1. Wai na Jehova i no save skelim yumi wantaim ol narapela?

JEHOVA i laikim olgeta kain manmeri. Yumi save long dispela bikos yumi lukim ol samting em i wokim olsem ol kain kain plents na ol kain kain animal na yumi ol man tu. Yumi olgeta i no wankain. Olsem na Jehova i no save skelim yumi wantaim ol narapela. Em i save long bel bilong yumi na ol tingting i stap long bel bilong yumi. (1 Sml. 16:7) Em i save tu long ol samting yumi save gut long mekim, ol samting yumi no save gut long mekim, na hau yumi bin kamap bikpela. Em i laik bai yumi mekim ol samting inap tasol long skel bilong yumi wan wan. I gutpela yumi bihainim pasin bilong Jehova na holim wankain tingting long yumi yet olsem em i gat long yumi. Long dispela rot, yumi bai i gat “gutpela tingting,” na yumi no tingim yumi yet olsem nambawan tru o olsem samting nating tasol.—Rom 12:3.

2. Wai na em i no gutpela long skelim yumi yet wantaim ol narapela?

² Tru tumas, yumi inap kisim helpim taim yumi lukim pasin bilong wanpela brata o sista long mekim gut wok autim tok. (Hib. 13:7) Na yumi ken kisim skul long em long hau yumi ken mekim wok autim tok bilong yumi yet i kamap gutpela moa. (Fili. 3:17) Tasol pasin bilong bihainim eksampel bilong wanpela i no wankain long pasin bilong skelim yu yet wantaim narapela. Taim yumi skelim yumi yet wantaim ol narapela, dispela inap kamapim pasin bilong bel nogut, bel hevi, na inap mekim yumi pilim olsem yumi samting nating tasol. Olsem yumi bin stori long atikol i go pinis, sapos yumi wok long resis wantaim ol narapela long kongrigesen, dispela inap bagarapim pasin pren bilong yumi wantaim Jehova. Olsem na Jehova i tokim yumi olsem: “Olgeta man wan wan i mas skelim wok bilong ol yet. Na long dispela rot, bai ol i amamas long  samting ol yet i mekim, na ol i no ken skelim ol yet wantaim narapela.”—Gal. 6:4.

3. Yu ken amamas long wanem ol senis yu mekim bilong lotuim Jehova?

³ Jehova i laik bai yu amamas long ol senis yu yet i bin mekim bilong lotuim em. Olsem, sapos yu bin baptais, yu ken amamas olsem yu bin winim dispela mak! Yu yet i wokim disisen bilong mekim olsem. Na yu mekim olsem bikos yu laikim God. Tingim ol samting yu wok long mekim bihain long yu baptais. Olsem, yu wok long mekim Baibel ritim na pesenel stadi bilong yu i kamap gutpela moa? Yu wok long mekim ol beten em yu pilim tru ol tok bilong en long bel? (Sng. 141:2) Yu mekim wok autim tok bilong yu i kamap gutpela moa na yu lain gut long yusim ol tul bilong autim tok? Na sapos yu gat famili, olsem wanem Jehova i helpim yu long kamap gutpela man marit, meri marit, o papamama? Yu ken amamas na belgut long ol senis yu bin mekim long ol dispela samting.

4. Bai yumi stori long wanem samting long dispela atikol?

⁴ Yumi ken helpim ol narapela long amamas long ol samting ol yet i mekim bilong lotuim Jehova. Yumi ken helpim ol tu long sakim pasin bilong skelim ol yet wantaim ol narapela. Long dispela atikol, yumi bai stori long hau ol papamama i ken helpim ol pikinini bilong ol, na hau poroman marit i ken helpim narapela narapela, na hau ol elda na ol narapela i ken helpim ol narapela bratasista. Na yumi bai stori tu long ol stiatok bilong Baibel we inap helpim yumi long putim ol mak i stret long sindaun na save bilong yumi wan wan.

5. Olsem Efesus 6:4 i tok, ol papamama i mas sakim wanem pasin?

⁵ Papamama i mas was gut na ol i no ken skelim wanpela pikinini wantaim narapela, na tu, ol i no ken ekspektim pikinini long mekim planti samting moa winim skel bilong em. Sapos papamama i skelim pikinini wantaim narapela o putim mak i antap tumas, dispela inap mekim pikinini i bel hevi. (Ritim Efesus 6:4.) Wanpela sista nem bilong em Sachiko, * em i tok: “Ol tisa bilong mi i laik mi mas winim ol narapela wanklas bilong mi. Na mama bilong mi i laik bai mi mas kisim gutpela mak long skul bambai mi ken kisim gutnem olsem wanpela Witnes long ai bilong tisa na papa bilong mi husat i no Witnes. Em i laik mi mas kisim 100 pesen long ol eksem bilong mi na dispela em i no isi. Mi pinis long  skul planti yia i go pinis, tasol sampela taim mi save pilim olsem Jehova i no amamas long mi, maski mi givim bes bilong mi.”

6. Ol papamama inap kisim wanem skul long tok bilong Buk Song 131:1, 2?

⁶ Baibel i mekim gutpela tok i go long ol papamama long Buk Song 131:1, 2. (Ritim.) King Devit i tok em i “no save tingting long kisim ol bikpela samting” na ol samting we em i no inap kisim. Pasin daun bilong em i “mekim bel bilong [em] i stap isi.” Ol papamama inap kisim wanem skul long tok bilong Devit? Ol papamama i mas daunim ol yet na holim stretpela tingting long ol mak ol yet i laik winim, na tu, long ol mak ol i putim bilong ol pikinini bilong ol. Ol papamama i ken tokim pikinini olsem ol i laikim em na ol i ken luksave long ol samting pikinini i mekim gut na ol samting em i no save mekim gut na putim ol mak i stret long em. Wanpela sista nem bilong em Marina, em i tok: “Mama i no save skelim mi wantaim tripela brata bilong mi o wantaim ol narapela pikinini. Em i skulim mi olsem mipela olgeta wan wan i gat narapela narapela pasin, na mipela i dia tumas long ai bilong Jehova. Mi amamas long dispela bikos nau mi no save skelim mi yet wantaim ol narapela.”

7-8. Olsem wanem man marit i ken givim ona long meri bilong em?

⁷ Man marit i mas givim ona long meri bilong em. (1 Pita 3:7) Givim ona i makim pasin bilong givim spesel atensen na rispek long ol narapela. Olsem, man i givim ona long meri bilong em taim em i rispektim em. Em i no inap askim meri long mekim ol samting em i no inap long mekim. Na em i no save skelim em wantaim ol narapela meri. Sapos em i save skelim em wantaim ol narapela meri, dispela inap mekim wanem long meri bilong em? Wanpela sista nem bilong Rosa, man bilong i no Witnes na oltaim em i save skelim em wantaim ol narapela meri. Ol tok i no stret em man i tromoi long Rosa i save mekim em i pilim nogut tru na em i save tingting planti olsem ol narapela i no laikim em. Rosa i tok: “Oltaim mi mas tokim mi yet olsem Jehova i laikim mi.” Tasol man marit Kristen i no ken mekim kain pasin, nogat, oltaim em i mas givim ona long meri bilong em. Em i save olsem taim em i mekim olsem, dispela i helpim em long pas gut wantaim meri bilong em, na tu, em bai pas gut wantaim Jehova. *

⁸ Man marit i givim ona long meri bilong em taim em i litimapim nem bilong meri bilong em, tokim em olsem em i laikim em, na mekim tok amamas long em. (Prov. 31:28) Em pasin man bilong Katerina—em yumi stori long em long atikol i go pinis—i bin mekim na dispela i helpim Katerina long daunim filing olsem em i samting nating tasol. Taim em i liklik, mama bilong em i save daunim em long rot bilong skelim em wantaim ol narapela gels na ol pren bilong em. Dispela i mekim na oltaim Katerina i skelim em yet wantaim ol narapela na em i mekim olsem yet maski em i kisim pinis tok i tru! Tasol man bilong em i helpim em long daunim dispela pasin na em i helpim em long kisim stretpela tingting long em yet. Katerina i tok: “Em i laikim mi, tok amamas long ol gutpela wok mi mekim, na em i beten wantaim mi. Em i kirapim mi long tingim ol gutpela pasin bilong Jehova na em i helpim mi long stretim ol tingting kranki bilong mi.”

9-10. Ol gutpela elda i mekim wanem bilong helpim wanpela sista husat i gat pasin bilong skelim em yet wantaim ol narapela?

⁹ Olsem wanem ol elda i ken helpim ol narapela em ol i gat pasin bilong skelim ol yet wantaim ol narapela? Skelim stori bilong wanpela sista nem bilong em Hanuni. Taim em i liklik i no gat wanpela i save tok amamas long em. Em i  tok: “Mi sem na mi pilim olsem ol narapela pikinini i winim mi. So kirap long dispela taim na i kam, oltaim mi save skelim mi yet wantaim ol narapela.” Maski Hanuni i kisim pinis tok i tru, em i save wok yet long skelim em yet wantaim ol narapela. Dispela i mekim na em i pilim olsem em i samting nating insait long kongrigesen. Nau em i stap olsem wanpela gutpela painia. Wanem samting i helpim em long senisim pasin bilong em?

¹⁰ Hanuni i tok ol elda i helpim em. Ol i tokim em olsem em i dia tumas long kongrigesen na ol i tok amamas long em i stap gutpela eksampel. Em i tok: “Sampela taim ol elda i askim mi long strongim ol narapela sista i nidim helpim. Dispela i mekim mi pilim amamas. Mi tingim ol elda i bin tok amamas long mi bin strongim sampela yangpela sista. Na ol i ritim tok bilong 1 Tesalonaika 1:2, 3 long mi. Dispela i bin strongim mi tru! Mi tenkyu tru long ol dispela gutpela wasman, nau mi amamas long stap insait long oganaisesen bilong Jehova.”

11. Olsem wanem yumi ken strongim “ol man em bel bilong ol i bagarap stret na ol i daunim ol yet” olsem Aisaia 57:15 i stori long ol?

¹¹ Ritim Aisaia 57:15. Jehova i save tingim tru “ol man em bel bilong ol i bagarap stret na ol i daunim ol yet.” I no ol elda tasol, yumi olgeta i gat wok long strongim ol dispela brata na sista. Wanpela rot bilong strongim ol em long soim ol olsem yumi tingim tru ol. Jehova i laik yumi soim ol olsem Em i laikim ol tru. (Prov. 19:17) Na tu, yumi helpim ol brata na sista bilong yumi taim yumi daunim yumi yet na yumi no hambak long save bilong yumi. Yumi no laik mekim pasin olsem yumi nambawan tru, nogut dispela i kirapim ol narapela long bel nogut. Yumi ken yusim gutpela pasin na save bilong yumi long strongim ol narapela.—1 Pita 4:10, 11.

12. Wai na ol man nating i laikim Jisas? (Lukim fran pes piksa.)

¹² Yumi ken kisim skul long pasin yumi ken mekim long ol narapela long rot bilong skelim pasin Jisas i bin mekim long ol disaipel bilong em. Em i nambawan gutpela man i bin stap long graun. Maski i olsem, em i gat “pasin isi na pasin daun.” (Mat. 11:28-30) Em i no hambak long bikpela save bilong em. Em i save mekim ol tok i isi long man i kisim gut na mekim ol simpol tok piksa em ol man nating i pilim tru. (Luk 10:21) Jisas i no wankain long ol hetman bilong lotu, oltaim em i save mekim ol narapela i pilim olsem ol i dia tumas long ai bilong God. (Jon 6:37) Long dispela rot, em i rispektim ol man nating.

13. Olsem wanem gutpela pasin na pasin laikim bilong Jisas i stap ples klia long pasin em i mekim long ol disaipel bilong em?

¹³ Gutpela pasin na pasin laikim bilong Jisas i stap ples klia long pasin em i mekim long ol disaipel bilong em. Em i save olsem sindaun bilong ol i no wankain na ol i gat narapela narapela save long mekim ol wok. So ol i no inap mekim ol wankain wok na wok bilong ol i no inap kamapim wankain samting. Maski i olsem, em i amamas tru long ol wok em olgeta wan wan i givim bel olgeta long mekim. Dispela pasin bilong Jisas long tingim ol tru i stap ples klia long tok piksa bilong ol talen em i mekim. Long dispela tok piksa, bosman i givim wok long ol wokboi “i stret long save na strong bilong wan wan.” Wanpela bilong dispela tupela gutpela wokboi i kisim planti talen moa winim narapela. Tasol bosman i mekim wankain tok long tupela, olsem: “Yu gutpela wokboi, yu mekim gutpela wok tru!”—Mat. 25:14-23.

14. Long pasin yumi mekim long ol narapela, olsem wanem yumi ken bihainim pasin bilong Jisas?

¹⁴ Oltaim Jisas i save mekim gutpela pasin na pasin laikim long yumi. Em i save olsem yumi olgeta i no gat wankain sindaun na yumi gat narapela narapela save bilong mekim ol wok, na em i amamas taim yumi givim bes bilong yumi. Yumi mas mekim wankain pasin olsem Jisas i mekim long ol narapela. Yumi no laik mekim wanpela  wanbilip i pilim olsem em i samting nating o mekim em i pilim sem bikos em i no inap mekim bikpela wok. Oltaim yumi laik painim rot bilong amamas long ol bratasista bilong yumi long ol i givim bes bilong ol long mekim wok bilong Jehova.

15-16. Wanpela sista i putim wanem ol mak na dispela i helpim em?

¹⁵ Taim yumi putim ol mak bilong winim long sait bilong bilip, dispela i mekim na yumi pilim olsem laip bilong yumi i gat as bilong en. Tasol bikpela samting, yumi laik putim ol mak i stret long save na sindaun bilong yumi wan wan, na yumi no laik putim wankain mak olsem ol narapela i putim. Yumi no laik bai dispela i mekim yumi bel hevi. (Luk 14:28) Tingim stori bilong wanpela painia sista, nem bilong em Midori.

¹⁶ Papa bilong Midori em i no wanpela Witnes, na oltaim em i save semim Midori long rot bilong skelim em wantaim ol narapela brata na susa bilong em na ol wanklas bilong em. Midori i tok: “Mi pilim olsem mi samting nating.” Tasol taim Midori i kamap bikpela, em i pilim amamas long em yet. Em i tok: “Mi save ritim Baibel long olgeta de bambai mi ken kisim bel isi na mi ken pilim olsem Jehova i laikim mi.” Na tu, em i putim ol mak i stret long em i ken winim, na em i beten askim God long helpim em long winim ol dispela mak. Dispela i mekim na Midori i amamas long pasin bilong em long lotuim Jehova.

17. (a) Yumi mas mekim wanem na bai tingting bilong yumi i “wok long kamap nupela”? (b) Wanem gutpela samting inap kamap long dispela?

¹⁷ Longpela haptaim i mas lus na bai yumi ken rausim ol tingting kranki yumi save gat long yumi yet. Olsem na Jehova i tokim yumi olsem: “Oltaim tingting bilong yupela i mas wok long kamap nupela.” (Efe. 4:23, 24) Bilong mekim olsem, yumi mas beten, stadi long Tok Bilong  God, na tingim tingim long bel ol tok yumi stadi long en. Yumi mas bihainim ol dispela tok na askim Jehova long strongim yu. Holi spirit bilong em bai helpim yumi long daunim laik bilong skelim yumi yet wantaim ol narapela. Na tu, Jehova bai helpim yumi long rausim pasin bilong bel nogut na pasin antap, na em bai helpim yumi long senis.

18. Olsem wanem tok bilong 2 Stori 6:29, 30 i ken strongim yu?

¹⁸ Ritim 2 Stori 6:29, 30. Jehova i save long ol tingting i stap long bel bilong yumi. Em i save tu long ol hatwok bilong yumi—yumi wok strong long sakim tingting bilong dispela graun na ol pasin kranki bilong yumi. Taim Jehova i lukim yumi wok strong tru long sakim ol dispela samting nogut, em i laikim yumi moa yet.

19. Jehova i yusim wanem tok piksa long soim laikim bilong em long yumi?

¹⁹ Bilong tok piksa long hau Jehova i laikim yumi, Em i yusim stori bilong pasin laikim namel long wanpela mama na bebi bilong em. (Ais. 49:15) Tingim stori bilong wanpela mama nem bilong em Rachel. Em i tok: “Pikinini meri bilong mi Stephanie i bon olsem primetsua bebi. Taim mi lukim em, em i liklik tru na i no gat strong. Tasol dokta i larim mi holim em olgeta de long fes mun em i stap long neseri. Dispela haptaim i helpim mitupela long pas gut tru. Nau em i gat 6-pela krismas, na em i luk liklik moa long ol narapela pikinini i gat wankain krismas. Tasol mi lavim em moa yet bikos em i wok strong tru long stap laip na em i bringim bikpela amamas long laip bilong mi!” Yumi ken belgut tru long save olsem Jehova i lavim yumi olsem, taim em i lukim yumi wok strong tru na givim bel olgeta long mekim wok bilong em!

20. Olsem wanpela wokman bilong Jehova, yu gat wanem risen long amamas?

²⁰ Yu wokman bilong Jehova na yu dia tumas long em namel long bikpela lain brata na i no gat wanpela i olsem yu. Jehova i no bringim yu i kam long em bikos yu gutpela moa winim ol narapela, nogat. Em i bringim yu i kam long em bikos em i lukim bel bilong yu na em i lukim olsem yu gat pasin daun na em isi long em i ken skulim yu na stretim yu. (Sng. 25:9) Yu ken save tru olsem Jehova i tingim tru gutpela wok bilong em yu mekim. Pasin bilong yu long sanap strong na holimpas bilip i soim olsem “bel bilong [yu] i stretpela na i gutpela.” (Luk 8:15) Olsem na wok yet long givim bes bilong yu long Jehova. Long dispela rot, i gat gutpela risen na yu ken “amamas long samting [yu] yet i mekim.”