1. Иегова бисти чүге кымның-биле-даа деңневейн турар?

ИЕГОВАНЫҢ дириг амытаннарны, үнүштерни, кижилерни бот-боттарынга дөмей эвес кылдыр чаяап каанындан алырга, Ол чүзүн-баазын чүүлге ынак деп көскү. Бистиң кижи бүрүзүвүс бир тускай, ынчангаш Иегова бисти кымның-биле-даа деңневейн турар. Ол бистиң кандыывысты база бистиң чүрээвисте чүү барын дыка эки билир (1 Хаан. 16:7). Оон аңгыда, Иегова бистиң кошкак болгаш күштүг талаларывысты база кандыг байдалга өзүп келгенивисти билир. Ынчангаш бистиң кылып шыдавас чүүлүвүстү Ол бистен кажанда-даа негевес. Бис база боттарывысче Иегованың караа-биле көрүп өөренир ужурлуг бис. Ынчаар кылыр болзувусса, боттарывыстың дугайывыста сарыылдыг кылдыр бодап, чогуур деңнелден бодувусту өрү азы куду көрбес бис (Рим. 12:3).

2. Өскелер-биле бодун деңнээри чүге шын эвес?

² Суртаалдаарынга аажок ынак акы-угбалар-биле кады бараалгаары дыка өөрүнчүг (Евр. 13:7). Бис олардан чижекти ап, боттарывыстың арга-мергежиливисти экижидип ап болур бис (Флп. 3:17). Ынчалза-даа бир кижиден үлегер-чижек алыры биле бодун ол кижиниң чедиишкиннеринге деңнээри — көңгүс ийи аңгы чүүл-дүр. Ындыг деңнээшкин биске адааргак чорукту, муңгаралды, безин чөгениишкинни оттуруп болур. Азы чок болза бодувусту өскелерден дээре деп санааш, адааннажып эгелээр айыыл бар. Эрткен статьяга ол чүүл Бурган-биле чоок харылзаавыска хораны чедирер деп көрген бис. Ынчангаш Иегова бисти ынакшылдыы-биле: «Кижи бүрүзү бодунуң ажыл-херээн шүгдүнзүн, ол ынчан бодун өске улус-биле деңневейн, чедиишкиннеринге чоргаарланып шыдаар» деп оттуруп турар (Гал. 6:4).

3. Бурган-биле чоок харылзаалыг болур дээш, чедип алган кандыг чедиишкиннериңер силерге өөрүшкүнү эккелген?

 ³ Иегова бисти бодувустуң чедиишкиннеривиске өөрүүр кылдыр күзеп турар. Чижээлээрге, сугга суктуруп алган болзуңарза, ол сорулганы чедип алганыңарга өөрүүр чылдагааннарыңар дыка хөй. Ол шиитпирни силер боттарыңар хүлээп алган силер, ону кылырынче силерни Бурганга ынакшыл оттурган. Оон аңгыда, сугга суктуруп алганыңардан тура, бо хүнге чедир канчаар эки талаже өскерли бергениңерни бодап көрүңер даан. Библия номчуурун, хууда шинчилел кылырынга оон-даа улуг күзелдиг апарган чадавас силер. Азы чок болза силерниң мөргүлдериңер оон-даа ханы уткалыг болгаш «айдызаар өргүл дег» апарган бе? (Ыд. ыр. 140:2) Чок болза суртаал үезинде боттарыңарны хостуг кылдыр миннип, суртаалга ажыглаар херекселдерни оон-даа эки ажыглап турар силер бе? Ашаа, кадайы, ачазы азы авазы боор хүлээлгени оон-даа эки күүседиринге Иегова-биле найырал силерге дузалаан бе? Боттарыңарның бо-даа, өске-даа чедиишкиннериңерни көргеш, өөрүшкүнү миннип, сеткилиңер ханар.

4. Бо статьяга чүнү сайгарар бис?

⁴ Бодунуң чедиишкиннери дээш өөрүүрүнге өскелерге дузалап болур бис. Оон ыңай олар боттарын өскелер-биле деңневес кылдыр база дузалап болур бис. Бо статьяга ада-иелер, өг-бүлелер, удуртукчулар база хуралда өске-даа акы-угбалар ону канчаар кылып болурун сайгарар бис. Оон ыңай библейжи дүрүмнер биске сорулгаларны салырынга канчаар дузалап болурун база көөр бис.

5. Эфесчилерге 6:4-тен алырга, ада-иелер чүнү кылбас болза эки?

⁵ Ада-иелер ажы-төлүн өске ажы-төл-биле деңневейн, олардан хөйнү негевес болза эки. А бир эвес ада-иелер ажы-төлүн өскелер-биле деңнеп, кылып шыдавас чүүлүн манаар болза, оларның чаш угаанын балыглап болур. (Номчуптуңар: Эфесчилерге 6:4.) Сачико * дээр угбавыс мынча дээн: «Башкыларым класска эң-не эки өөреникчи болурумну манап турган. Авам мени „чүгле бештерге өөренир сен, оон башка ачаң болгаш башкыларың Иегованың Херечилериниң дугайында багай кылдыр бодай бээр“ дээр турган. Оон экзаменнерни база чаңгыс-даа частырыг чок кылдыр дужаарымны ол күзеп турган. Ынчалза-даа ынчаар кылыры шуут болдунмас! Школаны шагда-ла доозупкан-даа болзумза, ол минниишкиннер чамдыкта катап база оттуп кээр. Иеговага эң-не экини берип турар хиремде, Ол меңээ чүүлзүнмейн турар деп бодай бээр-дир мен».

6. Ырлар 130:1, 2-ден ада-иелер чүнү өөренип ап болур?

 ⁶ Ырлар 130:1, 2-де (номчуптуңар) ада-иелерге ажыктыг сүме бар. Давид хаан мынча дээн: «Чедип ап шыдавазым, өндүр улуг чүвеже чүткүп, идээргеведим». Давид бодунуң арга-шинээн билип турган болгаш, сеткилинге тамчык-дышты миннип турган. Ада-иелер Давидтен чүнү өөренип ап болур? Биче сеткил база томаарыыр чорук ада-иелерге чүгле боттарынга эвес, а ажы-төлүнге база мерген угаанныг негелделерни тургузарынга дузалаар. Төлүңерниң чедер-четпес талаларын кичээнгейге ап, ооң чедип ап шыдаар сорулгаларын салырынга дузалажыңар. Ооң ачызында ол ада-иезиниң ынакшылын миннир боор. Марина дээр угбавыс мынча деп сагынган: «Авам мени үш акымга-даа, өске ажы-төлге-даа черле деңневес турган. Кижи бүрүзү бодунуу-биле салым-чаяанныг боор база Иегова бистиң кижи бүрүзүвүске ынак деп, ол меңээ чугаалап чораан. Ынчангаш бодумну улус-биле деңнээр күзелим шоолуг чок».

7, 8. Ашаа кадайынга алдар-хүндүнү канчаар көргүзүп болур?

⁷ Бурган-биле найыралын үнелеп турар эр кижи кадайы дээш сагыш човап, аңаа кичээнгей көргүзүп, ону хүндүлээр боор (1 Пет. 3:7). Кадайынга алдар-хүндүнү канчаар көргүзүп болур? Ол ооң чуртталгазында тускай черни ээлеп турар деп көргүзүп, ооң кылып шыдавас чүүлүн негевес боор. Оон аңгыда, ол эжин өске херээжен улус-биле кажанда-даа деңневес боор. Ынчаар кылыры чүге чугула? Иеговага бараалгавайн турар ашактыг, Роза дээр угбавыстың чижээн көрээлиңер. Ашааның кээргел чок деңнээшкиннерин үргүлчү дыңнап-ла тургаш, ол бодун чөгенчиг кылдыр миннип эгелээн. Ол безин мынча дээн: «Иегова мени үнелеп турар деп, кандыг-бир кижи меңээ үргүлчү сагындырып чугаалаар болза эки». А Иеговага ынак эр улус кадайларынга ындыг хамаарылга көргүспес. Олар кадайларынга алдар-хүндү көргүзүп чоруур, чүге дизе өг-бүлезиниң аас-кежии база боттарының Иегова-биле найыралы оон хамааржыр деп билир *.

⁸ Кадайын хүндүлээр эр кижи, аңаа ынакшылын илередир, ону мактаар база улус мурнунга ооң дугайында чүгле экини чугаалаар (У. ч. 31:28). Эрткен статьяда чугаалашканывыс Катеринаның ашаа аңаа база шак ындыг хамаарылганы көргүзүп чоруур. Ооң ачызында ол бодун чөгенчиг эвес кылдыр миннип турар. Катерина бичии турда, ооң авазы ону хей черге чемелеп, өске уругларга база ооң эштеринге деңнеп чораан. Түңнелинде Катерина бодун өскелерге деңнеп өөренип калган. Иегованың Херечизи апаргаш-даа, ол багай чаңчылдан дөмей-ле адырлып чадап турар. Ынчалза-даа ооң ашаа аңаа бодун эмин эрттир чемелевезинге дузалап турар. Катерина мынча дээн: «Ашаам меңээ ынак база мени мактап, мен дээш мөргүп чоруур. Ол ышкаш Иегова кайы хире кайгамчык Бурган деп чүүлдү меңээ сагындырып чоруур. Ооң ачызында бодумну хөлүн эрттир чемелевес апарган мен».

9, 10. Бодун өскелерден чөгенчиг кылдыр бодаар бир угбавыска хуралдың удуртукчулары канчаар дузалаан?

⁹ Бодун өскелер-биле деңнээр сундулуг улуска удуртукчулар канчаар дузалап болур? Хануни дээр угбавыстың чижээн көрүп көрээлиңер. Ол бичии турда, ону шоолуг мактавас турган. Ол мынча дээн: «Мен пөрүк турган мен база бодумну өскелерден чөгенчиг кылдыр миннип чораан мен. Эскереримге-ле, бодумну өскелер-биле деңнеп турар боор мен». Ынчангаш сугга суктуруп алгаш, долу бараалгап эгелээн соонда безин, акы-угбалар ону үнелеп турар дээрзинге Хануни арай деп бүзүрээр турган. Ынчалза-даа ол бодунга хамаарылгазын өскертип алгаш, амгы үеде аас-кежиктиг кылдыр бодун миннип чоруур.

¹⁰ Хануниниң саналы-биле алырга, аңаа сагыш човангыр удуртукчулар дузалаан. Олар ону  чыышка кайы хире чугулазын база кайы хире эки үлегер-чижекти көргүзүп чоруурун бүзүреткен. Хануни мынча деп бижээн: «Хуралдың удуртукчулары мени чаңгыс удаа эвес аныяк угбаларны деткиирин дилеп турган. Ооң ачызында мен чыышка кайы хире чугуламны билип каан мен. Акыларның мени канчаар мактап тургаш, 1 Фессалоникчилерге 1:2, 3-тү номчуп бергенин ам-даа дыка эки сактыр мен. Ол чүүл мээң чүрээмге дыка дээштиг болган! Ол сагыш човангыр удуртукчу акыларның ачызында мен чыышка кандыг үлүгнү киирип болурумну билип каан мен. Ону дыка үнелеп чоруур мен».

11. Исайя 57:15-тен алырга, сагыш-сеткили бастырган база качыгдаан улустарга канчаар дузалап болур бис?

¹¹ Номчуптуңар: Исайя 57:15. Иегова сагыш-сеткили бастырган, ундараан улуска эрге-чассыг хамаарылга көргүзүп турар. Ындыг акы-угбаларны деткиир хүлээлге чүгле удуртукчуларда эвес, а бистиң кижи бүрүзүвүсте бар. Ону кылып болур аргаларының бирээзи — оларны шын-на сеткиливистен сонуургаары. Иегова Бодунуң хойларын аажок үнелеп турар болгаш, оларның аразында ынакшылдыг хамаарылга турзун деп күзеп турар (Кол. 3:12). Оон ыңай боттарын чөгенчиг кылдыр миннир акы-угбаларга биче сеткилди илередип тургаш, дузалап болур бис. Бир эвес кижи бодунче хөй кичээнгей хаара тудар болза, өскелерге адааргак сеткилди оттуруп болур. А бис болза салым-чаяанывысты болгаш билиглеривисти өскелерни деткиир дээш ажыглаарын күзеп турар болгай бис (1 Пет. 4:10, 11).

12. Бөдүүн улус Иисусче чүге чүткүүр турган? (Журналдың даштында чурукту көрүңер.)

¹² Иисустуң эдерикчилеринге кандыг хамаарылганы көргүзүп турганы биске эки үлегер-чижек боор. Иисус улустуң аразындан эң-не өндүр улуг кижи чораан-даа болза, биче сеткилдиг болгаш чөпшүл чүректиг кижи чораан (Мф. 11:28—30). Ол кедергей угаанныг база билиглери хөй-даа турган болза, өскелерден дээре мен деп черле бодавайн чораан. Ол бөдүүн улуска билдингир чижектерни ажыглап, бөдүүн дыл-биле өөредип чораан (Лк. 10:21). Ёзуургак шажын башкарыкчыларынга бодаарга, Иисус кижилерни Бурганга херекчок силер деп кажанда-даа чугаалавайн чораан (Ин. 6:37). Харын-даа ол улустарны ылгай көрбейн, кижи бүрүзүнге хүндүткелдиг хамаарылгалыг турган.

13. Иисус өөреникчилеринге ачы-буянны болгаш ынакшылды канчаар илередип турган?

¹³ Иисустуң ачы-буяны болгаш ынакшылы өөреникчилеринге хамаарылгазындан көскү. Оларның кылып шыдаар чүүлдери болгаш байдалдары аңгы-аңгы деп, Иисус дыка эки билир турган. Ынчап кээрге, өөреникчилери чаңгыс ол-ла даалганы деңге күүседип шыдавас база оларның ажыл-херээниң түңнели дөмей болбас турган. Ынчалза-даа өөреникчилери Бурганга шын сеткилинден бараалгап турар боорга, Иисус оларны аажок үнелеп чораан. Өөреникчилерин кайы хире эки билип турганын ооң акша дугайында угаадыглыг чугаазындан көрүп болур бис. Ында дээргизи бодунуң чалча бүрүзүнге «шыдаар шаг-шинээн барымдаалап», даалгаларны берген. Ийи чалча боттарының хүлээлгелерин ак сеткилдии-биле күүседирин кыскан. Ынчалза-даа бирээзи, өскезинге бодаарга, дээргизинге хөй акшаны ажылдап берген. Ындыг турбуже, дээргизи: «Кончуг эки-дир, сен эки болгаш шынчы чалча-дыр сен!» — деп кайызын-даа мактаан (Мф. 25:14—23).

14. Иисусту өттүнүп, өскелерге эки хамаарылганы канчаар көргүзүп болур бис?

¹⁴ Оон аңгыда, Иисустуң ачы-буяны болгаш ынакшылы биске көргүзүп турар хамаарылгазындан көскү. Бистиң кылып шыдаар чүүлдеривис болгаш чуртталгавыста байдалдарывыс ылгалып турар дээрзин Иисус билир. Ынчалза-даа шыдаар шаавыс-биле кылып чоруур ажыл-херээвис ооң сеткилин өөртүп чоруур. Бис база шак ындыг хамаарылганы өскелерге көргүзер болзувусса эки. Чыышта бир-ле акывыска азы угбавыска «өскелерге бодаарга, хөйнү кылып шыдавас чөгенчиг-дир мен» деп минниишкиннерни оттурбас ужурлуг бис. Ооң орнунга Иеговага бар шаа-биле бараалгап  чорууру дээш, оларны мактаар арганы дилээлиңер.

15, 16. Бир угбавыска чедип ап шыдаар сорулгаларны салганы канчаар дузалаан?

¹⁵ Бурганче чоокшулаар сорулгалар салыр болзувусса, чуртталгавыс углуг-баштыг болгаш ужур-уткалыг боор. Ынчалза-даа чугула чүүл бар. Сорулгалар салырда, өске улустуң эвес, а бодувустуң байдалывысты болгаш шаг-шинээвисти кичээнгейге алыр болзувусса эки. Оон башка хөңнүвүс калып, безин боттарывыска хораны чедирип болур бис (Лк. 14:28). Мидори дээр эгелекчи угбавыстың чижээн көрүптээлиңер.

¹⁶ Мидориниң ачазы Иегованың Херечизи эвес турган. Ол ону куду көрүп, бичии дуңмаларынга болгаш чаңгысклассчыларынга бо-ла деңнээр турган. «Бодумну аас-кежик чок кылдыр миннир турган мен» — деп, Мидори үлешкен. Ынчалза-даа ол өзүп келгеш, бодун хүндүлеп өөренип алган. «Иегова меңээ оожургалды болгаш ынакшылды көргүзер кылдыр, хүннүң-не Библияны номчуур чордум» — деп, ол немээн. Оон аңгыда, Мидори чедип ап шыдаар сорулгаларны салгаш, ооң дугайында Иеговага чугаалап, дузаны дилеп турар. Ооң ачызында Мидори бодунуң чедиишкиннеринге өөрүп чоруур.

17. Боттарывыстың угаан-медереливисти канчаар чаартып болур бис база ооң түңнели кандыг боор?

¹⁷ Кыска үе ишти бодун чемелээринден адырлып алыры берге, ынчангаш Иегова бисти оон-даа улаштыр угаан-медереливисти чаартырынче оттуруп турар (Эф. 4:23, 24). Ону кылырынга биске мөргүл, Бурганның Сөзүн шинчилээри база номчаан чүүлүвүстүң дугайында ханы боданыры дузалаар. Ол бүгү чуртталгаңарның чугула кезии апаар кылдыр, Иеговадан чаннып дилеңер. Ынчан ыдыктыг сүлдениң ачызында боттарыңарны өскелерге деңневейн баар силер. Оон аңгыда, чүрээңерде адааргак  сеткилди азы алдарга ынак хөөннү эскереринге база ол чүдек шынарлардан адырлырынга Иегова силерге дузалаар.

18. 2 Чылдар 6:29, 30-де сөстер силерни канчаар оожургадып турар?

¹⁸ Номчуптуңар: 2 Чылдар 6:29, 30. Иегова бистиң чүрээвисти дыка эки билир. Оон ыңай, боттарывыстың четпес талаларывыс-биле база бо делегейниң багай хөөнү-биле кайы хире күштүг болгаш чаныш-сыныш чок демисежип чоруурувусту Ол дыка эки билир. Ону көргеш, Иегованың биске ынакшылы дам-на күштелип турар.

19. Иегова биске Бодунуң минниишкиннерин кандыг үлегер-чижекке көргүскен?

¹⁹ Иегова биске эрге-чассыг хамаарылгазын көргүзер дээш, чижек кылдыр ие кижиниң чаш төлүнге кайы хире ынаан көргүскен (Иса. 49:15). Рэйчел угбавыс мынча деп үлешкен: «Мээң уруум Стефани эрте төрүттүнүп келген. Уруумну бир дугаар көрүп каарымга, ол кээргенчиг болгаш хензиг болган. Бир ай ишти ол эмчиге эрттирер ужурга таварышкан. Ынчалза-даа эмчилер уруумну хүннүң-не холга тудуп болурун меңээ чөпшээрээн. Ол үелерде чаш кызымга эрге-чассыг хамаарылгамны көргүзүп турган мен, бот-боттарывыска дыка чоок апарган бис. Стефани ам алды харлыг, ол боду хире уруглардан бичежек кылдыр көстүр, ындыг-даа бол, уруумга ынакшылым хүнден хүнче күштелип орар. Чүге дээрге ол бодунуң амы-тыны дээш дыка демисежип турган база меңээ улуг аас-кежикти эккелген!» Бодап көрүңер даан, Иегова бистиң, Аңаа бердинген артар дээш, үндүрүп турар күжениишкиннеривисти көргеш, биске шак-ла ындыг эрге-чассыг ынакшылды миннип турар! Ону билири улуг оожургалды эккеп турар.

20. Иеговага чуртталгаңны бараалгадып алганың дээш, өөрүүр кандыг чылдагааннарың бар?

²⁰ Сен — кымга-даа дөмей эвес, Иегованың үнелиг бараалгакчызы сен. Бурган сени Бодунуң ынакшылдыг өг-бүлезинче хүлээп алган. Сен өскелерден дээре бооруңга эвес, а биче сеткилдиг, өөрениринге болгаш эттинеринге белен бооруңга, Бурган сээң-биле найыралдажыксай берген (Ыд. ыр. 24:9). «Мээң күжениишкиннеримни Иегова кайыын-на тоорул» деп черле бодавайн көр! Быжыг туруштууң болгаш Иеговага бердингениң сени «буянныг болгаш арыг чүректиг» деп көргүзүп турар (Лк. 8:15). Моон-даа соңгаар Иеговага бар шааң-биле бараалгаарыңны уламчыла. Ынчан бодуңну өскелер-биле деңневейн, өөрүшкүнү миннир чылдагааннарың хөй боор.