1. Sonaha ma pangahapta anggo irimangi hita ganup tompaon ni Jahowa?

ANGGO irimangi hita ganup tompaon ni Jahowa, sarupa ma pangahapta songon si Daud na mangkatahon, “Anggo hukawahkon langit-Mu pakon horja ni jari-jari-Mu, bulan pakon sagala bintang na pinauli-Mu, mintor aha ma nani jolma in ase pala ingaton-Mu ia, ampa anak ni manisia in ase ihargahon Ham ia?” (Ps. 8:4, 5) Anggo ibandingkon hita dirinta pakon bintang i langit, gabe sadar ma hita etek tumang do hape hita. Age pe sonai, ipardiateihon Jahowa do hita. Lang pitah ai. Songon si Adam pakon si Hawa hinan, ibahen do sidea gabe kaluarga ni Naibata.

2. Tanggung jawab aha do na ibere Jahowa hubani si Adam pakon si Hawa?

² Si Adam pakon si Hawa ma jolma na parlobei itompa Naibata. Ibahen Naibata do sidea gabe kaluargani, janah Naibata gabe Bapa ni sidea. Sihol do Naibata ase tongtong sidea marmalas ni uhur. Jadi iparentahkon Naibata ma bani sidea, “Manggompari anjaha lambin manggargar ma hanima, goki hanima ma tanoh on anjaha patunduk ma in.” (1 Mus. 1:28) Sihol do Naibata ase marginompari sidea anjaha mangurus tanoh on. Anggo idalankon sidea parentah ai, boi ma sidea pakon kaluargani gabe anggota kaluarga ni Naibata sadokah ni dokahni.

3. Mase boi ihatahon sada hasangapon do bani si Adam pakon si Hawa boi gabe anggota kaluarga ni Naibata?

 ³ Halani si Adam pakon si Hawa boi gabe anggota kaluarga ni Naibata, sada hasangapon do ai bani sidea. Songon na isurat bani Heber 2:7, ibotoh hita do aha na ihatahon Bibel pasal jolma. Ijai ihatahon, “Ipatoruh Ham do ia tongkin toruhan marimbang malekat, hasangapon ampa hamuliaon do isortalihon Ham bani.” Tongon, lang sarupa hagogohon ampa hapentaran ni malekat pakon jolma. (Ps. 103:20) Tapi pitah otik dassa “toruhan” jolma humbani malekat. Jadi luar biasa tumang do hasangapon na ibere Naibata bani sidea.

4. Sonaha ma ujungni halani lang itangihon si Adam pakon si Hawa parentah ni Naibata, janah aha do na laho iulas hita bani artikel on?

 ⁴ Tapi lang itangihon si Adam pakon si Hawa parentah ni Naibata. Halani ai, gabe marsitaronon ma sidea sonai homa ginomparni. Hassi pe sonai, totap do sura-sura ni Jahowa bani manisia. Sihol do Jahowa ase manisia boi gabe anggota kaluarga-Ni. Bani artikel on, iulas hita ma mase hita boi porsaya harga tumang do hita bani Jahowa. Dob ai, iulas hita use aha do na porlu ibahen hita ase boi hita gabe bagian humbani kaluarga ni Naibata. Anjaha iulas hita homa pasu-pasu aha do na laho idapot hita bani ari simagira.

5. Halani hita itompa Naibata songon rupa-Ni, sonaha hita boi patuduhkon tarima kasih hu Bani?

⁵ Itompa Jahowa do hita songon rupa-Ni. (1 Mus. 1:26, 27) Artini, boi do hita maniru sifat ni Naibata. Umpamani gabe boi hita patuduhkon holong, idop ni uhur, totap setia, ampa mangkorjahon na pintor. (Ps. 86:15; 145:17) Anggo marusaha hita maniru sifat ni Naibata, on patuduhkon ipasangap hita do Jahowa anjaha martarima kasih do hita halani itompa songon rupa-Ni. (1 Ptr. 1:14-16) Anggo ihorjahon hita harosuh ni Naibata, gabe tongtong ma hita marmalas ni uhur. Halani hita itompa boi maniru sifat ni Naibata, on patuduhkon marosuh do Naibata ase hita gabe bagian humbani kaluarga-Ni.

6. Sanggah Naibata manompa tanoh on, aha do na ibahen Ia ase hita boi totap marmalas ni uhur?

⁶ Itompa Naibata do tanoh on bahen iananta. Paima itompa Naibata si Adam pakon si Hawa, itompa Ia do lobei tanoh on. (Job 38:4-6; Jer. 10:12) Halani bujur tumang Jahowa, ipasirsir Jahowa do ganup na boi mambahen manisia marmalas ni uhur. (Ps. 104:14, 15, 24) Dobkonsi itompa Naibata na dong i tanoh on, ididah Ia ma “domma dear tumang” haganup. (1 Mus. 1:10, 12, 31) Isuruh Naibata do homa jolma “mamarentah” ganup tompaon-Ni. (Ps. 8:7) Sihol do Ia ase jolma boi mangurus tanoh on sadokah ni dokahni janah totap marmalas ni uhur. Tontu martarima kasih tumang do hita halani ai.

7. Sonaha Josua 24:15 patuduhkon anggo jolma boi mambahen pilihanni sandiri?

⁷ Ibere Naibata do hita mambahen pilihan. Ganup do hita boi mamilih aha na laho sibahenonta ibagas goluhta. (Basa Josua 24:15.) Anggo ipilih hita mangidangi Naibata, gabe malas tumang ma uhur-Ni. (Ps. 84:12; Pod. 27:11) Hita pe boi do homa mamilih laho mangkorjahon na dear. Pardiateihon ma contoh na ibahen Jesus.

8. Aha do na boi itiru hita humbani Jesus?

⁸ Songon Jesus, palobei hita ma haporluan ni halak na legan marimbangkon haporluanta sandiri. Bani sada ari, loja tumang do Jesus pakon susianni dobkonsi marbarita. Ipindahi sidea ma ianan laho marsaran.  Hape dob das sidea i ianan ai, domma bahat tumang halak na paimahon laho manangar ajaran ni Jesus. Ai gabe manggila do Jesus halani ai? Lang. Tapi mintor holong ma uhurni bani halak na mabuei ai. Halani ai, gabe “buei ma ipodahkon bani sidea”. (Mrk. 6:30-34) Anggo ra homa hita mambere gogoh ampa panorangta laho mangurupi na legan, parohkon hasangapon do ai bani Jahowa. (Mat. 5:14-16) Anjaha boi ma hita totap gabe anggota kaluarga ni Naibata.

9. Sibere-bere aha do na ijalo hita humbani Naibata?

⁹ Ibahen Jahowa do jolma boi marginompari anjaha marosuh do Ia ase namatoras mangajari anakni laho mangidangi-Si. Ai do halobihanni manisia marimbangkon malekat. Halani anggo malekat lang boi sidea marniombah. Jadi anggo adong niombah ni nasiam, sibere-bere humbani Naibata do ai. Halani ai, ibere Jahowa do tanggung jawab bani namatoras laho mangajari anakni “ibagas ajar ampa podah ni Tuhan in”. (Ep. 6:4; 5 Mus. 6:5-7; Ps. 127:3) Domma bahat publikasi na ipasirsir organisasi ni Jahowa laho mangajari niombah ni nasiam. Umpamani dong buku, video, musik, ampa na leganni. Ibere do ai halani holong tumang Jesus pakon Jahowa bani na maposo. (Luk. 18:15-17) Anggo tongtong namatoras marpangunsandeian bani Jahowa janah mangajari anakni pasal podah-Ni, gabe malas ma uhur-Ni. Anjaha anak ni sidea pe boi do holi gabe kaluarga ni Naibata sadokah ni dokahni.

10-11. Pasu-pasu aha do na idapot hita halani dong tobusan ni Jesus?

¹⁰ Ibere Naibata do Anak-Ni ase manisia boi gabe anggota kaluarga-Ni. Songon na dob iulas hita bani  paragrap 4, halani sengaja si Adam pakon si Hawa manlanggar Titah ni Naibata, lang boi be sidea gabe kaluarga ni Naibata, sonai homa ginomparni. (Rom 5:12) Tapi halani holong tumang Naibata bani ginompar ni si Adam, ibahen Ia ma dalan ase boi use sidea gabe kaluarga-Ni. Ibere Ia ma Jesus Kristus, Anak-Ni na sasada in laho manobus jolma. (Joh. 3:16; Rom 5:19) Marhitei tobusan ai do homa ipilih Naibata 144.000 halak hun tanoh on laho ibahen gabe anak-Ni i surga.​—Rom 8:15-17; Pangk. 14:1.

¹¹ Anggo totap unduk juakjuak ni Naibata ronsi ujung ni pamarentahan Saribu tahun, gabe anak ni Naibata ma sidea sadokah ni dokahni. (Ps. 25:14; Rom 8:20, 21) Humbani sonari pe domma boi idilo hita Jahowa ai “Bapa”. (Mat. 6:9) Leganni ai, dong marjuta halak na laho ipapuho. Janah iajari do holi sidea pasal parentah ni Naibata. Anggo ra sidea mandalankon parentah ai, sidea pe boi do gabe kaluarga ni Naibata ronsi sadokah ni dokahni.

12. Sungkun-sungkun aha do na laho iulas hita sonari?

¹² Domma iulas hita bahat tumang sibere-bere ni Jahowa bani jolma. Ipilih Naibata do jolma i tanoh laho manggoluh i surga gabe anak-Ni. Anjaha “humpulan na banggal” pe boi gabe anak-Ni i dunia na baru. (Pangk. 7:9) Jadi, aha ma na boi ibahen hita ase totap gabe kaluarga ni Naibata ronsi sadokah ni dokahni?

13. Aha do na boi ibahen hita ase boi gabe kaluarga ni Naibata? (Markus 12:30)

¹³ Patuduh ma holong bani Jahowa marhitei mangidangi-Si humbani gok ni uhurta. (Basa Markus 12:30.) Bahat tumang sibere-bere ni Naibata bani manisia. Anjaha sibere-bere-Ni na sidearan, ai ma ibere do hita kesempatan laho manombah-Si. Anggo holong uhurta  bani Jahowa, ‘dalankon hita ma titah-Ni’. (1 Joh. 5:3) Iparentahkon Jahowa do hita ase mandalankon parentah ni Jesus. Umpamani, isuruh Jesus do hita mangurupi halak gabe susianni. (Mat. 28:19) Iparentahkon ia do homa hita ase marsihaholongan. (Joh. 13:35) Anggo ra hita manangihon parentah ni Jahowa pakon Jesus, boi ma hita gabe anggota kaluarga ni Naibata.​—Ps. 15:1, 2.

14. Sonaha hita boi patuduhkon holong bani halak na legan? (Mateus 9:36-38; Rom 12:10)

¹⁴ Patuduh ma holong bani halak na legan. Holong do sifat ni Naibata na sibanggalan. (1 Joh. 4:8) Ia do parlobei na patuduhkon holong hubanta age pe lape itanda hita Ia. (1 Joh. 4:9, 10) Anggo ipatuduh hita holong bani na legan, dos do hita na maniru Jahowa. (Ep. 5:1) Sada carani hita patuduhkon holong bani na legan, ai ma urupi hita sidea marlajar pasal Jahowa. (Basa Mateus 9:36-38.) Anggo ibahen hita sonai, boi ma holi sidea gabe anggota kaluarga ni Naibata. Anjaha dobkonsi ididi pe sidea, maningon totap ma ihaholongi hita sidea. (1 Joh. 4:20, 21) Sonaha carani? Anggo dong pambahenan ni sidea na lang iarusi hita, ulang ma hita mintor curiga. Tapi bujur ma hita bani sidea janah hira hita ma sidea lobihan marimbangkon dirinta.​—Basa Rom 12:10; Pil. 2:3.

15. Hubani ise do hita maningon bujur?

¹⁵ Bujur ma bani ganup halak. Anggo hita sihol gabe kaluarga ni Naibata, maningon idalankon hita do prinsip ni Bibel. Umpamani, iajarhon Jesus do hita ase bujur bani ganup halak, tarmasuk bani munsuhta. (Luk. 6:32-36) Tongon, lang urah mangkorjahon ai. Halani ai, maningon marlajar do hita humbani Jesus. Anggo marusaha hita mangkorjahon parentah ni Jahowa pakon Jesus, boi ma hita totap gabe anggota kaluarga ni Naibata.

16. Sonaha carani ase ulang sambor ibahen hita goran ni kaluarga ni Naibata?

¹⁶ Ulang ibahen hita sambor goran ni kaluarga ni Naibata. Ibagas sada kaluarga, somal do na sietekan maniru anak na sibanggalan. Anggo iihutkon abangni Hata ni Naibata, itiru adekni ma ai. Tapi anggo ihorjahon abangni na lang dear, somalni ihorjahon adekni ai do homa na lang dear ai. Sonai ma ibagas kaluarga ni Naibata. Anggo dong i kuria na mangkorjahon na sambor atap gabe halak na murtad, somalni dong homa na legan na mangihutkon parlahouni ai. Gabe sambor ma goran ni kaluarga ni Naibata halani ai. (1 Tes. 4:3-8) Halani ai, ulang ma hita mangihutkon halak na mangkorjahon na masambor. Anggo iihutkon hita sidea, gabe seda ma holi parhasomananta pakon Naibata.

17. Aha do na porlu idingat hita, janah mase?

¹⁷ Maningon hubani Jahowa do hita porsaya sedo hubani arta. Anggo ipalobei hita Harajaon ni Naibata janah ihorjahon hita parentah-Ni, marjanji do Ia bereon-Ni do ganup na ihaporluhon hita. (Ps. 55:23; Mat. 6:33) Anggo irimangi hita ai, gabe idingat hita ma sedo arta i dunia on na mambahen hita marmalas ni uhur. Tapi ibotoh hita do anggo ihorjahon hita harosuh ni Naibata, ai do na mambahen damei uhur ampa pingkiranta. (Pil. 4:6, 7) Porini pe dong duitta laho mamboli bahat barang, pingkirhon hita ma sadiha bahat do holi bois panorang ampa gogohta laho mangurus barang-barang ai. Ai bani artanta ai do holi lalab uhurta? Dingat hita ma parlajaran na boi idapot hita humbani sarita pasal dalahi na bayak bani panorang ni Jesus. Sasintongni ibere Jesus do ia kesempatan laho mangirikkonsi, anjaha bani ari simagira boi do holi ia gabe anak ni Naibata i surga. Tapi  itulak ia do ai halani holongan uhurni bani artani.—Mrk. 10:17-22.

18. Anggo tongtong hita unduk bani Jahowa, pasu-pasu aha ma na laho ibere hubanta?

¹⁸ Ise pe na tongtong unduk hubani Naibata boi manombah Naibata sadokah ni dokahni. Sidea ma holi na mangurus tanoh on janah tongtong ma sidea marmalas ni uhur. Bahenon ni Harajaon ni Naibata ma holi tanoh on gabe paradeiso. Anjaha isasap Jesus do holi ganup sitaronon halani dousa ni si Adam pakon si Hawa hinan. Ipapuho Jahowa do holi marjuta halak na dob matei. Gabe sehat ma sidea janah marpangarapan laho manggoluh sadokah ni dokahni i tanoh on. (Luk. 23:42, 43) Anggo domma sempurna ganup jolma, iahapkon sidea ma “hasangapon ampa hamuliaon” songon na ipatugah bani Bibel.—Heb. 2:7.

19. Aha ma na porlu totap idingat hita?

¹⁹ Anggo nasiam “humpulan na banggal”, jenges tumang do pangarapan ni nasiam. Holong tumang do uhur ni Naibata bamu. Anjaha sihol do Ia ase tongtong ham gabe kaluarga-Ni. Halani ai, marusaha ma ham mambahen Naibata marmalas ni uhur. Sai tongtong ma dingat pangarapanmu ampa janji ni Naibata. Bayangkon ma boi do holi nasiam mangidangi ampa mamuji Naibata ronsi sadokah ni dokahni. Jadi sai tongtong ma dingat pangarapan na jenges ai.