1. Ano midotim kita to misangaˈan ni Yihofa a maamaan i, iraay ko manan a harateng?

ANO SIMSIMEN ita ko misangaˈan ni Yihofa a kakahaday dohaw i, o mamalecad ko harateng to mitiliday to ˈOlic a Tafitian. Sanay ci Tafiti a mitolon to Kawas: ‘Ano maˈaraw ako ko misangaˈan Iso a kakarayan, mahapinang ko pisilsil Iso to folad ato foˈis i, saan miharateng, o maan ko tamdaw, iro haratengen Iso cingra? O maan ko tamdaw, iro dipoten Iso cingra?’ (ˈOlic 8:3, 4) Malecad ci Tafitian, maharateng ko manengnengay a mimingay saaroˈan no niyah toniya dohaw, kawra kamayan ci Yihofa ciharateng kitaanan, tada kasemeranto saan kita miharateng. Dotoc wa maˈaraw ita, cowa ko kaciharateng aca ni Yihofa to sakacecay a tamdaw ci Atam aci Ifaan, hanaca pasalalomaˈanho no paro no lomaˈ Ningra cangra.

2. O manan ko araaw ni Yihofa to sakacecay a wawa i hekal?

² Ci Atam aci Ifa o sakacecay a wawa ni Yihofa toniya hekal. Malo Wama nangra i kakarayan, tada maolahay ci Yihofa cangranan, ngaˈayay malo ciepocay a paro no lomaˈ. Pasowalan ni Yihofa cangra: ‘Kalenak kamo, miledef toniya sera, pamatangen koniya sera.’ (Satapangan 1:28) O tatodong i, wa mahofoc cangra to wawa, misongilaˈ midimokos to cikiw. Ano makahi midofdof ci Atam aci Ifa, palecad to araaw ni Yihofa cangranan a midemak, cangra ato teloteloc wa tahadaˈoc materek i paro no lomaˈ ni Yihofa.

3. Misamanay haenen ko sowal, ci Atam aci Ifa o kalimlaan a tamdaw itini paro no lomaˈ ni Yihofa?

³ Ci Atam aci Ifa o kalimlaan a tamdaw itini paro no lomaˈ ni Yihofa. Milengo to misangaˈan ni Yihofa a tamdaw, itini ˈOlic 8:5 sanay ci Tafiti: ‘Pasafaen Iso ko saaroˈan ningra to coyoh to miming, mapafeli Iso cingra to ˈdil ato ˈodingar malo  tamohong.’ O coyoh o taˈangayay ko ˈicel, ˈadingo a tireng, soˈlinayto cowa ka lecad ko taneng ato ˈicel no tamdaw to coyoh. (ˈOlic 103:20) Nikawrira sanay ko sowal no Fangcalay Cudad, ‘masafaay no coyoh to miming’ ko tamdaw. Tada makapahay ko misadayan ni Yihofa to pisatapang no salakatay a tamdaw, soˈlinayto a masakasemeran!

4. (1) Ci Atam aci Ifa mitowakangay ci Yihofaan, samanay ko teloc? (2) Oniya lalakaw wa milengo to maanan hani?

 ⁴ Ka adayayan i, ikor ci Atam aci Ifa mitowakangay ci Yihofaan, telocto cowa ka ngaˈay materek i paro no lomaˈ ni Yihofa, pairaay to pades no teloteloc. Kawra cowa ka falic ko araaw ni Yihofa, o hatokel Ningra o midofdofay Cingranan a tamdaw tatahadaˈoc malo wawa Ningra. Oniya lalakaw wa milengo, patadoay ci Yihofa kitanan midemak to manan, paihkal to misaaretengay Cingra minengneng kitaanan, dotoc minengneng to ngangaˈay kita midemak to maanan nohatini, misawacay to makalimay kita masalalomaˈ no paro no lomaˈ no Kawas. Saikor, minengneng kita o wawa ni Yihofa i hekal wa milifok to manan a sapalemed noikor.

5. Ci Yihofa palecaden to tireng no Niyah misangaˈ kitanan, samaan kita ngaˈay paihkal to miakoˈiday ko niyah Cingranan?

⁵ Ci Yihofa palecaden to tireng Ningra misangaˈ to tamdaw. (Satapangan 1:26, 27) Samanen palecadan kita to tireng no Kawas a sangaˈen, mansa ngaˈay palahad to adihayay kasemeran a capeling ni Yihofa, tinakoen o siniˈadaay falocoˈ, olah, madimadiay ato moecelay. (ˈOlic 86:15; 145:17) Ano palahad kita toniya capeling i, wa paˈodingar ci Yihofaan, paihkalho tada miakoˈiday kita Cingranan. (1 Pitiro 1:14-16) Misarocod kita pakahemek to kakarayan a Wama, o lalipahak a marenec ko niyah. Wa ngaˈay kita mitodong ci Yihofaan, malo kaolahan Ningra a wawa, samanen palecadan Ningra to tireng no Niyah a misangaˈ kitaanan.

6. Mikitini misangaˈan ni Yihofa mikiriwiˈay a cikiw hano ngaˈay mahapinang ita to misaaretengay Cingra minengneng to tamdaw?

⁶ Patadoay ci Yihofa kitaanan misaday to mikiriwiˈay a lomaˈ. Itini ˈayaw no misangaˈ ci Yihofa to sakacecay tamdaw i, maharekayto Cingra misaday toniya cikiw. (Yopu 38:4-6; Yirimiya 10:12) Samanen patadoay ci Yihofa miharateng ato hinapaladaˈay, misangaˈay to adihayay makapahay a dafong i cikiw, o kaˈorip ita matomesay ko lipahak. (ˈOlic 104:14, 15, 24) Pakayni misangaˈan a kihcod no Niyah marenecay ko falocoˈ Ningra. (Satapangan 1:10, 12, 31) Ci Yihofa misaaretengay minengneng to tamdaw, ‘papikowanan’ Ningra ko tamdaw to kasapaan a masangaˈay. (ˈOlic 8:6) O araaw no Kawas o malefotay tamdaw wa ngaˈay tahadaˈoc midimokos to misangaˈan Ningra a kihcod, lipahak i lalomaˈ. Marariday kiso miharateng toniya makapahay araaw ni Yihofa ato miakoˈid Cingranan han?

7. Mikitini Yosuwa 24:15 samaan mahapinang ita to iraay ko pasalatay harateng no tamdaw hani?

⁷ Pafeliay ci Yihofa to pasalatay harateng kitaanan. Samanen iraay ko pasalatay harateng ita, wa ngaˈay kita mipiliˈ to kaolahan ita a pakayraan a maˈorip. (ˈOsien ko Yosuwa 24:15.) Ano mipiliˈ kita midoko to Kawas i, o mamahemek Cingra. (ˈOlic 84:11; Taneng 27:11) Wa ngaˈayho kita misaka dademak to pasalatay harateng midemak to inanengay a saˈosi. Dotoc, wa minengneng kita to ngaˈayay a taˈarawan ni Yis.

8. Hadaken ko tinakoan mitadtad, samanay ci Yis misaka dademak to pasalatay a harateng ningra?

⁸ Wa ngaˈay kita mitodong to taˈarawan ni Yis, mipiliˈ paisalakat to misaalian no tao. Kinacecayay, tiya malotayto ci Yis ato tarokos i, tayraay cangra i awaay ko adeses a kitiraan, sapahanhanaw to cecay liyad. Kawra mahelaay no ˈalomanay tamdaw cangra, makalimay  sapitengilaw to sapasifanaˈ ni Yis. Cowa ka maketer ci Yis. Ao, siniˈadaay toya ˈalomanay tamdaw, orato ‘pasifanaˈ cangranan to adihayay a demak.’ (Marko 6:30-34) Ano malecad kita ci Yisan makahi a kinafalah, mihadak to toki ato ˈicel a padama to tao, wa paˈdil to kakarayan Wama. (Matay 5:14-16) Mihaen ko demak ita o pasowalay ci Yihofaan, makalimay kita malo paro no lomaˈ Ningra.

9. O haharatengen no wama wina ko maanan hani?

⁹ Pafelian ni Yihofa ko tamdaw to sakahofoc a inaneng, ato pasifanaˈ to wawa maolah ato midoko Cingranan. Malo wama winaay, pakayniay kiso a miakoˈid to Kawas han? Soˈlin adihayay ko sapalemed ni Yihofa to coyoh, kawra cowa pafeli cangranan to sakahofoc a inaneng, edengan o tamdaw ko pafelian Ningra. O wama wina haharatengen konini, misalimla toniya mikiriwiˈay a sapatelong. Paikenan ni Yihofa i wama ato wina ko wawa, o wama ato wina wa ‘mitoor to araaw ni Yihofa a mirikec a palimoˈot cangranan, palahad cangranan’ o kalimlaan a ˈinorong konini. (Ifiso 6:4; Limoˈot 6:5-7; ˈOlic 127:3) Sapadamaaw to wama wina, o likakawa no Kawas adihayay ko misadayan mikitiniay i Fangcalay Cudad a lalosidan, tinakoen mitepangan cudad, ika, radiw ato wangcan no mita. Mahapinangay, ci Yihofa aci Yis maolahay to wawa. (Luka 18:15-17) Ano tooren no wama wina ko sakayat ni Yihofa ato misarocod a midimokos to wawa, o mamahemek ci Yihofa. Mihaen ko demak no wama wina, pairaay to toki no wawa malo paro no lomaˈ ni Yihofa, tahadaˈoc materek i paro no lomaˈ Ningra!

10-11. Milimasmas ci Yihofa to sapatefoc, pairaay to maanan hatoki ita hani?

¹⁰ Kinafalahay ci Yihofa to kaolahan Ningra a wawa, padama kitaanan ngaˈay patikol i taˈangayay paro no lomaˈ Ningra. Masowalay i  fafekang, ci Atam aci Ifa mitowakangay to Kawas, telocto cowato ka ngaˈay materek i paro no lomaˈ ni Yihofa, pakarorayayho to teloteloc. (Loma 5:12) Padetengay ci Atam aci Ifa mitowakang to Kawas, mansa malaplapay i lomaˈ no Kawas. Kawra o teloteloc nangra samanay hani? Tangongolay ko olah ni Yihofa to tamdaw, kinafalahay to foseniˈan a wawa no Niyah ci Yis Kristoan, ho ngaˈay ira ko toki no midofdofay a tamdaw miliyaw malo paro no lomaˈ Ningra. (Yohani 3:16; Loma 5:19) Pakayni i sapatefoc, hato ngaˈayay ci Yihofa misawawa toya madimadiay a 144,000 a tamdaw.—Loma 8:15-17; Paˈarawan 14:1.

¹¹ Cowa ko 144,000 aca a tamdaw, anini iraayho ko pinaay soˈot emang madimadiay midoko ci Yihofaan a tamdaw, mitooray to araaw Ningra a maˈorip. Ano mahererek ko pikowan to 1,000 miheca i, ano mataˈlif ko saikoray sapalifet, wa soˈliˈlinto malo wawa no Kawas. (ˈOlic 25:14; Loma 8:20, 21) Ira ko mahaenay hatokel, ano aninito, kamayan cangra pangangan ci Yihofaan to Wama. (Matay 6:9) Roma i, o patikolay maˈorip a tamdaw wa ira ko toki cipinang to saali ni Yihofa cangranan, polong makahiay midofdof a tamdaw saikor o mamalo paro no lomaˈ Ningra cangra.

12. Dotoc wa milengo kita to maanan hani?

¹² Talaˈayaway ci Yihofa patado kitaanan midemak to adihayay demak, paihkal to misaaretengay Cingra kitaanan, maharekayto Cingra misawawa to 144,000 a tamdaw, pairaayho to hatokel no ‘taˈangayay ˈopo tamdaw’ itini faelohay hekal malo soˈliˈlinay a wawa Ningra. (Paˈarawan 7:9) Dotoc wa milengo sasamaan ko demak ita anini, paihkal to makalimay ko niyah malo paro no lomaˈ ni Yihofa.

13. Sasamaan ko demak ita ngaˈay malo paro no lomaˈ ni Yihofa hani? (Marko 12:30)

¹³ Maolah ci Yihofaan, misarocod midoko Cingranan. (ˈOsien ko Marko 12:30.)  Adihayay ko sapafeli ni Yihofa kitaanan kasapaan a inaneng, o sakakaay kalimlaan i ngaˈay kita midoko Cingranan. ‘Midofdof to limoˈot no Kawas, o maolahay Cingranan.’ (1 Yohani 5:3) Palimoˈotay ci Yis kitaanan malingad padama to tamdaw micada to paputisem malo Krisciyang, ato masasiolah, o misaalian ni Yihofa kitaanan a dadofdofen a limoˈot konini. (Matay 28:19; Yohani 13:35) O makahiay midofdof a tamdaw papacomoden ni Yihofa i paro no lomaˈ Ningra.—ˈOlic 15:1, 2.

14. Sasamaan kita ciharateng ato maolah to tao? (Matay 9:36-38; Loma 12:10)

¹⁴ Maolah to tao. O olah o sakakaay kalimlaan a capeling ni Yihofa. (1 Yohani 4:8) Itini ˈayaw no mafanaˈ kita ci Yihofaan maolahayto Cingra kitaanan. (1 Yohani 4:9, 10) Ano sapitodongaw kita Cingranan, o mamaolah to tao. (Ifiso 5:1) O cecay pakayraan ita mihaen, itini ˈayaw no saikoray romiˈad padama to tao mafanaˈ ci Yihofaan. (ˈOsien ko Matay 9:36-38.) Mihaen ko demak ita, pairaay to toki no tao malo paro no lomaˈ no Kawas. Ikor no micada to paputisem ko cecay tamdaw, o papadotoc kita a ciharateng cingranan, mikangodo cingranan. (1 Yohani 4:20, 21) Sasamaan ko hademak hani? Pakasoˈlinen ko salikaka, aka ranikay a cisasa cangranan. Soˈlin cowa ka cipinang kita hano midemak ko salikaka to cecay demak, aka misaˈosi to misatekeday anca tatiihay ko nafalocoˈan nangra. O kakangodoen ita cangra, minengneng cangranan ikakaay ko ngaˈay to niyah.—ˈOsien ko Loma 12:10; Filipi 2:3.

15. O cima ko papaihkalen ita to siniˈadaay ato damsayay hani?

¹⁵ Paihkal to siniˈadaay ato damsayay i polong a tamdaw. Ano makalimay kita malo paro no lomaˈ ni Yihofa, o mamitoor to sowal Ningra a maˈorip. Tinakoen, pasifanaˈay ci Yis kitaanan pasayra i polong a tamdaw paihkal to siniˈadaay ato damsayay, mahawpay ko ˈada ita. (Luka 6:32-36) Soˈlin pasangaray kita mihaen to demak, wa kamayanho a misaˈicel minanam to harateng ato pakayraan ni Yis a dademak. Ano misarocod kita midofdof ci Yihofaan ato mitodong ci Yisan, o pasowalay kita to kakarayan a Wama makalimay kita tahadaˈoc materek i paro no lomaˈ Ningra.

16. Sasamaan kita miˈading to ngangan no paro no lomaˈ ni Yihofa?

¹⁶ Paˈadingen ko ngangan no paro no lomaˈ ni Yihofa. Tocerid, o safa maolahay a mitodong to kaka. Ano ngaˈay ko demak no kaka, wa patireng to ngaˈayay taˈarawan no safa. Ano tatiih ko demak no kaka, wa mitodong ko safa a tatiih ko demak. Malecaday ko paro no lomaˈ ni Yihofa. O cecay na madimadiay to Kawas a tamdaw ikor mitowakang to kimad, anca midemak to malafoay ato roma tatiihay demak, o romaroma tamdaw wa mitoor cingranan midemak to tatiihay demak alatek. Oniya tamdaw mipalakay to ngangan no paro no lomaˈ ni Yihofa. (1 Tisalonika 4:3-8) Aka a mafiyor no cowa ka madimadi a tamdaw kita, aka pihai to kihcod a demak mipalak to kalalaˈed ita to Wama i kakarayan.

17. Hamaan pairaen ita ko masamanay mararaway a harateng? Misamanay?

¹⁷ Mitadiˈec ci Yihofaan eca ko hafay. Mikiˈokay ci Yihofa, ano salakaten ita micangacang ko Hongti Kitakit, mitoor to moecelay palinian Ningra maˈorip, o mamidimokos Cingra to sakaˈorip ita. (ˈOlic 55:22; Matay 6:33) Maharateng konini, cowato ko caciharateng kita papaira to tahadaˈocay a lipahak ko mihadakan no hekal a dafong. Mafanaˈay kita, dengan mitoor to araaw ni Yihofa a midemak, ngaˈ ira ko soˈlinay rihadayay a falocoˈ. (Filipi 4:6, 7) Soˈlin iraay ko ˈicel ita micakay to adihayay dafong, o mamisimsim kita wa ira ko toki anca ˈicel ita misaka dademak ato mitomadaw toniya dafong hokira. Wa pakidem ko pitiˈer ita to iraay a dafong no niyah, caay ka ngaˈay awa han? Aka  mapawan, itini kita i paro no lomaˈ ni Yihofa adihayay ko hatayal, mihaenay aka makalisanga ko falocoˈ. Itini saka 1 hahekalan, cecay cihafayay a kapah caay kakahi mifalah to hafay no niyah, malahdaway ko toki matayal saki Yihofaan ato malo wawa no Kawas. Cowa ko mamitodong kita to pasaripaˈan ningra!—Marko 10:17-22.

18. O midofdofay to Kawas a tamdaw mamilifok to maanan a sapalemed?

¹⁸ Noikor, o polong midofdofay ci Yihofaan a tamdaw wa ngaˈay tahadaˈoc maolah ato midoko ci Yihofaan, o sakakaay kalimlaan a sapalemed konini! Roma i, o iraay ko hatokel i fafekang no sera maˈorip a tamdaw wa tahadaˈoc lipahak a midimokos to misangaˈan ni Yihofa a cikiw. Cato ka halafin, itini pikowan no Hongti Kitakit, oniya cikiw ato polong maˈoripay i cikiw o fafaeloh ko kaˈorip. O pairaan ni Atam aci Ifa a tatiihay demak i paro no lomaˈ no Kawas, wa saysayen ni Yis a maemin. Papatikolen ni Yihofa paˈorip ko pinaay soˈot emang a mapatayay tamdaw, paira to hatoki nangra itini Lakoing milifok to malefotay a kaˈorip. (Luka 23:42, 43) Ano patikol a malefot ko paro no lomaˈ no Kawas i fafekang no sera i, o kahacecay tamdaw papaihkal to malecaday misowalan ni Tafiti ira ko ‘ˈdil ato ˈodingar.’—ˈOlic 8:5.

19. O haharatengen ita ko maanan hani?

¹⁹ O masalalomaˈay no ‘taˈangayay ˈopo a tamdaw’ kiso han? Iraay ko makapahay a hatokel iso! Tada maolahay ci Yihofa tisowanan, makalimay Cingra malo tamdaw no paro no lomaˈ Ningra kiso. Mihaenay sarocoden a pakahemek ci Yihofa, to romiˈamiˈad misimsim to sakiˈok Ningra. Ira ko tatodong iso midoko to kakarayan Wama, ira ko tokel tahadaˈoc pakahemek Cingranan, songilaˈen misalimla koniya sano odoˈay a sapalemed!