1. Iehova ese ia havaraia gaudia ibounai ita laloa neganai dahaka henanadai ita laloa?

IEHOVA ese ia havaraia gaudia ibounai ita laloa neganai, reana iseda hemami be salamo torea tauna Davida ena hegeregerena, inai bamona ia henanadai: “Guba ai, emu imana amo oi karaia gaudia lau itaia neganai, hua bona hisiu danu lau itaia neganai, taunimanima be dahaka bona oi ese ia oi laloa noho? Bona taunimanima ena natuna be dahaka bona oi ese ia oi naria?” (Sal. 8:3, 4) Davida hegeregerena, Iehova ese ia havaraia gaudia hegeregere hisiu ita laloa neganai, ita be maragi momokani to Ia ese ita ia laloa noho. Danu do ita itaia, Iehova ese Adamu bona Heva ia laloa bada bona ena ruma bese ai ia halaodia.

2. Iehova ena ura Adamu bona Heva totona be dahaka?

² Adamu bona Heva be Iehova ena tanobada natuna ginigunadia bona ia be edia lalokau Tamana. Dirava ia ura idia ruaosi be gaukara do idia karaia. Idia ia hamaoroa: “Natudia umui havaraia bona do umui momo herea bona tanobada umui hahonua bona umui biagua.” (Gen. 1:28) Idia be natudia do idia havaraia bona tanobada do idia naria. Bema Adamu bona Heva be Iehova ena ura idia badinaia, idia bona edia natudia be Dirava ena ruma bese lalonai idia noho hanaihanai.

3. Dahaka dainai ita gwau diba Iehova ese Adamu bona Heva ia karaia dalana be hoa gauna?

³ Iehova ese ena ruma bese lalonai, Adamu bona Heva dekenai dagi namona ia henia. Salamo 8:5 ai, Davida be Iehova ese taunimanima ia karaia ia herevalaia, ia gwau: “Oi ese ia oi karaia bona aneru edia goada ese ena goada ia hereaia,  bona ia dekenai hairai bona hemataurai oi henia.” Momokani, Iehova ese taunimanima dekenai aneru ese idia abia siahu, aonega bona diba bada ia henia lasi. (Sal. 103:20) To, Iehova ese taunimanima dekenai hairai bona hemataurai ia henia. Unai be hoa gauna! Iehova ese iseda tama sina ginigunadia ia karaia neganai mauri namona ia henidia.

4. Adamu bona Heva be Iehova idia kamonai henia lasi dainai dahaka ia vara, bona inai atikol ai dahaka do ita herevalaia?

 ⁴ To, Adamu bona Heva be Iehova idia kamonai henia lasi dainai, iena ruma bese amo ia kokia. Unai dainai edia bese dekenai hekwakwanai momo idia havaraia, bona inai atikol ai unai do ita herevalaia. To Iehova be ena ura ia haidaua lasi, ia ura ia idia kamonai henia taudia be iena natudia ai do ia halaodia hanaihanai. Iehova ese ita ia laloa bada dalana mani ita herevalaia guna. Bena, Dirava ena ruma bese ai ita lao dalana do ita herevalaia. Bona, Iehova ese ena tanobada natudia dekenai do ia henia hahenamo idauidau do ita herevalaia.

5. Iehova ese ita be iena toana hegeregerena ia karaia dainai, edena dala ai ia ita hanamoa diba?

⁵ Iehova ese ita dekenai hemataurai ia henia, badina iena toana hegeregerena ita ia karaia. (Gen. 1:26, 27) Unai dainai ita be iena kara namodia ita hahedinaraia diba, hegeregere lalokau, hebogahisi, badinaia karana bona kara maoromaoro. (Sal. 86:15; 145:17) Unai kara namodia ita karaia neganai ita hahedinaraia Iehova ita hanamoa. (1 Pet. 1:14-16) Iseda kara amo eda guba Tamana ita hamoalea neganai, ita danu ita moale. Iehova ese ita dekenai iena kara namodia ia atoa dainai, ita be iena ruma bese taudia ai ita lao diba.

6. Iehova ese tanobada ia hegaegaelaia neganai, edena dala ai taunimanima ia laloa?

⁶ Iehova be ita totona noho gabuna namona ia hegaegaelaia. Adamu ia do karaia lasi neganai, Iehova ese taunimanima totona tanobada ia hegaegaelaia. (Iobu 38:4-6; Ier. 10:12) Iehova be hebogahisi bona harihari bada Diravana dainai, ia ese do ita moalelaia gau namodia momo ia havaraia. (Sal. 104:14, 15, 24) Dirava ia itaia ia karaia gaudia ibounai be “namo herea.” (Gen. 1:10, 12, 31) Bona taunimanima dekenai maduna ia henia ia havaraia gau namodia ibounai do idia “biagua” totona. (Sal. 8:6) Dirava ia ura goevadae taudia ese mai moale ida ia havaraia gau namodia do idia naria ela bona hanaihanai. Unai gwauhamata namona dainai hanaihanai Iehova oi tanikiu henia, a?

7. Edena dala ai Iosua 24:15 ia hahedinaraia taunimanima be mai edia ura kwalimu?

⁷ Iehova ese ita dekenai ura kwalimu ia henia. Iseda mauri lalonai, ita ura karaia gaudia ita abia hidi diba. (Iosua 24:15 duahia.) Abia hidi ita karaia iseda lalokau Diravana ita tomadiho henia neganai ia moale. (Sal. 84:11; Aon. 27:11) Iseda ura kwalimu ita gaukaralaia diba disisen namodia ita karaia totona. Mani Iesu ena haheitalai ita laloa.

8. Edena dala ta ai Iesu ese ena ura kwalimu ia gaukaralaia?

⁸ Iesu ena haheitalai ita tohotohoa neganai abia hidi ita karaia diba, ita sibona lasi to ma haida edia namo do ita atoa guna. Nega ta Iesu bona ena aposetolo taudia be idia hesiku bada, bona regerege lasi gabuna ta dekenai idia lao idia laga-ani totona. To, idia laga-ani lasi badina hutuma idia mai bona idia ura Iesu ese idia do ia hadibaia. Vadaeni, Iesu be dahaka ia karaia? “Idia dekenai gau momo ia hadibaia matamaia.” (Mar. 6:30-34) Iesu ita  tohotohoa bona iseda nega bona goada ita gaukaralaia ma haida ita durua neganai, iseda guba Tamana ita hanamoa unai. (Mat. 5:14-16) Bona ita hahedinaraia ita ura Iehova ena ruma bese lalonai ita noho.

9. Iehova ese tama sina dekenai dahaka harihari gauna ia henia?

⁹ Iehova ese taunimanima dekenai natudia havaraia siahuna ia henia. Danu, maduna ia henidia edia natudia idia hadibaia Ia idia lalokau henia bona hesiai henia totona. Bema oi be tama eiava sina ta, unai harihari gauna hereadaena oi moalelaia, a? Ena be Iehova ese aneru dekenai siahu ia henia gau namodia momo idia karaia totona, to idia dekenai natuna havaraia siahuna ia henia lasi. Unai dainai, bema oi be tama eiava sina, natuna naria ena hahenamo oi laloa bada be namo. Dirava ese tama sina dekenai maduna ia henia edia natudia be ‘Iehova ena matahakani bona sisiba amo idia hadibaia totona.’ (Efe. 6:4; Deu. 6:5-7; Sal. 127:3) Tama sina durua totona Dirava ena orea ese Baibel ia herevalaia pablikeisen, vidio, miusiki, bona websait ai idia noho atikol ia halasidia. Unai ese ia hahedinaraia, iseda guba Tamana bona iena Natuna ese natudia idia lalokau henia. (Luka 18:15-17) Tama sina be Iehova dekenai idia tabekau bona idia gaukara goada edia natudia idia naria neganai Iehova ia moale. Danu, unai bamona tama sina ese edia natudia idia durua Iehova ena ruma bese lalonai idia noho hanaihanai totona!

10-11. Mauri davalaia boubouna dainai Iehova be ita totona dahaka ia karaia?

¹⁰ Iehova ese iena Natuna lalokauna ia bouboulaia, unai amo ita be iena ruma bese lalonai ita noho lou diba.  Paragraf 4 dekenai ita herevalaia bamona, Adamu bona Heva idia kara dika neganai, idia bona edia natudia be Dirava ena ruma bese lalonai idia noho diba lasi. (Roma 5:12) Adamu bona Heva be mai ura ida Dirava idia kamonai henia lasi dainai, iena ruma bese amo ia kokidia. To edia natudia be edena bamona? Iehova be taunimanima ia lalokau henia dainai, dala ia kehoa iena ruma bese lalonai idia noho totona. Oibe, iena Natuna, Iesu Keriso, ena boubou gauna amo unai dala ia kehoa. (Ioa. 3:16; Roma 5:19) Iesu ena boubou gauna dainai, Iehova ese abidadama taudia 144,000 be iena natuna ai ia halaodia.​—Roma 8:15-17; Apok. 14:1.

¹¹ Danu, abidadama taudia milioni momo be Dirava ena ura idia karaia noho. Edia helaro be lagani 1,000 ena dokonai do ia vara hahetoho ginigabena murinai Dirava ena ruma bese lalonai do idia lao. (Sal. 25:14; Roma 8:20, 21) Unai idia laloa dainai, idia ese edia Havaraia Tauna, Iehova, idia gwauraia “Tamana.” (Mat. 6:9) Danu, do idia toreisi lou taudia be Iehova ena ura do idia dibaia. Bona Iehova ena hakaua dalana idia badinaia taudia be iena ruma bese ai do idia lao danu.

12. Dahaka henanadai do ita haerelaia?

¹² Iehova ese taunimanima totona gau namodia momo ia karaia. Ia ese horoa taudia be iena natudia ai ia halaoa vadaeni, bona “hutuma bada” dekenai helaro ia henia tanobada matamatana ai iena natudia ai idia lao totona. (Apok. 7:9) Hari, dahaka ita karaia diba Iehova ena ruma bese lalonai ita noho hanaihanai totona?

13. Dahaka ita karaia diba Dirava ena ruma bese lalonai ita noho totona? (Mareko 12:30)

¹³ Mai kudouna ibounai ida Iehova oi hesiai henia karana amo oi hahedinaraia ia oi lalokau henia. (Mareko 12:30 duahia.) Dirava ese ita dekenai harihari gaudia momo ia henia. Unai harihari gauna hereadaena ta be, Iehova ita  tomadiho henia diba. Iehova ena “taravatu ita badinaia” karana amo ita hahedinaraia ia ita lalokau henia. (1 Ioa. 5:3) Iehova ia ura do ita badinaia taravatu ta be, Iesu ese ia henia hahegani, hahediba taudia halaoa gaukarana do ita karaia. (Mat. 28:19) Danu, Iesu ia gwau ta ta do ita lalokau henia. (Ioa. 13:35) Iehova ese iena taravatu idia badinaia taudia be iena ruma bese lalonai ia abidia dae.​—Sal. 15:1, 2.

14. Edena dala ai ma haida dekenai lalokau ita hahedinaraia diba? (Mataio 9:36-38; Roma 12:10)

¹⁴ Ma haida lalokau henia. Lalokau be Iehova ena kara badana. (1 Ioa. 4:8) Iehova ita do diba lasi neganai, ita ia lalokau henia guna. (1 Ioa. 4:9, 10) Ma haida ita lalokau henia neganai, Ia ita tohotohoa. (Efe. 5:1) Unai ita karaia dalana ta be, nega ia do noho lalonai taunimanima ita durua Iehova idia dibaia totona. (Mataio 9:36-38 duahia.) Unai ita karaia neganai, Dirava ena ruma bese lalonai idia noho dalana do idia dibaia. Ta ia bapatiso murinai, namona be ita lalokau henia bona matauraia noho. (1 Ioa. 4:20, 21) Edena bamona unai ita karaia diba? Namona be ita abia dae ia be mai ena kara namodia. Hegeregere, bema ia karaia karana ta ita lalopararalaia lasi, namo lasi ita laloa ia be sibona ia laloa bada tauna. To, do ita matauraia bona ita hahedinaraia ia ese ita ia hereaia.​—Roma 12:10 duahia; Fili. 2:3.

15. Daidia dekenai hebogahisi bona kara namodia do ita hahedinaraia?

¹⁵ Hebogahisi bona kara namodia ita hahedinaraia. Bema ita ura Iehova ena ruma bese lalonai ita noho hanaihanai, namona be Baibel ena hereva ita badinaia. Hegeregere, Iesu ese ita ia hadibaia namona be taunimanima ibounai dekenai, hebogahisi bona kara namodia ita hahedinaraia, iseda inai taudia dekenai danu. (Luka 6:32-36) To, nega haida unai ita karaia be auka. Unai dainai, namona be Iesu ena lalohadai bona kara ita tohotohoa. Bema ita gaukara goada Iehova ita kamonai henia bona Iesu ita tohotohoa, ita hahedinaraia ita ura iseda guba Tamana ena ruma bese lalonai ita noho hanaihanai.

16. Edena dala ai Iehova ena ruma bese ita gimaia diba?

¹⁶ Iehova ena ruma bese gimaia. Ruma bese ta lalonai, mero maragina be ena kakana ena kara ia tohotohoa. Bema kakana be ena mauri lalonai Baibel ena hakaua herevadia ia badinaia, ia ese ena tadina dekenai haheitalai namona ia hahedinaraia. Bema kakana be kara dikadia ia karaia, iena tadina be iena kara do ia tohotohoa danu. Iehova ena ruma bese lalonai unai ia vara danu. Bema abidadama Keristani tauna ta be gabeai aposteit tauna ta ai ia lao, eiava matabodaga karana, o dala kererena ta ia badinaia, unai ese ma haida ia veria diba ia idia tohotohoa totona. Unai bamona taudia ese Iehova ena ruma bese taudia edia ladana idia hadikaia. (1 Tes. 4:3-8) Namona be haheitalai dikadia ita tohotohoa lasi bona gau ta ese iseda hetura karana iseda guba Tamana ida ia hadikaia lasi.

17. Dahaka lalohadai do ita dadaraia, bona dahaka dainai?

¹⁷ Iehova oi abidadama henia, to kohu lasi. Iehova ia gwauhamata ita dekenai aniani, dabua, bona noho gabuna do ia henia, bema Iena Basileia ita tahua guna bona ena kara maoromaoro taravatudia ita badinaia. (Sal. 55:22; Mat. 6:33) Unai gwauhamata ita abidadama henia neganai, do ita laloa lasi inai tanobada ena kohu be ita do ia gimaia bona hamoalea. Ita diba maino korikorina ita abia dalana tamona be, Iehova ena ura do ita karaia. (Fili. 4:6, 7) Ena be kohu momo ita hoia diba, to namona be do  ita laloa: Ita be mai iseda nega bona goada unai gaudia ita gaukaralaia bona naria totona, a? Eiava iseda kohu ita ura henia bada, a? Namona be ita laloatao, Dirava be ena ruma bese lalonai ita dekenai gaukara ia henia. Bona unai ita laloa bada be namo. Ita ura lasi Baibel ese ia sivarailaia tauna ena kara ita tohotohoa. Ia be iena kohu ia ura henia bada dainai, Iesu ena murinai ia raka lasi, bona Iehova hesiai henia karana bona ena natuna ta ai do ia halaoa ena hahenamo ia haboioa!​—Mar. 10:17-22.

18. Iehova idia badinaia taudia be dahaka hahenamo do idia moalelaia hanaihanai?

¹⁸ Iehova idia badinaia taudia ese ia do idia lalokau henia bona tomadiho henia ela bona hanaihanai! Danu tanobada helarona idia abia taudia be mai moale ida Iehova ese idia totona ia hegaegaelaia tanobada do idia naria. Kahirakahira, Dirava ena Basileia ese tanobada bona ia lalonai idia noho gaudia ibounai do ia hamatamataia lou. Adamu bona Heva be Dirava ena ruma bese idia rakatania dainai, idia vara hekwakwanai ibounai be Iesu ese do ia hanamoa lou. Iehova ese mase taudia milioni momo do ia hatorea isi lou, bona tanobada paradaisona ai mauri goevadaena do idia moalelaia. (Luka 23:42, 43) Iehova idia tomadiho henia taudia do idia goevadae neganai, idia ta ta ese Davida ia torea herevana, “hairai bona hemataurai” do idia abia.​—Sal. 8:5.

19. Dahaka ita laloatao be namo?

¹⁹ Bema oi be “hutuma bada” tauna ta, oi be mai emu helaro namona. Dirava ese oi ia lalokau henia, bona ia ura oi be iena ruma bese tauna ta ai oi lao. Unai dainai oi gaukara goada Ia oi hamoalea totona. Namona be dina ta ta ai, Dirava ena gwauhamata namodia oi laloatao. Bona iseda guba Tamana oi tomadiho henia bona hanamoa ela bona hanaihanai ena hahenamo oi laloa bada!