1. Ka gayaraabei wálügüdagun woungua dan le wararamagua asaminara luagun sun le adüga láalibei Heowá?

DAN le wararamagun asaminara luagu óunwenbu burí katei le adüga láalibei Heowá, gayaraati aba lan wasandiragun woungua kei Dawidi, le álügüdahabei lidan aban furíei: “Dan le narihini sielu le badügübei, luma hati hama waruguma ha bíchugubaña ñein, aba nasaminarun núnguarügü: Kátañanu san wügüriña lun basaminaruba lan hawagun? Kátañanu san gürigia lun bebereseduba lan hau?” (Sal. 8:3, 4). Kei Dawidi, gayaraati wasaminarun ñüraü wamá hóubawagu waruguma, lau sun lira, wéiritu wanigi berese lan Heowá wau. Lidan meha likesin Adán tuma Ewa, mama bereserügüti Heowá hau barǘ lumutiña giñe lun hádangiñe hamá meha liduheñu.

2. Ka meha labusenrubei Heowá houn furumiñetiña lisaanigu lidan Ubóu?

² Adán tuma Ewa furumiñebaña lisaanigu Heowá ya ubouagu, ani ligía meha Háguchibei le siélubei le hínsiñehabubei. Busenti yebe Heowá lun habuinchagüdüni ubóu hau hasaanigu. Aba lariñagun houn: “Garahüñügua humá saragu, buíngüda huméi ubóu hau hirahüñü ani gumadi huméi, gumadi humañame úduraü hama dunuru hama sun animaalugu ha aduruuharügübaña múarugu” (Agu. 1:28). Busenti meha Bungiu lun gasaanigu hamá luma giñe lun hóunigiruni ubóu. Lun hamuga gaganbadi lan Adán tuma Ewa ani gúnfuli hagía lau le lubeibei Heowá, dandu hagía kei hadügawagun hasigiruña hamuga keisi liduheñu Heowá lun súnwandan.

3. Ka uagu gayara lubéi wariñagun ru lan Heowá uéiriguni lun Adán tuma Ewa lau líchugun aban lúgaaru súdiniti houn lun hádangiñe hamá liduheñu?

³ Ruti Heowá uéiriguni lun Adán tuma Ewa lau líchugun aban lúgaaru súdiniti houn lun hádangiñe hamá liduheñu. Dan wayanuha  hawagu gürigia ha ladügübaña Heowá, ariñagatu Lererun Bungiu lidan Ebüréu 2:7: Adüga bumuti ǘnabugu hawéi ánheligu, gama lumoun dáüguagüda bumuti lau uéiriguni luma inebesei (Ebü. 2:7). Inarüni míchugun lani Bungiu ligiaméme ubafu houn gürigia, ni lichú-aau luma iyaraani kei líchuguni houn ánheligu (Sal. 103:20). Lau sun lira, adüga lumutiña “ǘnabugu hawéi”. Wéiriti lubuidun! Dan le ladügüniña Heowá furumiñetiña wagübürigu, ruti aban lubuidun ibagari houn.

4. Ka asuseredubei lun Adán tuma Ewa, ani kaba wariha lidan aturiahani le?

 ⁴ Híruti aba lan leferidiruni Adán tuma Ewa habara hadan liduheñu Heowá. Warihibei lidan aturiahani le, barüti lan saragu igarigu houn ladügawagun. Lau sun lira, masansirun lumuti Heowá lisaminan: le labusenrubei lun gaganbadi hamá lisaanigu lun lun súnwandan. Guentó warihaali ida liña lan ligaburi líchugun Heowá uéiriguni woun. Lárigiñe, wakutihabei ka lan lunbei wadügüni lun gayara lan aban wamá hádangiñe liduheñu. Ani lagumuhóun, wayanuhaba luagu abiniruni le lunbei hawinwanduni lisaanigu Heowá ya Ubouagun.

5. Ida liña warufuduni weteingiradi lun Bungiu lau ladügüniwa lenege guánarügü?

⁵ Ruti Heowá uéiriguni woun lau ladügüniwa lenege guánarügü (Agu. 1:26, 27). Kei lenege guánarügü lubéi Bungiu ladügawa, adügati lira lun warufuduni ámuñegueinarügü lubuidun burí ligaburi, kei burí ínsiñehabuni, gudemehabu, úarani luma irichaü (Sal. 86:15; 145:17). Dan le wáfaagun lun wadügüni, rútiwa uéiriguni lun Heowá ani arufuda wamuti geteingiradi wamá (1 Fe. 1:14-16). Anhein wadüga katei kei labusenruni Wáguchi le siélubei, daritiwa ugundani luma darangilaü. Ani kei adüga lániwa Heowá lenege guánarügü, gayaraati gürigia wamá ha labusenrubaña lun hádangiñe hamá liduheñu.

6. Ida liña líchugun Heowá uéiriguni houn gürigia dan le ladügünbalin Ubóu le?

⁶ Aransehati Heowá aban fulasu espechaliti wabá. Saragu dan lubaragiñe ladügüni furumiñeti wügüri, aranse laali meha Bungiu Ubóu habá gürigia (Hob. 38:4-6; Her. 10:12). Kei buidu lubéi ligaburi Bungiu ani gíchigadi ligía, adügati saragu katei lun gayaraabei lan wagundaarun lau (Sal. 104:14, 15, 24). Anihein dan ráramaguati asaminara luagu le adüga láalibei, ani aba larihin “luagu buidu lan” (Agu. 1:10, 12, 31). Ruti uéiriguni houn gürigia lau líchugun “ubafu” houn luagu sun katei buidu buriti le adüga láalibei Ubouagu (Sal. 8:6). Busenti Bungiu lun hóunigiruni gürigia charatiña sun buiti le adüga láalibei. Héchutiwa san lun weteingiruni Heowá luagu lubuidun füramasei le?

7. Ida liña larufuduni Hosué 24:15 gabafu hamá gürigia lun hanúadiruni le lunbei hadügüni?

⁷ Ru laali Heowá ubafu woun lun wanúadiruni le wabusenrubei wadügün. Seremei lun idewesei le, gayara lubéi wanúadiruni kaba lan wadüga lau wabagari (aliiha huméi Hosué 24:15). Gúndaati Wabungiute le hínsiñehabuti dan le wanúadirun weseriwidun lun (Sal. 84:11; Ari. 27:11). Anihein saragu igaburi le ñein lumuti gayara lan warufuduni wabafu lun wanúadahan. Ariha waméi hénpulu le lígirubei Hesusu.

8. Írida humá aban lídangiñe igaburi ñein lubéi layusurei Hesusu ubafu le luágubei lun lanúadirun.

⁸ Ru lumuti Hesusu le buídutimabei houn amu lidan furumiñeti lúgaaru, ani gayaraati wáyeihani lani hénpulu. Lidan aban dan, buchaali meha luagu Hesusu luma hawagu lánigu disipulugu, ábati houdin lidan aban fulasu darangilati lun hemeraagun. Ani siñati hemeraagun, aba hachülaagun saragu gürigia ñein habéi ani aranseñu haña lun haganbuni Hesusu. Lubaragiñe lagañidun, ábanrügü  hagudemedagun gürigia hagía lun ani aba lagumeserun “arufudaha saragu katei houn” (Mar. 6:30-34). Dan le wáyeihani Hesusu lau wayusuruni wadaani luma were lun wíderagun amu rútiwa uéiriguni lun Wáguchi le siélubei (Mat. 5:14-16). Ani ítara liña warufudun lun busén wamá lun hádangiñe wamá liduheñu.

9. Ka lunbei mabulieidun hamani agübürigu?

⁹ Ru laali Heowá ubafu houn gürigia lun gasaanigu hamá ani arufuda hagíame houn lun línsiñedun houn luma lun heseriwidun lun. Anhein gasaanigu hubéi, wéiriti san lebegi idewesei espechaliti le hun? Lau sun rúhali lan Heowá ubafu houn ánheligu lun hadügün katei wéinamuti, míchuti ubafu houn lun gasaanigu hama. Lau saminaü le, lunti geteingiradi hamá agübürigu luagu lubuidun idewesei le líchugubei Heowá houn. Rúhali Bungiu aban dasi sagüráuti houn agübürigu lun hagüriaruniña hasaanigu “arufudaheina houn kei labusenruni” Heowá (Efe. 6:4; 2 Lur. 6:5-7; Sal. 127:3). Lun gayara lan híderawaguniwa agübürigu, rutu lóundarun Heowá saragu ídemuei houn tídangiñeti Bíbülia, kei burí agumeiraguagüdüni, bidéu, uremu luma burí arütíkulu lidan Internet. Furanguti hínsiñe hamá wasaanigu lun Wáguchi le siélubei luma lun Lisaani (Luk. 18:15-17). Gúndaati Heowá dan le larihin afiñe hamá agübürigu luagu ani adüga haméi sun hayaraati lun hóunigiruniña hasaanigu. Agübürigu ha adügübalin le, rútiña chansi houn hasaanigu lun hádangiñe hamá liduheñu Heowá lun súnwandan.

10, 11. Ka katei gayara lubéi Heowá adüga seremei sákürifisiu le ladügübei Lisaani?

¹⁰ Ru lumuti Heowá lisaani le hínsiñetimabei lun lun líchugun aban chansi woun lunya hádangiñe wamá liduheñu. Kei warihini lidan  párafu 4, féridi lumuti Adán tuma Ewa halugaarun lun hádangiñe hamá liduheñu Heowá ani adügati giñe lira lun heferidiruni hasaanigu (Rom. 5:12). Kei aba lubéi maganbadi lan Adán tuma Ewa lun Bungiu, ligía gadüna habéi lun habugún hádangiñe liduheñu Bungiu. Kábati asusereda houn hadügawagun? Lau ínsiñeni, adüga lumuti Heowá le megei wabéi lun lanúadahaniña ha gaganbadibaña lun lun hádangiñe hamá liduheñu. Ida? Seremei sákürifisiu le ladügübei Hesukrístu le Lisaani (Huan 3:16; Rom. 5:19). Adügati sákürifisiu le lun lisaanigu hamá Heowá 144.000 gürigia ha úaraguatiña (Rom. 8:15-17; Aruf. 14:1).

¹¹ Añahein giñe, saragu míñunu gürigia ha gaganbaditiña adügei lugundan Bungiu. Ani hemenigitiña lun hádangiñe hamá liduheñu Heowá ha tímatimaatiña lárigiñeme lagumuhóun óuchawaguni le lunbei liabin lárigiñeme 1,000 irumu (Sal. 25:14; Rom. 8:20, 21). Seremei emenigini le, guentó wáhaña lun Heowá, Le adügübalin sun katei: “Núguchi” (Mat. 6:9). Luagu le aban oubaü, gürigia ha lúnbaña háguyugun hibihibei giñe chansi lun hadügüni le lagurabubei Heowá hámagiñe. Hame busenbaña hadügüni le lubeibei, lau lásügürün dan gayarabei hádangiñe hamá liduheñu Heowá.

12. Kaba álügüdahani wóunaba?

¹² Kei aubei warihei, adügaali Heowá saragu katei lun líchugun uéiriguni hou gürigia. Anúadira laña kristiánugu anuadirúaaña kei lisaanigu, ani ha hádangiñebaña “saragu gürigia” ru laali emenigini houn lun lisaanigu hamá lidan iseri ubóu (Aruf. 7:9). Ka gayarabei wadügüni guentó lun warufuduni lun Heowá busén wamá hádangiñe wamá liduheñu lun súnwandan?

13. Ka lunbei wadügüni anhein busén wabéi lun hádangiñe wamá liduheñu Heowá lun súnwandan? (Márükosu 12:30).

¹³ Arufuda waméi lun Heowá lau weseriwidun lun tídangiñe sun wanigi (aliiha huméi Márükosu 12:30). Lídangiñe sun idewesei le  ru láalibei Bungiu woun lau ínsiñehabuni, aban lídangiñe le wéiritimabei, wáhuduragun lun. Dan wadügüni le lubeibei, arufuda wamuti lun hínsiñe lan woun (1 Huan 5:3). Aban lídangiñe gumadi le líchugubei Hesusu lun wadügün disipulugu ani badisei wamañame (Mat. 28:19). Ariñagati giñe Hesusu woun lun hínsiñegua wamá wámagua (Huan 13:35). Gürigia ha gaganbadibaña lun hagía labusenrubaña Heowá lun hádangiñe hamá liduheñu lidan sun ubóu (Sal. 15:1, 2).

14. Ida luba warufudun ínsiñehabuni houn amu? (Matéu 9:36-38; Rómana 12:10).

¹⁴ Hínsiñe hamá amu woun. Ínsiñeni ligía ligaburi Heowá létima súdinibei (1 Huan 4:8). Hínsiñetiwa lun íbini lubaragiñe wasubudiruni (1 Huan 4:9, 10). Dan le hínsiñe hamá amu gürigia woun wasigiruñein lani hénpulu (Efe. 5:1). Aban igaburi le buídutimabei lun warufudun ínsiñehabuni wíderaguniña gürigia asubudirei Heowá dan le aniheingua lan dan (aliiha huméi Matéu 9:36-38). Ítara liña wíchugun chansi houn, lun hádangiñe hamá liduheñu Bungiu yarafa madise. Dan le labadiseirun aban gürigia, mosu wasigirun arufuda ínsiñeni lun ani inebe ligíame woun (1 Huan 4:20, 21). Kei hénpulu, masaminara wamá ladügüñein lan katei wuriba, samina wamá katei buiti luagu, masaminarun wagíame lau lan luriban ayumahani ladügei katei. Lubaragiñe lira, arufuda wamá inebe lan woun ani samina wamá iñu lan wawéi (aliiha huméi Rómana 12:10; Fili. 2:3).

15. Kaba un warufuda gudemehabu luma ínsiñehabuni?

¹⁵ Gudemehabu wamá ani hínsiñe hagíame sun gürigia woun. Anhein busén wabéi hádangiñe wamá liduheñu Bungiu lun súnwandan, lunti wawinwandun según le tarufudahabei Bíbülia woun. Kei hénpulu, arufudahati Hesusu lunti lan gudemehabu wamá ani hínsiñehabu wagíame hama sun gürigia, íbini wáganiñu (Luk. 6:32-36). Gayaraati anihein lan dan hénrengu lan larihíniwa katei le. Anhein ligía lubéi wakesinbei, lunti wafurendeirun asaminara luma adügei katei kei ladügüni Hesusu. Dan le wadügüni sun wayaraati lun gaganbadi wamá lun Heowá áyeiha wameime Hesusu, warufuduñein lun Wáguchi le siélubei busén wamá hádangiñe wamá liduheñu lun súnwandan.

16. Ka gayarabei wadügün lun masaminarun hamá amu wuriba hawagu liduheñu Heowá?

¹⁶ Góunigi waméi ligaburi lasaminarúniwa hawagu liduheñu Heowá. Hadan iduheñu, ménrengunti warihini háyeihani amulenu hóuserun íbugañanu. Anhein inebe lubéi houn le tariñagubei Bíbülia, híchuguba aban lubuidun hénpulu houn hamulenu. Ani anhein, hadüga le wuribabei, gayaraati hasigiruni hamulenu luriban hani hénpulu. Susereti ligiaméme hadan liduheñu Heowá. Anhein múaran aban kristiánu ani falá ligía arufudahani iyeeniti, o línsiñedun ibagari lidan magíaguni lun, gayaraabei háyeihani amu lagübüri üma le lafalarubei. Ha adügübalin, aba hawiyeduni lubuidun hiri liduheñu Heowá (1 Tesa. 4:3-8). Mafalara wamá lagübüri hénpulu ani mígira wamá giñe lun ladisedagüdüniwa luéi Wáguchi le siélubei.

17. Ka lunbei masaminarun wamani, ani ka uagu?

¹⁷ Luagu lan Heowá wafiñera mama lan luagu umegeguni. Füramaseti Heowá woun, anhein lan wáluaha Larúeiha furumiñe, inebe ligía lilurudun woun, líchuguba lan éigini, daüguaü tabu muna woun (Sal. 55:22; Mat. 6:33). Ligía lubeiti, masaminarun wamá lesefurubadiwa lan umegeguni le yaabei ubouagu o líchuguba lan ugundani woun. Subudi wamuti ladügǘniwa lan lugundan Heowá íchugubei ugundani woun luma darangilaü le inarüniti (Fili. 4:6, 7). Íbini anhein anihein lubéi seinsu wama lun wagañeihan saragu katei o saragu ílagu, mosu wasaminarun anhein gadaani wabéi o anhein anihein lubéi erei wawagun lun wayusurunu  o wóunigiruni. Álügüdagua wamá woungua: “Wéiriti san línsiñe numegen nun?”. Haritagua waméi aguraba lan Heowá wadügüni le lubeibei kei liduheñu. Ligíati, mígira wamá lun ladireirúniwa ni kata luéi wadügüni. Mabusenrúntiwa lun úa lan ni kata adügüti lun ítara wamá kei nibureinti le meha lídanbei lidaani Hesusu le máhabei lun agunbirahani le ladügübei Hesusu lun lun aban lan meha hádangiñe lisaanigu Heowá ámuñegü. Ani ka uagu? Ladüga lueirin línsiñe umegeguni lun (Mar. 10:17-22).

18. Kaba buiti wasagara lídangiñe abinirúni le lunbei hawinwanduni gürigia ha gaganbadibaña?

¹⁸ Hibihiba gürigia ha gaganbaditiña aba óunwenbu ugundani le maríhunwañahagili: línsiñedun Heowá houn luma lun háhuduragun lun lun súnwandan. Ha hemenigibaña lun hawinwandun ubouagu gachansinbaña lun hóunigiruni lubuidun Ubóu le ladügübei Heowá machararunga luma lun hawinwandun lidan. Seremei lun Larúeiha Bungiu, yarafa madise lagiribuduba lubuidun burí katei le meha lídanbei Ubóu. Lagidarubei Hesusu sun turobuli le buga ladügübei Adán tuma Ewa dan le hanúadirubei lun mama hamá hádangiñe liduheñu Heowá. Láguyuguagüdübaña Heowá míñunu gürigia ani líchuguba chansi houn lun hawinwandun lun súnwandan lau aba lubuidun átuadi ya ubouagu lidan aban paraísu (Luk. 23:42, 43). Danme le lachülürün dan lun mafigoun haña lan liduheñu Heowá ha lúnbaña herederun ya ubouagu, sun hagía harufudubei “uéiriguni luma inebesei” le uágubei tayanuha Bíbülia (Sal. 8:5).

19. Ka lunbei waritaguni?

¹⁹ Anhein hádangiñetün lubéi “saragu gürigia”, anihein aban lueirin emenigini hun. Wéiriti hínsiñe lun Heowá ani busenti lun aban humá hádangiñe liduheñu. Ligíati, áfaagua humá lun hagundaaragüdüni. Kipu huméi tidan hanigi luma lidan hisaminan sagü weyu. Gebegi lan lubuidun chansi le húmabei lau háhuduragun lun Wáguchi le siélubei ani gebegi lan giñe emenigini lun halawahani lun súnwandan.