. 10:21) Jesu wakalisiyene abapati bazikombelo nkaambo wakali kugwasya bantu kuti babone kuti balayandikana kuli Leza. (Joh. 6:37) Jesu wakali kubalemeka bantu bakali kulangilwaansi.

13. Jesu wakatondeezya biyeni kuti ulaaluzyalo aluyando kwiinda munzila njaakali kubajataayo basikwiiya bakwe?

¹³ Jesu wakatondeezya kuti ulaaluzyalo aluyando kwiinda munzila njaakali kubajataayo basikwiiya bakwe. Wakalizi kuti basikwiiya bakwe bakali azyiimo azipo zisiyene. Alubo taakali kulangilila kuti basikwiiya bakwe bachite zintu zikozyenie mumulimu wakukambawuka. Pesi wakali kubalumba boonse akaambo kamilimu njibakali kuchita. Chikozyano chamatalenta chitugwasya kubona maboneno ngaakalaawo Jesu atala abasikwiiya bakwe. Simalelo uuli muchikozyano eechi wakapa muzike umwi awumwi mulimu “kweelana anguzu zyakwe.” Aakati kabazike babili bakabeleka changuzu, umwi wakajana zyiingi kwiinda umwi. Pesi simalelaabo wakabalumba kabelesya majwi aakozyenie aakuti: “Wacita kabotu, omuzike mubotu alimwi uusyomeka!”—Mt. 25:14-23.

14. Kujana twachitobelezya biyeni chikozyano chaJesu?

¹⁴ Jesu utufwida luzyalo alubo ututondeezya luyando. Ulizi kuti tuli aazipo azyiimo zisiyene-siyene alubo ulabotelwa akubeleka changuzu nkutuchita. Tweelede kujata bamwi munzila iilikabotu mbuli mbachita Jesu. Tatweelede kujata bakombima munzila iitape kuti  balibone kabatagwasyi naakuti babe aabweeme akaambo kakuti tabakonzyi pe kuchita zintu mbuli mbubachita bamwi. Pesi tweelede kubalumbayizya bakwesu abachizi akaambo kakubeleka changuzu nkubachita mumulimu waJehova.

15-16. Umwi muchizi wakagwasigwa biyeni akusala kuchita zintu nzyakonzya kuchita?

¹⁵ Kuchita zintu zisiyene-siyene mumulimu waJehova kupa kuti tubotelwe. Chiindi nitusala zyakuchita, tatweelede kulyeezyanisya aabamwi pe pesi tweelede kusala kuchita zintu nzitukonzya kweendelana azyiimo zyesu. Kulyeezyanisya aabamwi kuyoopa kuti tutabotelwi alubo kulakonzya kupa kuti tumane manguzu. (Lk. 14:28) Atubone chikozyano chawumwi payona uutegwa Midori.

¹⁶ Wisi aaMidori teeKamboni pe. Wakali kukkala kamweezyanisya aabanike bakwe abamwi mbaakali kwiiyaabo kuchikolo. Midori wakaamba kuti: “Ndakali kulimvwa kanditagwasyi.” Naakali wakomena Midori wakasaanguna kulibona munzila iilikabotu. Wakaamba kuti: “Ndakali kubala Bbayibbele buzuba abuzuba kuchitila kuti nditakataazikani loko akuti ndibone kuti Jehova ulandiyanda.” Kuyungizya waawo, Midori wakasala kuchita zimwi zintu zyabukombi alubo wakakumbila Jehova kuti amugwasye kuzizuzikizya. Eezi zyakapa kuti Midori abotelwe azintu nzyaakali kuchita mumulimu waJehova.

17. Nga tulachita biyeni kuti ‘tuzumanane kubukulusya mizeezo iitweendelezya lyoonse’ alubo kuchita oobo kutugwasya biyeni?

¹⁷ Tulakonzya kutola chiindi kuti tuchinche nzila njitulibonaayo. Nkinkaako, Jehova wakaamba kuti: “Mweelede kuzumanana kubukulusya mizeezo iimweendelezya lyoonse.” (Ef. 4:23, 24) Kuti tukonzye kuchita oobu, tweelede  kukomba, kubala Jwi lyaLeza akuyeeyesesya. Zumanana kuchita zintu eezi alubo ukumbile Jehova kuti akugwasye. Muuya uusalala uyookugwasya kuti uzunde penzi lyakulyeezyanisya aabamwi. Kuti twaba abbivwe akulisumpula, Jehova uyootugwasya kuti tulilange-lange akuti tubugwisye buntu oobu butali kabotu.

18. Lugwalo lwa 2 Makani 6:29, 30, lukugwasya biyeni?

¹⁸ Bala 2 Makani 6:29, 30. Jehova ulizi mbutulimvwa. Ulizi kuti tubeleka changuzu kuti tukkale katusiyene abantu bali munyika eeyi yeendelezegwa aSaatani akuti tubeleka changuzu kuti tugwisye buntu butali kabotu. Chiindi Jehova natubona katubeleka changuzu kuti tugwisye buntu oobu butali kabotu zipa kuti atuyande loko.

19. Jehova uyikozyanisya aanzi nzila njatuyandaayo?

¹⁹ Jehova ubelesya chikozyano chamwanakazi amwanaakwe kuti atondeezye mbatuyanda. (Is. 49:15) Atubone chikozyano chaRachel. Wakaamba kuti: “Mwanaangu Stephanie wakazyalwa myeezi kayitanakkwana. Naakatumbukwa wakali muniini loko pesi dokotela wakandizumizya kuti kandimujata akumumbundila mwanaangu naakali muchibbadela mweezi wakwe wakusaanguna. Eezi zyakapa kuti ndimuyande loko. Lino ulaaminyaka iili 6 pesi ulisiyene abamwi basela lyakwe nkaambo uuli aamubili muniini. Ndilamuyanda mwanaangu nkaambo teekwakali kuuba kuti asike mpabede lino alubo kubawo kwakwe kupa kuti ndibotelwe loko mubuumi bwangu.” Kulatuumbulizya kuziba kuti Jehova anguwe utuyanda munzila iliboobu chiindi natubona katubeleka changuzu mumulimu wakwe nikuba kuti teekuuba pe kuchita oobo.

20. Nkamboonzi bakombi baJehova nibakonzya kubotelwa?

²⁰ Mbukunga uli mukombi waJehova, ulayandikana mumpuli yakwe alubo taakwe umwi muntu uli mbuli nduwe pe. Jehova taakakukwela kulinguwe akaambo kakuti ulabayinda bamwi muzintu nzuchita, pesi wakabona kuti uli aamoyo ubombede akuti ulazumina kuyiisigwa anguwe. (Int. 25:9) Baachoonzyo chakuti ulabotelwa kuti wachita zyoonse nzukonzya kuti umubelekele. Kulisimya akusyomeka nkuchita kutondeezya kuti ‘ulaamoyo uululeme alimwi mubotu.’ (Lk. 8:15) Zumanana kuchita nzukonzya kuti ubelekele Jehova. Kuti wachita oobo, uyoojana kaambo kakupa kuti ‘ukondwe lwako mwini.’