1. Nan̈ino ma Jehovah tsy mampiran̈a atsika aminolo hafa?

JEHOVAH tia raha isankarazany. Ahitan̈a zen̈y fomba niasany raha jiaby, an̈isanizen̈y atsika. Kila olo amy raha mampiavaka izy. Zen̈y mahavy Jehovah tsy mampiran̈a anao aminolo hafa. Izy mandiniky raha an̈aty fônao, na ny maha anao anao. (1 Sam. 16:7) Hainy tsarabe toetry tsaranao. Hainy koa raha mety ho vitanao ndreky raha tsy ho vitanao, baka io fomba nitarimian̈a anao. Ke tsy mety ho izy hampan̈ano anao raha tsy ho vitanao. Mila mifen̈y atsika baka ho miran̈a amy niny Jehovah fomba fahitantsika ain̈intsika. Izikoa atsika man̈ano zen̈y, ‘hisain̈y tsarabe’ atsika. Atsika koa fa misain̈y tsara, atsika salakady tsy han̈ambony ten̈a, avio atsika koa tsy hiheviten̈a ho tsisy dikany.​—Rom. 12:3.

2. Ino ma tsy mahatsara atsika mampiran̈a ain̈intsika aminolo?

² Marin̈y ndraiky fa mahatsara atsika mandiniky raha tsara vitany piaramanompo amy fanompoan̈a. (Heb. 13:7) Mety mahay rahalahy na ranabavy mahita vokatra amy fanompoan̈a donko anao. Izikoa anao mandiniky raha ataony, anao mety hahita fomba hankatsaran̈a fanompoan̈anao. (Fil. 3:17) Fa tsy mitovy foeky mangala tahaka raha tsara ataonolo ndreky mampiran̈a ain̈inao aminany. Izikoa anao mampiran̈a ain̈inao aminolo, farany anao mety ho be fô olo na ho kivy, na mety hatsapaten̈a ho tsisy dikany foeky. Nianarantsika tamy lahatsoratra talohany araiky ty fa mety ho robaka fihavanan̈antsika amy Jehovah izikoa atsika tia mifan̈oesa amy piaramanompo. Tiany Jehovah atsika, ke zen̈y mahavy izy mampirisiky atsika karaha ty: “Irarian̈a olo tsiaraikiaraiky samby handiniky raha ataony, fa tsy ampiran̈a ain̈inany aminolo, amy zen̈y izy ho ravoravo aminy ain̈inany tompiny.”​—Gal. 6:4.

3. Ino aby fandrosoan̈a vitanao ke mamparavoravo anao?

³ Tiany Jehovah ho ravoravo amy fandrosoan̈a vitanao anao. Ohatra iziô, anao koa vo vita batisa, tokony ho ravoravo mare  anao nahatakatra tanjon̈onao zen̈y. Nanapakevitry nan̈ano zen̈y anao, fotony anao tia Zan̈ahary. Diniha koa baka fandrosoan̈a vitanao tafaranizen̈y. Nanjary nahaitianao fo ma mamaky Baiboly ndreky mianatra manokan̈a? Lera anao mivavaka, nanjary voafaritry tsarabe ma vavakanao sady baka amy fô? (Sal. 141:2) Ary akory amy fanompoan̈a? Nanjary hainao ma mampiditry koran̈a aminolo itorianao? Nanjary hainao tsarabe ma mampiasa iro fitaovan̈a fampiasaintsika amy fanompoan̈a aby io? Izikoa ndraiky anao manambady amanjanaka, tsapanao ma fa nan̈ampy anao i Jehovah, ke nahaitsara fo ma fomba fitondrasanao vadinao ndreky zanakanao? Izikoa zen̈y, miravoravoa amy fandrosoan̈a tsara vitanao aby zen̈y.

4. Ino raha hidinihintsika ato?

⁴ Atsika afaka man̈ampy olo hafa ho ravoravo amy fandrosoan̈a vitandro, kanefa tsy hampiran̈a ain̈indro aminolo. Hidinihintsika ato raha mety hataony raimandreny han̈ampian̈a zanakandro. Ho hita ato koa raha mety hataonolo fivadiany baka iro hifan̈ampy, ndreky raha mety hataony antipan̈ahy ndreky piaramanompo amy zen̈y iro hahavita han̈ampy namandro. Farany, handiniky toro lalan̈any Baiboly koa atsika. Han̈ampy atsika tsiaraikiaraiky hahita tanjon̈o mety takarintsika raha zen̈y, arakaraka fahaizan̈antsika ndreky raha iain̈antsika.

5. Izikoa zahan̈a Efesianina 6:4, ino raha mila tandremany raimandreny?

⁵ Mila mitandrin̈y raimandreny baka tsy hampiran̈a zanakandro araiky amy zanakandro hafa, na hitaky raha tsy ho vitany tsaiky io. Fotony raha zen̈y mety hampakivy izy. (Vakia Efesianina 6:4.) Zen̈y iziô raha tsapany Ranabavy Sachiko. * Ho izy: “Iro papianatranay aby io nan̈anten̈a zaho hifen̈y mare hahazo naoty farany an̈abo. Sady tiany mamako hahay raha mare mandilatra iro tsaiky aby io koa zaho, amy zen̈y ho izy ho fitorian̈a vita ho azy amy papianatranay ndreky amy papako raha zen̈y, fotony papako tsy Vavolombelon̈o. Tiany mamako tsisy diso foeky raha jiaby ataoko koa fa examen, kanefa aia ma ahavitako zen̈y! Efa ela raha tantaraiko aby zen̈y, fa mbala misy vokany aminaka fo ziska iziô. Ndray zaho efa mifen̈y man̈ano erakany farany tsara vitako amy fanompoan̈a, zaho mbala miasaloha fo tsao Jehovah tsy afapô amy raha ataoko.”

6. Ino raha ianarany raimandreny baka amy Salamo 131:1, 2?

 ⁶ Misy raha matomboko koa ianarany raimandreny baka amy Salamo 131:1, 2. (Vakia.) Ao Panjaka Davida nivolan̈a fa izy ‘tsy nitady hahazo raha an̈abo loatra’, na nan̈iry raha tsy takany. Nanetry ten̈a izy, ke hainy fa voafetra fo raha mety ho vitany. Nanjary nilamin̈y sain̈inany avio vitany nifehy fan̈irian̈anany. Ino raha ianarany raimandreny baka amy zen̈y? Mila manetry ten̈a iro, ke han̈eky fa misy erany raha mety ho vitandro amy maha raimandreny iro. Mila ikendro koa fa misy limitiny koa raha mety ho vitany zanakandro, ke iro tsy tokony hitaky raha be loatra amy zanakandro. Izikoa misy tanjon̈o tianaro takariny zanakanaro, mila dinihinaro raha mety ho vitany zanakanaro ndreky raha mety tsy ho vitandro. Karaha ty nambarany Ranabavy Marina: “Efatra mianadahy zahay kibo araiky, fa mamanay tsiary ndraiky nampiran̈a zaho tamindry havako, na tamy tsaiky hafa. Nampianariny zahay fo fa kila olo amy raha hainy, ary samby valera amy Jehovah aby zahay tsiaraikiaraiky. Nakiry zaho nampianariny raha zen̈y, ke nanjary tsy dia mampiran̈a ain̈inaka aminolo hafa zaho.”

7-8. Akory mety han̈aboahany lelahy fa man̈amia voninahitry vadiny izy?

⁷ Lelahy kristianin̈y koa tsy maintsy man̈amia voninahitry vadiny. (1 Pet. 3:7) Olo araiky koa amianao voninahitry, dikanizen̈y izy hajainao avio hindesinao amy fomba miavaka. Ke izikoa lelahy man̈amia voninahitry vadiny, aboakany aminany fa ten̈a valera aminany vadiny io. Izy tsy hitaky raha tsy ho vitany vadiny na hampiran̈a izy amy man̈angy hafa. Mba diniha hely baka: Ino raha tsapany man̈angy izikoa vadiny mampiran̈a izy amy man̈angy hafa? Tsy Vavolombelon̈o vadiny Ranabavy Rosa, ke matetiky ramosenany io mampiran̈a izy amy man̈angy hafa. Nampalahelo i Rosa mare volan̈any vadiny zen̈y, sady nahavy izy nahatsapaten̈a tsisy dikany foeky. Tan̈atiny jerinany, tsisy olo tia izy. Ho izy: “Nila namian̈a toky fo zaho fa zaho tiany Jehovah sady valera aminany.” Hitantsika baka amy zen̈y, fa tokony hifen̈y fo lelahy kristianin̈y han̈amia voninahitry vadiny. Hainy baka fa, misy vokany amy fifandraisany amy vadiny raha zen̈y sady misy vokany amy fihavan̈any amy Jehovah. *

⁸ Lelahy koa man̈amia voninahitry vadiny, izy mikoran̈a raha tsara momba vadiny fo. Mazoto midera vadiny izy sady amezany toky koa madamonany io fa tiany mare. (Ohab. 31:28) Zatra nampiran̈a ain̈inany taminolo i Katerina, ranabavy voakoran̈a tamy lahatsoratra taloha in̈y. Taminizy mbala hely, matetiky mamany nan̈ambanimbany izy ndreky nampiran̈a izy tamy tsaiky hafa, an̈isanizen̈y kamaradiny. Nahatsapaten̈a tsisy dikany mare i Katerina. Ary ndray efa nanjary Vavolombelon̈o Jehovah izy, mbala zatra mampiran̈a ain̈inany aminolo fo. Ke nitady fomba fo vadiny han̈ampian̈a izy hatoky ten̈a. Volan̈iny Katerina: “Vadiko ndraiky ten̈a tia zaho ay. Derainy fo zaho izikoa fa mahavita raha tsara. Mivavaka ninaka koa izy. Ampatsiarôviny zaho toetry tsarany Jehovah, baka io ampiany zaho han̈itsy fomba fisain̈ananaka.”

9-10. Akory nataony antipan̈ahy nan̈ampy ranabavy araiky, baka izy tsy hampiran̈a ain̈inany aminolo eky?

⁹ Akory mety han̈ampiany antipan̈ahy olo zatra mampiran̈a ain̈inany aminolo hafa? Diniha baka raha niain̈any Ranabavy Hanuni. Taminizy mbala hely, mahalan̈a izy nahazo teny fideran̈a zen̈y. Karaha ty ho izy: “Zaho olo bihen̈amaso, avio zaho nihevitry fa zaho ny ten̈a bahara amy tsaiky jiaby. Mbala hely zaho efa zatra nampiran̈a  ain̈inaka taminolo.” Mbala karaha zen̈y fo izy firaka izy efa nanjary Vavolombelon̈o Jehovah. Ke nanjary nihevitry izy fa, tsisy dikany foeky raha jiaby ataony amy fiangonan̈a. Kanefa, iziô ranabavy io pisava lalan̈a sady ravoravo mare. Ino raha nan̈ampy izy hiova?

¹⁰ Nivolan̈a i Hanuni fa nisy antipan̈ahy tsara fan̈ahy nan̈ampy izy. Nataondro tsapany fa izy ten̈a natokisandro. Nideraindro koa izy fotony izy man̈amia ohatra tsara. Karaha ty raha nisoratiny Hanuni: “Matetiky iro antipan̈ahy aby io niangavy zaho hampahery rahavavy nila fan̈ampian̈a. Nahatsapaten̈a nilain̈a mare zaho koa fa nangatahindro han̈ano zen̈y. Mbala azoko onon̈o fo nisy antipan̈ahy be fitiavan̈a aby zay nankasitraka zaho, nohony zaho nampahery rahavavy tanora vitsivitsy. Baka tio nivakiandro taminaka 1 Tesalonianina 1:2, 3. Nanohin̈y fônaka mare raha zen̈y. Nohony fan̈ampiandro antipan̈ahy be fitiavan̈a aby io, nanjary tsapako iziô fa ilain̈a ankitin̈y zaho an̈ivony fiangonan̈a.”

11. Akory mety han̈ampiantsika iro olo ‘tôrotôro fô’, koran̈iny Isaia 57:15 ao?

¹¹ Vakia Isaia 57:15. Tiany Jehovah mare iro ‘olo tôrotôro fô’ aby io ndray iro mahatsapaten̈a ho tsisy dikany. Atsika jiaby samby afaka man̈ampy iro rahalahy ndreky ranabavy tiantsika aby io, fa tsy antipan̈ahy fo. Ohatra iziô, hankahery iro anao izikoa aboakanao amindro fa anao ten̈a mijery iro. Tiany Jehovah haboakantsika amindro fa iro ten̈a tiantsika ankitin̈y. (Ohab. 19:17) Hahavita han̈ampy iro koa atsika, izikoa manetry ten̈a sady tsy poerapoera. Tokony hampiasaintsika hampahirezan̈a piaramanompo raha man̈avanan̈a atsika ndreky fahaizan̈antsika. Ndray zen̈y, atsika tsy misariky jerinolo amintsika, amy zen̈y iro tsy ho be fô olo.​—1 Pet. 4:10, 11.

12. Nan̈ino tianolo tsotra niaraka tamy Jesosy? (Zahava sary amy fon̈ony gazety ty.)

¹² Maro raha mety ianarantsika baka amy fomba nitondrasany Jesosy pianatranany. Jesosy lelahy ten̈a niavaka tambony tany teto; fa ndray zen̈y, izy ‘tsara fan̈ahy sady nanetry ten̈a.’ (Mat. 11:28-30) Olo narangitry koa izy sady maro raha hay, fa izy tsy poerapoera. Nampiasa volan̈a tsotra ndreky fan̈oharan̈a hainolo izy koa fa nampianatra, ke ten̈a nanohin̈y fônolo tsotra raha zen̈y. (Lioka 10:21) Izy tsy nan̈ambony ten̈a karaha iro pitondra fivavahan̈a aby tamy zen̈y. Jesosy tsy nan̈ano raha hahavy iro olo aby io hieritreritry fa iro tsisy dikany amy Zan̈ahary. (Jaona 6:37) Najainy fo iro vahoaka madiniky aby io.

13. Akory ahitan̈a fa be fitiavan̈a ndreky tsara fan̈ahy tamy pianatranany i Jesosy?

¹³ Jesosy be fitiavan̈a sady tsara fan̈ahy tamy pianatranany. Hainy fa samby isany raha iain̈andro ndreky raha haindro. Ke tsy voatery hitovy andraikitry mety ho vitandro ndreky raha mety ho vitandro amy fanompoan̈a. Hainy Jesosy koa fa nifen̈y nan̈ano ny farany tsara vitandro iro, ke nankasitrahany raha zen̈y. Hita amy fan̈oharan̈a momba talenta fomba fiheverany Jesosy raha zen̈y. Koran̈iny amy fan̈oharan̈a io ao fa mitovy fo asa nankin̈iny lelahy io tamy panomponany telo, avio nataony mifan̈araka amy fahaizan̈andro tsiaraikiaraiky. Aroe tamindro panomponany aby io nazoto mare niasa. Araiky nahazo benefisy bebe mandilatra panompo araiky hafa. Fa iro samby niderainy tômpondro. Ho izy tamindro: ‘Tsara zen̈y panompo tsara sady atokisan̈a.’​—Mat. 25:14-23.

14. Akory hangalantsika tahaka fomba nitondrasany Jesosy olo?

¹⁴ Jesosy be fitiavan̈a ndreky tsara fan̈ahy amintsika. Hainy fa tsy mitovy fahaizan̈antsika ndreky raha iain̈antsika, fa izy ravoravo fo izikoa atsika mifen̈y man̈ano zay vitantsika amy fanompoan̈a Jehovah. Akory hangalantsika tahaka toetriny Jesosy zen̈y, lera atsika mifandray amy piaramanompo? Tsy tiantsika foeky izikoa baka amy raha ataontsika mahavy piaramanompo hahatsapa ten̈a tsisy dikany. Izikoa iro tsy  mahavita be amy fanompoan̈a, atsika tsy han̈ano raha hahavy iro ho men̈atra na ho vôtivôty. Tokony hitady fomba fo atsika hideran̈a iro, amy zay raha tsara vitandro amy fanompoan̈a.

15-16. Ino hatsaran̈a nazony ranabavy araiky, izikoa izy fa niezaka nanakatra tanjon̈o azony takariny tsarabe?

¹⁵ Manjary misy dikany ndreky mahafapô fiain̈anantsika, izikoa atsika manan̈a tanjon̈o arapan̈ahy. Kanefa, tanjon̈o zen̈y tokony hampifan̈arahintsika amy fahaizan̈antsika ndreky raha iain̈antsika, fa tsy amy tanjon̈olo hafa. Izikoa tsy zen̈y, ho rivan̈a edy atsika sady ho diso fan̈antinan̈a. (Lioka 14:28) Diniha baka raha navoa i Midori. Pisava lalan̈a ranabavy io.

¹⁶ Papany ranabavy io tsy Vavolombelon̈o. Nampiran̈iny babany tamindro kibo araiky taminany ndreky tamy tsaiky lekoly araiky taminany i Midori taminizy mbala hely. Karaha ty ho izy: “Hitako tsisy dikany foeky zaho.” Midori ndraiky koa fa nahaibe, nahainatoky ten̈a fo izy. Karaha ty koa ho izy: “Namaky Baiboly isanandra zaho, fotony hitako kalma oe zaho koa fa nan̈ano zen̈y. Nanjary tsapako koa fitiavany Jehovah zaho.” Niezaka hanan̈a tanjon̈o mety takariny tsarabe i Midori, baka io nivavaka izy baka Jehovah han̈ampy izy hanakatra tanjon̈o aby zen̈y. Ke nanjary ravoravo ranabavy io tamy fandrosoan̈a vitany.

17. a) Ino raha han̈ampy atsika hanohy han̈avao angovo mibeko sain̈intsika? b) Ino vokatranizen̈y amintsika?

¹⁷ Mahatsiaro ten̈a tsisy dikany ma anao? Aleva onon̈o fa raha zen̈y tsy ho afaka betibety. Zen̈y mahavy Jehovah mivolan̈a fa tokony ‘havaozin̈y fo atsika aminy angovo mibeko sain̈intsika.’ (Efes. 4:23, 24) Akory havian̈a amy zen̈y? Atsika mila mivavaka, baka io mianatra ndreky misaintsain̈y Volan̈a Zan̈ahary. Mila mifen̈y mare atsika han̈ano iro raha aby io ndreky mangataka angovo amy Jehovah. Han̈ampy  anao fan̈ahy masin̈iny Jehovah, ke ho vitanao fo tsy hampiran̈a ain̈inao aminolo hafa. Jehovah han̈ampy anao hahita izikoa anao efa be fô olo, na poerapoera. Han̈ampy anao hiova koa izy.

18. Nan̈ino ma mampahery anao raha koran̈iny 2 Tantara 6:29, 30?

¹⁸ Vakia 2 Tantara 6:29, 30. Jehovah mahay raha an̈aty fôntsika. Hainy raha hiaretantsika. Hainy koa fa, miezaka mare atsika baka hahavita handresy fan̈irian̈a ratsy an̈atintsika ao, ndreky tsy ho voataon̈ony donia ty han̈ano raha ratsy. Ke mahaimitombo fo fitiavany Jehovah atsika, fotony hitany ezaka mare ataontsika.

19. Ino ohatra ampiasainy Jehovah, han̈aboahan̈a amintsika fa ten̈a tiany mare atsika?

¹⁹ Ampitovisiny Jehovah amy fitiavany reny araiky zanany in̈y, fitiavany Jehovah atsika. (Isaia 49:15) Karaha ty ho reny araiky zay, Rachel an̈arany: “Teraka tsy ampy fanjava i Stephanie zanako man̈angy. Hely oe izy taminizy vo teraka sady tsisy angovo. Natao tan̈atiny couveuse fo izy, tan̈atiny fanjava araiky, fa nimboàny dokotera fo ndraiky zaho mba nan̈onjon̈o izy hely isanandra. Ke nanjary nifandray ampô mare zahay. Izy iziô efa tsiota taon̈o, fa mbala hely fo izy izikoa ampiran̈iny amy tsaiky taon̈o araiky aminany. Kanefa nahaitiako fo izy, fotony tsy maintsy niady mare izy baka ho velon̈o. Ravoravo mare koa zaho manan̈a izy.” Ten̈a mampahery mahay fa karaha zen̈y koa fitiavany Jehovah atsika. Izikoa atsika mifen̈y mare manompo izy amy fô jiaby, atsika mahaitiany fo.

20. Hazavà nan̈ino ravoravo anao manompo Jehovah.

²⁰ An̈isany fianakavian̈any Jehovah anao fotony manompo izy. Isankarazany olo an̈isany lafamìnany io, kanefa miavaka ndreky valera mare anao aminany. Zen̈y tsy mivolan̈a fa tsara mandilatra olo hafa anao, fa hitany raha tan̈atiny fônao tao ke zen̈y nahavy izy nitaon̈o anao han̈aton̈o izy. Hitany baka fa anao manetry ten̈a sady von̈ono han̈eky ampianarin̈y ndreky hiova. (Sal. 25:9) Matokisa anao fa ravoravo izy, anao koa fa man̈amia izy ny farany tsara baka aminao. Ary matoa anao iziô miaritry sady tsy mivadiky, dikanizen̈y anao manan̈a ‘fô tsara ndreky tia raha tsara.’ (Lioka 8:15) Ke ameza Jehovah fo ny farany tsara baka aminao. Ho ‘ravoravo aminy ain̈inao’ edy anao izikoa man̈ano zen̈y.