1. Wen wi tink bowt aal weh Jehoava kriyayt, weh wi mait aks wiself?

WEN wi tink bowt aal weh Jehoava kriyayt, wi mait feel laik di saamis Dayvid hoo mi pray tu Jehoava an aks: “Wen Ah luk pahn di hevnz weh yu mek wid yu han dehn, di moon ahn di staar dehn weh yoo kriyayt, da hoo wee fi mek yu memba wi, ahn da hoo wee fi mek yu tek kayr a wi?” (Ps. 8:3, 4) Laik Dayvid, wi mait tink bowt how smaal wee wen wi kompyaa wiself tu di staarz weh Jehoava kriyayt, ahn Jehoava stil pay atenshan tu wi. Eena dis aatikl, wi wahn si how Jehoava mi tek kayr a di fers hyoomanz an aalso welkom dehn az paat a fi hihn famili.

2. Weh Jehoava mi waahn Adam ahn Eev du?

² Adam ahn Eev da-mi Jehoava fers chiljren pan ert, ahn Jehoava da-mi dehn hevnli Faada weh mi lov dehn wahn lat. Hihn mi gi dehn werk fi du. Jehoava mi tel dehn: “Unu mos ga chiljren ahn ful op di ert ahn koltivayt it.” (Gen. 1:28) Hihn mi waahn mek dehn ga chiljren ahn tek kayr a di ert. If Adam ahn Eev mi obay ahn du weh Gaad mi aks dehn fi du, di too a dehn lang wid dehn chiljren mi wahn bee paat a Jehoava famili fareva.

3. Wai wi ku seh dat Jehoava mi giv Adam ahn Eev wahn impoatant plays eena fi hihn famili?

³ Adam ahn Eev mi ga wahn impoatant plays eena Jehoava famili. Eena Psalm 8:5, Dayvid mi seh sohnting bowt di way how Jehoava mi kriyayt man. Hihn mi seh: “Yu mek ahn lee loawa dan di aynjel dehn. Ahn yu giv ahn  powa an aana.” Da chroo, Jehoava neva gi hyoomanz di saym powa, wizdom, ahn skilz laik di aynjelz. (Ps. 103:20) Bot tink bowt dis: Hyoomanz geh mek onli “lee loawa” dan di powaful aynjel dehn. Dat reeli amayzin, noh chroo? Wen Jehoava mi kriyayt wi fers payrents, hihn mi reeli gi dehn wahn wandaful laif!

4. Weh mi hapm tu Adam ahn Eev bikaaz dehn mi disobay Jehoava, ahn weh wi wahn diskos eena dis aatikl?

 ⁴ Sad fi seh, bikaaz Adam ahn Eev mi disobay Jehoava, dehn da neva paat a Jehoava famili nohmoh. Ferda eena di aatikl, wi wahn si how dis kaaz terabl prablemz fi dehn fyoocha chiljren. Bot Jehoava perpos fi hyoomanz noh chaynj. Hihn waahn obeedyant hyoomanz fi bee fi hihn chiljren fareva. Mek wi diskos how Jehoava shoa wi dat ih aana wi. Den, wi wahn fain owt weh wi ku du now fi shoa dat wi waahn bee paat a Gaad famili. Wi wahn aalso diskos som a di blesinz weh Gaad famili wahn injai pahn ert eena di fyoocha.

5. How wi ku shoa Gaad dat wi graytful dat ih mek wi wid kwalitiz weh hihn gat?

⁵ Jehoava shoa dat ih aana wi wen ih mek wi wid kwalitiz weh hihn gat. (Gen. 1:26, 27) Bikaaz hihn mek wi dis way, wi ku laan fi shoa fi hihn wandaful kwalitiz, laik lov, kompashan, laayalti, ahn raichosnis. (Ps. 86:15; 145:17) Wen wi werk haad pahn dehndeh kwalitiz, wi gi gloari tu Jehoava ahn wi shoa ahn dat wi graytful. (1 Peet. 1:14-16) Wi feel hapi wen wi bihayv eena wahn way weh mek wi hevnli Faada hapi. Aalso, bikaaz wi ga kwalitiz laik weh Jehoava gat, wi ku bee di kaina peepl hihn waahn eena fi hihn famili.

6. How Jehoava mi chreet hyoomanz wid aana wen hihn kriyayt di ert?

⁶ Jehoava mi pripyaa wahn speshal plays fi mek wi liv eena. Lang bifoa hihn mi mek di fers man, Jehoava mi pripyaa di ert fi mek hyoomanz ku liv eena. (Job 38:4-6; Jer. 10:12) Bikaaz Jehoava soh kain ahn jenaros, hihn mi mek wahn lata gud tingz weh ku mek wi hapi. (Ps. 104:14, 15, 24) Hihn mi aalso tek taim fi tink bowt weh aal ih kriyayt, ahn hihn “si dat ih mi gud.” (Gen. 1:10, 12, 31) Hihn mi aana hyoomanz wen ih gi dehn “kanchroal oava” aal di byootiful tingz weh hihn kriyayt. (Ps. 8:6) Gaad perpos da fi mek perfek hyoomanz injai di tek kayr a fi hihn wandaful kriyayshan fareva. Yoo gi tanks tu Jehoava fi da wandaful pramis?

7. How Joshua 24:15 shoa dat Jehoava gi wi di freedom fi mek wi oan disizhanz?

⁷ Jehoava gi wi di freedom fi mek wi oan disizhanz. Wee ku chooz weh wi wahn du eena laif. (Reed Joshua 24:15.) * Wi lovin Gaad hapi wen wi chooz fi serv hihn. (Ps. 84:11; Prov. 27:11) Wee ku yooz da saym freedom fi mek ada gud disizhanz. Mek wi laan fahn Jeezas egzampl.

8. Gi wahn egzampl a how Jeezas mi yooz ih freedom fi mek ih oan disizhanz.

⁸ If wi chooz fi put di needz a adaz heda wi oan, wi di shoa dat wi di kapi Jeezas egzampl. Wahn taim wen Jeezas an ih apasl dehn mi veri taiyad, dehn mi chravl tu wahn kwaiyet plays fi chrai geh sohn res. Bot dehn neva did geh fi res. Wahn krowd a peepl mi fain dehn, ahn dehn mi kyaahn wayt mek Jeezas teech dehn.  Bot Jeezas neva geh beks. Insted, ih haat gaahn owt tu dehn. Soh weh Jeezas mi du? Hihn mi “staat teech dehn wahn lata tingz.” (Maak 6:30-34) Wen wi kapi Jeezas ahn yooz wi taim an enerji fi help adaz, wi bring gloari tu wi hevnli Faada. (Mach. 5:14-16) Ahn wi shoa Jehoava dat wi waahn bee paat a fi hihn famili.

9. Weh speshal gif Jehoava gi hyoomanz?

⁹ Jehoava gi hyoomanz di privilij fi ga chiljren ahn di rispansabiliti fi teech dehn fi lov ahn serv hihn. If yoo da wahn payrent, yoo graytful fi da speshal gif? Jehoava gi di aynjel dehn wahn lata wandaful privilij, bot hihn noh gi dehn di privilij fi ga chiljren. Soh if yoo da wahn payrent, gi tanks tu Jehoava fi da amayzin privilij. Payrents ga di impoatant rispansabiliti fi rayz dehn chiljren ahn fi “disiplin dehn akaadn tu di gaidans weh kohn fahn Jehoava.” (Ifee. 6:4; Deut. 6:5-7; Ps. 127:3) Fi help payrents wid da impoatant rispansabiliti, Gaad aaganaizayshan provaid lata tingz weh bays pahn di Baibl, laik difrent poblikayshan, veedyo, myoozik, an aatikl pahn wi websait. Aala dis shoa dat wi hevnli Faada an ih Son lov wi dyaa yong chiljren. (Look 18:15-17) Ih mek Jehoava hapi wen payrents chros eena hihn ahn du dehn bes fi tek kayr a dehn chiljren. Wen payrents du dis, dehn aalso help dehn chiljren fi ga di hoap fi bee paat a Jehoava famili fareva!

10-11. Wai Jehoava mi giv ih Son az wahn ransom?

¹⁰ Jehoava giv op ih preshos Son soh dat wi ku bee paat a fi Hihn famili agen. Laik weh wi mi laan eena  paragraaf 4, wen Adam ahn Eev mi sin, dehn kudn bee paat a Jehoava famili nohmoh. (Roam. 5:12) Dehn mi chooz fi disobay Gaad, soh dehn noh dizerv fi bee paat a Jehoava famili nohmoh. Bot weh wuda hapm tu dehn fyoocha chiljren? Jehoava lov hyoomanz, soh hihn mek shoar dat Adam ahn Eev obeedyant chiljren geh di apachooniti fi bee paat a fi Hihn famili. Dat da di reezn wai ih gi di laif a ih onli Son, Jeezas Krais. (Jan 3:16; Roam. 5:19) Bikaaz a Jeezas sakrifais, Jehoava mi adap 144,000 faytful hyoomanz az fi hihn son dehn.—Roam. 8:15-17; Rev. 14:1.

¹¹ Aalso, milyanz a ada obeedyant ahn faytful hyoomanz di du Gaad wil tudeh. Fi dehn hoap da fi bee paat a Gaad famili afta di fainal tes wen di 1,000 yaaz paas. (Ps. 25:14; Roam. 8:20, 21) Bikaaz dehn ga da wandaful hoap, dehn kaal Jehoava, dehn Kriyayta, “Faada.” (Mach. 6:9) Pahn tap a dat, peepl weh geh rezorek wahn ga di apachooniti fi laan weh Jehoava ekspek fahn dehn. Di peepl weh chooz fi obay Jehoava wahn ku bee paat a fi hihn famili tu.

12. Weh kweschan wi wahn diskos?

¹² Soh faar, wi laan dat Jehoava don du lata tingz fi chreet hyoomanz wid aana. Hihn don adap 144,000 faytful hyoomanz az fi hihn son dehn, ahn hihn wahn gi dehn wan weh da paat a di “big krowd” di hoap fi bee fi hihn chiljren eena di nyoo werl. (Rev. 7:9) Weh wee ku du fi shoa Jehoava dat wi waahn bee paat a fi hihn famili fareva?

13. Weh wi ku du fi bee paat a Gaad famili fareva? (Maak 12:30)

¹³ Shoa Jehoava dat yu lov ahn, an serv ahn wid yu hoal haat. (Reed Maak 12:30.) Gaad soh kain dat ih gi wi wahn lata gif. Wan a di graytis gif weh hihn gi wi da  di apachooniti fi wership hihn. Wi shoa Jehoava dat wi lov ahn wen wi “obay fi hihn komanment dehn.” (1 Jan 5:3) Wan a di komanment dehn weh Jehoava waahn wi obay da di koman weh Jeezas gi wi fi mek disaiplz ahn baptaiz dehn. (Mach. 28:19) Hihn mi aalso koman wi fi lov wan anada. (Jan 13:35) Jehoava wahn welkom dehn wan weh obeedyant intu fi hihn big famili weh deh aal rong di werl.—Ps. 15:1, 2.

14. How wi ku shoa dat wi lov adaz? (Machyu 9:36-38; Roamanz 12:10)

¹⁴ Shoa dat yu lov adaz. Lov da Jehoava moas impoatant kwaliti. (1 Jan 4:8) Jehoava shoa wi dat ih lov wi bifoa wi mi eevn noa hihn. (1 Jan 4:9, 10) Wee kapi fi hihn egzampl wen wi shoa dat wi lov adaz. (Ifee. 5:1) Wan a di moas impoatant wayz how wi ku shoa dat wi lov peepl da wen wi mek gud yoos a di taim weh lef fi help dehn laan bowt Jehoava. (Reed Machyu 9:36-38.) Wen wi help dehn, dehn ku laan weh dehn need fi du fi bee paat a Jehoava famili. Afta wahn persn geh baptaiz, wi fi kantinyu lov ahn rispek ahn. (1 Jan 4:20, 21) How wi du dis? Wi chros dat ih ga gud intenshanz. Dis help wi fi noh tink bad bowt ahn er tink dat ih onli du tingz fi selfish reezn. Insted, wi shoa dat wi aana wi brada ahn dat wi si ahn az sohnbadi weh moa impoatant dan wee.—Reed Roamanz 12:10; Fil. 2:3.

15. Hoo aal wi shuda shoa mersi ahn bee kain tu?

¹⁵ Shoa mersi ahn bee kain tu evribadi. If wi waahn bee paat a Jehoava famili fareva, wi fi fala weh di Baibl seh. Fi egzampl, Jeezas mi teech dat wi fi shoa mersi ahn bee kain tu evribadi, eevn wi enimi dehn. (Look 6:32-36) Bot dat noh aalwayz eezi fi du. If dat da di kays, wi fi laan fi tink an ak laik Jeezas. Wen wi du wi bes fi obay Jehoava ahn kapi Jeezas egzampl, wi di shoa wi hevnli Faada dat wi waahn bee paat a fi hihn famili fareva.

16. How wi ku protek di repyutayshan a Jehoava famili?

¹⁶ Protek di repyutayshan a Jehoava famili. Eena wahn famili, wahn lee bwai wuda yoozhwali kapi weh ih oalda breda du. If di oalda breda alow Baibl prinsiplz fi gaid ih laif, den hihn wahn bee wahn gud egzampl fi ih lee breda. Bot if di oalda breda du di opozit, den ih lee breda wahn fala ih bad egzampl. Da di saym wid Jehoava famili. If wahn Kristyan weh yoostu bee faytful ton wahn apastayt ahn staat tu du imoaral er korop tingz, adaz eena di kangrigayshan mait waahn du di sayhn tingz. Dehn wan weh du dehndeh tingz mek Jehoava famili ga wahn bad repyutayshan. (1 Tes. 4:3-8) Wi noh fi kapi bad egzamplz, ahn wi noh fi alow eniting fi damij wi rilayshanship wid wi hevnli Faada.

17. Weh kaina tinkin wi fi rijek, ahn wai?

¹⁷ Chros eena Jehoava insteda mateeryal tingz. Jehoava pramis dat if wi put di Kingdom fers eena wi laif an obay fi hihn raichos standadz, hihn wahn gi wi weh wi need, laik food, kloaz, ahn shelta. (Ps. 55:22; Mach. 6:33) If wi chros eena da pramis, wi noh wahn tink dat di mateeryal tingz a dis werl wahn protek wi ahn mek wi hapi. Wi noa dat wen wi du Jehoava wil, dat da di onli way wi ku ga reel pees. (Fil. 4:6, 7) Eevn if wi ga di moni fi bai lata tingz, wi fi aks wiself if wi reeli ga di taim er di enerji fi yooz ahn tek kayr a dehndeh tingz. Aks yuself: “Ai ku liv widowt som a di tingz weh Ah oan?” Wi fi memba dat, az paat a Gaad famili, hihn  don gi wi werk fi du. Dat meenz dat wi noh fi alow eniting fi mek wi looz wi foakos. Fi shoar, wi noh waahn bee laik di yong man weh mi laik di tingz weh ih oan soh moch dat ih disaid fi noh fala Jeezas. Hihn mis ih chaans fi serv Jehoava ahn fi mek Jehoava adap ahn az wan a ih son dehn.—Maak 10:17-22.

18. Weh grayt aana ahn blesinz obeedyant hyoomanz wahn injai fareva?

¹⁸ Obeedyant hyoomanz wahn ga di graytis aana eva—di aana fi lov ahn wership Jehoava fareva! Di peepl weh ga di hoap fi liv pahn di ert wahn bee hapi fi tek kayr a di ert weh Jehoava kriyayt fi mek dehn liv eena fareva. Soon Gaad Kingdom wahn mek di ert, an evriting weh eena it, byootiful agen. Jeezas wahn solv aala di prablemz weh kohn afta Adam ahn Eev mi chooz fi disobay Jehoava an abandan fi Hihn famili. Jehoava wahn rezorek milyanz a peepl ahn gi dehn di apachooniti fi liv fareva. Dehn wahn liv fareva eena perfek helt pahn wahn byootiful ahn perfek ert. (Look 23:42, 43) Wen aal hyoomanz weh serv Jehoava geh perfek, dehn wahn ga di “powa an aana” weh Dayvid mi rait bowt.—Ps. 8:5.

19. Weh wi waahn memba?

¹⁹ If yoo da paat a di “big krowd,” yoo ga wahn wandaful hoap. Gaad lov yoo ahn hihn waahn yu bee paat a fi hihn famili. Soh du yu veri bes fi mek hihn hapi. Kip di pramis dehn weh Gaad gi yu eena yu main ahn haat. Cherish di privilij weh Gaad gi yu fi wership an prayz ahn fareva!