1. Rosai nari kakḇaḇir ya rofyor komam Yahwe ḇraur ḇramin Ḇyena?

FAFISU kowasen kara mura ro supswan ma farsyos Yahwe ifrur na ine ido, na kakḇaḇir imnis manḇefas Mazmur, Daud i. Ḇyenadi ḇo doḇe, ”Rofyor yamam farsyos Bedi, ḇraur ḇramin Bena, paiki ma mak wafrur anna, yakon yakara: Manseiso snonggaku ya inja waswarepen i, ma manseiso roma snonggaku inja mamwarek i?” (Mz. 8:3, 4) Raris Daud i, imbude kokara koinema kokasun kaku bardibur supswan ma farsyos ine, ḇape komarisen kaku snar Yahwe dakmam ma dakswarepen ko. Ḇape, roi nari kawos na, Yahwe myam snonggaku ḇerandak Adam ma Eva su monda ḇa, ḇape ḇyesu fa suyakro kina Ḇyedi.

2. Yahwe imarisen Adam ma Eva sufrur rosai?

² Adam ma Eva suma Yahwe romawa randak ifrur ro supswan ya, ma Yahwe ima Kma bena saswar suḇedirya. Yahwe byuk fararur ḇe su fa sufrur na. Allah ikofen ḇe su radine, ”Mukapar roma kpu sya fa sibor syadi, insama supswan ine ifo ma mkoḇepoik na.” (Kej. 1:28) Inja, Allah imarisen suna romawa ma sufaduru pyum supswan ya. Susouser faro Yahwe ido, Adam ma Eva fnoḇek romawa suḇesya nari sḇe Allah kina Ḇyedi isof fyoro.

3. Rosai ḇefnai fa bisa kokofen Adam ma Eva Yahwe byuk ḇe su moḇ ḇepyum kaku?

³ Ro Yahwe kina Ḇyedi, Adam ma Eva susmai syowi kaku. Ro Mazmur 8:5 ma fasfas kasun ḇyena, Daud ikofen ḇo doḇe, ”[Yahwe] wafrur [snonggaku] fa ikaki syadi ḇa ro malaikat, ma swower i kuker baba ma sanandik.” (Mz. 8:5) Imboḇae, malaikat sya sfawinanem ma  sisambraḇ syadibur snonggaku sya. (Mz. 103:20) Ḇape, snonggaku ḇyeḇefrur ”ikaki syadi ḇa” ro malaikat ḇesambraḇ kaku. Ine roi ḇepyum kaku! Roi Yahwe byuk faro sinan ḇepon koḇesuine kwar syowi ḇeba kaku!

4. Snar Adam ma Eva susouser faro Yahwe I ḇarya, rosai susmai na ma rosai na kawos ro farkarkor anine?

 ⁴ Faḇye kaku, Adam ma Eva susouser Yahwe I ḇarya, suḇe kina Ḇyedi wer ḇa. Roi ine ifnai ḇo nun roi ḇeḇyeḇa faro romawa kpu ḇyesi, raris na komam ro farkarkor ine. Ḇape Yahwe marisen Ḇyena neḇefadwer ḇa. Imarisen snonggaku sya sisouser ma sakḇe kina Ḇyedi isof fyoro. Ḇepon ya, na kawos rariso Yahwe fyasnai faro ko kwar snar ḇyesyowi kaku ko. Ramnai, nari kawos rosai na kofrur ro kirine fa kofasnai komarisen kakro Yahwe kina Ḇyedi. Ḇepupes ya, nari kawos barakas rosai nari Allah romawa Ḇyesi sismai na ro supswan isof fyoro.

5. Moḇsa na kokofen kasumasa rai snar koḇefrur fa komnis Allah I?

⁵ Yahwe ifrur ko fa komnis I. (Kej. 1:26, 27) Snar komnis I, inja bisa kakfasnai rari-rari ḇepyum Yahwe Ḇyena. Raris, saswarya, syowi ḇaido sawarwar, souser, ma kofrur roi ḇenapes ya. (Mz. 86:15; 145:17) Koḇesewar fa kofrur roi nane ido, ine nfasnai koḇesyowi Yahwe ma kokofen kasumasa faro I. (1 Ptr. 1:14-16) Kofrur namnis Kma koḇedi ro nanggi marisen Ḇyena ido, na kosmai aski ma saneprei. Osower ido, snar kona rari-rari ḇemnis Yahwe I, inja bisa ḇyeko fa kakro kina Ḇyedi.

6. Rosai ḇefasnaiḇair kaku snar Yahwe ḇyesyowi kaku snonggaku koine?

⁶ Yahwe fyasos moḇ ḇepyum kaku koḇarek rona. Snar Yahwe ḇyesyowi snonggaku sya, inja rofyor ifrur snonggaku sya ḇaim, Ifrur supswan ḇepyum ine ḇepon ḇe ko. (Ayb. 38:4-6; Yer. 10:12) Snar Yahwe iswar ma inaḇye, roi ḇebor ḇepyum Byuk na faro ko insamaido kona aski marisen. Myamepen ḇraur Ḇyena ḇesya kwar ma ”myam snar roi ifrur nakam napyum fafayaḇa”. (Kej. 1:10, 12, 31) I kako byuk ḇaḇesyowi faro snonggaku sya kuker byuk fararur fa sḇepoik faro ḇraur Ḇyena ḇero supswan ya. (Mz. 8:6) Allah imarisen snonggaku ḇenapes sya simarisen ro fararur sismai nane isof fyoro. Ma iso Ḇyeasas kaku faro koni. Inja, Ausya wakofen kasumasa ḇesya kwar snar asas ḇeba ani ke?

7. Rariso Yosua 24:15 fyasnaiḇair snar snonggaku koine Yahwe byuk fa bisa kokinfir ro manggunko?

⁷ Yahwe byuk ḇe ko fa kokinfir ro manggunko. Inja, bisa kokinfir ro manggun ko rosai imbe kofrur ro kenem koḇena. (Wasya Yosua 24:15.) Kokinfir fa kuffarmyan I ido, nari Imarisen. (Mz. 84:11; Ams. 27:11) Inema snemuk ḇepyum rirya. Snar Yahwe byuk ḇe ko fa kokinfir ro manggunko, inja bisa kun snemuk ḇepyum kuker roi ḇesena. Mgorama komam Yesus kenem ḇepyum ḇyena.

8. Moḇsa Yesus byuk kankinfir manggun ḇyena rai? Fawar pan.

⁸ Yesus kyinfir fa myam fandun ḇepon ro snonggaku ḇesesya bardibur manggundi. Ras oso, i kuker manfamyan ḇyeskoya skombrus inja skoḇe skomnaisu ro moḇ ḇeḇeursḇa. Imboi, fafisu skora ḇe moḇ ani ido, skomam kawasa ḇebor skain siwaf fa Yesus fyarkor si. Mura  jadi fa simnaisu ḇa. Ḇape, Yesus dakfayaf si ḇa. Fama, iswar kawasa ansya ma ”fyarkor si ro roi nabor”. (Mrk. 6:30-34) Imnis ra Yesus i, koḇe kakbuk oras ma samambraḇ koḇena faro snonggaku ḇesesya. Kofrur rarirya ido, kobuk sanandik faro Kma koḇedi ro nanggi ma kofasnai faro I snar komarisen kakro kina Ḇyedi.​—Mat. 5:14-16.

9. Fakamaman rosai Yahwe byuk faro snonggaku sya?

⁹ Snonggaku sna samambraḇ fa sna romawa ma sismai fakamamar fa sḇuk farkarkor faro si insama bisa siswar ma suffarmyan Yahwe I. Fakamaman ḇaido karunia ine ḇyeḇebuk faro snonggaku sya monda. Malaikat bena papoik nabor sya monda sakna fakamaman ine ḇa. Inja, sinan Au ido, na ḇesyowi fararur ḇeba ine ke? Yahwe ikyar Au kwar fa mamfaduru romawa sya kuker ”farkarkor ma ananun [Yahwe]”. (Ef. 6:4; Ul. 6:5-7; Mz. 127:3) Inema ḇaḇesyowi ma kako fakamamar ḇefandun kaku. Insamaido wasmai fanfnoḇek, Allah organisasi Ḇyedine fyasos robebor fa kobukifarkor Refo nabore imnis ra syap na, vidio, musik, ma fasfas ḇero situs web koḇedi. Ine nfasnaiḇair snar Kma koḇedi ro nanggi ma Roma Ḇyani suswar faro romawa sya. (Luk. 18:15-17) Inja, ḇesewar fa mamfaduru pyum kaku romawa Bedi, ma wakyar Yahwe I. Wafrur rariryaido, nari wafrur Yahwe imarisen, ma romawa Bedi na nya swaf fa dakro Yahwe kina Ḇyedi isof fyoro!

10-11. Yahwe fyarser Roma Ḇyedi insamaido?

¹⁰ Yahwe fyarser Roma iswar kaku Ḇyedi insamaido kakḇe kina Ḇyedi. Raris ḇeḇeyap ro  syos 4, Adam ma Eva suro Yahwe kina Ḇyedi wer ḇa, roma up suḇesyano rupa rairi. (Rm. 5:12) Adam ma Eva fandun fa suḇeyawbur ro Yahwe kina Ḇyedi, snar sufawi kwar ḇesyabo susouser ḇa. Ḇape, rariso kuker kpu up ḇyesi ḇesouser sya? Yahwe iswar si ma imarisen sakḇe kina Ḇyesi. Inja, Fyarser Roma mandos Ḇyedi, Yesus Kristus. (Yoh. 3:16; Rm. 5:19) Snar farsarser fasarpar ani, snonggaku ri 144.000 skanow si ḇe Allah romawa Ḇyesi.​—Rm. 8:15-17; Why. 14:1.

¹¹ Si monda ḇa, snonggaku yuta syadi sia kako ḇesouser ma ḇekyar sya. Si kako sakfrur Allah marisen Ḇyena. Rofyor simkeibur ujian ro papupes Ḇaḇepapoik Taun Syaran Oser Kristus ḇyedi, si kako bisa sakḇe Yahwe kina Ḇyedi. (Mz. 25:14; Rm. 8:20, 21) Ḇape, kirine bisa sor Manḇedaw sedi, Yahwe, kuker apap ”Kma”. (Mat. 6:9) Snonggaku ḇebor nari ḇeḇebawes sya nari sifarkor si fa sifawi Yahwe marisen Ḇyena. Sisouser ido, bisa sakḇe kina Ḇyedi kako.

12. Rosai nari kawos wer na?

¹² Imnis kawos kwar ani, Yahwe ifrur kwar roi nabor ḇefasnaiḇair snar Ḇyesyowi ko. Ikanow snonggaku ḇesmai ramrem sya ḇe romawa Ḇyesi ma byuk saneraro faro ”raryur ḇeba” fa sakḇe romawa Ḇyesi ro dunya babo ya. (Why. 7:9) Inja, rariso bisa kofasnaiḇair faro Yahwe snar imbe kakḇe kina Ḇyedi?

13. Imbe kakḇe Yahwe kina Ḇyedi ido rosai kofrur kaku ya? (Markus 12:30)

¹³ Wuffarmyan Yahwe I kuker sne ḇesiper snar waswar I. (Wasya Markus 12:30.) Ro samambraḇ nakam Yahwe byuk ḇe kona, oser ḇefandun kaku ya isoine samambraḇ fa kosyom I. Bisa  kofasnai sawarwar koḇena faro Yahwe kuker ”koḇeuser sasoser ḇyena”. (1 Yoh. 5:3) Imnis raris, roro Yesus, Yahwe byuk parenta ḇe ko fa kofrur manfamyan ma koḇebaptis si. (Mat. 28:19) Kosmai parenta fa koswar yae ko. (Yoh. 13:35) Kosouser parenta Ḇyena kam ido, na koḇe Yahwe kina Ḇyedi.​—Mz. 15:1, 2.

14. Moḇsa koswar snonggaku ḇesesya rai? (Matius 9:36-38; Roma 12:10)

¹⁴ Waswar snonggaku ḇesesya. Saswar ima Yahwe rari ḇeba Ḇyena. (1 Yoh. 4:8) Yahwe iswar ko, syadi wer fyor komambir I ḇaim. (1 Yoh. 4:9, 10) Imbe koso Yahwe kuker koswar snonggaku ḇesesya. (Ef. 5:1) Nyan oser ḇepyum fa kofasnai saswar koḇena iso kuker kofnoḇek si fa sfarkor ḇekur Yahwe fyor fafisu isya kaker. (Wasya Matius 9:36-38.) Kuker rarirya, sna swaf fa sakḇe Yahwe kina Ḇyedi. Rofyor oso isya ḇyebaptis kwar raryano fandun koswar i pdef ma koḇesyowi i. (1 Yoh. 4:20, 21) Imnis raris, nari kona kakara ḇesasar faro i ḇa. Ifrur roi oso ido, nari kowarki faro i ḇa. Ḇape roi kofrur iso, nari koḇesyowi naek ḇaido srar koḇedi ma komam ikaki syadi ro ko.​—Wasya Roma 12:10; Flp. 2:3.

15. Faro mansei kaku nari kofasnai sneḇenaḇye ma sawarwar ya?

¹⁵ Kofasnai sneḇenaḇye ma sawarwar faro snonggaku sya kam. Koḇe Yahwe I ḇe Kma koḇedi isof fyoro ido, fandun fa kofrur rosai perenta Ḇyena. Imnis ra, Yesus fyarkor ko fa kofasnai sneḇenaḇye ma sawarwar faro snonggaku sya kam, syadi wer faro mbroḇ koḇesi. (Luk. 6:32-36) Komam ido, ine syamswene. Ḇape, bisa kofrur na fyor koḇesewar fa kokara ma kombranser na raris moḇ Yesus i raya. Koḇesewar kaku kosouser Yahwe ma kosofarari Yesus ido, kofasnaiḇair faro Kma koḇedi ro nanggi snar komarisen koḇe kina Ḇyedi isof fyoro.

16. Rariso kofaduru pyum snonsnon ḇepyum ro Yahwe kina Ḇyedi?

¹⁶ Faduru pyum snonsnon ḇepyum ro Yahwe kina Ḇyedi. Roro kina oso, ḇekasun ya na daksofarari ḇeba ḇyani. Eba ḇyani iso farkankin Refo ido, nari nḇe contoh ḇepyum faro eḇe kasun ya. Ḇape ḇebaya ifrur roi ḇeḇyeḇa ido, ḇe kasun ya kako bisa daksofarari i. Rupa rairi ro Yahwe kina Ḇyedi. Snonggaku Kristen ono sisya barpur mura ḇebur kakaku ya ḇaido ḇefrur roi ḇeḇyeḇa ido, naek srar ḇesesya bisa saksowanan si ḇaido sifrur roi ḇeḇyeḇa kako. Ine bisa nafrur snonsnon ḇepyum ro Yahwe kina Ḇyedi iḇyeḇa. (1 Tes. 4:3-8) Imbarya, kosofarari awer contoh ḇeḇyeḇa na, ma roi oso ḇaḇeri nafrur awer ko fa kobinggwanbur Kma koḇedi ro nanggi.

17. Kakara ḇemnis rariso fandun fa kobinggwanbur na, ma snaro?

¹⁷ Wakyar nako Yahwe I, mboi arasai ḇa. Yahwe ḇyeasas kwar fa byuk roḇean, sansun, rum, imboi kosewar ḇepon Karajan ḇyedi ḇepon ari ma kofrur rosai ḇenapes namnis marisen Ḇyena. (Mz. 55:22; Mat. 6:33) Inja, kokara awer ḇo koḇo pipi bisa nafrur kosmai aski ma kokain kuker payamyum. Bisa kosmai aski kaku rofyor kofrur Yahwe marisen Ḇyena. (Flp. 4:6, 7) Kona samambraḇ fa kokoḇes roebor na rariyano, kokara roi anane: Na yana oras ma samambraḇ fa yamam roebor anna ke? Nari yaswar syadi roebor yenane ke? Koswarepen snar koḇe Allah kina Ḇyedi, kona fararur ḇefandun kaku. Inja, koḇefnder na awer. Komewer komniso snon kayan ro Yesus  fafisu ḇyedi ani. Snar iswar syadi nana ḇyena, kyurpum fa dakuffarmyan Yahwe I ma nari ḇyeḇekanow fa ḇye roma Ḇyedi ḇa!​—Mrk. 10:17-22.

18. Ḇaḇesyowi ma barakas rosai nari snonggaku ḇesouser sya sismai na?

¹⁸ Snonggaku ḇesouser sya nari sismai ḇaḇesyowi ḇeba kaku, isoine bisa siswar ma sisyom Yahwe isof fyoro. Yahwe manfamyan Ḇyesya ḇekenem ro supswan sya kako nari simarisen sfaduru supswan ine, roi Yahwe ifrur kwar ro randak ya ipyum kaku. Kero wer, Allah Karajan Ḇyedi nari nafrur supswan ya ipyum kaḇer. Yesus nari ifrur kandera nabor ḇeramuma ro ḇaḇembrob Adam ma Eva su. Yahwe nari ḇyawes snonggaku yuta ḇemar kwar sya, ma nari sna swaf fa sakkenem fyoro ro firdaus ma sidafduf ḇa. (Luk. 23:42, 43) Rofyor Yahwe kina Ḇyedi ḇero supswan sya sinapes nari sismai baba ma sanandik raris Daud fyasepen ro mazmur ya.​—Mz. 8:5.

19. Rosai na waswarepen kaku na?

¹⁹ Auma waksun ro ”raryur ḇeba” ido, nwa saneraro ḇepyum kaku. Allah iswar Au. Imarisen wakro kina Ḇyedi. Inja, ḇesewar kaku fa wafrur imarisen. Fasnai naro kenem Bena ras ḇe ras snar Auma wawaf Allah asas-asas Ḇyena. Mamwarek pyum kaku ḇaḇesyowi wasmai na fa buki syom sandik Kma koḇedi ro nanggi isof fyoro-fyoro!