1. Ibhwidisu yebhi itena kumoneka, kyoso kituxinganeka mu ima yoso yabhange Jihova?

KYOSO ki tuxinganeka o ima yabhange Jihova kudyulu ni mu ixi, tutena kudivwa kala o mukwa jisálamu, Davidi, kyoso kyebhwidisa mu musambu: “Kyoso ki ng’ila ngi talesa ku dyulu, ku ufunu wa milembu yé, ku mbeji ni jithéthembwa ji wa yudika, ng’amba, ngixi: Muthu mwene wa soko kyebhi, phala eye ku mu suwa? Mba mon’a muthu, kwila eye u mu ta muxima?” (Jisá. 8:3, 4) Kala Davidi tutena kudivwa kwila, twatolo, mukudisokesa ni jithethembwa ja bhange Jihova ni ima yamukwa ya madiwanu yatukondoloka. Maji twandamona kwila, Jihova wasuwu o dikaza dya dyanga, Adá ni Eva, mukwa abhana o ujitu wakutokala kumwiji wê.

2. Jihova wamesenene kwila Adá ni Eva abhanga ihi?

² Adá ni Eva exile o twana twadyanga twa Jihova mu ixi. Jihova wexile o Tata ya a dyulu, mwene wamesenene kwila, o dikaza didi dikala ni twana, Nzambi wa atangela: “Vwalenu, mu sokoloke, mu izalese ixi yoso, mu i tolole.” (Dim. 1:28) Jihova wamesenene kwila, ene avwala twana ni kulanga kyambote o ixi ya abhele. Se Adá ni Eva a beleselele ni kubhanga ya abhingile Jihova, ene ni twana twâ eji bhanga mbandu ya mwiji wa Jihova, katé kuhádya ni hádya.

3. Mukonda dyahi tutena kuzwela kwila, Adá ni Eva exile ni kididi kya ujitu ku mwiji wa Jihova?

³ Adá ni Eva exile ni kididi kya ujitu ku mwiji wa Jihova. Kala kya kisoneka mu divulu dya Jisálamu 8:5, yalungi ni athu abhange Jihova, Davidi wambe: “Sumbala kyene, maji ki wamubhange, kifwa ki wa mu sokesa ni jianju; wa mu zwika kitundu kya ukota ni ujitu.” Mu kidi, o athu muxitu, kasokela ni jianju mukutena, mu unjimu ni uhete wakubhanga o ima. (Jisá.  103:20) Maji o athu “katolo kyavulu” mu ku asokesa ni ji anju. Kima kya madiwanu kyoso Nzambi kya bhange o jitata jetu jadyanga. Mwene wa abhana mwenyu wambote.

4. Ihi yabhiti ni Adá ni Eva mukonda dya kukamba kubelesela Jihova ni ihi itwandadilonga mu milongi yiyi?

 ⁴ Tuluwala mukwijiya kwila, mukonda dya kukamba kubelesela Jihova, Adá ni Eva atexi o ujitu wâ wa kubhanga mbandu ya mwiji wa Jihova. Kala kitwandamona mu milongi yiyi, kiki kyabhekela windwa kutwana twê. Maji o vondadi ya Jihova kiyalunguluka, kana. Mwene wamesena hanji kwila, o athu amubelesela, akala twana twê katé kuhádya ni hádya. Kya dyanga, twandamona kyebhi Jihova kyene mulondekesa kwila, etu twala ni valolo yavulu kumesu mê. Mukusuluka twandamona se ihi itwatokala kubhanga kindala phala kulondekesa kwila, twamesena mwene kubhanga mbandu ya mwiji wa Nzambi. Mukusukaku, twandazwela o mabesá andatambula o athu mu ixi, anda bhanga mbandu ya mwiji wa Jihova kate kuhádya ni hádya.

5. Kyebhi kitutena kulondekesa o kisakidilu kwa Nzambi mu kutubhanga mu kidifwanganu kyê?

⁵ Jihova watubhana kijingu mukutubhanga mu kidifwanganu kyê. (Dim. 1:26, 27) Kuma atubhange mu kidifwanganu kya Nzambi, etu tutena kukala ni kulondekesa o idifwa yavulu yambote, kala: O kuzola akwetu, kyadi, ufiyele ni kubatula o maka ni kuyuka. (Jisá. 86:15; 145:17) Setubhanga nguzu phala kukala ni idifwa yiyi, twandajingisa Jihova, twandalondekesa we kwila, twa akwa kusakidila. (1 Phe. 1:14-16) Se tubhanga o ima mu ukexilu usangulukisa Tata yetu ya dyulu, etu we twandasanguluka. Mukutubhanga mu kidifwanganu kyê, Jihova watubhana we o uhete wakukituka athu afwama kubhanga mbandu ya mwiji wê.

6. Kyebhi Jihova kya jingisa o athu kyoso kyabhange o ixi?

⁶ Jihova wapelepalala o ixi mu ukexilu wakatunda phala etu. Jihova wapelepalala o ixi phala o athu kutungamu, ni kithangana kyavulu ande dya kubhanga o diyala dya dyanga. (Jobe 38:4-6; Jel. 10:12) Kuma Jihova mukwa kubhanga mbote, wala ni ukexilu wakubhana, mwene wabhange ima yavulu phala kutusangulukisa. (Jisá. 104:14, 15, 24) Mukubhita kithangana, mwene waxinganeka mu ima yoso yabhange, “anga u ki mona kuma kyawabha.” (Dim. 1:10, 12, 31) Mwene wajingisa o athu mu ku abhana o ujitu wa “kutambula konda” dya ima yoso yabhange mu ixi. (Jisá. 8:6) Nzambi wamesena kwila, o athu ayuka, akatula mbote ni kulanga o ima yoso yafwama yabhange mu ixi. O kwila wene musakidila jinga Jihova mukutubhana o ikanenu yiyi yambote?

7. Kyebhi Josuwé 24:15 ilondekesa kwila o athu ala ni ufolo wakusola yandabhanga?

⁷ Jihova watubhana o ufolo wakusola o ima itwamesena o kubhanga. Etu tutena kusola o ima itwandabhanga kumwenyu wetu. (Tanga Josuwé 24:15.) O Nzambi yetu ya henda, usanguluka kyavulu kyoso ki tusola kumusidivila. (Jisá. 84:11; Jisa. 27:11) Ni ufolo wakusola utwalanawu, tutena kusola kubhanga ima yavulu yambote. Tala o phangu yatuxila Jezú.

8. Bhana phangu ilondekesa kyebhi Jezú kya kalakala ni ufolo wê wakusola.

⁸ Mukukayela o phangu ya Jezú, etu we tutena kuta o mbote ya akwetu kupholo dya jivondadi jetu. Sayi kizuwa, Jezú ni jipoxolo jê, atohokele kyavulu. Kyenyiki, asoto kuya ku kididi kyatululuka, amesenene kunyohaku bhofele. Maji ene katenene kunyoha. Sayi kibuka kya athu kya asange kwenyoko, ene amesenene kyavulu kwivwa o ilongesu ya Jezú. Maji Jezú ka akwatela njinda. Muveji dya kiki wa akwatela henda. Kyenyikiphe, ihi yabhange  Jezú? O Bibidya yamba: “Anga u kwata ku a longa ima yavulu.” (Mál. 6:30-34) Kyoso ki tu kayela o phangu ya Jezú, mukubhakula o kithangana ni nguzu yetu phala kukwatekesa akwetu, tufumanesa Tata yetu ya dyulu. (Mat. 5:14-16) Tulondekesa we kwa Jihova kwila, twamesena mwene kubhanga mbandu ya mwiji wê.

9. Ujitu webhi wakatunda wabhana Jihova ku athu?

⁹ Jihova wabhana ku athu o ujitu wakuvwala twana ni ku alonga kumuzola ni kumusidivila. Se eye utata, o kwila ubhana valolo ku ujitu yú wakatunda? Jihova wabhana maujitu avulu ku jianju, maji mwene ka abhana o ujitu wa kuvwala twana. Kyenyikiphe, se utata, londekesa kisakidilu ku ujitu yú wakusasa o twana. O jitata atambula o ujitu wakusasa o twana ni “ku a beta, ni ku a longa kyoso kya tumu Ngana.” (Efe. 6:4; Mate. 6:5-7; Jisá. 127:3) Phala kukwatekesa o jitata kusasa kyambote o twana twâ, o kilunga kya Nzambi kyene mubhana jifalamenda mwala o milongi ya Bibidya, kala madivulu, jividyu, mimbu ni milongi mu internete. Sé phata, kikale Tata yetu ni Mon’ê Jezú, azolo kyavulu o minzangala. (Luka 18:15-17) Kyoso o jitata kyadyelela kwa Jihova anga abhanga yoso phala kulanga o twana twâ, Jihova usanguluka. O Jitata jiji, jikwatekesa we o twana twâ kukala ni kidyelelu kya kubhanga mbandu ya mwiji wa Jihova katé kuhádya ni hádya!

10-11. Kidyelelu kyahi kyatubhana Jihova bhukaxi ka sata ya kukula?

¹⁰ Jihova wabhana Mon’ê umoxi’elele phala etu tutene kukala dingi ni kidyelelu kya kubhanga mbandu ya mwiji wê. Kala kya kitumbula mu  kaxi 4, kyoso Adá ni Eva kyate o kituxi, ene ni twana tweji vwala, kexile dingi ni ujitu wakubhanga mbandu ya mwiji wa Jihova. (Loma 5:12) Adá ni Eva akambe kubelesela Nzambi mulwelu. Kyenyiki, ene kexile dingi ni ujitu wakubhanga mbandu ya mwiji wa Nzambi. Abha ihi yeji bhita ni twana twâ? Mukonda dya henda yakwatela o athu, Jihova wajikula o njila phala oso amubelesela atene kubhanga dingi mbandu ya mwiji wê kuhádya. Mwene wabhange kiki bhukaxi ka sata ya Mon’ê umoxi’eléle, Jezú Kidistu. (Nzwá 3:16; Loma 5:19) Mukonda dya sata ya Jezú, 144.000 a athu afiyele, amu asola phala kukala twana twa Nzambi.—Loma 8:15-17; Dij. 14:1.

¹¹ Kwala we mazunda a athu afiyele amubelesela ni kubhanga o vondadi ya Nzambi. Ene ala ni kidyelelu kya kubhanga mbandu ya mwiji wa Nzambi, kyoso kyandabhita o polova yasukina, kudisukilu dya Midi ya Mivu. (Jisá. 25:14; Loma 8:20, 21) Mukonda dya kidyelelu kiki, ene éne mukwixana kyá Jihova, o Mubhanga wâ, kala “Tata.” (Mat. 6:9) O athu anda ku afukununa, andakala we ni ujitu wakudilonga yamesena Jihova kokwâ. O yó andabelesela o itumu yê, kudisukilu andabhanga we mbandu ya mwiji wê.

12. Kibhwidisu kyebhi kitwandadilonga kindala kiki?

¹² Kala kitwamono kyá, Jihova wenemubhanga kya ima yavulu phala kujingisa o athu. Mwene wasolo kyá o jiphange a a undu kala twana twê, o “mundu wavulu” ala we ni kidyelelu kyakukala twana twê kumundu wobhe kate kuhádya ni hádya. (Dij. 7:9) Ihi itutena kubhanga kindala phala kulondekesa kwa Jihova kwila twamesena mwene kubhanga mbandu ya mwiji wê katé kuhádya ni hádya?

13. Kima kyahi kiwatokala kubhanga phala kubhanga mbandu ya mwiji wa Nzambi? (Máluku 12:30)

¹³ Londekesa o henda yé kwa Jihova mu kumusidivila ni muxima wé woso. (Tanga Máluku 12:30.) Mu henda yê, Jihova watubhana  maujitu avulu. Maji nange o uhete wakumubheza, wala bhukaxi ka maujitu abeta dingi kota. Tulondekesa kwa Jihova kwila twamuzolo, mu “kwaluka o ijila yê.” (1 Nzw. 5:3) Jihova wamesena kwila, tubelesela o kitumu kya tubhana bhukaxi ka Jezú, kya kulonga maxibulu ni ku abatizala. (Mat. 28:19) Mwene watubhana we o kitumu kya kudizola mudyetu. (Nzwá 13:35) Oso abelesela o itumu yê, Jihova wanda ku abhana o ujitu wakubhanga mbandu ya mwiji wa abheziyê ku mundu woso.—Jisá. 15:1, 2.

14. Kyebhi kitutena kulondekesa kwila, twazolo mwene akwetu? (Matesu 9:36-38; Loma 12:10)

¹⁴ Londekesa henda kwa akwenu. O henda yene o kidifwa kya Jihova kyabeta kota. (1 Nzw. 4:8) Jihova mwene wadyanga kutulondekesa o henda, ande mwene dya kumwijiya. (1 Nzw. 4:9, 10) Tukayela o phangu yê, kyoso kitulondekesa we o henda kwa akwetu. (Efe. 5:1) Ukexilu umoxi wabetakota wa kulondekesa o henda ku athu, o kwa longa yalungu ni Jihova, mukithangana kitwala nakyu hanji. (Tanga Matesu 9:36-38.) Kyoso kitwakwatekesa, ene andatena kwijiya yatokala kubhanga, phala kubhanga we mbandu ya mwiji wa Nzambi. Kyoso o muthu kya mubatizala, twatokala kusuluka ni kumuzola ni kumuxila. (1 Nzw. 4:20, 21) Kyebhi ki tubhanga kiki? Tubhanga kiki mu kudyelela kwila, yoso yamubhanga, wamu ibhanga ni muxima wazele. Kyenyiki, se kitutendela mukonda dya mwene wabhange kima, kitwanda muxinganeka kyayibha. Muveji dya kumuxinganeka kyayibha, twandajingisa phangyetu mu kumukita kwila, mwene wabetakota, etu ndenge.—Tanga Loma 12:10; Fil. 2:3.

15. Nanyi twatokala kumulondekesa o henda ni kumubhangela o mbote?

¹⁵ Londekesa henda ni kubhanga o mbote ku athu oso. Se twamesena mwene kubhanga mbandu ya mwiji wa Jihova Nzambi katé kuhádya ni hádya, twatokala kukumbidila izwela o Mak’â Mê, ku mwenyu wetu. Mukifika Jezú walongo kwila, twatokala kulondekesa henda ni kubhanga o mbote ku athu oso, katé mwene o jinguma jetu. (Luka 6:32-36) Sayi ithangana, kitena kutubhonza kubhanga kiki. Se kiki kibhita, twatokala kuxinganeka ni kusota kubhanga o ima kala Jezú. Kyoso kitubhanga yoso itutena phala kubelesela Jihova ni kukayela o phangu ya Jezú, tulondekesa kwa Tata yetu ya dyulu kwila, twamesena mwene kubhanga mbandu ya mwiji wê katé kuhádya ni hádya.

16. Kyebhi kitutena kulanga o dijina dyambote dya mwiji wa Jihova?

¹⁶ Langa o dijina dyambote dya mwiji wa Jihova. Mu mwiji muxitu, muveji javulu, o ana’jindenge akayela o phangu yamakota mâ. Se o dikota dikumbidila o itumu ya Bibidya ku mwenyu wê, o ana’jindenge andakayela o phangu yê yambote. Maji se o dikota dibhanga ima yayibha o ndenge wandakayela we o phangu yê yayibha. Kyene kibhita ni mwiji wa Jihova. Se o Kidistá mu ukulu wexile fiyele, lelu ukituka mukwa kulungulula o kidi, ubhanga ufusa mba kima kyengi kyayibha, o jiphange jamukwa atena kukayela we o phangu yê yayibha. O athu abhanga kiki, amuxidisa o dijina dyambote dya mwiji wa abhezi a Jihova. (1 Tes. 4:3-8) Kitwatokala kukayela o phangu yayibha, kitwatokala we kwehela kima kyosokyoso kuzanga o ukamba wetu ni Tata yetu ya dyulu, Jihova.

17. Ibanzelu yebhi itwatokala kulenga ni mukonda dyahi?

¹⁷ Dyelela kwa Jihova muveji dya kudyelela o jimbote. Jihova wakanena kutubhana kudya, izwatu ni inzo, se tudyanga kusota o Utuminu ni uyukilu wê kumwenyu wetu. (Jisá. 55:22; Mat. 6:33) Se tudyelela mu kikanenu kiki, kitwandaxinganeka kwila, o jimbote kumundu yú, jene jandakutulanga ni kutusangulukisa.  Etu twejiya kwila, tukala ngó ni kusanguluka kwa kidi se tubhanga o vondadi ya Jihova. (Fil. 4:6, 7) Né mwene se twala ni kitadi kyasoko phala kusumba ima yavulu, twatokala kuxinganeka: O kwila twandakala ni kithangana ni nguzu phala kulanga o ima yoso yiyi? O kwila tutena kudikwatenena mu ima itwala nayu? Twatokala kulembalala kwila, Nzambi watubhana kikalakalu phala kubhanga ku mwiji wê. Kiki kilombolola kwila, kitwatokala kulanduka. Mukidi, etu kitwamesena kukayela o phangu yayibha ya munzangala wa diyala, waditunu kusidivila Jihova ni ujitu wakumusola kala mon’â Nzambi, mukonda dya kudikwatenena kujimbote jexile naju!—Mál. 10:17-22.

18. Mabesá ni kijingu kyebhi kyadikota kyandatambula o athu abelesela katé kuhádya ni hádya?

¹⁸ O athu abelesela andatambula kijingu kyadikota, o ujitu wakuzola ni kubheza Jihova katé kuhádya ni hádya! Yó ala ni kidyelelu kya kutunga mu ixi, andasanguluka we mukulanga o ixi ya abhana Jihova. Kwakambe ngó, o Utuminu wa Nzambi wandayudika, kubhangulula mba kufwamesa o ima yoso mu ixi. Jezú wandazubha o maka oso atubhekela Adá ni Eva, kyoso kyasolo kuxisa o mwiji wa Nzambi. Jihova wandafukununa mazunda ni mazunda a athu, wanda ku abhana o ujitu wa kukala ni mwenyu wakalelaku, sawídi yayuka, mu ixi yokitule kyá palayízu. (Luka 23:42, 43) Kyoso o athu oso abheza Jihova kyanda kituka athu ayuka, enyoso andatambula o “kitundu kya ukota ni ujitu” watumbula Davidi.—Jisá. 8:5.

19. Ihi itwatokala kulembalala jinga?

¹⁹ Se watokala ku “mundu wavulu,” eye wala ni kidyelelu kya katunda. Nzambi wakuzolo kyavulu, wamesena kwila eye ubhanga mbandu ya mwiji wê. Kyenyikiphe, bhanga yoso i utena phala kumusangulukisa. Izuwa yoso, watokala kulembalala o ikanenu ya Nzambi ni ku ilunda ku muxima wé. Bhana valolo ku ujitu wé wakubheza Tata yetu ya henda, wala kudyulu, kwata ni maku ayadi o kidyelelu kyé kya kumuximana katé kuhádya ni hádya!