1. მუშენ ვა მადარენა იეჰოვა შხვეფს?

იეჰოვას უჸორს მრავალფეროვნება, მუთ თიშ სარკო გუნაჭყეფუეფშე, თინეფ შქას ადამიანეფშე, იძირე. ჩქი არძა განსხვავებულეფ ვორეთ. თაშ ნამდა, იეჰოვა დღას ვეშმადარენა შხვეფს. თინა ოკვირ ჩქინ გურს — შინაგან პიროვნებას (1 სამ. 16:7). ღორონთის უჩქჷ ჩქინ მუჭოთ ძალიერინ, თეშ სუსტ მხარეეფ დო თინა ხოლო, მუნერ ბაღანობა მიღდეს. ათეშენ თიშე უმოსის ვეთხინს, ვინემ შემლებნა. ჩქი იეჰოვაშ თოლით ოკო ვუჯინედათ ჩქინ დუდის. შედეგო მაღვენუნა „საღ აზროვნება“ — ვართ მითინშე უმოს მაღალო გივორინუანთ ჩქინ დუდის დო ვართ თიცალ ნაკლებო მიფრჩქინანთ, ნამდა უღირსობაშ გრძნობაქ გომრჩქინდან (რომ. 12:3).

2. მუშენ ვა რე ჯგირ შხვეფშა დუდიშ შედარება?

² მუშო ოკო რაგად, ჩქი შემლებნა, დიბგურუათ შხვეფშე, მაგალთო, თი ართგურ და დო ჯიმალეფიშ მაგალითეფშე, მით ეფექტურო მსახურენა (ებრ. 13:7). თინეფიშ დაკვირებათ შემალებენა ქობძირათ, მუჭო გუვაუჯგუშათ ჩქინ მსახურება (ფილ. 3:17). მარა პიროვნებაშ მაგალითიშ მეჸუნა დო თიშა დუდიშ შედარება შხვადოშხვა მუდგარენ რე. თეცალ შედარებაქ შილებე გინმოშქვან მენჯარიშო, გომტახან გურ ვარდა გომრჩქინან უღირსობაშ გრძნობა. თეს გეძინელ, მუჭოთ წოხოლენ სტატიას რე გარჩიებულ, მუჟამსით ვოცადუთ, ჩქინ და დო ჯიმალეფშე უჯგუშეფო ქოფრჩქინდათ, გილმელებნა იეჰოვაწკუმა ურთიერთობა. ათეშენ იეჰოვა ჸოროფათ ელამჩანა: „თითოულქ მუშ საქმეს დეკვირას; თენა მოუღანს თის ხიოლს დო ვართ ხოლო მუშ დუდიშ შხვეფშა შედარება“ (გალ. 6:4).

3. თქვა მუს მიოჭირინეთ იეჰოვაშ მსახურებას, მუდგაქ ხიოლ მოიღეს?

 ³ იეჰოვას ოკო, გეფხარათ სულიერო წიმი ულათ. მაგალთო, უკვე ნათილ ქორეთ-და, მუშო ოკო რაგად, მანგარო გოხიოლნა, ნამდა თე მიზანს მიოჭირინეთ! თე გადაწყვეტილება თქვა პირადო მიღით, მუთ იეჰოვაშ მიმართ თქვან ჸოროფაქ გოკეთებაფუეს. დეფიქრით, მუს მიოჭირინეთ ნათუაშ უკულ. მაგალთო, შილებე უმოსო ქიგეჸოროფეს ბიბლიაშ პირად კითხირ დო გურაფაქ. თქვან ლოცვეფქ უმოს აზრიანო გინირთჷ (ფსალმ. 141:2). გაუჯგუშით ქადაგებაშ დროს ჩიებაშ წუმოჭყაფაშ უნარ დო უმოს ეფექტურო ირინუანთ ქადაგებას მოხვარნან თი საშვალებეფს. ოჯახ ქორჸუნან-და, შილებე იეჰოვაქ მიგეხვარეს, უჯგუშ ქომონჯ, ოსურ, ვარდა მშობელ ჸოფედითკო. თქვა შეილებნა, რდათ ბედნერეფ დო კმაყოფილეფ თი ირფელშენ, მუდგას თეცალ საკითხეფს მიოჭირინეთ.

4. მუს გუვარჩიენთ თე სტატიას?

⁴ ჩქი შემლებნა, შხვეფს მივეხვარათ, მუნეფიშ სულიერო წიმი ულათ გეხარან დო მითინს ვეშუდარან დუდ. თე სტატიას ჩქი გუვარჩიენთ, მუჭო რე შეიოლებერ, ნამდა მშობლეფქ მეხვარან სქუალეფს, მეუღლეეფქ — ართიანს დო უხუცესეფ დო შხვეფქ — და დო ჯიმალეფს. ბოლოს გუვარჩიენთ ნამთინე ბიბლიურ პრინციპის, ნამუთ მიმეხვარებნა, დეფიფქრათ თიცალ გონივრულ მიზნეფშე, მუდგაშ მეჭირნაფა შემალებენა.

5. მუჭოთ ეფესოელეფიშ 6:4-ის ჭარჷ, მუშ კეთებას ოკო ეუჩილითუან დუდ მშობლეფქ?

⁵ მშობლეფ ფრთხილას ოკო რდან, ნამდა ართ ბაღანა მაჟიას ვეშუდარან ვარდა თიშე უმოს ვა მოთხუან, ვინემ შეულებ. სანარღოთ, თეჯგურა საქციელქ შილებე ბაღანა გაღიზიანას (წეკითხით ეფესოელეფიშ 6:4). ართ და, ნამდგას საჩიკო * ჯოხო, იჩიებ: „მასწავლებერეფ ჩქიმდე თიშე უმოსის ითხინდეს, ვინემ შხვა ბაღანეფშე. თეწკუმა ართო, ჩქიმ დიდას ოკოდ, ჯგირო იბგურეკო, ნამდა თენა ჯგირ დამოწმება ჸოფედკო მასწავლებერეფშო დო ჩქიმ მუმაშო, ნამუთ იეჰოვაშ მოწმე ვა რდჷ. თის ოკოდ, გამოცდეფ 100 პროცენტიან შედეგით ჩუვაბარკო, მუდგაშ კეთება ვეშმალებედ. მართალ რე, სკოლა ვათენ თიშ უკულ წანეფქ მიკილ, მარა მინშა იშენით ფიფქრენქ, ნამდა თიმწკუმა ხოლო, მუჟამსით მუთ შემლებუნ ირფელს ვორთუქ, იეჰოვა ვა რე ჩქიმით კმაყოფილ“.

6. მუშ გურაფა შეულებნა მშობლეფს ფსალმუნიშ 131:1, 2-შე?

 ⁶ მშობლეფს მნიშვნელოვან მუდგარენიშ გურაფა შეულებნა ფსალმუნიშ 131:1, 2-შე (წეკითხით). მეფე დავითიქ თქუ: „ვართ დიდ მუდგარენს ბგორუნქ“, შხვა სიტყვეფით ქოფთქუათინ, ვენჭუაფუდ თიშა, მუდგაშ კეთება ვეშიალებედ. თის თანდაბლობა დო მოკრძალებაქ მეხვარ, ვა უდინუაფუდკო სიმშვიდე დო კმაყოფილება. მუშ გურაფა შეულებნა მშობლეფს დავითიშ სიტყვეფშე? მშობლეფს თანდაბლობა დო მოკრძალება მეხვარებ, ქოთ მუნეფიშ დუდის დო ქოთ ბაღანეფს ზედმეტ ვა მოთხუან. თინეფს შეულებნა მუნეფიშ ბაღანეფს დუდ დაფასებულო ოგინაფუან თით, ნამდა ქაძირუან, მუშ კეთება გიშალენა ჯგირო დო მუშ — ვარ. თეშ უკულ ქიმეხვარან ბაღანეფს, ქიფიქრან თიცალ მიზნეფშე, ნამდგაშ მეჭირნაფა შეიალებენა. ართ და, სახელო მარინა, იშინანს: „ჩქიმ დიდა დღას ვა მადარენდჷ ჩქიმ სუმ ჯიმას დო ვართ შხვა ბაღანეფს. თიქ დუმოგურუ, ნამდა არძას შხვადოშხვანერ უნარ მიღნა დო თითოულ ძვირფას ვორეთ იეჰოვაშო. ათეშენ, მა ნაკლებო ვადარენქ ჩქიმ დუდის შხვეფს“.

7, 8. მუჭო შეულებნა ქომონჯეფს, მეუღლეშ პატიცემა გიმირჩქინან?

⁷ ქრისტიან ქომონჯიქ პატი ოკო ცას მეუღლეს (1 პეტ. 3:7). თეს გაკეთენს, მუჟამსით განსაკუთრებულ ყურადღებას გეგმირჩქინანს დო მანგარო დაფასენს თის. თინა ვა მოთხინს მეუღლეს შეულებუნ თიშე უმოსის დო ვართ შხვეფს შეუდარენს. მუ გლახა შედეგიქ შილებე მაჸუნას მეუღლეშ შხვაშა შედარებას? ართ დაშ, როზაშ, მეუღლე, მით ვა რე იეჰოვაშ მოწმე, ხშირას ადარენს თის შხვა ოსურკათას. თიშ გურიშალმაჭუაფალ სიტყვეფქ როზას ხვალე ღირსებაშ გრძნობა ვა უდინუნ, თიშა ხოლო გემშაღალაფუ ეჭვ, დასურო ქოუჸორს დო ვარ თინა მითინს. როზა იჩიებ: „ირიათო მოსაჭირ თიშ გოშინა, ნამდა იეჰოვა მაფასენს“. ქრისტიან ქომონჯეფ პატის ცენა მუნეფიშ მეუღლეეფს. თინეფს უჩქნა, ნამდა თეცალ საქციელ ჯგირო მოქმედენს მუჭოთ მეუღლეწკუმა, თეშ იეჰოვაწკუმა ურთიერთობაშა. *

⁸ ქომონჯ, ნამუთ პატის ცენს მუშ ოსურს, თიშ გურშენ ჯგირს იჩიებ შხვეფწკუმა, არწმუნენს მუშ ჸოროფაშა დო ოცქვანს (იგავ. 31:28). თეცალ მოქმედებაქ მეხვარ წოხლენ სტატიას მოშინაფილ კატერინას, გიორჯგინკო უღირსობაშ გრძნობას. ბაღანობას თის დიდა ხშირას აკრიტიკენდჷ დო შხვა ბაღანეფწკუმა, თინეფ შქას მუშ მეგობრეფწკუმა, ადარენდჷ. შედეგო, კატერინაქ ხოლო ქიდიჭყჷ მუშ დუდიშ შხვეფშა შედარება დო თაშ იქციებუდ ჭეშმარიტებაშ გაგებაშ უკულ ხოლო. თის ქრისტიან მეუღლექ მეხვარ, გიორჯგინკო თე ჩვევას დო სწორას შეაფასკო მუშ დუდ. კატერინა იჩიებ: „ჩქიმ მეუღლეს ვუჸორქ, მოცქვანს ჯგირ საქმეეფშე დო ლოცულენს ჩქიმო. თინა იეჰოვაშ დიდებულ თვისებეფს ხოლო გუმოშინანს დო მოხვარ, უარყოფით აზროვნება ჩეფთხინუე“.

9, 10. მუჭო მეხვარეს მზრუნველ უხუცესეფქ ართ დას, ნამდა გიორჯგინკო შხვეფშა დუდიშ შედარებაშ ჩვევას?

⁹ მუჭო შეულებნა უხუცესეფს თინეფიშ მოხვარა, მიდგას მუშ დუდიშ შხვეფშა შედარებაშ ჩვევა უღჷ? დეფიფქრათ და ჰანუნიშ შემთხვევაშე, ნამდგას ბაღანობას ნაკლებო ოცქვანდეს. თინა იშინანს: „მორდებუან ვორდჷ დო ფიფქრენდჷ, ნამდა შხვა ბაღანეფ ჩქიმდე ბრელით უჯგუშეფ რდეს. მუთ დუდ ქოფშუნ, ირიათო შხვას ვადარენდჷ ჩქიმ დუდის“. ჰანუნი ჭეშმარიტებაშ გაგებაშ უკულ ხოლო თაშ იქციებუდ. შედეგო, თინა ფიქრენდჷ, ნამდა კრებას მუთუნ მნიშვნელოვან როლს ვასრულენდჷ. მარა  ჰანუნიქ აზროვნება დითირუ. ამდღა თინა აგრძელენს პიონერო მსახურებას დო თეწკუმა ართო, დუდის ბედნერო გინაფლენს. მუქ მეხვარ თის?

¹⁰ ჰანუნი იჩიებ, ნამდა თის მზრუნველ უხუცესეფქ მეხვარეს. თინეფქ დარწმუნეს, ნამდა კრებაშო ძვირფას რდჷ დო ოცქვანდეს ართგურობაშ ჯგირ მაგალითის ირზენდუნ თიშენ. თინა გეუძინანს: „მინშა უხუცესეფ ფთხინდეს, ნამთინე დას ქიმვეხვარკო. თე დავალებაქ მა დუდ საჭირო პიროვნებათ მოგინაფუ. გუმაშინე, მუჟამსით მოჸოროფე უხუცესეფქ მადლობა მიწის ახალგაზრდა დალეფიშ გურიშელაკინაშენ დო ეშამკითხეს 1 თესალონიკელეფიშ 1:2, 3, მუდგაქ მანგარო შეხუ ჩქიმ გურს! თინეფიშ ჭყოლოფათ ამდღა მა ვაფასენქ ჩქიმ ადგილს იეჰოვაშ ორგანიზაციას“.

11. მუჭო შემლებნა თიცალ „შურაკოჭირებულეფიშ“ მოხვარა, მუნერით ფსალმუნიშ 34:18-ს რე მოშინაფილ?

¹¹ წეკითხით ფსალმუნიშ 34:18. იეჰოვა მანგარო ზრუნენს თინეფშე, მით „შურაკოჭირებულეფ“ რენა. ხვალე უხუცესეფს ვარინ, არძას შემლებნა, გურშა ელუკინათ თეცალ ძვირფას და დო ჯიმალეფს. ართ-ართ მხარე თეშ ოკეთებელო რე თინეფიშ მიმართ გულწრფელ ინტერესიშ გიმოხანტუა. იეჰოვას ოკო, ქუვოძირათ თინეფს, ნამდა მანგარო უჸორს მუშ მსახურეფ (კოლ. 3:12). თანდაბლობათ დო მოკრძალებათ ხოლო შემლებნა და დო ჯიმალეფიშ მოხვარა. ვა მოკონა, ჩქინ დუდშა გეგნიბღათ თიზმა ყურადღება, ნამდა და დო ჯიმალეფს მენჯარიშობაშ გრძნობა გურჩქინათ. თეს უჯგჷ, ჩქინ უნარეფ დო რჩქინა ართიანიშ გურიშელაკინალო გიმიბრინუათ (1 პეტ. 4:10, 11).

12. მუშენ მოწონდჷ უბრალო ხალხის იესოწკუმა ურთიერთობა? (ქოძირით სურათ გალენ გვერდის)

¹² ჩქი ბრელ მუდგარენიშ გურაფა შემლებნა თევრეშე, მუჭო ოქცუდ იესო მუშ მიმაჸუნალეფს. თინა არძაშ უმოს დიდებულ ადამიან რდჷ, მიდგას დღას უცხოვრებ, მარა, თეწკუმა ართო, გიმირჩქინანდჷ ლიბ ხასიათის დო თანდაბლობას (მათ. 11:28—30). იესო ვეცქვანდჷ მუშ სიბრძნე დო დიდ რჩქინათ. თინა ოგურუანდჷ უბრალო ნინათ დო ირინუანდჷ ადვილო გაგებელ მაგალითეფს, ნამდა შეხუკო უბრალო ხალხიშ გურს (ლუკ. 10:21). ამაყ რელიგიურ წინამძღოლეფიშ გინაწონს, იესო დღას ვაგინაფუანდჷ შხვეფს, ნამდა თინეფ ღორონთშო ნაკლებო მნიშვნელოვანეფ რდეს (იოან. 6:37). თეშ მანგიორო, თინა პატის ცენდჷ უბრალო ხალხის.

13. მუჭო იძირ იესოშ სიკეთე დო ჸოროფაქ მოწაფეეფიშ მიმართ თიშ დამოკიდებულებაშე?

¹³ იესოშ სიკეთე დო ჸოროფაქ მოწაფეეფიშ მიმართ თიშ დამოკიდებულებაშე ქიძირ. თის უჩქუდ, ნამდა თინეფს შხვადოშხვა უნარ დო მდგომარეობა უღდეს, ათეშენ, ართნერ საქმე ვაკეთებედეს დო ვართ ართნერ შედეგეფშა მიაჭირინედეს მსახურებას. მარა თინა აფასენდჷ თითოულიშ მონდომას. იესოშ თეცალ დამოკიდებულებაქ ტალანტეფიშ გურშენ თიშ მოჸუნაფილ იგავშე ქიძირ. თე იგავს ბატონქ თითოულ მონას „მუშ უნარიშ მიხედვით“ მეჩჷ დავალება. ჟირ მონაშე ართ-ართიქ მეტ გაკეთ, მარა ბატონქ ჟირხოლოს ართნერო ოცქუ დო უწუ: „ყოჩაღ, ჯგირ დო ართგურ მონა რექ!“ (მათ. 25:14—23).

14. მუჭო შემლებნა მივაჸუნათ იესოშ მაგალითის?

¹⁴ იესო ირიათო სიკეთე დო ჸოროფას გიმირჩქინანს ჩქინ მიმართ. თის უჩქჷ, ნამდა ჩქინ უნარ დო მდგომარეობა შხვადოშხვანერ რე დო ოხიოლ, მუჟამსით ორწყე, ნამდა ვა ბზოგენთ თის, მუდგაშ კეთება შემლებნა. საჭირო რე, ჩქი ხოლო იესოცალო მივექცუათ შხვეფს. ვა მოკონა, და დო ჯიმალეფს დუდ უღირსო ვოგინაფუათ ვარდა ონჯღორე დუგურინუათ თიშ გურშენ, ნამდა შხვეფს შეულებნან თისხი ვაკეთებენა. თეშ მანგიორო, ქუვოცქუათ თინეფს იეჰოვაშ მსახურებას ნამ შეულებნან თიშ კეთებაშენ.

15, 16. მუ ჯგირობუა მოუღ ართ დას რეალურ მიზნეფშე ფიქრიქ?

¹⁵ სულიერ მიზნეფ ჩქინ ცხოვრებას მიმართულებას არზენს დო აზრიანო გინაშქვანს. მარა თიცალ მიზნეფშე ოკო ფიფქრენდათ, მუთ ჩქინ უნარ დო მდგომარეობას მეურე დო ვართ ხოლო შხვაშის. თაშ ქიმიფქციებუთ-და, გურ ვა გომტირხუნა (ლუკ. 14:28). გუვარჩუათ და მიდორიშ მაგალით.

¹⁶ ბაღანობას მიდორის მუმა, ნამუთ ვა რე იეჰოვაშ მოწმე, ურაგადუდ, ნამდა მუშ და დო ჯიმალეფ დო სკოლაშ ამხანაგეფ თიშე უჯგუშეფ რდეს. მიდორი იჩიებ: „დუდის უღირსო ბგინაფლენდჷ“. მარა მირდუნ, თიქ გავითარ ღირსებაშ გრძნობა. თინა გეუძინანს: „ირ დღას ბკითხულენქ ბიბლიას, შედეგო შინაგან სიმშვიდე მიღჷ დო ბგინაფლენქ იეჰოვაშ ჸოროფას“. თეს გეძინელ, მიდორიქ რეალურ მიზნეფშე ქიდიჭყჷ ფიქრ დო ლოცულენდჷ, ნამდა იეჰოვას ქუმუხვარებუდკო თე მიზნეფიშ მეჭირნაფას. საბოლათ, თის შეიალებუ, გეხარკო სულიერო წიმი ულათ.

17. მუჭო შემლებნა აზროვნებაშ თირუა დო მუ მაჸუნუ თეს შედეგო?

¹⁷ უარყოფით გრძნობეფქ დო ფიქრეფქ შილებე ბრელ ხანს ვეჩმეთხუან. ათეშენ იეჰოვა ელამჩანა, ნამდა ვემვოტუათ აზროვნებაშ თირუა (ეფეს. 4:23, 24). თეშო საჭირო რე ლოცვა, ღორონთიშ სიტყვაშ გურაფა დო ფიქრ. გაგრძელით თეშ კეთება დო იეჰოვას ქოთხით ძალა. თიშ წმინდა შურ ქიმგეხვარებნა, გიორჯგინათ შხვეფშა დუდიშ შედარებაშ ჩვევას. იეჰოვა თის ხოლო ქიმგეხვარებნა, ნამდა თქვან გურს მენჯარიშობა ვარდა სიამაყე ქორენ-და, ქოძირათ თინა დო ხეთეშე ქიდიჭყათ თირუა.

18. მუჭო ელაიკინანა გურშა 2 მატიანეშ 6:29, 30-ის მოჩამილ სიტყვეფ?

 ¹⁸ წეკითხით 2 მატიანეშ 6:29, 30. იეჰოვა ორწყე ჩქინ გურს დო თის ხოლო, მუჭო ვობრძოლუთ ქვეყნიერებაშ აზროვნებას დო ჩქინ არასრულყოფილებას. შედეგო, თის უმოსო ვეჸოროფებუთ.

19. მუ მაგალითის ირინუანს იეჰოვა თიშ ეიოჭარალო, მუდგას ჩქინ მიმართ გინაფლენს?

¹⁹ იეჰოვას, ჩქინ მიმართ მუს გინაფლენსინ თიშ ოძირაფალო, დიდა დო ჭიჭე ბაღანაშ შქას ჸოროფაშ მაგალით მოჸუნს (ეს. 49:15). გუვარჩუათ ართ დიდაშ, რეიჩელიშ, მაგალით. თინა იჩიებ: „ჩქიმ სქუა სტეფანიქ დროშე ადრე დებად. პირველო თინა ბძირინ, მანგარ ჭიჭე დო ცოდაჯგურა რდჷ. მარა საავადმყოფოს უფლება ქომჩეს, პირველ თუთას, ონდო თინა ინკუბატორს რდჷ, ირდღას ხეს ქიდებკინკო. თე პერიოდის ჩქინ შქას ძალიერ დიდასქუალურ კავშირქ გორჩქინდჷ. ასე თინა ამშვ წანერ რე დო მუშ მახანეფიშ კარს ჭიჭე რე. მა თინა მანგარო მიჸორს, მუშენდა ბრელქ აჸუ ობრძოლებერქ, ნამდა იცოცხლუკო. ჩქიმ ჭიჭე ძღაბიქ ჩქიმ ცხოვრებაშა დიდ ხიოლ გემშეღ!“. მუნერ გურიშემაქექაფალ რე თიშ რჩქინა, ნამდა იეჰოვა თეშნერ ჸოროფას გინაფლენს ჩქინ მიმართ, მუჟამსით ორწყე, ნამდა ბრელს ფხანდენთ თიშ მსახურებაშო!

20. მუჭოთ იეჰოვაშ მეძღვინელ მსახურს, ხიოლიშ მუ მიზეზ გიღნა?

²⁰ მუჭოთ იეჰოვაშ მსახურ, თქვა თიშ ოჯახიშ განსაკუთრებულ დო ძვირფას წევრ რეთ. იეჰოვაქ მუწკუმა დაახლოებაშ საშვალება თიშენ ვემერჩეს, ნამდა შხვეფშე უჯგუშეფ რდით. თენა თიშენ აკეთ, ნამდა ქოძირ თქვან გურ, თანდაბლობა დო თიშ სურვილ, ქიდიგურეთკო თიშე დო დითირითკო (ფსალმ. 25:9). დარწმუნებულ რდათ, თინა აფასენს, მუჟამსით თქვა ირნერო ოცადუთ თიშ მსახურებას. თქვან მოთვინება დო ართგურობა ამტკიცენს, ნამდა „ჯგირ გურიშ“ რეთ (ლუკ. 8:15). მორთ ვემიოტუათ იეჰოვაშო ნამ შეილებნან თიშ კეთება დო შედეგო, გეხარენთ სულიერო წიმი ულათ.