1. Sanga siukuri kerina si enggo ciptaken Jahwe, banci saja uga perasanta?

 ADI siukuri kerina si enggo iciptaken Jahwe, banci saja bali perasanta ras pemasmur Daud si ertoto man Jahwe, nina, “Sanga kutatap langit si banNdu alu tanNdu, janah kutatap bulan ras bintang si enggo banNdu, kai kin manusia e maka ingetNdu ia, kai kin anak manusia e maka ermediate Kam man bana?” (Ms. 8:3, 4) Bali bagi Daud, pasti luar biasa kel siakap nggit Jahwe mperdiateken kita. Situhuna labo kita japahna pe adi ibandingken ras bintang-bintang. Sipelajari kari maka Jahwe labo saja ermediate man Adam ras Hawa, tapi banNa ka kalak e jadi bagin arah keluargaNa.

2. Kai si arapken Jahwe ilakoken Adam ras Hawa?

² Adam ras Hawa me anak-anak Jahwe si pertama i doni janah Jahwe me Bapak kalak e si perkeleng. Ikataken Jahwe kai si arapkenNa arah kalak e. Nina, “Ertambah-tambahlah janah reh teremnalah, demilah doni.” (Kej. 1:28) Ate Jahwe lit min anak-anak kalak e janah urusna doni enda alu mehuli. Adi patuh kalak e janah lakokenna kai si pindo Jahwe, kalak e ras keturunenna banci jadi anggota keluarga Dibata seh rasa lalap.

3. Engkai maka banci sikataken luar biasa kesempaten Adam ras Hawa banci jadi bagin keluarga Jahwe?

³ Luar biasa kel kesempaten Adam ras Hawa perban banci kalak e jadi keluarga Jahwe. Bas Masmur 8:5 bagenda nina Daud kerna manusia si iciptaken Jahwe, “BanNdu ia teruhen sitik asangken malekat-malekat, mahkotaiNdu ia alu kemulian ras kehamaten.” Memang beluhen ras gegehen malekat asangken manusia. (Ms. 103:20) Tapi manusia ‘sitik ngenca teruhen’ asangken malekat-malekat e.  Enda luar biasa kel! Sanga ciptaken Jahwe orang tuata si pertama, berekenNa kegeluhen si la tanggung ulina man kalak e.

4. Kai akibatna perban Adam ras Hawa la patuh man Jahwe, janah kai kari sibahas bas artikel enda?

 ⁴ Sayang kel, perban Adam ras Hawa la patuh man Jahwe lanai kalak e jadi keluarga Jahwe. Si e erban keturunen kalak e ngenanami melala masalah, bagi si ibahas kari bas artikel enda. Tapi sura-sura Jahwe labo berubah. Ate Jahwe kerina manusia si patuh banci jadi anak-anakNa seh rasa lalap. Bas artikel enda, sibahas kari kai buktina meherga akap Jahwe kita. Kenca si e, sibahas ka uga carata mbuktiken maka jadi bagin keluarga Jahwe ateta. Bas pendungi artikel enda, sibahas ka kari kai saja pasu-pasu si banci inanami anak-anak Jahwe si lit i doni seh rasa lalap.

5. Perban ciptaken Dibata kita sesuai ras sipat-sipatNa, uga carata ngergai Ia?

⁵ Iciptaken Jahwe manusia seri ras sipat-sipatNa. (Kej. 1:26, 27) Emaka banci siusih sipat-sipatNa si luar biasa. Misalna kekelengen, perkuah ate, kesetian, ras adil. (Ms. 86:15; 116:5; 145:17) Adi siusih sipat-sipat Jahwe e, siergai Jahwe ras sibuktiken maka ngata bujur kita man baNa. (1 Pet. 1:14-16) Adi siban meriah ukur Bapakta si i surga, kita pe meriah ukurta. Perban sipat-sipatta seri ras sipat Jahwe, banci kita ncukupi syarat jadi keluargaNa.

6. Sanga sikapken Jahwe doni enda, kai buktina ergaiNa manusia?

⁶ Isikapken Jahwe ingan tading si istimewa man banta. Ndauh sope ciptaken Jahwe manusia, enggo ciptakenNa doni enda man banta. (Jop 38:4-6; Jer. 10:12) Perban Jahwe ermediate ras nggit mere, sikapkenNa melala si mehuli guna erban meriah ukurta. (Ms. 104:14, 15, 24) Paksa si e, inen Jahwe kerina si enggo ciptakenNa janah ‘mehuli akapNa.’ (Kej. 1:10, 12, 31) IergaiNa manusia alu mereken kalak e ‘kuasa nandangi’ kerina si iciptakenNa i doni. (Ms. 8:6) Ate Dibata ermeriah ukur min manusia si sempurna seh rasa lalap sanga ngurus kerina ciptanNa i doni. Ratur nge kam ngata bujur man Jahwe kerna janji si luar biasa e?

7. Bagi si ikataken bas Josua 24:15, kai buktina manusia bebas erban keputusen?

⁷ Ipediat Jahwe kita bebas erban keputusen. Bebas kita erban keputusen bas geluhta. (Baca Josua 24:15.) Meriah ukur Dibatata adi siban keputusen guna ngelayani Ia. (Ms. 84:11; Kua. 27:11) Banci siban keputusen si mehuli bas melala bagin. Mari siperdiateken usihen si iban Jesus.

8. Kai salah sada buktina maka bebas Jesus erban keputusen?

⁸ Banci siusih Jesus adi sipelebe kepentingen kalak asangken kepentingenta. Bas sada wari, enggo latih kel akap Jesus ras murid-muridna. Lawes kalak e ku ingan si tenang gelah banci istrahat, kepeken la banci kalak e istrahat. Reh jelma si enterem ndahi kalak e janah merhat kel kalak e megiken pengajaren Jesus. Amin pe bage labo merawa Jesus perban mekuah atena ngidah kalak e. Emaka kai si lakoken Jesus? “Mulai ajarina kalak e janah melala si ajarkenna.” (Mrk. 6:30-34) Adi siusih Jesus alu nggunaken waktu ras gegehta nampati  kalak si deban, sibereken kemulian man Bapakta si i surga. (Mat. 5:14-16) Sibuktiken ka maka jadi bagin keluarga Jahwe ateta.

9. Kai pemere si istimewa arah Jahwe man manusia?

⁹ Manusia banci lit anakna janah kalak e si ertanggung jawap guna ngajari anak-anakna gelah engkelengi ras ngelayani Jahwe. Kengasupen enda man manusia ngenca ibereken Dibata. Amin pe melala kengasupen si luar biasa si lit bas malekat tapi la banci lit anakna. Adi kam sekalak orang tua, ergaindu nge tugas istimewa e? Orang tua enggo ibereken tugas si penting guna mpebelin anak-anak alu “disiplin ras pengajaren Jahwe.” (Ep. 6:4; Ul. 6:5-7; Ms. 127:3) Guna nampati orang tua, enggo sikapken organisasi Dibata melala bahan-bahan pengajaren si erpalasken Pustaka misalna publikasi, video, musik, ras artikel web. Jelas me Bapakta si i surga ras anakNa engkelengi anak-anak. (Luk. 18:15-17) Adi andalken orang tua Jahwe janah lakokenna si mehulina bas mpebelin anak-anakna, pasti meriah ukur Jahwe. Banci ka sampati orang tua anak-anakna gelah banci jadi bagin arah keluarga Jahwe seh rasa lalap!

10-11. Kai tujun Jahwe ngorbanken anakNa?

¹⁰ Bereken Jahwe AnakNa si keleng kel ateNa gelah banci kita mulihi jadi bagin arah keluargaNa. Bagi si ijelasken bas  paragrap 4 ndai, Adam ras Hawa bage pe keturunenna lanai bagin arah keluarga Jahwe. (Rom. 5:12) Adam ras Hawa sengaja la patuh man Jahwe, emaka lanai akui Jahwe kalak e jadi keluargaNa. Tapi uga kerna keturunenna? Perban keleng ate Jahwe manusia, iaturkenNa gelah anak-anak kalak e si patuh banci iadopsi jadi keluargaNa. Lakoken Jahwe si e alu ngorbanken anakNa si tonggal eme Jesus Kristus. (Joh. 3:16; Rom. 5:19) Perban korban tebusen Jesus e, banci adopsi Jahwe 144.000 kalak si setia.​—Rom. 8:15-17; Ket. 14:1.

¹¹ Selain si 144.000 e, lit jutan kalak si setia si patuh ngelakoken peraten Dibata. Banci kalak e jadi bagin arah keluarga Dibata kenca ujin si terakhir bas pendungi Pemerentahen Seribu Tahun. (Ms. 25:14; Rom. 8:20, 21) Tapi gundari nari pe enggo banci lebuh kalak e Penciptana, “Bapak.” (Mat. 6:9) Bas masa depan, kalak si ipekeke pe banci mpelajari kai si arapken Jahwe arah kalak e. Adi patuh kalak e, banci ka kalak e jadi bagin arah keluarga Jahwe.

12. Penungkunen kai si nandangi sijawap?

¹² Bagi si enggo sipelajari ndai, enggo melala si lakoken Jahwe si mbuktiken maka ergaiNa manusia. Enggo adopsiNa kalak si erpengarapen ku surga jadi anak-anakNa, janah bereNa arapen man “kelompok jelma si enterem” gelah banci jadi anak-anakNa bas doni si mbaru. (Ket. 7:9) Kai si banci silakoken guna mbuktiken man Jahwe maka jadi bagin keluargaNa ateta?

13. Kai si banci silakoken gelah banci jadi bagin keluarga Dibata? (Markus 12:30)

¹³ Kelengilah Jahwe alu kerina pusuhndu. (Baca Markus 12:30.) Melala pemere si mehuli si enggo bereken Dibata man banta. Banci saja, salah sada si luar biasana eme banci sisembah Ia. Sibuktiken man Jahwe maka keleng ateta Ia  alu “patuh man perentah-perentahNa.” (1 Joh. 5:3) Salah sada perentah si ate Jahwe sipatuhi eme perentah si bereken Jesus man banta guna njadiken murid ras mperidiken kalak e. (Mat. 28:19) Iperentahken Jesus ka kita gelah sikeleng-kelengen. (Joh. 13:35) Alo-alo Jahwe kerina kalak si patuh man baNa jadi bagin arah keluargaNa si lit i sebelang doni.​—Ms. 15:1, 2.

14. Kai buktina keleng ateta kalak si deban? (Matius 9:36-38; Roma 12:10)

¹⁴ Kelengilah kalak si deban. Kekelengen me sipat Jahwe si mbelinna. (1 Joh. 4:8) Lenga pe sitandai Jahwe enggo leben kelengiNa kita. (1 Joh. 4:9, 10) Siusih Ia adi keleng ateta kalak si deban. (Ep. 5:1) Salah sada cara si mehulina engkelengi kalak si deban eme alu nampati kalak e erlajar kerna Jahwe sanga lit denga waktu. (Baca Matius 9:36-38.) Adi bage siban, sisampati kalak e mpelajari kai si perlu lakokenna gelah banci jadi bagin keluarga Dibata. Kenca sekalak jelma iperidiken, arus terus sikelengi ia janah siergai. (1 Joh. 4:20, 21) Misalna, la negatip perukurenta man kalak e. La kita curiga adi lit perbahanenna si la jelas siangkai alasenna. Tapi, sibuktiken ateta maka siergai kalak e janah sianggap ia ganjangen asangken kita.​—Baca Roma 12:10; Pil. 2:3.

15. Man ise saja sibuktiken maka kita perkuah ras mehuli?

¹⁵ Cidahkenlah perkuah ate ras kiniulin man kerina kalak. Adi jadi bagin keluarga Jahwe ateta seh rasa lalap, arus sidalanken Kata Dibata. Contohna, ajari Jesus kita gelah sicidahken perkuah ate ras kiniulin man kerina kalak, termasuk man musuh-musuhta. (Luk. 6:32-36) Tapi banci saja mon-mon mesera siakap ngelakokenca. Adi bage penggejapenta, siusihlah perukuren ras perbahanen Jesus. Adi silakoken si mehulina guna patuh man Jahwe ras ngusih Jesus, sibuktiken man Bapakta si i surga maka jadi bagin keluargaNa ateta seh rasa lalap.

16. Uga carata njaga gelar keluarga Jahwe tetap mehuli?

¹⁶ Jagalah gelar keluarga Jahwe tetap mehuli. Biasana bas sada keluarga, anak si dilaki ngusih abangna. Adi dalanken abangna e prinsip-prinsip Pustaka, ia jadi usihen si mehuli man adekna. Tapi adi jahat abangna e, banci saja usih adekna ia. Bage ka me bas keluarga Jahwe. Adi lit Saksi Jahwe si dungna murtad, ngelakoken perbahanen seks si salah, ntah pe perbahanen si la mehuli, banci saja usih kalak si deban ia. Perbahanen si bage banci ncedai gelar umat Jahwe si mehuli. (1 Tes. 4:3-8) Emaka la kita nggit ngikutken perbahanen si jahat janah la sipediat kai pe ncedai hubungenta ras Bapakta si perkeleng si lit i surga.

17. Perukuren si uga nge si arus sipedauh ras engkai?

¹⁷ Andalkenlah Jahwe, labo erta. Erjanji Jahwe maka pasti sikapkenNa panganta, pakenta, ras inganta tading adi sipelebe KerajanNa ras siikutken patokenNa si benar. (Ms. 55:22; Mat. 6:33) Adi tek kita man janji e, la kita erpengakap maka erta banci ngelindungi kita janah banci mereken keriahen ukur man banta. Siteh maka sada ngenca carana gelah banci kita tuhu-tuhu ermeriah ukur eme ngelakoken peraten Jahwe. (Pil. 4:6, 7) Amin pe ngasup kita nukur melala barang,  perlu siukuri penungkunen enda, ‘Lit nge waktuku nggunaken barang-barang e ras ngurussa? Banci nge kari kelengen ateku barang-barangku e asangken si deban?’ Arus siinget maka lit tugasta selaku anggota keluarga Jahwe. Emaka arus sipelebe tugasta e. La kita nggit bagi anak perana si pentingen akapna ertana asangken ngikutken Jesus. Emaka bene me kesempatenna ngelayani Jahwe ras iadopsi jadi salah sada anak-anak Jahwe!​—Mrk. 10:17-22.

18. Kai kehamaten si mbelinna si banci dat kalak si patuh, ras kai ka pasu-pasuna?

¹⁸ Kalak si patuh banci pagi ndatken kehamaten si mbelinna eme engkelengi ras nembah Jahwe seh rasa lalap! Umat Jahwe si arapenna nggeluh i doni meriah ka pagi kapna perban banci ngurus doni enda, si enggo ciptaken Dibata jadi rumah si sempurna man kalak e. Iban Kerajan Dibata pagi doni enda ras kerina isina mejile mulihi. Imasapken Jesus pagi kerina masalah si terjadi perban keputusen Adam ras Hawa si nadingken keluarga Dibata. Ipekeke Jahwe pagi jutan kalak si enggo mate, bereNa kesempaten man kalak e nggeluh rasa lalap, janah sempurna pagi kalak e bas doni si enggo iubah jadi Pardis. (Luk. 23:42, 43) Sanga kalak si ngelayani Jahwe jadi sempurna banci me dat kalak e “kemulian ras kehamaten” bagi si itulis Daud bas buku Masmur.​—Ms. 8:5.

19. Kai si arus lalap siinget?

¹⁹ Adi kam bagin arah “kelompok jelma si enterem,” lit arapenndu si luar biasa. Keleng ate Jahwe kam. AteNa jadi bagin keluargaNa min kam. Emaka lakokenlah kerina si banci lakokenndu guna erban meriah ukurNa. Tiap wari arus ukurindu ras ingetndu janji-janji Dibata. Ergailah kesempatenndu banci nembah Bapakta si i surga bage pe muji Ia seh rasa lalap!