MWAZI G’OKUYIGA 30
Osimiswe n’Enafasi Yawe omu Mulala gwa Yehova
“Wamujirire w’eshishi bugeke ku bamayika wanamuyambisa echishema ch’obukuze n’obwinja.”—ZB. 8:5, mahugulo m’eshishi.
OLWIMPO 123 Kutii Utaratibu wa Kitheokrasi kwa Ushikamanifu
OKU BUGEKE *
1. Bibazo bihe byakarhuyinja omu bwenge amango rhwamawaza ku byoshi Yehova alemaga?
AMANGO rhwamakengera oku bi Yehova alemaga byoshi, rhwachiyunva kuguma n’omwandisi we zaburi Daudi, wabazaga Yehova ntya omu sala: “Amango nambona embingu zawe, akasi k’emidoke yawe, omwezi n’enyenyezi walemaga, omuntu onafa, ali nde mp’omuyibuke, n’omwana w’omuntu mpu omushishikale?” (Zb. 8:3, 4) Kuguma na Daudi, rhwakalola hantu hageke rhulamire omu mahanga moshi, rhwanava rhwasomezwa n’okuntu Yehova akarhuyibuka. Aliko nk’okurhwabona, Yehova arhashishikalaga konyine abantu ba burhanzi, k’okuderha Adamu na Eva, s’ahubwe abajira baguma b’omu mulala gwage.
2. Bichi Yehova alilonzeze Adamu na Eva bajire?
2 Adamu na Eva b’abaliri bana ba Yehova b’oburhanzi oku gulu na Yehova aliri Eshe wabo w’obuzigire. Alilonzeze oyola mulume na mukage bakole omu mulala gwage. Mungu ababwira ntya: “Muburhe mube banene, muyunjuze egulu n’okulirhambula.” (Mwa. 1:28) Alilonzeze baburhe abana, bashishikale n’egulu. Nka bakengaga n’okujira ebi Mungu abahemere, Adamu na Eva n’oluburho lwabo, bakagenderere kuba omu mulala gwa Mungu esiku n’amango.
3. Bulagurhe rhwakaderha oku Adamu na Eva baligwerhe enafasi y’akamaro bwenene omu mulala gwa Yehova?
3 Adamu na Eva baligwerhe enafasi y’akachiro omu mulala gwa Yehova. Nk’oku biyerekenwe omu Zaburi 8:5 n’omu mahugulo m’eshishi, Daudi aliderhere ntya oku bilolere omuntu Yehova alemere: “Wamujirire w’eshishi bugeke ku bamalayika wanamuyambisa echishema ch’obukuze n’obwinja.” Kweri, abantu barhahabwaga emisi, obwenge n’obuhashe buli kuguma n’obwa bamalayika. (Zb. 103:20) S’aliko, omuntu “ali w’eshishi bugeke” konyine kw’abola bamalayika bagwerhe misi minene. Echola chisomeze! Amango Yehova alemaga abazere berhu b’oburhanzi, alibahere akalamo kakwirire bwenene orhankalola!
4. Bichi byahikiraga Adamu na Eva omu kurhakenga kwabo Yehova, na bichi rhwaganirako mu gunola mwazi?
4 Ech’okugayisa, kuli kubona oku Adamu na Eva barhakengaga Yehova, bachibwa omu mulala gwage. Echola chalerhera oluburho lwabo bibazo binene, nk’oku rhwabona mu gunola mwazi. Aliko omuhigo gwa Yehova gurhaza kuhindamuka. Alonzeze abantu banamukenga babe bana bage esiku n’amango. Rhurhangage rhuganire nka gurhe Yehova arhuyerekere oku rhuli b’akamaro embere zage. Rhwashuba kushambala bichi rhwakajira zene akaba rhulonzeze kuba baguma b’omu mulala gwa Mungu. Buzinda, rhwaganira oku migisho abana ba Yehova nji basiimira esiku n’amango.
OKUNTU YEHOVA AKOLEERE ABANTU N’OLUKENGO
Mu njira nchi Yehova arhuyerekere olukengo? (Olole echifungo cha 5-11) *
5. Nka gurhe rhwakayereka Mungu olukengo bulala arhulemere oku shusho lyage?
5 Yehova arhuyerekere olukengo omu kurhulema oku shusho lyage. (Mwa. 1:26, 27) Bulala rhwalemerwe oku shusho lya Mungu, rhwakagala kugwarha n’okuyerekana zinene omu ngeso zage zinja, nk’obuzigire, obonjo, obwimana n’okunali. (Zb. 86:15; 145:17) Amango rhwamayerekana engeso zili nk’ezola, rhwanakengesa Yehova n’okumuyereka oku rhumugwerhe kw’eshukurani. (1 Pe. 1:14-16) Amango rhwamayereka Darha w’embingu engeso zisimisize, rhwanagwarha obusime. N’amango rhulemwa oku shusho lyage, Yehova arhuha obuhashe b’okuba bantu alonzeze omu mulala gwage.
6. Nka gurhe Yehova akoleraga abantu n’olukengo amango alemaga egulu?
6 Yehova arhurheganyize ahantu henja bwenene h’okulama. Embere aleme omuntu murhanzi, Yehova abaga arheganyize egulu mira y’abantu balamamo. (Yob. 38:4-6; Yer. 10:12) Bulala ali muntu mwinja onahana, Yehova alemere bintu binene yi birhusimisa. (Zb. 104:14, 15, 24) Mango maguma, Yehova arhola akasanzi k’okuwaza oku bintu abaga alemere, “anabona oku bili binja.” (Mwa. 1:10, 12, 31) Yehova aliyerekere abantu obukenge omu kubaha “oburhambo” oku bilemwa byage byoshi oku gulu. (Zb. 8:6) Mungu alonzeze abantu boshi bashinganene basiimire akasi k’okushishikala ebilemwa byage binja esiku n’amango. K’onazigana kubwira Yehova koko kw’echola chilagane chinja bwenene?
7. Nka gurhe olwandiko lwa Yoshua 24:15 luyerekene okw’abantu bajira obuhuru b’okuchishoga?
7 Yehova arhuhere oluhembo l’obuhuru b’okuchishoga ebi rhulonzeze. Rhwakachishoga okuntu rhwakolesa akalamo kerhu. (Osome Yoshua 24:15.) Mungu werhu w’obuzigire anayunva asimire amango rhwamachishoga kumukolera. (Zb. 84:11; Mez. 27:11) Rhwakakolesa obuhuru bwerhu b’okuchishoga mu njira zinene. Rhushambalage oku mufano Yesu arhulekeraga.
8. Mu njira nchi Yesu alikoleseze obuhuru bwage b’okuchishoga? Lerha omufano
8 Rhwakayiga omufano gwa Yesu omu kuchishoga kuhira enyungu z’abandi oku nafasi y’oburhanzi. Lusiku luguma amango Yesu n’entumwa zage baliluhire bwenene, bagana ahantu harhulerere yibahumuka. Aliko, barhahumukaga. Echigusho ch’abantu chabashigana, banaligwerhe enyorha Yesu abayigirize. Aliko Yesu arhalubaga. S’ahubwe, abayunvira obonjo. Gurhe Yesu ajirire? “Ahwanza kubayigiriza bintu binene.” (Mk. 6:30-34) Amango rhwamayiganya Yesu omu kuhaana ebisanzi n’emisi yerhu yirhurhabala abandi, rhwanalerhera Darha w’embingu obukuze. (Mt. 5:14-16) Kandi, rhwanayereka Yehova oku rhulonzeze kuba baguma b’omu mulala gwage.
9. Luhembo luhe lw’akamaro bwenene Yehova ahere abantu?
9 Yehova ahere abantu obuhashe b’okuburha abana, n’akasi k’okubayigiriza bamuzigire banamukolere. Akaba oli muzere, k’ogwerhe eshukurani k’olola luhembo lw’akamaro bwenene? Chiro akaba oku Yehova ahere bamalayika buhashe bunene busomeze, arhabahaga obuhashe b’okuburha abana. Akaba oli muzere, wakasiimira olola lukengo ogwerhe l’okulemba abana. Yehova ahere abazere akasi k’akamaro k’okulemba abana babo “omu nyigirizo n’obukomerezi bwa Yehova.” (Efe. 6:4; Kum. 6:5-7; Zb. 127:3) Omu kurhabala abazere, olubaga lwa Yehova lwakulire ebikoleso biyumangiire oku Biblia, nk’ebitabu, amavideo, emiziki, n’eyindi myazi oku Enternete. Kweri, Darha w’embingu n’Omugala, bombi banasima abana berhu bachili badorho. (Lu. 18:15-17) Amango abazere bamalangalira Yehova, n’okujira okwabo koshi bagalire omu kushishikala abana babo bazigirwa, banasimisa Yehova. Abazere bali nk’abola, banaha abana babo obulangalire b’okuba bantu b’omu mulala gwa Yehova esiku n’amango!
10-11. Bichi Yehova ajirire birhugalikire kugerera enchungu?
10 Yehova ahanire Omugala muzigirwa yi rhushuba kuba baguma b’omu mulala gwage. Nk’oku rhwabonaga omu chifungo cha 4, amango Adamu na Eva bajira echaha, bachibwa omu mulala gwa Yehova n’abana babo bakaburhire. (Ro. 5:12) Adamu na Eva bonyine bachishogaga okurhakenga Yehova. Bobola balikwanene bachibwe m’ogola mulala. Gurhe si oku bilolere abana babo? Bulala Yehova anazigira abantu, ajirire bigalikane y’abana babo bamukengere bashube bagaluke m’ogola mulala. Ajirire ntyo kugerera enchungu y’Omugala w’echinege, Yesu Kristu. (Yoh. 3:16; Ro. 5:19) Kugerera enchungu ya Yesu, Mungu ajirire bantu 144 000 bimana babe bana bage.—Ro. 8:15-17; Ufu. 14:1.
11 Kandi, amamiliyoni m’abandi bimana, balibajira oku bukenge obulonza bwa Mungu. Bagwerhe obulangalire b’okuba omu mulala gwa Mungu enyuma w’echigeregezo ch’obuzinda oku buzinda b’oburhegesi bwa myaka 1 000. (Zb. 25:14; Ro. 8:20, 21) Bulala bagwerhe obola bulangalire, banahamagala Yehova, omulemi wabo “Darha.” (Mt. 6:9) Balala nji bafuka nabo nji bahaabwa akasanzi k’okuyiga ebi Yehova alonzeze bakole. Balala nji bachishoga kukenga obwerekezi bwage, nji bahikira kuba nabo baguma b’omu mulala gwage.
12. Chibazo chihe rhukala shubizako?
12 Nk’oku rhwabwene, Yehova akolere bintu binene biyerekene okw’ahere abantu olukengo. Ajirire abashigwa babe bana bage, anahere balala “b’echigusho chinene” obulangalire b’okuba bana bage omu gulu lihyahya. (Ufu. 7:9) Bichi rhwakajira zene yi rhuyereka Yehova oku rhulonzeze kuba baguma b’omu mulala gwage esiku n’amango?
OYEREKE YEHOVA OK’OLONZEZE KUBA MUGUMA W’OMU MULALA GWAGE
13. Bichi rhwakajira yi rhuba baguma b’omu mulala gwa Mungu? (Marko 12:30)
13 Oyereke Yehova oku omuzigiire omu kumukolera n’omurhima gwawe goshi. (Osome Marko 12:30.) Omu bintu byoshi binene Yehova arhuhere oku buzigire, nkabaga luhembo luguma lw’akamaro mw’ezola mpembo zoshi, luli luhembo l’obuhashe rhugwerhe b’okumuharamya. Rhunayereka Yehova oku rhumuzigiire omu ‘kukenga amarhegeko mage.’ (1 Yo. 5:3) Rhegeko liguma omu marhegeko Yehova asimire rhukenge, lili lilala Yesu arhuhaga ly’okujira abanafunzi n’okubabatiza. (Mt. 28:19) Kandi, arhuhere erhegeko ly’okuzigirana buli muguma n’owindi. (Yoh. 13:35) Yehova nji ayegereza balala boshi bakenga amarhegeko mage babere omu mulala gw’abamuharamya omu gulu lyoshi.—Zb. 15:1, 2.
14. Nka gurhe rhwakazigira abandi? (Matayo 9:36-38; Waroma 12:10)
14 Ozigire abandi. Engeso nkulu bwenene ya Yehova buli buzigire. (1 Yo. 4:8) Yehova alirhuyerekere obuzigire bwage embere rhumumenye. (1 Yo. 4:9, 10) Rhunamuyiganya amango rhwamazigira abandi. (Efe. 5:1) Nguma omu njira zinja rhwakayerekamo abandi oku rhubazigire, kuli kubarhabala bamenye Yehova akasanzi kachiliho. (Osome Matayo 9:36-38.) Amango rhwamajira ntyo, rhwanabarhabala bamenye bichi bakajira yibaba baguma b’omu mulala gwa Mungu. Amango omuntu amamala kubatizwa, rhukwanene rhugenderere kumuzigira n’okumukenga. (1 Yo. 4:20, 21) Nka gurhe rhwakajira ntyo? Omufano, kuli kumuyereka oku rhuchizerere okw’agwerhe empanvu nyinja erhumire ajira ntyo. Kandi, akaba rhurhayunvirhe bulagurhe ajiraga chintu chilebe, rhurhakawaza oku ajiraga ntyo bulala anachisima yenyine. S’ahubwe, rhukwanene kuyereka mwene-werhu olukengo n’okumubona okw’arhulushire.—Osome Waroma 12:10; Flp. 2:3.
15. Bantu bahe rhukwanene kuyunvira obonjo n’okubakolera oku bwinja?
15 Rhuyunvire abantu boshi obonjo rhunabakolere oku bwinja. Akaba rhulonzeze kuba baguma b’omu mulala gwa Yehova esiku n’amango, rhukwanene kukolesa Echinwa chage Ebiblia omu kalamo kerhu. Omufano, Yesu arhuyigirizaga oku rhukwanene rhuyunvire abantu boshi obonjo n’okubakolera oku bwinja chiro n’okubashombanyi berhu. (Lu. 6:32-36) Mango maguma rhwakabona oku okujira ntyo bikomere. Akaba ntyo kubili, rhukwanene kuyiga enkengero n’ebijiro bya Yesu. Amango rhwamajira okwerhu koshi yi rhukenga Yehova n’okuyiganya Yesu, rhwanayereka Darha w’embingu oku rhulonzeze kuba baguma b’omu mulala gwage esiku n’amango.
16. Nka gurhe rhwakalanga ezino ly’omulala gwa Yehova?
16 Rhugenderere kulanga ezino ly’omulala gwa Yehova. Omu mulala nya mulala, omwana mudorho w’oburhabana anazigana kuyiganya mukulu wage. Amango omukulu amakolesa amakanuni me Biblia omu kalamo kage, anayereka mudorho wage omufano gwinja. Amango omukulu amahwanza kukola ebintu bibi, omudorho naye akamuyiganya. Intyo kubinali n’omu mulala gwa Yehova. Nk’Omukristu waliri mwimana amaba chigamba ch’obwemere changwa amajira ebintu by’obubaraga changwa ebindi bintu bibi, abandi nabo bakamuyiganya omu kukola ebintu bibi. Abanajira ntyo, banazingisa ezino ly’omulala gw’abanaharamya Yehova. (1 Te. 4:3-8) Rhurhakwanene kuyiganya emifano mibi changwa kuleka echintu choshi-choshi chirhuhenule ku Darha w’obuzigire w’embingu.
17. Mawazo machi rhukwanene kulekana namo na bula gurhe?
17 Olangalire Yehova ahali h’okulangalira ebintu by’omubiri. Yehova arhulaganyize oku rhukahira Obwami bwage oku nafasi y’oburhanzi omu kalamo kerhu n’okukulikiza amakanuni mage m’okunali, arhuha ebilyo, emyambaro n’ah’okulama. (Zb. 55:22; Mt. 6:33) Amango rhwamayibuka ntyo, rhurhawaza okw’ebintu by’omubiri by’elila gulu byakarhulerhera obubegere n’obusime b’okugenderera. Rhumenyere oku chintu chiguma chakarhulerhera omurhula g’okuli, kuli kujira obulonza bwa Yehova. (Flp. 4:6, 7) Chiro akaba rhwakaba rhugwerhe obuhashe b’okugula bintu binene, rhukwanene rhurhange rhukengere akaba kweri rhugwerhe akasanzi n’emisi y’okukolesa n’okushishikala ebyola bintu. Ka rhuchishwekere bwenene oku bintu byerhu? Rhukwanene rhuyibuke oku Mungu anihire rhukole akasi arhuhere omu mulala gwage. K’okuderha oku rhurhakwanene kuchileka rhuhugiswe. Rhurhashondere kuba chiro n’akatyu nk’olala musole w’omuchire walisimire ebirugu byage n’echola charhuma alahira kukulikira Yesu. Bobola aheza orozo l’okukolera Yehova n’ol’okujirwa muguma omu bana bage!—Mk. 10:17-22.
BICHI ABANA BA YEHOVA NJI BAGWARHA ESIKU N’AMANGO?
18. Lukengo luhe lunene na migisho michi abantu banakenga Mungu nji basiimira esiku n’amango?
18 Abantu bagwerhe obukenge, nji bagwarha olukengo lunene kulusha byoshi, k’okuderha okuzigira n’okuharamya Yehova esiku n’amango! Balala bagwerhe obulangalire b’okulama oku gulu nji bashuba kugwarha omwishingo g’okushishikala egulu lyerhu linja Yehova arhulemeraga mpu yirhulamako. Hanola hofi-hofi, Obwami bwa Mungu bwajira egulu na buli chintu choshi chiliko bishube bibe bihyahya. Yesu nj’amala ebibazo byoshi byalerhwaga n’okuntu Adamu na Eva bachishogaga okurhenga omu mulala gwa Mungu. Yehova nj’afula amamiliyoni m’abantu n’okubaha orozo l’okugwarha akalamo k’esiku n’amango eyi banagwerhe amagala mashinganyanya omu gulu nji lyahindamulwa kuba Paradizo. (Lu. 23:42, 43) Ok’omulala gwa Yehova g’oku gulu guligwayegera obushinganyanya, buli muguma mubo nj’ayerekana “obukuze n’obwinja” nk’oku Daudi ayandikaga.—Zb. 8:5.
19. Bichi rhukwanene kugenderera kuyibuka?
19 Akaba oli omu bantu “b’echigusho chinene,” ogwerhe obulangalire bwinja bwenene. Mungu akuzigire; analonzeze obe muguma w’omu mulala gwage. Che chirhumire, ojire okwawe koshi y’omusimisa. Ngasi lusiku ogenderere kubika ebilagane bya Mungu omu bwenge n’omu murhima gwawe. Ochisiimire olukengo ogwerhe l’okuba omu bantu banaharamya Darha muzigirwa w’embingu, onasiimire obulangalire ogwerhe b’okumuharamya esiku n’amango!
OLWIMPO 107 Mungu—Kielelezo cha Upendo
^ mus. 5 Y’omulala gugwarha obusime, buli muguma akwanene amenye bichi akakola y’arhabala abandi omu mulala. Omulume ogwerhe obuzigire akwanene ayumangire bwinja, omukazi naye akwanene amurhabale, n’abana bagwerhe obukenge bakwanene bakole omu buguma haguma n’abazere babo. Intyo kubinali omu mulala gwa Yehova. Mungu werhu arhugwerhere ewazo likwirire, na rhukalama nk’oku omuhigo gwage guli, rhwaba baguma b’omu mulala gwage esiku n’amango.
^ mus. 55 AMAFASIRIYO M’EFOTO: Amango Yehova alemaga abantu, alibahere obuhashe b’okuyiga engeso zage. Omulume n’omukazi bali bayiganya engeso za Mungu omu kuyerekana obuzigire n’okuyunvirana obonjo buli muguma n’owindi n’okuyereka ezola ngeso oku bagala babo. Oyola mulume n’omukazi bazigire Yehova. Banali bayerekana okubabwene ok’oluhembo l’okugwarha abana luli lw’akamaro omu kuyigiriza bagala babo bazigire n’okukolera Yehova. Abazere balibakolesa evideo omu kubafasiriya bulagurhe Yehova ahaanaga Yesu nka nchungu. Balibashuba kubayigiriza oku omu Paradizo yayinjire nji rhwashishikala egulu n’enyama esiku n’amango.
