1. Kinde ma wabeparu kilili pi piny ma Yehova ucwiyo, waromo penjara ku penji ma kani?

KINDE ma wabeparu lembe kilili iwi polo ku ng’om ku piny mange ceke ma Yehova ucwiyo, wawinjara ve jagor Zaburi ma Daudi m’upenjo Yehova i rwo pare kumae: “Kinde m’apido pi polo peri ma tic m’i cingi, dwi ku cero, m’iketho; dhanu en e ang’o, ma nia ipido pire? Man wod dhanu, ma nia iliewe?” (Zab. 8:3, 4) Calu Daudi, wan bende ka wabeparu pi piny ma Yehova ucwiyo, wacopo nwang’u nia wanok magwei, man waromo zungo nia Yehova ulund ubedieng’ piwa. Re calu ma wabineno, Yehova ugam udieng’ pir Adamu giku Eva, ento ejik keno kende ngo, eketho gidoko bende ni juruot pare.

2. Yehova ukwayu nia Adamu giku Eva gitim ang’o?

² Adamu giku Eva gibino awiya pa Yehova ma kwong’a iwi ng’om, man Weggi maeno mi polo ugam umarugi lee. Emito nia ginyay gidok ni juruot ma lee. Mungu uwacu igi kumae: “Wunyol, wumedru de, wupong’ ng’om, man wudwoke wor iwu.” (Tha. 1:28) Mungu ugam umito nia Adamu giku Eva ginyol awiya man gigwok ng’om ma tie kabedo migi. Ka nwang’u giwore man gitimo lembe m’ekwayu i bang’gi, nwang’u gin karacelo ku nyikwaygi gicibedo ni juruot pare rondo ku rondo.

3. Pirang’o wacopo yero nia Yehova umiyo kabedo mi yung ni Adamu giku Eva i kind juruot pare?

³ Yehova umiyo kabedo mi yung ni Adamu giku Eva i kind juruot pare. I Juebrania 2:7, Biblia uyero wec ma e iwi kite ma Yehova ucwiyo ko dhanu: “Iketho ebedo piny nyanok nisagu  jumalaika; ironye ku dwong’ man yung.” I andha, Yehova umiyo tego, rieko, man copo i ayi ma rom ungo ni dhanu man ni jumalaika. (Zab. 103:20) Ento dhanu tie “piny nyanok” ka juporogi ku giracwiya maeno mi tipo ma giweg tego. Eno tie lembe mi zungo ngo nia! Ma jiji mbe, kinde ma Yehova ucwiyo junyodo mwa ma kwong’a, emiyo igi kwo ma ber mandha!

4. Lembang’o m’unwang’u Adamu giku Eva kinde ma giworo ngo dwand Yehova, man wabiweco iwi lembang’o i thiwiwec maeni?

 ⁴ Lembe mi can utie nia Adamu giku Eva giworo ngo dwand Yehova, eno uketho giwok kud i kind juruot pare. Calu ma wabineno i thiwiwec maeni, lembuno unyayu peko ma yawe mbe ni nyikwaygi. Ento lembakeca pa Yehova ulokere ngo. Ebemito dhanu ma giwor gibed ni awiya pare rondo ku rondo. Dong’ wakenen kite ma Yehova unyutho ko nia piwa tie tek lee i iye. I ng’eye, wabineno gin ma wacopo timo tin eni pi ninyutho nia wabemito wabed i kind juruot pa Mungu. Tokcen ne, wabiweco iwi mugisa m’awiya pa Yehova ma gin’i ng’om keni gibinwang’u rondo ku rondo.

5. Wacopo nyutho foyofoc mwa nenedi ni Mungu pi kite m’ecwiyo kowa i ayine?

⁵ Yehova ucwiyowa i ayine. (Tha. 1:26, 27) Calu ma Mungu ucwiyowa i ayine, wacopo cego kite ma beco dupa i kwo mwa calu ve mer, kisa, gwokobedoleng’, man bedopwe. (Zab. 86:15; 145:17) Ka wabecego kite ma kumeno, wamiyo yung ni Yehova, man eno nyutho nia wabedwoko ire foyofoc. (1 Pet. 1:14-16) Kinde ma wabetimo lembe i ayi ma foyo i Wegwa mi polo, wan de wabedo kud anyong’a. Bende, calu ma Yehova ucwiyowa i ayine, emiyo iwa copo ma waromo doko ko kit dhanu m’ebemito ubed i kind juruot pare.

6. Kite ma Yehova uyiko ko ng’om ni dhanu ubenyutho nenedi nia emiyo igi yung?

⁶ Yehovah uyiko iwa kabedo ma segi. Oro dupa i wang’ ma fodi Yehova ucwiyo ngo nico ma kwong’a, elar eyiko ng’om ma dhanu gibikwo i iye. (Yob 38:4-6; Yer. 10:12) Calu ma Yehova dieng’ piwa man e jabero, ecwiyo iwa piny dupa kara unyay anyong’a i iwa. (Zab. 104:14, 15, 24) I ng’eye, kinde m’eting’o saa pi niparu kilili iwi piny m’ecwiyo, ‘eneno nia e ber.’ (Tha. 1:10, 12, 31) Mungu uketho dhanu ‘ubim wi’ piny ceke ma beco m’ecwiyo, i ayi maeno re m’emiyo yung igi. (Zab. 8:6) Lembakeca pa Mungu utie nia dhanu ma gimbe ku dubo gigwok giracwiya pare ma beco kud anyong’a rondo ku rondo. Nyo ibed idwoko foyofoc ni Yehova nja pi lembang’ola maeno ma yawe be?

7. Giragora pa Yocuwa 24:15 ubenyutho nenedi nia dhanu utie ku bedagonya mi timo ng’iyong’ici?

⁷ Yehova umiyo iwa bedagonya mi timo ng’iyong’ic. Wacopo ng’iyo wan giwa gin ma wabitimo i kwo mwa. (Som Yocuwa 24:15.) Copo ma watie ko mi ng’iyo wan giwa gin ma watim julwong’o nia bedagonya mi timo ng’iyong’ic. Anyong’a nego Mungu mwa ma jamer kinde ma wang’iyo nitimo ire. (Zab. 84:11; Rie. 27:11) Wacopo tiyo ku bedagonya maeno pi nimaku yub dupa ma beco. Wakenen kite ma Yesu utiyo ko ku bedagonya pare mi timo ng’iyong’ic.

8. Kemii lapor moko m’ubenyutho kite ma Yesu utiyo ko ku bedagonya pare mi timo ng’iyong’ic.

⁸ Wacopo lubo lapor pa Yesu nwang’u wabeng’iyo niketho yeny mi jumange i wang’ mwa. Nindo moko kinde ma Yesu ku jukwenda pare giol, gigam gicidho kaka moko ma ling’ ma gigeno nia giromo yom i iye. Ento lembene utimere ngo ve ma gipangu. Udul dhanu ucidh unwang’ugi kuca man gibino kud ava mi winjo ponji pa Yesu. Re ng’eicwiny umaku ngo Yesu,  ento kisa re m’unege i kum dhanu. E etimo ang’o? “Ecaku ponjogi ku lembe dupa.” (Mark. 6:30-34) Ka wabelubo lapor pa Yesu, niwacu wabetiyo ku saa mwa man kero mwa pi nikonyo jumange, wabimiyo yung ni Wegwa mi polo. (Mat. 5:14-16) Wabinyutho bende nia wabemito wabed i kind juruot pa Yehova.

9. Yehova umiyo giramiya ma kani ma segi ni dhanu?

⁹ Yehova umiyo ni dhanu copo mi nyolo awiya, man emiyo igi rwom mi ponjo awiyane kara gimare man gitim ire. Kan itie janyodo, nyo ibed inyutho foyofoc de pi giramiya maeno ma segi? Yehova umiyo copo dupa ma wang’u ijo ni jumalaika, ento emiyo ngo igi copo mi nyolo nyodo. Pieno kan itie janyodo, bed inyuth foyofoc pi rwom m’emiyo iri mi tungo awiya. Junyodo ginwang’u rwom ma pire tek mi ‘ponjo man mi twinyo’ awiya migi “nimakere ku telowic pa Yehova.” (Efe. 6:4; Poi. 6:5-7; Zab. 127:3) Pi nikonyo junyodo, dilo pa Mungu umiyo jamtic dupa m’ujengere iwi Biblia, calu ve girasoma ma tung’ tung’, video, wer, man jamtic mange dupa ma nwang’ere i Internet. Ubenen kamaleng’ nia Wegwa mi polo giku Wode gimaru awiya lee mandha. (Luka 18:15-17) Ka junyodo gibejengiri iwi Yehova man gibetimo tego migi ceke pi nigwoko awiya migi ma pigi tek lee, anyong’a nego Yehova. Junyodo ma gibetimo kumeno gikonyo awiya migi kara gidok bende juruot pa Yehova rondo ku rondo!

10-11. Nikum jamgony, Yehova umiyo iwa kaka ma kani?

¹⁰ Yehova umiyo Wode m’emaru lee kara wadok juruot pare kendo. Calu ma waneno i  udukuwec mir ang’wen, kinde m’Adamu giku Eva gidubo, giwok kud i kind juruot pa Yehova, man awiya migi de gibino mbe ku kaka i kind juruotne. (Rum. 5:12) Adamu giku Eva gitimo tegowic ni Mungu akakaka, pieno ebino lembe ma kakare nia ewodhgi cen kud i kind juruot pare. Dong’ Yehova utimo ang’o pir awiya migi ke? Calu m’emaru dhanu, egam emaku yub ma kara awiya migi ma biworo dwande gidwog i kind juruot pare. Etimo kumeno nikadhu kud i lam ma Wode ma kulong’ ma Yesu Kristu uthiero. (Yoh. 3:16; Rum. 5:19) Nikum lam maeno ma Yesu uthiero, Yehova udwoko dhanu elufu dak acel ku pier ang’wen wi ang’wen (144 000) ma gigwoko bedocu migi gidoko ni awiya pare.​—Rum. 8:15-17; Nyu. 14:1.

¹¹ Bende, dhanu ma wendgi milioni ma kwanere ngo ma gigwoko bedoleng’ migi gibetimo yeny pa Mungu. Gitie ku genogen mi doko juruot pa Mungu i ng’ei amulaic ma tokcen i ajiki mi bimobim mi oro elufu acel. (Zab. 25:14; Rum. 8:20, 21) Calu ma gitie ku genogen maeno, kadok kawoni de gilwong’o Yehova ma Jacwic migi nia “Wegwa.” (Mat. 6:9) Dhanu ma gibicer bende gibinwang’u kaka mi ponjo lembe ma Yehova ubekwayu i bang’gi. Ju ma gibiyiyo telowic pare gibimondo bende i kind juruot pare.

12. Wabidwoko wang’ penji ma kani kawoni?

¹² Calu ma waai waneno, Yehova utimo lembe dupa pi nimiyo yung ni dhanu. Edaru dwoko Jukristu ma juwiro ku tipo gidoko nyithindho pare, man ni “udul ma dit” ke emiyo genogen mi doko awiya pare pi nja i ng’om ma nyen. (Nyu. 7:9) Dong’ wacopo timo ang’o niai tin pi ninyutho ni Yehova nia wabemito wabed i kind juruot pare rondo ku rondo?

13. Ukwayu watim ang’o kara wamond i kind juruot pa Mungu? (Marko 12:30)

¹³ Tim ni Yehova kud adundeni ceke pi ninyutho nia imare. (Som Marko 12:30.) I kind  piny ceke ma Yehova umiyo iwa ku berocwinye, acel ma dit utie copo mwa mi timo ire. Wanyutho ni Yehova nia wamare nwang’u “wabeworo cik pare.” (1 Yoh. 5:3) I kind cik ma Yehova ubemito wawor, acel utie lembang’ola ma Yesu ung’olo ni julubne nia giketh dhanu udok julub, man gimii igi batizo. (Mat. 28:19) Eng’olo bende nia wamarara i kindwa. (Yoh. 13:35) Yehova bijolo ju ma gibeworo cik pare kara gimond i kind jurutic pare ma gibetimo ire i wang’ ng’om zoo.​—Zab. 15:1, 2.

14. Wacopo nyutho nenedi nia wamaru jumange? (Matayo 9:36-38; Jurumi 12:10)

¹⁴ Nyuth mer ni jumange. Mer utie kite pa Yehova ma dit m’usagu zoo. (1 Yoh. 4:8) Yehova ular unyutho iwa mer ma nwang’u fodi wang’eye de ngo. (1 Yoh. 4:9, 10) Walubo kite pare maeno kinde ma wabenyutho mer ni jumange. (Efe. 5:1) Yo acel ma ber ma wanyutho ko mer ni dhanu utie nikonyogi giponj lembe iwi Yehova ma fodi saa nuti eni. (Som Matayo 9:36-38.) Kinde ma wabetimo kumeno, wamiyo igi kaka ma gimond ko i kind juruot pa Mungu. Kadok i ng’ei ma ng’atini ulimo batizo de ukwayu wamedara asu nimare man ninyutho ire woro. (1 Yoh. 4:20, 21) Waromo timo kumeno nenedi? Gin acel ma wacopo timo utie nigeno nia thelembe ma cuu re m’ucwale nitimo lembe moko. Ku lapor, kan etimo lembe moko ma ber, wabiparu ngo nia etimo kumeca kara junene. Ento wabimiyo yung ire nwang’u wabenene nia e dit ma saguwa.​—Som Jurumi 12:10; Filip. 2:3.

15. Ukwayu wanyuth kisa man bero ni jukani?

¹⁵ Bed ku kisa i kum dhanu ceke man tim igi bero. Tek wabemito wabed i kind juruot pa Yehova rondo ku rondo, ukwayu watii ku Lembe pa Mungu i kwo mwa. Ku lapor, Yesu uponjo nia wacikara ninyutho kisa man bero ni dhanu ceke, kadok ni ju m’udaguwa. (Luka 6:32-36) Saa moko wanwang’u nia etie tek nitimo lembe maeno. Tek etie kumeno, ukwayu waponj niparu lembe man nibedo ku timo ma calu pa Yesu. Ka wabetimo kero wabeworo Yehova man wabelubo lapor pa Yesu, nwang’u wabenyutho ni Wegwa mi polo nia wamito wabed i kind juruot pare rondo ku rondo.

16. Wacikara nitimo ang’o kara kud wacid nying’ juruot pa Yehova?

¹⁶ Kud icid nying’ juruot pa Yehova. Wang’ ma pol i kind juruot, nyathin ma nyanok kwanyu kit timo mi juwang’e. Ka jadit ubetiyo ku cik mir ukungu mi Biblia i kwo pare, ebedo ni lapor ma ber ni jung’eye. Ento ka jadit utie ku timo ma reco, awiya mange m’ulubo ng’eye de gikwanyu lapor pare ma rac. I kind juruot pa Yehova de tie kumeno. Ka tekene Jakristu m’ular ugwoko bedoleng’ pare ni Yehova ucaku bebedo ku kit paru mi jai i kum yiyoyic, kunoke ecaku bemondo i lembsasa mi tarwang’, kadi ecaku bekwo i ayi m’umaku piny ungo, jumange de gicopo mito gitim lembe ma reco calu m’ebetimo. Dhanu ma gibetimo kumeno gicido ng’wic juruot pa Yehova ma gibetimo ire. (1 Thes. 4:3-8) Wacikara ngo nilubo lapor ma reco man niweko gin moko ci unyoth winjiri mwa ku Wegwa mi polo ma jamer.

17. Kit paru ma nenedi m’ukwayu ngo wabed ko, man ke pirang’o?

¹⁷ Gen Yehova kakare nigeno giki mi kum. Yehova ung’olo nia ebimiyo iwa cam, kendi, man kabedo, tek wabeyenyo ma kwong’a Ker pare man wabekwo nimakere ku cik pare ma tie atira. (Zab. 55:22; Mat. 6:33) Tek wageno lembang’ola maeno, wabiparu ngo nia giki mi kum ma ng’om maeni ubemiyo bigwokowa man biketho wabibedo kud anyong’a ma galu. Wang’eyo nia yo acel kende re ma copo miyo iwa kwiyocwiny mandha: utie nitimo yeny pa Yehova. (Filip. 4:6, 7) Kadok nwang’u watie ku yore ma wacopo ng’iewo ko piny dupa de,  re ukwayu walar wang’ey ka nyo wabibedo ku saa man kero mi tiyo ku pinyne man mi gwokogi. Nyo wabimaru pinyne nikadhu mukero? Ukwayu wapoy nia Mungu umiyo iwa tic ma watim i kind juruot pare. Eno nyutho nia wacikara ngo niweko gin moko uwing wiwa. Wabemito ngo wabed ve jalawobi m’ugam umaru piny pare lee nisagu, uketho eng’iyo nia kud elub tok Yesu. Pieno ebayu rwom mi timo ni Yehova man mi bedo acel m’i kind awiya pare!​—Mark. 10:17-22.

18. Dhanu ma giwor gibinwang’u yung ma dit man mugisa ma kani rondo ku rondo?

¹⁸ Dhanu ma giwor gibinwang’u yung ma dit m’usagu zoo: gibibedo ku rwom mi maru Yehova man gibitimo ire rondo ku rondo! Ju ma gitie ku genogen mi kwo iwi ng’om gibibedo bende kud anyong’a nigwoko ng’om maeni ma ber ma Yehova ucwiyo kara ubed ni kabedo migi. Ceng’ini eni, Ker pa Mungu bidwoko ng’om ku piny ceke ma kwo i iye udok nyen kendo. Yesu biyiko lembe ceke ma reco m’Adamu giku Eva ginyayu kinde ma gimaku yub ma giwok ko kud i kind juruot pa Mungu. Yehova bicero dhanu milioni dupa, man ebimiyo igi kaka mi kwo rondo ku rondo ku leng’kum ma ber mandha iwi ng’om ma bidoko ni paradizo. (Luka 23:42, 43) Kinde ma jurutic pa Yehova mi ng’om kakeni gibedoko leng’, ng’atuman m’i kindgi binwang’u “dwong’ man yung” ma Biblia ukiewo pire.​—Ebr. 2:7.

19. Ukwayu ngo wiwa uwil i kum lembang’o?

¹⁹ Kan itie i kind “udul ma dit,” ng’ey nia itie ku genogen ma ber mi tuko ngo. Mungu umeri; ebemito ibed acel m’i kind juruot pare. Pieno, tim kero peri ceke inyay anyong’a i iye. I kwo peri ma kubang’ ceng’, wii kud uwil i kum lembang’ola ma Mungu utimo man gwoke i adundeni. Nen rwom m’itie ko mi timo ni Wegwa mi polo ni gin ma pire tek, man mar rwom m’emiyo iri mi pake rondo ku rondo!