1. Ki perguntas pode pasa-nu pa kabésa óras ki nu ta pensa na tudu kuza ki Jeová kria?

ÓRAS ki nu ta pensa na tudu kuza ki Jeová faze na séu ku na Téra, talvês nu ta xinti mésmu kuza ki salmista Davidi. Un bês el faze orason i el pergunta: ‘Óras ki N ta odja bu séu, trabadju di bus dédu, lua i strélas ki bu faze, kuzê ki é ómi ki ta móre, pa bu lenbra di el, i fidju di ómi, pa bu toma kónta di el?’ (Sal. 8:3, 4) Sima Davidi, óras ki nu odja ma nos é pikinoti konparadu ku strélas ki Jeová faze, talvês nu ta fika dimiradu pamodi simé el ta presta atenson na nos. Na kel studu li, nu sta ben odja ma Jeová presta atenson na Adon ku Eva, ki é kes primeru algen ki el kria. Má el faze más di ki kel-li. El dexa-s faze párti di se família.

2. Kuzê ki Jeová kreba pa Adon ku Eva fazeba?

² Adon ku Eva éra kes primeru fidju di Jeová li na Téra i el ta amaba es txeu. Jeová da-s un trabadju pa es faze. El fla-s: ‘Nhos ten fidjus i nhos bira txeu; nhos intxi Téra i nhos manda na el’. (Gén. 1:28) Es debe tinha fidju i kuidaba di Téra dretu. Si es obiba ku Jeová i es fazeba kuzê ki el pidiba es, Adon ku Eva i ses fidjus ta kontinuaba ta fazeba párti di família di Deus pa tudu ténpu.

3. Pamodi ki nu pode fla ma Jeová da Adon ku Eva un lugar inportanti na se família?

³ Adon ku Eva tinha un lugar inportanti na família di Jeová. Na Salmo 8:5 i na nóta di rodapé, Davidi fla kel-li sobri manera ki Jeová kria ómi: ‘Bu faze-l un kuzinha más fraku di ki anjus, i bu pô-l koroa di glória i di bunitéza.’ É verdadi ki nu ka dadu kel mésmu puder,  intilijénsia i kapasidadi sima di anjus. (Sal. 103:20) Má anos é sô un ‘kuzinha más fraku’ di ki kes anju poderozu. Kel-li é un kuza ki ta dexa-nu dimiradu! Kantu Jeová faze nos primeru pai ku mai, el da-s kel midjór vida ki ten!

4. Kuzê ki kontise ku Adon ku Eva, i kuzê ki nu sta ben odja na kel studu li?

 ⁴ É tristi pamodi Adon ku Eva dexa di faze párti di família di Jeová. Sima nu ta ben odja más pa frenti, kel-li traze txeu sufrimentu pa tudu ses fidju. Má simé, vontadi di Jeová ka muda. Ti inda el krê pa kes algen ki ta obi ku el bira se fidjus pa tudu ténpu. Primeru, nu ta ben odja modi ki Jeová mostra ma nu ten txeu valor pa el. Dipôs, nu ta ben odja kuzê ki nu meste faze pa nu mostra ma nu krê faze párti di família di Deus. Na fin, nu ta ben pâpia di kes benson ki fidjus di Jeová li na Téra ta ben ten pa tudu ténpu.

5. Modi ki nu pode mostra Deus nos gratidon pamodi el kria-nu sima se imaji?

⁵ Jeová kria-nu sima se imaji. (Gén. 1:26, 27) Nu kriadu sima imaji di Deus. Jeová kria-nu ku kapasidadi di dizenvolve i mostra kes kualidadi sima di sel. Kes kualidadi li ta djuda-nu ser kes tipu di algen ki el krê pa faze párti di se família. Pur izénplu, alguns di kes kualidadi é amor, konpaxon, lialdadi i justisa. (Sal. 86:15; 145:17) Óras ki nu ta sforsa pa mostra kes kualidadi li, nu ta da ónra pa Jeová i nu ta mostra-l nos gratidon pamodi el kria-nu sima se imaji. (1 Ped. 1:14-16) Tanbê nos vida ta bira mutu más filís i ku obijetivu.

6. Modi ki manera ki Jeová kria Téra ta prova ma nu ten txeu valor pa el?

⁶ Jeová pripara un kaza spesial pa nos. Txeu ténpu antis di el kria primeru ómi, Jeová pripara Téra pa nos. (Jó 38:4-6; Jer. 10:12) Pamodi se amor i pamodi el gosta di da, Jeová poi un monti kuza sábi na Téra ki ta dexa-nu filís. (Sal. 104:14, 15, 24) Na kes momentu ki Jeová para pa el djobe kes kuza ki el kria, el ‘odja ma tudu éra bon.’ (Gén. 1:10, 12, 31) Pa mostra ma nu ten txeu valor pa el, el fla-nu pa nu manda na tudu kes kuza bunitu ki el kria li na Téra. (Sal. 8:6) Deus krê pa kes algen perfetu xinti alegria na kuida di tudu kes kuza bunitu ki el faze pa tudu ténpu. Bu ta kustuma agradese Jeová pa kel speransa rei di sábi li?

7. Modi ki Josué 24:15 ta mostra ma nu ten liberdadi di skodje?

⁷ Jeová da-nu liberdadi di skodje. Nu pode skodje kuzê ki nu krê faze ku nos vida. (Lé Josué 24:15.) Jeová da-nu kel kapasidadi li i el ta fika txeu kontenti óras ki nu ta skodje sirbi-l. (Sal. 84:11; Pro. 27:11) Nu pode uza dretu nos liberdadi di skodje na txeu ária di nos vida. Nu ben odja ki izénplu ki Jizus dexa-nu.

8. Modi ki Jizus uza se liberdadi di skodje kantu el staba txeu kansadu?

⁸ Sima Jizus, nu pode poi interesis di otus algen na frenti di nos interesi. Un dia, Jizus ku se apóstlus staba txeu kansadu. Pur isu, es bai pa un lugar más trankilu pa es ba diskansa un bokadinhu. Má es ka konsigi diskansa pamodi un monti di algen bai ses tras i es tinha gana pa Jizus inxinaba es. Envês di Jizus fika xatiadu ku es, el xinti péna di es. Nton, kuzê ki Jizus faze? ‘El kumesa  ta inxina-s txeu kuza.’ (Marcos 6:30-34) Nu pode imita Jizus. Nu pode uza nos ténpu i nos inerjia pa djuda otus algen. Si nu faze kel-li, nu ta da ónra pa nos Pai ki sta na Séu i nu ta mostra Jeová ma nu krê faze párti di se família. — Mat. 5:14-16.

9. Di kuzê ki pai ku mai debe lenbra?

⁹ Jeová da-nu kapasidadi di ten fidju i responsabilidadi di inxina-s ama-l i sirbi-l. Si bo é pai ô mai, bu ta da valor pa es prezenti spesial? Nbóra Jeová da anjus txeu kapasidadi, el ka da-s kapasidadi di ten fidju. Pur isu, pai ku mai debe da txeu valor pa priviléjiu di kria fidju. Es dadu un responsabilidadi inportanti di kria fidju ‘na disiplina i na instruson di Jeová.’ (Efé. 6:4; Deut. 6:5-7; Sal. 127:3) Pa djuda pai ku mai, organizason di Jeová ta da txeu feraménta ku bazi na Bíblia, sima publikasons, vídius, múzikas i artigus na internet. Kel-li ta mostra klaru ma Jeová ku Jizus ta da bus fidju txeu valor. (Luc. 18:15-17) Óras ki pai ku mai ta faze ses midjór pa kria ses fidju, es ta da ses fidju oportunidadi di faze párti di família di Jeová pa tudu ténpu i Jeová ta fika txeu kontenti!

10-11. Ki oportunidadi Jeová da-nu através di resgati?

¹⁰ Jeová da-nu se Fidju ki ten más valor pa el, pa nu pode faze párti di Se família otu bês. Sima nu odja na  parágrafu 4, Adon ku Eva dexa di faze párti di família di Jeová i kontise mésmu kuza ku ses fidjus. (Rom. 5:12) Adon ku Eva skodje ka obi ku Deus, pur isu es ka merese fikaba na se família. Má, i ses fidjus? Jeová ta ama-nu txeu i el ranja un manera di adota kes ki ta obi ku el, através di sakrifisiu di Jizus Kristu. (João 3:16; Rom. 5:19) Pamodi resgati ki se úniku Fidju paga, Jeová ta pode adota 144 mil algen pa ser se fidjus. — Rom. 8:15-17; Apo. 14:1.

¹¹ Alén di kes kriston skodjedu ku spritu santu, ten milhons di otus algen fiel ki sta ta sforsa pa faze vontadi di Deus oji. Es sta ta spéra pa es ben faze párti di família di Deus dipôs di kel últimu próva na fin di kes mil anu. (Sal. 25:14; Rom. 8:20, 21) Pamodi kel speransa li, milhons di algen ta pode txoma Jeová désdi gósi di ses ‘Pai’. (Mat. 6:9) Kes ki ta ben resusitadu tanbê ta ten oportunidadi di prende kuzê ki Jeová krê pa es faze. Si es skodje obi ku Jeová tanbê es ta ben faze párti di se família.

12. Ki pergunta nu sta ben responde gósi?

¹² Sima nu odja, Jeová mostra di txeu manera ma nu ten txeu valor pa el. El adota kes kriston skodjedu ku spritu santu pa ser sima se fidjus, i el da kes ki ta faze párti di kel ‘monti di algen’ oportunidadi di bira se fidjus na kel mundu novu. (Apo. 7:9) Kuzê ki nu debe faze gósi pa nu mostra Jeová ma nu krê faze párti di se família pa tudu ténpu?

13. Kuzê ki nu meste faze pa nu faze párti di família di Deus? (Marcos 12:30)

¹³ Bu ta mostra bu amor pa Jeová óras ki bu ta sirbi-l di tudu bu korason. (Lé Marcos 12:30.) Pamodi bondadi ki Jeová ten, el da-nu txeu prezenti. Un di kes midjór prezenti, é kapasidadi di adora-l. Nu ta mostra ma nu ta ama Jeová, óras ki nu ta ‘obi ku se mandamentus’. (1 João 5:3) Na nómi di se Pai,  Jizus manda-nu pa nu faze disiplus i batiza-s. (Mat. 28:19) Tanbê, el manda-nu pa nu ama kunpanheru. (João 13:35) Jeová ta ben fika kontenti di resebe kes algen ki ta obi ku el na se família na mundu interu. — Sal. 15:1, 2.

14. Modi ki nu pode mostra ma nu ta ama otus algen? (Mateus 9:36-38; Romanos 12:10)

¹⁴ Mostra amor pa otus algen. Amor é kel kualidadi más inportanti di Jeová. (1 João 4:8) Jeová ama-nu ti mésmu antis di nu konxe-l. (1 João 4:9, 10) Óras ki nu ta ama otus algen, nu sta ta imita Jeová. (Efé. 5:1) Un di kes midjór manera di nu mostra amor pa otus algen é óras ki nu ta djuda-s prende sobri Jeová, timenti inda sta na ténpu. (Lé Mateus 9:36-38.) Asi, nu ta da-s xansi tanbê di faze párti di família di Deus. Sikrê dipôs ki un algen batiza, nu debe kontinua ta mostra-l amor i ruspetu. (1 João 4:20, 21) Modi ki nu ta faze kel-li? Un manera di nu faze kel-li é óras ki nu ka ta duvida di se intenson. Pur izénplu, si el faze un kuza ki nu ka ntende dretu, nu ka debe atxa ma el faze-l ku mau intenson. Envês di kel-li, nu debe da nos irmon ónra i trata-s sima algen más inportanti ki nos. — Lé Romanos 12:10; Fil. 2:3.

15. Pa kenha ki nu debe mostra mizerikórdia i bondadi?

¹⁵ Nu debe mostra mizerikórdia i bondadi pa tudu tipu di algen. Si nu krê faze párti di kes ki ten direitu di txoma Jeová di Pai, nu debe faze tudu kel ki se Palavra ta fla. Pur izénplu, Jizus inxina ma nu debe mostra tudu algen mizerikórdia i bondadi, ti mésmu nos inimigus. (Luc. 6:32-36) Alvês nu pode atxa difísil faze kel-li. Si kel-li sta kontise ku nos, nu debe prende pensa i aji sima Jizus. Óras ki nu ta faze nos midjór pa nu obi ku Jeová i imita Jizus, nu pode mostra nos Pai na Séu ma nu krê faze párti di se família pa tudu ténpu.

16. Modi ki nu pode proteje kel bon nómi ki família di Jeová ten?

¹⁶ Proteje kel bon nómi ki família di Jeová ten. Alvês na un família un mininu ta krê imita se irmon más grandi. Si se irmon más grandi ta sigi prinsípius di Bíblia na se vida, el ta ser un bon izénplu pa se irmon más pikinoti. Má si kel irmon más grandi kumesa ta faze kuzas mariadu, el pode poi se irmon más pikinoti ta sigi se mau izénplu. Kel-li tanbê pode kontise na família di Jeová. Imajina ma un sérvu di Jeová ki antis éra fiel, bandona i fika kóntra Se organizason ô el disidi faze otus kuza mariadu. Kel-li pode poi otus irmon ta imita se mau izénplu. Kes algen ki ta faze kes kuza li, ta prujudika kel bon nómi ki família di Jeová ten. (1 Tes. 4:3-8) É pur isu ki nu debe ivita tudu kes mau izénplu i ka dexa nada afasta-nu di nos Pai na Séu ki ta ama-nu txeu.

17. Ki pensamentus mariadu nu debe ivita i pamodi?

¹⁷ Kunfia na Jeová i ka bu kunfia na kuzas material. Jeová promete ma si nu poi Reinu na primeru lugar i nu obi ku el, el ta da-nu kumida, ropa i un lugar di mora. (Sal. 55:22; Mat. 6:33) Óras ki nu ta kunfia na kel promésa li, nu ka ta pensa ma kuzas material di kel mundu li ta proteje-nu i ta pô-nu ser filís. Nu sabe ma úniku manera di nu xinti pas déntu nos é óras ki nu ta sirbi Jeová. (Fil. 4:6, 7) Sikrê nu ten manera di kunpra txeu kuza, nu debe djobe si nu ten ténpu i  forsa pa uza i kuida di kes kuza. Nu gosta txeu di kes kuza material ki nu ten? Nu debe lenbra ma Jeová da-nu un trabadju pa faze na se família. Kel-li krê fla ma nu ka pode dexa nada distrai-nu. Nu ka krê ser sima kel jóven ki nega un oportunidadi di sirbi Jeová i di ser adotadu sima un di se fidjus, sô pamodi el gostaba txeu di kes poku kuza material ki el tinha li na Téra! — Marcos 10:17-22.

18. Ki priviléjiu grandi i ki benson ki kes ki ta obi ku Jeová ta ben ten?

¹⁸ Kes ki ta obi ku Jeová ta ben ten kel midjór priviléjiu ki ten, ki é ama-l i adora-l pa tudu ténpu! Kes ki ten speransa di ben vive na Téra ta ben xinti alegria di kuida di es planéta, ki é un kaza perfetu ki Jeová faze pa nos. Óras ki Reinu di Deus ben governa-nu, Téra i tudu kuza na el ta bira bunitu otu bês. Jizus ta ben kaba ku tudu kes prubléma ki parse dipôs ki Adon ku Eva disidi bandona família di Deus. Jeová ta ben resusita kes milhon di algen i es ta ben ten xansi di vive pa tudu ténpu ku saúdi perfetu na un paraízu li na Téra. (Luc. 23:42, 43) I sima kes algen ki ta obi ku Deus ba ta bira perfetu, kada un di es ta ben ten kel ‘glória i bunitéza’ ki Davidi pâpia di el. — Sal. 8:5.

19. Kuzê ki nu debe sta disididu na faze?

¹⁹ Si bu ta faze párti di kel ‘monti di algen’, bu ten un speransa rei di sábi. Deus ta ama-u i el krê pa bu faze párti di se família. Pur isu, faze bu midjór pa bu agrada Deus. Vive kada dia ku kes promésa di Deus na bu menti i na bu korason. Mostra gratidon pa kel priviléjiu di adora bu Pai na Séu ki krê-u txeu. I tanbê, da valor pa kel speransa di lova-l pa tudu ténpu!