1. Гава әм сәр тьштед кӧ Йаһоԝа әʹфьрандьнә дьфькьрьн, дьбәкә әм жь хԝә чь бьпьрсьн?

ГАВА әм сәр мәзьнайа гәрдуне, кӧ Йаһоԝа әʹфьрандийә, дьфькьрьн, дьбәкә готьнед Даԝьд зәбурбеж тен бира мә, йе кӧ жь Йаһоԝа пьрси: «Гава әз дина хԝә дьдьмә ль әʹзмана, кьред тʹьли-печʹийед тә, һиве у стәйрка, кʹижан кӧ тә щи-ԝар кьрьнә, иди чи йә инсан кӧ тӧ бир тини, йан жи бәнде ве дьне тӧ ле дьньһерʹи?» (Зәбур 8:3, 4). Мина Даԝьд, дьбәкә әм жи хԝә нав тʹәмамийа гәрдунеда бьчʹук һʹәсаб дькьн у әʹщебмайи нә кӧ Йаһоԝа дина хԝә дьдә мә. Ве готареда, әме бьвиньн ԝәки Йаһоԝа нә тʹәне бона мәрьвед пешьн, Адәм у Һеԝа, хәм дькьр, ле ӧса жи әԝи әԝана кьрьн пʹара малбәта хԝә.

2. Ԛьрара Йаһоԝа бона мәрьвед пешьн чь бу?

² Сәр әʹрде, Адәм у Һеԝа зарʹед Йаһоԝайә пешьн бун, у әԝ Баве ԝани әʹзмани бу. Йаһоԝа ԝанарʹа тʹәми да: «Шин бьн у ль һәв зедә бьн, әʹрде тʹьжи кьн у хԝәйитийе ле бькьн» (Дәстпебун 1:28). Йаһоԝа дьхԝәст кӧ Адәм у Һеԝайе зарʹ дьне хьстана у тʹәмамийа әʹрде бькьрана щьнәт. Һәгәр ԝана гӧһ бьдана Йаһоԝа у ль гора нета ԝи бьжитана, әԝана у зӧрʹәта ԝан ԝе һʹәта-һʹәтайе бьбуна пʹара малбәта Хԝәде.

3. Әм жь кʹӧ заньн ԝәки Адәм у Һеԝайе малбәта Йаһоԝада щийе мәхсус дьгьртьн?

³ Адәм у Һеԝайе малбәта Йаһоԝада щики мәхсус дьгьртьн. Зәбур 8:5-да Даԝьд дәрһәԛа ԝана ӧса гот: «Тә һьнәки жь мьлйакʹәта әԝ ньмьзтьр кьр, рʹумәт у рʹәԝшева әԝ хәмьланд». Рʹаст ә, ԛәԝат, билани у һʹӧнӧред мәрьва мина йед мәләка ниньн (Зәбур 103:20). Диса жи, Кʹьтеба Пироз дьбежә ԝәки мәрьв тʹәне «һьнәки» жь мәләка  ньмьзтьр ьн. Бәле, Йаһоԝа бь рʹасти жи жийинәкә хԝәш дабу мәрьвед пешьн!

4. Чь һатә сәре Адәм у Һеԝайе, у ве готареда әме дәрһәԛа чь хәбәр дьн?

 ⁴ Сәд һʹәйф, Адәм у Һеԝайе щийе хԝә малбәта Йаһоԝада ӧнда кьрьн. Ве готареда, әме бьвиньн ԝәки әԝ йәк чь ахьрийа хьраб ани сәре зӧрʹәта ԝан. Ле нета Йаһоԝа бона мәрьва нәһатийә гӧһастьне. Әԝ диса жи дьхԝазә, ԝәки мәрьвед гӧһдар бьбьнә зарʹед ԝи у һʹәта-һʹәтайе бьжин. Ньһа әме дина хԝә бьдьн кӧ Йаһоԝа ча да кʹьфше, ԝәки әԝ мә рʹумәт дькә. Паше, әме бьвиньн кӧ әм ида ньһада чаԝа дькарьн нишан кьн, ԝәки әм дьхԝазьн бьбьн пʹара малбәта Йаһоԝа. Хьлазийе, әме пебьһʹәсьн кӧ дьнйа тʹәзәда, зарʹед Йаһоԝа ԝе чь кʹәрәма бьстиньн.

5. Әм чаԝа дькарьн Йаһоԝа рʹумәт кьн?

⁵ Йаһоԝа әм сурәте хԝәда хӧльԛандьнә (Дәстпебун 1:26, 27). Жь бо ԝе йәке кӧ әм сурәте Хԝәдеда һатьнә әʹфьрандьн, әм дькарьн һʹӧнӧред баш ча һʹьзкьрьн, дьлрʹәʹми, амьни у һәԛийе нав хԝәда пешда биньн (Зәбур 86:15; 145:17). Гава әм һʹӧнӧред ӧса пешда тиньн, әм Йаһоԝа рʹумәт дькьн у рʹазибуна хԝә әʹйан дькьн (1 Пәтрус 1:14-16). Һәгәр әм бь рʹабун-рʹуньштьна хԝә дьле Баве хԝәйи әʹзмана ша бькьн, әме жи шабуне бьстиньн. Ӧса жи, әԝ йәк кӧ Хԝәде әм сурәте хԝәда әʹфьрандьнә те һʹәсабе, ԝәки әм дькарьн бьбьн мәрьвед лайиԛи малбәта ԝи.

6. Чахе Йаһоԝа әʹрд һазьр дькьр, әԝи чаԝа мәрьв рʹумәт кьрьн?

⁶ Йаһоԝа маләкә хԝәш дайә мә. Пешийа кӧ Йаһоԝа мәрьвед пешьн әʹфьранд, әԝи әʹрд бона ԝан һазьр кьр (Ибо 38:4-6; Йерәмйа 10:12). Йаһоԝа йәки хәмкʹеш у мәрʹд ә, ләма жи әԝи гәләк тьштед баш әʹфьрандьнә, ԝәки әм бәхтәԝар бьн (Зәбур 104:14, 15, 24). Гава Хԝәде сәр кьред дәсте хԝә ньһерʹи, әԝи дит кӧ һәр кьред ԝи «гәләки ԛәнщ бун» (Дәстпебун 1:10, 12, 31). Йаһоԝа мәрьва ль сәр һʹәму әʹфьринарʹа «сәрԝер дани» (Зәбур 8:6). Гәло әв йәк ԛәдьрәки мәзьн нинә? Нета Хԝәде әв ә, ԝәки мәрьвед беԛьсур һʹәта-һʹәтайе тʹәбийәте хԝәй кьн у жь ԝе ләзәте бьстиньн. Гәло тӧ рʹазибуна хԝә бона ве созе Йаһоԝа һәр тʹьм әʹйан дьки?

7. Йешу 24:15 ча зәлал дькә, ԝәки азайа мәйә бьжартьне һәйә?

⁷ Йаһоԝа азайа бьжартьне дайә мә. Әв йәк те һʹәсабе, ԝәки әм дькарьн хԝәха сафи кьн чаԝа бьжин (Йешу 24:15 бьхунә). Гава әм сафи дькьн Хԝәдерʹа хьзмәт кьн, дьле ԝи гәләк ша дьбә (Зәбур 84:11; Мәтʹәлок 27:11). Бь сайа азайа бьжартьне, әм дькарьн гәләк сафикьрьнед баш бькьн. Ԝәрен әм дина хԝә бьдьнә мәсәла Иса Мәсиһ.

8. Иса азайа хԝәйә бьжартьне чаԝа дьда хәбате?

⁸ Мина Иса Мәсиһ, әм жи дькарьн сафи кьн кӧ бькʹәвьнә һʹәйра мәрьва у ԝана сәр хԝәрʹа бьгьрьн. Щарәке, гава Иса у шагьртед ԝи гәләк ԝәстийайи бун, ԝана щики рʹьһʹәт дьгәрʹийа, ԝәки һʹәвәки һеса бьн. Ле әԝана нькарьбун һеса буна, чьмки әʹлаләтәкә мәзьн пәй ԝан чу у дьхԝәстьн, ԝәки Иса ԝана һин кә. Дәԝса кӧ әʹщьз бә, дьле Иса сәр ԝан шәԝьти. Ләма жи әԝи «дәстпекьр гәләк тьшт әԝ һин кьрьн» (Марԛос 6:30-34). Һәгәр әм жи мина Иса ԝәʹдә у ԛәԝата хԝә бона һʹалхԝәшийа кәсед дьн хәрщ бькьн, әме бь ве йәке наве Баве хԝәйи  әʹзмана рʹумәт кьн (Мәтта 5:14-16). Ӧса жи, бь ве йәке әм нишан дькьн, ԝәки дьхԝазьн бьбьн пʹара малбәта Йаһоԝа.

9. Чь пʹешкʹеша мәхсус Йаһоԝа дайә мәрьва?

⁹ Йаһоԝа мәрьв пе мәщала зарʹанине әʹфьрандьнә у щабдари дайә ԝан, ԝәки зарʹед хԝә һин бькьн Хԝәде һʹьз кьн у ԝирʹа хьзмәт кьн. Һәгәр зарʹед тә һәнә, гәло тӧ ве пʹешкʹеша мәхсус ԛимәт дьки? Һәла бьфькьрә, Йаһоԝа гәләк рʹумәт дайә мәләка, ле диса жи әԝи мәщаләкә ӧса нәдайә ԝан. Ләма жи ԛимәта ве пʹешкʹеше бир нәкә у бьшекьринә. Хԝәде дьхԝазә ԝәки де-бав мәзьнкьрьна зарʹа ча щабдарикә пироз һʹәсаб кьн у зарʹед хԝә «бь ширәт у һинкьрьна Хӧдан мәзьн кьн» (Әфәси 6:4; Ԛануна Дӧщари 6:5-7; Зәбур 127:3). Сәва кӧ али де-бава бькьн, тʹәшкиләта Йаһоԝа гәләк һащәтед ль сәр һʹиме Кʹьтеба Пироз дәрхьстьнә, мәсәлә әʹдәбйәт, видео, мьԛам у готаред сәр малпәре. Бәле, һьм Баве мәйи әʹзмана һьм жи Кӧрʹе ԝи зарʹ у щаһьлед мә гәләк һʹьз дькьн (Луԛа 18:15-17). Гава де-бав баԝәрийа хԝә Йаһоԝа тиньн у чь жь дәсте ԝан те дькьн, ԝәки зарʹед хԝә бь щурʹе лапи баш мәзьн бькьн, Йаһоԝа гәләк ша дьбә. Де-бавед ӧса зарʹед хԝәрʹа рʹе вәдькьн, ԝәки әԝана жи һʹәта-һʹәтайе бьбьн пʹара малбәта Йаһоԝа!

10-11. Йаһоԝа бь сайа ԛӧрбана Иса чь рʹе бона мә вәкьр?

¹⁰ Йаһоԝа Кӧрʹе хԝәйи дәлал бәрва да, сәва кӧ әм диса бькарьбьн бьбьн пʹара малбәта Ԝи. Чаԝа әм жь  абзаса 4 пеһʹәсийан, Адәм у Һеԝа жь малбәта Йаһоԝа һатьбун дәрхьстьне, у ве мәщале бона зарʹед хԝә жи ӧнда кьрьн (Рʹомайи 5:12). Адәм у Һеԝайе бь һʹәмде хԝә мьԛабьли Хԝәде рʹабун, ләма жи әԝана һежа нибун, ԝәки малбәта Йаһоԝада бьминьн. Ле зӧрʹәта ԝан? Йаһоԝа мәрьва һʹьз дькә у әԝ мәщале дьдә йед гӧһдар, ԝәки бьбьнә пʹара малбәта ԝи. Әԝи бь сайа  ԛӧрбана Кӧрʹе хԝә Иса Мәсиһ мәрʹа рʹе вәкьр (Йуһʹәнна 3:16; Рʹомайи 5:19). Ахьрийеда сәр һʹиме ԛӧрбана Иса, 144 000 мәрьвед амьн мәщал стандьн кӧ бьбьн кӧрʹед Хԝәде (Рʹомайи 8:15-17; Әʹйанти 14:1).

¹¹ Хенщи ԝе йәке диса бь милйона мәрьв гӧһ дьдьн Хԝәде у ԛьрара  ԝи тиньн сери. Һәгәр әԝана щерʹьбандьна пашьнда демәк хьлазийа Сәрԝертийа Һʹәзарсали йа Иса Мәсиһ амьн бьминьн, әԝана ԝе бь тʹәмами бьбьн әндәмед малбәта Йаһоԝа (Зәбур 25:14; Рʹомайи 8:20, 21). Сәр һʹиме ве һевийе, әԝана ида ньһада Йаһоԝа ча «Бав» нав дькьн (Мәтта 6:9). Ӧса жи, мәщала кәсед кӧ жь мьрьне рʹабьн ԝе һәбә, ԝәки ԛьрар у ԛанунед Йаһоԝа һин бьн. Һәгәр әԝана рʹебәрийа ԝи ԛәбул бькьн, әԝе жи бькарьбьн бьбьн пʹара малбәта ԝи.

12. Әме ньһа щаба кʹижан пьрсе бьстиньн?

¹² Ча мә дит, Йаһоԝа бона мәрьва гәләк гав авитьнә, йед кӧ дьдьнә кʹьфше, ԝәки әԝ ԝана ԛимәт дькә. Әԝи кәсед бь рʹӧһʹе пироз бьжарти ида кьрьнә кӧрʹед хԝә, у дьнйа тʹәзәда мәрьвед жь ‹әʹлаләта мәзьн› жи ԝе бькарьбьн бьбьн зарʹед ԝи (Әʹйанти 7:9). Гәло әм ида ньһада дькарьн чь бькьн, ԝәки Йаһоԝарʹа бьдьнә кʹьфше, кӧ әм дьхԝазьн бьбьн пʹара малбәта ԝи сәр һʹәта-һʹәтайе?

13. Сәва кӧ әм бьбьн пʹара малбәта Хԝәде, гәрәке әм чь бькьн? (Марԛос 12:30)

¹³ Бь тʹәмамийа дьле хԝә Йаһоԝарʹа хьзмәт бькә у бь ве йәке бьдә кʹьфше ԝәки тӧ ԝи һʹьз дьки (Марԛос 12:30 бьхунә). Мә гәләк тьштед ԛәнщ жь  Хԝәде стандьнә. Пʹешкʹеша һәри ԛимәт әв ә, ԝәки әм дькарьн ԝирʹа хьзмәт бькьн. Гава әм «тʹәмийед ԝи дьԛәдиньн», әм нишан дькьн ԝәки әм ԝи һʹьз дькьн (1 Йуһʹәнна 5:3). Бь һʹӧкӧме кӧ Иса жь Баве хԝә стандьбу, әԝи тʹәми да, ԝәки әм, мәрьвед жь һʹәму мьләта бькьн шагьртед ԝи у ԝана бьньхӧминьн (Мәтта 28:19). Ӧса жи әԝи тʹәми да, ԝәки әм һәвдӧ һʹьз бькьн (Йуһʹәнна 13:35). Бәле, Йаһоԝа ԝе кәсед гӧһдар бькә пʹара малбәта хԝәйә һʹәмдьнйайе (Зәбур 15:1, 2).

14. Әм чаԝа дькарьн һʹьзкьрьне әʹйан кьн? (Мәтта 9:36-38; Рʹомайи 12:10)

¹⁴ Мәрьва һʹьз бькә. Һʹьзкьрьн һʹӧнӧре Йаһоԝа йа сәрәкә йә (1 Йуһʹәнна 4:8). Пешийа кӧ мә ԝи нас кьр, Йаһоԝа ида мә һʹьз дькьр (1 Йуһʹәнна 4:9, 10). Гава әм мәрьва һʹьз дькьн, әм чʹәʹв дьдьнә Йаһоԝа (Әфәси 5:1). Һʹәта ԝәхт һәйә, ԝе баш бә кӧ әм али мәрьва бькьн, ԝәки әԝана Йаһоԝа нас бькьн. Бь ве йәке, әме нишан кьн, ԝәки әм мәрьва һʹьз дькьн (Мәтта 9:36-38 бьхунә). Бь сайа ве йәке, әм мәщале дьдьн ԝан кӧ әԝ жи бьбьн нәфәред малбәта Йаһоԝа. Паши кӧ кәсәк бе ньхӧмандьне жи, гәрәке әм бәрдәԝам кьн ԝи һʹьз бькьн у ԛәдре ԝи бьгьрьн (1 Йуһʹәнна 4:20, 21). Гәло әм чаԝа дькарьн ве йәке бькьн? Мәсәлә, гәрәке әм нетед ԝи нәкьнә бьн шьке. Һәгәр әм кьред ԝи фәʹм нәкьн жи, гәрәке әм нәфькьрьн кӧ нета ԝи хьраб ә. Гәрәке әм ԛәдьре һәвдӧ бьзаньбьн у кәсед дьн сәр хԝәрʹа бьгьрьн (Рʹомайи 12:10 бьхунә; Филипи 2:3).

15. Гәрәке әм кʹерʹа дьлрʹәʹми у ԛәнщийе әʹйан бькьн?

¹⁵ Һьндава кәсед дьн дьлрʹәʹм у ԛәнщ бә. Һәгәр әм дьхԝазьн бьбьн пʹара малбәта Йаһоԝа, гәрәке әм ль гора Хәбәра ԝи бьжин. Мәсәлә, Иса һин дькьр ԝәки әм гәрәке һьндава һʹәму мәрьва у һәла һе дьжмьнед хԝәда жи, дьлрʹәʹм у ԛәнщ бьн (Луԛа 6:32-36). Һәгәр әв йәк мә зор те, ԝе баш бә кӧ әм фькьр у кьред Иса хԝәрʹа бькьн мәсәлә. Гава әм чь жь дәсте мә те дькьн кӧ һьм гӧһ бьдьн Йаһоԝа һьм жи чʹәʹв бьдьнә Иса, әм нишан дькьн ԝәки дьхԝазьн бьбьн пʹара малбәта Баве хԝәйә әʹзмана.

16. Әм чаԝа дькарьн наве малбәта Йаһоԝа бьпарезьн?

¹⁶ Наве малбәта Йаһоԝа бьпарезә. Гәләк малбәтада, кӧрʹе бьчʹук гәләк щар чʹәʹв дьдә бьре хԝәйи мәзьн. Һәгәр бьре мәзьн ль гора принсипед Кʹьтеба Пироз дьжи, әԝе бьре хԝәйи бьчʹукрʹа бьбә мәсәләкә баш. Ле һәгәр бьре мәзьн бь жийинәкә хьраб дьжи, йе бьчʹук жи дьԛәԝьмә чʹәʹв бьдә ԝи. Малбәта Йаһоԝада жи ӧса йә. Һәгәр Мәсиһик жь рʹастийе дәрдькʹәвә у дьбә рʹабәр, йан жи дәстпедькә бенамусийе у тьштед һʹәрам бькә, дьбәкә йед дьн жи чʹәʹв бьдьнә ԝи. Кәсед ӧса, наве малбәта Йаһоԝа рʹәш дькьн (1 Тʹесалоники 4:3-8). Гәрәке әм чʹәʹв нәдьнә кәсед кӧ хьрабийе дькьн, у изьн нәдьн ԝәки тьштәк мә жь Баве мәйи дьлован дур хә.

17. Гәрәке әм кʹижан ньһерʹандьна нәрʹаст рʹәт кьн у чьма?

¹⁷ Баԝәрийа хԝә нә кӧ тьштед материйали, ле Йаһоԝа бинә. Йаһоԝа соз дьдә кӧ һәгәр әм бәри пешьн Пʹадшатийа ԝи бьгәрʹьн у ль гора принсипед ԝи бьжин, әԝе хԝарьн, кʹьнщ у щи-сьтʹар бьдә мә (Зәбур 55:22; Мәтта 6:33). Һәгәр әм ве йәке бира хԝәда хԝәй кьн, әме һевийа хԝә һәбуна ве дьнйайева гьре нәдьн у нәфькьрьн ԝәки әв дьнйа дькарә мә бьпарезә у бәхтәԝарийе бьдә мә. Әм заньн сәва кӧ әм әʹдьлайа дьл бьстиньн, гәрәке әм ԛьрара Йаһоԝа биньн сери  (Филипи 4:6, 7). Һәгәр дәсте мәда һәбә кӧ гәләк тьшта хԝәрʹа бькʹьрьн жи, ԝе баш бә кӧ әм жь хԝә бьпьрсьн гәло һежа йә кӧ әм ԝәхт у ԛәԝата хԝә бь зедәйи сәр тьштед ӧса хәрщ бькьн. Ӧса жи, ԝе баш бә кӧ әм жь хԝә бьпьрсьн гәло дьле мә тьштед материалива чьԛас гьредайи йә. Гәрәке әм бир нәкьн кӧ Хԝәде шьхӧләки фәрз дайә мә. Демәк, әм гәрәке изне нәдьн кӧ һʹьше-аԛле мә бь зедәйи сәр тьштед дьн бә. Әм һьлбәт нахԝазьн бьбьн мина ԝи мере дәԝләти, йе кӧ дькарьбу Йаһоԝарʹа хьзмәт бькә у бьбә кӧрʹе ԝи, ле әԝи ве мәщале рʹәт кьр, чьмки тьштед материали дьһа зедә һʹьз дькьр (Марԛос 10:17-22).

18. Мәрьвед гӧһдар ԝе чь рʹумәт у кʹәрәма бьстиньн?

¹⁸ Мәрьвед гӧһдар ԝе кʹәрәма һәри мәзьн бьстиньн: Әԝана ԝе һʹәта-һʹәтайе Йаһоԝа һʹьз бькьн у ԝирʹа хьзмәт бькьн! Кәсед кӧ һивийа жийина сәр әʹрде нә, ԝе һʹәта-һʹәтайе жь жийина щьнәтеда ләзәте бьстиньн. Дәмәкә незикда, Пʹадшатийа Хԝәде ԝе әʹрде диса бькә щьнәт. Иса Мәсиһ ԝе ахьрийа хьраб кӧ жь бо гӧне Адәм у Һеԝайе пешда һат, кʹокева бьдә һьлдане. Йаһоԝа ԝе бь милйона мәрьв жь мьрьне рʹакә у мәщале бьдә ԝан һʹәта-һʹәтайе бь сьһʹәта-ԛәԝата баш щьнәтеда бьжин (Луԛа 23:42, 43). Чахе хьзмәткʹаред Йаһоԝа бьбьн беԛьсур, әԝе «рʹумәт у рʹәԝшева» бенә хәмьландьне (Зәбур 8:5).

19. Гәрәке әм чь бир нәкьн?

¹⁹ Һәгәр тӧ пʹара ‹әʹлаләтәкә мәзьн и›, һевийа тә гәләк хԝәш ә. Хԝәде тә гәләк һʹьз дькә у әԝ дьхԝазә ԝәки тӧ бьби пʹара малбәта ԝи. Ләма жи, чь жь дәсте тә те бькә ԝәки әԝ жь тә рʹази бә. Һәр рʹож созед Хԝәде бинә бира хԝә. Ве мәщале ԛимәт бькә кӧ тӧ дькари ԝирʹа хьзмәт бьки у ша бә ԝәки те бькарьби һʹәта-һʹәтайе пәсне наве ԝи бьди!