1. Eṱe mape ya atu kara nomapuriro yeṋe indu tji matu ripurire koviṋa avihe Jehova mbya mema?

INDU tji matu ripurire koviṋa Jehova mbya mema, mape ya atu kara noumune otja omutjange wEpsalme David, ngwa pura ku Jehova mongumbiro kutja, “Tji me tara kevaverwa Ove ndi wa ungura, na komueze na kozonyose nḓu wa twa poṋa pazo, hapo omundu omukwatjike kutja u mu zemburuka, ingwi omuatje womundu kutja u rikendera ye?” (Eps. 8:3, 4) Tjimuna David, eṱe mape ya atu rimunu okuhina onḓengu indu tji matu risasaneke nozonyose Jehova nḓa mema. Nu okutjiwa kutja Jehova u rikendera ku eṱe mape ya atji tu kumisa. Posi yokutja, matu katara komuano Jehova mee rikendere kovandu ovatenga ooAdam na Eva, nomuano mbwe ve vatera okurira orupa rweṱunḓu re.

2. Jehova wa ri nondando iṋe kovanatje ve ovatenga ooAdam na Eva?

² Adam na Eva va ri ovanatje va Jehova ovatenga kombanda yehi, nu Jehova wa ri Ihe wawo worusuvero womeyuru. Eye wa yandja oviungura kovakupasane mba. Mukuru wa tja: “Kwatasaneye, takavareye nu mu urise ehi, noro ngari kare kehi yeṋu.” (Gen. 1:28) Eye aa vanga kutja ve kare novanatje nu ve tjevere ehi. Andakuzu va puratena nu ave tjiti oviṋa otja Mukuru pa ningira, ooAdam na Eva nozondekurona zawo atjave rira ouṋepo weṱunḓu ra Mukuru nga aruhe.

3. Ongwaye tji matu tja Jehova wa yandja ondjingonekero yapeke kooAdam na Eva otjorupa rweṱunḓu re?

³ Jehova wa yandja ondjingonekero yapeke kooAdam na Eva otjorupa rweṱunḓu re. MEpsalme 8:5, David wa hungira ohunga nomuano Jehova ma uta omundu nu wa tja: “Ove we mu uta owokehi yovaengeli kaṱiṱi, we mu hareka nondatero nondjozikiro.” Otjiperi kutja Jehova kayandjere omasa nounongo kovandu tjimuna yovaengeli. (Eps. 103:20) Nungwari, eye  we ve ungura ‘kehi kaṱiṱi’ povaengeli ovanamasa. Tjiri iho otjiyorokise. Indu Jehova tja mema ovanene vetu ovatenga, eye we ve pa ehupo ewa.

4. Hapo kwa tjitwa tjike ku Adam na Eva mena rokutja kave puratenene ku Jehova, nu matu kahungirira ku ye morupa ndwi?

 ⁴ Ouhumandu, Adam na Eva kava ri orupa rweṱunḓu ra Jehova rukwao mena rokuhina onḓuviro ku ye. Iho tja yeta omauzeu omengi kozondekurona zawo, otja tji matu katara kombunda morupa ndwi. Posi yokutja, ondando ya Mukuru kai ya runduruka. Eye u vanga kutja ovandu mbe nonḓuviro ve rire orupa rweṱunḓu re nga aruhe. Rutenga, matu kahungirira komuano Jehova me tu raisira kutja oweṱe ovananḓengu ku ye. Okuzambo, matu katara koviṋa mbi matu yenene okutjita nai okuraisa kutja matu vanga okurira orupa rweṱunḓu ra Mukuru. Korusenina, matu kahungirira kozondaya ovanatje va Jehova nḓu mave kayorokera kombanda yehi nga aruhe.   

5. Matu raisa vi ondangi ku Mukuru mena rokutumema novikaṋena tjimuna ovye?

⁵ Jehova we tu yozika mokutuungura novikaṋena tjimuna ovye. (Gen. 1:26, 27) Mena rokutja twa ungurwa kosaneno ya Mukuru, eṱe matu yenene okuraisa ovikaṋena oviwa tjimuna orusuvero, otjari, ouṱakame nousemba. (Eps. 86:15; 145:17) Indu tji matu raisa ovikaṋena otja imbyo, matu yandja ohiviro ku Jehova na tu raisa kutja tu nondangi ku ye. (1 Petr. 1:14-16) Eṱe matu kara nondjoroka, indu tji matu ritjindi momuano mbu tjata ku Tate wetu womeyuru. Mena rokutja Jehova we tu ungura kosaneno ye, eṱe matu yenene okurira ovandu vongaro Jehova ndje vanga meṱunḓu re.

6. Omomuano uṋe Jehova ma yozika ovandu indu tja ungura ehi?

⁶ Jehova we tu rongerisira omaturiro omawa. Ngunda Jehova e hi ya mema omundu omutenga, eye wa rongerisa ehi kovandu. (Job 38:4-6; Jer. 10:12) Mena rokutja u notjari nouharupu, Jehova we tu pa oviṋa oviwa kutja tu kare nondjoroka. (Eps. 104:14, 15, 24) Nu povikando tjiva, eye aa nongonona oviṋa avihe mbya ungura na munu kutja “oviwa tjinene.” (Gen. 1:10, 12, 31) Jehova wa raisa kutja ovandu ovananḓengu mokuvezika kutja ve ‘honaparere po’ oviṋa avihe mbya uta kombanda yehi. (Eps. 8:6) Mukuru u vanga kutja ovandu ohomonena ve kare nondjoroka yokuṱakamisa oviutwa vye oviwa nga aruhe. Hapo ove u raisa ondangi komakwizikiro wa Jehova omawa ngo?

7. Omomuano uṋe Josua 24:15 mu ri raisa kutja omundu u nouyara wokuritoororera omuini?

⁷ Jehova we tu pa otjiyandjewa tjokuritoororera oveni. Eṱe matu yenene okutoorora omuhunga mbu matu vanga okutoora mehupo. (Lesa Josua 24:15.) Indu tji twa toorora okukarera Mukuru, eye u kara nondjoroka. (Eps. 84:11; Omiano 27:11) Matu yenene okuungurisa ouyara wetu wokuritoororera oveni okutjita ozondando zarwe ozombwa. Ripura nomuano umwe Jesus ma ungurisa ouyara we.

8. Yandja otjihorera tjomuano Jesus ma ungurisa ouyara we wokuritoororera omuini.

⁸ Eṱe matu yenene okuhorera ku Jesus mokutwa po ozonḓero za varwe komeho wa inḓa ozetu oveni. Otjikando tjimwe Jesus novaapostele ve va urirwe tjinene, owo va ya poruveze paave munu kutja mave kasuva. Posi yokutja, owo kave yenenene okukasuva. Otjimbumba tjovandu tje ya pu va ri nu aatji vanga okuhongwa i Jesus. Posi yokutja Jesus ka pindikire. Moruveze rwanao, eye we ve  ṱira ondjenda. Hapo Jesus wa tjita vi? Eye wa “uta okuvehonga oviṋa ovingi.” (Mar. 6:30-34) Indu tji matu horere ku Jesus mokuungurisa oruveze nomasa wetu okuvatera varwe, iho matji yandja ohiviro ku Tate wetu womeyuru. (Mat. 5:14-16) Nu wina matji raisa kutja tu vanga okurira orupa rweṱunḓu re.

9. Otjiyandjewa tjiṋe tjapeke Jehova tja yandja kovandu?

⁹ Jehova wa mema ovandu kutja ve yenene okukara novanatje, nu we ve pa omerizirira wokuhonga ovanatje vawo okumusuvera nokumukarera. Indu tji u novanatje, hapo u nondangi kotjiyandjewa tjapeke ho? Nandarire kutja ovaengeli va serwa ondaya tjinene i Jehova, eye ke ve pere otjiyandjewa tjokukara novanatje. Kunao, indu tji u ri omunene kara nondangi kondjingonekero yoye ndjo yokukurisa ovanatje. Ovanene va pewa omerizirira omananḓengu wokukurisa ovanatje ‘mokuvevyura nokuveronga otja Muhona pe vanga.’ (Ef. 6:4; Deut. 6:5-7; Eps. 127:3) Otjira tja Jehova tji yandja oviṋa mbya zikamena kOmbeibela, tjimuna omambo, ouvidio, omizumbi noviṋa vyarwe mbi ri korungovi rwetu okuvatera ovanene. Oukahu kutja, Tate wetu womeyuru nOmuna we va suvera omitanda. (Luk. 18:15-17) Jehova u kara nohange indu tji ma munu ovanene tji mave riyameke ku ye mokukurisa ovanatje vawo. Nu ovanene otja imbo ve vatera ovanatje vawo okurira orupa rweṱunḓu ra Jehova nga aruhe.

10-11. Otjikeṋa Jehova tje tu tjitira okupitira motjisuta tjonguturiro?

¹⁰ Jehova wa yandja Omuna we omusuverwa kokutja tu rire orupa rweṱunḓu re rukwao. Otja tji pa tamunwa  moparagrafa 4, Adam na Eva va tjita ouvi nu iho tja tjita kutja owo novanatje vawo ve pandjare ondjingonekero yokurira orupa rweṱunḓu ra Jehova. (Rom. 5:12) Adam na Eva va toorora okuhina okupuratena ku Mukuru, kunao owo va pandjara ondjingonekero yawo yokurira eṱunḓu ra Jehova. Nu hapo tjike novanatje vawo? Mena rokutja Jehova wa suvera ovandu, eye wa yenena okutjita kutja ovanatje va Adam na Eva ve yakurwe otjorupa rweṱunḓu re. Eye wa tjita nao okupitira mombunguhiro yOmuna we omukwatwaerike, Jesus Kristus. (Joh. 3:16; Rom. 5:19) Okupitira mombunguhiro ya Jesus, Jehova wa yenena okuyakura ovandu 144 000 ovaṱakame otjovanatje ve.—Rom. 8:15-17; Omavan. 14:1.

¹¹ Ovandu varwe omayovi omengi wina ve tjita ombango ya Mukuru. Nowo ve nomaundjiro wokukarira orupa rweṱunḓu ra Mukuru kombunda yozombura 1 000. (Eps. 25:14; Rom. 8:20, 21) Mena rokutja ve nomaundjiro ngo, owo nai ve isana Jehova Omuute wawo otja “Tate.” (Mat. 6:9) Imba mbu mave kapendurwa wina mave kamuna ouyara wokukerihonga imbi Jehova mbye undjira ko ku wo. Imba mba puratene komirari vye mave karira orupa rweṱunḓu re wina.

12. Matu kazira epuriro riṋe nai?

¹² Otja tji twa munu, Jehova wa tjita oviṋa ovingi okuturaisira kutja oweṱe ovananḓengu ku ye. Eye wa yakura ovatwirisiwa otja ovanatje ve nu imba ‘wotjimbumba otjinene,’ eye we ve pa omaundjiro wokurira ovanatje ve mouye oupe. (Omavan. 7:9) Ovikwaye mbi matu yenene okutjita nai okuraisira Jehova kutja matu vanga okurira orupa rweṱunḓu re nga aruhe?

13. Matu yenene okutjita ye kutja tu rire orupa rweṱunḓu ra Jehova? (Markus 12:30)

¹³ Raisa orusuvero rwoye ku Jehova mokumukarera nomutima auhe. (Lesa Markus 12:30.) Mukuru we tu pa oviyandjewa ovingi, nu tjimwe otjinanḓengu  okurikotamena ku ye. Eṱe tu raisa kutja twa suvera Jehova ‘mokuṱakamisa omatwako we.’ (1 Joh. 5:3) Etwako rimwe Jehova nde tu pa okupitira mu Jesus, okukaisa po ovandu ovahongewa nokuvepapitisa. (Mat. 28:19) Eye wina we tu rakiza kutja tu suverasane. (Joh. 13:35) Jehova ma kayakura imba mbe raisa onḓuviro ku ye otjorupa rweṱunḓu re.—Eps. 15:1, 2.

14. Omomuano uṋe mu matu yenene okuraisa orusuvero ku varwe? (Mateus 9:36-38; Ovaroma 12:10)

¹⁴ Raisa orusuvero ku varwe. Orusuvero ootjikaṋena otjinanḓengu ku Jehova. (1 Joh. 4:8) Jehova we tu raisira orusuvero ngunda atu hi ye mu tjiwa. (1 Joh. 4:9, 10) Eṱe tu horera ku ye indu tji matu raisa orusuvero ku varwe. (Ef. 5:1) Omuano omusemba mbu matu yenene okuraisa orusuvero kovandu omokuvevatera okurihonga ohunga na Jehova ngunda a pe noruveze. (Lesa Mateus 9:36-38.) Indu tji matu ve vatere, owo mave yenene okurihonga imbi mbi mave hepa okutjita kutja ve yenene okurira orupa rweṱunḓu ra Mukuru. Omundu tja zu nokupapitisiwa, eṱe matu sokukayenda komurungu okumusuvera nokumuraisira ondengero. (1 Joh. 4:20, 21) Iho matji kamburire mo ye? Otjotjihorera, indu tja tjiti otjiṋa otjivi, katu sokuripura kutja eye wa tjitire owina. Nungwari, matu sokumuraisira ondengero mokumuvara kutja omunanḓengu pu eṱe.—Lesa Ovaroma 12:10; Fil. 2:3.

15. Hapo matu sokuraisa otjari nouwa ku uṋe?

¹⁵ Raisa otjari nouwa kovandu avehe. Indu tji matu vanga okukara norupa meṱunḓu ra Jehova nga aruhe, eṱe matu sokuungurisa imbi mbi matu rihongo okuza mOmbeibela mehupo retu. Otjotjihorera, Jesus we tu honga kutja matu sokuraisa otjari nouwa kovandu avehe, nandarire kovanavita na eṱe. (Luk. 6:32-36) Posi yokutja, povikando tjiva mape ya a rire ouzeu okutjita nao. Ndoovazu peri nao, matu sokurihonga okuripura nokuritjinda otja Jesus. Tji matu kondjo otja pu matu yenene okupuratena ku Jehova nokuhorera ku Jesus, tu raisa kutja tu vanga okurira orupa rweṱunḓu re nga aruhe.

16. Omomuano uṋe mu matu yenene okutjevera kutja atu ha zunḓa eṱunḓu ra Jehova?

¹⁶ Tjevera kutja o ha zunḓa eṱunḓu ra Jehova. Meṱunḓu, okanatje okazandu popengi ke horera oviṋa erumbi rako mbi mari tjiti. Indu ingwi erumbi tji ma kongorere omirari vyOmbeibela, eye ma raisa otjihorera otjiwa komuangu we. Posi yokutja indu erumbi tji ra utu okutjita oviṋa ovivi, ingwi omuangu ma utu okuhorera kovitjitwa vye ovivi. Otjingaperi nao wina meṱunḓu ra Jehova. Omukambure omukwetu ngwa ri omuṱakame tja utu okupirukira otjira tja Jehova poo tja utu okutjita oviṋa ovivi, varwe mape ya ave horere ku ye. Imba mbe tjita nao ve zunḓa eṱunḓu ra Jehova. (1 Tes. 4:3-8) Eṱe katu sokuhorera kovihorera vyawo ovivi poo okuyandjera otjiṋa okutupora korusuvero rwa Tate wetu womeyuru.

17. Omeripura yeṋe ngu matu sokuyepa, nu omena raye?

¹⁷ Ṱakama mu Jehova pendje nokuṱaṱera komauini. Jehova we tu kwizikira kutja indu tji twa twa po Ouhona we poruveze orutenga mehupo retu na tu hupu otja komirari vye, eye me tu pe oviṋa mbi matu hepa tjimuna ovikurya, ozombanda noruveze okukara po. (Eps. 55:22; Mat. 6:33) Indu tji twa raisa ongamburiro momakwizikiro nga, eṱe kamaatu kara nouripura wokutja ovimariva noviṋa vyouye mbwi mavi tu yetere ondjeverero poo ondjoroka yaaruhe. Matu tjiwa kutja omuano auyerike mu matu yenene okukara nohange eendu tji matu tjiti ombango ya Jehova. (Fil. 4:6, 7) Nandarire kutja tu novimariva okuranda oviṋa ovingi, matu sokuripura  kutja tjiri tu noruveze poo omasa okuviungurisa nokuvitjevera. Hapo mape ya atu suvere oviṋa mbi tjinene? Eṱe matu sokuzemburuka kutja Mukuru we tu pa oviungura meṱunḓu re. Pu mape hee kutja katu sokuyandjera otjiṋa okupora ombango yetu ku Jehova. Eṱe katu nokuvanga okukara tjimuna omurumendu omutanda ngwa panḓa okukarera Jehova mena rokusuvera ouini we. Mena ranao, wa pandjara ondjingonekero yokuyakurwa otja umwe wovanatje va Mukuru.—Mar. 10:17-22.

18. Hapo ondjozikiro iṋe nu ozondaya zeṋe ovandu ovaṱakame nḓu mave kayorokera nga aruhe?

¹⁸ Ovandu ovaṱakame mave kakara nondjingonekero yokusuvera Jehova nokumukarera nga aruhe. Imba mbe nomaundjiro wokukahupa kombanda yehi, mave kakara nondjoroka yokukatjevera ehi Jehova nde ve ungurira kutja ve ture mo. Moruveze rwatjimanga Ouhona wa Mukuru mau tjiti kutja ehi noviṋa avihe mbi ri mo vi rire oviwa rukwao. Jesus mee ku isa po omauzeu aehe nga yetwa mena rokuhina onḓuviro kwa Adam na Eva. Jehova ma kapendura ovandu ovengi nokuvepa ouyara wokuhupa nga aruhe, nouveruke ouwa mehi ndi mari rire oparadisa. (Luk. 23:42, 43) Indu ovandu mbe karera Jehova tji va rire ohomonena owo mave ‘harekwa nondatero nondjozikiro,’ otja David tja tjanga.—Eps. 8:5.

19. Ovikeṋa mbi matu sokuzemburuka?

¹⁹ Tji u ri orupa ‘rwotjimbumba otjinene,’ tjiwa kutja u nomaundjiro omawa. Mukuru we ku suvera neye ma vanga kutja u rire orupa rweṱunḓu re. Kunao, tjita atjihe tji mo sora kutja u tjate ku ye. Rizemburuka nomakwizikiro wa Mukuru eyuva arihe. Raisa ondangi kondjingonekero yokurikotamena ku Tate wetu womeyuru, nu vara omaundjiro wokutanga Jehova nga aruhe otjotjiṋa otjihuze.