1. Hatulaalangil ha biit byoos bidy Yehow muhang, tumvumvw bicy?

HATULAALANG bwa biit byoos bidy Yehow muhang, twiiyiiy kwiiyumvw bu mumvwiil mumb a misambw Davih waakady mujooj Yehow mu diisambil neey: “Hanaataatal diiwul diibuh, midimw ya bikam biibuh, suuny ni mitoot biwudy mulongolol. Muut ufwaafw i ngany bwiibuh kwiikal nend mu meej, mwaan a muut i ngany bwiibuh kumutacil?” (Mis. 8:3, 4, NWT) Teng bu Davih, tumweemweek tuut tukeeh, hatwiifwaafwanyikij ni cibwaash-bwaash cidy Yehow muhang. Cikwaabw, tudy ni musangal bwa mudy Yehow wiitacish bwiitut. Waakady mwiitacish bwa baat ba kuuhal, Adam ni Eev, ni waakady mwiibakidil mu cisak cindiy.

2. I biny byaakady Yehow mulongolweel baan bindiy ba kuuhal ba ha bulab?

² Adam ni Eev baakady baan ba kuuhal baakady Yehow muhang ha bulab ni Yehow waakady Taat aababw wa mu diiwul waakady mwiibakat. Waakady ukaam bwa biin maluw aab bashaal cisak citam. Ni kwiibambiley neey: “Lelanganaay, nuvulanganaay, nwiiwuujaay bulab teeteet. Dyaacilaay bya ha bulab byoos haash.” (Kbwa. 1:28) Waakady mukat bwa balel baan ni bwa balam bwiikaj bwaababw bwa ha bulab. Bu bab bakooyel ni balond cyaakady Yehow mwiibambil bwa kulong, Adam ni Eev ni lelakan yaababw, baakady mwa kushaal biin mu cisak cya Mawej buyiil.

3. Bwabiny tudy mwa kuleeb neey: Adam ni Eev baakady biin-biin ni cyaab cilengel mu cisak cya Yehow?

³ Adam ni Eev baakady ni cyaab cilengel mu cisak cya Yehow. Teng mudyobw bafund mu mukand a Misambw 8:5 ni dimanyish dya kuush kwa diibej, Davih uleeleeb bwa Yehow, Hang a baat neey: “Uw waakady mumuweekesh bikeeh kuush kwa banjel, ni udy mumuvwiik ciful cya butumby ni buneem.” Biin-biin, baat kabiinoh bend ni bukash ni meej ni biheel byaakaabumw  ni banjel. (Mis. 103:20) Biin-biin, baat kabiin teng “kuush” kwa banjel ba bukash buvul. Bikeekemesh! Haakady Yehow muhang balel biitut ba kuuhal, waakady mwiibakish biin-biin shikacil mulengel!

4. I cihet kaay cibiih cimweekel haakady Adam ni Eev bakufwaabeel Yehow, ni i biny bitwiikal mwa kwiisambil mu ciin bwaal eecy?

 ⁴ Bya kakunying, Adam ni Eev bajimbajil cyaab cyaababw mu cisak cya Yehow. Bwaal oobw, bwaakady bukaamin lelakan yaababw lutat lukasakan menmen, ki mutwiiyiiy kwiibital mu ciin bwaal eecy. Ki myand yidy Yehow mulongolol kayiishoh bend yishiituluk. I mukat bwa baat bamukokooyel biikal baan bindiy buyiil. Twanj twiisambilaayaak ha mushind uleeleej neey: Yehow i mwiitwangat ni buseeb. Cikwaabw, twiiyiiy kwiisambil ha citudy mwa kulong kaabaak bwa kuleej neey: tudy bakat kwiikal biin mu cisak cya Mawej. Haanyim, twiiyiiy kwiisambil ha myand ya musangal yiikal baan ba Yehow mwa kwiiy kuhet ha bulab buyiil.

5. I mushind kaay utudy mwa kwaakish Yehow lutumb?

⁵ Yehow i mwiitwambik luumw hadyey mwiituhang mu ciifwany cindiy. (Kbwa. 1:26, 27) Bu mudy Mawej mwiituhang ku cimfwany cindiy, tudy mwa kuleej biikadil bindiy bilengel bivul, bu mudy lukat, lus, lulamat ni buwaakan. (Mis. 86:15; 145:17) Bu mutuleeleej biikadil eeby, twaakaakish Yehow lutumb ni tuleeleej mutumufwiifwiijok. (1 Py. 1:14-16) Hatuloolong myand mu mushind a kusangeej Taat iitut a mu diiwul, twiiyiiy kwiikal ni musangal. Ni cikwaabw, mutudy bahang ni biikadil bya bwiin bya Yehow, tudy mwa kushaal baat badyey mukat mu cisak cindiy.

6. I mushind kaay udy Yehow mwambik baat luumw?

⁶ Yehow i mwiitulongolweel cyaab cilengel ciitut kushikat. Mafuk mavul kuuhal kwa kuhangey muut a kuuhal, Yehow waakady mulongol bulab bwa baat kushikatoh. (Yoobw 38:4-6; Jer. 10:12) Bu mudyey mulengel myand ni muut waakakishangan biit, Yehow i mwiitwaakish biit bivul bidyey muhang bwiitut kwiikal ni musangal. (Mis. 104:14, 15, 24) Hahicil ciisang, utadil neey: “byoos bilongeley byaakady bilengel.” (Kbwa. 1:10, 12, 31) Waakady muleej mudyey wambik baat luumw ha kwiibakish “bukaleng hamut a biit byoos bidyey muhang” ha bulab. (Mis. 8:6, NWT) Mawej waakady mukat bwa baat bawaakan biikal ni musangal weeh bwa kulam biit bilengel menmen bidyey muhang buyiil. Udyaakal ufwiijook Yehow bwa mulay indiy mulengel oow eeny?

7. I mushind kaay udy mukand a Jozuweh 24:15 uleej mudy muut mwiikal ni mushind a kwiisungwiil myand?

⁷ Yehow i mwiitwaakish mushind a kwiisungwiil myand. Tudy mwa kwiisungwiil myand yitudy mwa kulong mu shikacil iitut. (Bal Jozuweh 24:15.) Bukash bwa kusungul cya kulong bibubiibikan neey: kwiisungwiil kwa myand. Mawej iitut a lukat usaasangal hatwangangat dihangadik dya kumukadil mudimw. (Mis. 84:11; Tus. 27:11) Tudy mwa kukal mudimw bilengel ni kwiisungwiil kwiitut kwa myand hatwangangat mahangadik malengel. Tutalaay cileejel cidy Yeez mwiitushiil.

8. I mushind kaay udy Yeez mukal mudimw ni bukash bwindiy bwa kwiisungwiil kwa myand?

⁸ Kulond cileejel cya Yeez, kudy mwa kwiitwambulwiish bwa kulek kukaam bilengel biitut kaayeet, ki tukaam musangal a bakwaabw. Diifuk dikwaabw haakady Yeez ni bapostol bindiy bakooy menmen, bakaamin cyaab cilengel bwaabab kwiiweejeloh. Ki byaakady bikasakan bwaabab kwiiweejobw. Baat bavul biiyil kwiibasangan, bakaam bwa Yeez i balongweesh. Ki Yeez, kaakadyoh bend mufulul mund. Hamut a kufululey mund, waakady mumvwiil baat lus. Nook, i biny bilongeley? “Utangil kwiibalongweesh myand yivul.”  (Mark 6:30-34) Hatuloolond cileejel cya Yeez, hakutwaal diib diitut ni bukash bwiitut bwa kwambulwiish baat bakwaabw, twaakaakish Taat iitut a mu diiwul lutumb. (Mat. 5:14-16) Cikwaabw, tuleeleej Yehow neey: tudy bakat kwiikal biin mu cisak cindiy.

9. Balel bady mwa kulam biny mu meej?

⁹ Yehow i mwaakish baat mushind a kwiikalobw ni baan, mwiibakish ni bujit bwa kwiibalongweesh bwa bamukat ni bamukadil mudimw. Uw mwiikal mulel, wanyanyishok kuh kwa habwaah kwa Mawej eeny? Banjel bady ni midimw yivul yidy Yehow mwiibakish bwa kumuh lutumb, ki kabiin ni dyakatook dya kulelobw baan. Ni bwaal oobw mu meej, baat boos bakaakashish baan, bikaam batal bu dyakatook bwa mushind udyobw bahet mudimw oow. Iibakish balel mudimw a kukashish baan baababw “ha kwiibabel ni kwiibakand ni may ma kudy Mawej.” (Ef. 6:4; Mmu. 6:5-7; Mis. 127:3) Bwa kwambulwiish balel, bulongolody bwa Mawej i buhatul mikand yumvumvwiij myand ya mu Bibl, bu mudy mikand, video, misambw, ni biin bwaal bidy mu sit. Biin-biin, Taat iitut a mu diiwul ni Mwaan indiy, i bakat baan batofw. (Luuk 18:15-17) Hady balel bateekel Yehow micim ni balong mwaababw moos bwa kulam baan baababw ba buseeb buvul, Yehow usaasangal bikasakan. Ni balel ba nook, bahehetesh baan baababw mushind a kushaal biin mu cisak cya Yehow buyiil!

10-11. I biny bidy Yehow mwiitulongolweel ku dyambulwiish dya cya kukuul naacy baat?

¹⁰ Yehow i mutwaal Mwaan indiy a buseeb buvul menmen bwa tuhet mushind a kushaal cikwaabw biin mu cisak cindiy. Teng mudyeby bileej mu  cikos 4, Adam ni Eev bajimbajil cyaab cyaababw mu cisak cya Yehow, ni bajimbajil cyaab cyaakady baan baababw mwa kwiikal. (Rom 5:12) Adam ni Eev baakady bakufwaabeel Mawej ku makand, ki bwabiny waakady mwiibaful mu cisak cindiy. Ki, i biny byaakady mwa kulongekel baan baababw? Yehow i mukat baat bamukookooyel, ki bwabiny wiibaakaakish bikaakaamobw bwa biikal baan mu cisak cindiy. Ulongel nook hatwaadiley Mwaan indiy a diimung bu mulambw, Yeez Krist. (Jah 3:16; Rom 5:19) Bu cihet cya ku mulambw a Yeez, baat 144 000 batuutungunuk ni kulam mucim mutook, Mawej wiibiitaatab bu baan bindiy.—Rom 8:15-17; Yis. 14:1.

¹¹ Cikwaabw, baat miliyo yivul bady balamat Mawej, bamukookooyel ni baloolong lukat lwindiy. Bady ni mushind a kwiikal biin-biin biin mu cisak cya Mawej iikalobw mwa kutaatameen diiteet dya bulekel ku bulekel kwa mivw cinun. (Mis. 25:14; Rom 8:20, 21) Ni bwaal oobw mu meej, bady mwa kubiikan Yehow Cyakahang aabab neey: “Taat.” (Mat. 6:9) Cikwaabw, biikal mwa kusanguk biikaakal ni mushind a kulong myand idy Yehow mwiibalomb bwa kulong. Baat boos biikal mwa kukooyel ku may ma Mawej, biiyiiy kushaal byaabw biin mu cisak cindiy.

12. I diijooj kaay ditwiiyiiy kwaalabul kaabaak?

¹² Teng mutudy biibital, Yehow uleeleej mu myand yivul mudyey wambik baat luumw. Wangangat bumb diisaby bu baan bindiy, ni i mwaakish “baat bavul beeh” kutakamin bwa kushaalobw baan bindiy mu bulongolody buhyaabuhy. (Yis. 7:9) I biny bitudy mwa kulong kaabaak bwa kuleej Yehow neey: tudy bakat kushaal biin mu cisak cindiy buyiil?

13. I biny bitudy mwa kulong bwa kwiikal biin mu cisak cya Mawej? (Mark 12:30)

¹³ Leej muwudy mukat Yehow hakumukadil mudimw ni mucim iibuh woos. (Bal Mark 12:30.) Biit byoos bilengel bitudy naaby i Mawej udy mwiitwaakisheby, misang yikwaabw  cyumw cya ku byabukish bihit kulengel bidyey mwiitwaakish, i mushind utumuhahambidil. Tuleeleej neey: tudy bakat Mawej, ‘hatukookooyel ku may mindiy.’ (1 Jah 5:3) Yehow i mukat bwa tukooyel diiy dyaakady Yeez mwiitwaakish bwa kwaalabul baat bwa bashaal biiyij, ni kwiibaabatiiz. (Mat. 28:19) Cikwaabw, i mwiituh diiy ditut kukatangan. (Jah 13:35) Yehow wiiyiiy kwaakidil bakookooyel ku may mindiy bwa kwiikalobw bahambidil ba mu cisak cindiy cya ha bulab butuutul.​—Mis. 15:1, 2.

14. I mushind kaay utudy mwa kuleej bakwaabw lukat? (Matewus 9:36-38; Biin Rom 12:10)

¹⁴ Kat baat bakwaabw. Lukat i cikadil citam cya Yehow. (1 Jah 4:8) Yehow waakady mwiituleej lukat kuuhal kwiitut ku mumanyik. (1 Jah 4:9, 10) Tumwiidiidikij hatukaakat bakwaabw. (Ef. 5:1) Mushind aakaabumw mulengel wa kuleej baat lukat i kwiibambulwiish bwa bamanyik myand habitaatal Yehow hacidyok diib aah. (Bal Matewus 9:36-38.) Hakulong nook, twiibaakaakish mushind a kwiikalobw biin mu cisak cya Mawej. Haanyim a muut muman kutambul, bikaam tutungunuk ni kumuleej lukat ni kaneemw. (1 Jah 4:20, 21) I mushind kaay utudy mwa kulong nook? Bwaal bwaakaabumw, tudy mwa kumuleej myand yilengel yidyey mwa kuteekel micim bwa kikaloh bend ni miland. Cikwaabw, tut katuy bumvw bwabiny kiish ulong bwaal kahand, katwaakulangoh bend neey: wiibuloolong bwa tubingil twindiy kaayend. Hamut a kulong nook, twiiyiiy kuleej mutwangangat mwiin-kweet ni buseeb, hatumutaatal neey: i mwiituhitok.​—Bal Biin Rom 12:10; Fili. 2:3.

15. I bangany batudy mwa kuleej lus ni mucim mulengel?

¹⁵ Leej baat boos lus ni mucim mulengel. Tut bakat kwiikal biin mu cisak cya Yehow buyiil, bikaam tukooyel diiy dya Mawej mu shikacil iitut. Cileejel, Yeez waakady mwiitulongweesh bwa twiikal tuleej baat boos lus ni mucim mulengel ning balwiish biitut. (Luuk 6:32-36) Twiiyiiy kutal neey: hady mafuk mahit biiyiiy kwiitukasakeen bwiitut kulong nook. Biby nook, bikaam tulong ni tulong myand teng bu Yeez. Hatwiikaakashishomw bwa kukooyel Yehow ni tulond mu diikas dya Yeez, tuleeleej Taat iitut a mu diiwul mutudy bakat kwiikal biin mu cisak cindiy buyiil.

16. I mushind kaay utudy mwa kulam luumw lwa cisak cya Yehow?

¹⁶ Lam luumw lwa cisak cya Yehow. Mu cisak cyoos eecy, mwaan-mulum ucidy mutofw udyaakal teng wiidikij myand yiloolong yaayend mwaan-mulum. Iikal yaayend ukooyel may matam ma mu Bibl mu shikacil indiy wiiyiiy kumushiil cileejel cilengel. Ki hady yaayend ulong myand yibiih, mutofw wiiyiiy kulond teng mu diikas dya yaayend aady. I bya mushind aakaabumw ni mu cisak cya Yehow, hady mwiin Krist wa lulamat utwaadij kwiikal ni meej ma batontolody, utwaadij shikacil a busenj eecy ulond njil mubiih, bakwaabw bady mwa kuteet kumulond bwa kulong myand yibiih. Baat baloolong nook, banyanyang luumw lwa bahambidil bady mu cisak cya Yehow. (1 Tes. 4:3-8) Bikaam tulek kulond bileejel bya baat babiih ni katwiitaboh bend bwaal ning bwaakaabumw budy mwa kwiitufweej kuleeh ni Taat iitut a mu diiwul.

17. I meej kaay matudy mwa kulek, ni bwabiny?

¹⁷ Teekel Yehow micim hamut a kukat bihak. Yehow i mulay neey: wiiyiiy kwiitwaakish cya kudy, bizang ni cyaab cya kushikat tut tuteek Bukaleng bwindiy ha cyaab cya kuuhal ni biikal ni shikacil uhehetangan ni mikenj yiwaakan yindiy. (Mis. 55:22; Mat. 6:33) Tut ni bwaal oobw mu meej, katwiin mwa kulang neey: bihak bidy mwa kwiitulam ni kwiitwaakish musangal a buyiil. Tudy bamanyik neey: mushind aakaabumw udy mwa kwiituhetesh diitalal dya biin-biin dya mu micim, i kulong lukat lwa Yehow.  (Fili. 4:6, 7) Ning tut mwa kusumb biit bivul, bikaam tumanyik biin-biin diib ni bukash bitudy mwa kukal naaby mudimw bwa kulam biit aaby. Tudy mwa kushaal beeyeleel teng bihak biitut eeny? Bikaam tuvuluk neey: Mawej ukaakaam bwa twiikal biin cisak bindiy bahahatul bihet bilengel mu mudimw indiy. Bwaal oobw bumvumvwiij neey: katwiinoh bend mwa kushaal mu diitanaj. Biin-biin katwiin bakat kwiikal bu sangwiilum udy mulek kukadil Yehow mudimw mu mushind mukumban bwa kwiikaley umw wa ku baan bindiy​—bwaal waakady mukat bikasakan bihak bya ha bulab ni kulekey kulond Yeez!​—Mark 10:17-22.

18. I luumw kaay lutam ni mabenesh biikal mwa kuhet baat biikal mwa kukooyel buyiil?

¹⁸ Baat bakookooyel biiyiiy kwiikal ni musangal ni luumw lwiilwiin lweeh—bwa dyakatook dya kukat ni kuhambidil Yehow buyiil! Baat boos bady ni diitakamin dya kushikat ha bulab, biiyiiy kwiikal ni musangal bwa kulam bulab bulengel oobw, cyaab ciwaakan cidy Yehow mwiibalongolweel bwa kushikat. Mu kalung kakeeh oomw, Bukaleng bwa Mawej, bwiiyiiy kulong bwa bulab ni biit byoos biikal bihyaabihy. Yeez wiiyiiy kuman myand yoos yibiih yidy Adam ni Eev bakaamish bwa kaay yiikaloh bend mu cisak cya Mawej. Yehow wiiyiiy kusangul miliyo ya baat bavul ni wiiyiiy kwiibakish mushind a kwiikalobw ni buumy buyiil ni makand ma nyeet mawaakan ha bulab bufutulul paradiiz. (Luuk 23:42, 43) Bumudy cituh cya ha bulab cya cisak cya bahambidil ba Yehow ciy kuuhal teng ni ku buwaakan, muut woos ukaakadil Yehow mudimw wiiyiiy kushaal muwaakan ni wiiyiiy kuhet ‘butumby ni buneem,’ ki mufundil Davih.—Mis. 8:5, NWT.

19. I biny bitudy mwa kulam mu meej?

¹⁹ Uw mwiikal mukacy mwa “baat bavul beeh,” wiiyiiy kutakamin myand yilengel yeeh. Mawej i mu kukat; ni i mukat bwa wiikal mwiin mu cisak cindiy. Nook, long myand yoos yidy mwa kumusangeej. Iikal ni milay ya Mawej mu meej miibuh ni mu micim diifuk dyoos. Anyish dyakatook diwudy naady bwa kuhambidil Taat iitut a mu diiwul udy mwiitukat, ni kat mushind uwudy nend oow bwa kumwaakish lutumb buyiil!