1. Habwaki Yahwe tatulengesaniza n’abantu abandi?

YAHWE agonza ebintu ebirukwahukana. Kinu nikyeyoleka kurungi omu bintu ebirukuhuniriza ebiyahangire, otwaliiremu n’abantu. Buli muntu w’embaganiza. Nahabweki Yahwe tasobora kukulengesaniza n’abantu abandi. Ayekebiija omutima gwawe kandi ogu nuwe omuntu wawe ow’omunda. (1 Sam. 16:7) Amanyire ebintu eby’osobora kukora kurungi, eby’otasobora kukora, n’omulingo wakuziibwemu. Kandi tasobora kukusaba kukora ebintu eby’otarukusobora. Tusemeriire kwegera ha kyokurorraho kya Yahwe eky’okwerora omulingo uwe aturoramu. Hanyuma nitwija kuba n’entekereza enungi hatali kwetekerezaaho muno ekihinguraine rundi kwetekerezaaho bike.​—Bar. 12:3.

2. Habwaki kitali kirungi kwerengesaniza n’abantu abandi?

² Nitusobora kwegera ha byokurorraho ebirungi eby’abantu abandi. Ekyokurorraho, nihasobora kuba haroho ow’oruganda rundi munyaanya itwe anyakuli omutebezi omurungi muno. (Baheb. 13:7) Nitusobora kuserra emiringo tusobora kumwegeraho nukwo tusobole kusemezaamu obuheereza bwaitu. (Baf. 3:17) Baitu haroho embaganiza hagati y’okwegera ha kyokurorraho ekirungi eky’omuntu, n’okukikozesa kwerengesaniza na uwe. Kakuba twerengesaniza n’abantu abandi, nitusobora kukwatwa ihali, kuhwamu amaani, rundi kwehurra nk’abataine mugaso. Nk’oku twayegere omu kicweka ekyahoire, kakuba twoleka ngu nitukira abandi omu kitebe, nikisobora kusiisa enkoragana yaitu na Yahwe. Nahabweki omu mulingo ogw’okugonza, Yahwe natutererra ati: “Omuntu wena ayerengere omulimogwe wenka, kandi nukwo abe nokwenyumizakwe habwe wenka, kunu tihali habwondi.”​—Bag. 6:4.

3. Mpindahinduka ki ez’okozere ezikuletera kusemererwa?

 ³ Yahwe n’agonza osemererwe habw’okukurakurana kwawe omu by’omwoyo. Ekyokurorraho, kakuba obatizibwa, osemeriire kusemererwa habw’okuhika ha kigendererwa kyawe! Okakora encwamu ey’okubatizibwa habwawe. Kandi encwamu egi okagikora habw’okugonza okwoiniire Ruhanga. Tekerezaaho okukurakurana okw’okozere kuruga obatizibwa. Ekyokurorraho, oyeyongiire kugonza kusoma n’okwesomesa Baibuli? Esaara zaawe zeyongiire kufooka z’amakuru? (Zab. 141:2) Oyongiire ha bukugu bwawe obw’okubaza n’abantu omu mulimo ogw’okutebeza hamu n’okukozesa ebikwato byaitu ebitukozesa omu buheereza? Kandi obworaaba oine eka, Yahwe akukonyire kwongera kuba nyineeka, nyinabwenge, rundi omuzaire omurungi? N’osobora kusemererwa habw’empindahinduka zinu zoona ez’okozere.

4. Biki ebiturukwija kubazaaho omu kicweka kinu?

⁴ Nitusobora kukonyera abantu abandi kusemerererwa omu kukurakurana kwabo omu by’omwoyo. Nitusobora n’okubakonyera kuleka kwerengesaniza n’abantu abandi. Omu kicweka kinu, nitwija kurora omulingo abazaire basobora kukonyeramu abaana baabo, abali omu buswere basobora kukonyerangana, kandi n’omulingo abagurusi hamu n’abandi basobora kukonyeramu Abakristaayo bagenzi baabo. Ha kumalirra, nitwija kubazaaho ebyahandiikirwe ebimu ebisobora kutukonyera kweteraho ebigendererwa ebitusobora kuhikaho.

5. Kusigikirra ha Abefeso 6:4, kiki abazaire ekibasemeriire kwerinda?

⁵ Abazaire basemeriire kwegendereza kulengesaniza omwana omu, n’omwana ondi rundi kumunihirramu kukora ekintu ekyatarukusobora. Abazaire kakuba bakora kinu nibasobora kumumaramu amaani. (Soma Abefeso 6:4.) Munyaanya itwe Sachiko * nagamba ati: “Abeegesa bange banihirramuga kukora kurungi ha isomero kukira abeegi bagenzi bange. Kwongerraho, nyina nyowe na uwe akaba n’agonza nkole kurungi ha isomero nukwo abeegesa bange hamu na ise nyowe, ow’akaba atali omu h’Abakaiso ba Yahwe babe n’entekereza ehikire h’abantu ba Yahwe. Nyina nyowe akaba n’agonza ntunge kikumi ha kikumi omu birengeso byange, kandi eki kikaba nikingumira. N’obukiraaba ngu nkamara kusoma, obwire obumu nyehurra ngu ebindukukorra Yahwe tibirukumara.”

6. Kiki abazaire ekibasobora kwega kuruga omu Zabuli 131:1, 2?

 ⁶ Isomo erikuru hali abazaire nirisangwa omu Zabuli 131:1, 2. (Soma.) Omukama Daudi akagamba ngu akaba ‘atarukugendera omu bigambo ebikuru’ rundi kukora ebintu ebikaba bimukizire. Habwokuba akaba ali mwebundaazi, akaba aine okumwarwa hamu n’obusinge. Kiki abazaire ekibasobora kwegera omu bigambo bya Daudi? Abazaire kusobora kuba abebundaazi, tibasemeriire kwenihirramu bingi rundi kunihira bingi omu baana baabo. Abazaire nibasobora kukonyera omwana wabo kwehurra ngu w’omugaso kurabira omu kwetegereza ebintu eby’asobora kukora kurungi hamu n’ebi ebyatarukusobora, kandi hanyuma bamutereho ebigendererwa eby’asobora kuhikaho. Munyaanya itwe arukwetwa Marina n’agamba ati: “Nyina nyowe takandengesanizaaga n’abagenzi bange basatu rundi abaana abandi. Akanyegesa ngu buli muntu wena aine ebisembo ebirukwahukana kandi buli omu w’omuhendo hali Yahwe. Habwokuba akanyegesa eki, tinkira kwerengesaniza n’abandi.”

7-8. Ninyeeka n’asobora ata kuteekamu mukazi we ekitiinisa?

⁷ Nyineeka Omukristaayo asemeriire kuteekamu mukazi we ekitiinisa. (1 Pet. 3:7) Ekyokurorraho, nyineeka ayoleka ngu n’ateekamu mukazi we ekitiinisa kurabira omu kumwoleka ngu w’omuhendo muno hali uwe. Tamusaba kukora ebintu ebihinguraine ebyatasobora kukora. Kandi tamulengesaniza n’abakazi abandi. Omukazi n’asobora kwehurra ata kakuba iba akora ekintu nk’eki? Iba munyaanya itwe Rosa ow’atali omu h’Abakaiso ba Yahwe akira kumulengesaniza n’abakazi abandi. Ebigambo bye ebitali by’embabazi biretiire Rosa kwehurra kubi n’okuteekereza ngu busaho omuntu wena arukumugonza. Rosa n’agamba ati: “Mpurra ninyetaaga kwikara ninyijukibwa ngu Yahwe nantwara nk’omuntu w’omuhendo.” Kwahukanaho iba munyaanya itwe ogu, nyineeka Omukristaayo ateekamu mukazi we ekitiinisa. Akimanyire ngu kakuba akora eki nikiija kumuletera kuba n’enkoragana enungi na mukazi we hamu na Yahwe. *

⁸ Nyineeka ow’ateekamu mukazi we ekitiinisa amuhaisaniza, amugumya ngu n’amugonza, kandi amusiima. (Nfu. 31:28, 29) Ogu nugwo omulingo iba Katerina outwabalizeeho omu kicweka ekyahoire ya mukonyire obuyayehuliire ngu abandi nibamukira. Katerina obwakaba akyali muto, nyina yakiraga kumumaramu amaani kandi yamulengesanizaaga n’abaisiki abandi otwaliiremu na banywani be. Nahabweki, Katerina akatandika kwerengesaniza n’abandi kandi akagumizaamu n’akikora na hanyuma y’okufooka omu h’Abakaiso ba Yahwe. Baitu iba anyakuli Mukristaayo amukonyire kuleka kukora ekintu eki kandi amukonyire kwetekerezaaho omu mulingo oguhikire. Nagamba ati: “Iba nyowe n’agonza, ansiima habw’ebintu ebirungi ebinkora kandi ansabira. Ekindi, anyijukya emiringo ya Yahwe enungi kandi ankonyera kweyihamu entekereza embi.”

9-10. Abagurusi b’ekitebe abarukufaayo bakakonyera bata munyaanya itwe kuleka engeso ey’okwerengesaniza n’abantu abandi?

⁹ Abagurusi b’ekitebe nibasobora bata kukonyera abo abaine engeso ey’okwerengesaniza n’abandi? Tekerezaaho ekyokurorraho kya munyaanya itwe Hanuni. Obwakaba akyali mwana muto tibakiraga kumusiima. Nagamba ati: “Nkaba nyine ensoni kandi nateekerezaaga ngu abaana abandi bagezi kunkira. Nkatandika kwerengesaniza n’abandi kurugira kimu omu buto.” N’obuyaizire omu mananu, Hanuni akagumizaamu nayerengesaniza n’abantu abandi.  Nahabweki, yayehurraga ngu ebiyakoraga omu kitebe bikaba bitali by’omugaso. Baitu hati n’aheereza nka payoniya asemeriirwe. Kiki ekyamukonyire kuhindura entekereza ye?

¹⁰ Hanuni nagamba ngu akakonyerwa abagurusi b’ekitebe ab’embabazi. Bakamugambira ngu w’omugaso omu kitebe kandi bamusiima habw’ekyokurorraho kye ekirungi eky’obwesigwa. Akahandiika ati: “Obwire obumu, abagurusi b’ekitebe bansabaga kugarramu amaani banyaanya itwe abamu ababaga nibetaaga obukonyezi. Obujunanizibwa bunu bukandetera kwehurra ngu ninyetaagwa. Ninyijuka abagurusi abarukufaayo obubansiimire habw’okugarramu amaani banyaanya itwe abamu abato. Hanyuma bakansomera 1 Abasesalonika 1:2, 3. Eki kikansemeza muno! Habw’abagurusi abo ab’okugonza, hati nkimanyire ngu ndi w’omugaso muno omu kitebe.”

11. Nitusobora tuta kukonyera “abomutima ogucwekere,” nk’oku kyolekerwe omu Zabuli 34:18?

¹¹ Soma Zabuli 34:18. Yahwe afaaho muno “abomutima ogucwekere.” Itwena, nitusobora kugarramu abandi omu kitebe amaani hatali abagurusi b’ekitebe bonka. Gumu ha miringo tusobora kubagarramu amaani nukwo kubooleka ngu nitubafaaho muno. Yahwe n’agonza tubooleke omulingo arukubagonzaamu. (Nfu. 19:17) Kandi nitusobora kukonyera ab’oruganda na banyaanya itwe kakuba twikara tuli bebundaazi kandi tukaleka kwehaisaniza hab’ebintu ebitusobora kukora. Titurukugonza kuletera abantu kututekaho omutima, habwokuba eki nikisobora kubaletera kukwatwa ihali. Oihireho nitugonza byona ebiturabaza n’ebiturakorra Abakristaayo bagenzi baitu bibagarremu amaani.​—1 Pet. 4:10, 11.

12. Habwaki abantu aba hansi bagonzaaga kuba na Yesu? (Rora ekisisani ekya ha kyesweko.)

¹² Omulingo Yesu yatwaizeemu abahondezi be nigutukonyera kwega nk’oku tusemeriire kutwazaamu abandi. Nuwe omusaija ow’amaani akukirayo ayabaireho omu nsi. Baitu nabwo akaba ali “mwebundaazi kandi muculeezi omu mutima.” (Mat. 11:28-30, NW) Atehaisanize ngu akaba aine amagezi maingi kandi ngu akaba amanyire ebintu bingi. Akeegesa n’akozesa ebigambo n’ebyokurorraho ebyanguhire kwetegereza kandi ebyakwasire ha mitima y’abaculeezi. (Luk. 10:21) Yesu akaba atali nk’abebembezi b’amadiini ab’emyehembo. Yakiraga kuletera abantu abandi kwehurra ngu b’omuhendo muno hali Ruhanga. (Yoh. 6:37) Abantu aba hansi akabatekamu ekitiinisa.

13. Yesu akooleka ata embabazi hamu n’okugonza kusigikirra ha mulingo yatwaizeemu abegeswa be?

¹³ Embabazi hamu n’engonzi za Yesu bikeyoleka ha mulingo yatwaizeemu abegeswa be. Akaba akimanyire ngu baine obusobozi obutarukusisana hamu n’enyikara ezirukwahukana. Nahabweki, boona bakaba batasobora kukora ebintu nibyo bimu rundi kukora omulimo ogurukwingana omu buheereza. Baitu buli omu akamusiima habw’obwekambi bwe. Kinu Yesu akakyoleka kurabira omu ruganikyo rwe orurukukwata ha taranta. Omu ruganikyo oru, mukama w’abairu akaha buli mwiru omulimo nasigikirra ha ‘busobozibwe okubukaba buli.’ Omu h’abairu babiri omwekambi akatunga nyingi muno kukira ondi. Baitu boona babiri mukama wabo akabasiima n’akozesa ebigambo nibyo bimu: “Okozire, iwe omuiru rubale omurungi, owokwesiga!”​—Mat. 25:14-23.

14. Nitusobora tuta kwegera ha mulingo Yesu yatwaizeemu abantu abandi?

¹⁴ Yesu atutwaza omu mulingo ogw’embabazi kandi ogw’okugonza. Akimanyire nk’oku twine obusobozi hamu n’enyikara ezirukwahukana, kandi kimusemeza obutwekamba nk’oku turukusobora. Tusemeriire kwegera ha kyokurorraho kya Yesu. Tutaliretera ow’oruganda rundi munyaanya itwe kwehurra taine omugaso rundi kukwatwa ensoni ngu habwokuba ebyarukukora tibirukwingana n’eby’abandi. Oihireho,  leka tuserre buli kagisa koona kandi tukakozese kusiima ab’oruganda na banyaanya itwe habw’okwekamba kwabo kuheereza Yahwe.

15-16. Munyaanya itwe akagasirwa ata habw’okweteraho ebigendererwa eby’asobora kuhikaho?

¹⁵ Ebigendererwa eby’omwoyo bitukonyera kumanya eky’okukora omu bwomeezi bwaitu hamu n’okuba n’ekigendererwa. Baitu tusemeriire kweteraho ebigendererwa nitusigikirra ha busobozi n’enyikara yaitu, hatali kweteraho ebigendererwa ebirukusisana n’eby’abandi. Kakuba tukikora, nitusobora kwehurra kubi kandi tukahwamu amaani. (Luk. 14:28) Tekerezaaho ekyokurorraho kya munyaanya itwe arukwetwa Midori kandi arukuheereza nka payoniya.

¹⁶ Ise owa Midori ow’atali omu h’Abakaiso ba Yahwe yamuswazaaga obw’akaba akyali muto, n’amulengesaniza n’abagenzi be abandi hamu n’abarukwega nabo ha isomero. Midori n’agamba ati: “Nkehurra nk’owataine mugaso.” Baitu obuyakuzire, akatandika kwehurra kurungi. Nagamba ati, “Nasomaga Baibuli buli kiro habwokuba yankonyeraga kuba n’obusinge omu mutima kandi nayehurraga ngu Yahwe nangonza.” Ekindi, aketeraho ebigendererwa ebyanguhire kuhikiriza kandi yasaba Yahwe amukonyere kubihikiiriza. Ekyarugiremu, Midori akasemererwa muno habw’okurora ngu akaba nakurakurana omu by’omwoyo.

17. Nitusobora tuta ‘kufooka abahyaka omu mutima ogw’ebitekerezo byaitu,’ kandi kiki ekirarugamu?

¹⁷ Entekereza hamu n’enyehurra embi nibisobora kutahwaho omu kiro kimu. Nahabweki Yahwe natutererra ‘kufooka abahyaka omu mutima ogw’ebitekerezo byaitu.’ (Bef. 4:23, 24) Kusobora kukora eki, tusemeriire kusaba, kwesomesa Ekigambo kya Ruhanga n’okukyecumitirizaaho. Ikara n’okora ebintu binu kandi  osabe Yahwe akuhe amaani. Omwoyo gwe ogurukwera nigwija kukukonyera kuleka engeso ey’okwerengesaniza n’abandi. Yahwe naija n’okukukonyera kumanya obw’oraaba ofookere ow’ihali rundi ow’emyehembo kandi akukonyera kukora empindahinduka bwangu.

18. Ebigambo ebirukusangwa omu 2 Ekyebyomubusinge 6:29, 30 nibisobora bita kukuhumuza?

¹⁸ Soma 2 Ekyebyomubusinge 6:29, 30. Yahwe amanyire ebiri omu mutima gwaitu. Kandi akimanyire nk’oku turukurwanisa omwoyo omubi ogw’ensi n’obutahikirra bwaitu. Yahwe obwarora omulingo twekamba kurwanisa ebintu binu, kimuletera kweyongera kutugonza.

19. Yahwe asoborra ata omulingo ayehurramu haliitwe?

¹⁹ Kukukonyera kwetegereza omulingo Yahwe ayehurramu haliitwe, akozesa ekyokurorraho eky’enkoragana enyakuli hagati y’omwana na nyina. (Is. 49:15) Tekerezaaho munyaanya itwe Rachel. Akahandiika ati: “Muhara wange Stephanie akazaarwa atakahikire. Obunabandize kumurora akaba ali mutaito muno kandi ataine maani. Baitu omu kwezi okw’okubanza, obwakaba akyali omu kyoma dakitaali akanyikiriza kumukiikira buli kiro. Omu kasumi ako, nyowe n’omwana wange tukeyongera kugonzangana. Hati aine emyaka mukaaga kandi mutaito kukira abaana abandi ab’emyaka ye. Nimugonza muno habwokuba akaruga hara muno kusobora kuba mwomeezi, kandi andetiire okusemererwa kwingi muno omu bwomeezi bwange!” Kituletera kusemererwa obutukimanya ngu Yahwe ayeyongera kutugonza muno obwarora nitwekamba kukora n’amaani gaitu goona!

20. Habwaki abaheereza ba Yahwe baine okusemererwa?

²⁰ Nk’omu h’abaheereza ba Yahwe, oli w’embaganiza kandi oli w’omuhendo omu ka ya Yahwe. Yahwe atakucunde kumwirra haihi ngu habwokuba n’okira abantu abandi. Akakucunda habwokuba akarora omu mutima gwawe kandi yarora nk’oku oli muntu omwebundaazi, ow’ayetegekere kumwegaho hamu n’okukora empindahinduka. (Zab. 25:9) Ikara okimanyire ngu Yahwe asiima obwoyekamba kukora kyona ekirukusoboka kumuheereza. Okugumiisiriza hamu n’obwesigwa bwawe nibyoleka ngu oine omutima ogusemiire kandi omurungi. (Luk. 8:15) Nahabweki gumizaamu noheereza Yahwe ekirukukirayo oburungi. Hanyuma noija kusobora kuba n’okusemererwa “[habwawe] wenka.”