1. Muze mutunyonga ha yuma yeswe yize Yehova atangile, yihula yika mutuhasa kulihula?

 NYI twanyonga ha yuma yeswe yize Yehova atangile mu malilu ni hashi, kota mutulivwa ngwe chize Ndawichi evwile. Tangwa limwe iye yahula Yehova ngwenyi: “Shimbu mungutala malilu, che chitanga cha minwe ye; kakweji ni matongonoshi aze wakolesele; mutu kuchi apwa mba ukamunyonge yena? Hanji mwana mutu, kuchi apwa ukamunangise?” (Samu 8:3, 4) Chizechene ngwe Ndawichi, nyi mutunyingika ngwetu tuli akepe ha kulitesa ni malilu ni hashi, mutukomoka ha kunyingika ngwetu Yehova kakulihulumba hali yetu. Ngwe chize mutumona, Yehova kakalihulumbile wika hali atu atangu, Alama ni Eva, alioze kaehele nawa uhashi wa kupwa mu usoko wenyi.

2. Mulimo uka Yehova ahanyine kuli Alama ni Eva?

² Alama ni Eva kapwile ana atangu a Yehova hano hashi, nawa Yehova te kakwazanga chinji. Yehova kazangile hanga Alama ni Eva akwase usoko wenyi oke. Kashika aalwezele ngwenyi: “Semenu nukaliokese, nukazalise hashi.” (Uputu. 1:28) Alama ni Eva te mapwa ni ana ni kufunga kanawa hashi. Nyi Alama ni Eva kononokene ni kulinga kanawa mulimo wo, kachi ayo ni ana jo kanungine mu usoko wa Zambi ku miaka yeswe.

3. Mumu liaka mutuhasa kwamba ngwetu, Alama ni Eva kapwile alemu mu usoko wa Yehova?

³ Alama ni Eva kapwile alemu mu usoko wa Yehova. Ha Samu 8:5, Ndawichi kambile hakutwala ku chize Yehova atangile mutu ngwenyi: “Hiwamupwisa kushi lia angelo hakepe  wika. Hiwamwaha chipangula cha uhenya ni ulemu.” Yehova kakahanyine atu ndundo, mana ni utotombo ngwe uze ahanyine kuli angelo. (Samu 103:20) Chipwe chocho, angelo kahianyine chinji atu. Chikuma chino chakutukomwesa chinji! Muze Yehova atangile yisemi jetu atangu kaehele mwono upema chinji.

4. Yika yalingiwile kuli Alama ni Eva, nawa yika mutumona ha mutwe uno?

 ⁴ Chaluyinda, mumu lia kuhona kwononoka, Alama ni Eva yecha kupwa mu usoko wa Yehova. Ngwe chize mutumona ha mutwe uno, chino chanehene lamba linji kuli ana jo. Chipwe chocho, upale wa Yehova hali atu kuwalumukine. Iye nihindu kanazange hanga atu waze akumwononokena apwe ana jenyi ndo ku miaka yeswe. Chitangu, tutalenu yize Yehova alingile hanga asolole ngwo tuli alemu kuli iye. Hanyima, mutumona yize twatamba kulinga hanga tusolole ngwetu, tunazange kupwa mu usoko wa Zambi. Kusulaho, mba mutushimutwina yiwape yize ana ja Yehova hano hashi makazuka ku miaka yeswe.

5. Kuchi mutuhasa kusolola kuli Yehova ngwetu tunasakwilila ha kututanga mu chano chenyi?

⁵ Yehova katulemesene ha kututanga mu chano chenyi. (Uputu. 1:26, 27) Zambi katangile atu mu chano chenyi, ha kwaha uhashi wa kupwa ni yitanga yize iye akwete ni kuyisolola. Yitanga yacho, yakutukwasa kupwa atu waze iye anazange mu usoko wenyi, yimwe yili, zango, keke, ushishiko ni ululi. (Samu 86:15; 145:17) Muze twakusa tachi hanga tupwe ni yitanga yacho, twakusolola kuli Yehova ngwetu tunasakwilila ha kututanga mu chano chenyi. (1 Petu. 1:14-16) Chikwo nawa, twakupwa ni uwahililo wamwenemwene ku mwono wetu.

6. Kuchi mutapu uze Yehova aluliekele yuma hano hashi wakusolola ngwo kakulemesa atu?

⁶ Yehova kanakatululiekela chihela chipema. Shimbu te kanda achitanga lunga mutangu, Yehova yaluliekela atu hashi. (Yombi 38:4-6; Jere. 10:12) Mumu lia zango ni kupwa chihanyi, Yehova yasa yuma yinji yipema hano hashi hanga yituvwise kuwaha. (Samu 104:14, 15, 24) Ha yisuho yeswe yize Zambi ahwimine hanga atale yitangiwa yenyi, ‘kayimwene ngwenyi yinapeme.’ (Uputu. 1:10, 12, 31) Mba asolole ngwenyi atu kali alemu chinji, Yehova yaaha “chiyulo” helu lia yuma yeswe yipema yize atangile hano hashi. (Samu 8:6) Upale wa Zambi uli ngwo, atu angunu akawahilile ku miaka ya mutolo ha kufunga yuma yeswe yipema yize atangile hano hashi. Shina wakusakwilila Yehova mashimbu eswe ha chilakenyo chino chipema?

7. Kuchi Yoshua 24:15 unasolola ngwo atu kali ni uhashi wakusakula chipi ni chipema?

⁷ Yehova katuhele uhashi wa kusakula chipi ni chipema. Yetu mutuhasa kusakula kulinga yize tunazange ku mwono wetu. (Tanga Yoshua 24:15.) Kashika, Yehova kakuwahilila chinji muze twakusakula kumuwayila. (Samu 84:11; Yishi. 27:11) Kuli majila anji waze mutuhasa kuzachishilamo uhashi wacho hanga tukwate yiyulo yipema. Tutalenu chilweza chize Yesu ahichikile.

8. Kuchi Yesu azachishile uhashi wenyi wa kusakula chipi ni chipema ha limwe shimbu?

⁸ Chizechene ngwe Yesu, ni yetu mutuhasa kusakula kusa upale wa akwetu kulutwe kuhiana wa yetwene. Tangwa limwe, Yesu ni apostolo jenyi te kanahongo chinji, chocho yaya ku chihela cha ukawo hanga ahwime ndambu. Alioze kakahashile kuhwima. Mbunga yinene ya atu yiyawana, nawa ayo te kanazange chinji aalongese kuli Yesu. Alioze Yesu kakevwile uli. Shimbu evwe uli, iye yaevwila  keke. Mba yika Yesu alingile? “Yaputuka kualongesa yuma yinji.” (Marku 6:30-34) Ni yetu mutuhasa kwimbulula Yesu ha kusa mashimbu ni tachi jetu hanga tukwase akwetu. Nyi twachilinga, mutuhalisa Tata yetu wa mu malilu. (Mateu 5:14-16) Mutusolola nawa kuli Yehova ngwetu, tunazange kupwa mu usoko wenyi.

9. Chawana chika chilemu chize Yehova ahanyine kuli atu?

⁹ Yehova kahanyine kuli atu uhashi wa kusema ana ni kwalongesa kumuzanga ni kumuwayila. Nyi uli chisemi, shina wakusakwilila ha chawana chino chilemu? Yehova katangile angelo ni utotombo unji upema, alioze kakaehele uhashi wa kupwa ni ana. Kashika, yisemi katamba kulemesa chinji chiteli chize aehele cha kupwa ni ana. Kulela ana ni ‘kwafumba ni kukanyamisa cha Mwene,’ chili chiteli chisandu chize Zambi ahanyine kuli yisemi. (Efwe. 6:4; Shimbi 6:5-7; Samu 127:3) Ululikiso wa Yehova wakukwasa yisemi ha kutuhwisa yikwata yinji yize yakulumbununa Mbimbiliya, ngwe mikanda, yinema, miaso ni yikuma ya ha Internet. Twamona pundu ngwetu, Tata yetu wa mu malilu ni Mwanenyi, Yesu, kakulemesa chinji akweze. (Luka 18:15-17) Muze yisemi akujikijila muli Yehova ni kulinga yeswayo mahasa hanga alele ana jo, Yehova kakuwahilila. Chikwo nawa, yisemi jacho kakuhana kuli ana jo uhashi wa kupwa mu usoko wa Yehova ku miaka yeswe!

10-11. Uhashi uka Yehova anatwehe kupalikila mu ukuule?

¹⁰ Yehova kahanyine mwono wa Mwanenyi yoze akulemesa chinji hanga tuhase kupwa nawa mu usoko wenyi. Ngwe chize twamona ha  paragrafu 4, Alama ni Eva kalitunyine kupwa mu usoko wa Yehova, chino yichikwata nawa hali ana jo. (Roma 5:12) Alama ni Eva kechele kwononokena Zambi ku tachi, kashika te chinalite kwahuma mu usoko wenyi. Mba yika mutwamba hali ana jo? Yehova kakuzanga chinji atu, kashika ahanyine ukuule wa Yesu hanga asakule waze mamwononokena apwe ana jenyi. (Yoa. 3:16; Roma 5:19) Mumu lia ukuule, atu ashishika 144.000 kanapu ana ja Zambi.—Roma 8:15-17; Uso. 14:1.

¹¹ Kuchizako akwa-Kristu akuwayisa, tununu a tununu twa atu akwo ashishika, no kanase tachi hanga alinge upale wa Zambi musono. Ayo kali ni kutalatala cha kupwa mu usoko wa Zambi hanyima lia cheseko cha kasula ha Kanunu ka Miaka. (Samu 25:14; Roma 8:20, 21) Mumu lia kutalatala chacho, atu wano mahasa kusanyika Yehova ngwo, Sakatanga yetu hanji ngwetu “Tata.” (Mateu 6:9) Chikwo nawa, atu waze makahindwisa mu paraisu, no makapwa ni uhashi wa kulilongesa yize Yehova anashimbwila hali ayo. Nyi masakula kwononokena Zambi, no makapwa mu usoko wenyi.

12. Chihula chika mutushimutwina haliapwila?

¹² Ngwe chize twamona, Yehova hanalingi yuma yinji yize yakusolola ngwo kakulemesa atu. Iye hanasakula akwa-Kristu akuwayisa hanga apwe ana jenyi, nawa hanahane kutalatala kuli “mbunga yinene” hanga akapwe ana jenyi mu chifuchi chaha. (Uso. 7:9) Yika mutuhasa kulinga haliapwila hanga tusolole kuli Yehova ngwetu, tunazange kupwa mu usoko wenyi ku miaka yeswe?

13. Yika mutuhasa kulinga mba tupwe mu usoko wa Yehova ku miaka yeswe? (Marku 12:30)

¹³ Solola zango lie kuli Yehova ha kumulingila. (Tanga Marku 12:30.) Mumu lia kupwa chihanyi, Yehova hanahane yawana yinji kuli atu, chimwe cha ku yawana yacho, chili uhashi wa kumuwayila. Twakusolola ngwetu  twakuzanga Yehova, muze ‘twakwononokena shimbi jenyi.’ (1 Yoa. 5:3) Shimbi yimwe yize Yehova anazange hanga tuyononokene, yili shimbi yize Yesu ahanyine ya kutayisa tumbaji ni kwapapachisa. (Mateu 28:19) Iye katuhele nawa shimbi ya kulizanga umwe ni mukwo. (Yoa. 13:35) Waze akwononoka, Yehova makaasa mu usoko wa tuvumbi twenyi a hashi heswe.—Samu 15:1, 2.

14. Kuchi mutuhasa kusolola ngwetu twakuzanga akwetu? (Mateu 9:36-38; A-Roma 12:10)

¹⁴ Solwela akwenu zango. Zango lili chitanga chilemu cha Yehova. (1 Yoa. 4:8) Yehova kanakatusolwela zango shimbu te kanda tuchimunyingika. (1 Yoa. 4:9, 10) Mutuhasa kwimbulula Yehova ha kuzanga akwetu. (Efwe. 5:1) Jila yimwe yipema yize mutuhasa kusolwelamo ngwetu twakuzanga atu, yili kwakwasa hanga alilongese hakutwala kuli Yehova muze kuchili mashimbu. (Tanga Mateu 9:36-38.) Nyi twachilinga, no mutwaha uhashi wa kupwa mu usoko wa Zambi. Chipwe hanyima lia kupapachisa umwe mutu, nihindu twatamba kununga ni kumusolwela zango ni vumbi. (1 Yoa. 4:20, 21) Kuchi mutuhasa kuchilinga? Jila yimwe yize mutuchilingila yili kumujikijila. Chakutalilaho, nyi malinga chuma chize kuchatulumbunukine, kutwatambile kunyonga ngwetu kachilinga ni nyonga lipi. Shimbu tuchilinge, twatamba kulemesa ndumbwetu ni kumumona ngwetu katuhiana.—Tanga A-Roma 12:10; Fwili. 2:3.

15. Aya twatamba kusolwela keke ni upeme?

¹⁵ Pwako mutu mupema ni kuvwila atu eswe keke. Nyi tunazange kupwa hamwe ni atu waze ali ni ulite wa kuvuluka Yehova ngwo Tata ku miaka yeswe, twatamba kukaula yize twakulilongesa mu Liji lienyi. Chakutalilaho, Yesu kalongesele ngwenyi, twatamba kusolola keke ni upeme kuli atu eswe, chipwe kuli akwa-kole jetu. (Luka 6:32-36) Ha mashimbu amwe, mutuhasa kumona ngwe chino chili chikalu kuchilinga. Nyi chocho, twatamba kulilongesa kunyonga ni kulinga yuma ngwe Yesu. Muze twakusa tachi hanga twononokene Yehova ni kwimbulula Yesu, twakusolola kuli Tata yetu wa mu malilu ngwetu, tunazange kupwa mu usoko wenyi ku miaka yeswe.

16. Kuchi mutuhasa kufunga lufuma wa usoko wa Yehova?

¹⁶ Funga lufuma mupema wa usoko wa Yehova. Mu usoko, kanuke kanji-kanji kakuzanga kwimbulula chilweza cha yayo. Nyi yayo makaula shimbi ja Zambi ku mwono wenyi, mapwa chilweza chipema kuli mwanako. Alioze, nyi yayo mapwa ni yitanga yipi, mwanako mahasa kukaula chilweza chenyi chipi. Chino muchihasa kulingiwa nawa mu usoko wa Yehova. Nyi umwe ndumbu yoze te washishika mapwa chitanganyanyi ni kulinga yuma ya luchisa hanji ni yuma yikwo yipi, chino muchihasa kutwala mandumbu akwo hanga amwimbulule. Waze akulinga yuma yamutapu au, kakupihisa lufuma wa usoko wa Yehova. (1 Tesa. 4:3-8) Kashika, twatamba kwehuka yilweza yipi ni kusa tachi hanga tuhone kwecha chuma nichimwe chituhandunune kuli Tata yetu wa mu malilu.

17. Manyonga aka api waze kutwatambile kupwa no, nawa mumu liaka?

¹⁷ Jikijila muli Yehova, kanda ujikijila ha yikumba. Nyi mutufupa chitangu Wanangana wa Zambi ni kumwononokena, iye matwaha kulia, mazalo ni zuwo. (Samu 55:22; Mateu 6:33) Nyi twanyonga ha chilakenyo chino, kutuchi kumona ngwetu yikumba ya hano hashi, muyitufunga ni kutwaha uwahililo. Tunanyingika ngwetu chuma muchitukwasa kupwa ni sambukila ya ku mbunge, chili kulinga upale wa Yehova. (Fwili. 4:6, 7) Chipwe ngwe tuli ni mbongo ja kulanda yuma yinji, nihindu  twatamba kusa shindakenyo hanga tunyingike nyi tuli ni mashimbu hanji tachi ja kuzachisa yuma yacho ni kuyifunga. Shina twakuzanga chinji yikumba? Twatamba kunyingika ngwetu, Yehova hanatwehe mulimo hanga tulinge mu usoko wenyi. Chino chinalumbunuka ngwo, kutwatambile kwecha chuma nichimwe hanga chitulalwise. Kutwazangile kupwa ngwe mukweze yoze walitunyine kuwayila Yehova ni kupwa umwe wa kuli ana jenyi. Iye kalitunyine kuwayila Yehova, mumu kazangile chinji yikumba yize apwile nayo!—Marku 10:17-22.

18. Uhenya ni yiwape yika makapwa nayo atu waze akwononoka?

¹⁸ Atu waze akwononoka, makapwa ni chiwape chinene—kuzanga Yehova ni kumuwayila ku miaka yeswe! Waze ali ni kutalatala cha kutwama hano hashi, no makawahilila ha kufunga hashi haze Yehova aluliekelele atu. Kwasala hakehe, Wanangana wa Zambi muuyula hano hashi ni kululieka nawa yuma yeswe yize yiliho. Yesu makahwisa lamba lieswe lize liejile ku chiyulo cha Alama ni Eva cha kuhichika usoko wa Zambi. Yehova nawa makahindwisa tununu a tununu twa atu ni kwaha uhashi wa kupwa ni mwono ungunu mu paraisu hano hashi ku miaka yeswe. (Luka 23:42, 43) Nawa muze atu maya ni kupwa angunu, eswe mapwa ni “uhenya ni ulemu” ngwe chize Ndawichi asonekene.—Samu 8:5.

19. Yika watamba kununga ni kulinga?

¹⁹ Nyi unalingi chihanda cha “mbunga yinene,” uli ni kutalatala chipema chinji. Zambi kakukuzanga; nawa kanazange hanga upwe mu usoko wenyi. Kashika, sako tachi hanga umuvwise kuwaha. Hita tangwa, nyonga ha yilakenyo ya Zambi ni kuyifunga mu mbunge ye. Sakwilila ha chiteli chize uli nacho cha kuwayila Tata yetu wa mu malilu, ni kulemesa kutalatala che cha kumuhalisa ku miaka yeswe!