1. Јеһованын хәлг етдикләри һагда дүшүнәндә биздә һансы суаллар јараныр?

ЈЕҺОВАНЫН јаратдығы әнҝин каинат һагда дүшүнәндә, јәгин ки, мәзмурчу Давудун кечирдији һиссләри кечирсиниз. Давуд Аллаһа һәмд уҹалдараг демишди: «Хәлг етдијин ҝөјләрә, әлләринин ишинә, јаратдығын аја, улдузлара баханда дүшүнүрәм: фани инсан нәдир ки, ону хатырлајырсан? Бәшәр оғлу нәдир ки, онун гејдинә галырсан?» (Зәб. 8:3, 4). Давуд кими, јәгин, сиз дә каинатла мүгајисәдә нә гәдәр кичик олдуғунузу дүшүнүрсүнүз вә Јеһованын сизә нәзәр салмасына һејран галырсыныз. Бу мәгаләдән ҝөрәҹәјимиз кими, Јеһова нәинки илк бәшәр өвладларынын, Адәмлә Һәвванын гејдинә галмышды, һәмчинин онлары Өз аиләсинә дахил етмишди.

2. Јеһованын јер үзүндә јаратдығы илк өвладлары илә бағлы нијјәти нә иди?

² Адәмлә Һәвва Јеһованын јер үзүндә јаратдығы илк өвладлары иди, Јеһова да онларын сәмави Атасы иди. Јеһова онларын хејирли өвлад олмасыны истәјирди. Онлара бујурмушду: «Төрәјиб чохалын, бүтүн јер үзүнү долдурун вә она саһиб олун» (Јар. 1:28). Адәмлә Һәвва өвлад саһиби олмалы вә евләри олан Јер күрәсинә гуллуг етмәли идиләр. Онлар итаәткарлыг ҝөстәриб, Јеһованын бу нијјәтинә ујғун давранса идиләр, һәм өзләри, һәм дә нәсилләри әбәдијјән Аллаһын аиләсинин үзвү олаҹагды.

3. Јеһованын Адәмлә Һәвваја аиләсиндә шәрәфли јер вердијини нәјә әсасән дејә биләрик?

³ Адәмлә Һәвванын Јеһованын аиләсиндә шәрәфли јери вар иди. Давуд Зәбур 8:5 ајәсиндә Јеһованын хәлг етдији инсанла бағлы белә демишди: «Сән ону мәләкләрдән бир аз ашағы јаратдын, башына шәрәф, әзәмәт таҹы гојдун». Дүздүр, Јеһова  инсаны мәләкләр гәдәр гүдрәтли, зәкалы вә габилијјәтли јаратмајыб (Зәб. 103:20). Амма инсаны бу гүдрәтли мәләкләрдән садәҹә «бир аз ашағы» јарадыб. Бир дүшүнүн, бу нә демәкдир! Һәгигәтән дә, Јеһова улу валидејнләримизин һәјатына мөһтәшәм башланғыҹ вермишди.

4. Адәмлә Һәвванын итаәтсизлији уҹбатындан нә баш верди вә бу мәгаләдә нә һагда данышаҹағыг?

 ⁴ Тәәссүфләр олсун ки, Адәмлә Һәвва итаәтсизликләринә ҝөрә өвладлыгдан чыхарылды. Бу мәгаләдән дә ҝөрәҹәјимиз кими, бу онларын нәсли үчүн фәлакәтлә нәтиҹәләнди. Амма Јеһованын нијјәти дәјишмәјиб. О истәјир ки, итаәткар инсанлар әбәдијјән Онун өвлады олсун. Илк өнҹә, ҝәлин ҝөрәк Јеһова бизи неҹә шәрәфләндириб. Һәмчинин өјрәнәҹәјик ки, Јеһованын аиләсинин үзвү олмаг истәдијимизи неҹә ҝөстәрә биләрик. Сонда исә Јеһованын јер үзүндәки өвладларыны ҝөзләјән әбәди немәтләр һаггында данышаҹағыг.

5. Бизи Өз бәнзәриндә јаратдығына ҝөрә Аллаһа миннәтдар олдуғумузу неҹә ҝөстәрә биләрик?

⁵Јеһова бизи Өз бәнзәриндә јаратмагла шәрәфләндириб (Јар. 1:26, 27). Аллаһын бәнзәриндә јарадылдығымыз үчүн Онда олан мәрһәмәт, сәдагәт, әдаләт вә диҝәр ҝөзәл кејфијјәтләри тәзаһүр етдирә биләрик (Зәб. 86:15; 145:17). Өзүмүздә бу кими кејфијјәтләри јетишдирмәклә Јеһоваја шәрәф ҝәтиририк вә Она миннәтдарлығымызы ҝөстәририк (1 Бут. 1:14—16). Сәмави Атамызын бәјәндији кими давранмағымыз бизә хошбәхтлик ҝәтирир. Јеһова бизи Өз бәнзәриндә јарадыб, демәли, Онун Өз аиләсиндә ҝөрмәк истәдији инсан олмағымыз мүмкүндүр.

6. Јеһова Јер күрәсини јарадаркән инсаны шәрәфләндирдијини неҹә ҝөстәрмишди?

⁶Јеһова бизә ҝөзәл ев бәхш едиб. Јеһова илк инсаны јаратмаздан хејли әввәл Јер күрәсини јашајыш үчүн һазырлады (Әјј. 38:4—6; Әрм. 10:12). Јеһова хејирхаһ вә сәхавәтли олдуғу үчүн бизә боллуҹа наз-немәт вериб (Зәб. 104:14, 15, 24). О, вахташыры јаратдыгларына нәзәр салырды вә ҝөрүрдү ки, «бу, јахшыдыр» (Јар. 1:10, 12, 31). Јеһова инсана јаратдығы һејрәтамиз шејләр үзәриндә «ағалыг» вермәклә ону уҹалтды (Зәб. 8:6). Аллаһын нијјәти одур ки, камил инсанлар әбәдијјән Онун јаратдыгларынын гајғысына галыб, севинҹ дујсунлар. Бу мөһтәшәм вәдә ҝөрә Јеһоваја даима миннәтдарлығынызы билдирирсиниз?

7. Јушә 24:15 ајәси инсанын ирадә азадлығына саһиб олдуғуну неҹә ҝөстәрир?

⁷Јеһова бизә ирадә азадлығы вериб. Һәјат јолумузу сечмәк бизим әлимиздәдир. (Јушә 24:15 ајәсини охујун.) Сечим етмәк габилијјәтимиз ирадә азадлығы адланыр. Биз Аллаһа хидмәт етмәји сечәндә Онун гәлби севинир (Зәб. 84:11; Мәс. 27:11). Ирадә азадлығымыздан һәјатымызын мүхтәлиф саһәләриндә дүзҝүн гәрарлар вермәк үчүн истифадә едә биләрик. Ҝәлин ҝөрәк Иса Мәсиһ бу әнамдан неҹә истифадә етмишди.

8. Иса сечим азадлығындан неҹә истифадә етмишди? Нүмунә чәкин.

⁸ Онун нүмунәси бизә көмәк едәҹәк ки, ирадә азадлығымыздан дүзҝүн истифадә едиб, башгаларынын рифаһыны өзүмүзүнкүндән үстүн тутаг. Бир дәфә Иса илә һәвариләри чох јорғун иди. Онлар динҹәлмәк үмиди илә сакит бир јерә јолланырлар. Амма динҹәлә билмирләр, чүнки ҹамаат Исадан тәлим алмаг үчүн һәмин јерә ахышыр. Иса ҹамааты ҝөрәндә әсәбиләшмир, әксинә, онлара јазығы ҝәлир. Буна ҝөрә дә «онлара чох шеј өјрәтмәјә» башлајыр (Марк 6:30—34). Биз дә Исадан өрнәк алараг, вахтымызы вә ҝүҹүмүзү башгалары үчүн гурбан верәндә  ҝөјдәки Атамызын адыны уҹалдырыг (Мәт. 5:14—16). Һәмчинин ҝөстәририк ки, Онун аиләсинин үзвү олмаг истәјирик.

9. Јеһова инсанлара һансы хүсуси әнамы вериб?

⁹Јеһова инсана өвлад саһиби олмаг габилијјәти бәхш едиб; һәмчинин инсанын үзәринә өвладына Аллаһы севмәји вә Она гуллуг етмәји өјрәтмәк мәсулијјәти гојуб. Әзиз валидејнләр, бу хүсуси әнамы гијмәтләндирирсиниз? Јеһова мәләкләрә мөһтәшәм габилијјәтләр версә дә, онлара өвлад саһиби олмаг габилијјәти вермәјиб. Буна ҝөрә дә валидејнләр Јеһованын онлара вердији мәсулијјәти гијмәтләндирмәлидирләр. Валидејнләрә өвладларыны «Јеһованын тәрбијәси вә өјүд-нәсиһәтилә» бөјүтмәк һәвалә олунуб. Бу, мүгәддәс бир өһдәчиликдир (Ефес. 6:4; Ган. 6:5—7; Зәб. 127:3). Бу ишдә валидејнләрә көмәк етмәк үчүн Аллаһын тәшкилаты Мүгәддәс Китаба әсасланан чохлу вәсаитләр тәгдим едир, мәсәлән, нәшрләр, видеолар, мусиги вә интернет мәгаләләри. Ајдындыр ки, ушаглар сәмави Атамыз вә Онун Оғлу үчүн чох әзиздир (Лука 18:15—17). Валидејнләр Јеһоваја ҝүвәнәндә вә өвладларына гајғы ҝөстәрмәк үчүн әлләриндән ҝәләни едәндә Јеһова разы галыр. Һәмчинин белә валидејнләр ушагларына көмәк едирләр ки, онлар Јеһованын аиләсинин әбәдијјән үзвү олсунлар!

10, 11. Фидјә гурбанлығы сајәсиндә Јеһова гаршымызда һансы имканлары ачыб?

¹⁰Јеһова инсанларын јенидән Онун аиләсинин үзвү олмасы үчүн ән дәјәрли Оғлуну гурбан вериб.  Дөрдүнҹү абзасда вурғуландығы кими, һәм Адәмлә Һәвва, һәм дә онларын нәсли Јеһованын аиләсиндәки јерләрини итирдиләр (Ром. 5:12). Адәмлә Һәвва Јеһоваја гаршы биләрәкдән итаәтсизлик етдији үчүн өвладлыгдан чыхарылмаға лајиг идиләр. Бәс онларын нәсли илә нә баш верди? Јеһова мәһәббәтдән ирәли ҝәләрәк тәдбир ҝөрдү ки, онларын арасындан лајиг олан кәсләри Өз аиләсинә дахил етсин. О, бунун үчүн јеҝанә Оғлу Иса Мәсиһи гурбан верди (Јәһ. 3:16; Ром. 5:19). Исанын фидјәси сајәсиндә Јеһованын 144 000 садиг инсаны оғуллуға ҝөтүрмәси мүмкүн олду (Ром. 8:15—17; Вәһј 14:1).

¹¹ Һәмчинин милјонларла диҝәр садиг инсан Јеһованын ирадәсини итаәткарлыгла јеринә јетирир. Онларын миниллијин ахырында олаҹаг сонунҹу сынагдан сонра там шәкилдә Аллаһын аиләсинин үзвү олмаг имканы вар (Зәб. 25:14; Ром. 8:20, 21). Белә бир үмидләри олдуғу үчүн онлар артыг индидән Јараданлары Јеһоваја «Ата» дејә мүраҹиәт едирләр (Мәт. 6:9). Дириләҹәк кәсләрә дә Јеһованын бујругларыны өјрәнмәк имканы вериләҹәк. О кәсләр ки Аллаһа итаәт едәҹәк, онлар да сонда Онун аиләсинин үзвү олаҹаг.

12. Һансы суалын ҹавабыны тапаҹағыг?

¹² Ҝөрдүјүмүз кими, Јеһова инсаны шәрәфләндирмәк үчүн чох шеј едиб. О, мәсһ олунмушлары артыг оғуллуға ҝөтүрүб, бөјүк издиһама исә јени дүнјада там шәкилдә өвладлыға ҝөтүрүлмәк үмидини вериб (Вәһј 7:9) Бәс биз әбәдијјән Јеһованын аиләсинин ичиндә олмаг истәдијимизи неҹә ҝөстәрә биләрик?

13. Јеһованын аиләсинин үзвү олмаг үчүн нә етмәлијик? (Марк 12:30).

¹³Јеһоваја бүтүн гәлбинизлә хидмәт едәрәк Ону севдијинизи ҝөстәрин. (Марк 12:30 ајәсини охујун.) Хејирхаһ Аллаһымыз бизә сајсыз-һесабсыз немәтләр вериб. Бизә Она ибадәт етмәк габилијјәти вермәси, бәлкә дә, бу немәтләрин ән бөјүјүдүр.  Јеһованы севдијимизи «Онун әмрләринә риајәт етмәк»лә ҝөстәририк (1 Јәһ. 5:3). Иса Мәсиһ Јеһованын бујруғу илә бизә шаҝирд һазырламаг вә онлары вәфтиз етмәк тапшырығы вериб (Мәт. 28:19). О һәмчинин бизә бир-биримизи севмәји әмр едиб (Јәһ. 13:35). Јеһова онун әмрләринә итаәт едәнләри хидмәтчиләриндән ибарәт үмумдүнја аиләсинә дахил едәҹәк (Зәб. 15:1, 2).

14. Инсанлары севдијимизи неҹә ҝөстәрә биләрик? (Мәтта 9:36—38; Ромалылара 12:10).

¹⁴Инсанлара мәһәббәт ҝөстәрин. Мәһәббәт Јеһованын ән әсас хүсусијјәтидир (1 Јәһ. 4:8). Биз һәлә Јеһованы танымамышдан әввәл О бизә мәһәббәт ҝөстәриб (1 Јәһ. 4:9, 10). Биз инсанлара мәһәббәт ҝөстәрәндә Она бәнзәмиш олуруг (Ефес. 5:1). Инсанлара мәһәббәт ҝөстәрмәјин ән ҝөзәл јолларындан бири, һәлә вахт вар икән, онларын Јеһова һагда өјрәнмәсинә көмәк етмәкдир. (Мәтта 9:36—38 ајәләрини охујун.) Бунунла биз онларын гаршысында Јеһованын аиләсинин үзвү олмаг имканы ачырыг. Инсан вәфтиз олунандан сонра да биз она мәһәббәт ҝөстәрмәјә вә һөрмәт етмәјә давам етмәлијик (1 Јәһ. 4:20, 21). Бура нә дахилдир? Мәсәлән, етибар етмәк. Онда она пис нијјәт јозмајаҹағыг вә нәјисә худбин мәгсәдлә етдијини дүшүнмәјәҹәјик. Әксинә, диндашымызы өзүмүздән үстүн сајмагла она һөрмәт ҝөстәрәҹәјик. (Ромалылара 12:10 ајәсини охујун; Филип. 2:3.)

15. Кимләрә гаршы хејирхаһ вә мәрһәмәтли олмалыјыг?

¹⁵Бүтүн инсанлара гаршы хејирхаһ вә мәрһәмәтли олун. Әҝәр истәјириксә, Јеһованын аиләсиндә олуб, әбәдијјән Она «Ата» дејәк, Кәламында јазыланлара әмәл етмәлијик. Мәсәлән, Иса өјрәдирди ки, биз һамыја, һәтта дүшмәнләримизә гаршы хејирхаһ вә мәрһәмәтли олаг (Лука 6:32—36). Бәзән бу бизә чох чәтин ҝәлә биләр. Белә олан һалда, биз Иса кими дүшүнмәји вә давранмағы өјрәнмәлијик. Јеһоваја итаәт етмәк вә Исаја бәнзәмәк үчүн әлимиздән ҝәләни едәндә Јеһоваја ҝөстәририк ки, биз әбәдијјән Онун аиләсинин ичиндә олмаг истәјирик.

16. Јеһованын аиләсинин адыны ләкәләмәмәк үчүн нә едә биләрик?

¹⁶Јеһованын аиләсинин адына ләкә ҝәтирмәјин. Адәтән аиләдә евин бөјүк оғлу нә едирсә, кичији дә ону тәкрарлајыр. Әҝәр бөјүк оғул Мүгәддәс Китабдакы принсипләрә әмәл едирсә, кичик гардашы үчүн ҝөзәл нүмунә олур. Јох әҝәр бөјүк оғул дүз јолдан сапарса, кичик гардашы үчүн пис нүмунә олар. Јеһованын аиләси һагда да ејни шеји демәк олар. Әҝәр садиг мәсиһи сонрадан дөнүк фикирләрә ујурса, әхлагсыз вә ја надүрүст һәјат сүрмәјә башлајырса, башгаларында онун шәр әмәлләринә гошулмаг истәји јарана биләр. Бу ҹүр даврананлар Јеһованын аиләсинин адыны ләкәләјирләр (1 Салон. 4:3—8). Биз пис нүмунәләри изләмәмәјә гәти гәрарлы олмалыјыг вә јол вермәмәлијик ки, нәсә бизим сәмави Атамызла мүнасибәтимизи корласын.

17. Өзүмүзү һансы дүшүнҹә тәрзиндән ҝөзләмәлијик вә нәјә ҝөрә?

¹⁷Мадди шејләрә јох, Јеһоваја бел бағлајын. Јеһова вәд едир ки, әҝәр биз Падшаһлығы һәр шејдән үстүн тутсаг, Онун салеһ ганунларына ујғун јашасаг, јемәјимиз, ҝејимимиз вә јашамаға јеримиз олаҹаг (Зәб. 55:22; Мәт. 6:33). Әҝәр биз Јеһованын бу вәдинә етибар етсәк, онда дүшүнмәјәҹәјик ки, бу дүнјанын тәклиф етдији мадди шејләрә саһиб олсаг, дәрдимиз олмаз вә хошбәхт оларыг. Билирик ки, әсл гәлб раһатлығына саһиб олмағын јеҝанә јолу Јеһованын  ирадәсини јеринә јетирмәкдир (Филип. 4:6, 7). Амма, ола биләр, мадди имканымыз чох шеј алмаға јол верир. Бәс бу шејләри истифадә етмәк вә онларын гуллуғунда дурмаг үчүн вахтымыз вә ҝүҹүмүз олаҹаг? Саһиб олдуғунуз шејләрә чох бағлысыныз? Унутмамалыјыг ки, Јеһова аиләсинин үзвләринә мүәјјән ишләр тапшырыб. Јол вермәмәлијик ки, нәләрсә бизи бу ишләри јеринә јетирмәкдән јајындырсын. Биз мадди шејләрә бағлы олдуғу үчүн Исанын ардынҹа ҝетмәкдән имтина едән варлы ҝәнҹә бәнзәмәк истәмирик. О, бу гәрары илә Јеһоваја хидмәт етмәк вә Онун оғлу олмаг имканыны итирди! (Марк 10:17—22).

18. Итаәткар инсанлара әбәдијјәт боју һансы шәрәф вә немәтләр нәсиб олаҹаг?

¹⁸ Итаәткар инсанлара ән бөјүк шәрәф нәсиб олаҹаг. Онлар әбәдијјәт боју Јеһованы севиб, Она ибадәт едәҹәкләр! Һәмчинин Јеһованын онлар үчүн јаратдығы мүкәммәл евә, Јер планетинә гуллуг едиб, бундан севинҹ дујаҹаглар. Тезликлә Аллаһын Падшаһлығы јер үзүнү вә орада олан һәр шеји јенидән ҝөзәлләшдирәҹәк. Иса Мәсиһ Адәмлә Һәвванын Аллаһын аиләсиндән чыхмасы нәтиҹәсиндә јаранан бүтүн проблемләри арадан галдыраҹаг. Јеһова милјонларла өлмүш инсаны дирилдәҹәк вә онлара сағлам бәдәндә вә ҹәннәтә чеврилмиш јер үзүндә әбәди јашамаг имканы верәҹәк (Лука 23:42, 43). Јеһованын аиләсинин јер үзүндәки һиссәси камиллијә јетишдикҹә, һәр бир кәсә Давудун јаздығы кими, «шәрәф, әзәмәт» нәсиб олаҹаг (Зәб. 8:5).

19. Нәји јадда сахламалыјыг?

¹⁹ Әҝәр сиз бөјүк издиһама аидсинизсә, Јеһова сизин гаршынызда мөһтәшәм имкан ачыб. Јеһова сизи севир вә истәјир ки, Онун аиләсинин үзвү оласыныз. Одур ки, Ону разы салмаг үчүн әлиниздән ҝәләни един. Һәр бир ҝүнүнүзү Јеһованын вәдләри илә јашајын. Сәмави Атамыза ибадәт етмәк шәрәфини гијмәтләндирин вә Ону әбәдијјәт боју мәдһ етмәк имканыны әлдән вермәјин!