1. ¿Andijtsïnisï Tata Diosï Jeoba no terukutantajki máteruecha jingoni?

TATA Diosï Jeoba tsitisïndi eska mámaru jásï ambe jauaka, ísï eska na xarharajka imeeri kueraakata jimbo, astachi kʼuiripuecha táchani jarhaska. Nóksï jarhasti tsimani kʼuiripuecha engaksï májkueni járhatika, ísï jimbojtsïnisï Tata Diosï Jeoba no méni terukutantajti máteruecha jingoni. Ima exesïndi ambe enga mintsitarhu jaka ka na engachi járhatika incharinisï (1 Sam. 16:7). Ístu exesïndi ambe engachi újka úni, ambe engachi no újka úni ka na engachi tʼarhexeka. Ka nójtsïni kurhachisïndi sánderu ambe ka eskachi xáni uaaka úni. Jatsiskachi para májkueni úni eska ima ka ísï exekuarhini eskajtsïni ima na exejka. Engachi ísï úska, xarhatanchi jauaka eskachi “kaxumbikua” jingoni eratsesïnga ka nóchi jámaaka eratseni eskachi sánderu kʼéri ambeeska o eskachi menusiska (Rom. 12:3).

2. ¿Andisï no sési jaki eskachi terukukuarhintaaka máteruecha jingoni?

² No no sési jarhasti exeni na enga sési aianhpijka erachi ma (Ebr. 13:7). Inde ambejtsïni uaati jarhuatani parachi sánderu ambakiti jorhentpiricheni (Filip. 3:17). Joperu no májkuenisti ambakiti ejempluni exeni nemeerini para ma ísï úni ka eska exeni sinchi sánderu sési úxaki ambe ma eska ima o sánderu no sési. Engachi jámaska terukukuarhintani máteruecha jingoni, uaakachi enbidia pʼikuarherani, chkétakuarhini o astachi ísï pʼikuarherani eskachi no ma ambe jukaparhakueska. Ka eskachi na exekia máteru jorhenguarhikuarhu, andaperani jámani kúnguarhikuarhu anapu erachicha jingoni uaati úni eskachi nóteru sési pájperaakia Tata Diosï Jeoba jingoni. Ísï jimbojtsïnisï ima xénchperakua jingoni arhijti: “Eska mándani arini exeaka ambe enga imajkumindu újka, ka ísï jatsiati ambe enga jimbo uaaka imajkumindu tsípini jarhani, ka no terukukuarhintaparini máteru nema jingoni” (Gal. 6:4, TNM).

3. ¿Ambe ka ambejtsï sánderu sési úxakia engajtsï marhuakuni jaka Tata Diosï Jeobani ka engajtsï jimbo sési pʼikuarherajka?

³ Tata Diosï Jeoba uékasïndi eskachi sési pʼikuarheraaka, imani ambe jimbo engachi úkia parachi sánderu sési kómarhini. Pori  ejemplu, engachi itsï atakuarhikia uaakachi sési pʼikuarherani jimbokachi úskia ísï úni. Juchachi erakuspka ísï úni jimbokachi xénchasïnga Tata Diosï Jeobani. Ju je eratsentani ambe ka ambe engachi sánderu sési úkia desde jiáni uératini. Pori ejemplu, jamberichi iásï sánderu tsitijkia arhintani ka jorhenguarhini Bibliani, o jamberichi sánderu mintsita jingoni kómarhijkia Tata Diosïni (Sal. 141:2). Jamberichi sánderu újki ueenani uandontskuarheni kʼuiripuechani jingoni ka úraani juchaari erramientechani aianhpikuarhu. Ka jamberijtsïni Tata Diosï Jeoba jarhuataati parachi sánderu ambakiti uámba máeni, témba máeni o taaticheni. Uaakachi sési pʼikuarherani jimbokachi úskia sánderu sési úni indeni ambe.

4. ¿Ambechi exea ini jorhenguarhikua jimbo?

⁴ Uaakachi jarhuataani máteruechani parakaksï imeechajtu sési pʼikuarheraaka imani ambe jingoni engaksï úni jaka para Tata Diosï Jeobani marhuakuni ka eskaksï no terukukuarhintaaka máteruecha jingoni. Ini jorhenguarhikua jimbo, exeakachi na engaksï taaticha uaaka jarhuataani uájpeechani, na engaksï temungurhiricha uaaka jarhuajperani ka na engaksï orhejtsïkuticha ka iámindu kúnguarhikuarhu anapuecha uaaka jarhuataani imeecheri erachichani. Ka últimu, exeakachi máru Biblieri karakatechani engajtsïni jarhuataaka exeni ambe ka ambechi uaa úni parachi Tata Diosïni marhuakuni.

5. Eska na arhijka Efesu 6:4, ¿ambeksï no jatsiski para úni taaticha?

⁵ Taatichaksï no jatsisti para terukutantaani uájpeechani ni kurhakuani ambe ma engaksï no uaaka úni. I ambe no sési jarhasti ka no sési pʼikuastasïndi sapiichani (arhinta je Efesu 6:4). Pirenchi ma enga arhinhajka Sachiko, * uandasïndi: “Eskuelarhu anapu jorhentpirichaksï erokuarhisïreendi eskani ji sánderu ambakiti kalifikasionichani jatsiapiringa ka eska máteruecha. Ístu, mama uékasïreendi eskani ambakiti jorhenguarhiri máepiringa paraka juchiiti maestruecha ka juchiiti Taati enga no Testigueka sési ambe uandapiringa Tata Diosïri ambe. Asta uékasïreendi eska engani eksaminichani uántaapiringa no ma errori jatsipiringa, joperu inde ambe no úpirindi ísï úkuarhini. Nájkiruka iónikia engani uéntaka eskuela, útasïni ménichani ísï eratsesïnga eska Tata Diosï Jeoba no jaiapanhentasïnga ambe engani újka, nájkirukani kánikua jánguarhintaaka”.

6. ¿Ambeksï uaa jorhenguarhini taaticha Salmo 131:1, 2 jingoni?

⁶ Salmo 131:1, 2 (arhinta je) ambakiti ambe jorhendaasïndi taatichani. Rei Dabidi uandaspti: “No uékasïnga kʼéri ambe jirinhani ni imani ambe engani no uaaka úni”. Jimboka Dabidi  kaxumbitispka, inde ambe úspti eska sési pʼikuarherapiringa. I ambe jorhendaasïndi taatichani eskaksï uaaka kaxumbitini ka eskaksï no jámaaka sánderu ambe erokuarhini imeecheri ka uájpeecheri ambe. Engaksï metechani jatsikukuauaka uájpeechani, jatsistiksï para exeni, ambeksï úsïni úni ka ambe nómbe parakaksï uájpeecha uaaka ísï úni. Pirenchi ma enga Marina arhinhajka, miásïndi: “Mamarini no méni terukutantaspti juchiiti tanimu ermanuecha jingoni ni máteru sapiicha jingoni. Jorhendastirini eskachi no iáminduecha úsïnga májkueni ambe úni ka eskajtsïni Tata Diosï Jeoba iáminduechani jukaparharasïnga. Ísï jimbo, ji no káni jámasïnga máteruecha jingoni terukukuarhintani”.

7, 8. ¿Néna uaa acheeti sési kámani ka janhanharhini témbani?

⁷ Acheeticha engaksï kristianueka jatsistiksï para sési kaani ka janhanharhiani témbechani (1 Ped. 3:7). ¿Nénaksï uaa ísï úni? Engaksï xarhatakuaska eskaksï jukaparharaasïnga, engaksï no kurhakuaska sánderu ambe ka eska xántku imeecha uaaka úni ka ístu engaksï no terukutaantaska máteru uarhiiticha jingoni. ¿Andisï no sési japirini ísï úni? Ju je exeni ambe enga nitamakuarhika pirenchi ma enga Rosa arhinhajka. Imeeri uámba enga no Testigueka pʼindesti terukutantani máteru uarhiiticha jingoni. No sési pʼikuastasïndi Rosani ambe enga uámba arhijka, peru ístu i ambe ústi eska Rosa iásï nóteru seguru jauakia eska nema meru xénchasïnga. Ima uandasïndi: “Uétarhinchasïnga eskajtsïni miátantani jauaka eskarini Tata Diosï Jeoba jukaparharasïnga”. Joperu ima acheeticha engaksï kristianueka, sésiksï kaasïndi témbechani jimbokaksï míteska eskaksï ísï uaaka sési pájperani tsimarhani ka ístu Tata Diosï Jeoba jingoni. *

⁸ Acheeticha engaksï sési kaajka témbechani, sési ambeksï uandasïndi imeecheri ambe, arhiasïndiksï eskaksï xénchaasïnga ka felisitariuasïndiksï (Prov. 31:28). Indeni ambesï úpti Katarineri uámba engachi máteru jorhenguarhikua jimbo exeka para jarhuatani exeni eska ima kánikua jukaparhakueska. Enga Katarina sapichuepka, imeeri amamba no káni sési arhisïrendi ka uánikua xanhari terukutantani jarhasïreendi máteru nanaka sapirhaticha jingoni, asta imeeri amiguecha jingoni. Ísï jimbo, Katarina ueenaspti terukukuarhintani máteruechani jingoni asta jiáni jamberi enga mítepkia jurhimbikuani. Joperu uámba jarhuataspti paraka nóteru ísï pʼikuarherapiringia ka paraka sési eratsepiringa imeeri ambe. Katarina uandasïndi: “Juchiiti acheetirini xénchasïndi ka felisitarisïndireni imani ambakiti ambe jimbo engani újka ka kómarhijpichisïndirini. Ístureni miátantasïndi na enga xáni sési kámpijka Tata Diosï Jeoba ka jarhuatasïndirini parani no eratseni imani ambe engareni no sési pʼikuastajka”.

9, 10. ¿Nénaksï jarhuataspi orhejtsïkuticha pirenchini ma enga terukukuarhintani jámeenga?

⁹ ¿Nénaksï úsïni jarhuataani orhejtsïkuticha imeechani engaksï terukukuarhintani jarhajka máteruecha jingoni? Ju je exeni ambe enga nitamakuarhipka pirenchi ma enga Hanuni arhinhajka, enga ima sapichuepka no méni arhinhaspti eska sési ambe úsïreenga. Ima uandantasïndi: “Ji no káni uandarispka ka ísï pʼikuarherasïreenga eskaksï máteru sapiicha sánderu sési úsïreenga ambe ma eska ji. Engani ji miájka, méntkisï terukukuarhintani jarhasïreenga máteruecha jingoni”. Asta jiáni enga na Testiguepkia, Hanuni seguirini jarhasïreendi terukukuarhintani máteruecha jingoni ka i ambe ísï pʼikuastasïreendi enajki no ma ambe jimbo jarhuajpeni japi kúnguarhikuarhu. Joperu iásï prekursora máestia enga tsípikua jingoni jámajka. ¿Ambe jarhuataspi mójtakukuarhini?

¹⁰ Hanuni uandasïndi eskaksï orhejtsïkuticha xénchperakua jingoni jarhuataspka. Imeechaksï arhispti eskaksï mintsikasïreenga ka felisitarisptiksï imeeri ambakiti ejemplu jimbo. Hanuni  uandantasïndi: “Ménichani, orhejtsïkutichajtsïni kurhachispti eskani uinhaperaantapiringa pirenchichani máru engaksï uétarhinchani japka. Inde amberini ísï pʼikuastaspti enajkirini kúnguarhikua meru uétarhincheni. Miásïnga eskajtsïni orhejtsïkuticha sési arhiparini agradeserichispka engani uinhaperaantapka máteru pirenchichani engaksï sánderu sapirhatika ka tátsekuajtsïni arhichintaspti 1 Tesalonika 1:2, 3. Inde amberini mintsitarhu niárachespti. Indeni ambe jimbo engaksï úpka i xáni ambakiti orhejtsïkuticha, iásï míteskia eskani jukaparhakueska Tata Diosï Jeobaeri kúnguarhikuarhu”.

11. ¿Nénachi uaa jarhuataani imeechani engaksï “kánikua kómu pʼikuarherani jaka” enga Isaías 57:15 jimbo arhijka?

¹¹ (Arhinta je Isaías 57:15). Tata Diosï Jeoba kánikua uandanhiasïndi imeechani jimbo engaksï “kánikua kómu pʼikuarherani jaka”. Iáminduecha ka no solu orhejtsïkuticha uaakachi uinhaperantaani juchaari erachichani engaksï ísï pʼikuarherani jaka. Uaakachi mintsita jingoni xarhatakuani eskachi pendienti pásïnga imeechani jimbo. Tata Diosï Jeoba uékasïndi eskachi xarhatakuauaka eska ima xénchaasïnga imeeri karichichani (Prov. 19:17). Ístuchi uaaka jarhuataani engachi jucha kaxumbitiska ka no kʼéramakuarhini imani ambe jimbo engachi újka úni parakaksï máteruecha no jámaaka enbidia pʼikuarherani. Sánderu sési, úraakachi imani ambe engachi jorhenaka ka imani ambe engachi xáni míteka parachi uinhaperperantani (1 Ped. 4:10, 11).

12. ¿Andiksïsï sési pʼikuarhereni Jesúsi jingoni jarhani ima kʼuiripuecha engaksï kaxumbitipka? (Exe je dibujuni enga ueenakuarhu jaka i rebisteri).

¹² Uaakachi jorhenguarhini néna káni máteruechani engachi exeska na enga Jesúsi kaapka imeeri chúxapatichani. Nájkiruka ima sánderu kʼéri ambeepka ima ‘kaxumbitispti ka no teparakuarhisïreendi’ (Mat. 11:28-30). No uandaparini jámani jarhasïreendi na enga xáni jánhastiipka ka na enga xáni uánikua ambe mítepka. Enga jorhentpienga, imani uandakuechani úraasïreendi enga kʼuiripu kurhanguauenga ka imani ejempluechani enga mintsitarhu niárakuauenga imani kʼuiripuechani engaksï kaxumbitipka (Luk. 10:21). No ísïispti eska relijioniri orhejtsïkuticha engaksï kánikua kʼéramakuarhienga, sánderu sési, Jesúsi ísï pʼikuastaspti kʼuiripuechani eskaksï kánikua jukaparhakuespka para Tata Diosï (Juanu 6:37). Méntkisï janhanharhikua jingoni kaaspti iámindu kʼuiripuechani.

13. ¿Andichisï uandajki eska Jesúsi xénchaasïreenga ka sési káni imeeri chúxapatichani?

¹³ Jesúsi sési kaaspti imeeri chúxapatichani ka xénchaasïreendi. Mítespti eskaksï no iáminduecha májkueni ambe jorhenhaspka úni ka eskaksï táchani jásï ambe nitamakuarhixapka, ísï jimbo, nóksï úpirindi májkueni járhati ánchikuarhitechani intsïnhaani nijtuksï úni xáni aianhpini. Joperu, Jesúsi jukaparharaasïreendi jimbokaksï mándani arhini mintsita jingoni jánguarhintasïreenga. Ka xarhataspti i ambe jiáni enga talentuecheri ejempluni uandapka. Ini ejemplu jimbo, patroniri ma uandaspti enga ánchikuarhita íntsaapka imeeri jántspirichani seguni na eskaksï xáni úpiringa úni. Ísïisti, nájkirukaksï ima tsimani jántspiricha úpka imeecheri ánchikuarhitani, ma sánderu andaspti eska máteru. Joperu, patroni felisitariuaspti ini mismu uandakuecha jingoni tsimarhani: “Sési jarhasti, ambakiti jántspiriskari ka mintsinharhikuendi” (Mat. 25:14-23).

14. ¿Nénachi uaa májkueni kámpini eska Jesúsi?

¹⁴ Ístujtsïni Jesúsi xénchasïndi ka sésijtsïni kámani. Mítesti eskachi no iáminduecha májkueni ambe jorhenhaska ka eskachi táchani jásï ambe nitamakuarhixaka ka kánikua tsípisïndi engachi mándani arhini jánguarhintajka na engachi xáni uaaka para marhuakuni Tata Diosïni. ¿Nénachi uaa májkueni úni eska ima? Nóchi uékasïnga eskaksï juchaari erachicha menusi pʼikuarheraaka o kʼuratseni jimbokaksï no úsïnga xáni úni eska máteruecha. Sánderu sési, ju je exeni néna engachi uaaka felisitariuani erachichani jimbokaksï jánguarhintaxaka marhuakuni Tata Diosï Jeobani xáni eskaksï xáni uaaka.

15, 16. ¿Néna jarhuataspi pirenchini ma imani ambe úni enga úpiringa ísï úni?

¹⁵ Engachi eratseaka ambe ka ambechi uaa úni parachi marhuakuni Tata Diosï Jeobani, jarhuataatijtsïni parachi sési pʼikuarherani ka sési eratsetini jarhani ambe engachi uéjka úni juchaari tsípikua jingoni. Joperuchi jatsiska para imani ambe erakuni úni ambe engachi jucha uaaka úni ka seguni ambe engachi nitamakuarhini jauaka ka no ambe engaksï máteruecha újka úni. Jimboka engachi no ísï úska, nóchi sési pʼikuarheraaka ka chkétakuarhiakachi (Luk. 14:28). Ju je exeni prekursoraeri ejemplu ma enga Midori arhinhajka.

¹⁶ Enga Midori nanaka sapichu máepka, taati jémba enga no Testigueka kánikua no sési kámasïreendi, terukutantasïreendi ermanu jémbeecha ka eskuelarhu anapu kompanieruecha jingoni. Ima uandantasïndi: “Ísï pʼikuarherasïreenga enajkini no ma ambe jukaparhakuepi”. Joperu máru uéxurhini tátsekua sánderu sési pʼikuarherantasptia. Midori uandantasïndi: “Pauani pauani arhintasïreenga Bibliani, jimboka engani ísï ueenga sési pʼikuarherasïreenga ka úsïreenga eskani pʼikuarherapiringa na engareni xáni xénchajka Tata Diosï Jeoba”. Ístu, erakuspti imani ambe úni enga úpiringa, para marhuakuni Tata Diosïni Jeobani ka kurhakuspti eska jarhuatapiringa ísï úni. Enga ísï úpka, tsípispti imani ambe úni enga úpiringa para Tata Diosï Jeobani marhuakuni.

17. ¿Nénaksï uaa kristianuecha seguirini jimbanherantaani imeecheri eratsekuechani, ka néna jarhuataua inde ambe?

¹⁷ Ma ióndasïndi para nóteru no sési exekuarhinia. Jimbojtsïnisï Tata Diosï Jeoba arhijti eskachi seguirini jauaka jimbanheraantani juchaari eratsekuechani (Efes. 4:23, 24). Parachi úni indeni ambe, jatsiskachi para kómarhikua úni, jorhenguarhini ka eratsentani Tata Diosïri Karakatani. Ju je méntkisï úni ini ambe ka kurhakuni Tata Diosï Jeobani eskajtsïni uinhapikua íntskuaka.  Ka imeeri espiritu santujtsïni jarhuataati parachi no jámani terukukuarhintani máteruecha jingoni. Ístujtsïni jarhuataati parachi exekuarhini sinchi kʼéramakuarhixaki ochi enbidia pʼikuarherani ka parachi jirejiresï úni ambe ma parachi no ísï eratseni.

18. ¿Nénaksïni sési pʼikuastantasïni chánksïni ambe enga arhijka 2 Crónicas 6:29, 30?

¹⁸ (Arhinta je 2 Crónicas 6:29, 30). Tata Diosï Jeoba sési mítesti juchaari mintsitani. Ístu mítesti eskachi jánguarhintaxaka parachi no ísï jámani eska parhakpini anapuecha ka parachi no úni ambe engachi pekadu jimbo újka. Enga exejka na engachi xáni jánguarhintani jarhajka parachi no indeni ambe úni, sánderujtsïni kánikua xénchasïndi.

19. ¿Náki ejempluni úrasïni Tata Diosï Jeoba parajtsïni xarhatacheni na enga pʼikuarherajka juchantsïni jimbo?

¹⁹ Para Tata Diosï Jeoba xarhatani ambe enga pʼikuarherajka juchantsïni jimbo, amamberi ejemplu ma úrasïndi enga kánikua xénchajka imeeri charhakuni (Is. 49:15). Rachel enga sapini ma kánguarhijka uandasïndi: “Juchiiti nanaka sapichu Stephanie antesi andajpenuspti. Primeru xanhari engani exepka kánikua sapichituespti... ma mesi enkubadorarhu jarhaspti, joperureni doktori jurajkuspti parani ji pauani pauani kamanharhini. Inde ambe úspti eska juchiiti charhaku ka ji, kánikuachi xénchperapiringa. Iásï Stephanie seisi uéxurhini jatiristia. Ka nájkiruka sánderu sapichitueka eska máteruecha engaksï májkueni jatiriika, ji iámu juchiiti mintsita jingoni xénchasïnga, jimboka kánikua jánguarhintaska para úni irekani ka inde amberini kánikua sési pʼikuastasïndi”. Ka Tata Diosï Jeobajtujtsïni ísï xáni xénchasïndi enga exejka eskachi kánikua jánguarhintani jarhasïnga parachi sési marhuakuni. ¿A no eska inde ambe míteni kánikuajtsïni sési pʼikuastantajka?

20. ¿Andichisï uaa tsípini?

²⁰ Iáminduechachi kánikua jukaparhakueska Tata Diosï Jeobaeri familiarhu ka no jarhasti máteru enga májkuenika eska jucha. Tata Diosï Jeobajtsïni no erakusti jimbokachi jucha sánderu sési úsïnga ambe ma eska máteruecha. Sánderu sési, ima exesti eska juchaari mintsita kaxumbitiska ka eskachi jurajkutakuarhisïnga parajtsïni jorhendani ka mójtakuni (Sal. 25:9). Uaakachi seguru jarhani eska ima kánikua tsípisïnga engachi jánguarhintajka xáni eskachi xáni uaaka para marhuakuni. Ístu, engachi tekaantajka ka no jurajkuni, xarhatanchi jarhasïnga eskachi “ambakiti mintsita” ma jataska (Luk. 8:15). Ísï jimbo, ju je seguirini sánderu ambakiti ambe íntskuni juchaari ambe. Engachi ísï úska, tsípinchi jauaka imani ambe jimbo engachi jucha úka úni.