1. Ngei Djehovha asikatiezanisi no anhu amweni?

DJEHOVHA unopfarira zviro zvakasiyana-siyana. Izvi zvinooneka pamhene pa zviro zvaakasika, kutobatanidzawo anhu. Umwe na umwe wedu aaezaniswi no umweni. Ngo muezaniso, Djehovha aatiezanisi no anhu amweni. Iyena unoongorora mwoyo wedu, zvatiri nge cemukati. (1Sa. 16:7) Iyena unoziyawo petakabambira, petakarembera uye mushobo wetakasikwa. Uye iyena aazotikumbiri kuti tiite zviro zvatisikakwanisi kuita. Isusuwo tinodikana kufundira kudziona hingana maonerhwe atinoizwa na Djehovha. Kana tikadaro “ticagara no murangariro wakanakana,” zvecida kureya kuti atizodzioni hingana tinokosha kana kuti hingana tisikabetseri kupinda amweni.—Aro. 12:3.

2. Ngei zvakashata kudziezanisa ne amweni?

² Azvizi kushata kusirira muezaniso dze anhu amweni. Ngo muezaniso, pamweni munoziya hama inobudirira mu basa rekuparidzira. (Ahe. 13:7) Uye izvona zvingamubetsera kuti mupete masimba ari ese mu basa rekuparidzira. (Afi. 3:17) Asi pano musiyano uripo pakati pekuteedzera muezaniso wakanaka we munhu no kudziezanisa no munhu. Munhu uno musambo we kudziezanisa no amweni ungakwanisa kugara no bibvu, kugara akatsukwara kana kutozwa hingana asikabetseri. Asi hingana zvatakaona mufundo yakadarika, kukwikwidzana ne amweni zvingakwanisa kukanda pa ngozi kunamata kedu. Ndiyo ndaa Djehovha no rudo rake unotibvunza kuti: “Umwe na umwe ngaaongorore zvaanoita, uye ucabva apfara nazvo iyena pacake, asikadziezanisi no munhu umweni.”—Aga. 6:4.

3. Matii api anoita kuti mupfare mu upenyu nge kubudirira kamaita?

³ Djehovha anoda kuti imwimwi mupfare nge kubudirira kenyu pakunamata. Ngo muezaniso, kana imwimwi makabhabhatidzwa, tinoti makorokoto! Ici cisananguro cemakaita imwimwi pacenyu. Uye cainga cakatsamira pa rudo renyu kuna Mwari. Rangarirai kubudirira  kamakaita kubva pemakabhabhatidzwa dakara zvino. Ngo muezaniso, munozwa kuti rudo renyu pakuerenga Bhaibheri uye pakuita fundo ye munhu ega zvatunhudzirika here? Munoona kuti minamato yenyu yaakubva pasi pe mwoyo here? (Pis. 141:2) Munozwa kuti maano cido cakakura cekuda kuparidzira here? Kana imwimwi muno mhuri, munoona kuti Djehovha wakamubetsera kuti mugare mwamuna kana kuti baba akanaka here? Kana imwimwi makabudirira pa matii manganani ataona, mungakwanisa kupfara nge kubudirira kamaita. Matii api anoita kuti mupfare mu upenyu wenyu nge kubudirira kamaita? Isusu tingakwanisa kubetsera amweni kuti azwe mupfaro nge kubudirira kawo pakunamata.

4. Ticaonei mu fundo ino?

⁴ Isusu tingakwanisa kubetsera amweni kuti azwe mupfaro nge kubudirira kawo pa kunamata. Tingakwanisa kuwabetserawo kuti asagare ecidziezanisa no amweni. Mu fundo ino, ticaona kuti abereki angabetsera kudini ana awo, makazado angabetserana kudini, uye akuru angabetsera kudini hama ne hanzvadzi dze mu ungano. Pakupedzesera, ticaona mazano manganani e mu Bhaibheri angatibetsera kuti tigare no zvinangwa zvatinokwanisa kuita zvecipindirana no zvatinokwanisa uye no migarire yedu ye zviro.

5. Maererano na Aefeso 6:4, ngazvipi zvisikadikani kuizwa ne abereki?

⁵ Abereki anodikana kungwarira kuti asaezanise ana awo, kana kuti, kukumbira mwana kuti aite zviro zvaasikakwanisi kuita. Zviro izvi, zvingakwanisa kunyangadza mwana. (Erengai Aefeso 6:4.) Hanzvadzi imweni inozwi Sachiko * yakati: “Afundisi angu, aiyetsera kuti ndigare nani kudarika andaifunda nawo. Kutunhudzira ipona, mai angu aida kuti inini ndibudirire kucikora kuti ndipase upupuri wakanaka ku mufundisi wangu uye baba angu ainga asiripi Mupupuri wa Djehovha. Zvezvirokwazvo, awona aida kuti ndibudise nota yakakura pa maporovha ese andaiita, uye inini ndaiona hingana kuti izvona azvizoitiki. Kunyazi padarika makore akawanda kubvira pandakapedza cikora, dakara nyamasi uno ndinodzibvunzisa kuti ndiri kuita zviri zvese kuna Djehovha here kana kuti haiwa.”

6. Madzibaba angafundei kubva mu bhuku ra Pisarema 131:1, 2?

⁶ Abereki angakwanisa kufunda fundo rinokosha pana Pisarema 131:1, 2. (Erengai.) Mambo Dhavhidhi, wakabhuya kuti iyena wainga asikapsvaki “zviro zvakanyanya kukura”  kana kupsvaka zviro zvaainga asikazokwanisi. Nge kudzidodosa uye kuziya paanogumira Dhavhidhi waikwanisa “kunyaradza mwiya wake.” Masoko a Dhavhidhi anotifundisei? Abereki, garai anhu anodzidodosa uye kuziya pamunogumira haiwa basi pa zviya zvamunoetsera imwimwi pacenyu, asi kutobatanidzawo pa zviya zvamunoetsera ku mwana wenyu. Ziyai zvinokwanisa kuizwa no zvisikakwanisi kuizwa no mwana wenyu uye mubetserei kuti agare no zvinangwa zvaanokwanisa kudzadzisa. Kana mukadaro, mwana wenyu ucakwanisa kuzwa kuti unodiwa. Hanzvadzi imweni inozwi Marina, inoedzurira yeciti: “Mai angu ainga asikandiezanisi no hama dzangu, kana kuti no ana e anhu amweni. Kubvira kare, awona akandifundisa kuti munhu wese mu nyika, pano zvaanokwanisa kuita zvakasiyana uye umwe na umwe unokosha kuna Djehovha. Nge rubetso rawo, inini andimbodziezanisi no anhu amweni.”

7-8. Mwamuna ungapangidzira kudini kuti unokudza mukadzi wake?

⁷ Mwamuna we ciKristu unodikana kukudza mukadzi wake. (1Pe. 3:7) Kukudza kunobatanidza kureremedza umweni uye kunobatanidzawo kubata munhu no nyara mbiri. Ngo muezaniso, mwamuna unokudza mukadzi wake unomubata hingana munhu unokosha maningi. Uye iyena aazomuezanisiwo no anakadzi amweni. Mwanakadzi ungakwanisa kuzwa kudini kana mwamuna wake akagara ecimuezanisa no anakadzi amweni? Onai muezaniso wa Rosa. Mwamuna wake usiripi Mupupuri wa Djehovha, kakawanda kakhona unogara ecimuezanisa no anakadzi amweni. Izvi zvakakuwadza kudini maonero aaidziita? Iyena unoti: “Nguwa dzese ndinoda kuti munhu umweni andiedzurire kuti zvezvirokwazvo ndinokosha kuna Djehovha.” Ndiyo ndaa, mwamuna we ciKristu unodikana kukudza mukadzi wake. Ngokuti iyena unoziya kuti izvona zvingakwanisa kubata-bata mucato wawo, uye ukama wake na Djehovha. *

⁸ Mwamuna unokudza mukadzi wake, aareketi zvakashata nge zvake kune amweni, unomubvunza kuti unomuda uye unomusimba. (Zvie. 31:28) Ndizvona zwakaizwa no mwamuna wa Katerina wamborekethwa nge zvake mu fundo yakadarika, iyena wakamubetsera kuti akunde mazwiro aya akashata. Paainga ari mwana mudoko, iyena waishorhwa na mai ake uye waigara eciezaniswa no asikana amweni, kutobatanidzawo madzishamwari ake. Nge ndaa yazvo, Katerina wakatanga kudzipima ne kudziezanisa ne amweni—kunyazi paakazogara Mupupuri wa Djehovha! Asi mwamuna wake we ciKristu, wakamubetsera kuti akunde muzwiro uu wakashata uye kuti agare no maonero ari pakati no pakati nge zvake. Katerina unoti: “Iyena unondida, unondisimba nge zviro zvakanaka zvandinoita uye unoita minamato ecibhuya nge zvangu. Unondibetserawo kuti ndiziye mawara anoshamisa a Djehovha unondibetsera kuti ndigadzirise mazwiro angu akashata.”

9-10. Akuru akabetsera kudini hanzvadzi imweni kuti isiye musambo we kudziezanisa no anhu amweni?

⁹ Akuru angabetsera kudini hama dzino musambo we kudziezanisa no amweni? Onai muezaniso we hanzvadzi inozwi Hanuni. Paainga aciri mwana mudoko, iyena wainga asikasimbwi. Unoedzurira eciti: “Ndainga ndiri munhu wakanyararisa uye ndaiwona hingana kuti ana amweni ari nani kupinda inini. Kubvira pendaizwirana no amweni, ndaipedzesera no kudziezanisa no anhu amweni.” Kunyazi mumasure me kugara Mupupuri wa Djehovha, Hanuni wakarumbwa ecidziezanisa no amweni. Nge ndaa yazvo, iyena waidziona hingana kuti aabetseri mu ungano.  Asi nyamasi uno, iyena ndi piyoneira unopfara. Ngazvipi zvakamubetsera kuti acinje maonero ake?

¹⁰ Hanuni unoti zvakamubetsera, i rubetso rakabva ku akuru ano rudo. Awona akamubvunza kuti, iyena unokosha mu ungano uye akamusimba nge muezaniso wake wekutenda. Wakatara eciti: “Nguwa dzimweni, akuru aindikumbira kuti ndibetsere hanzvadzi dzaida kubambiswa. Mabasa aya akaita kuti ndizwe kuti ndinokosha. Ndinoedzurira akuru paakanditenda nge kubambisa kandaiita madjaha e asikana. Pedzepo, awona akandierengera tsamba ya 1 Atesaronika 1:2, 3. Izvona zvakabaya mwoyo wangu! Nge rubetso re aushi aya akanaka, nyamasi uno ndinoreremedza mbuto yandinayo mu sangano ra Djehovha.

11. Tingabetsera kudini aya “anodzvinyirirwha uye aya ano mwoyo unodzidodosa,” anorekethwa pana Isaya 57:15?

¹¹ Erengai Isaya 57:15. Djehovha unokoshesa ese aya “anodzvinyirirwha uye aya ano mwoyo unodzidodosa.” Tese hedu, haiwa basi akuru, tingakwanisa kuita zvakawanda kuti tibambise hama no hanzvadzi dzedu dzinodiwa. Mushobo wekuita izvona, ngewekupangidza kuti zvezvirokwazvo tinowapfarira. Djehovha anoda kuti tibetsere hama dzedu kuitira kuti awona azwe kuti iyena uno rudo ne mabira ake. (Zvie. 19:17) Kupinda izvona, tingakwanisa kubetsera hama dzedu nge kugara anhu anodzidodosa uye ari pakati no pakati. Atidikani kuita zviro zve kudzionesa, ngekuti izvona zvingakwanisa kuita kuti pagare no uzondi. Pane kuti tidaro, tinodikana kuseenzesa zvatinokwanisa kuita uye ruziyo redu kuti tibambisane umwe na umwe.—1Pe. 4:10, 11.

12. Ngei anhu anodzidodosa aipfarira kugara na Djesu? (Onai foto ye pa kapa.)

¹² Mabatire aiita Djesu afundi ake, anotifundisa zvakawanda nge zvemabatire atingaita amweni. Djesu wainga ari mwanarume mukuru wakamborarama kare. Kunyazi zvakadaro, iyena wainga ari munhu uno “upfawi uye uno mwoyo unodzidodosa.” (Mt. 11:28-30) Iyena waiziya maningi uye waizia zviro zvakawanda, asi wainga asikadzionesi. Djesu paaifundisa, waiseenzesa masoko akareruka ne mifanikiso yaibaya mwoyo ye anhu anodzidodosa. (Ru. 10:21) Atungamiriri e magereja e mu nguwa ya Djesu, aidzikudza uye aiita kuti anhu azwe hinga asikabetseri kuna Mwari. (Ju. 6:37) Asi Djesu wainga asikaiti kudaro, iyena waireremedza anhu aishorhwa.

13. Kunaka uye rudo ra Djesu, zvakabuda kudini pamhene nge mushobo waaibata afundi ake?

¹³ Kunaka uye rudo ra Djesu, zvakabuda pamhene nge mushobo waaibata afundi ake. Iyena waiziya kuti umwe na umwe, wainga ano maitire uye magarire akasiyana-siyana. Hino, ese ainga asikazokwanisi kuita mabasa amwewo, kana kuti kuseenza zvakaezana mu ushumiri. Kunyazi zvakadaro, iyena waireremedza zvaiizwa na umwe na umwe wawo. Djesu waizwisisa maningi uye izvi zvakaoneka pa mufanikiso we matarento. Pamufanikiso iwona, tenzi wakapasa umwe na umwe basa rekuita “maererano no zvaaikwanisa kuita.” Umwe we aranda wakaseenza zvakanaka zvikabarira kupinda umweni wake. Asi tenzi wakatenda ese airi eciseenzesa masoko amwewo e kuti: “Maita zvakanaka, aseenzi akanaka uye akagondeka!”—Mt. 25:14-23.

14. Tingateedzera kudini Djesu pa mabatire aiita amweni?

¹⁴ Djesu anotibata zvakanaka uye no rudo. Iyena unonyasa kuziya zviro zvatinokwanisa kuita, migarire yedu inosiyana uye unopfara maningi patinoita zvese zvatinokwanisa kuita. Isusu tinodikana kuteedzera Djesu. Zvingaitika kuti hama dzimweni adzikwanisi kuita zvakawanda hingana amweni awo. Kunyazi zvakadaro, atidikani kubhuya zviro zvinoita kuti awona atsukware kana kuti azwe hingana kuti aana basa. Pane kudaro, tinodikana kuwasimba nge kuita kawo zvaanokwanisa mu basa ra Djehovha.

15-16. Hanzvadzi Midori, yakabetsereka kudini nge kugara no zvinangwa zvaaikwanisa kuita?

¹⁵ Zvinangwa pakunamata, zvinotipasa gwanza no cinangwa mu upenyu. Asi cakaigika nge cekuti, tinodikana kugara no zvinangwa zvinopindirana no zvatinokwanisa kuita uye no mugarire wedu, haiwa no migarire ye amweni. Zvinangwa zvatisikakwanisi kuita, zvingaita kuti titsukware uye tipererhwe no mupfaro. (Ru. 14:28) Onai muezaniso we hanzvadzi imweni piyonera inodainzwa Midori.

¹⁶ Paainga aciri mwana mudoko, nguwa dzakawanda Midori waidzvinyirirhwa na baba ake asiripi Mupupuri wa Djehovha. Nguwa dzese awona aimuezanisa no hama dzake uye no shamwari dzaaifunda nadzo. Midori unoti: “Ndaizwa hingana ndisikabetseri.” Asi paainga ecikura, Midori wakatanga kudzigonda. Iyena unoti: “Kuerenga Bhaibheri mazuwa ese kakandibetsera kuti ndigare no runyararo mu ndangariro uye kuzwa kuti Djehovha unondida.” Kupinda izvona, iyena wakagara no zvinangwa zvaaikwanisa kuita, uye wakaita munamato kuti Djehovha amubetsere pa kudzadzisa zvinangwa zvake. Mugumisiro wakhona nge wekuti, Midori wakapfara maningi nge kubudirira kake pakunamata.

17. Tingaitei kuti “tirumbwe tecigadzirisa mishobo yedu ye kurangarira,” uye zvicatibetsera kudini?

¹⁷ Mazwire no marangarire asikazi kunaka aangaperi ciriporipoco. Ndiyo ndaa, Djehovha unotingwadza eciti: “Rumbwai mecigadzirisa mushobo wenyu we kurangarira.” (Aef. 4:23, 24) Kuti tidaro, tinodikana kuita minamato, kufunda Soko ra Mwari, uye no kunyasa kurangarira zviya zvatinonga tafunda. Hino, petai masimba ari ese kuti muite zviro izvi, uye nguwa dzese kumbirai Djehovha kuti amupase simba. Mwiya mucena wake, ucamubetsera kuti munyise musambo we kudziezanisa no amweni. Asi  kana nguwa dzimweni uzondi no kudzikudza kukatanga kukura mu mwoyo menyu, Djehovha ucamubetsera kuti mukasike kuzvizwa uye kuti mubvise mazwiro aya mu mwoyo menyu.

18. Tsamba ya 2 Makoronika 6:29, 30 ingamunyaradza kudini?

¹⁸ Erengai 2 Makoronika 6:29, 30. Djehovha unoziya zviri mu mwoyo medu. Iyena unoziya hondo yatinayo—hondo ye mwiya we nyika ino uye no kusakwana kedu. Asi Djehovha paanoona kuti tiri kurhwa no simba kuti tibvise marangariro asikazi kunaka, rudo raanaro katiri, rinotunhudzirika.

19. Djehovha unoseenzesa muezaniso upi kuti atibetsere kuzwisisa rudo raanaro katiri?

¹⁹ Kuti adjekese rudo raanaro katiri, Djehovha unoseenzesa muezaniso we rudo rina mai ne mwana wawo. (Isa. 49:15) Onai zvakaitika kuna mai umweni unozwi Rachel. Iyena wakatara eciti: “Mwana wangu unozwi Stephanie, wakabarhwa mwedzi isati yakwana. Pendakamuona pekutanga, iyena waioneka hingana cidoko-doko asikakwanisi kudzidziirira. Asi pakati pe mwedzi wekutanga paakagara mucitufa, cipitari yakanditendera kui ndimubereke mazuwa ese. Mukana uu we rudo, wakatibetsera kuti tinyase kuzwirana. Nyamasi uno, iyena waano makore 6 uye wakadodoka kupinda ana amweni e thunga rake. Kunyazi zvakadaro, inini ndinomuda maningi, ngekuti wakarhwa kuti arumbwe ecirarama uye wakaunza mupfaro wakakura kandiri!” Zvinopfadza kuziya kuti Djehovha uno rudo rimwero na isusu paanotiona tecipeta masimba ari ese kuti timuseenzere no mwoyo wese!

20. Zvinyi zvinoita kuti mupfare ngekuseenzera Djehovha?

²⁰ Ngekugara kenyu museenzi wa Djehovha, imwimwi makasiyana no amweni uye muri munhu unokosha mu mhuri ye mu nyika yese yakasiyana-siyana. Djehovha aazi kumukweera kaari ngekuti muri nani kupinda amweni. Iyena wakamukweera kaari ngekuti wakaona mwoyo wenyu uye wakaona kuti muri munhu unodzidodosa uye munoda kufunda. (Pis. 25:9) Garai ne cokwadi cekuti Djehovha unoreremedza zvese zvamunoita pa basa rake. Kushingirira uye no kugondeka kenyu, kunopangidza kuti imwimwi muno mwoyo “we zvirokwazvo uye wakanaka.” (Ru. 8:15) Nge ndaa yazvo, rumbwai meciita zvese zvamunokwanisa kuna Djehovha. Kana mukadaro, zvicaita kuti mugare no zviro zvakawanda “zvinomupfadza [imwimwi pacenyu].”