1. Mwaha wa heeni Yehova ohininlikanxeraawe ni atthu akina?

YEHOVA omusivela itthu soohiyana-hiyana. Eyo ennooneya mwa soopattuxiwa sawe, waahela mpuwa atthu. Mutthu mmoha a hiyo ori meekhaawe. Mwaha wa yeeyo, Yehova khankhalakhala oolikanxerakani ni mutthu mukina. Owo onnoona omutthu anyu wa mpuwa. (1 Sam. 16:7) Owo tho onnahela mpuwa ele munweraanyu opaka ni muhinweraanyu. Nave-tho moota muhuuwalaanyu. Owo khanoovekelani opaka etthu muhiiweraanyu opaka. Hiyo nintthuneya oxuttera wiisoonaka ntoko hiiho owo onnoonelaawe. Napaka eyo nnookhalano “moonelo wooreera” naari khaniinrowa wiisoonaka okhala atthu ootthuneyaxa naari ohitthuneya.—Arom. 12:3.

2. Mwaha wa heeni nihintthuneyaahu wiilikanxera ni atthu akina?

² Khaiyene ti vootthekeya olikanxa ntakihero nooreera naatthu akina. Mwa ntakihero, apaale nyuwo moomusuwela munna ookhumela nnene ni muteko woolaleera. (Aheb. 13:7) Otthara ntakihero na munna owo, pooti wookhaviherani nyuwo moota wookhumela nnene ni muteko woolaleera. (Afil. 3:17) Nto wookhala ovirikana otokweene variyari va otthara ntakihero na mutthu ni wiilikanxera. Mutthu oniilikanxera ni atthu akina pooti okhalano nrima, naari okhulumuwa aniisoona weera khamuteko. Mene ntoko noonnaahu yoosoma evinre, okhalano munepa wootthuna okuphana ni asinna a mmulokoni pooti onanariha mukhalelo ahu wa omunepani. Nto tiiyeeyo Yehova onnivahaawe miruku iya: “Vano mutthu ti mutthu awehexexe muteko onèraiye, ni siso anakhaleno ovuwa wa yoworu ni khaiyene wa muteko wa mukhw’awe.”—Agal. 6:4.

3. Mwa itthu heeni iya iromolinwe va, munoonaanyu weera mookela vahoolo?

³ Yehova ontthuna weera muhakalaleleke okela wanyu vahoolo woomunepani. Mwa ntakihero, wakhala weera nyuwo mooBatiziwa, vooreera! Eyo yoothanla nyuwo mpankaanyu meekhaanyu mwaha wookhalano nsivelo ni Muluku. Muupuweleke moota mukenlaanyu  vahoolo mBatiziwakaru. Mwa ntakihero, munoona weera osiveliwa wanyu omusoma Biblya ni yoosomaanyu ya vameekhaanyu yoohatxeerereya? Munoona weera mavekelo anyu teekhaikhai ni ankhuma vamurimani? (Nsal. 141:2) Nyuwo munoona weera munvara murima mmapuroni muteko ahu woolaleera ni mooxuttera ovarela muteko nnene ikaruma sahu sooxuttiha? Nkha wakhala weera mookhalano etthoko, munoona weera Yehova ohookhaviherani okhala mulopwana, muthiya naari tiithi annene? Wakhala weera nyuwo munnakela vahoolo mwa itthu iya, nyuwo pooti ohakalalela.

4. Eheeni ninrowaahu woona yoosoma ela?

⁴ Hiyo nnimwaakhavihera akina ohakalala waya ni okela vahoolo moomunepani. Ni hiyo tho nnimwaakhavihera weera ehimakeleke wiilikanxera. Yoosoma ela ninkela woona moota asipaapa ankelaaya waakhaviheraka anamwane aya, nave nnoorowa woona moota anamathelana akhanlaaya ookhaviherana mukina ni mukhwaawe ni moota asitokweene a mmulokoni anrowaaya waakhavihera asinna ni asirokora. Avinyaka, ninkela woona moota malamulo a Biblya annikhaviheraaya okhalano sooluluwanya seekhaikhai, moovarihana ni mweemmo ninwerelaahu.

5. Moovariha ni Aefeso 6:4, ti heeni a sipaapa ehintthuneyaaya opaka?

⁵ Asipaapa ontthuneya wiikasoopa weera ehimakeleke waalikanxera anamwane aya ni anamwane akina naari waakhanyerera opaka ele ahinweraaya. Itthu ntoko iya pooti omunyoonyiha mwaana. (Mmusome Aefeso 6:4.) Murokora mmoha onitthaniwa Sachiko * ohimme há: “mapurusoore aka yaatthuna weera miyo kikhale ookhumela nnene waaphwaha makoleeka aka kaasomaakano. Moowatxerera ameyaka yaatthuna weera miyo kikhumeleke nnene oxikola weera kihelele onamoona wooreera wa mapurusore aka ni apapaka yahaakhanle namoona a Yehova. Veekhaikhai, awo yaatthuna weera miyo kikumiheke inoota itokotokoxa iprova sootheene kaapakaaka. Nto kahoona weera eyo khayaawereeya. Naamwi ehuhu yintxipale kimalinheene osoma , mpaka va kinnikoha wakhala weera kinipaka kinweraaka mmutekoni mwa Yehova.”

6. Asipaapa anxuttera eheeni ni yoolepa ya Nsalmu 131:1, 2?

⁶ Asipaapa pooti oxuttera etthu yootepa otthuneya va Nsalmu 131:1, 2 (Mmusome.)  Mwene Davidi ohimme weera owo khaasa “itthu sitokotoko”, naari itthu ahaaweraawe ophwanya. Mwaha wookhala oowiyeviha aawera ‘oririha ni omaliha murimaawe’. Masu a Davidi enanixuttiha eheeni? Asipaapa, mukhale owiiyeviha ohiya ele muwehereranyu weera mpake mene tho wa ele muwehereranyu wa anamwane anyu. Musuweleke ele mwaninyu onweraawe opaka ni ele ohinweraawe, ni mmukhavihereke okhalano sooluluwanya weera awere ophwanya. Mwapaka eyo, mwaninyu onimwiisoona weera ookhala muteko. Murokora mmoha onitthaniwa Marina uupuwelaka ohimme há: “ameyaka khayaakilikanxera ni asinnaka naari ni anamwane aatthu akina. Ehuhu yootheeene awo yannakixuttiha weera atthu ootheene arinono mikhalelo soovirikana nitho weera mutthu ti mutthu tootthuneya vamaithoni va Yehova. Mwaha wa nikhavihero naya, miyo nkininto wiilikanxera ni atthu akina.”

7-8. Mulopwana anoonihereke hayi weera onnattittimiha amwaarawe?

⁷ Mulopwana mukristu ontthuneya waattittimiha amwaariye. (1 Ped. 3:7) Ottittimiha onhela mpuwa omuhela ekhitto mutthu mukina, ni omuthokorora moothanleya. Mwa ntakihero, mulopwana onattittimiha amwaarawe, onaakasoopa ntoko mutthu ootthuneyaxa. Owo khanrowa waaveekela opaka etthu ahiinrowaaya owera opaka. Nave tho khanrowa waalikanxera ni athiyana akina. Muthiyana onrowa woonelaka hayi wakhala weera aiyawe annamakela omulikanxera ni athiyana akina? Nwehe ntakihero na Rosa. Aiyawe ahikhanle namoona a Yehova ikwaha sintxipale annamulikanxera ni athiyana akina. Eyo yaamweeriha Rosa ohisoonela vatthu. Owo ohimme há: “miyo ikwaha sintxipale kintthuna wuupuxeriwa weera miyo kiri ootthuneya vamaithoni va Yehova.” Tivaavo oraaya wootthuneya mulopwana mukristu waattittimiha amwaariye. Mwaha wooweera owo oosuwela weera eyo enookhavihera etthoko awe ni onthamwene awe ni Yehova. *

⁸ Mulopwana onamuttittimiha mwaariye onnamuuluma nnene akhala ni asinkwaawe, akhala ni amwaarawe onnaleela weera kinnoosivelani ni onnattottopela. (Mir. 31:28) Tiyeeyo aiyawe Katerina aromoliwe yoosoma evinre yaapakaaya weera aakhavihere amwaariye oviriha muupuwelo woonanara. Emaara araawe mwaana, Katerina annuulumwa moohirerela ni ameyawe yaawo yaamulikanxera ni asaaruusi akina wahela mmupuwa asikhwaawe. Mwaha wa yeeyo, Katerina aapatxera wiilikanxera ni atthu akina—naamwi muhoolo owo akhalakaru namoona a Yehova! Nto aiyawe mukristu yaamukhavihera ohiya moonelo ole, ni weera akhalekeno moonelo wa eriyari-neeriyari voohima sa yoowo. Katerina ohimme há: “aiyaka annasiveliwa ni miyo, awo annakittottopela kaapakaka itthu sooreera ni annakivekelela. Nave-tho awo annakuupuxera mikhalelo sooreera sa Yehova ni annakikhavihera ovenxa minyuupuwelo saka soonanara.”

9-10. Asitokweene ansivelo yaamukhavihenre hayi murokora mmoha oviriha mukhalelo woowiilikanxera ni atthu akina?

⁹ Asitokweene anrowa waakhavihera hayi asinna arinono mukhalelo wootthuna wilikanxera ni atthu akina? Nwehe ntakihero na murokora onitthaniwa Hanuni emaara aaraiye mwaana waari wooxupa wiiwa ottottopeliwa. Owo onuupuwela: “miyo kaari mutthu owiisuka ni koona weera anamwane akina yaari ootthuneya okipwaha miyo. Nto ovinyera vaavo kiinilikanxera ni atthu akina.” Naamwi akhalakaru namoona a Yehova, Hanuni aavirelela wiilikanxera ni atthu akina. Mwaha wa yeeyo, owo oona weera khamuteko mmulokoni. Mene owo vano piyoneira  oohakalala. Eheeni yaamukhavihenre opaka matxentxo a moonelo awe?

¹⁰ Hanuni ohimme weera, naari nikhavihero aakhenlaawe na asitokweene a nsivelo. Asitokweene awo yaamuleela weera owo annavareleya muteko mmulokoni, ni yaamuttottopela mwaha wa ntakihero nawe nooreera. Hanuni olempe há: “ikwaha ikina asitokweene yannakivekela weera kaakhavihere asirikora yaatthuna olipihiwa. Miritti iya saakikhavihera wiisona weera miyo kinnavareleya muteko. Kinnuupuwela ekwaha asitokweene yakixukurenlaaya mwaha woowaalipiha asirokora eeli asimwali. Awo yaasoma ni miyo yoolepa ya 1 Atesalonika 1:2, 3. Nto etthu ele yaakivara murima! Mwaha wa ntakihero nooreera na asitokweene ala, olelo kinnahela mwiitti nipuro kiraakano mmarehereroni mwa Yehova.”

11. Nnakhavihere hayi ale ari “othanana ni òwiyeviha murima”, ehimmwale va Yesaya 57:15?

¹¹ Mmusome Yesaya 57:15. Yehova onnapwattha atthu “othanana ni òwiyeviha murima”. Ohiya waahiyera asitokweene paahi, atthu ootheene hiyo, nnoowera waakhavihera asinna ni asirokora antthuna olipihiwa. Mukhalelo mmoha wa moota woopaka eyo, ori woonihera weera ninnapwattha awo. Yehova ontthuna weera naakhavihereke asinna woona nsivelo owo oraaweno ni iputtiputthi sawe. (Mir. 19:17) Opwaha wa yeeyo, hiyo pooti waakhaviihera asinnihu wakhala weera ninnoonihera wiiyeviha. Khanintthuneya opaka etthu weera nihimmwe mwaha weera opaka eyo, pooti okumihera nrima wa atthu akina. Ohiya opaka eyo, nintthuneya weera nivariheleke owerawahu ni osuwela wahu weera nilipihaneke mukina ni mukwaawe.—1 Ped. 4:10, 11.

12. Mwaha wa heeni atthu oowiiyeviha waasivelaaya okhala ni Yesu? (Nwehe elataratho va kaapani.)

¹² Moota Yesu aathokorowaawe attharili awe pooti onixuttiha etthu wa moota woowathokorowa akina. Yesu mulopwana mmoha ootthuneyaxa otonko okhala. Naari vareene hiiho, owo aari “opixa murima ni owiyeviha”. (Math. 11:28-30) Owo aari oowiwamo ni aakhalano osuwela. Mene owo khaapaka itthu weera ahimmwe. Ohiya opaka eyo, emaara axuttihaawe aavarihela muteko nuulumo nookhweya ni maphwanaphwaniho yaavara murima atthu oowiiyeviha. (Lu. 10:21) Ahooleli a ittiini a ehuhu ya Yesu, yaari owiisoona. Mukhalelo owo, wannaweriha atthu akina wiisonaka weera khiyaano muteko vamaithoni va Muluku, mene Yesu khaapaka ntoko yaawo. (Yoh. 6:37) Owo annaattittimiha atthu ootheene.

13. Noonihereñye hayi nsivelo ni okhapelela wa Yesu?

¹³ Okhapelela ni nsivelo na Yesu nannonihereya moota owo aavilelaawe atthareli awe. Owo aasuwela weera mutthu ti mutthu aakhalano soowera sawe ni mikhalelo sawe soovirikana. Nto mwaha wa yeeyo, khaiyene ootheene yaarowa okasoopa miritti naari ovara vantxipale muteko woolaleera. Naamwi vareene hiiyo, Yesu annahela mwiitti wiilipihera wa mutthu ti mutthu. Yesu aari mutthu oosuwela owiriyana ni eyo yaahoneya emaara aapankaawe niphwanaphwaniho na etalento. Mwa niphwanaphwaniho nna, pwiya onnaavaha miritti akaporo awe “moovarihana ni owera waya”. Mmoha akaporo aavanre nnene, aawera ophwanya eluukuru yaapwaha akaporo akina, mene ahattottopela ooweeli ni masu mamoharu eraka: “vorera opwaha, weyo kaporo orera murima ni ororomeleya!”—Math. 25:14-23.

14. Ninrowa otakiha hayi moota Yesu aakasoopawe atthu?

¹⁴ Yesu onnanivilela ni onikhapelela ni nsivelo. Owo oosuwela weera owera wahu ni makhalelo ahu toovirikana, nave owo onnahakalala naapakaka ele hiyo ninweraahu. Hiyo nintthuneya omutakiha Yesu. Pooti weera asinna akina khanwera opaka ele asinna akina anweraaya opaka. Naamwi vareene hiiho, khaninrowa wuuluma etthu eneera ewuulihihe muru  naari ohikhala muteko. Opwaha mwa yeeyo, nintthuneya weera naattottopeleke mwaha woowiilipihera waya opaka ele anweraaya mmutekoni mwa Yehova.

15-16. Murokora attottenle hayi mureerelo mwaha wookhalano sooluluwanya sa ekhaikhai?

¹⁵ Sooluluwanya sa omunepani sinnanivaha ephiro ni yoolakela ya mweekumini. Mene yootthuneya ori okhalano sooluluwanya sinvarihana ni sooweera sahu ni makhalelo ahu, ohiya soowera sa atthu akina. Sooluluwanya saahikhala sa ekhaikhai, pooti onittettheiha ni onikhulumula. (Lu. 14:28) Nwehe ntakihero na pioneira onitthaniwa Midori.

¹⁶ Midori emaara aarawe mwaana, ikwaha sintxipale apapawe yaawo yahaakhanle namoona a Yehova yannampuhera. Awo yannamulikanxera ni makoleeka awe asoomaaweno oxikola. Midori oneera: “miyo kiisiona okhala ohivareleya muteko.” Mene annuwakaru Midori aapatxera wiisona weera ookhala ni muteko. Owo ohimme tho há: “omusoma Biblya mahuku ootheene waakikhavihera okhalano murettele mmurimani mwaka ni woona weera Yehova onnakisivela.” Opwaha mwa yeeyo, Medori aalakela okhalano sooluluwanya sa omunepani sa ekhaikhai ni anvekela Yehova weera amukhavihere okwanihera. Yookhumelela aya, ti yooweera Medori onnahakalalela okela wawe vahoolo wa omunepani.

17. Ninrowa ovirelela hayi otxentxa muupuwelo ahu, ni enrowa okhumelela eheeni?

¹⁷ Minyuupuwelo soonanara khasinvira moowakuveya. Mwaha wa yeeyo, Yehova onnileelaawe weera: “ni oyariwa wa naveli mmunepani wa miruku sanyu” [nvirelele otxentxa muupuwelo anyu]. (Aef. 4:23, 24) Weera niwere opaka eyo, onttthuneya onvekela, osoma masu a Muluku ni otthokelela. Nto mwiilipihereke weera nwere opaka itthu iya, ni munvekeleke Yehova weera oovaheeni ikuru. Munepa wootteela wa Yehova,  onimookhaviherani owina munepa wootthuna wiilikanxera ni atthu akina. Vano wakhala weera nrima naari wiisunnuwiha mookhalano vamurimani, munvekele Yehova weera ookhavihereni ovinxa vamurimani vanyu minyupuwelo ntoko iyo.

18. 2 Sowereya 6:29, 30, onrowa woomalihani hayi?

¹⁸ Mmusome 2 Sowereya 6:29, 30. Yehova oosuwela murimaahu ni oosuwela maxupo ninwanaahuno—ni munepa wa elapo ni ohimalela wahu. Yehova aanoonaka niwanaka ni itthu iyo soonanara, onsivela wawe onnaatxeereraya.

19. Ntakihero heeni Yehova onvarelaawe muteko weera aniwexexihe nsivelo oraweno ni hiyo?

¹⁹ Yehova weera aphwanaphwanihe nsivelo oraaweno ni hiyo, onnavarela muteko nsivelo na maaye ni mwanawe. (Yes. 49:15) Nwehe ele yamweerenle murokora onitthaniwa Rachel. Owo olempe há: “mwanaka Stephanie kaamuyanre minyeeri sihikwanenle. Ekwaha yoopatxera kamoonnaaka owo aari mukhaanene ni ohilipa. Mene mpuwa wa mweeri mmoha yoowo atthuneyaawe okhala nipuro ankhuneeliwayavo anamwane oohikwanela minyeeri, otxipattala kaaheereliwa weera kimuyareke ottuli. Ehuhu ele kaakhalaaka ni mwanaka, yaanikhavihera okhalano nsivelo. Vano Stephanie orino iyaakha 6 ni tooyeva waapwaha anamwane aalikanaaweno oyariwa. Miyo kinnamusivela mwaha wooweera ohilipihera weera akhale mukumi ni mwaha wooweera okiruhela ohakalala mweekumini mwaka!” Ti vooreera osuwela weera Yehova orino nsivelo nimoharu ni hiiyo, aanoonaka niilipiheraka weera nimukokhorele ni onvarela muteko ni murimaahu wootheene!

20. Mathowa eheeni muraanyuno weera muhakalaleke mwaha wookhala murumeyi owiiveleela a Yehova?

²⁰ Mwaha wookhala murumeyi a Yehova, nyuwo muri meekhiinyu ni muneerela empari emusi awe ya veelaponi erimo atthu oohiyana-hiyana. Yehova khoopurulenleni mwekhaikhaini mwaha wookhala oosuwelaxa waaphwaha akina. Owo opurulenleni mweekhaikhaini mwaha weera ooweha murimaanyu, anoona weera nyuwo mutthu oowiyeviha ni otthuna oxuttera. (Nsal. 25:9) Muroromeleke weera Yehova onnahela mwiitti itthu sootheene mumpakaanyu mmutekoni mwawe. Ovilela wanyu ni ororomeleya wanyu onnonihera weera nyuwo mutthu murinono murima “worera ni wa phama”. (Lu. 8:15) Mwaha wa yeeyo, nvirelele onvaha Yehova ele munweraanyu. Vano nyuwo mookhalano mathowa mantxipale a ohakalala “wawinyuru”.