1. Малы Иегова милемыз нокинэн уг ӵошаты?

 ИЕГОВАЛЭН уг поты, ваньмыз одӥг кадь мед луоз шуыса. Сое адӟыны луэ, пӧртэм пумо будосъёс, пудо-животъёс, пӧртэм калыкъёс шоры учкыса. Ми пӧлысь котькудӥз аспӧртэмлыко, соин ик Иегова милемыз нокинэн уг ӵошаты. Со тодэ, кыӵеесь ми но мар милям сюлмамы (1 Экс. 16:7). Озьы ик со лыдэ басьтэ кужмо но ляб палъёсмес, озьы ик сое, кызьы ми будӥмы. Со ноку но уз кур милесьтым сое, мае ми лэсьтыны ум быгатэ. Милемлы дышетсконо асьмеос шоры Иегова сямен учкыны. Соку асьмеды мукетъёсызлэсь вылӥе но ум пуктэ, ултӥяса но ум улэ (Рим. 12:3).

2. Малы астэ мукетъёсыныз ӵошатоно ӧвӧл?

² Ми ужаськомы-тыршиськомы оскымон вын-агайёсын но сузэр-апайёсын ӵош, кудъёсыз туж умой тодытыны быгато (Евр. 13:7). Ми быгатӥськомы соослэсь адӟем карыны но ужан-тыршонын быгатонлыкъёсмес умоятыны (Флп. 3:17). Но кинлэсь ке адӟем карыны но соин ӵошатскыны туж пӧртэм. Асьмеды мукетъёсыныз ӵошатыса, ми быгатӥськомы вожъяськыны, кайгырыса улыны яке малпаны, ми номырлы ярасьтэм адямиос шуыса. Со сяна, кызьы вераськиз кылем статьяын, ми асьмеды мукет вын-агайёслэсь но сузэр-апайёслэсь вылӥе пуктыны быгатомы. Нош соку Иеговаен кусыпъёсмы лябӟозы. Соин ик Иегова милемыз яратыса ӧте: «Котькудӥз аслэсьтыз ужъёссэ ачиз мед эскероз-чаклалоз, соку со, мукетъёсын ассэ ӵошатытэк, аслаз азинсконъёсыныз ушъяськыны быгатоз» (Гал. 6:4).

3. Кыӵе азинсконъёсты тӥледлы шумпотон вайизы?

 ³ Иеговалэн потэ, ми азинсконъёсмылы мед шумпотомы шуыса. Кылсярысь, тӥ пылатӥськиды ке, шумпотыны быгатӥськоды, та ужпумдэс быдэстӥды шуыса. Та ужпумез тӥ асьтэос кутӥды, малы ке шуоно тӥ Инмарез яратыны кутскиды. Озьы ик малпаське, кыӵе азинсконъёс тӥ лэсьтӥды пылатӥськемды бере. Библиез лыдӟон но сое эскерон тӥледлы тросгес шумпотон вае-а? Тыршиськоды-а тӥ эшшо но сюлмысь вӧсяськыны? (Пс. 140:2). Яке тӥ тодытыкуды туж ик уд кышкаське ини но тодытон понна тӥрлыкъёсты эшшо но быгатыса уже кутӥськоды ини? Юрттӥз-а тӥледлы Иеговаен эшъяськон эшшо но умой карт, кышно, атай яке анай луыны? Та удысъёсысь азинсконъёсты сярысь малпаськыса, тӥ шумпотоды, луоз.

4. Мае ми эскеромы та статьяын?

⁴ Ми быгатӥськомы мукетъёсызлы но юрттыны шумпотыны азинсконъёссылы, кудъёсыз Иеговалы йыбыртъянэн герӟаськемын. Озьы ик ми быгатӥськомы соослы юрттыны ӵошатскытэк улыны. Та статьяын ми эскеромы, кызьы тае лэсьтыны быгато анай-атайёс, кузпалъёс, тӧроос, озьы ик кенешысь мукет вын-агайёс но сузэр-апайёс. Со сяна, ми эскеромы Библиысь куд-ог возетъёсты, кудъёсыз юрттозы милемлы быдэстыны луымон ужпумъёс пуктыны.

5. Мар карыны уг яра анай-атайёслы, Ефесъёслы 6:4 лыдэ басьтыса?

⁵ Анай-атайёслы уг яра нылпиоссэс ог-огенызы ӵошатыны яке быдэстыны луонтэм курон-косонъёс пуктыны. Озьы лэсьтыса, соос нылпиоссэс вӧсь карозы. (Лыдӟе Ефесъёслы 6:4.) Тани мар вера Сачико b нимо сузэр: «Дышетӥсьёсы возьмазы, мон ваньмызлэсь умой дышетско шуыса. Нош анае косэ вал монэ витьлы гинэ дышетскыны, атае но дышетӥсьёсы Иеговалэн Адӟись-Ивортӥсьёсыз сярысь урод медаз малпалэ шуыса. Анаелэн потэ вал, экзаменъёс дыръя мон одӥг янгыш но медам лэсьты шуыса. Нош со быдэстонтэм вал. Школаын дышетсконме мон кемалась йылпумъяй ке но ини, куддыръя сыӵе шӧдонъёсы мынам выльысь кылдыло. Иеговалы самой умойзэ сётыса но, мон быдэсак уг оскиськы, солы ярамон луисько шуыса».

6. Малы анай-атайёсты дышетыны быгато кылъёс, кудъёсыз гожтэмын Псалтирьын 130:1, 2?

 ⁶ Анай-атайёслы бадӟым пайда вайыны быгато кылъёс, кудъёсыз гожтэмын Псалтирьын 130:1, 2 (лыдӟе). Давид эксэй вераз: «Аслым вормонтэм, быдӟым ужъёсы мон ӧй пыриськылы». Давид вала вал, мае лэсьтыны быгатэ, нош мае уг быгаты. Соин ик со каньыл сюлмын улӥз. Малы дышетыны быгато Давидлэн кылъёсыз анай-атайёсты? Анай-атайёслы зӥбыт-востэм луоно. Соку соос асьсэлэсь но, нылпиоссылэсь но укыр троссэ уз возьмалэ. Анай-атайёслы нылпизылэсь кужмо но ляб палъёссэ лыдэ басьтоно. Озьы ик юрттоно солы быдэстыны луымон ужпумъёс пуктыны. Солы луыса нылпи шӧдоз, сое ярато шуыса. Марина сузэр тодаз вае: «Анае ноку ӧз ӵошаты монэ агаеным, кык вынъёсыным, озьы ик мукет нылпиосын но. Со котьку вераз мыным, котькуд адямилэн аслаз быгатонлыкъёсыз вань шуыса но Иегова ми пӧлысь котькудзэ яратэ шуыса. Соин ик мынам шер кылдэ мылкыды асме мукетъёсыныз ӵошатыны».

7, 8. Кызьы карт кышноезлы гажамзэ возьматыны быгатэ?

⁷ Адӟись-Ивортӥсь луись картъёс кышнооссэс санэ поныны кулэ, яке соослы нимысьтыз саклык висъяны но соосты гажаны кулэ (1 Пётр 3:7). Карт кышноезлы аслаз улоназ бадӟым инты висъя. Со кышноезлэсь быдэстыны луонтэмзэ уз куры. Карт ноку уз ӵошаты сое мукет кышномуртъёсын. Малы озьы лэсьтыны уг яра? Эскеромы Роза сузэрлэсь учырзэ, кудӥзлэн картэз Иеговалэн Адӟись-Ивортӥсез уг луы. Картэзлэн лек кылъёсыз сэрен Роза ассэ урод шӧдэ но уг оскы ини, сое кин ке но яратэ шуыса. Со сяна, Роза вера: «Мыным ялан тодам вайытоно, Иегова монэ дунъя шуыса». Нош Адӟись-Ивортӥсь луись картъёс кышноосынызы асьсэды чылкак мукет сямен возё. Соос кышнооссэс гажало, малы ке шуоно валало: соку кышноенызы но, Иеговаен но кусыпъёссы юнмалозы c.

⁸ Карт, кудӥз аслэсьтыз кышнозэ гажа, сое яратэ шуыса оскытэ, сое ушъя но мукетъёсызлы со сярысь умойзэ гинэ вера (Мад. 31:28). Тани Катериналэн учырез, кудӥз сярысь кылем статьяын вераськиз. Солэн картэз юрттэ солы, куке со ассэ ултӥяны кутске. Пичи дыръяз Катериналэн анаез ялан сое пыкылӥз. Со сое ӵошатэ вал мукет нылъёсын, озьы ик эшъёсыныз но. Соин ик Катерина дышиз ассэ мукетъёсыныз ӵошатыны. Солэн сыӵе сямыз вал Иеговалэн Адӟись-Ивортӥсь луэмез бере но. Но Катериналэн картэз юрттӥз солы ачиз шоры шонер учкыны. Катерина вера: «Со монэ яратэ, ушъя но мон понна вӧсяське. Озьы ик со мыным тодам вайытэ, макем умой сямъёсыз вань Иегова Инмарлэн, но юрттэ мыным урод малпанъёсме палэнтыны».

9, 10. Кызьы тӧроос одӥг сузэрлы юрттӥзы ассэ мукетъёсыныз ӵошатытэк улыны?

⁹ Кызьы тӧроос юрттыны быгато соослы, кинъёс асьсэды мукетъёсыныз ӵошато? Ойдолэ эскеромы Хануни нимо сузэрлэсь учырзэ. Пичи дыръяз сое шер ушъязы. Тани мае со тодаз вае: «Мон возьдаськись нылпи вал но малпай, мукет нылпиос мынэсьтым умойгес шуыса. Кӧня асме тодӥсько, мон котьку но асме мукетъёсыныз ӵошатӥсько вал». Соин ик пылатӥськемез бере, озьы ик пионер луыса ужаны-тыршыны кутскемез бере но, солы секыт вал оскыны, вын-агайёс но сузэр-апайёс сое дунъяло шуыса. Но со быгатӥз ачиз шоры мукет сямен учкыны. Али ужан-тыршон солы трос шумпотон вае.

 ¹⁰ Хануни сузэрлэн верамезъя, солы туж юрттӥзы сюлмаськись тӧроос. Соос оскытӥзы сое, кенешын сое дунъяло но со мукетъёсызлы туж умой адӟем карон возьматэ шуыса. Хануни гожтӥз: «Кӧня ке пол тӧроос куризы монэ егитгес сузэръёслы юрттыны. Тӧроослэн сётэм ужзы юрттӥз мыным валаны, кенешын монэ дунъяло шуыса. Али но тодӥсько на, кызьы вын-агайёс собере монэ ушъязы но лыдӟизы мыным кылъёсты, кудъёсыз гожтэмын 1 Фессалоникаослы 1:2, 3. Та мынам сюлмам ик пыриз. Сюлмаськись тӧроослы луыса мон валай, мон кенешлы пайда вайыны быгатӥсько шуыса».

11. Кызьы ми юрттыны быгатӥськомы соослы, кинъёс секыт мылкыдын уло? (Исаиялэн 57:15).

¹¹ Лыдӟе Исаиялэсь 57:15. Иегова туж яратыса сюлмаське соос сярысь, кинъёс секыт мылкыдын уло. Сыӵе вын-агайёслы но сузэр-апайёслы тӧроос гинэ юрттыны кулэ ӧвӧл. Ми пӧлысь котькудӥз соослы юрттыны кулэ. Одӥгез амал, кызьы сое карыны луэ — соосын сюлмысь тунсыкъяськыны. Иегова аслэсьтыз ыжъёссэ туж дунъя. Солэн потэ, ми но ог-огмылы яратонмес мед возьматомы шуыса (Кол. 3:12). Кызьы эшшо ми юрттыны быгатӥськомы на вын-агайёслы но сузэр-апайёслы, кудъёсыз асьсэды мукетъёсызлэсь уродгес шуыса лыдъяло? Асьмеды зӥбыт-востэм возьыса. Адями аслыз мултэс саклык висъя ке, мукетъёсыз солы вожъяськыны быгато. Нош милям потэ, кылъёсмы но ужъёсмы мукетъёссэ мед юнматозы шуыса (1 Пётр 4:10, 11).

12. Малы огшоры адямиос Иисусэз ярато вал? (Учке вылбамысь суредэз.)

¹² Озьы ик милемлы трос пайда вайыны быгатэ со, кызьы Иисус ассэ возиз аслаз дышетскисьёсыныз. Музъем вылын вань улэм адямиос пӧлысь со тужгес но быдӟым адями вал, озьы ке но со ассэ зӥбыт-востэм возиз (Матф. 11:28—30). Иисус туж визьмо вал но солэн трос тодон-валанъёсыз вал ке но, таин со ноку ӧз ушъяськы. Со огшоры кылъёсын но огшоры примеръёсын дышетӥз, кудъёсыз дышетскымтэ адямиослы но валамон вал (Лука 10:21). Ушъяськись религиозной кивалтӥсьёсын ӵошатыса, Иисус вӧзын, адямиос шӧдӥзы, Инмар соосты дунъя шуыса (Иоанн 6:37). Огшоры адямиосты но со туж гажаз.

13. Кызьы Иисус аслаз дышетскисьёсызлы лякыт но яратӥсь луэмзэ возьматӥз?

¹³ Иисус аслаз дышетскисьёсыныз ассэ лякытэн но яратыса возиз. Со туж умой валаз, соослэн быгатонлыкъёссы но югдуръёссы пӧртэмесь шуыса. Озьыен, соос ӧз быгатэ одӥг кадь ужъёсты быдэстыны но одӥг кадь емышъёс вайыны. Но Иисус тодӥз, ваньзы соос вань сюлмысьтызы ужало-тыршо шуыса, соин ик соосты дунъяз. Талантъёс сярысь мадёнысь адӟиське, макем валаса Иисус ассэ возиз аслаз дышетскисьёсыныз. Со мадёнын кузё котькуд ляльчиезлы кужымезъя уж сётӥз. Кык ляльчиос ужзэс рос-прос быдэстӥзы, но одӥгез соос пӧлысь кузёезлы тросгес коньдон поттӥз. Озьы ке но кузёзы соосты одӥг кадь ушъяз: «Ярам, лякыт, оскиськымон ляльчи!» (Матф. 25:14—23).

14. Кызьы ми асьмеды мукетъёсыныз Иисус кадь возьыны быгатӥськомы?

¹⁴ Иисус милемын но ассэ лякытэн но яратыса возе. Со тодэ: ваньмылэн милям пӧртэм быгатонлыкъёсмы но югдуръёсмы. Со шумпотэ, куке ми лэсьтӥськомы ваньзэ, мае быгатӥськомы. Милемлы но мукетъёсыныз асьмеды озьы ик возёно. Милям уг поты: ми сэрен огъя оскисьёсмы асьсэды номырлы ярасьтэмен мед шӧдозы яке асьсэды янгыше мед уськытозы, соос мукетъёсыз мында лэсьтыны уг быгато шуыса. Со интые, ойдолэ вын-агайёсмес но сузэр-апайёсмес  ушъяломы, соос Иеговалы вань сюлмысьтызы ужало-тыршо шуыса.

15, 16. Кыӵе пайда вае одӥг сузэрлы быдэстыны луымон ужпумъёс кутэмез?

¹⁵ Куке ми Иеговалы ужан-тыршонын ужпумъёс пуктӥськомы, ми шумпотон басьтӥськомы но валаськомы, малы улӥськомы. Но милемлы кутоно сыӵе ужпумъёс, кудъёссэ ми асьмеос быдэстыны быгатомы. Одно ик кутоно ӧвӧл сыӵе ужпумъёсты, кудъёссэ мукетъёсыз быдэстыны тыршо. Озьы ӧм лэсьтэ ке, милям мылкыдмы куашканы быгатэ (Лука 14:28). Эскеромы Мидори сузэрлэсь учырзэ, кудӥз пионер луыса ужа-тырше.

¹⁶ Мидори сузэрлэн атаез Адӟись-Ивортӥсь ӧвӧл, со ялан сое ултӥяса возиз, выныныз, сузэреныз но огъя дышетскисьёсыныз ӵошатыса. «Мон асме номырлы ярасьтэм адямиен шӧдӥ»,— вера Мидори сузэр. Но будэмъяз со ассэ юнгес шӧдыны кутскиз. Мидори азьланьтэ: «Мон котькуд нунал Библиез лыдӟи, солы луыса мынам сюлмы буйгаз но, мон шӧдӥ, Иегова монэ яратэ шуыса». Со сяна, Мидори ас азяз быдэстыны луымон ужпумъёс пуктэ, соос сярысь вӧсяськыкуз вера но Иеговалэсь куре, соосты быдэстыны мед юрттоз шуыса. Ваньмыз та Мидорилы юрттэ аслаз азинсконъёсызлы шумпотыса улыны.

17. Кызьы ми быгатӥськомы азьланяз но малпаськон амалмес тупатыны но кыӵе пайда со ваёз?

¹⁷ Асьмеос шоры шонер учкон понна, трос дыр кулэ. Соин ик Иегова милесьтым мылкыдмес ӝутэ азьланяз но малпаськон амалмес тупатыны (Еф. 4:23, 24). Со понна милемлы кулэ вӧсяськыны, Инмарлэсь Кылзэ эскерыны но лыдӟеммы вылын малпаськыны.  Тае лэсьтон понна, Иеговалэсь кужым куре. Соку святой духлэн юрттэменыз тӥ асьтэдыз мукетъёсыныз уд ӵошатэ ини. Озьы ик Иегова юрттоз тӥледлы валаны, кутскиды-а тӥ вожъяськыны яке ушъямез-данъямез яратыны, но юрттоз ӝог воштӥськыны.

18. Кызьы тӥледыз буйгато кылъёс, кудъёсыз гожтэмын 2 Паралипоменонын 6:29, 30?

¹⁸ Лыдӟе 2 Паралипоменонэз 6:29, 30. Иегова тодэ, мар милям сюлмамы. Озьы ик со тодэ, макем трос милемлы кужым кулэ, та дуннелэн мылкыдыныз но асьмелэн тырмымтэосынымы нюръяськон понна. Тае адӟыса, Иегова милемыз эшшо но золгес яратэ.

19. Кыӵе пример вылын Иегова валэктэ, макем зол со милемыз яратэ?

¹⁹ Иегова милемыз яратэ озьы ик, кызьы анай аслэсьтыз нылпизэ яратэ (Ис. 49:15). Тани мар вера Рэйчел нимо сузэр: «Стефани нылы дырызлэсь азьло вордскиз. Куке мон сое нырысьсэ адӟи, со туж пичи но ляб вал. Нырысетӥ толэзьзэ со эмъюртын улӥз, но эмъясьёс лэзизы мыным котькуд нунал сое киям басьтылыны. Соку ми ог-огенымы эшшо но юнгес герӟаськимы. Али Стефанилы куать арес, со огъёзъёсызлэсь пичигес. Но нуналысь нуналэ мон сое юнгес но юнгес яратӥсько, малы ке шуоно со улонэз понна туж нюръяськиз но мыным трос шумпотон вайиз!» Малпаське: куке Иегова адӟе, макем ми тыршиськомы солы оскымон луыны, со милемыз ӵапак озьы ик яратэ. Та малпан милемыз туж буйгатэ!

20. Малы Иеговалэн ужась-тыршисьёсыз шумпотыса улыны быгато?

²⁰ Тон Иеговалы ужаськод-тыршиськод бере, тон пыриськод солэн бадӟым семьяяз, кудаз тонэ туж ярато. Ачиз Иегова но тонэ туж яратэ. Со ӧз малпа, тон мукетъёсызлэсь умойгес шуыса. Иегова адӟиз: тон зӥбыт-востэм адями, кудӥз дась солэсь дышетскыны но воштӥськыны (Пс. 24:9). Соин ик солэн тонэн эшъяськемез потӥз. Юн оскы, со дунъя, куке тон вань сюлмысьтыд солы ужаськод-тыршиськод. Юн но оскымон луэмед возьмато, тынад лякыт но чылкыт сюлмыд шуыса (Лука 8:15). Соин ик азьланяз но Иеговалы ужан-тыршонын лэсьты ваньзэ, мае тон быгатӥськод. Соку тон аслад азинсконъёсыдлы шумпотод.