1. ¿Kasa jülüjaka waaʼin weirakaapa sümüin tü kasa nukumalakat Maleiwa?

WEʼRAPA tü kasa nukumalakat Maleiwa chaa iipünaa, eesü süpüla müin wanüiki maʼaka naaʼin David sünain maa: «Teirakaale sümüin tü kasa pukumajakat, maʼaka saaʼin tü aituʼukat, chi kashikai sümaa tü shüliwaikalüirua, ponusü maʼin taaʼin jülüjain paaʼin na wayuukana. Jaʼitainna wayuuin neʼe waya, aaʼinmajünüshii waya putuma» (Sal. 8:3, 4). Saʼakajee süpüshuaʼa tü kasa nukumalakat Maleiwa chaa iipünaa, eesü ponule waaʼin jülüjain waya naaʼin Maleiwa mayaainjeʼe wayuuin neʼe waya, maʼaka ponuin naaʼin David. Wekirajaajeerü anain nnojoliin neʼe nukumalain Jeʼwaa Adán sümaa Eva, napüshishii naya.

2. ¿Kasa keeʼireetüjütkalia naaʼin Jeʼwaa nüpüleerua Adán sümaa Eva?

² Na palajanakana wayuu nukumalain Jeʼwaa nia Adán sümaa Eva otta nüchonniishii naya. Keeʼireesü naaʼin Jeʼwaa kachoinjanain naya. Anuu nünüiki namüin: «Anakaja kachonniire jia, joulüiwa na juuʼuliwoʼukana sainküin mmakat süpüshua» (Gén. 1:28). Müleka naaʼinrüle Adán sümaa Eva tü nuchuntakat Jeʼwaa napüleerua, ayatüshiije naya nüpüshin Jeʼwaa.

3. ¿Jamüsü watüjaaka saaʼu kojutapuʼuin Adán sümaa Eva nutuma Jeʼwaa?

³ Nüchoinpuʼushii Jeʼwaa Adán sümaa Eva otta kojutupuʼushii naya nutuma. Anuu nünüiki David suluʼu Salmo 8:5 nachiki na wayuu nukumajakana Maleiwa: «Pukumajüin na wayuukana sünain meematüin nakuwaʼipa maʼaka naaʼin nakuwaʼipa na aapieekana otta kojutuleeshiʼiya naya putuma noulia sümaa anain maʼin naya poʼuluʼu». Nnojotsü wanaawain wakuwaʼipa namaa na aapieekana suluʼu pülain waya jee wainmain tü kasa watüjakalü apüleerua (Sal. 103:20). Mayaainjeʼe nnojoluin wanaawain  wakuwaʼipa namaa na aapieekana, anashaatasü maʼin nukuwaʼipa Adán sümaa Eva nutuma Jeʼwaa.

4. (1) ¿Kasa alataka nümüin Adán sümaa Eva sutuma nnojoliin noonooin nümaa Maleiwa? (2) ¿Kasa wekirajaajeetka anain sünain ekirajaayakat tüü?

 ⁴ Saaʼujee nnojoluin noonooin Adán sümaa Eva sümüin nünüiki Jeʼwaa nnojoliinnapa naya nüpüshin. Wekirajaweerü anain sünain ekirajaayakat tüü mojuin nakuwaʼipa na nooʼuliwoʼukana sünainjee tia naaʼinrakat. Ayateeria naaʼinrüin Jeʼwaa tü keeʼireetüjütkalia naaʼin napüleerua na wayuukana. Keeʼireesü naaʼin nüchoinjanain waneepia na oonookana sümaa nünüiki. Wekirajaajeerü anain palajana tü naaʼinrüitpakat Jeʼwaa süpüla kojutuin waya nutuma otta tü waaʼinrajatkat maaʼulu naʼakeere waya na nüpüshikana jee tü kasa anasü naapeetkat namüin na wayuukana yaa saaʼu mmaka.

5. ¿Kasa waaʼinrajatka süpüla kojutuin watuma Jeʼwaa?

⁵ Kojutushii waya nutuma Jeʼwaa süka nukumajüin waya maʼaka naaʼin (Gén. 1:26, 27). Süka müin wakuwaʼipa nutuma Jeʼwaa, eesü süpüla washatüin nukuwaʼipa. Eeshii süpüla aipüraliin waya wayuu, wamüliajüliin jee lotuin sukuwaʼipa tü kasa waaʼinrakat (Sal. 86:15; 145:17). Washatüle nukuwaʼipa Jeʼwaa, kojuteechi nia watuma jee kojuteerü wamüin tü naaʼinrakat wapüleerua (1 Ped. 1:14-16). Anale wakuwaʼipa nuʼupala chi Washi iipünaajachikai, talateena waya. Süka nukumajüin waya Jeʼwaa maʼaka naaʼin, eesü süpüla anain wakuwaʼipa maʼaka nücheküin shia napüleerua na nüpüshikana.

6. ¿Kasa naaʼinraka Jeʼwaa süpüla kojutuinjanain na wayuukana nutuma nukumajapa tü Mmakat?

⁶ Nukumajüin Jeʼwaa wapüla tü Mmakat sümaa anain maʼin shia. Kettaatüjülia nutuma Jeʼwaa tü Mmakat süpülapünaa nukumajüin chi palajachikai wayuu (Job 38:4-6; Jer. 10:12). Süka kapülain naaʼin wakuwaʼipa jee kamaneein nia, watta saalii kasa anasü naaʼinraka süpüla talatüinjanain waya saaʼu tü Mmakat (Sal. 104:14, 15, 24). Süchikijee kettaain nutuma Maleiwa süpüshuaʼa tü kasa nukumalakat, niʼrüin sünain anashaatain maʼin shia (Gén. 1:10, 12, 31). Kojutushii nutuma na wayuukana saaʼu laülaain naya nutuma saaʼu tü kasa nukumalakat yaa mmapaʼa (Sal. 8:6). Tü keeʼireekat naaʼin Jeʼwaa shia talatüinjanain na wayuukana sünain aaʼinmajaa tü kasa nukumalakat. Anasü maʼin waapawaire analuʼut nümüin Jeʼwaa saaʼu tü kasa naapakat wamüin.

7. ¿Jamüsü watüjaaka saaʼu eein süpüla waneeküin süka waaʼin wamüiwaʼa tü waaʼinreekat sünainjee tü sümakat Josué 24:15?

⁷ Nuuʼulaain waya Jeʼwaa waneeküin tü waaʼinreekalü amüin. Eesü süpüla waneeküin wamüiwaʼa tü wakuwaʼipainjatkat (paashajeʼera Josué 24:15). Talatüsü naaʼin Maleiwa waneeküle süka waaʼin wamüiwaʼa waʼyataain nümüin (Sal. 84:11; Prov. 27:11). Eesü waneirua kasa anaka süpüla waneeküin süka waaʼin wamüiwaʼa. Wekirajaa süchiki tü nüneekakat Jesuu süka naaʼin nümüiwaʼa.

8. Püküja wanee kasa nüneekaka Jesuu süka naaʼin nümüiwaʼa.

⁸ Eesü süpüla waneeküin kapülain waaʼin nakuwaʼipa na waneinnua maʼaka naaʼinrüin shia Jesuu. Soʼu wanee kaʼi, mapüsashi maʼin Jesuu otta na nikirajüinkana. Noʼunaka eemüin yüütüülin tü mmakat süpüla neemeraainjanain, nnojoliipejeʼe naya eemeraain süka wainmain wayuu eejanakana napüla ekirajüneeka. Mayaainjeʼe mapüsain maʼin Jesuu, nnojoishi nia jashichin namüin, nümüliajüin naya. Müshijeseʼe nikirajüin naya «sünain kasa wainma» (Mar. 6:30-34). Wanaa sümaa waaʼinrüin tü naaʼinrakat Jesuu süpüla wakaalinjain na waneinnua, kojuteechi watuma chi Washi iipünaajachikai (Mat. 5:14-16). Jee müsia jaʼyeerü waaʼu naʼakeein waya na nüpüshikana Jeʼwaa.

9. ¿Kasa jülüjainjatka naaʼin na kachonshiikana?

 ⁹ Eeshii süpüla kachonniin na wayuukana süka nukumajüin Jeʼwaa süpüla müinjatüin nakuwaʼipa. Nuluwataain naya Jeʼwaa süpüla nekirajüinjanain nachonnii otta süpüla alinjachin nia napüla sümaa naʼyataainjanain nümüin. Kachonle pia, ¿kojutusüche tia pümüin? Mayaainjeʼe wainmain tü kasa anasü naapakat Maleiwa namüin na aapieekana, nnojoishii nukumajüin naya süpüla kachoinjanain. Müsüjeseʼe kojutuinjatüin namüin na wayuu kachonniikana nepijüin nachonnii. Aluwataanüshii naya süpüla nekirajüin nachonnii «sünain tü nuluwataakat anain chi Maleiwakai» (Éf. 6:4; Deut. 6:5-7; Sal. 127:3). Süpüla nountuin tia, wainma kasa saapaka nupueulose Maleiwa namüin, maʼaka saaʼin karaloʼutairua, video, muusika jee pütchi suluʼuka Internet. Wayaawatüin sünainjee tia alin nüpüla Jeʼwaa otta Jesuu na tepichikana (Luc. 18:15-17). Talateechi Jeʼwaa namaa na wayuu kachonshiikana neʼitaale naaʼin nünain jee naaʼinmajüle na nachonniikana. Naaʼinrüle tia, nakaalinjeena nachonnii süpüla naʼakain na nüpüshikana Jeʼwaa süpüla kaʼikat süpüshuaʼa.

10, 11. ¿Kasa eeka nutuma Jeʼwaa saaʼujee outuin chi Nüchonkai?

¹⁰ Naapüin Jeʼwaa chi Nüchon aishikai maʼin nüpüla süpüla anajiraain waya nümaa jee nüpüshinjanain waya. Wekirajaaitpa anain suluʼu  pütchika 4 nnojoluin noonooin Adán sümaa Eva nümüin Jeʼwaa, nnojoliinnapaka nüpüshin naya Jeʼwaa. Akaataajaʼa neʼe nakuwaʼipa na nachonniikana (Roma 5:12). Süka nüneeküin süka naaʼin nümüiwaʼa Adán sümaa Eva nnojoliin noonooin nümaa Maleiwa, nnojoliinnapa anain naya süpüla naʼakain na nüpüshikana. ¿Jamakaʼa nakuwaʼipa na nüchonniikana? Nukumajüin Jeʼwaa wanee sukuwaʼipa süpüla nüneeküin noʼutku nüchonnii Adán sümaa Eva süpüla nüchoinjanain naya. Naaʼinrüin tia Jeʼwaa sükajee outuin Jesuu, chi Waneeshikaʼiya Nüchon (Juan 3:16, TNM; Roma 5:19). Saaʼujee outuin Jesuu, eeshii 144.000 wayuu waneepiakana nümaa Maleiwa nüneekaka süpüla nüchoinjanain (Roma 8:15-17; Alat. Map. 14:1).

¹¹ Eeshii watta naalii wayuu aaʼinrakana tü nuchuntakat Maleiwa otta naʼatapajüin naʼakainjanain na nüpüshikana süchikijee tü miitkat juya (Sal. 25:14; Roma 8:20, 21). Sükajee naʼatapajüin tia «Taata», müshii naya nümüin Jeʼwaa chi Kakumalakai naya (Mat. 6:9). Jee müshiʼiya na asoʼiraainjanakana aaʼin, ekirajüneena naya sünain tü nuluwataakalü anain Jeʼwaa. Nayasaʼa na oonookana nümaa, naʼakeena na nüpüshikana.

12. ¿Kasa wekirajaainjatka anain jooluʼu?

¹² Wekirajaaitpa anain wainmain kasa naaʼinraka Jeʼwaa sutuma kojutuin nutuma na wayuukana. Jamüshiijaʼa na wayuu nüneekakana süpüla chainjanain chaa iipünaa, nüchoinnapa naya jee na wayuu wattakana maʼin naalii aʼatapajüshii süpüla nüchoinjanain naya suluʼu tü mma jeketkat (Alat. Map. 7:9). ¿Kasa waaʼinrajatka sutuma naʼakeein waya na nüpüshikana Jeʼwaa? Wekirajaa sünain tia.

13. ¿Kasa waaʼinrajatka süpüla naʼakain waya na nüpüshikana Maleiwa? (Marcos 12:30).

¹³ Jaʼya waaʼu alin wapüla Jeʼwaa sükajee waʼyataain nümüin süka süpüshuaʼa waaʼin (paashajeʼera Marcos 12:30). Tü alanaʼaleekat maʼin sünain anain saʼakajee tü kasa anasü naapakat Maleiwa wamüin shia eein süpüla waʼwaajüin nia. Shiimainre alin wapüla Maleiwa waaʼinreerü «tü nuluwataakat anain waya» (1 Juan 5:3). Wanee kasa nuluwataaka anain waya Jeʼwaa shia waaʼinrüinjatüin tü nümakat Jesuu süchiki wekirajüinjanain na wayuukana jee wakaalinjainjanain naya süpüla woutiisain naya (Mat. 28:19). Jee wane kasa waaʼinrajatka naashin Jesuu shia aijiraainjanain waya  (Juan 13:35). Nüneekeena Jeʼwaa na wayuu oonookana waneepia nümaa süpüla naʼakain na aʼwaajakana nia sainküinpünaa tü mmakat (Sal. 15:1, 2).

14. ¿Kasa waaʼinrajatka aire wapüla na waneinnua? (Mateo 9:36-38; Roma 12:10).

¹⁴ Alinjana wapüla na waneinnua. Tü aliikalü apüla wayuu shia tü nukuwaʼipa Jeʼwaa jaʼyakat maʼin nünain (1 Juan 4:8). Aitüjüliʼiya waya nüpüla Jeʼwaa nnojoliiwaʼaya weʼraajüin nia (1 Juan 4:9, 10, TNM). Washatüin nukuwaʼipa Jeʼwaa aire wapüla na waneinnua (Éf. 5:1). Wanee kasa waaʼinrajatka aire wapüla na wayuukana shia wekirajüle naya süpüla neʼraajüin nukuwaʼipa Jeʼwaa süpülapünaa süntüin sükalia süpüla sajaʼlajaain tü kasakalüirua (paashajeʼera Mateo 9:36-38). Waaʼinrüle tia, wakaalinjeena naya süpüla naʼakainjanain na nüpüshikana Maleiwa. Süchikijee woutiisain naya, ayatüinjana alin naya wapüla jee kojutuinjana naya wamüin (1 Juan 4:20, 21). Jamüshiijaʼa waya, nnojoliinjana walirajamaatüin naya naainjale wanee kasa nnojotka anain saaʼin wamüin. Shia anaka aluʼu kojutule naya wamüin jee nnojorüle yaletüin wakuwaʼipa noʼupala (paashajeʼera Roma 12:10; Filip. 2:3).

15. ¿Jaralii wamüliajüinjanaka jee kamaneeinjanaka amüin waya?

¹⁵ Wamüliaja jee kamanee waya sümüin wayuu süpüshuaʼa. Müleka naʼakeere waya na nüpüshikana Jeʼwaa, waaʼinrüinjatü tü sümakat tü Bibliakat. Jamüshijaʼa Jesuu, nüküjain wamüliajüliinjanain jee kamaneeinjanain waya sümüin wayuu süpüshuaʼa, jaʼitakajeʼe namüin na waʼünüükana (Luc. 6:32-36). Eepejeʼe süpüla kapüleein wamüin waaʼinrüin tia. Müsüjeseʼe choʼujaain washatüinjatüin nukuwaʼipa Jesuu. Wanaa sümaa wachajaain sukuwaʼipa süpüla woonooin sümaa nünüiki Jeʼwaa jee washatüin nukuwaʼipa Jesuu, jaʼyasü waaʼu naʼakeein waya na nüpüshikana Jeʼwaa.

16. ¿Kasa waaʼinrajatka suulia mojuin pütchi nachiki na aʼwaajakana Jeʼwaa?

¹⁶ Eeja waaʼin suulia mojuin pütchi süchiki nüpüshi Jeʼwaa. Wanee jintüi nüshatüin nukuwaʼipa chi nipayakai. Müleka naaʼinrüle tü sümakat tü Bibliakat chi nipayakai, nüshateerü chi nimüliakai tü nukuwaʼipakat nüchiirua. Shiasaʼa joo naaʼinrüle chi epayaakai kasa mojusü, nüshateerü tiayaa nüchiirua. Meematsia tü alatakat suluʼu nupueulose Jeʼwaa. Jamüshijaʼa nuuʼulaale wanee wawala suulia anoujaa süpüla nikirajüin alawaa süchiki tü Bibliakat jee niʼyarülajüle nukuwaʼipa, eesüjaʼa süpüla nashatüin na waneinnua tü nukuwaʼipakat. Naaʼinrüle tia wanee wawala, mojeerü pütchi nachiki na aʼwaajakana Jeʼwaa (1 Tes. 4:3-8). Nnojo wanaawain waaʼin namaa na aaʼinrakana kasa mojusü jee nnojo wakayalaain nuulia chi Washi iipünaajachikai.

17. (1) ¿Kasa nnojotka anain süpüla jülüjain waaʼin? (2) ¿Jamüsü mojuka jülüjale waaʼin tia?

¹⁷ Weʼitaa waaʼin nünain Jeʼwaa suulia weʼitaain waaʼin sünain washirüü. Nüküjain wamüin Jeʼwaa naapeerüin tü kasa choʼujaakat wamüin waaʼinmaale tü waʼyataainkat nümüin jee waaʼinrüle tü nümakat (Sal. 55:22; Mat. 6:33, TNM). Sutuma tia, nnojoleerü jülüjain waaʼin shiain tü washirüükat talatüinjatka atuma naaʼin wanee wayuu jee anainjatka atuma nukuwaʼipa. Watüjaa aaʼu shiain talateerüin atuma waaʼin waaʼinrüle tü nüchekakat Jeʼwaa (Filip. 4:6, 7). Müleka eere wamaʼana nneerü süpüla wayaʼlajüin wanee kasa, anasü jülüjale waaʼin palajana jalouijeerüle shia wamüin jee süsetaajeerüle kaʼi wapüla süpüla waaʼinmajüin shia. Anasü wasakirüle waaʼin sünain tüü: «¿Shiache waaʼinmaaka kamaʼanaa kasa?». Jülüjainjatü waaʼin naapüin wamüin Maleiwa wanee aʼyatawaa suluʼu nupueulose süpüla waaʼinmaainjatüin shia. Müsüjeseʼe nnojoluinjatüin waaʼinmaain wanee kasa naata suulia. Nnojotkalaka washateein nukuwaʼipa chi jimaʼai washitkai ayoutaka niʼyataain  nümüin Jeʼwaa jee ayoutaka nüchooin nia saaʼujee kachiiruain naaʼin washirüü (Mar. 10:17-22).

18. (1) ¿Kasa alanaʼaleejeetka sünain anain maʼin natuma na waneepiakana nümaa Maleiwa? (2) ¿Kasa neʼreetka süpüla kaʼikat süpüshuaʼa?

¹⁸ Na oonookana waneepia nümaa Maleiwa, aijeechi nia napüla jee naʼwaajeechi nia süpüla kaʼikat süpüshuaʼa, tia shia tü alanaʼaleekat maʼin sünain anain. Na yaainjanakana kepiain mmapaʼa talateena naya sünain aaʼinmajaa tü Mma nukumajakat Maleiwa napüla. Alüʼütsü maʼin süpüla anainjatüin maʼin tü Mmakat süchikuaʼa nuluwataapa Maleiwa saaʼu. Najaʼttireerü Jesuu süpüshuaʼa tü kasa mojusü eekat sünainjee nuuʼulaain Adán sümaa Eva naʼakain naya nüpüshi Maleiwa. Nüsoʼireʼereerü naaʼin Jeʼwaa watta naalii wayuu otta eesü süpüla katüin noʼu nutuma sümaa anain naya paʼaraiisüpa tü Mmakat (Luc. 23:42, 43, TNM). Lotopa maʼin nakuwaʼipa na nüpüshi Jeʼwaa yaakana mmapaʼa, kojuteena maʼin naya nutuma jee aneena maʼin naya noʼuluʼu maʼaka nüküjain David (Salmo 8:5).

19. ¿Kasa jülüjainjatka waaʼin waneepia?

¹⁹ Naʼakale waya na wayuu wattakana naalii, eʼreena waya kasa anasü nutuma Maleiwa. Aishii waya nüpüla jee keeʼireesü naaʼin naʼakain waya na nüpüshikana. Wachajaa sukuwaʼipa süpüla talatüinjachin Jeʼwaa watuma. Jülüja maʼin waaʼin waneepia tü kasa anasü naapüinjatkat Maleiwa wamüin jee kojuta wamüin eein süpüla waʼwaajüin chi Washi iipünaajachikai maaʼulu yaa jee süpüla kaʼikat süpüshuaʼa.