1. ¿Chuqui miʼ mejlel laj cʼajtiben lac bʌ cheʼ mi lac ñaʼtan pejtelel chuqui tsaʼ bʌ i mele Jehová?

CHEʼ mi lac wen ñaʼtan jiñi panchan yicʼot Pañimil tsaʼ bʌ i mele (pʌtʌ) Jehová tajol cheʼ yubil mi la cubin lac bʌ bajcheʼ David, tsaʼ bʌ i sube ti jumpʼejl oración: «Cheʼ mij qʼuel a panchan, i melbal i yal a cʼʌb, yicʼot jini uw yicʼot ecʼ tsaʼ bʌ a mele. Maʼanic mic chʼʌmben isujm chucoch ma pʼuntan winicob, come maʼanic i ñuclel» (Sal. 8:3, 4). Cheʼ bajcheʼ tsiʼ mele David, tajol mi lac ñaʼtan chaʼan mach wen ñucoñicla bajcheʼ jiñi ecʼ tac i miʼ toj sajtel lac pusicʼal cheʼ Jehová miʼ chʼʌmonla ti ñuc. Pero cheʼ bajcheʼ mi caj laj qʼuel tiʼ tojlel Adán yicʼot Eva, Jehová mach tsaʼic jach i chʼʌmʌyob ti ñuc, tsiʼ yotsayob tiʼ familia.

2. ¿Chuqui yom bʌ Jehová tsiʼ yʌlʌ tiʼ tojlel jiñi ñaxañoʼ bʌ i yalobil?

² Adán yicʼot Eva jiñobʌch ñaxañoʼ bʌ i yalobil Jehová wʌʼ ti Pañimil i Jehová jiñʌch i Tat muʼ bʌ i cʼuxbiñob. Yom chaʼan miʼ pʼolob i bʌ, tiʼ subeyob: «La pʼojliquetla. Butʼula jini pañimil. Cʼʌñʌla» (Gn. 1:28). Yom chaʼan miʼ tilel i yalobilob yicʼot miʼ cʌntañob jiñi Pañimil. Cheʼ Adán yicʼot Eva tsaʼic i jacʼbeyob i tʼan Jehová yicʼot tsiʼ meleyob cheʼ bajcheʼ yom, tsaʼ bej ajñiyob tiʼ familia tiʼ pejtelel ora yicʼot jiñi i pʼolbalob.

3. ¿Chucoch miʼ mejlel la cʌl chaʼan Jehová tsiʼ qʼuele ti ñuc Adán yicʼot Eva cheʼ tsiʼ yʌqʼueyob i yajñib tiʼ familia?

³ Jehová tsiʼ qʼuele ti ñuc Adán yicʼot Eva cheʼ tsiʼ yʌqʼueyob i yajñib tiʼ familia. Cheʼ bajcheʼ miʼ yʌl Hebreos 2:7, (TWT) jiñi Biblia miʼ yʌl bajcheʼ Jehová tsiʼ mele jiñi wiñic: «Tsaʼ mele yoma lajal cheʼ bajcheʼ ángelob, tsaʼ wʌqʼue i ñuclel». I sujmʌch,  Dios mach cheʼic cʼamel tsiʼ yʌqʼue i pʼʌtʌlel, i ñaʼtʌbal yicʼot chuqui yujilob i melol jiñi wiñicob bajcheʼ jiñi ángelob (Sal. 103:20). Pero «yoma lajal» tsiʼ mele bajcheʼ jiñi wen pʼʌtʌl bʌ ángelob. ¡Wen utsʼatax jiñi! Cheʼ bʌ Jehová tsiʼ mele jiñi ñaxam bʌ lac tatob, wen utsʼatax bajcheʼ tsiʼ yʌcʼʌyob ti chumtʌl.

4. ¿Chuqui tsaʼ ujti tiʼ tojlel Adán yicʼot Eva, i chuqui mi caj laj qʼuel ti ili estudio?

 ⁴ Pero Adán yicʼot Eva tiʼ sʌtʌyob i yajñib tiʼ familia Jehová. Cheʼ bajcheʼ mi caj laj qʼuel ti ili estudio, jiñi tsiʼ yʌqʼue cabʌl wocol i pʼolbalob. Pero Jehová maʼañic qʼuextʌyem chuqui ñaʼtʌbil i chaʼan. Yom chaʼan jiñi lac piʼʌlob xjacʼtʼañoʼ bʌ miʼ sujtelob tiʼ yalobil tiʼ pejtelel ora. Wʌle, mi caj laj qʼuel bajcheʼ tac an i qʼueleyonla ti ñuc Jehová. Cheʼ jiñi, mi caj laj qʼuel chuqui miʼ mejlel lac mel chaʼan mi lac pʌs chaʼan la com ochel tiʼ familia. Ti wiʼil, mi caj la cʌl chuqui ti bendición tac mi caj i tajob jiñi i yalobilob Jehová ti Pañimil.

5. ¿Bajcheʼ mi la cʌqʼuen wocolix i yʌlʌ Dios cheʼ tsiʼ meleyonla tiʼ yejtal?

⁵ Jehová tsiʼ yʌqʼueyonla lac ñuclel cheʼ tsiʼ meleyonla tiʼ yejtal (Gn. 1:26, 27). Melbilonla tiʼ yejtal Dios, jin chaʼan miʼ mejlel lac taj yicʼot lac pʌs jiñi utsʼatax bʌ i melbal (chaʼlibal) tac bajcheʼ jiñi i cʼuxbiya, i pʼuntaya, i xucʼtilel yicʼot i tojel (Sal. 86:15; 145:17). Cheʼ mi lac mel iliyi, mi la cʌqʼuen i ñuclel Jehová yicʼot wocolix i yʌlʌ (1 P. 1:14-16). Mi mucʼʌch lac mel chuqui miʼ mulan Jehová, tijicña mi caj la cubin. Cheʼ jaʼel, tajol miʼ mejlel lac tsʼʌctesan muʼ bʌ i cʼajtin chaʼan mi la cochel tiʼ familia come melbilonla tiʼ yejtal.

6. Cheʼ bʌ Jehová tsiʼ mele jiñi lum, ¿bajcheʼ tsiʼ yʌqʼue i ñuclel jiñi lac piʼʌlob?

⁶ Jehová tsiʼ chajpʌbeyonla utsʼatax bʌ lac chumlib. Cheʼ bʌ jalto yom chaʼan miʼ mel jiñi ñaxam bʌ wiñic, Dios tsiʼ chajpa jiñi Lum chaʼan mi lac chumtʌl (Job 38:4-6; Jer. 10:12). Cabʌl chuqui tsiʼ mele chaʼan mi lac ñusan lac bʌ come wen an i yutslel (Sal. 104:14, 15, 24). Tsiʼ locʼsʌbe tac i yorajlel chaʼan miʼ ñaʼtan pejtel chuqui tsiʼ mele, i «tsiʼ qʼuele utsʼatʌch» (Gn. 1:10, 12, 31). Tsiʼ yʌqʼue i ñuclel lac piʼʌlob cheʼ tsiʼ yʌqʼueyob tiʼ wenta pejtelel chuqui tsiʼ mele ti Pañimil (Sal. 8:6). Dios yom chaʼan cheʼ bʌ tojobix jiñi lac piʼʌlob tijicña miʼ yubiñob cheʼ miʼ cʌntañob tiʼ pejtelel ora chuqui melbil i chaʼan. ¿Ñʌmʌl ba la cʌqʼuen wocolix i yʌlʌ chaʼan jiñi utsʼatax bʌ tʼan wʌn albil bʌ i chaʼan?

7. ¿Bajcheʼ miʼ pʌsbeñonla Josué 24:15 chaʼan librejonla chaʼan mi lac yajcan chuqui mi lac mel?

⁷ Jehová libre tsiʼ meleyonla chaʼan mi lac yajcan chuqui mi lac mel. Wocolix i yʌlʌ chaʼan jiñi lac majtan, miʼ mejlel lac yajcan chuqui mi caj lac mel ti laj cuxtʌlel (pejcan Josué 24:15). Wen tijicña miʼ yubin cheʼ mi lac yajcan lac melben i yeʼtel (troñel) (Sal. 84:11; Pr. 27:11). Cabʌl bajcheʼ miʼ mejlel laj cʼʌn ti wen jiñi lac librejlel. Laʼ laj qʼuel jiñi ejemplo tsaʼ bʌ i cʌybeyonla Jesús.

8. Alʌ junchajp bajcheʼ tsiʼ cʼʌñʌ i librejlel Jesús.

⁸ Jesús ñaxan tiʼ sʌclʌbe i wenlel yambʌlob i joñonla miʼ mejlel lac lajin jaʼel. Ti jumpʼejl bʌ qʼuin, Jesús yicʼot i yapóstolob wen lujbob i tsaʼ majliyob baqui miʼ mejlel i cʼajob i yo. Pero maʼañic tsaʼ mejliyob ti cʼaj o, yonlel lac piʼʌlob tsaʼ cʼotiyob yaʼ baqui añob chaʼan miʼ ñʌchʼtʌbeñob i cʌntesa tac Jesús. Pero maʼañic tsaʼ michʼa, tsiʼ pʼuntayob i «cabʌl chuqui tsaʼ caji i cʌntesañob» (Mr. 6:30-34). Cheʼ mi lac lajin Jesús chaʼan mi laj cʼʌn lac pʼʌtʌlel yicʼot jiñi i yorajlel am bʌ lac chaʼan chaʼan mi laj coltan yambʌlob, mi la cʌqʼuen i ñuclel jiñi lac Tat am bʌ ti panchan (Mt. 5:14-16). Cheʼ  bajcheʼ jiñi, mi lac pʌsben chaʼan la com ochel tiʼ familia.

9. ¿Chuqui yom cʼajalob i chaʼan jiñi tatʌlob?

⁹ Jehová tsiʼ meleyonla chaʼan miʼ mejlel ti tilel la calobilob yicʼot tsiʼ yʌqʼueyonla ti lac wenta chaʼan mi laj cʌntesañob i cʼuxbin yicʼot i melbeñob i yeʼtel. Mi jatet an a walobilob, ¿muʼ ba a qʼuel ti ñuc jiñi ñuc bʌ a majtan? Anquese Jehová tsiʼ yʌqʼue i pʼʌtʌlel jiñi ángelob chaʼan miʼ melob chuqui ñuc tac bʌ, maʼañic tsiʼ meleyob chaʼan miʼ tilel i yalobilob. Jinmecu chaʼan, jiñi tatʌlob yom miʼ qʼuelob ti ñuc jiñi majtan. Tsaʼ aqʼuentiyob ili chʼujul bʌ eʼtel chaʼan miʼ juʼsʌbeñob i pusicʼal i yalobil cheʼ woliyob (choncolob) ti colel yicʼot chaʼan miʼ cʌntesañob ti lac Yum (Ef. 6:4; Dt. 6:5-7; Sal. 127:3). Chaʼan miʼ coltʌntelob, jiñi organización an i yʌcʼʌ cabʌl eʼtijib loqʼuem bʌ ti Biblia bajcheʼ jiñi jun tac, video tac, cʼay tac yicʼot jiñi an tac bʌ ti Internet. Tsiquil chaʼan jiñi lac Tat am bʌ ti panchan yicʼot jiñi i Yalobil miʼ wen cʼuxbin la calobilob (Lc. 18:15-17). Jehová miʼ mulan cheʼ jiñi tatʌlob miʼ ñopob tiʼ tojlel yicʼot miʼ chaʼleñob wersa i cʌntan jiñi i yalobilob. Jiñi tatʌlob cheʼ bʌ miʼ melob bajcheʼ jiñi, miʼ coltañob i yalobilob chaʼan miʼ mejlelob ti ochel tiʼ familia Jehová tiʼ pejtelel ora.

10, 11. ¿Chuqui ti wenlel miʼ mejlel ti tajtʌl cheʼ Jehová tsiʼ yʌcʼʌ i Yalobil?

¹⁰ Jehová tsiʼ yʌcʼʌ jiñi ñumen cʼuxbibil bʌ i yalobil chaʼan mi lac mejlel ti chaʼ ochel tiʼ familia. Cheʼ bajcheʼ tsaʼ laj qʼuele ti  párrafo 4, Adán yicʼot Eva tiʼ sʌtʌyob i yajñib tiʼ familia Jehová i cheʼʌch tsaʼ ujti tiʼ tojlel i yalobilob jaʼel (Ro. 5:12). Adán yicʼot Eva tsiʼ yilol ñusʌbeyob i tʼan Jehová, jin chaʼan tsaʼ chojquiyob loqʼuel tiʼ familia. ¿I chuqui mi caj i yujtel tiʼ tojlel i pʼolbalob? Chaʼan i cʼuxbiya, Jehová an chuqui tsiʼ mele chaʼan miʼ mejlel i yotsañob tiʼ familia jiñi muʼ bʌ i jacʼbeñob i tʼan. ¿Chuqui tsiʼ mele? Tsiʼ yʌcʼʌ i Yalobil (Jn. 3:16; Ro. 5:19). Ili ñuc bʌ majtañʌl tsiʼ yʌcʼʌ chaʼan Dios miʼ chʼʌm bajcheʼ i yalobil 144 mil xucʼul bʌ lac piʼʌlob (Ro. 8:15-17; Ap. 14:1).

¹¹ Cheʼ jaʼel, an yonlel lac piʼʌlob woli (yʌquel) bʌ i melob chuqui yom Dios yicʼot añob i pijtaya chaʼan miʼ yochelob tiʼ familia cheʼ bʌ miʼ yujtel jiñi mil jab (Sal. 25:14; Ro. 8:20, 21). Wʌle muqʼuix i pejcañob Jehová bajcheʼ i «Tat» come añobix i chaʼan jiñi pijtaya (Mt. 6:9). Cheʼ jaʼel, jiñi lac piʼʌlob muʼ bʌ caj i chʼojyelob mi caj i mejlel i cʌñob chuqui yom Jehová tiʼ tojlelob. Jiñi muʼ bʌ i jacʼbeñob i tʼan mi caj i mejlelob ti ochel tiʼ familia.

12. ¿Chuqui ti cʼajtiya mi caj la cʌqʼuen i jacʼbal?

¹² Cheʼ bajcheʼ tsaʼix laj qʼuele, Jehová cabʌl chuqui an i mele chaʼan miʼ yʌqʼuen i ñuclel jiñi lac piʼʌlob. Tsaʼix i yotsa tiʼ yalobilob jiñi yajcʌbiloʼ bʌ chaʼan miʼ majlelob ti panchan, i jiñi yonlel lac piʼʌlob tsaʼix i yʌqʼueyob i pijtaya chaʼan ti jiñi tsijiʼ bʌ Pañimil miʼ junyajl sujtelob tiʼ yalobil jaʼel (Ap. 7:9). ¿Chuqui miʼ mejlel lac mel chaʼan mi lac pʌs chaʼan la comʌch ochel tiʼ familia Jehová tiʼ pejtelel ora?

13. ¿Chuqui yom mi lac mel mi la com ochel tiʼ familia Jehová? (Marcos. 12:30).

¹³ Laʼ lac pʌsben laj cʼuxbiya Jehová cheʼ mi lac melben i yeʼtel tiʼ pejtelel lac pusicʼal (pejcan Marcos 12:30). Tiʼ pejtelel jiñi lac majtan am bʌ i yʌqʼueyonla Dios yicʼot i cʼuxbiya, tajol junchajp ñumen ñuc bʌ jiñʌch cheʼ miʼ mejlel lac chʼujutesan. Cheʼ mi lac jacʼben jiñi i mandar tac mi lac pʌsben chaʼan mucʼʌch laj cʼuxbin (1 Jn. 5:3). Junchajp jiñʌch tsaʼ bʌ i subeyonla Jesús chaʼan mi lac sutqʼuin ti xcʌntʼan yambʌlob yicʼot mi la cʌcʼob ti chʼʌmjaʼ (Mt. 28:19). Tiʼ subeyonla  jaʼel chaʼan yom mi laj cʼuxbin lac bʌ (Jn. 13:35). Jehová mi caj i chʼʌm tiʼ tejclum pejtelel muʼ bʌ i jacʼbeñob i tʼan (Sal. 15:1, 2).

14. ¿Bajcheʼ mi lac pʌs chaʼan mi laj cʼuxbin yambʌlob? (Mateo 9:36-38; Romanos 12:10).

¹⁴ Laʼ laj cʼuxbin yambʌlob. Jiñi cʼuxbiya jiñʌch ñumen ñuc bʌ i melbal Jehová (1 Jn. 4:8). Tsiʼ cʼuxbiyonla anquese maxto laj cʌñʌyic (1 Jn. 4:9, 10). Cheʼ bʌ mi laj cʼuxbin yambʌlob woli lac lajin (Ef. 5:1). Junchajp bajcheʼ ñumen wen mi lac pʌsben laj cʼuxbiya jiñi lac piʼʌlob jiñʌch cheʼ mi laj coltañob i cʌn Jehová cheʼ bʌ anto i yorajlel (pejcan Mateo 9:36-38). Cheʼ bajcheʼ iliyi, woli laj coltan chaʼan miʼ yochel tiʼ familia Dios ti talto bʌ qʼuin. Cheʼ bʌ an majqui miʼ chʼʌm jaʼ yomʌch mi lac bej cʼuxbin yicʼot mi laj qʼuel ti ñuc (1 Jn. 4:20, 21). Jumpʼejl ejemplo, cheʼ bʌ an chuqui mach weñic miʼ mel, mach yomic lecoj mi lac ñaʼtan tiʼ tojel i mach la cʌl chaʼan yilol jach i chaʼan tsiʼ mele o woli jach i bajñel sʌclan i wenlel. Laʼ lac chʌn qʼuel ti ñuc yicʼot laʼ lac ñaʼtan chaʼan ñumen ñuc bajcheʼonla (pejcan Romanos 12:10; Fil. 2:3).

15. ¿Majqui yom bʌ mi lac pʌsbeñob lac pʼuntaya yicʼot la cutslel?

¹⁵ Laʼ lac pʌsben lac pʼuntaya yicʼot la cutslel pejtelel lac piʼʌlob. Mi la com ochel tiʼ familia Dios tiʼ pejtelel ora, yom mi lac jacʼ cheʼ bajcheʼ miʼ yʌl jiñi Biblia. Jumpʼejl ejemplo, Jesús tsiʼ pʌsbeyonla chaʼan yom mi lac pʼuntan yicʼot mi lac pʌsben la cutslel pejtelel lac piʼʌlob, yicʼotto jiñi laj contrajob (Lc. 6:32-36). Tajol an qʼuiñil wocol mi la cubin chaʼan mi lac mel iliyi, mi cheʼʌch mi la cubin, yom mi laj cʌn lac lajin i pensar yicʼot i melbal Jesús. Cheʼ mi lac chaʼlen wersa lac jacʼben i tʼan Jehová yicʼot lac lajin Jesús, mi lac pʌsben jiñi lac Tat am bʌ ti panchan chaʼan la comʌch ochel tiʼ familia tiʼ pejtelel ora.

16. ¿Chuqui miʼ mejlel lac mel chaʼan mi laj cʌntan jiñi wem bʌ i melbal i familia Jehová?

¹⁶ Laʼ laj cʌntan jiñi wem bʌ i melbal i familia Jehová. Ti jumpʼejl familia ñʌmʌl ti qʼuelol chaʼan jiñi ijtsʼiñʌloʼ bʌ miʼ lajiñob jiñi ascuñʌloʼ bʌ. Mi jiñi ascuñʌlob miʼ chʼʌmob ti ñuc jiñi principio tac am bʌ ti Biblia, mi caj i yʌqʼueñob wem bʌ ejemplo jiñi ijtsʼiñʌloʼ bʌ. Pero mi tsiʼ meleyob mach bʌ weñic, tajol jiñi ijtsʼiñʌloʼ bʌ mi caj i tsajcañob jaʼel. Lʌcʼʌ lajal miʼ yujtel tiʼ familia Jehová jaʼel. Mi juntiquil xñoptʼan mach xucʼulic miʼ yajñel i mi tsajcan chaʼan bʌ apostasía, miʼ mel tsʼiʼlel yicʼot mach tac bʌ weñic, tajol jiñi yambʌlob mi caj i tsajcañob jaʼel. Muʼ bʌ i melob jiñi, miʼ bibʼesañob jiñi wem bʌ i melbalob i wiñicob Jehová (1 Ts. 4:3-8). Mach lac tsajcañob yicʼot mach la cʌcʼ chaʼan an chuqui miʼ ñajtʼesañonla tiʼ tojlel jiñi lac Tat am bʌ ti panchan.

17. ¿Chuqui mach bʌ yomic mi lac ñaʼtan, i chucoch?

¹⁷ Laʼ lac ñop ti Jehová i mach jiñic ti chubʌʼañʌl tac. Jehová miʼ subeñonla chaʼan mi mucʼʌch lac ñaxan sʌclan jiñi i Yumʌntel yicʼot mi lac jacʼben jiñi i mandar tac, mi caj i yʌqʼueñonla i bʌl lac ñʌcʼ, lac pislel yicʼot la cotot (Sal. 55:22; Mt. 6:33). Jin chaʼan, maʼañic mi lac ñaʼtan chaʼan jiñi chubʌʼañʌl tac mi caj i yʌqʼueñonla laj coltʌntel yicʼot lac tijicñʌyel. La cujil chaʼan muʼ bʌ caj i yʌqʼueñonla i sujm bʌ lac ñʌchʼtʌlel jiñʌch cheʼ mi lac mel chuqui miʼ mulan Jehová (Fil. 4:6, 7). I mi an lac taqʼuin chaʼan mi lac mʌn chuqui tac jach la com, laʼ lac ñaʼtan mi añixto i yorajlel yicʼot lac pʼʌtʌlel chaʼan mi laj cʼʌn yicʼot chaʼan mi laj cʌntan. Laʼ laj cʼajtiben lac bʌ: «¿Muʼ ba c wen cʼuxbin chuqui tac an c chaʼan?». Laʼ laj cʼajtesan chaʼan Jehová tsiʼ yʌqʼueyonla la queʼtel tiʼ familia. Jin chaʼan, maʼañic chuqui yom miʼ yʌn baqui an lac ñaʼtʌbal. Mach la comic sujtel bajcheʼ jiñi wiñic tiʼ yorajlel Jesús mach bʌ  añic tsiʼ jacʼʌ i melben i yeʼtel Jehová i ti wiʼil miʼ yochel bajcheʼ i yalobil. ¿I chucoch? Tiʼ caj mi wen cʼuxbin i chubʌʼan (Mr. 10:17-22).

18. ¿Chuqui ñuc bʌ majtañʌl yicʼot bendición tac mi caj i tajob jiñi xjacʼtʼañoʼ bʌ?

¹⁸ Jiñi lac piʼʌlob xjacʼtʼañoʼ bʌ mi caj i ñusañob i bʌ ti jiñi ñumen ñuc bʌ majtan: I cʼuxbintel yicʼot i chʼujutesʌntel Jehová tiʼ pejtelel ora. Jiñi añoʼ bʌ i pijtaya chaʼan miʼ chumtʌlob ila ti Lum mi caj i ñusañob i bʌ tiʼ cʌntʌntel jiñi utsʼatax bʌ Pañimil tsaʼ bʌ i mele Jehová chaʼan mi lac chumtʌl. Wocolix i yʌlʌ i Yumʌntel Dios, tsʼitaʼ jax yom chaʼan jiñi Pañimil yicʼot pejtelel chuqui an miʼ chaʼ sujtel bajcheʼ ti ñaxan. Jesús mi caj i jisan pejtelel jiñi wocol tsaʼ bʌ i yʌcʼʌ Adán yicʼot Eva cheʼ bʌ tsiʼ tʌtsʼʌyob i bʌ tiʼ familia Dios. Jehová mi caj i chʼojyesan yonlel lac piʼʌlob i mi caj i yʌcʼob ti chumtʌl ti Pañimil tiʼ pejtelel ora cheʼ bʌ sujtemix ti jumpʼejl paraíso i maʼañix mi caj i cʼamʼañob (Lc. 23:42, 43). Cheʼ bʌ jiñi i familia Jehová añoʼ bʌ ti Lum tojobix, jujuntiquil mi caj i pʌs jiñi «ñuclel» muʼ bʌ i yʌl jiñi Biblia (He. 2:7, TWT).

19. ¿Chuqui yom mi laj cʼajtesan?

¹⁹ Mi jatet ochemet ti jiñi yonlel wiñicob xʼixicob (quixtañujob), an utsʼatax bʌ a pijtaya. Dios miʼ cʼuxbiñet i yom chaʼan maʼ wochel tiʼ familia, jin chaʼan chaʼlen wersa chaʼan maʼ mel chuqui miʼ mulan. Ti jujumpʼejl qʼuin yom chʌn an ti a ñaʼtʌbal yicʼot ti a pusicʼal jiñi wʌn albil bʌ i chaʼan. Qʼuele ti ñuc cheʼ miʼ mejlel a chʼujutesan jiñi a Tat am bʌ ti panchan i ñaʼtan chaʼan mi caj a wʌqʼuen i ñuclel tiʼ pejtelel ora.