1. Nĩ ũndũ ũrĩkũ ũũkaga meciria-inĩ rĩrĩa twecũrania igũrũ rĩgiĩ indo ciothe iria Jehova ombĩte?

RĨRĨA twecũrania ũhoro wĩgiĩ indo nyingĩ iria Jehova ombĩte gũkũ thĩ na kũrĩa igũrũ, no tũigue o ta Daudi mwandĩki wa thaburi ũrĩa wahoire Jehova, akĩũria ũũ: “Rĩrĩa nderorera igũrũ rĩaku, mawĩra ma ciara ciaku, mweri na njata iria ũigĩte kuo, mũndũ-rĩ, nĩwe kĩ atĩ nĩkĩo ũmwĩciragia, nake mũrũ wa mũndũ nĩwe kĩ atĩ nĩkĩo ũmũrũmbũyagia?” (Thab. 8:3, 4) O ta Daudi, no tũrigwo nĩ kĩĩ gĩtũmaga Jehova atwĩcirie, tondũ no twĩyone tũrĩ anini mũno tweringithania na indo ciothe iria Jehova ombĩte. No o ta ũrĩa tũkuona, Jehova to kũrũmbũiya aarũmbũirie andũ a mbere Adamu na Hawa no nĩ aamatuire a famĩlĩ yake.

2. Jehova eendaga Adamu na Hawa meke atĩa?

² Adamu na Hawa nĩo maarĩ ciana cia mbere cia Jehova gũkũ thĩ, na Ithe wao wa igũrũ Jehova nĩ aamendete mũno. Eerĩgagĩrĩra makorũo na maumĩrĩra mega thĩinĩ wa famĩlĩ yake. Aameerire ũũ: “Ciaranai na mũingĩhe, mũiyũrie thĩ na mũmĩtoorie.” (Kĩam. 1:28) Eendaga magĩe ciana, na marũmbũiye thĩ ĩrĩa yarĩ mũciĩ wao. Korũo nĩ maathĩkĩire ũndũ ũcio Jehova aameerĩte, Adamu na Hawa o hamwe na njiarũa ciao mangĩatũũrire marĩ a famĩlĩ ya Ngai tene na tene.

3. Nĩ kĩĩ kĩngĩtũma tuuge atĩ Adamu na Hawa maarĩ na itemi rĩa bata famĩlĩ-inĩ ya Jehova?

³ Adamu na Hawa maarĩ na itemi rĩa bata famĩlĩ-inĩ ya Jehova. Thĩinĩ wa Thaburi 8:5, Daudi akĩaria igũrũ rĩgiĩ ũrĩa Jehova oombire mũndũ aaugire ũũ: “Wamũtuire wa gĩkĩro gĩa thĩ hanini gũkĩra araika, na ũkĩmũhumba riri na gĩtĩo.” Jehova ndaaheire andũ hinya, ũũgĩ, na ũhoti ta wa araika. (Thab.  103:20) O na kũrĩ ũguo, mũndũ nĩ wa “gĩkĩro gĩa thĩ hanini” aringithanĩtio na araika acio marĩ hinya. Ta wĩcirie ũndũ ũcio! Jehova aaheete aciari aitũ a mbere ũtũũro mwega mũno.

4. Gwathiire atĩa harĩ Adamu na Hawa nĩ ũndũ wa kwaga gwathĩkĩra Jehova? Tũkwarĩrĩria maũndũ marĩkũ gĩcunjĩ-inĩ gĩkĩ?

 ⁴ Ũndũ wa kĩeha nĩ atĩ Adamu na Hawa nĩ maateire mweke ũrĩa maarĩ naguo wa gũkorũo famĩlĩ-inĩ ya Jehova. Ũndũ ũcio warehire maumĩrĩra moru mũno harĩ njiarũa ciao o ta ũrĩa tũkuona gĩcunjĩ-inĩ gĩkĩ. No muoroto wa Jehova ndũrĩ wacenjia. Endaga andũ arĩa athĩki matuĩke ciana ciake tene na tene. Rekei twambe twarĩrĩrie ũrĩa Jehova atuonetie gĩtĩo. Nĩ tũgũcoka twarĩrĩrie ũrĩa tũngĩka ihinda-inĩ rĩrĩ, nĩguo tuonanie atĩ nĩ tũrenda gũkorũo tũrĩ a famĩlĩ ya Ngai. Mũthia-inĩ, nĩ tũkwarĩrĩria irathimo iria ciana cia Jehova gũkũ thĩ igaakenera tene na tene.

5. Tũngĩonania ngatho citũ atĩa harĩ Jehova nĩ ũndũ wa gũtũũmba na mũhianĩre wake?

⁵ Jehova oonanirie atĩ nĩ atũtĩĩte na njĩra ya gũtũũmba na mũhianĩre wake. (Kĩam. 1:26, 27) Tondũ Jehova atũũmbĩte na mũhianĩre wake, no tũhote gũkũria ngumo nyingĩ njega ta wendo, ũcayanĩri, wĩhokeku, na ũthingu. (Thab. 86:15; 145:17) Rĩrĩa twakũria ngumo ta icio, nĩ tũtĩithagia Jehova na tũkonania atĩ tũrĩ na ngatho. (1 Pet. 1:14-16) Rĩrĩa tweka maũndũ na njĩra ĩrakenia Ithe witũ wa igũrũ, nĩ tũkoragwo na gĩkeno na tũkaigua tũiganĩire. Na tondũ aatũũmbire na mũhianĩre wake, Jehova nĩ atũhotithĩtie gũtuĩka andũ arĩa endaga makorũo thĩinĩ wa famĩlĩ yake.

6. Jehova aaheire andũ gĩtĩo atĩa rĩrĩa aahaarĩirie thĩ?

⁶ Jehova nĩ aatũthondekeire mũciĩ mwega. Ihinda iraihu atanomba mũndũ wa mbere, Jehova nĩ aahaarĩirie thĩ nĩguo ĩikaragwo nĩ andũ. (Ayub. 38:4-6; Jer. 10:12) Tondũ nĩ atwĩciragia na nĩ mũtaana, Jehova nĩ aatũheire indo nyingĩ njega nĩguo tũkenagĩre. (Thab. 104:14, 15, 24) Ecũrania ũhoro wĩgiĩ indo iria oombĩte, Jehova nĩ oonire atĩ ‘ciarĩ njega.’ (Kĩam. 1:10, 12, 31) Nĩ oonirie andũ gĩtĩo na njĩra ya kũmahe “wathani igũrũ” rĩa indo iria ciothe oombĩte gũkũ thĩ. (Thab. 8:6) Ngai endaga andũ akinyanĩru mathiĩ na mbere kũrũmbũiya ũũmbi ũcio wake mũthaka tene na tene. Hihi nĩ ũcokagĩria Jehova ngatho hingo ciothe nĩ ũndũ wa kĩĩranĩro kĩu kĩega?

7. Joshua 24:15 yonanagia na njĩra ĩrĩkũ atĩ andũ nĩ marĩ wĩyathi wa gwĩthuurĩra?

⁷ Jehova nĩ atũheete kĩheo kĩa wĩyathi wa gwĩthuurĩra. Tũkoragwo na wĩyathi wa gũthuura ũrĩa tũkwenda gwĩka ũtũũro-inĩ witũ. (Thoma Joshua 24:15.) Ngai witũ ũrĩ wendo nĩ akenaga rĩrĩa twathuura kũmũtungatĩra. (Thab. 84:11; Thim. 27:11) No tũhũthĩre wĩyathi witũ wa gwĩthuurĩra na njĩra ĩrĩa yagĩrĩire rĩrĩa tũratua matua. Rekei tuone kĩonereria kĩrĩa Jesu aatũigĩire ũndũ-inĩ ũcio.

8. Jesu aahũthagĩra wĩyathi wake na njĩra ĩrĩkũ? Heana ngerekano.

⁸ No twĩgerekanie na Jesu na njĩra ya gũthuura kũiga maũndũ ma andũ arĩa angĩ mbere ya maũndũ maitũ ithuĩ ene. Hĩndĩ ĩmwe Jesu na atũmwo ake nĩ maanogete mũno, na magĩthiĩ handũ hahooreru nĩguo mahurũke. No ũndũ ũcio ndwahotekire. Guokire andũ kĩrĩndĩ kĩnene na nĩ meendaga kũrutwo nĩ Jesu. No Jesu ndaarakarire. Handũ ha ũguo, nĩ aaiguĩrĩire andũ acio tha. Kwoguo Jesu eekire atĩa? Bibilia yugaga ũũ: “Akĩambĩrĩria kũmaruta maũndũ maingĩ.”  (Mar. 6:30-34) Rĩrĩa twegerekania na Jesu na njĩra ya kũhũthĩra mahinda na hinya witũ gũteithia andũ arĩa angĩ, nĩ tũgoocithagia Ithe witũ wa igũrũ. (Mat. 5:14-16) Ningĩ nĩ tuonagia Jehova atĩ nĩ tũrenda gũkorũo thĩinĩ wa famĩlĩ yake.

9. Nĩ kĩheo kĩrĩkũ kĩa mwanya Jehova aheete aciari?

⁹ Jehova nĩ aheete andũ ũhoti wa kũgĩa ciana, na akamahe wĩra wa gũciteithia kũmwenda na kũmũtungatĩra. Angĩkorũo ũrĩ mũciari-rĩ, hihi nĩ ũkenagĩra kĩheo kĩu kĩa mwanya? O na gũtuĩka Jehova nĩ aheete araika ũhoti mũnene, ndamaheete ũhoti wa kũgĩa ciana. Nĩ ũndũ ũcio, andũ arĩa mararera ciana nĩ magĩrĩirũo kuona wĩra ũcio ũrĩ mweke wa mwanya. Aciari nĩ mehokeirũo wĩra wa bata na mũtheru wa kũrera ciana ciao ‘magĩcirũngaga na magĩcitaaraga na njĩra ya Jehova.’ (Ef. 6:4; Gũcok. 6:5-7; Thab. 127:3) Ithondeka rĩa Jehova nĩ rĩrutĩte indo nyingĩ ciarĩrĩirie Bibilia nĩguo iteithĩrĩrie aciari ta mabuku, video, nyĩmbo, na indo ingĩ irĩ Intaneti-inĩ. Ithe witũ wa igũrũ na Mũrũ wake hatarĩ nganja nĩ makenagio nĩ ciana. (Luk. 18:15-17) Jehova nĩ akenaga rĩrĩa aciari mamwĩhoka, na meka ũrĩa wothe mangĩhota nĩguo marere ciana ciao. Na aciari ta acio nĩ matũmaga ciana ciao igĩe na kĩĩrĩgĩrĩro gĩa gũgaatuĩka a famĩlĩ ya Jehova tene na tene.

10-11. Nĩ ũndũ ũrĩkũ Jehova ahotithĩtie kũgerera igongona rĩa ũkũũri?

¹⁰ Jehova aarutire Mũrũ wake ũrĩa endete mũno nĩguo tũhote gũcoka rĩngĩ thĩinĩ wa famĩlĩ yake. O ta ũrĩa tũkũgwetete  kĩbungo-inĩ gĩa 4, Adamu na Hawa nĩ moorirũo nĩ mweke wa gũkorũo famĩlĩ-inĩ ya Jehova na kwoguo o na njiarũa ciao ikĩũrũo nĩ mweke ũcio. (Rom. 5:12) Tondũ Adamu na Hawa maaremeire Ngai makĩendaga, warĩ ũndũ mwagĩrĩru harĩ o kweherio thĩinĩ wa famĩlĩ yake. No kũngĩathiire atĩa harĩ njiarũa ciao? Tondũ Jehova nĩ endete andũ, nĩ aathondekire njĩra nĩguo njiarũa ciao iria ingĩgaakorũo irĩ njathĩki cingĩre thĩinĩ wa famĩlĩ yake. Eekire ũguo na njĩra ya kũruta igongona rĩa Jesu Kristo, Mũrũ wake wa mũmwe. (Joh. 3:16; Rom. 5:19) Nĩ ũndũ wa igongona rĩu rĩa Jesu, andũ ehokeku 144,000 nĩ maahotithirio gũtuĩka ariũ a Ngai.—Rom. 8:15-17; Kũg. 14:1.

¹¹ Ningĩ nĩ kũrĩ andũ angĩ aingĩ ehokeku mekaga wendi wa Ngai. Marĩ na kĩĩrĩgĩrĩro gĩa gũkaaingĩra famĩlĩ-inĩ ya Ngai thutha wa igerio rĩa mũico, mũthia-inĩ wa mĩaka ĩrĩa ngiri ĩmwe. (Thab. 25:14; Rom. 8:20, 21) Tondũ marĩ na kĩĩrĩgĩrĩro kĩu, o na ũmũthĩ metaga Jehova “Ithe witũ” tondũ nĩwe wamombire. (Mat. 6:9) Andũ arĩa makaariũkio o nao nĩ makaagĩa na mweke wa kwĩruta maũndũ marĩa Jehova endaga andũ meke. Arĩa magathuura gwathĩkĩra ũtongoria wake, mũthia-inĩ o nao nĩ makaaingĩra thĩinĩ wa famĩlĩ yake.

12. Nĩ kĩũria kĩrĩkũ rĩu tũkwarĩrĩria?

¹² O ta ũrĩa tuona, Jehova nĩ aheete andũ gĩtĩo kũgerera njĩra nyingĩ. Nĩ atuĩte arĩa aitĩrĩrie maguta ariũ ake, na akahe arĩa a “kĩrĩndĩ kĩnene” kĩĩrĩgĩrĩro gĩa gũgaatuĩka ciana ciake thĩinĩ wa thĩ njerũ. (Kũg. 7:9) Nĩ atĩa twagĩrĩirũo gwĩka mahinda-inĩ maya nĩguo tuonie Jehova atĩ nĩ tũrenda gũtuĩka andũ a famĩlĩ yake tene na tene?

13. Nĩ ũndũ ũrĩkũ tũngĩka nĩguo Jehova atwamũkĩre thĩinĩ wa famĩlĩ yake? (Mariko 12:30)

¹³ Onanagia nĩ wendete Jehova na njĩra ya kũmũtungatĩra na ngoro yaku yothe. (Thoma Mariko 12:30.) Jehova nĩ atũheete iheo nyingĩ mũno na kĩheo kĩmwe kĩnene atũheete nĩ ũhoti wa kũmũthathayia. Nĩ tuonagia Jehova  atĩ nĩ tũmwendete na njĩra ya ‘kũrũmĩrĩra maathani make.’ (1 Joh. 5:3) Rĩathani rĩmwe rĩrĩa Jehova endaga twathĩkĩre nĩ rĩrĩa Jesu aatũheire rĩa gũtua andũ arutwo na kũmabatithia. (Mat. 28:19) Ningĩ nĩ aatwathire twendanage. (Joh. 13:35) Jehova nĩ amũkagĩra andũ arĩa mamwathĩkagĩra akamaingĩria thĩinĩ wa famĩlĩ ya thĩ yothe ya ndungata ciake.—Thab. 15:1, 2.

14. Tũngĩonania atĩa atĩ nĩ twendete andũ arĩa angĩ? (Mathayo 9:36-38; Aroma 12:10)

¹⁴ Endaga andũ arĩa angĩ. Wendo nĩguo ngumo ĩrĩa nene ya Jehova. (1 Joh. 4:8) Jehova aatwendire o na tũtamũmenyete. (1 Joh. 4:9, 10) Rĩrĩa twenda andũ arĩa angĩ, tũkoragwo tũkĩĩgerekania nake. (Ef. 5:1) Njĩra ĩmwe njega ya kuonania atĩ nĩ twendete andũ nĩ kũmateithia merute ũhoro wĩgiĩ Jehova hĩndĩ ĩrĩa marĩ na mweke. (Thoma Mathayo 9:36-38.) Rĩrĩa tweka ũguo, nĩ tũtũmaga magĩe na kĩĩrĩgĩrĩro gĩa gũkaaingĩra thĩinĩ wa famĩlĩ ya Ngai. Mũndũ arĩkia kũbatithio, nĩ twagĩrĩirũo gũthiĩ na mbere kũmwenda na kũmũhe gĩtĩo. (1 Joh. 4:20, 21) Tũngĩka ũguo na njĩra ĩrĩkũ? Ũndũ ũmwe tũngĩka nĩ kũmwĩhoka na gwĩtĩkia atĩ aratungatĩra Ngai arĩ na muoroto mwega. Kwa ngerekano, angĩka ũndũ na twage gũtaũkĩrũo nĩguo, tũtiagĩrĩirũo gũtua atĩ ekire ũguo arĩ na muoroto mũũru. Handũ ha ũguo, twagĩrĩirũo kũmũhe gĩtĩo na tũmuone arĩ wa bata gũtũkĩra.—Thoma Aroma 12:10; Afil. 2:3.

15. Nĩ andũ arĩkũ twagĩrĩirũo kuonia tha na ũtugi?

¹⁵ Onanagia tha na ũtugi kwerekera andũ othe. Angĩkorũo no twende gũkorũo thĩinĩ wa famĩlĩ ya Jehova tene na tene, nĩ twagĩrĩirũo kũhũthagĩra ũtaaro wa Kiugo gĩake ũtũũro-inĩ witũ. Kwa ngerekano, Jesu aarutanire atĩ nĩ twagĩrĩirũo kuonanagia tha na ũtugi kũrĩ andũ othe nginya kũrĩ thũ citũ. (Luk. 6:32-36) Rĩmwe na rĩmwe, no ũkorũo ũtarĩ ũndũ mũhũthũ gwĩka ũguo. Ĩndĩ no tũhote, tũngĩĩruta gwĩkaga na gwĩciria o ta Jesu. Rĩrĩa tweka ũrĩa wothe tũngĩhota gwathĩkĩra Jehova na kwĩgerekania na Jesu, nĩ tuonagia Ithe witũ wa igũrũ atĩ nĩ tũrenda gũkorũo tũrĩ a famĩlĩ yake tene na tene.

16. Tũngĩgitĩra atĩa rĩĩtwa rĩa famĩlĩ ya Jehova?

¹⁶ Gitagĩra rĩĩtwa rĩa famĩlĩ ya Jehova. Nĩ tuonaga kaingĩ thĩinĩ wa famĩlĩ, kahĩĩ karĩa kanini gakĩgeria kwĩgerekania na mũrũ wa nyina ũrĩa mũkũrũ. Angĩkorũo mũrũ wa nyina ũcio mũkũrũ nĩ arahũthĩra motaaro ma Bibilia ũtũũro-inĩ wake, no aigĩre kahĩĩ kau kĩonereria kĩega. No angĩambĩrĩria gwĩka maũndũ moru, kahĩĩ kau kahota kũrũmĩrĩra kĩonereria gĩake kĩũru. Ũguo noguo kũrĩ famĩlĩ-inĩ ya Jehova. Mũkristiano ũkoretwo arĩ mwĩhokeku angĩtuĩka mũregenyũki kana ambĩrĩrie gwĩka maũndũ moru, andũ arĩa angĩ kĩũngano-inĩ no mambĩrĩrie gwĩka o take. Andũ arĩa mekaga ũguo nĩ mathũkagia rĩĩtwa rĩa famĩlĩ ya Jehova. (1 Thes. 4:3-8) Tũtiagĩrĩirũo kũmarũmĩrĩra, kana tũreke ũndũ o wothe ũthũkie ũrata witũ hamwe na Ithe witũ wa igũrũ ũrĩ wendo.

17. Nĩ mwĩcirĩrie ũrĩkũ twagĩrĩirũo gwĩthema, na nĩkĩ?

¹⁷ Wĩhokage Jehova handũ ha kwĩhoka indo cia kĩĩmwĩrĩ. Jehova atwĩrĩire atĩ nĩ arĩtũheaga irio, nguo, na handũ ha gũikara, tũngĩiga Ũthamaki wake mbere na tũtũũre kũringana na ithimi ciake cia ũthingu. (Thab. 55:22; Mat. 6:33) Kũririkana ũndũ ũcio, nĩ gũtũteithagia gwĩthema gwĩciria atĩ indo cia kĩĩmwĩrĩ iria irĩ thĩinĩ wa thĩ no itũhe ũgitĩri na gĩkeno gĩa gũtũũra. Nĩ tũmenyaga atĩ njĩra ĩrĩa tu ĩngĩtũrehera thayũ wa ma wa meciria nĩ gwĩka wendi wa Jehova. (Afil. 4:6, 7) Ningĩ o na angĩkorũo no tũhote kũgũra indo nyingĩ, nĩ twagĩrĩirũo kwĩyũria kana nĩ tũrĩkoragwo na  mahinda na hinya wa gũcihũthĩra na gũcirũmbũiya. Hihi nĩ twendete mũno indo iria tũrĩ nacio cia kĩĩmwĩrĩ? Nĩ twagĩrĩirũo kũririkanaga atĩ nĩ harĩ wĩra ũrĩa Ngai atũheete thĩinĩ wa famĩlĩ yake, na kwoguo tũtiagĩrĩirũo kũreka ũndũ o na ũmwe ũtũhĩngĩce. Hatarĩ nganja tũtingĩenda kũhaana ta mũndũ ũrĩa waregire kũrũmĩrĩra Jesu nĩ ũndũ wa indo cia kĩĩmwĩrĩ iria aarĩ nacio, na kwoguo akĩaga gũtungatĩra Jehova na akĩũrũo nĩ mweke wa gũtuĩka ũmwe wa ariũ a Ngai.—Mar. 10:17-22.

18. Nĩ gĩtĩo kĩrĩkũ kĩnene andũ arĩa athĩki makoonio, na nĩ irathimo irĩkũ magaakenera tene na tene?

¹⁸ Andũ arĩa athĩki nĩ makaagĩa na mweke wa kwenda na gũthathaiya Jehova tene na tene, na kĩu nĩkĩo gĩtĩo kĩrĩa kĩnene mũno mũndũ angĩheo. Arĩa marĩ na kĩĩrĩgĩrĩro gĩa gũgaatũũra gũkũ thĩ, nĩ magaakenera kũrũmbũiya thĩ ĩno thaka ĩrĩa Jehova oombire ĩtuĩke mũciĩ wao. Ica ikuhĩ, Ũthamaki wa Ngai nĩ ũkwerũhia thĩ na indo iria ciothe ikoragwo kuo. Jesu nĩ akaarehe kĩhonia kĩa mathĩna mothe marĩa maarehirũo nĩ itua rĩa Adamu na Hawa rĩa kweherera famĩlĩ ya Jehova. Jehova nĩ akaariũkia andũ milioni nyingĩ na amahe mweke wa gũtũũra tene na tene marĩ na ũgima mwega wa mwĩrĩ thĩinĩ wa thĩ ĩrĩa ĩgaakorũo ĩgarũrĩtwo ĩgatuĩka paradiso. (Luk. 23:42, 43) Hĩndĩ ĩyo, o ũrĩa athathaiya a Jehova arĩa magatũũra thĩinĩ wa thĩ magaathiĩ na mbere gũtuĩka akinyanĩru, noguo o ũmwe wao akonania “riri na gĩtĩo” iria Daudi aandĩkire ũhoro wacio.—Thab. 8:5.

19. Nĩ ũndũ ũrĩkũ twagĩrĩirũo gwĩka hingo ciothe?

¹⁹ Angĩkorũo ũrĩ wa ‘kĩrĩndĩ kĩrĩa kĩnene,’ ũrĩ na kĩĩrĩgĩrĩro kĩa magegania. Jehova nĩ akwendete na endaga ũkorũo thĩinĩ wa famĩlĩ yake. Nĩ ũndũ ũcio, ĩkaga ũrĩa wothe ũngĩhota nĩguo ũmũkenagie. Hingo ciothe wĩcũranagie igũrũ rĩgiĩ ciĩranĩro cia Jehova. Tĩaga mweke ũrĩa ũrĩ naguo wa gũthathaiya Ithe witũ wa igũrũ ũtwendete, na ũkenagĩre kĩĩrĩgĩrĩro kĩrĩa atũheete gĩa kũmũgooca tene na tene!