1. Jehovan rochlolea soglea vostuncher niall kortat tednam amchea monant kosle prosn ieunk puro?

DEVAN rochlolo ho vhodd vixv ami polloitat tednam amkam pasun Davida sarke prosn ieunk puro. Davidan, Jehovak magnneant mhunnttlem: “Mollob, Tujea hatanchem kam, hanv pollein zalear, tunvem thoim lail’lea chondra-noketrancher nodor ghalin zalear, monis konn ga, Tunvem tacho ugddas korcheak? Adanvacho put konn, Tunvem tachi porva korcheak?” (St. 8:3, 4) Davida bhaxen, Jehovan rochlolea vixva mukhar munis kainch nhoi oxem amkam disot. Tori astana, Jehova amchea dor-ekleacher dhean dita. Ami hea lekhant xiktolim ki Jehova Devan Adanv ani Evecher fokot dheanuch diunk na punn tankam aplea familicho bhag pasun kelo.

2. Adanv ani Even kitem kelolem Jehovak zai aslem?

² Jehova Devan Adanv ani Evek rochlolean to tancho Bapui zaun aslo. Ani tannem tancher axirvad ghalun oxem mhunnttlem: “Choddat ani vaddat, prithum bhorat ani tika tumchea hata khal dovrat.” (Ut. 1:28) Tor hea utram pormonnem, Adanv ani Even bhurgeank zolmak haddunk zai aslem. Ani tannim sogleamnim hea prithumecho samball korunk zai aslo. Tor Adanv, Eve ani tanchim soglim bhurgim Devachea utrak khaltim ravlolim zalear tim sodanch tachea familicho bhag zaun urta aslim.

3. Adanv ani Eve, Jehovachea familint valorachim aslim mhunn ami kiteak mhunnonk zata?

³ Poilea munxa vixim, Davidan, Stotr 8:5-ant oxem  mhunnttlem: “Tori astana Tunvem taka devdutam poros matso sokla dovorlai, mhoimecho ani tezacho mukutt tachea mathear ghalai.” Tor, Devan munxank devdutam poros ‘matxe sokol’ dovorleant. Hacho orth, tannem tankam devdutam itli podvi, bud’dhi, ani tank diunk na zalear pasun Adanv ani Evek ek borem jivit diun, munxam valorachim asat mhunn tannem dakhoilem.—St. 103:20.

4. Adanv ani Eve Devachea utrak khaltim naslim dekhun kitem zalem, ani hea lekhant ami kitem polloitolim?

 ⁴ Punn Adanv ani Eve, Devachea utrak khaltim ravonk nant. Taka lagon, tim Jehovachea familicho bhag zaun uronk nant. Ani ami fuddem polloitolim toxem, hacho porinnam tanchea bhurgeancher pasun poddlo. Punn Jehova Devan tachea bhurgeank soddun diunk nant. Tim aplea utrak khaltim ravtolim zalear to tankam portun aplea familint gheunk toiar asa. Tor hea lekhant, munis valoracho mhunn Jehovan koxem dakhoilem, amkam Jehovachea familicho bhag zaunk zai zalear ami kitem korunk zai, ani tachea familicho bhag zaun ravlolean amkam koslim besanvam mellttolim tem ami polloitolim.

5. Jehovan amkam aplea sarkim rochleant mhunn ami taka amchem upkariponn koxim dakhounk xoktat?

⁵ Jehovan munxank aplea sarkim rochleant. (Ut. 1:26, 27) Mhunnche, tannem amkam aple zaite gunn diun rochleant, zoxe mog, doia-moia, visvaxiponn ani promannikponn. (St. 86:15; 145:17) Tor osle gunn ami amchea bhitor vaddounk proitn kortat tednam ami Jehovak khuxal kortat, taka man haddttat ani tache upkari asat mhunn dakhoitat. (1 Ped. 1:14-16) Ani Jehovak manvota tem ami kortat tednam ami khuxal astolim ani Jehovak aplea familint zai toslim munxam ami zaunk pavtolim.

6. Jehova munxank valoracho mhunn lekhta hem tannem koxem dakhoilam?

⁶ Jehovan munxank hi prithum ek sobit ghor mhunn dilam. Munxank roch’chea poilim, Jehova Devan hi prithum rochli. (Job 38:4-6; Jer. 10:12) To doiall ani udar aslo dekhun tannem munxam pasot anik zaiteo vostu rochleo. (St. 104:14, 15, 24) Uprant, tannem rochlam tachea vixim chintunk tannem vell ghetlo ani ‘tem soglem borem’ asa mhunn tannem polloilem. (Ut. 1:10, 12, 31) Toxench, aplea soglea rochnnecher munxank ‘odhikar diun’ to tankam kitlo valoracho mhunn lekhta tem tannem dakhoilem. (St. 8:6) Ani munxamnim aplea rochnnecho samball korun sodanch khuxal ravlolem Jehovak zai aslem. Tor Jehovan hem soglem kel’lea pasot tumi taka sodanch upkar attoitat kai?

7. Joshua 24:15-a pormonnem, munxank borem-vaitt vinchun kaddpachi tank asa mhunn ami kiteak mhunnonk zata?

⁷ Jehovan munxank borem-vaitt vinchun kaddpachi tank dilea. (Joshua 24:15 vachat.) Ani hi tank uzar korun ami Jehovachi seva korunk vinchun kaddttat tednam to khub khuxal zata. (St. 84:11; Mho. 27:11) Toxench, ami hi tank anik zaite bore nirnnoi gheunk pasun uzar korunk zata. Hem ami koxem korunk zata tem zannam zaunk Jezuchem ek udharonn polloum-ia.

8. Jezun apleak asloli vinchun kaddchi tank koxi uzar keli, hachem ek udharonn diat.

⁸ Ek pavtti Jezu ani tache xis porgottnni korun khub thoklole ani visov gheunk lagon te eka eksurea zagear gele. Punn Jezu thaun xikonk sodhtale tea lokancho ek vhodd zomo thoim ailo. Tankam polloun Jezu ragar zaunk na. Punn taka tanche churchure disle  ani “sobar vostu To tankam xikounk laglo.” (Marku 6:30-34) Tor, Jezun visov gheunchea bodlek lokank Jehova vixim xikounk vinchun kaddlem. Jezuchi dekh gheun ami pasun amcho vell ani takot dusreank Jehova vixim xikounk uzar korunk zata. Ani oxem kortat tednam ami Jehovak mhoima diunk pavtat. (Mt. 5:14-16) Toxench, ami tachea familicho bhag zaun ravonk sodhtat mhunn dakhoitat.

9. Jehovan avoi-bapaink koslo vhodd sueog dila?

⁹ Jehova Devan munxank, bhurgeank zolmak haddpachi tank dilea. Toxench tannem avoi-bapaink, aplo mog ani seva korunk tanchea bhurgeank xikounchi zobabdari dilea. Ainzank veg-veglli tank asa khori, punn bhurgeank zolmak haddpachi tank Jehova Devan tankam diunk na. Tor avoi-bapaimno, Jehovan tumkam dil’lea hea sueogacho valor korat. Karonn tumchea bhurgeank ‘xistin ani bore dekhin Somiachi vatt’ xikounk Devan tumkam ek mhotvachi zobabdari dilea. (Ef. 6:4; D.S. 6:5-7; St. 127:3) Ani tumkam hem korunk modot zaunk, Jehova Devan aplea songottnne udexim zaitim Bible-acher adarit prokaxonam, viddeo, songit, ani website-icher mahiti pasun dilea. Khorench, Jehova ani Jezu tumchea bhurgeancho khub mog kortat. (Lukas 18:15-17) Tor, tumchea bhurgeank bore dekhin vaddounk tumi zata titlem kortat tednam Jehova khub khuxal zata. Ani tumchea bhurgeank Jehovachea familicho bhag zaunk tumi modot korunk pavtolim!

10-11. Jehovan aplea Putachem bolidan dilolean kitem zaunk pavlem?

¹⁰ Jehovan munxank portun aplea familicho bhag zaunk aplea ekleach Putak dila. Ami  peregraf 4-ant polloilem toxem, Adanv ani Eve zannam zaun Devachea utrak khaltim ravonk nant dekhun tannim Jehovachea familicho bhag zaun urchi sondhi sasnak hogddaili. (Rom. 5:12) Ani hea karonnak lagon tanchea bhurgeank pasun tea familicho bhag zaunk mellonk na. Punn Jehova Devak tanchea bhurgeancho mog aslo dekhun tankam portun aplea familicho bhag korunk tannem aplea Putachea bolidana udexim ek vatt toiar keli. (Juanv 3:16; Rom. 5:19) Ani Jezu Kristachea bolidanak lagon, Jehovak visvaxi ravtolea 1,44,000 munxank Jehova aple put mhunn manun gheta.—Rom. 8:15-17; Prok. 14:1.

¹¹ Itlench nhoi, Jezuchea soddvonnek lagon Jehovak visvaxi ravtolea lak’khamnim lokank fuddarak ho bhorvonso asa: Kristachea Hozar Vorsachea Razvottkechea xevottak te Jehovachea familicho bhag zatole. (St. 25:14; Rom. 8:20, 21) Ani hea bhorvonxeak lagon tim atanch thaun Jehova Devak aplo ‘Bap’ mhunn ulo kortat. (Mt. 6:9) Toxench, Jezuchea bolidanak lagon zaitim zannam punorjivont zatolim. Tankam Jehova vixim xikonk ek sondhi mellttoli ani tim Jehovak visvaxi ravtat zalear tankam tachea familicho bhag zaunk mellttolem.

12. Ami khoinchea prosnacho zobab polloitolim?

¹² Atam meren ami polloilem toxem, ami valorachim asat mhunn Jehovan zaitea vattamnim dakhoun dilam. Tannem obhixikt Kristanvank aple put mhunn manun ghetleat. Toxench, ‘vhodd urponjek’ to novea sonvsarant aplim bhurgim mhunn manun ghetolo. (Prok. 7:9) Tor prosn ieta, amkam Jehovachea familicho bhag zaunk zai zalear ami aiz kitem korunk zai?

13. Jehovachea familicho bhag zaunk ami kitem korunk zai? (Marku 12:30)

¹³ Soglea kallzan Jehovachi seva korun tumi tacho mog kortat mhunn dakhoiat. (Marku 12:30 vachat.) Jehova Devan amkam  zaitim dennim dileant. Tantuntlem sogleant vhoddlem dennem mhunnttlear, tannem amkam tachi bhokti korunk ek sondhi dilea. Ani ami ‘tacheo adnia pallttat’ tednam ami tacho mog kortat mhunn dakhoitat. (1 Juanv 5:3) Tantuntli ek adnea mhunnttlear, lokank xis korun bautizm divop. (Mt. 28:19) Toxench anik ek adnea mhunnttlear, eka-mekacho mog korop. (Juanv 13:35) Ani jim konn Jehovachea adneank pallo ditat tankam to sonvsarbhor aslolea aplea familicho bhag kortolo.—St. 15:1, 2.

14. Amkam eka-mekacho mog asa mhunn ami koxem dakhounk zata? (Matev 9:36-38; Romkarank 12:10)

¹⁴ Eka-mekacho mog korat. Ami Jehovak vollkhonaslim tednam pasun tannem amcho mog kelo. (1 Juanv 4:9, 10) Karonn mog tacho mukhel gunn zaun asa. (1 Juanv 4:8) Tor Jehovachi dekh gheun ami pasun eka-mekacho mog korunk zai. (Ef. 5:1) Hem korunk ek bori vatt mhunnttlear, hea sonvsaracho xevott ieunchea poilim ami zata titlea lokank Jehova vixim xikovop. (Matev 9:36-38 vachat.) Ami oxem kortat tednam, Jehovachea familicho bhag zaunk ami tankam ek sondhi ditat. Toxench, tannim vaddavoll korun bautizm ghetlea uprant pasun ami tankam mog dakhoit ravonk zai. (1 Juanv 4:20, 21) Hem ami koxem korunk zata? Chintat, ek bhav umkeach ritin kiteak vaglo tem amkam somzona. To toso vaglo mhunn ami tacher ragar zaunchea bodlek vo tachem chintop chukichem asa mhunn dubhavchea bodlek, taka valoracho mhunn lekhun to amchea poros vorto mhunn ami chintunk zai.—Romkarank 12:10 vachat; Filp. 2:3.

15. Ami konnank doia ani kaklut dakhounk zai?

¹⁵ Sogleank doia ani kaklut dakhoiat. Ami soglea lokank ani amchea dusmanank pasun doia ani kaklut dakhounk zai mhunn Jezun xikoilem. (Lukas 6:32-36) Punn oxem korop amkam thodde pavtti kotthin zaunk puro. Tori astana, ami Jezuchi dekh gheun Devachea utra pormonnem jieunk proitn korit ravtat tednam, amkam Jehovachea familicho bhag zaunk zai mhunn ami dakhoitat.

16. Jehovachea familichem nanv pidd’ddear zaina zaunk ami kitem korunk zai?

¹⁶ Jehovachea familichem nanv pidd’ddear zaunk dium nakat. Chintat, ghorant dog zann chedde asat. Vhoddlo cheddo Devachea totvam pormonnem jieta zalear, dhaktto cheddo tachea dekhin cholonk xokta. Punn vhoddlo cheddo vaitt kamam korta zalear dhaktto cheddo taka polloun apunnui vaitt kamam korunk xokta. Teach bhaxen, Jehovachea familint pasun zaunk xokta. Jehovak visvaxi aslolo ek bhav vo bhoinn dhorm-broxtt zata vo onoitik kamam vo vaitt kamam korunk lagta zalear, dusrim-i tanchea sarkim korunk xoktat. Ani oxem kelolean, Jehova lagim asloli apli ixttagot tim hogddaunk xoktat. Toxench, Jehovachea familichem nanv pidd’ddear zaunk xokta. (1 Tes. 4:3-8) Ani oxem zal’lem amkam kednanch naka.

17. Girestkaie vixim koslem chintop ami pois korunk zai, ani kiteak?

¹⁷ Girestkaiecher nhoi, punn Jehovacher visvas dovrat. Ami Jehovachem Raj poilea zagear dovortat ani tachea dorjeam pormonnem choltat zalear to amcheo sogleo gorzo purnn kortolo mhunn tannem amkam utor dilam. (St. 55:22; Mt. 6:33) Hea utracher ami patietat zalear, sonvsarachi girestkai amkam khuxalkai ani surokxa diunk xokta mhunn ami chintchim nant. Karonn khori khuxalkai ani xanti amkam Jehovachi seva kelearuch mellonk xokta. (Filp. 4:6, 7) Hea vixim chintat. Amchea lagim zaiteo vostu gheunk ghoddtta astolem. Punn teo vostu uzar korunk ani samballunk, amchea lagim  titlo vell ani takot asa kai? Karonn heo vostu gheunk ani samballunkuch ami vell sartat zalear Jehovachea kamant amchem dhean urchem na. Ani hea vostuncho amkam chodduch mog asa zalear, ami Jezun sanglolea tornnattea bhaxen zaunk xoktat. Taka Jehovachi seva korunk ani fuddarak tacho put zaunk ek sondhi asli. Punn aplea girestkaiecho taka chodd mog aslo dekhun to Jezucho pattlav korunk fatti sorlo. Tor amkam Jehovachea familicho bhag zaun uronk zai zalear, ami tachea seve thaun amchem dhean halonk diunchem nhoi.—Marku 10:17-22.

18. Jehovachea utrak khaltim ravtat tankam koslim besanvam mellttolim?

¹⁸ Jehovachea utrak khaltim ravtat tankam koslim besanvam mellttolim? Tim sasnak Jehovacho mog korunk ani tachi bhokti korunk pavtolim. Tim sobit bag zalolea prithumecho samball kortolim. Adanv ani Evek lagon zal’lem vaittponn fuddarak Jezu kaddun uddoitolo. Jehova lak’khamnim lokank punorjivont kortolo ani aplea vixim xikonk tankam ek sondhi ditolo. (Lukas 23:42, 43) Ani Jehovak visvaxi ravtat tim soglim poripurnn zatolim. Tednam tim khoreponnim Jehovachim bhurgim zaunk pavtolim. Ani Davidan sanglolea pormonnem, ‘mhoimecho ani tezacho mukutt’ tanchea mathear astolo.—St. 8:5.

19. Ami kitem korunk vavr korit ravum-ia?

¹⁹ Tumi ‘vhodd uponjecho’ bhag zaun asat zalear, him soglim besanvam melloun gheunk ani Jehovak manvota tem korunk vavr korit ravat. Jehova tumcho khub mog korta mhunn ugddas dovrat. Ani portun aplea familicho bhag zaun, sodankal apli bhokti korunk tannem tumkam dila tea sueogacho valor korat!