1. Enyɔbiɔse ciwo yí atɛnŋ ava susumɛ nɔ mì nɔ mìbu tamɛ kpɔ so enu ciwo Yehowa wa nuɔ?

NƆ MÌBU tamɛ kpɔ so enu ciwo pleŋ Yehowa wa le xexeɛ mɛ nuɔ, taŋfuin etɛnŋ wa nɔ mì shigbe ehakpatɔ Davidi nɛ. Ébiɔ Yehowa se le gbedodoɖa mɛ mɔ: “[Yehowa,] ŋ glo jeŋkwi ciwo yí È wa koɖo Ao lɔ̀wo kpɔ. Ŋ kpɔ wleci koɖo wlecivi ciwo yí È jɔ, yí ŋ nu le nyɛɖeki mɛ mɔ: Nyi taɖo yí agbetɔwo le veviɖe nɔ Eo ahan ɔ? Nyi taɖo yí È ɖonɔŋwi wo hɛnnɛ ɔ? . . . Nyi taɖo yí È kpɔnɔ wo ji hɛnnɛ ɔ?” (Eha. 8:3, 4) Shigbe Davidi nɛɔ, mìtɛnŋ kpɔ mɔ mìdenyi ŋɖe o nɔ mìsɔ mìwoɖekiwo sɔ koɖo wlecivi ciwo Yehowa wa yí etɛnŋ kpaca mì mɔ Yehowa bukɔ mìwo tɔ kpɔ. Vɔ shigbe lé mìakpɔɛ nɛɔ, Yehowa le be nɔ agbetɔ ŋkɔtɔ ciwo yí nyi Adamu koɖo Ɛva yí sɔ wo wa yi xomumɛtɔwo.

2. Edɔ ci Yehowa ji mɔ Adamu koɖo Ɛva awa saɔ?

² Adamu koɖo Ɛva nyi evi ŋkɔtɔwo nɔ Yehowa le nyigban ji yí Yehowa nyi wowo Da amɛlɔntɔ ci yí le jeŋkwimɛ. Ékpɔkɔ mɔ mɔ asu koɖo ashi cɛ awa dɔ ɖe le xomu lɔ mɛ. Mawu nu nɔ wo mɔ: “Mí a ji evi sugbɔ. Mí a ɖɔ nyigbanji, yí a sun ji.” (Gɔnm. 1:28) Éji mɔ woaji viwo yí ale bu nɔ nyigban ci yí nyi wowo nɔxu. Nɔ Adamu koɖo Ɛva se tonu nɔ Mawu yí wa edɔ ci eɖo nɔ wo saɔ, wo koɖo wowo jijimɛviwo akpɔtɔ anyi Mawu xomumɛtɔwo sɔyi mavɔ.

3. Nyi yí taɖo mìatɛnŋ anu mɔ Yehowa na texwe ci nu bubu le Adamu koɖo Ɛva le yi xomu mɛɔ?

³ Adamu koɖo Ɛva ɖo texwe ci nu bubu le le Yehowa xomu mɛ sa. Le Ehajiji Wema 8:5 mɛɔ, Davidi nu so  Yehowa nuwawa ci yí nyi agbetɔ nu mɔ: “Èwɛ yí eyi gɔnmɛ hwɛɖeka nɔ mawudɔlawo, yí èsɔ bubu koɖo acɔ cɔn ni.” Nyɔnɔnwi yɔ, ŋsɛn, nunya koɖo nujikpekpe ci Yehowa na agbetɔwo to akpo nɔ ci ena mawudɔlawo. (Eha. 103:20) Vɔ “hwɛɖeka” kpoŋ yí agbetɔwo yi gɔnmɛ nɔ mawudɔla sɛnŋwo. Dekpaca amɛ ba? Hwenu Yehowa wa mìwo jila ŋkɔtɔwoɔ, éna agbe nywi wo.

4. Nyi yí jɔ do Adamu koɖo Ɛva ji ci wodese tonu nɔ Yehowaɔ, yí nyi mìakpɔ le nyɔta cɛ mɛɔ?

 ⁴ Ewa ŋshishi mɔ Adamu koɖo Ɛva sɔ wowo texwe bu le Yehowa xomu mɛ. Shigbe lé mìakpɔɛ le nyɔta cɛ mɛ nɛɔ, ecɛ hɛn cukaɖawo va wowo jijimɛviwo ji. Tamɛ ci Yehowa ɖo do agbetɔwo nu detrɔ o. Éji mɔ agbetɔ tonusetɔwo anyi ye viyewo sɔyi mavɔ. Doŋkɔɔ, mìakpɔ enu ciwo Yehowa wa yí sɔ dasɛ mɔ mìle veviɖe nɔ ye. Le yi goduɔ, mìakpɔ enu ciwo mìawa kakacɛ yí asɔ dasɛ mɔ mìji mɔ mìanɔ Mawu xomu mɛ. Le vɔvɔnuɔ, mìakpɔ enunywi ciwo Yehowa vi ciwo yí anɔ nyigban ji ase vivi nɔ sɔyi mavɔ mɛ.

5. Lé mìatɛnŋ akanfu Mawu nɔ ci ewa mì do yi nɔnɔmɛ nu doɔ?

⁵ Yehowa do bubu mì nu ci ewa mì do yi nɔnɔmɛ nu. (Gɔnm. 1:26, 27) Ci Mawu wa mì yí mìɖyiɔ, mìatɛnŋ aɖo yi nɔnɔmɛ nywiwo shigbe lɔnlɔn, vevisesedoamɛnu, egbejinɔnɔ koɖo enujɔjɔɛwawa nɛ, yí adasɛ wo le mìwo nuwanawo mɛ. (Eha. 86:15; 145:17) Nɔ mìtekpɔ ɖo nɔnɔmɛ ŋtɔ́woɔ, anyi mìkanfukɔ Yehowa yí dokɔ akpe ni. (1 Piɛ 1:14-16) Nɔ mìwakɔ nu ciwo mìwo Da ci yí le jeŋkwimɛ lɔnnɔɔ, eji ajɔ mìwoŋtɔwo. Sɔ ta niɔ, ci Yehowa wa mì do yiŋtɔ nɔnɔmɛ nuɔ, mìatɛnŋ anyi agbetɔ ciwo eji mɔ woanɔ ye xomu mɛ.

6. Lé Yehowa do bubu agbetɔwo nu hwenu ewakɔ nyigban lɔ doɔ?

⁶ Yehowa dra axwe nywi ɖeka do nɔ mì. Xoxo gbɔxwe Yehowa awa agbetɔ ŋkɔtɔɔ, éwa nyigban ɖɛ nɔ agbetɔwo. (Job 38:4-6; Ʒer. 10:12) Ci Yehowa nyi xomɛvunɔ koɖo nunamɛtɔɔ, éwa enunywi sugbɔ keŋ asɔ do jijɔ nɔ mì. (Eha. 104:14, 15, 24) Ci ewakɔ enuwoɔ, nɔ eva ɖo hweɖewonuɔ, eglonɔ wo kpɔ keŋ kpɔnɔ “mɔ enu lɔwo nyɔ.” (Gɔnm. 1:10, 12, 31) Édo bubu agbetɔwo nu ci “E sɔ [wo] yí wo kpacɛ nɔ” enu nyakpɔkpɔ ciwo pleŋ ewa do nyigban lɔ ji. (Eha. 8:6) Mawu tamɛɖoɖo yí nyi mɔ agbetɔ maɖonuvɔnwo ase vivivi nɔ ebulele nɔ yi nuwawa nyakpɔkpɔwo tɛgbɛɛ. Èdonɔ akpe nɔ Yehowa nɔ egbe nywi cɛ ci eɖo nɔ mìa?

7. Lé Ʒozue 24:15 dasɛ mɔ amɛɖekishinɔnɔblɔɖe le agbetɔ shi doɔ?

⁷ Yehowa na amɛɖekishinɔnɔblɔɖe mì. Mìatɛnŋ acan agbe ci mìji mɔ mìanɔ. (Hlɛn Ʒozue 24:15.) Amɛɖekishinɔnɔblɔɖe yí nyi mɔ mìvo awa cancan ɖekpokpui. Mìwo Mawu amɛlɔntɔ lɔ kpɔnɔ jijɔ nɔ mìcin mɔ mìasin. (Eha. 84:11; Elo. 27:11) Mìatɛnŋ azan amɛɖekishinɔnɔblɔɖe ci yí le mì shi nywiɖe le nɔnɔmɛ sugbɔ mɛ. Na mìakpɔ kpɔwɛ ci Yesu ɖo ɖɛ.

8. Na kpɔwɛ ɖeka ci yí dasɛ lé Yesu zan amɛɖekishinɔnɔblɔɖe yi tɔ do.

⁸ Mìatɛnŋ asran Yesu yí acin mɔ mìasɔ mɛbuwo nyɔna ɖonɔ ŋkɔ nɔ mìwo tɔ. Gbeɖekaɔ, enu cikɔ nɔ Yesu koɖo yi apotruwo kpɛɖɛkpɛɖɛ eyi woji texwe ci yí ɖo ɖa keŋ agbɔn domɛ hwɛɖeka. Vɔɔ, detɛnŋ je ji nɔ wo o. Amɛahwa ɖeka  vakpɔ wo le nɔ yí jikɔ veviɖe mɔ Yesu akpla nu yewo. Vɔ Yesu dedo dɔmɛzi o. Ewaɖeɔ, amɛ lɔwo nu wa ŋshishi ni. Nyi Yesu wa nɔ woɔ? “É kpla enu sugbɔ [wo.]” (Maki 6:30-34) Nɔ mìwa nu shigbe Yesu nɛ yí zannɔ mìwo gamɛ koɖo mìwo ŋsɛn sɔ kpedo mɛbuwo nuɔ, ahɛn kanfukanfu vɛ nɔ mìwo Da ci yí le jeŋkwimɛ. (Mt. 5:14-16) Agbedasɛ nɔ Yehowa mɔ mìjijiɛ anyi yi xomumɛtɔwo.

9. Enuvevi ci Yehowa na agbetɔwoɔ?

⁹ Yehowa na nujikpekpe agbetɔwo nɔ woaji viwo yí gbena agbanleamɛji wo mɔ woakpla nu wowo viwo nɔ woalɔn ye yí asɛn ye. Nɔ jila ènyi ɖe, enunana vevi ŋtɔ́ jɔ ji nɔ eoa? Nyɔnɔnwi enyi mɔ Yehowa na enujikpekpe ganganwo dɔlawo, vɔ dena evijiji nujikpekpe wo o. Eyi taɖo nɔ jila ènyiɔ, do afixɔxɔ mɔnukpɔkpɔ vevi cɛ nu. Agbanleamɛji vevi enyi nɔ jilawo mɔ woahɛn wowo viwo le “enukplamu koɖo ese ji nɔ̀nɔ nɔ Axwetɔ” mɛ. (Efe. 6:4; 2 Ese. 6:5-7; Eha. 127:3) Mawu habɔbɔ lɔ to Bibla ji keŋ wa dɔwanu sugbɔ sɔ kpedo jilawo nu. Le kpɔwɛ mɛ, éwa wemawo, videowo, ehajijiwo koɖo nubuwo do siti ji. Eze gbajɛɛ mɔ, mìwo Da ci yí le jeŋkwimɛ koɖo Eviɛ lɔn mìwo viwo sugbɔ. (Luiki 18:15-17) Nɔ jilawo ɖoŋ do Yehowa nu keŋ wa ci ji wokpe yí le be nɔ wowo vi veviwoɔ, ejɔnɔ ji nɔ Yehowa. Gbesɔ kpe niɔ, jila lɔwo kpekɔdo wowo viwo nu nɔ woatɛnŋ avanɔ Yehowa xomu mɛ keke sɔyi mavɔ!

10-11. Emɔ ci Yehowa hun nɔ mì sɔ to tafɛn lɔ jiɔ?

¹⁰ Yehowa sɔ Eviɛ vevi sɔ na do mìwo ta nɔ mìatɛnŋ agbevanyi Yi xomumɛtɔwo. Shigbe lé mìnui le  mamamɛ 4 mɛ nɛɔ, Adamu koɖo Ɛva wa nuvɔn taɖo wo koɖo wowo jijimɛviwo degbenyi Yehowa xomumɛtɔwo o. (Rɔm. 5:12) Adamu koɖo Ɛva ŋtɔwo yí ɖui koŋ gbe tonu sese nɔ Mawu, eyi taɖo wodegbeje anɔ yi xomu lɔ mɛ o. Vɔ wowo jijimɛviwo ɖe? Yehowa lɔn agbetɔviwo, eyi taɖo ehun mɔ nɔ Adamu jijimɛvi tonusetɔwo nɔ woatɛnŋ anɔ yi xomu lɔ mɛ. Éwa cɛ sɔ to Eviɛ akogo, Yesu Kristo vɔnsa lɔ ji. (Ʒan 3:16; Rɔm. 5:19) Yesu vɔnsa lɔ yí dɔ Yehowa xɔ agbetɔ egbejinɔtɔ 144 000 yí wonyi eviɛwo.—Rɔm. 8:15-17; Enyɔ. 14:1.

¹¹ To akpo nɔ yɛɔ, agbetɔ tonusetɔ miliɔn nɛniɖe buwo wakɔ Mawu dro. Wokpɔkɔ emɔ mɔ yewoavanyi Mawu xomumɛtɔwo le dodokpɔ kpɛtɛkpɛtɛ ci woawa le xwe kotokun ɖeka cɛkpakpa lɔ godu. (Eha. 25:14; Rɔm. 8:20, 21) Ci mɔkpɔkpɔ cɛ le wo shiɔ, woyɔkɔ Yehowa wowo Watɔ lɔ vɔ mɔ yewo “Da.” (Mt. 6:9) Emɔ ahun nɔ mɛ ciwo woafɔn so ku can yí woakpla enu ci Yehowa jikɔ so wo shi. Gbesɔ kpe niɔ, mɛ ciwo alɔn awa do Yehowa mɔdasɛnamɛwo ji avanɔ yi xomu mɛ.

12. Biɔse ci mìakpɔ ɖoŋci nɔ yɛɔ?

¹² Shigbe lé mìkpɔɛ nɛɔ, Yehowa wa nu sugbɔ yí sɔ dasɛ mɔ yedo bubu agbetɔwo nu. Éxɔ amɛshiaminɔwo yí wonyi eviɛwo vɔ, éna mɔkpɔkpɔ “agbetɔ sugbɔ sugbɔ” lɔwo nɔ woavanyi eviɛwo le xexe yoyu lɔ mɛ. (Enyɔ. 7:9) Nyi mìawa le kakacɛ mɛ yí asɔ dasɛ nɔ Yehowa mɔ mìji mɔ mìanɔ yi xomu lɔ mɛ sɔyi mavɔmavɔɔ?

13. Nyi yí mìatɛnŋ awa keŋ anɔ Mawu xomu lɔ mɛɔ? (Maki 12:30)

¹³ Dasɛ mɔ yelɔn Yehowa yí asin koɖo ao ji pleŋ. (Hlɛn Maki 12:30.) Mawu sɔ xomɛvu na nu sugbɔ mì. Taŋfuin,  enunana gangantɔ ɖeka yí nyi enujikpekpe ci mìɖo yí asin. Mìdanasɛ nɔ Yehowa mɔ mìluin nɔ ‘mìwanɔ do yi sewo ji.’ (1 Ʒan 5:3) Ese ɖeka ci ji Yehowa ji mɔ mìwo le wa do yí nyi ese ci Yesu do mɔ mìwo le wa nukplaviwo keŋ aʒin wo do shi mɛ. (Mt. 28:19) Égbedo se nɔ mì mɔ mìwo le lɔn mìwonɔnɔwo. (Ʒan 13:35) Yehowa axɔ tonusetɔwo do yi sɛntɔwo xomu ci yí le xexeɛ pleŋ mɛ.—Eha. 15:1, 2.

14. Lé mìawɛ alɔn amowoɔ? (Matie 9:36-38; Rɔmatɔwo 12:10)

¹⁴ Lɔn amowo. Lɔnlɔn yí nyi Yehowa nɔnɔmɛ gangantɔ. (1 Ʒan 4:8) Yehowa lɔn mì gbɔxwe mìvajeshi ɖɛ. (1 Ʒan 4:9, 10) Nɔ mìlɔn mɛbuwoɔ, anyi mìsrankɔ Yehowa. (Efe. 5:1) Emɔ nywitɔ ci ji mìato yí alɔn amowo yí nyi mɔ mìakpedo wo nu woajeshi Yehowa gbɔxwe gamɛ aji. (Hlɛn Matie 9:36-38.) Nɔ mìwɛni ahan ɔ, woatɛnŋ akpla enu ci woɖo awa keŋ avanyi Mawu xomumɛtɔwo. Nɔ mɛɖe wa ʒinʒindoshimɛ ɖegbɔɔ, mìɖo akpɔtɔ aluinni yí adonɔ bubu yi nu. (1 Ʒan 4:20, 21) Lé mìawɛ doɔ? Ðeka yí nyi mɔ mìakannɔdo ji mɔ susu nywiwo yí cucuni yí ewanɔ enuwo. Le kpɔwɛ mɛ, nɔ mìdenya susu ci yí taɖo ewa nu ɖeɔ, mìdamɔ amɛɖekitɔjiji yí taɖo ewɛ o. Vɔ mìado bubu mìwo nɔvi lɔ nu yí asɔɛ mɔ yɛle ŋkɔ nɔ mì.—Hlɛn Rɔmatɔwo 12:10; Fili. 2:3.

15. Miwo mìɖo aku ŋshishi nɔ yí agbefa xomɛ doɔ?

¹⁵ Ku ŋshishi nɔ amowo pleŋ yí afa xomɛ do wo. Nɔ mìji mɔ mìanɔ Yehowa xomu lɔ mɛ tɛgbɛɛɔ, mìɖo awanɔ do Mawu Nyɔ lɔ ji le mìwo gbenɔnɔ mɛ. Le kpɔwɛ mɛ, Yesu kpla mì mɔ mìwo le ku ŋshishi nɔ amowo pleŋ yí afa xomɛ do wo, mìwo ketɔnɔwo can. (Luiki 6:32-36) Hweɖewonuɔ, yi wawa tɛnŋ gbɔnnu nɔ mì. Nɔ ahan yɔ nɛɔ, mìɖo atekpɔ abunɔ tamɛ yí awanɔ nu shigbe Yesu nɛ. Nɔ mìwa ci ji mìkpe yí senɔ tonu nɔ Yehowa yí gbewanɔ nu shigbe Yesu nɛɔ, mìadasɛ nɔ mìwo Da ci yí le jeŋkwimɛ mɔ mìji mɔ mìanɔ yi xomu lɔ mɛ sɔyi mavɔ.

16. Lé mìdaxo ɖyi Yehowa xomu lɔ ŋkɔ doɔ?

¹⁶ Ŋgbexo ɖyi Yehowa xomu lɔ ŋkɔ o. Le xomu mɛɔ, vihwɛwo srannɔ wowo fofowo kpɔwɛ. Nɔ ɖevi xoxutɔwo wakɔ do Bibla gɔnmɛɖosewo ji le wowo gbemɛɔ, woanyi kpɔwɛ nywi nɔ wowo nɔviwo. Vɔ nɔ wowakɔ enudɔndɔnwoɔ, vihwɛ lɔwo tɛnŋ sran wowo kpɔwɛ dɔndɔn lɔ. Ahanke ele le Yehowa xomu mɛ nɛ. Nɔ Kristotɔ egbejinɔtɔ ɖe vatrɔ xɔsegbetɔ alo wa gbɔdɔndɔn masɔkoɖosenu ɖe alo wa enumanyɔmanyɔ ɖeɔ, mɛbuwo tɛnŋ sran wo yí awa nudɔndɔn. Mɛ ciwo wanɔ nu ahan xokɔ ɖyi Yehowa sɛntɔwo xomu lɔ. (1 Tɛs. 4:3-8) Mìɖo aze nɔ amɛ nɛnɛhantɔwo. Mìdaɖe mɔ ŋɖe adahɛn kacaca ci yí le mìwo koɖo mìwo Da amɛlɔntɔ ci yí le jeŋkwimɛ gblamɛ o.

17. Enububukpɔ ci yí mìɖo agbeɔ, yí nyi yí taɖoɔ?

¹⁷ Kando Yehowa ji sɔwu mɔ àkando ŋcilanmɛnuwo ji. Yehowa ɖo gbe nɔ mì mɔ, nɔ mìwo ji ye Fyɔɖuxu lɔ doŋkɔ yí wa do ye se jɔjɔɛ lɔwo jiɔ, yeana ŋɖuɖu, nudodo koɖo dɔnxu mì. (Eha. 55:22; Mt. 6:33) Ci mìnya ahan ɔ, mìdebuini mɔ ŋcilanmɛnu xexe cɛ mɛ tɔwo aglɔn ta nɔ mì yí ana mìakpɔ jijɔ ŋtɔŋtɔ o. Mìnya mɔ ŋci ɖekɛ yí ana mìakpɔ fafa ŋtɔŋtɔ yí nyi Yehowa dro wawa. (Fili. 4:6, 7) Nɔ mìasun ji axwle enu sugbɔ can ɔ, mìɖo akpɔ mɔ mìɖo gamɛ koɖo ŋsɛn ci yí ʒan yí azan wo yí agbele be nɔ wo ma. Taŋfuin nu  ciwo le mì shi vale veviɖe nɔ mì sɔwua? Mìɖo aɖo ŋwi mɔ Mawu ɖo dɔ nɔ mì le yi xomu lɔ mɛ. Eyi taɖo mìdeɖo aɖe mɔ nubuwo adɔn mìwo susuwo o. Kankandoji li mɔ, mìdeji mɔ mìaɖyi ɖajɛvi hotɔnɔ ci mɔ hun nɔ asɛn Yehowa yí avanyi eviɛ vɔ yí egbe o! Ðo élɔn nu ciwo yí le shi keke gbe mɔ yedakplɔ Yesu do o.—Maki 10:17-22.

18. Bubu gangan koɖo shicu ciwo agbetɔ tonusetɔwo axɔ tɛgbɛɛɔ?

¹⁸ Agbetɔ tonusetɔwo axɔ bubu gangantɔ ci yí nyi mɔ woalɔn Yehowa yí asin yi mavɔ mɛ! Eji agbejɔ mɛ ciwo shi nyigban ji mɔkpɔkpɔ le mɔ yewoale be nɔ nyigban nyakpɔkpɔ ci Yehowa wa nɔ anyi wowo xwe. Zaanɖe yɛɔ, Mawu Fyɔɖuxu lɔ adra nyigban koɖo nushianu ci yí le ji do yí woagbenya kpɔkpɔ. Yesu akpɔ cukaɖa ciwo pleŋ yí to so gbeta ci Adamu koɖo Ɛva sɔ yí to le Mawu xomu lɔ mɛ gbɔ. Yehowa afɔn amɛ miliɔn nɛniɖe yí ana mɔnukpɔkpɔ wo yí woanɔ agbe tɛgbɛɛ le lanmɛsɛn blebu mɛ le nyigban ci yí atrɔ Paradiso ji. (Luiki 23:42, 43) Nɔ agbetɔ ciwo yí sɛnkɔ Yehowa le nyigban ji vatrɔ amɛmaɖoafɛnwoɔ, woaxɔ “bubu koɖo acɔ” ci nyɔ Davidi nu.—Eha. 8:5, NWT.

19. Nyi mìɖo ale do susumɛɔ?

¹⁹ Nɔ èle “agbetɔ sugbɔ sugbɔ” lɔwo mɛɔ, anyi mɔkpɔkpɔ nywi yí le eo shi. Mawu lɔn eo yí ji mɔ eo anyi ye xomumɛtɔ. Eyi taɖo wa ŋɖekpokpui ci ji àsun nɔ ao nu akpe ni. Le ŋkeke ɖeshiaɖe mɛɔ, Mawu gbeɖuwo le nɔ susu koɖo jimɛ nɔ eo. Do bubu mɔnukpɔkpɔ ci yí le eo shi yí èsɛnnɔ mìwo Da vevi ci yí jeŋkwimɛ nu yí ado afixɔxɔ mɔnukpɔkpɔ ci yí le eo shi yí àkannɔfui tɛgbɛɛ nu!