1. Parché che Geovà no’l fà mia comparassion intrà noantri e i altri?

GEOVÀ el ghe piase che le robe le sìpia difarente una del’altra. Noantri savemo de questo parché ghen’è difarenti tipi de piante, bèstie e persone. Alora podemo esser sicuri che Geovà mai el fà comparassion intrà noantri e i altri. Invesse, lu el cognosse el nostro cuor, el sa quel che semo boni e quel che no semo mia boni de far e come semo stati slevadi su. (1 Sam. 16:7) Alora, Geovà no’l ne domanda de far una roba che no semo boni de far. E noantri ghemo de pensar come Geovà el pensa sora noantri stessi. Cossita, no ndaremo pensar che semo meio o pedo che altri. — Rom. 12:3.

2. Parché che no l’è bon far comparassion coi altri?

² Noantri podemo imparar tanto col bel esémpio dei altri. (Ebr. 13:7) Par esémpio, fursi te cognossi un fradel che l’è bravo nela predicassion, e te pol imparar tanto con lu. (Fil. 3:17) Ma ghen’è una granda difarensa intrà far compagno e far comparassion con una persona. Parché? Quando femo comparassion coi altri, podemo deventar invidiosi, restar desanimadi o pensar che no femo gnente de giusto. Come ghemo visto nel stùdio passà, voler esser meio che i altri pol intrigar la nostra amicìssia con Geovà. Par quela che Geovà el ne ga dato el consìlio de Gàlati 6:4, che dise: “Stà atento a quel che ti te sì bon de far. Alora, ti te restarè contento con ti stesso e nò in comparassion con nantra persona.”

3. Che boni cambiamenti te ghè belche fato par Geovà?

 ³ Geovà el vol che te resti contento con quel che ti te fè a lu. Par esémpio, se te sì belche batesà, te ghè fato questa dessision ti sol e par causa del to amor a Geovà. Proa anca pensar in altri cambiamenti che te ghè belche fato. Par esémpio, te ghè cada volta de pi voia de leder e studiar la Bìblia? Te sì bon de pregar a Geovà e parlar tuto quel che te pensi e che te senti? (Sal. 141:2) Te sì drio predicar cada volta meio e te ghè imparà a doperar ben le publicassion e vìdei par predicar e insegnar? Se te ghè una fameia, Geovà el te ga giutà a deventar un sposo, una sposa, un pare o mare meio? Se te ghè fato questi cambiamenti, te pol restar contento.

4. Cossa che ndaremo veder in questo stùdio?

⁴ Noantri podemo giutar i altri a restar contenti con quel che i ze drio far par Geovà. Par esémpio, no ghemo mai de far comparassion intrà quel che un fradel el fà e quel che i altri i fà. In questo stùdio, ndaremo imparar come i genitori i pol giutar i so fioi, come quei che i ze maridadi i pol giutarse un al altro e come i ansiani i pol giutar i fradei e sorele nela congregassion. Anca ndaremo veder che la Bìblia la pol giutarne quando volemo far de pi par Geovà. Come? Ela la pol giutarne a dessider far qualcossa, ma che semo boni de farla.

5. De acordo con Efesi 6:4, cossa i genitori no i ga de far?

⁵ I genitori i ga de star atenti par no far comparassion intrà un fiol e nantro, o voler che un fiol el fae de pi de quel che l’è bon. Questo pol farlo restar desanimà. (Ledi Efesi 6:4. *) Varda cossa che la sorela Sachiko * la ga dito: “I me maestri i volea che mi fusse meio che i altri coleghi. Anca la me mare la volea che me sforsesse tanto par esser un bel esémpio al me maestro e al me pare, che no l’era Testimònia de Geovà. Ela la volea che mi rispondesse tuto giusto nele prove, ma no ero mai bona de far questo. Fà belche tanti ani che mi go finio de studiar nela scola, ma seito ancora a domandarme se son drio far che basta a Geovà.”

6. Cossa che i genitori i pol imparar del Salmo 131:1, 2?

 ⁶ Ledi Salmo 131:1, 2. * In questo testo, Davi el ga dito che no’l ndea in serca de robe che le era massa grande o dele robe che no’l saria bon de rivarghe. Davi l’è stà ùmile e el savea quel che l’era bon e quel che no l’era bon de far. Cossita, lu l’era contento e el gavea pace. Cossa che i genitori i pol imparar? Lori i ga de esser ùmili con quel che i speta de lori stessi, ma i ga de far questo anca coi fioi. I genitori i ga de capir quel che i fioi i ze boni e quel che no i ze boni de far, e giutarghe a dessider far a Geovà quel che i sarà boni de rivarghe. Cossita, i fioi i ndarà sentir che i ga valor. Varda cossa una sorela, che la ga nome Marina, la ga dito: “La me mare mai la fea comparassion intrà mi e i me tre fradei o coi fioi dei altri. Ela la ga sempre dito che tuti i ga le so qualità e che tuti i ze pressiosi par Geovà. Par causa de questo, le ze pròpio ciare volte che fao comparassion intrà mi e i altri.”

7-8. Come el omo el pol darghe onor ala so dona?

⁷ El omo el ga de dar onor ala so dona. (1 Pie. 3:7) Questo vol dir che lu el ga de rispetarla tanto. Par esémpio, el omo che el dà onor ala so dona la trata come una persona importante, no’l va mia domandar che la fae una roba che no la ze bona e mai el farà comparassion intrà ela e altre done. Come la dona la ndaria sentirse se el so omo el seitesse a far comparassion? Varda el esémpio de Rosa. El so omo, che no l’è Testimònia de Geovà, el fà sempre comparassion intrà ela e altre done. Par causa de questo, la pensa che no la ga mia valor. Ela la ga dito: “I altri sempre i ga de giutarme a ricordar che Geovà el me ama.” El omo el ga de ricordarse che la maniera come el trata la so dona mostra che el dà valor al so matrimònio, ma anca ala so amicìssia con Geovà. *

⁸ El omo che el dà onor ala so dona sempre el parla robe bele sora ela ai altri e sempre el dise che la ama e che la ga tanto valor. (Pro. 31:28) L’è questo che el sposo de Katerina, che ghemo parlà nel stùdio passà, el ga fato par giutarla a veder che la gavea valor. Quando Katerina la era una toseta, la so mare la seitea a dirghe su, e a compararla cole so amighe e altre tosete. Par causa de queste robe, Katerina la ga seità a far comparassion intrà ela e altri, anca dopo de deventar una Testimònia de Geovà. Ma el so omo la ga giutà tanto. Katerina la ga dito: “El me omo el me ama, el me loda par quel che fao de bon e el prega par mi. Lu anca el me ricorda dele bele qualità de Geovà e el me giuta a pensar dela maniera giusta.”

9-10. Come i ansiani i ga mostrà amor quando i ga giutà una sorela a fermarse de far comparassion intrà ela e altri?

⁹ Come i ansiani i pol giutar i fradei che i fà comparassion coi altri? Varda el esémpio dela sorela Hanuni. Quando la era una toseta, mai la era lodada. Ela la se ricorda: “Mi gavea vergogna e pensea che i altri tosatei i era meio che mi. Mi go sempre fato comparassion intrà mi e i altri.” Anca dopo de deventar Testimònia de Geovà, Hanuni la ga seità a compararse coi altri. Par causa de questo, la pensea che no la era importante  nela congregassion. Ma la ga cambià la so maniera de pensar e ancoi la ze una pioniera pròpio contenta. Cossa che la ga giutà?

¹⁰ I ansiani i ga dato aiuto a Hanuni. Lori i ga dito che ela la gavea tanto valor nela congregassion e la ga lodà par causa del so bel esémpio. Cossita, la ga sentio che la era pròpio importante. Hanuni la ga dito: “Arquante volte, i ansiani i me ga domandà se mi podea incoraiar altre sorele. Far questo me ga giutà a sentirme importante nela congregassion. Me ricordo de quando i ansiani me ga ringrassià parché go incoraià arquante gióvene. Lori i ga anca ledesto 1 Tessalonissensi 1:2, 3 par mi. Quele parole me ga fato tanto ben. Par causa del aiuto dei ansiani, mi dao tanto valor par quel che mi fao nela organisassion de Geovà.”

11. Come podemo giutar quei che i ze drio sofrir, come dise in Isaia 57:15?

¹¹ Ledi Isaia 57:15. * Geovà el se preocupa tanto con quei che i ze drio sofrir. I ansiani e tuti noantri podemo incoraiar questi fradei e sorele. Podemo far questo quando mostremo che ghe volemo tanto ben. Geovà el vol che giutemo i nostri fradei a sentir el amor che el ga par cada un de lori. (Pro. 19:17) Noantri anca giutemo i nostri fradei quando semo ùmili. Par esémpio, no volemo mia farse veder parché questo podaria far altri restar con invìdia. Pitosto, ghemo de doperar le nostre abilità e quel che savemo par incoraiar ai altri. — 1 Pie. 4:10, 11.

12. Parché che le persone le ghe piasea de star insieme de Gesù? (Varda la ilustrassion dela prima pàgina.)

¹² Noantri podemo imparar tanto dela maniera che Gesù el tratea i so dissìpoli. I lìderi religiosi del tempo de Gesù i era orgoliosi e i fea le persone sentirse sensa valor. Ma Gesù no l’era cossita. (Gioani 6:37) Gesù l’è stà el omo pi importante che el ga belche vivesto qua nela Tera, e anca cossita, lu l’era “manso e ùmile de cuor”. (Mat. 11:28-30) Lu l’era pròpio bravo e el savea tante robe, ma no’l volea farse veder ai altri. Invesse, lu el parlea e el doperea ilustrassion che tute le persone le capia e le tratea con rispeto. — Luc. 10:21.

13. Come savemo che Gesù el tratea i so dissìpoli con bontà e amor?

¹³ Gesù el tratea i so dissìpoli con tanta bontà e amor. Gesù el savea che le abilità e la vita de lori le era difarente una del’altra. Alora, Gesù no’l spetea che tuti i fesse le medèsime robe nela predicassion. Invesse, lu el restea contento con quel che cada un el fea. Noantri semo anca sicuri de questo par meso dela ilustrassion che el ga fato sora i talenti. In questa ilustrassion, el paron el ga dato laoro de acordo cola capacità de cada schiavo. Due schiavi i ga laorà tanto ben, ma un de lori el ga guadagnà de pi che quelaltro. Anca cossita, el paron el ga lodà tuti i due cole medèsime parole: “Brao, schiavo bon e fedele!” — Mat. 25:14-23.

14. Come podemo tratar le persone come Gesù?

¹⁴ Gesù el mostra tanto amor e bontà a noantri. Gesù el cognosse le nostre abilità e la nostra vita, e el resta tanto contento quando femo el nostro meio. Noantri podemo tratar i nostri fradei dela medèsima maniera che Gesù. Pol esser che arquanti fradei no i ze boni de far quel che i altri i fà, ma mai ndaremo parlar o far qualcossa che li fae sentirse sensa valor. Pitosto, volemo lodarli par quel che lori i ze boni de far a Geovà.

15-16. Parché che l’è stà bon par Midori scòlier far qualcossa de acordo con quel che la podea?

¹⁵ Quando volemo far de pi par Geovà, semo pi contenti e sicuri de quel che volemo far. Ma noantri ghemo de dessider cossa far de acordo cole nostre abilità e la nostra vita, e nò de acordo coi altri. Parché, se noantri volemo tanto far una roba che no saremo boni de farla, restaremo desanimadi. (Luc. 14:28) Varda el esémpio de una pioniera che la ga nome Midori.

¹⁶ Quando Midori la era una toseta, la ga sofrio tanto. So pare, che no l’è Testimònia de Geovà, la ghe disea su e el seitea a far comparassion intrà ela e i so fradei e i so coleghi. Midori la ga dito: “Mi pensea che no gavea gnanca un valor.” Varda cossa che la ga giutà a cambiar la so maniera de pensar. Midori la ga dito: “Leder la Bìblia tuti i giorni me ga giutà a gaver pace e a saver che Geovà el me ama.” Midori la ga anca pensà in quel che la podea far de pi par Geovà e la ga domandà el so aiuto. Cossita, la ze restada contenta con quel che la ga fato.

17. (a) Come che podemo ‘seitar a far nova la nostra maniera de pensar’? (b) Cossa ndarà suceder se femo questo?

¹⁷ No l’è mia fàcile fermarse de pensar che no ghemo mia valor. Par quela che Geovà el dise: ‘Seité a far nova la vostra maniera de pensar.’ (Efe. 4:23, 24) Come che podemo far questo? Noantri ghemo de sforsarse par pregar, studiar la Bìblia, pensar sora e domandar sempre che Geovà ne dae forsa. Cossita, par meso del so spìrito santo, Geovà el ndarà giutarne a no far comparassion coi altri. E se scominsiemo a mostrar invìdia o orgòlio, Geovà el ndarà giutarne a nicorderse e a cambiar.

18. Come 2 Cróniche 6:29, 30 ne consola?

 ¹⁸ Ledi 2 Cróniche 6:29, 30. * Geovà el ne cognosse tanto ben. Lu el sa del sforso che femo par causa dele nostre imperfession e par no far quel che le persone del mondo le fà. Ma quando Geovà el vede che semo drio sforsarse tanto, lu el ne ama ancora de pi.

19. Che ilustrassion ne giuta a capir quel che Geovà el sente par noantri?

¹⁹ La Bìblia la dopera el amor che ghen’è intrà una mare e el so bambin par mostrar cossa che Geovà el sente par noantri. (Isa. 49:15) Varda el esémpio de Rachel, che la ga dito: “La me fiola Stephanie la ze nassesta vanti del tempo. Quando la go visto par la prima volta, la era tanto picinina. Ma el dotor el me ga assà ciaparla in brasso tuti i giorni in quel mese che la ze restada nel ospedal. Par causa de questo, noantre due semo restade tanto darente una del’altra. Ancoi, Stèphanie la ga sei ani e la ze pi pìcola che le altre tosete dela so età. Anca cossita, mi la amo tanto parché la se ga sforsà par viver. Mi son tanto contenta de gaverla!” Geovà el sente la medèsima roba par noantri quando el vede che femo sforso par servirlo. Saver de questo ne assa tanto contenti.

20. Parché che i servi de Geovà i pol esser contenti?

²⁰ Come servo de Geovà, te sì tanto valioso par la So fameia e no ghen’è nantra persona compagna a ti. Geovà el ga volesto che te lo cognossessi, nò parché te sì meio che i altri, ma parché lu el te ga vardà e el ga visto che te eri una persona ùmile e che te volei imparar. (Sal. 25:9) Alora sìpia sicuro che Geovà el dà tanto valor a quel che te fè par lu. La to perseveransa e lealtà le ze una prova che te ghè un cuor sinsiero e bon. (Luc. 8:15) Alora, seita a far el to meio a Geovà. Cossita, te restarè contento con quel che te pol far.