1. Ni byahi ebikasa omwa bulengekania wukalengekania okwa byosi ebya Yehova abirihangika?

THUKABYA thukalengekania okwa byosi ebya Yehova abirihangika, ithwangana yowa ng’omuhandiki w’esyonyimbo ya Dawudi, oyuwasaba athi: “Omughulhu ngasamalira olhubulha lhwawu, omubiiri w’eminwe yawu, n’omukera n’esyongununu, ebyo wabirihira aho wabyo; ko mundu niki kwehi? Wuthi wukamwibuka kwehi? N’omwana w’omundu niki kwehi? Wuthi wukamulembera kwehi?” (Esy. 8:3, 4) Nga Dawudi, ithwangana samalira akanya kake buyira ako thwikereko omwa buhangwa bwosi neryo ithwasweka eribya Yehova inianathwibukire. Aliwe ngoku thunemwendi lhangira, Yehova mwathasubulira okw’itsomana lisa abandu b’erimbere, Adamu na Eva, aliwe kandi mwabahira omw’ihiika liwe.

2. Yehova aby’awithire abaana biwe ab’erimbere ab’okwa kihugho b’ekighendererwaki?

² Adamu na Eva babya baana ba Yehova ab’erimbere okwa kihugho, kandi Yehova yuwabya Thatha wabu w’elhubulha ow’olhwanzo. Mwabaha omubiiri w’erikolha. Nyamuhanga mwababwira athi: “Mubuthe mukanyirire, musulhaye ekihugho, mughondayekyo.” (Enz. 1:28) Babya b’eributha abaana n’eritsomana ndeke ekihugho, obwikalho bwabu. Adamu na Eva ku babya bowa bakakolha ekya Yehova abugha athi bakole, ibo n’abaana babu bangabere omw’ihiika lya Nyamuhanga kera na kera.

3. Busana naki ithwabugha thuthi Adamu na Eva mubahebwa omwanya w’ekitsumbi omw’ihiika lya Yehova?

³ Adamu na Eva babya bawithe omwanya w’ekitsumbi omw’ihiika lya Yehova. Ngoku kiri omwa Abaebrania 2:7, e Biblia yikabugha bino okwa mibere Yehova ahangikiramo omundu: “Wabirimuyira mo muke oko bamalaika . . . wabirimusingya omo  lhukengerwa n’erisikya ly’omwami.” Ni kwenene, abandu mubathahebwa obuthoki, amenge, n’amaaka ebyingene n’eby’abamalaika. (Esy. 103:20) Nomwabine, Yehova abiribasingya [eribambalya embitha] omo lhukengerwa n’erisikya ly’omwami. Wanamalhangira! Omo kwenene Yehova mwaha ababuthi bethu b’erimbere b’enzuko eyuwene.

4. Ni kyahi ekyabya oko mwanya wa Adamu na Eva omw’ihiika lya Yehova, kandi omo mwatsi ono thukendi kania okuki?

 ⁴ Eky’obulighe, Adamu na Eva mubaherya omwanya wabu omw’ihiika lya Yehova. Eki kyabirilethera abaana babu ebitsibu ebikalire, ngoku thukendi lhangira omo mwatsi ono. Aliwe ekighendererwa kya Yehova sikirikyathahinduka. Anzire abandu abowa ibabya baana biwe kera na kera. Thuthatsuka erilebya ngoku Yehova abirithuha ekitsumbi. Enyuma waho, thukendi kania okwa bya thwanga kolha lino erikangania ku thwanzire eribya omw’ihiika lya Nyamuhanga. Erighunzerera, ithwalhangira emighisa eya baana ba Yehova ab’okwa kihugho bakendi syatsemera kera na kera.

5. Thwanga sikya thuthi Nyamuhanga busana n’erithuhangika omo kisosekanio kiwe?

⁵ Yehova mwathuha ekitsumbi omw’ithuhangika omo kisosekanio kiwe. (Enz. 1:26, 27) Kundi thuhangikirwe omo kisosekanio kya Nyamuhanga, thwangana kulha-kulhania n’erikangania emibere yiwe mingyi mibuyanga, ng’olhwanzo, erighanyira, obuthaleghulha, n’erithunganene. (Esy. 86:15; 145:17) Thukabya thukakulha-kulhania emibere ng’eyi, thukaha Yehova y’olhukengerwa n’erikangania ku thukamusima. (1 Pet. 1:14-16) Thwamabya n’emibere eyikatsemesaya Thatha wethu w’elhubulha, thukatsema kandi ithwayowa ndeke. Kandi Yehova abere akathuhangika omo kisosekanio kiwe, mwathuha amaaka aw’eribya ithwanganabya bandu abo anzire omw’ihiika liwe.

6. Yehova mwaha athi abandu b’ekitsumbi akatheghekania ekihugho?

⁶ Yehova mwathutheghekera obwikalho bw’embaghane. Kera athali ahangika omundu w’erimbere, Yehova mwatheghekera abandu b’ekihugho. (Yobu 38:4-6; Yer. 10:12) Kundi ni muyitheghererya kandi mwenge, Yehova mwahangika bindu bingyi ebyuwene ebyanga leka ithwatsema. (Esy. 104:14, 15, 24) Ihakanayira, iniaghanirya okwa by’abirihangika, ‘n’erilhangira ko byuwene.’ (Enz. 1:10, 12, 31) Mwaha abandu b’ekitsumbi akabaha ‘erithabalha’ okwa bindu byosi ebyuwenenga ebiri okwa kihugho. (Esy. 8:6) Nyamuhanga anzire abandu abahikene ibabana etseme ya kera na kera ey’eritsomana ebihangikwa ebyuwenenga ebi. Wukanasima Yehova mughulhu wosi busana n’omulhaghe mubuyanga oyo?

7. Ebiri omu Yosua 24:15 bikakanganaya bithi ngoku omundu awithe obughabe bw’eriyithwiramu?

⁷ Yehova abirithuha obughabe bw’eriyithwiramu. Thwangana yisombolera ebya thwanzire erikolha omo ngebe. (Soma Yosua 24:15.) Amaaka w’eriyisombolera ayo akahulhawamo obughabe bw’eriyithwiramu. Nyamuhanga wethu w’olhwanzo akatsema thukathwamu erimukolera. (Esy. 84:11; Emi. 27:11) Thwangana kolesya ndeke obughabe bwethu bw’eriyithwiramu omo nzira nyingyi. Thalengekania okwa ky’erileberyako ekya Yesu ahiraho.

8. Ni nzira yahi nguma eya Yesu akoleserayamu amaaka wiwe w’eriyithwiramu?

⁸ Thwangana gherererya eky’erileberyako kya Yesu omw’ithwamu erihira ebiyithawa by’abandi embere okwa byethu. Kiro kighuma, Yesu n’abakwenda biwe babya ibabirilhuha kutsibu neryo bamaghenda eyithe bandu eyo babya bakalengekania bathi bakendi lhuhukira. Aliwe mubithabya bithya. Endeko y’abandu muyabeyayo, kandi ibanzire Yesu  iniabakangirirya. Aliwe Yesu mwathayiponera. Omwakanya k’ekyo, mwakwira abandu b’obulighe. Neryo Yesu mwakolhaki? ‘Mwatsuka erikangiriryabo emyatsi mingyi.’ (Mk. 6:30-34) Thukabya thukagherererya Yesu omw’ikolesya endambi n’akaghalha eriwathikya bandi, thukaha Thatha wethu w’elhubulha y’olhukengerwa. (Mt. 5:14-16) Kandi thukabya ithukakanganaya Yehova ku thwanzire eribya omw’ihiika liwe.

9. Ni kyahi ekya babuthi batholere ibabya iban’ibukire?

⁹ Yehova abiriha abandu b’amaaka w’eributha abaana, kuthya n’olhukwamirwa lhw’eribakangirirya erimwanza n’erimukolera. Wamabya iwuli mubuthi, wukanasima ekihembo ky’embaghane eki? Nomwakine indi Yehova abiriha abamalaika b’ekitsumbi ky’ahighulhu, sibathahebwa olhusunzo lhw’eributha abaana. Ban’ibukire ekyo, abakalembera abaana batholere ibalhangira akaghisa ako mwa k’obughuli. Ababuthi babirihebwa olhukwamirwa, omubiiri owabuyirire ow’erilembera abaana babu ‘omw’ikungabo, n’erikangiriryabo, omw’ikangirirya ly’Omukama.’ (Efe. 6:4; Ebi. 6:5-7; Esy. 127:3) Eriwathikya ababuthi, ekithunga kya Nyamuhanga kyabirihulhukya emyatsi mingyi eyiseghemere okwa Biblia, ng’ebitabu, esyovidiyo, omuziki, n’emyatsi okwa muthahulha. Ahathe erithika-thika, Thatha wethu w’elhubulha na Mughalha wiwe bakalhangira abaana bethu mwa b’obughuli. (Lk. 18:15-17) Omughulhu ababuthi bakayikethera Yehova n’erikolha ekyosi-kyosi ngoku banga thoka erilembera abaana babu, Yehova akatsema. Kandi ababuthi ng’abo bakaha abaana babu amaha w’eribya baghuma b’okw’ihiika lya Yehova kera na kera!

10-11. Ni kyahi ekya Yehova abirileka ikyathokekana okw’ithwe erilhabira omwa ndongolya?

¹⁰ Yehova mwahayo Mughalha wiwe ow’obughuli bunene nuku thwanga thasyabya omw’ihiika Liwe. Ngoku kikanibweko omwa  nungu 4, Adamu na Eva mubaherya omwanya wabu omw’ihiika lya Yehova, bamaherya n’omwanya w’abaana babu. (Abar. 5:12) Adamu na Eva mubakighenderera erithendiowa Nyamuhanga, neryo mubabya ini b’erilhusibwa omw’ihiika liwe. Kandi ibbwa abaana babu? Omo lhwanzo Yehova mwahiraho endegheka ey’erileka ikyathokekana okwa baana babu abowa erihirwa omw’ihiika liwe. Mwakolha eki erilhabira omwa kihongo kya Mughalha wiwe Ekyusa, Yesu Kristo. (Yn. 3:16; Abar. 5:19) Busana n’ekihongo kya Yesu, abandu 144,000 abathaleghulha babiriyirwa mwa baghalha ba Nyamuhanga.​—Abar. 8:15-17; Erib. 14:1.

¹¹ Eryongera okw’ekyo, esyomiliyoni sy’abandi abathaleghulha banemukolha erisonda lya Nyamuhanga. Bawithe amaha w’eribya omw’ihiika lya Nyamuhanga enyuma w’erilengesibwa ly’erighunzerera okw’ihwererera ly’Emyaka Rukumi. (Esy. 25:14; Abar. 8:20, 21) Amaha ayo anali omwa bulengekania bwabu, nibya na lino bakahulha Yehova, Omuhangiki wabu, mo “Thatha.” (Mt. 6:9) Abakendi syalhubukibwa nabu bakendi syahebwa akaghisa k’eriminya ebya Yehova anzire ibakolha. Abakendi syaligha erighendera okwa busondoli bwiwe erighunzerera nabu bakendi syabya omw’ihiika liwe.

12. Ni kibulyo kyahi ekya thukayasubiraya?

¹² Ngoku thwamabirilhangira, Yehova abirikolha bindu bingyi eriha abandu b’ekitsumbi. Abiriyira abahakabibwa mwa baghalha biwe, kandi abiriha ‘ab’endeko nene’ amaha w’eribya baana biwe omwa kihugho kihya-kihya. (Erib. 7:9) Thwanga kolhaki lino erikangania Yehova ku thwanzire eribya omw’ihiika liwe kera na kera?

13. Thutholere ithwakolhaki eribya b’okw’ihiika lya Nyamuhanga? (Mariko 12:30)

¹³ Kanganaya ku wanzire Yehova omw’imukolera n’omuthima wawu wosi. (Soma Mariko  12:30.) Nyamuhanga abirithuha ebihembo bingyi. Ekighuma ky’okwa bihembo bikulhu-bikulhu ebyo w’amaaka w’erimuramya. Thukakanganaya Yehova ku thumwanzire ‘omw’ikwama ebihano biwe.’ (1 Yn. 5:3) Omw’ibughira Thatha wiwe, Yesu mwathulhaghira athi thuyire abigha, n’eribatizyabo. (Mt. 28:19) Kandi mwathuhana athi thwanzane. (Yn. 13:35) Yehova akendi syalhangira athi abakamwowa bakabya b’okw’ihiika liwe ery’ekihugho kyosi ery’abaramya biwe.​—Esy. 15:1, 2.

14. Thwanga kangania thuthi abandi b’olhwanzo? (Matayo 9:36-38; Abanya Roma 12:10)

¹⁴ Kanganaya abandi b’olhwanzo. Olhwanzo w’omubere mukulhu wa Yehova. (1 Yn. 4:8) Yehova mwakangania kwa thwanzire nibya isithuli thwamuminya. (1 Yn. 4:9, 10) Thukamugherereraya thukakangania abandi b’olhwanzo. (Efe. 5:1) Enzira nguma ey’okwa syonzira esyuwene kutsibu eyathwanga kanganiryamu ku thwanzire abandu ly’eribawathikya erigha oku Yehova endambi yikineho. (Soma Matayo 9:36-38.) Omw’ikolha ekyo, thukabaha akaghisa ak’eribya baghuma b’okw’ihiika lya Nyamuhanga. Omundu amabiribatizibwa, thutholere ithwalholha embere erimwanza n’erimusikya. (1 Yn. 4:20, 21) Eki mwamuliki? Ng’eky’erileberyako, thukamuyikethera. Thwamathendi yitheghererya ekiryaleka iniakolha kindu kirebe, isithwendi mulengekaniryamu nabi. Omwakanya k’ekyo, thukamuha ekitsumbi, erimulhangira ng’athulengire.​—Soma Abanya Roma 12:10; Fil. 2:3.

15. Ni bahi abo thutholere ithwaghanyira n’erikolera ebibuya?

¹⁵ Ghanyira abandu abosi n’eribakolera ebibuya. Thwamabya thwanzire eribya omw’abo abatholere eryahulha Yehova mwa Thatha wabu kera na kera, thutholere ithwaghendera oko Kinywe kiwe omo ngebe yethu. Ng’eky’erileberyako, Yesu mwakangirirya athi thutholere ithwaghanyira abandu abosi n’eribakolera ebibuya, nibya n’esyonzighu syethu. (Lk. 6:32-36) Hanganayira ikyathukalira erikolha ekyo. Kyamabya ikwa kiri kithya, thutholere ithw’igha erilengekania n’erikolha nga Yesu. Thukabya thukakolha ngoku thwanga thoka eriowa Yehova n’erigherererya Yesu, thukakanganaya Thatha wethu w’elhubulha ku thwanzire eribya omw’ihiika liwe kera na kera.

16. Thwanga theya thuthi erina ly’erihiika lya Yehova?

¹⁶ Theghaya erina ly’erihiika lya Yehova. Omw’eka, ni kya buli kiro omwana mulere erigherererya mukulhu wiwe. Omwana omukulhu amaghendera okwa misingyi ye Biblia omo ngebe yiwe, iniakendi hiriraho mulere wiwe eky’erileberyako kibuya. Omwana omukulhu amathwamu erikolha ebithuwene, omulere iniangana kwama eky’erileberyako kiwe kibi. Kwa bine bithya n’omw’ihiika lya Yehova. Oyuwanabya Mukristayo muthaleghulha amasa mw’amalengekania w’eriyisamambulha okw’ikirirya kutse erithwamu erisangira omo by’obutswatswa kutse engebe y’obuthebya, abandi ibangana lengwako ibanza erimuyiyungako omw’ikolha ekibi. Abakakolha ebi bakatsandaya erina ly’erihiika ly’abaramya ba Yehova. (1 Tes. 4:3-8) Thutholere ithwayihighulha okw’ikwama eby’erileberyako ebithuwene n’erithendi lighira ekyosi-kyosi erithusegherya haali oku Thatha wethu w’elhubulha ow’olhwanzo.

17. Ni malengekania wahi agho thutholere ithwayihighulhako, kandi busana naki?

¹⁷ Yikethere Yehova butsira ebindu by’ekinyamubiri. Yehova akalhagha athi iniakendi thuha ebyalya, eby’eriambalha, n’ah’erikalha thwamatsuka erisondya Obwami bwiwe n’erighendera okwa bihano biwe ebithunganene. (Esy. 55:22; Mt. 6:33) Thun’ibukire ekyo, thukayihighulha oko malengekania w’eribugha indi ebindu by’ekinyamubiri ebya kihugho kino kikaha bikendi thuha obutheya n’etseme ya kera na  kera. Thunasi ngoku enzira nguma ey’eribaniramo obuholho b’okwenene ly’erikolha erisonda lya Yehova. (Fil. 4:6, 7) Nomuthwangabya ithwangana thoka erighulha ebindu bingyi, thutholere ithwalebya kwenene nga thunawithe endambi kutse akaghalha ak’erikolesya ebindu ng’ebyo n’eribisugha. Mbwino ithuthayisanga ithwabiryanza kutsibu ebindu byethu? Thutholere ithwabya ithunibukire ngoku Nyamuhanga abirithuha omubiiri omw’ihiika liwe. Ekyo kikamanyisaya kithi isithwaligha erilengemeribwa. Ahathe erithika-thika, sithwanzire eribya ng’omulhwana oyuwaghana akaghisa k’erikolera Yehova kuthya n’ak’eriyirwa mwa mughuma w’okwa baghalha biwe habw’erithanza kutsibu ebindu bike eby’ekihugho!​—Mk. 10:17-22.

18. Ni kitsumbi kyahi kinene n’emighisa eyo abowa bakendi syatsemera kera na kera?

¹⁸ Abandu abowa bakendi syatsemera ekitsumbi ekilengire kutsibu​—olhusunzo lhw’erianza Yehova n’erimuramya kera na kera! Abawithe amaha w’okwa kihugho nabu bakendi syatsema bakuwania ekihugho kibuyanga ekya Yehova atheghekanaya ndeke eribya bwikalho bwabu. Obwami bwa Nyamuhanga bukisiya ibuwania ekihugho n’ebyosi ebiriko. Yesu akendi syaghunzaho ebitsibu ebya biribanika busana na Adamu na Eva erithwamu erilhua omw’ihiika lya Nyamuhanga. Yehova akendi syalhubukya esyomiliyoni sy’abandu n’eribaha akaghisa k’engebe y’erikotha, ibanawithe amaghalha awuwene oko kihugho ekyabiribya paradiso. (Lk. 23:42, 43) Ekitsweka ky’okw’ihiika ly’abaramya ba Yehova eky’okwa kihugho kinemulholha okw’ihikana, obuli mughuma akendi syakangania “olhukengerwa n’erisikya” ebikanibweko omo Biblia.​—Ebr. 2:7.

19. Ni kyahi ekya thutholere ithwabya ithun’ibukire?

¹⁹ Wamabya iwuli mughuma w’okwa “ndeko nene,” wuwithe amaha mabuyanga. Nyamuhanga akwanzire; anzire iwabya omw’ihiika liwe. Neryo kolha ekyosi-kyosi ekya wanga thoka erimutsemesya. Ambi obuli kiro emilhaghe ya Nyamuhanga iyabya iyine omwa bulengekania n’omwa muthima wawu. Sima olhusunzo lhwawu olhw’eriramya Thatha wethu mwanzwa ow’elhubulha, n’erilhangira amaha w’erisyamupipa kera na kera mwa w’obughuli!