1. ?Wanem i kam long tingting blong yu, taem yu tingbaot olgeta kriesen blong Jehova?

TAEM yumi tingbaot olgeta samting we Jehova i krietem, maet yumi gat sem filing olsem Deved we i prea long Jehova se: “Taem mi luk heven, ol wok blong ol fingga blong yu, mun mo ol sta we yu bin mekemrere olgeta i stap, mi luk se man i nating nomo, i save ded, taswe ?from wanem yu stap tingbaot hem, mo yu stap kea gud long pikinini blong man?” (Sam 8:3, 4) Olsem Deved, maet yumi tingbaot se yumi smol we yumi smol bitim ol sta we Jehova i krietem, mo yumi glad se Jehova i tingbaot yumi. Bambae yumi luk se Jehova i kea long Adam mo Iv, be i no hemia nomo, hem i mekem tufala i kam pat blong famle blong hem.

2. ?Jehova i wantem se Adam mo Iv i mekem wanem?

² Adam mo Iv tufala i faswan pikinini blong Jehova long wol, mo Jehova i olsem papa blong tufala we i lavem tufala. Hem i wantem se kapol ya i gat plante pikinini, so hem i talem long tufala se: “Yufala i mas gat ol pikinini mo yufala i kam plante mo fulumap wol.” (Jen. 1:28) Hem i wantem se tufala i gat ol pikinini mo lukaot gud long wol ya. Sipos Adam mo Iv i bin obei mo folem gud plan blong Jehova, tufala wetem olgeta pikinini blong tufala bambae oli save stap olsem memba blong famle blong God olwe.

3. ?From wanem yumi save talem se Adam mo Iv i gat bigfala blesing ya blong kam pat blong famle blong Jehova?

³ Adam mo Iv i gat bigfala blesing ya blong kam pat blong famle blong Jehova. Folem Ol Sam 8:5 mo futnot, Deved i tokbaot man we Jehova i krietem, i se: “Yu mekem hem i stap daon lelebet long ol enjel, mo yu mekem hem i kasem glori mo ol gudgudfala samting olsem hat blong king.” I tru, Jehova i  no givim sem paoa, save, mo gudhan long man olsem we i givim long ol enjel. (Sam 103:20) Be yet, ol man oli “stap daon” smol nomo long ol enjel we oli gat bigfala paoa. !Traem tingbaot! !Jehova i givim wan nambawan laef long faswan perens blong yumi!

4. ?Wanem i hapen long Adam mo Iv, mo bambae yumi tokbaot wanem long stadi ya?

 ⁴ Sori tumas, Adam mo Iv i no moa pat blong famle blong Jehova. Hemia i mekem bigfala problem long olgeta we oli kamaot biaen long tufala, olsem we bambae yumi tokbaot long stadi ya. Be plan blong Jehova i no jenis, hem i wantem se ol man we oli obei oli kam pikinini blong hem olwe. Fastaem, bambae yumi tokbaot samting we Jehova i mekem blong ona long yumi. Biaen, bambae yumi tokbaot samting we yumi save mekem naoia blong soemaot se yumi wantem kam pat blong famle blong hem, mo ol blesing we ol pikinini blong Jehova long wol bambae oli harem gud long hem blong olwe.

5. ?Yumi save mekem wanem blong ona long God from samting we hem i mekem long yumi?

⁵ Jehova i ona long yumi taem i mekem yumi long pija blong hem. (Jen. 1:26, 27) Yes, from we Jehova i mekem yumi long pija blong hem, yumi naf blong wokem mo soemaot plante gudfala fasin blong hem olsem, lav, sore, fasin blong holemstrong, mo mekem i stret oltaem nomo. (Sam 86:15; 145:17) Taem yumi wokem ol fasin ya, yumi ona long Jehova mo yumi pruvum se yumi glad long samting we hem i mekem long yumi. (1 Pita 1:14-16) Taem yumi mekem ol fasin we Papa blong yumi long heven i glad long hem, yumi tu yumi glad. Mo from we yumi gat ol fasin olsem Jehova, yumi save kam ol man we Jehova i wantem insaed long famle blong hem.

6. ?Olsem wanem Jehova i ona long ol man taem i mekemrere wol ya?

⁶ Jehova i mekemrere wan spesel hom blong yumi. Bifo we hem i krietem faswan man, hem i mekemrere wol ya blong ol man. (Job 38:4-6; Jer. 10:12) Mo from we Jehova i kaen mo i glad blong givim samting, hem i wokem plante gudfala samting blong mekem yumi hapi. (Sam 104:14, 15, 24) Samtaem, hem i tingbaot bakegen ol samting we hem i krietem, mo “hem i luk se i gud.” (Jen. 1:10, 12, 31) Hem i ona long ol man, taem hem i putum olgeta blong oli “bos” long olgeta naesfala samting we hem i wokem long wol. (Sam 8:6) Plan blong God se ol man we oli stret gud bambae oli lukaot long ol naesfala samting ya blong olwe. ?Yu yu talem tangkiu long Jehova oltaem from nambawan promes ya?

7. ?Olsem wanem Josua 24:15 i soemaot se man i fri blong mekem prapa desisen blong hem?

⁷ Jehova i wokem yumi we yumi fri blong mekem prapa desisen blong yumi. Taswe yumi save jusum samting we yumi wantem mekem long laef blong yumi. (Ridim Josua 24:15.) Be God blong yumi we i lavem yumi, i glad taem yumi jusum blong wosipim hem. (Sam 84:11; Prov. 27:11) Yumi save yusum fasin fri ya blong mekem plante gudfala desisen. Traem luk wan eksampol we Jisas i soem.

8. ?Olsem wanem Jisas i yusum fasin fri we hem i gat?

⁸ Yumi save folem fasin blong Jisas, taem yumi jusum blong tingbaot narafala fastaem. Wan dei taem Jisas mo ol aposol blong hem oli taed, oli go long wan ples we i kwaet blong oli save spel smol. Be oli no spel nating from we wan bigfala hip blong ol man oli faenem olgeta, mo oli wantem tumas blong Jisas i tijim olgeta. Be Jisas i no kros long ol man ya, hem i sore long olgeta. ?Ale hem i mekem wanem? “Hem i tijim olgeta long plante samting.” (Mak 6:30-34) Sipos yumi folem fasin  blong Jisas blong yusum taem mo paoa blong yumi blong halpem ol narafala, yumi stap presem Papa blong yumi long heven. (Mat. 5:14-16) Mo tu, yumi soemaot long Jehova se yumi wantem kam pat blong famle blong hem.

9. ?Ol perens oli mas tingbaot wanem?

⁹ Jehova i mekem we ol man oli naf blong gat pikinini, mo i givim wok ya long olgeta blong oli save tijim pikinini blong i lavem Jehova mo wosipim hem. Sipos yu yu wan perens, ?yu yu glad long nambawan presen ya? Nating se Jehova i wokem ol enjel we oli gat paoa blong mekem plante gudfala samting, be hem i no givim raet long olgeta blong gat pikinini. From samting ya, sipos yu yu wan perens, yu mas glad long privilej ya blong lukaot long ol pikinini. Jehova i givim wan impoten responsabiliti long ol perens blong oli “stretem mo givim woning long [ol pikinini] folem tingting blong Jehova.” (Efes. 6:4; Dut. 6:5-7; Sam 127:3) Blong givhan long ol perens, oganaesesen blong Jehova i givim plante tul we i stanap long Baebol olsem ol buk, ol video, miusik, mo ol atikol long websaet. I klia se Papa blong yumi long heven mo Boe blong hem i lavem tumas ol yangfala. (Luk 18:15-17) Taem ol perens oli dipen long Jehova mo oli mekem bes blong olgeta blong lukaot gud long ol pikinini blong olgeta, Jehova i glad tumas. !Mo oli stap givhan long pikinini tu blong i gat janis ya blong kam pat blong famle blong Jehova olwe!

10-11. ?Yumi save kasem wanem from ransom?

¹⁰ Jehova i givim gudfala Boe blong hem, blong yumi save gat janis blong kam pat blong famle blong hem bakegen. Olsem yumi tokbaot long  paragraf 4, Adam mo Iv mo ol pikinini blong tufala oli no moa pat blong famle blong Jehova. (Rom 5:12) Adam mo Iv i jusum blong no obei long God, taswe i stret nomo we hem i tekemaot tufala long famle blong hem. Be ?olsem wanem long ol pikinini blong tufala? Jehova i lavem ol man, taswe hem i mekem wan rod blong hem i save adoptem olgeta we oli obei, blong oli kam pat blong famle blong hem. Hem i mekem olsem tru long sakrefaes blong Boe blong hem, wan nomo we hem i gat, hemia Jisas Kraes. (Jon 3:16; Rom 5:19) From sakrefaes blong Jisas, God i adoptem 144,000 man we oli holemstrong long hem blong oli kam ol pikinini blong hem.—Rom 8:15-17; Rev. 14:1.

¹¹ Mo tu, plante narafala man we oli obei long God go kasem en blong wan taosen yia, bambae oli kam pat blong famle blong hem. (Sam 25:14; Rom 8:20, 21) Mo from we oli gat hop ya, oli stap singaot Jehova we i Krieta blong olgeta se “Papa.” (Mat. 6:9) Olgeta ya tu we oli laef bakegen bambae oli gat janis ya blong lanem samting we Jehova i wantem olgeta blong mekem. Olgeta we oli jusum blong obei long ol daereksen blong hem, bambae oli save kam pat blong famle blong hem tu.

12. ?Wanem kwestin we bambae yumi ansa long hem naoia?

¹² Olsem yumi bin luk, Jehova i mekem plante samting finis blong ona long ol man. Hem i adoptem finis ol tabu Kristin blong oli kam ol boe blong hem, mo i givim hop long wan “bigfala hip blong man” blong oli save kam pikinini blong hem long niufala wol. (Rev. 7:9) ?Yumi save mekem wanem blong soem se yumi wantem kam pat blong famle blong Jehova olwe?

13. ?Yumi save mekem wanem blong yumi kam pat blong famle blong God? (Mak 12:30)

¹³ Soemaot long Jehova se yu lavem hem, taem yu wosipim hem long olgeta hat blong yu. (Ridim Mak 12:30.) Jehova i kaen tumas mo i givim plante gudfala presen long  yumi, be wan long ol beswan presen we hem i givim, hemia blong wosipim hem. Yumi soemaot long Jehova se yumi lavem hem, taem yumi “obei long ol komanmen blong hem.” (1 Jon 5:3) Wan long ol komanmen ya hemia oda ya blong Jisas blong pulum ol man i kam disaepol mo baptaesem olgeta. (Mat. 28:19) Mo hem i givim oda ya tu blong yumi lavlavem yumi. (Jon 13:35) Olgeta we oli obei long ol komanmen blong Jehova, hem i welkamem olgeta insaed long famle blong hem long fulwol we oli wosipim hem.—Sam 15:1, 2.

14. ?Olsem wanem blong soem lav long narafala? (Matiu 9:36-38; Rom 12:10)

¹⁴ Soem lav long ol narafala. Lav hem i wan impoten fasin blong Jehova. (1 Jon 4:8) Jehova i lavem yumi bifo we yumi save hem. (1 Jon 4:9, 10) Yumi save folem fasin blong hem, taem yumi soem lav long ol narafala. (Efes. 5:1) Wan long ol beswan rod blong soem lav long ol man, hemia blong halpem olgeta blong oli save Jehova naoia we i gat taem yet. (Ridim Matiu 9:36-38.) Taem yumi mekem olsem, yumi halpem olgeta blong oli save samting we oli mas mekem blong kam pat blong famle blong Jehova. Afta we wan man i baptaes, yumi mas gohed blong lavem hem mo respektem hem. (1 Jon 4:20, 21) ?Yumi mekem samting ya olsem wanem? Wan rod hemia taem yumi trastem hem. Eksampol, bambae yumi no gat nogud tingting long wan brata from wan samting we hem i mekem. Defren olgeta, bambae yumi ona long hem mo luk hem se i hae moa long yumi.—Ridim Rom 12:10; Fil. 2:3.

15. ?Hu olgeta we yumi mas sore mo kaen long olgeta?

¹⁵ Soemaot se yu sore mo yu kaen long olgeta man. Sipos yumi wantem kam pat blong famle blong Jehova olwe, yumi mas folem gud Tok blong God long laef blong yumi. Eksampol, Jisas i tijim yumi blong gat sore mo kaen long olgeta man, iven ol enemi blong yumi. (Luk 6:32-36) Be maet i had long yumi blong mekem samting ya. Sipos i olsem, yumi mas lanem blong gat sem tingting olsem Jisas mo folem fasin blong hem. Taem yumi mekem bes blong yumi blong obei long Jehova mo folem fasin blong Jisas, yumi soemaot long Papa blong yumi long heven se yumi wantem kam pat blong famle blong hem olwe.

16. ?Olsem wanem yumi save protektem gudnem we famle blong Jehova i gat?

¹⁶ Protektem gudnem we famle blong Jehova i gat. Insaed long wan famle, plante taem wan smol boe i save mekem sem samting we bigfala brata blong hem i mekem. Sipos bigfala brata i folem gud ol rul blong Baebol long laef blong hem, hemia i wan gudfala eksampol long smol brata blong hem. Be sipos bigfala brata i mekem samting we i no stret, smol brata tu bambae i folem rabis eksampol blong hem. Hemia i sem mak tu insaed long famle blong Jehova. Sipos wan Kristin we i bin holemstrong long Jehova i kam wan apostasi mo i mekem ol samting we i no stret, maet ol narafala tu bambae oli folem eksampol blong hem mo mekem samting we i no stret. Olgeta we oli mekem olsem, oli spolem gudnem we famle blong Jehova i gat. (1 Tes. 4:3-8) Yumi no mas folem ol rabis eksampol olsem, mo yumi no mas letem eni samting i pulumaot yumi long Papa blong yumi long heven we i lavem yumi.

17. ?Yumi mas blokem wanem kaen tingting mo from wanem?

¹⁷ Trastem Jehova i bitim ol samting long saed blong bodi. Jehova i promes se bambae i givim kakae, klos, mo haos long yumi sipos yumi lukaot Kingdom mo stret fasin blong hem fastaem. (Sam 55:22; Mat. 6:33) Sipos yumi trastem promes ya, bambae yumi no gat tingting ya se ol samting blong wol bambae oli  protektem yumi mo mekem yumi hapi. Yumi save se wan rod nomo blong gat pis long tingting, hemia taem yumi mekem wil blong Jehova. (Fil. 4:6, 7) Nating se yumi naf blong pem plante samting, be yumi mas tingbaot tu sipos yumi rili gat taem mo paoa blong yusum ol samting ya mo lukaot gud long olgeta. ?Yu yu laekem ol sas samting blong yu? Yumi mas rimemba se God i givim sam wok blong yumi mekem insaed long famle blong hem, taswe yumi no mas letem eni samting i pulum tingting blong yumi. Yumi no wantem kam olsem yangfala man ya we i laekem tumas ol samting we hem i gat, nao i no moa folem Jisas mo i mestem janis ya blong wosipim Jehova, mo blong Jehova i adoptem hem olsem boe blong hem.—Mak 10:17-22.

18. ?Wanem bigfala blesing we ol man we oli obei bambae oli enjoem olwe?

¹⁸ Ol man we oli obei bambae oli kasem wan bigfala blesing, hemia privilej ya blong lavem mo wosipim Jehova olwe. Olgeta ya tu we oli gat hop blong laef long wol, bambae oli glad blong lukaot gud long wol ya we Jehova i wokem blong i kam hom blong olgeta. I no longtaem wol mo olgeta laef samting long hem bambae oli kasem blesing aninit long rul blong Kingdom. Jisas bambae i stretem nogud samting we i hapen taem Adam mo Iv i jusum blong lego famle blong God. Jehova bambae i mekem plante milian man oli laef bakegen, oli gat gudfala helt, mo oli laef olwe long wol ya we bambae i kam wan paradaes. (Luk 23:42, 43) Taem ol man we oli wosipim Jehova oli kam stret gud, olgeta evriwan bambae oli kasem “glori mo ol gudgudfala samting” we Deved i tokbaot.—Sam 8:5.

19. ?Yumi mas tingbaot wanem?

¹⁹ Sipos yu yu wan memba blong “bigfala hip blong ol man,” yu gat wan nambawan hop. God i lavem yu mo i wantem se yu kam wan memba blong famle blong hem. Taswe i gud yu mekem bes blong yu blong mekem hem i glad. I gud we evri dei yu tingbaot ol promes blong God, mo yu glad long privilej ya blong wosipim Papa blong yumi long heven, mo blong presem hem olwe.